Глава V

Одз асывнас Пестеров вайöтiс автомашинасö горт öшын увтö. Тоня вились пуксис кабинаö, вöрзьöтчисö одзлань. Гортö шедöмись öнi нывка эз ни пов. Шордын посёлокыс сулалiс тшöтш туй бердас, ордйыны сiйö некыдз эз позь. Сiдзкö, местаöдз сё ни вайöтасö. Öнi нывкалö вились усис тöдвылас босьтöм телеграмма. Сэтшöмыс эта вотöдз эшö эз вöвлы. Эта вотöдз сылö гижлiсö дзир письмоэз. Частожыксö гижлiс сойыс, шочыника, кыкись-куимись год пытшкас, вовлiсö письмоэс мамыссянь. Ныын и юассис-висьтассис быдöс йылiсь.

Телеграммаас нем полöтанаыс и эз вöв юöртöм. Но сiя ачыс ни мыйöнкö полöтiс, тшöктiс думайтны, мый сэтчин вермис лоны. Этасянь, кыным матöжык сибöтчис нывка гортлань, сыным вынöнжык пелитчисö сы юрö быдкодь гажтöм думаэз. Думайтсис, что гортын кöдакö аймамыс коласiсь то ли пондiс шогавны, то ли ештiс доймыны. Уджавтöнняс быдöс вермас лоны. Но эз кö нiя юöртö эта йылiсь веськыта, дак сiйöн дзир, мед не повзьöтны одзлань гажтöм юöрнас.

Луншöрпöра автомашина вöлi Шордынын. Посёлок бердас ни нывка висьталiс, кыдз буржык кежны ны керку дынöдз. Тöдса öшын увтын сувтiсö. Тоня, кöда эта вотöдз öддьöн видзчисис гортö локтöмсö, öнi дзик кынмис аслас местаын. Кылiс мыйöнкö нывкалöн сьöлöмыс, что гортiссезкöт пантасьöмыс нем бурсö оз кöсйы. Но воштiсьнытö вöлi некытчö, кабинасис ковсис петны. Сьöкыт сумканас, позялöм коккес вылын нывка лэдзчис улö, кабина ыбöсоксö пöднавтöдз Пестеровлö горöтчис:

— Пырав шонтiсьнытö. Кынöмыт эд, натьтö, сималö.

— Спасибо, Тоня, некöр: ректiсьны и грузитчыны колö.

— Но видзчисьышт сэк. Ме часöт Лизаыслiсь паськöмсö бöр петкöта, — нывка перыта иньдöтчис керкулань.

Эта коста жö кылiс ыбöслöн горöн дзуркнитöм, посöдзас мыччисис кузь чикися, ён вывтыра да чож нывка. Эта вöлi Тонялöн томжык сой — Людмила. Öтiк платьеа да гортся тапочкаэза, сiя уськöтчис паныт, öшöтчис Тонялö голя бердас.

— Здравствуй, Тонька! Локтiн? Вот и бур. Вай жö отсала, — Людмила босьтiс сойыс киись сумкасö: — О-хо, сьöкыткодь эд, видзöт жö. Мый тэ сэтчин сымдасö тöбалiн? — сойсö лэдзис одзлань. Ачыс, вевдöрись поспу вывсянь ни, дзар керыштiс автомашина ладорö, дзик горöтчис: но мый пö тэ эшö сэтöн видзчисян? Верман пö мунны — саясис ыбöс саяс.

Мый медодз усис Тонялö син вылас, дак этö Людмила сойыслöн гажа настроеннёыс. Этасянь нывка недырик кежö вунöтiс аслас гажтöм думаэз йылiсь, пондiс чöвтчыны.

— Тонька, кысь нö тэнат сэтшöм пальтоыс? Ачыт небин? Кыдз купчиха пасьтасьöмыт. И пимиэс тожö тöдтöмöсь.

— Да чöв тэ... Мыйöн ме эшö сэтшöм пальтосö неба? Туй вылас тай, гортöдз локны, сетiсö. Часöт шофёрыскöт колö бöр ыстыны, — Тоня кышыштiс кокас тапочкаэз, везтiс юр вылас шаль, пальтонас да пимиэзнас киас петiс.

Дыр мыйись нывка пырис бöр. Но сiя, мый часöт лоис сыкöт öтöрас да мыйсянь пымйöтлытöдз вирсялiс чужöмыс, керкуас пыртöдз чулавнытö эз ешты. Чужöм вылас вежсьöмсö сойыс и казялiс.

— Мый тэкöт лоис сэтшöмыс?

— Нем...

— А мый нö сы дырна öтöрас керин?

— Дыр разь? — Тоня кылiс, кыдз сойыс кыввезсянь рожабаннэс пондiсö вирсявны эшö öддьöнжык.

