Асъя югытлö паныт

Город эшö узис, лöньöсь вöлiсö отиртöм улицаэз. Но асылыс сибöтчис ни. Ойся пемытыс, кыдз повзьöм, чöлöмöн лэдзис мусö аслас сывтырись да пондiс пышшыны. А асывся лöз рöмыс, сiдз жö шытöг да не тэрмасьöмöн, лэдзчисис кысянькö вылiсянь и, му бердас сибöтчöмöн, тыдавтöг пазалiс, югмис да паськалiс. И вот алöй рöма асывся скатын öтiк дорнас мыччисис гöрд гöглян.

Медодзза шондi югöррезкöт Степан Фёдорович чеччис постеляись, петiс посöдзö да пондiс кöмасьны. Эта коста чуть-чуть дзуркнитiс ыбöс, и Евлампия Матвеевна, баличаэсö сынавтöн, сувтiс порог дорас.

— Пенсинер, вились тай нö уджавны лöсьöтчан?

Степан Фёдорович лэдзис кисис джынысви каттьöм нямöтсö, лэбтiсьыштiс, шуис:

— Быль эд, квать боль. А ме и вунöтi. Вай, ноко, мыйкö инö мöдiкö пасьтавны.

Сьöд шевиотовöй костюмын, дöраовöйкодь басöк сера йöрнöсын, кытшöмöсь любитöны новйыны пöрись отирыс, Степан Фёдорович пуксис öшын одзö.

Город олiс одззася оланöн. Сибöтчис уджалан кад. Жöдзис быдöс ловьяыс улица пасьта. Тэрмасис öтмöдöрö отир. Сьöкыта, горöн урчитöмöн, ветлiсö автобуссэз. Сук бус кöвьясис да паськалiс туй боккезö — пуксис заборрез вылö, лякис пуэзлiсь зелёнöй листтэсö.

И только Степан Фёдоровичлö талун тэрмасьны вöлi некытчö. Медодзза лун, кöр сiя эз тэрмась сёйны, медодзза лун, кöр эз пет уджавны.

— Тэрмасьö, тэрмасьö. Тi эшö томöсь. А ме... — старик серöмтчыштiс, öтöрö видзöттöн. — Ме мыдзи, пöрисьми да и аслам уджöн шедтi ни, натьтö, аслым шоччисян кадсö.

Эта думасянь бур лоис сьöлöм вылас и вились чуть тöдчана шыннялöм вöрзьöтiс чужöм вылiсь чукырресö.

Кöр улицаын отирлöн визыв шор кодь мунöмыс пондiс чулавны ни, Степан Фёдорович пасьтасис да петiс гортсис. Тöнняся чорыт да перыт оськöввес талун эз ни тöдчö сы походкаын. Старик старайтчис не тэрмасьны. Шондiыс ёна эшö шонтiс, руыс вöлi кöс. Эз позь казявны сiйö пöдтан да коддзöтан дуксö, кöда овлö тулысöн быдкодь пу да турун цветитiкö.

Сквериккезын да парккезын мукöд пуэз пондöмась чапкыны ассиныс лист. Быдкодь рöмаöсь, кадiсь кадö нiя янсавлiсö уввез бердiсь да, руас дыркодь бергалöмöн, усялiсö песок вылас. Кусттэз коласын ытшкытöм туруныс увдöрсянь пондöм кельдöтны. Сибöтчис ар. Сiя ас мознас вöлi бур да гажа.

Öтмöдöрö нёджжасьöмöн Степан Фёдорович вельдыр ветлöтiс улицаэз кузя. Только павжун кежö шедiс сiя город шöрас. Эстöн, кыдз и пыр, вöлi уна отир. То öтiк, то мöдiк пантасьлiсö тöдсаэз. Быдыс юасис здоровье да олан йылiсь, мый вылö Степан Фёдорович эз на öбижайтчы. Ёрттэз поздравляйтiсö старикöс пенсия вылö петöмöн.

Босьтны эта лунö Степан Фёдорович нем эз думайт, но пыравлiс быд магазинö: охота вöлi тöдны, мый эм товаррез коласiсь. Пажнайтiс сiя столовöйын. Пажнайтiкас юис кынымкö кружка сур. Гортö локтiс рытъяввылас — гажа да мыдзöмкодь.

Сiдз чулалiс эшö кынымкö лун. А öтiк асылö, эшö ольпасьын куйлiкö, решитiс:

— Тырмас, натьтö, квать боль. Пöрисьувья ог я кö ме тшыксьыны мöд...

