Ловья лым

Сибöтчис тулыс. Сылiс лым. Кушмисö ыббез. Сöстöм русö асывсянь рытöдз тыртiс шоррезлöн горöн боргöм, сьöдкайезлöн сьылöм да сьöдракаэзлöн карзöм. Сiя кадö и усис меным тöдвылам кöктоин. Охота лоис сёйны сыись керöм пирöггез. Быдöнныс, кинлö усьлiс кöть öтпырись сёйны кöктоиновöй пирöггез, натьтö, тöдöны, кытшöм нiя чöскытöсь, кöраöсь да бурöсь.

Дак вот... Кресення лунö босьтi ме сьöрам доз, асывсянь петi туйö.

Погоддяыс сулалiс кымöракодь, но зэрнытö эз думайт. Руалiс шоныт тöлок. Матiсь вöр бердсянь паныт вайöтiс шоналöм лыс дукöн, кöда сорлассис кушамöм ыббез весьтын аскодьöм уль му дуккöт.

Чожа мый ме кежи ыджыт туй вылiсь, пондi оськавны межа пöлöн. Кок увтын негорöн кышöтiс мöймуся кельдöтöм да косьмöм ни öнöдз турун. Басöк рöма бабыввез, дзик рöма цветтэз, быркайтiсö кадiсь кадö ме син одзын. Öнöдз нiя ештöмась саймыны ни. А вылын, ыб весьтын, енöжас öшалiс ыбшаррезлöн сöстöм да гора питиртöм.

Межа пöлöнняс кыссис паськыт ыб. Но сiя вöлi гöрöм эшö арсянь. Вежöртана, что кошшыны гöрöм му вывсис нем. Кöктоиныс сэтчö оз пет.

Иньдöтчи одзлань. Векнитик туёк, кöда кыссис чуклясьöмöн томыник кöзъя вöрöт, чожа мый петкöтiс менö мöдiк сэтшöм жö паськыт ыб вылö. Но и эстöн видзчисьöм сiя жö. Сiдз павжун вотöдз ме и вуджлалi ыб вывсянь ыб вылö: оськалi этöн каднас не öтiк километр ылына туйколас. Ыббес эта коста пантасьлiсö быдкодьöсь: гырисьöсь и поснитöсь, гажаöсь и гажтöмöсь. Кынымакö ны коласiсь вöлiсö нельки гöртöмöсь. Сэтшöм ыб кузя ме и ветлöтi быднёж, и доль, и поперег. Дышöтчытöг мышкыраси быд оськöв вылын, видзöтчи. Но мымда бы эг кошшись — быдöс весь. Кöктоинсö сiдз некысь и эг пантав. А быдöс сысянь, что медбöрья годдэзö ыббес вылö вель уна пондiсö петкöтны быдкодь удобреннёэз. А кöктоин, кыдз неколана турун, сымдасö оз радейт. Вот сiя и öшис миян муэз вылiсь.

Жаль меным лоис весись öштöм кадсö, но да мый эд керан. Керны нем. Надейтчыны одзлань тожö нем вылö. Сiдз простöй дознам и иньдöтчи ме бöр гортö.

Бертi веськытжык туй кузя. А öтiклаын, ыббес коласын, менчим туйöс поперегалiс паськыт да джуджыт кырас. Вöлi сiя важся ни. Вились кырöтöм местаыс некытöн эз тöдчы. Эз тыдав и тулысся ваэзöн нöбöтöм му. Не вевдöрсяняс, кырасыс пöлöн, не кырас пыдöсас, некытшöм вöр эз быдмы. Тöдчис, что гожуммезнас сiйö нельки ытшкывлöмась. Кыссис кырасыс лунвывлань. Этасянь и лымыс сэтчин тожö эз ни вöв. Осьта быд ладорсянь лунтырся шондiлö, сiя бытшöма вöлi сайöвтöм кöдзыт ойтöвсянь. Сiйöн öнöдз кырас пыдöсыс пондöм ни вевттисьны югыт-зелёнöй рöма лудöн, кöда, топ зу, тшöка мыччисьöм кельдöтöм турун коласöт. Этасянь быдсöн кырасыс мыччассис шонытöн да гажаöн.

Вель уна подöн ветлöтöмсянь сэк кежö ме тöдчöмöн мыдзыштi ни. Сэтчö жö и тэрмасьнытö одзлань вöлi некытчö. Кисим простöй дозöс ме сувтöтi кырас дорас. Ачым лэдзчиси сыкöт ордчöн.

Пукавны шоччисьöм могись кырас дорас вöлi долыт да бур: нельки вöрöтчыны охота эз вöв. Шоччисьтöнням ме дзир жагвыв нёджжаси öтмöдöрö. И эстöн меным син вылам усис мыйкö сэтшöм, не дивуйтчыны кöдалö некыдз эз позь. Öтiклаын, кырас пыдöсас, ылiсянь мыйкö бель видзис син одзын, топ кокнитик лым, нето пуж. И тыдалiс сiя тасянь не тшöтш му бердас, а дзик öшалiс лажмытика лэбтiсьöм турун весьтас. Меддивуйтаныс жö вöлi сыын, что эта öшалан торыс мыччассис ловьяöн. Кадiсь кадö сiя топ вöрöтчышалiс аслас местаын, ылiсянь вериктiс син одзын. Эта вöрöтчöм коста сылöн бель видзöмыс то кусышалiс недырик кежö, то вились югмывлiс бöр, то мыччасьлiс лöзвевьяöн, то вились чочкомöн. Вот загадка.

Мыйкö дырна ме видзöтi быдöс вылö вевдöрсяняс. Но мый сэтчин вöлi сэтшöмыс, ылiсянь сiдз и эг вежöрт. Сэк ме сувтi да жагвыв лэдзчи кырас пыдöсас, иньдöтчи сылань. Оськöв, мöдiк, куимöт сё матöжык сибöтчи бель видзан места дынö. Ачым эта коста сы бердiсь и син эг орöт. А кыным матынжык — сылöн кöвьясьöмыс тыдалiс сё бытшöмжыка да бытшöмжыка.

Но вот сибöтчи зэв. И сэк вöлись лоис быдöс вежöртана. Вöлöм эта не лым и не пуж, кыдз меным мыччассис вылiсянь видзöтiкö, а лымдорчача цветтэз. Лымыс эстiсь ештöм сывны кынымкö лунöн одзжык. И вот... Мед не сёрмыны да не сетны местасö кинлöкö мöдiклö, лымдорчачаэс сэтчö и лэбтiсьöмась. Цветтэс ештöмась оссьыны сымда, что быдöнныс öтлаын ылiсянь и былись вачкисисö кокнит лым нето пуж вылö. А вöрöтчисö нiя рамыник тöлоксянь, кöда кадiсь кадö руалыштлiс лунвыв ладорсянь кырас пыдöсöттяс. Этасянь меным и мыччассис сiдз, бытьтö лымыс ловья.

Панталöм картинасянь ме тöдчöмöн гажмыштi. Öнi меным эз ни думайтсьы, что эта ылына туйколассö тали весь. Аслам дивуйтчöм коста нетшкöвтi сьöрам кынымкö цвет, жагвыв нiйö пуктi простöй дозам. Сiйöн сорöн и петi кырас мöдöрас да кокнита иньдöтчи гортö.