Тоня лажмытжыка мышкыртчис аслас сумка весьтö, пондiс кыскавны сыись вайöмсö. А Людмила чöлöмöн сё эшö сулалiс ордчöн, видзчисис, мый горöтчас сойыс сы кыввез вылö. И кöр ны коласын чöлöмсö одзлань кыскыны эз ни позь, Тоня шыасис:

— Деньгасö тай вайöтöмыс понда пондылi сетны...

— Сэтшöм томыслö? Да сылö деньгатöг колö нывкаэсö кыскавны. Ме бы тэ местын некытшöм деньга сылö эг сет.

— Кин нö тэнö весь кыскавны пондас?

— Мыля нö озö? Ме бы кыдз чикыртыштi синнам, кöть кин бы кыскис, — мыччалöм могись Людмила сэтöн жö чикыртыштiс перво öтнас, сэсся мöд синнас, бытьтö сы одзын сулалiс не пöрисьжык сойыс, Тоняыс, а и былись кытшöмкö том шофёр.

— Людка, тэ кöть думайтан жö, он, мый баитан?

— Фи! Тэ ачыт локтiкат öтпырись, шу, эн и чикыртышт сылö синнат? Мыля нö сэк деньгасö эз босьт?

Дзир неважын Тоня вуджис горт порог. Сойыскöт пантасьöм бöрсянь дас минутася унажык эз чулав. Эта коста нывка нельки эз на ешты тöдны видзчисьтöм телеграммалiсь причина. Но Людмилалöн горöтчöм кыв вес то ли сотiсö, то ли кынтiсö сылiсь сьöлöмсö. Нiя сулалiсö паныт, оськöв ылына öтамöд дынсянь. Чикыртöм синнэзöн, тыра да вира тырппес вылын бöб шынньöлöн, Людмила сё эшö видзчисис, мый горöтчас сойыс сы юалöм вылö.

Тоня дивуйтчöмöн видзöтiс сойыс вылö, думайтiс: «Эта мый сэтшöмыс? Позьö я сымдасö примитны ылöстöм кадся шутитöм вылö?» Но сы одзын сулалiс не нылочка-челядёк, а дассизимгодся, ён кикока, сысся тыражык мороса, мичажык чужöма нывка. И думайтны кö сы басни сьöртi, сiя талун ни лöсьöтчис унаöн одзавны ассис пöрисьжык сойсö. Ответыс местö Тонялö охота вöлi косьöвтны-вачкыны сы шыннялан тырппез кузя. И вöв ны коласын эта басниыс öтлаын овтöн, нывка, натьтö бы, сiдз и керис. Но сiя бертiс гортö дзир гöститöм могись и лэбтыны грехсö медодзза жö лунö вöлi небасöк.

Тонялiсь чöлöмсö Людмила вежöртiс ас мознас.

— Аха-а, чöлан! Сiдзкö, сiдз и эм.

Баитны одзлань сойыскöт Тонялöн охота öшис. Нывка чöлöмöн нёджжасьöв-керис öтмöдöрö, жагвыв оськöвтiс залö.

Эстöн, кыдз и одзжык, быдöс вöлi ас местын. Ыбöс бердсянь шульгаланьын — диван. Веськыта джодж шöрас — гöгрöса пызан да нёль стул. Шульгаланись угöлын, тумбочка вылын — радиоприёмник. Веськытлань стена бердöт эшö вит-квать стул. Но мый эз тырмы да сэтшöм перыта усис син вылö, дак этö пуовöй рамкаын айыслöн фотография, кöда пыр öшалiс паныт пыранiныслö, кык öшын коласын.

— Кытчö нö айöлiсь портретсö воштöмöсь? Тапочкаа коккезнас джодж кузя нёштöма гужгышалöмöн Людмила жагвыв сибöтчис порог бердöдз, косякыс бердö пельпоннас нырыштчыштöмöн, сувтiс. Тырппес вылын одззася кокнит шынньöла, сiя жмитыштiс пельпоннэзнас, дзик горöтчис: кысь пö ме тöда.

— А мыйлö меным телеграммасö сетiн?

— Мыля мыйлö? Тэ бытьтö он и тöд, что ашын праздник? Мамö тай тшöктiс, вот и сетi.

— А сiя оз шогав?

— Мыйсянь бы? О-оз. Уджалö да.

— А айö?

Эстöн вöлись Людмила дивуйтчöмöн лэбтыштiс сойыс вылö синнэсö: тэ пö мый, кöдö оз ков, юасян? — паныт горöтчис:

— Тэ разь сё эшö он тöд? — А мый сэтшöмыс?