Эта лунö сiя пасьталiс уджалан паськöм да петiс сарайö. Эстöн, торья жырын, сулалiс верстак. Стена бердын, джаджоккез да туввез вылын, куйлiсö и öшалiсö быдкодь инструменттэз.

Лунтыр старик эз петав сарайсис: ныр увтас нузгöмöн-сьылöмöн мыйкö лöсалiс, стружитiс, пилитiс.

Гриша локтiс удж вывсянь, кылiс стукöтöмсö, пырис айыс дынö сараяс.

— Висьтав, ноко, мый ни бригадаас керсьö, — тшöктiс старик.

— Уджалам. Чожа виль керку пондöтам тэчны.

— Ме вот тожö уджала, — Степан Фёдорович качыкнитiс юрнас угöлын сулалан кöртзыррез, вилаэз да кураннэз вылö.

— Адзза, — шыннялöмöн шыасис паныт Гриша.

— А кин нö бригадасö босьтiс?

Гриша повзьыштiс эна кыввезсянь. Кыдз видзны ответсö айыслö, зонка эз тöд. Быдöс йылiсь ештiс думайтны, а вот эта йылiсь, кöть и думайтiс, но мылякö ачыс айыслö висьтавны эз лысьт. И вот... Минута етш Гриша думайтiс, но одзлань чöвны эз позь, а бöбöтчыны эз куж.

— Менö сувтöтiсö, — негорöн горöтчис зоныс.

— Вот кыдз, квать боль. Чожа айыт бöрсянь бригадирнас петiн, Бытьтö тэсся арталiсьжык некин бригадаас эз адззись. Чожа, чожа. Ме кöркö нёль год уджалi, медбы уджалiсьнас петны, вежöртан? Да мый тэныт баитны. Не сiя ни öнi кадыс, — ыш ловзисьöмöн горöтчис Степан Фёдорович да пондiс öктыны верстак вылiсь инструментсö.

Басниыс сэсся эз лöсяв. Гриша петiс. Сiя думайтiс айыс кыввез вылын, но некыдз нем эз вежöрт. И думаын эз вöв мыйöн-либо öбидитны стариксö, а вот öбидитчис.

«Не ачым эд корси. Сувтöтiсö кö, кытчö нö сэтöн воштiсьны. Не пышшыны жö эта понда бригадасис. Да и мый сэтöн умöльыс?» — думайтiс Гриша, керкуас пырикö.

* * *

Мунiс Гришалö двадцать пятöй год. Не лыддьыны кö зонкалiсь пымжык сьöлöмсö, кöда овлö том кадö быд мортлöн, то сiя быдöсöн вачкисьö айыс вылö кыдз кык ва воть. «Аслам вирыс сы жилаэзын котöртö», — гордитчöмöн баитлiс Степан Фёдорович, мунiс кö басни Гриша йылiсь. Учöтсянь зонка бура велöтчис школаын. Аймамыс син одзын некöр эз кер неколанасö. «Велöта, ась инженерöн петас», — думайтiс ас кежас айыс. Но сы моз эз пет.

Сибöтчис тулыс. Гриша ветлöтiс дасöт классö. Экзаменнэз коста зонка етша петавлiс гортiсь, нельки умöльтчыштiс чужöм вылас, бытьтö пöрисьмыштiс да нюжалiс. А öтпыр пуктiс пызан вылас айыс одзö аттестат.

— Но, кытчö, зонö, öнi думайтан?

— Уджавны, — бытьтö орöтiс, öтiк кылöн висьталiс Гриша да сэтöн жö содтiс: — Локта тэ дынö велöтчыны.

Шутка туйö примитiс Степан Фёдорович зоныслiсь баснисö.

— Ачыт тöдан. Ме тожö томöн пондi уджавны.

Эта вылын и орис ны коласын басниыс. Но ёна öбидитчис Степан Фёдорович, кöр куимöт лунас ни казялiс зонсö строительнöй площадка вылын.

— Отсасьны, ая, локтi. Висьтав, мый керны.

Кымöр вевттис стариклiсь чужöмсö. Лöгыс поснит бичирöн чепöссис сы синнэзiсь. Дыр Степан Фёдорович видзöтiс зоныс вылö. Видзöтiс паныт и Гриша, видзöтiс айыс синнэзö, кыдз пыр видзöтлiс одзжык, кöр кывзывлiс сылiсь видчöм нето совет. И öнi тöдса лöг синнэз увтын зонка эз повзьы, эз гöрдöт, эз бергöтчы мöдöрö, эз лэдз муас синнэсö. Только öтпыр сьöд, кузь синкыммес чепöссьыштiсö вывлань, бытьтö мöдiсö лэбзьыны асланыс местаись, но сэтöн жö сувтiсö бöр. Зонкалöн паныт смелöя видзöтöмыс баитiс: «Эн пов, ая, быдöс лоас бур».

