Павжун коста

Недыр мыйись эта бöрсянь челядь куимнанныс öтлаын кыссисö кырас пöлöн вывлань. Ыб дорас нiйö панталiс Гаврил Иван дедлöн пон Буско. Ачыс старик пукалiс неважын керöм шалаш одзын, тэчöм тшынас дынын, пöжалiс би вылын павжун кежас тшаккез — гоббез да рыжыккез.

— Но мый, кайит? — юалiс Иван дед, кöр пинялiссез, öтiк бöрсянь мöдiк, сибöтчисö шалаш дынö. Иван дед — кöдзись. Татчö сiя кайис эшö одзза лунас, мед не сулöтны пинялiссесö да аскадö лöсьöтны нылö удж.

— Кайим, — öтiк öмись горöтчисö паныт зонкаэз.

— Нем эд лосьö туй вылас?

— Эгö тай. Мешöк только вöлыс вылiсь кырассö вуджтöн уськöтлiм.

— Да кыдз нö лэбтiт?

— Лэбтiм тай. — Тшöканас öвтыштöмöн Витя мыччалiс ёртыслань, дзик горöтчис: «Вот Толикыс, сiя лэбтiс».

— А мый нö етша бригадирыс вöввесö мöдöтöм. Вель уна эд гöрöм муыс. Не петны ашын рыт кежö куимыслö лоас.

— А ми кык ой кежö и кайим.

— Сiдз нö дак... Сэк öнiсянь и шоччöтö вöввезнытö. Кадыс вот павжун ни лоö. — Кöдзись дзар керыштiс пуэс коласöт шондiыс вылö, кöда сэк кежö и былись лöсьöтчис сувтны веськыта.

— Мунам сэк юскисьны, — горöтчис Толя ёрттэслö, и челядь иньдöтчисö асланыс вöввез дынö.

Сiя кадö Витялöн Чалко да Мишалöн Дюттяныс — доддявтöмöсь, павжнайтiсö ни межа дорись сук турун коласын. Дзир Толялöн Рыжкоыс сулалiс эшö юскытöг пиняэзöн няридз коласын.

Кытчöдз Толя юскис межа дорын ассис вöв, сылöн ёрттэс ректiсö няридз вылiсь пиняэз да улыккез, лöсьöтiсö, мед павжун бöрсянь позис нiйö доддявны. Сэсся куимнанныс öтлаын вились сибöтчисö асланыс пестеррезöн кöдзись дынö, пуксисö би гöгöр, кинлö кыдз гленитчис, кыскалiсö, мый вöлi пуктöм гортсяняныс, пондiсö павжнайтны.

Толя сiдз масьтiс-сёйис картовка сора няньöн гряд вылiсь нетшкöвтöм луккез, что кыдз бытьтö этася чöскытжыкыс сы понда некöр да нем эз и вöвлы. Сыкöт жö ордчöн пукалiс Витя да турун сора няньнас юис бутылка понiсь йöв. И дзир öтiк Миша пукалiс быдöнныс дынiсь торйынмоз да бутылка понiсь йöвнас жö кылöтiс сöчöн вылын пöжалöм картовкаовöй шаньгаэз.

Но вот Толя кольччöм луккесö öтлаын няньыскöт дзимлялiс мешöкас бöр, вештыштiс сiйö дынсис, видзöтчöв-керис ас гöгöр, юалiс:

— А мыйлö нö, деда, татчö шалашсö керин?

— Мыля мыйлö? А узьнытö нö кытöн пондан?

— А избушкаас нето Зiпозас?

— Избушкаыс, зонö, таво киссьöм ни, а мöдöрас... Гажтöм тай мыйкö меным сэтчин да... — кöдзись мыйсянькö ловзисис ыш, лöньсис.

Стариклiсь баснисö кывзытöн Толя синйис, кытчö бы öшöтны сёяннас мешöксö. А кöр кöдзисьыс лöньсис, зонка одзлань юалiс:

— Киссьöм, шуан, деда, избушкаыс? А мöйму эшö дзонь вöлi, — син вылас усис кыдз бердiсь сöтöм ув. Зонка сувтiс, судзöтчис, öшöтiс ассис мешöксö эта ув вылö. Кöдзисьыс одзлань эз шыась. Сiя кыскис табак кисет, жагвыв пондiс каттьыны куритны.