— Дак сiя жö чапкис миянöс. Вежöртан, он? Месяц ни, кыдз нiя мамöкöт янсöтчисö. Мунiс сiя миян дынiсь, — басниыс коста Людмила вуджис порог омöнняс сойыс ладорö, сувтiс паныт.

— Кыдз янсöтчисö?

— А сiдз вот... Мунiс тай.

— Айö мунiс? Гортiсь?

— Тэ сiйö эшö айöн шуан, немортсö? Да ме сыкöт, пантасяс кöр кытöн, дак и здоровайтчыны ог думайт, вот!

Тоня син одзын керкуыс пондiс пемдыны, гажтöммис, кöдзалiс. Нывка зэвжык каттьыштiс бердас шаль — чужан лун кежö айыссянь медбöрья козин — жагвыв лэдзчисис диван вылö. «Дак вот мыйын телеграммаыслöн причинаыс — айö мунiс гортiсь». Жагвыв, чöлöмöн Тоня гогинялыштiс юрнас. Синнэсö мыйсянькö пондiс курöтны.

Людмила казялiс, что сойыс сылiсь баснисö оз кывзы, сибöтчис матöжык диван бердас.

— Тэ эшö горзан? Адззöмыт тожö мый понда. Но мунiс и мун, абу жаль. И сытöг олам. Эшö буржыка. Бур бы вöлi ай, дак некöр бы сiдз эз кер. Мый ми сысянь бурсö адззылiм? Ме сымда и тöда — вексö мамöс, кинкöт колiс и эз, вежöктiс.

Людмила баснисянь сьöлöм вылiсь шогыс сорлассис зорамöм лöгкöт. Нывка гажтöма ыш ловзисис, öвтыштiс сöдзöм синваэсö.

— Людка, тэныт абу и стыд айö йылiсь йöз баснисö баитны? Юрнат мыйкö думайтан жö, он? Сё эшö асьтö челядёкöн лыддян?

— А мый, шу, эшö не сiдз я мый я? Ачыс вексö кинкöткö кыскасис, а мамöс вежöктiс.

— Стыдтöм! Думайтышт кöть невночка, кин йылiсь да мый тэ баитан! Кысь тэ тöдан?

— Мыля нö ог? Мамö эд висьталiс. Да и кытшöм сiя меным эта бöрсянь ай, шатласись поныс. Сэтшöмсö ме айнас ог и лыддьы. — Ачыт тöдан. Ась и тэ моз. Но он кö тэ куж думайтны ачыт — йöз баснинас эн баит. Вежöртiн? Ме тэнö сэсся ог кывзы. Кинкö, батi, кыскасис, а айö уджалiс.

— Дак тэ мый, айыт дор сувтан?

— Не тэ дор жö, ылöстöмыс дор.

— Но бур сiя тэнат öддьöн, дак сы дынö и мун овнытö, абу жаль. Ми мамöкöт и öтнаным олам.

— Кутю тэ, кутю. Но чöв. Эдö на эшö олö. Видзöта вот ме, кыдз тi сытöг пондат овнытö, — Тоня мöдiс горöтчыны мыйкö одзлань, да казялiс, что ылööв пырисö кык сой баснинас, лöньсис. Эта коста посöдзас кылiсö тöдса оськöввез, гортö бертiс мамныс.

— Тонюша? Тэ гортын ни. Бур, что локтiн. Öтпырись кöть отир моз öтлаын праздниксö чулöтам,— порог увтас Ольга Сергеевна чöвтiс вывсис каракулевöй пась, сувтiс зеркало одзö, пондiс сынасьны. Эта вöлi шöрöт вывтыра, волькыт кикока, гöгрöса пельпона да лöсьыт чужöма, топ вочöтöм акань, инька, кöдна йылiсь отирыс баитöны: полокаласö вочöт — и сё басöк лоас. Кöть Ольга Сергеевналö вöлi нёльдас саяс ни, сетны сылö сымдасö эз на позь. Мый уж мый, но ассис том кадся лöсьытсö кужöма видзны öнöдз. Волькыт рожабаннэс, кöдна вылын чукыррес абу на ештöмöсь адззыны местасö, кыдз даскыкьямыс годсялöн, сё эшö öгралiсö мича рöмöн. Невеста ныввес коласын сiйö чожажык позис примитны пöрисьжык сой местö.

Кыдз только Ольга Сергеевна вуджис порог, Людмила сэк жö и чепöссис паныт мамыслö. Тоня, кöдалö бы колiс керны этö сойысся одзжык, дзик домалöм, кольччис пукавны местаас. Но мамыс этö бытьтö эз и казяв. Зеркало одзас малалыштiс тыра мороссэсö, боккесö, сибöтчис, пуксис пöрисьжык нылыс бокö.

Мамыс бöрсянь и Людмила пиньлалыштiс зеркало одзын синнэсö, малалыштiс чур видзан мороссö, сэк вöлись сибöтчис öтлаö, гырдззанас мамыс пельпон вылö нырыштчыштöмöн, сувтiс.

Тоня видзчисис, что мамыс часöт ыш ловзисяс, зубыт шогöн сьöлöм вылас пондас висьтасьны, мый вöтiс оланас нылiсь семьясö. А Ольга Сергеевна видзöтыштiс ныввес вылö, горöтчис:

— Но мый тiянкöт, ныввез, пондыны кернытö? Видзöта вот ме, видзöта тiян вылö и аслам синнэзлö ог верит, что тi менам сэтшöм гырисьöсь ни. Вот и думайта — пöрисьтат тi мамнытö, ой, кыдз пöрисьтат. Одзöв сё жö вайсьöм тiянöс, одзö-ö-öв. Тöдны, тöдны бы одзлань кежö... Но кытчö тi сiдз тэрмасят?

Тоня чöлiс, юрсö вывлань эз лэбтыв. А Людмила паныт шыасис:

— Сэтчин жö, мама, кытчö и тэ ачыт кöркö.

— Видзöт тэ менам, одза-одз... Кöть школасö кончит да вöлись жö сы йылiсь думайт. Вот кинöс миян колö медодз жöник саяс сетны, — Ольга Сергеевна недырик кежö пуктiс Тоня пельпон вылö кисö: — Сiя миян пöрисьжык и велöтчансö таво кончитас.

Дзик кöдзытсянь Тоня чутыртчыштiс вывтырнас мамыс павкöтчöмсянь, думайтiс: «Неужто сылö нем йылiсь этася мекöт баитнытö? Неужто абу и шог, что айö гортiсь мунiс? Тöдны бы одзлань, некöр абу и колöм локны гортö».

— Мама, — шыасис сэтöн Людмила сойыс. — Тоняыс эд айыс дынö овнытö мöдö мунны. Адззан, и öнi дзик немöй пукалö, оз и баит. Бытьтö ми тэкöт виноватöсь, что сiя миянöс чапкис.

— Мунас и ась мунö, некин сiйö оз видз. Кыкнанныт вермат мунны. Примитас я сiя тiянöс?

— Мама, ме эд Тоняыс йылiсь баита.

— Од тi сылö колö — не тэ, не Тоняыс. Колiт бы, дак сiдз бы эз и кер. А одзлань кежö баитчам — айныт йылiсь меным сэсся и кылiсь джынöн эд казьмöтö. Тырмас. Öнöдз ме сы увья кодя олансö эг адззыв, мыдзи. Талун праздник, а миян нем абу лöсьöтöм. Кутчам-ко вот стряпайтны. А сёрöнжык вермат мунны клубö. Нем тiянлö, невеста отирлö, йöв доззэзлö моз, гортын шöммыны.

Эстöн куимнанныс коласын басниыс и баитсис. Ольга Сергеевна чеччис, кежис узьлан жырö, мед вежны вывт.

Час кыным бöртi быдöс керöм-лöсьöтöмыс вöлi чукöртöм пызан вылö. Нельки шампанскöй вина бутылка, кыдз и одзза годдэзö жö, сулалiс пызан шöрын.

Быдöнныс пуксисö. Сибöтчис кад лэбтыны бокаллэз. И эстöн вöлись вежöртiсö, что вина бутылкасö осьтны некинлö. Сёрöнжык сiя сё жö вöлi осьтöм. Сэк казялiсö эшö öтiк нетырман тор: Виль год праздник кежö керкуаныс эз вöв ёлка, кöдö эта вотöдз быд год вайлiс да вочöтлiс ныввескöт Тонялöн айыс, Александр Михайлович. И ась öнi эта нетырман торыс праздниксö эз ни сувтöт, но тшыкöтiс вель ёна.

Кöр локтiс колана кад, Ольга Сергеевна лэбтiс бокал, дженытика горöтчис.

— Но, ныввез! Виль годöн! Гажöн да счастьеöн! Мамыс сьöрись и Людмила эз кольччы. Кыкöн чокнитчисö. И дзир öтнас Тоня вöрöтчытöг пукалiс пызан сайын, гажтöма видзöтiс паныта сулалан простöй стул вылö, дзик сё эшö кинöскö видзчисис.

— Тонюша, кут. Мый нö кольччин?

То ли этна кыввезсянь, то ли эшö мыйсянь, Тоня кылiс, кыдз мыйкö зубыта тасасис горшас, пондiс курöтны нырсö, синнэсö. Нывка вежöртiс, что кылöтны этö тасасьöм торсö винаыс оз ни отсав. Мамыслö паныт шыасьтöг сiя чеччис пызан сайись, мунiс узьлан жырö.