Öнöдз Витя дзир кывзiс ны коласiсь баснисö. Но кытшöм зi поз йылiсь баитiсö кöдзись да сылöн ёртыс, да кыдз сэтöн позис узьны, сiдз нем и эз вежöрт. Зонка öшöтiс пестерсö öтлаö ёртыс мешöк дынö, юалiс:

— Толик, а мый сiя сэтшöмыс, зi позыс?

— Тэ разь он на тöд?

— Ог, конешно.

— Но адззылан кöр, дак сэк пондан тöдны. А öнi, челядь, ветлам тöдсасьны.

— Ки мунак нi? Эгö на менö колö, ме шашöт, — öмтырьяс пелитöм шаньганас горöтчис Миша. Сiя сувтiс коккес вылö, домавтöм пестерсö лажмытика кышалiс понуль бердö, уськöтчис ёрттэс сьöрö.

Челядь петiсö ыб дорö. Ыб саяс, паныта межа вылын, сьöд видзис лажмытик избушка. Сы дынö медодз и иньдöтчисö.

Избушкасö тшуплöмась важын ни да вевттöг. Кадсянь да васянь вöснитик потолочинаэс öнöдз ештöмась сiсьмыны. А таво тулыснас нiйö нырыштöм лымöн. Кынымкö потолочина шöрвиöнняс нельки чегöмöсь да понвывтчöмöн усьöмась пытшкас. Дранечись керöм лажмытик наррезся интереснöйыс избушкаас нем эз адззись, сiйöн челядь сы дынiсь чожа мунiсö бöр. Межа дорöт оськавтöн нiя кадiсь кадö сувтчышалiсö льöмпуэз дынын, кöдна эстöн, дзик натодиль садитöмöсь, пантасьлiсö вель уна. А льöмыс, воöм ни сэк кежö, сырк-сырк öшалiс быд льöмпу вылын. Сымдасö и кольнытö вöлi жаль, и сёйнытö некöр. Быдöскöт колiс ештыны тöдсасьны, а медöддьöн — зi позсö ештыны видзöтны.

Межа дорöттяс оськавтöн челядь видзчисьтöг петiсö кытшöмкö туй вылö. Сiя пондöтчис тшöтш ыб дорсяняс и волькыт да гажа местаöт, кыдз югыт коридор, кыссис веськыта пыд вöрас.

Толя, кыдз казялiс оссьöм коридорсö, содтыштiс оськöввесö, петiс одзлань.

— Тэ кытчö, Толик?

— Локтö. Часöт адззылат.

Витя да Миша лöньсисö. Кыкнанныс пондiсö тэрмасьны ёртныс сьöрö. Недыр мыйись вöрыс чулалiс. Зонкаэз петiсö кушин вылö. Ны одзын оссьöм картинасянь Витя да Миша медперво нельки повзьыштiсö.

Кушин шöрас, пöрöм заплод сайын, сулалiсö кык ыджыт, важ да пуста керку. Раматöм, стеклотöм да пиньласьöм, неыджыт öшыннэзöн, топ писькöтлöм синнэзöн, нiя нёштöма видзöтiсö паныт челядьлö, дзик горзiсö да норасисö асланыс гажтöм олан вылö. Гöгöр вöлi лöнь. Дзир негорöн да полöмöн кышöтiс керку юр вылын ыскöвтöм дранеч увтiсь мыччисьöм симöт. Кысянькö пытшксяняс кадiсь кадö кылiс норöн виксöмöн да сыркьялöмöн дзуртышалöм. Эта небасöк шысянь недолыт вöлi сьöлöм вылын, кöдздöтiс вывтыр.

Челядь вель дыр сулалiсö вöрöтчытöг. Нiя видзчисисö, что часöт кинкö мыччисяс паныт, сэтшöм жö нёштöм, гажтöм да полöтана, кыдз и асьныс керкуэс. Но чулалiс минута, мöдiк, а керкусис сiдз некин и эз мыччись. Сэк Витя оськöвтiс матöжык Толя дынö.

— Кывзы жö, Толик, мый эта сэтшöмыс?

— А Зiпозыс.

— Эта и эм, да?

— Но.

— Дак эта жö олан керку. А ме думайтi былись кытшöмкö зi поз.

— И ме тожö сiдз думайтi, — шыасис Миша ёртыс сьöрö. — А мыля сiйö сiдз шуöны?

— Кин сiйö тöдö. Баитöны тай Зiпоз, Зiпоз, а мыйсянь сiдз, сымдасö ме и ачым ог тöд. Иван дедлiсь колö юавны, висьталас, батi, тöдö дак... Но мый, пыралам пытшкöдззас, видзöтам.

— Ме даки ог, — негорöн шыасис Миша.

— Мый, повзин ни бöра?

— Эг да...

— Но и ась. Ми кыкöн вермам.

Толя да Витя жагвыв иньдöтчисö керкуэслань. Ёрттэс сьöрись кольччöмöнмоз сылань жö оськöвтiс и Миша. Но разьсьöм посöдз бердас зонка сувтiс. Пырны ёрттэс сьöрö пуста керкуас сiя, öткö, полiс, мöдкö, дышöтчис.

Кытчöдз Толя да Витя ветлöтiсö кытöнкö пытшкас, Миша öтнас бергалiс керку гöгöр, нёджжасис. Сэк сiя и казялiс, кыдз посöдз весьтын öшöтчöм жёлоб бердiсь нетшкöвтчис сырчик да саясис керку саяс. «Пöжсьöны, натьтö, кытöнкö», — думайтiс Миша, пондiс видзöтлыны жёлоб гöгöрсö. Чожа мый зонка казялiс дранеч увтiсь мыччисьöм турун тылöппез, кай гöннэз да поснит ёг.

— Челядь! Петö, мыйкö мыччала! — горöтчис Миша ёрттэслö.

Толя да Витя перыта мыччисисö öшынöт, öтдруг юалiсö:

— Мый сэтшöмсö?

— Кайпоз адззи.

— Кытöн?

— Вон жёлоб понас тыдалö.

Толя да Витя чеччöвтiсö öтамöд бöрсянь му вылö, сибöтчисö Миша дынö. И сiя кадö, кöр Толя сё эшö нёджжасис увтсяняс, Витя чылiс ни керку угöлöт вывлань. Вот сiя жёлоб увтас ни. Но кайпоз дынöдз перыта он шед. Дранеччес увтын коласыс сэтшöм учöт, что ки сэтчин некыдз оз тöр. Дыр мыйись Витя кисö сё жö сюйыштiс. Но эшö кайпозыс бердö сибöтчытöдз зонка павкис чуннезнас мыйкö чорыт да кöдзыт бердö.

— Челядь, мыйкö адззи!

— Мый?

— Кöртовöй мыйкö кылö.

— Но кыскы, кылö дак.

— Ог вермы. Некыдз киö оз тöр. — Витя вились пондiс борсьыны. Медперво сiя кыскис да чапкис ёрттэс вылö кытшöмкö важ да сiсь рукляэз. Зонкаэз вешшыштiсö бокö. Но вот ёрттэс увья мыйкö сайöвтöмöн Витя чеччöвтiс увлань, перыта бергöтчис нылö паныт, горöтчис:

— Руки вверх!

Толя да Миша медперво и былись паймыштöмöсь, дивуйтчöмöн видзöтiсö адззöм тор вылö и эз вермö веритны асланыс синнэзлö. Витя киын вöлi наган, настоящöй наган.

— Вот этö да-а-а, — дыр мыйись горöтчис Миша. Куимнанныс чукöртчисö öтлаö. Öнi челядь вуджöтлiсö адззöм торсö киись киö, бергöтлiсö, видзöтiсö быд ладорсянь, дивуйтчисö, мымда вермисö. Кайпоз йылiсь некинлöн и дума эз ни вöв.

Наганыс жёлоб коласас куйлöм важын ни. Сiя ёна ештöм сiмны. Медперво нельки курокыс эз ветлы. Сэтчö жö и барабаныс вöлi нач простöй, нельки öтiк патрон эз вöв. Но адззöм торыс гажöтiс быдöннысö, сiдз кыдз эта вотöдз настоящöй нагансö челядь эшö и синöн эз адззывлö.

Кватитчисö зонкаэз, кöр кадыс вöлi уна ни. Витя юалiс:

— Кывзö жö, а кытчö ми öнi сiйö пондам воштыны?

— Дзебны кытчöдз колö, а сэсся гортö лэдзчöтам, — горöтчис Толя. Эта вылын челядь и баитчисö.