— Ладно, — Степан Фёдорович лöга öвтыштiс кинас. — Босьт мастерок, сувт ордчöн. Да етшажык ракаэсö видзöтлы — перытжыка вöрöтчы. Видзöтам, кытшöм тэись отсасисьыт

Джын год сулалiс Гриша ордчöн айыскöт. Джын год орöттöг, жаднöя видзöтiс сы киэз вылö, кöдна вöлiсö чорытöсь, небасöкöсь, пöльтчöм лöз жилаэзöн, но эстöн орсiсö уджалан инструментöн сэтшöм жö кокнита, кыдз смычокöн скрипач. Шысеттöг кывзiс Гриша айыслiсь велöтöм. Локтiс кад, зонкалö сетiсö разряд. Но уджавны усис невна: зонкасö босьтiсö армияö.

Чулалiс кык год. И эстöн Степан Фёдоровичлöн петiсö медодзза синваэз. Вöлiсö нiя не умöльсянь. Гажсянь да радсянь аслас зон понда петiсö стариклöн синваэз. И лоис эта то кыдз.

Сибöтчис тулыс — майскöй праздник. Пантавны сiйö эта годö Степан Фёдорович лöсьöтчис бура. Öксисö öтiк-мöдiк тöдсаэз коласiсь, пуксисö пызан сайö. Юыштiсö. Гöссез гажмисö. Гуляйтны бы только, гажöтчыны, но хозяиныслö пызан саяс мыйкö эз тырмы. Казялiс этö öтiк гöсь, юасьны пондiс:

— Мый нö тэ, дружок, невесёв талун? Мый тэныт оз тырмы? Видзöт, мöдiк орден ни тай правительствоыс уджыт понда сетiс.

— Сiдз-то сiя сiдз, да мыйкö вот гажтöмкодь сьöлöм вылын лоис, — баитö хозяин. — Гришаыс ордчöн абу. Сiя вот талун и оз тырмы.

— Эта не беда. Не война эд öнi, повны нем. Служитас да и локтас гортö, — лöньсьöтiс ёртсö сосед.

Эта коста пырис почтальон, öтлаын газетаэзкöт да журналлэзкöт вайис телеграммаэз да письмоэз. Вöлi письмо и зоныссянь, а öтлаын сыкöт кытшöмкö гижöт тöдтöм почерка. Повзьöтанакодь овлö тöдтöм письмоыс. Конверт вылын адресыс вöлi печатайтöм. Увдöрас штамп: «Войсковöй частись командир». Сiдзкö, ачыс командир гижö. Мый жö лоис сэтшöмыс? Кöдзыт ньылöм воттез перыта вевттисö сылiсь чужöмсö, а гаддеза гырись киэс тöдчöмöн пондiсö дрöжитны. Видзчисьны гöссезлiсь мунöмсö Степан Фёдорович эз понды. Умöля кöстасян чуннезнас сiя косялiс конвертсö.

Командир благодаритiс Гришалiсь пöрись аймамсö зоннысö бытшöма воспитайтöм понда. Вермас ли лоны пöрисьувья унажык гаж да честь, кöр нылö висьталöны спасибо челядьнысö быдтöм да воспитайтöм понда! «Аслам, аслам, менам вирö котöртö сы жилаэзын! Гришка, Гришка, ылöса менам зон!» — Степан Фёдорович судзöтiс зоныслiсь стена вылын öшалан портретсö да жмитiс сiйö морос бердас. Эта коста öтамöдсö одзалöмöн сы синнэзiсь, кыдз кык гырись анькытш тусь, котöртiсö синваэз да усисö морос вылас. «Ась служитö. Оз я эна годдэзö мöдöрö бергöт думасö», — сэк жö надейтчöмöн думайтiс Степан Фёдорович. Öддьöн ни сылö вöлi охота ассис зонсö адззыны инженерöн. Эта йылiсь и думайтiс. Но...

Бертiс Гриша армиясянь ёнмöм, бытшöм — сы вылö и видзöт. И вились айыс юалiс:

— Но мый, зонö, думайтан керны?

— Думайтны, ая, нем. Понедельникас уджавны пета. Али полан, что служба коста уджсö дугдi радейтны? — шуис Гриша да сэтöн жö содтiс: — Эн пов. Эг эшö вунöт, кыдз мастероксö киам видзны. А велöтчаныс миян дынiсь оз пышшы.

— Ме мый думайта? Нем... Нем. И повны тэ понда ог пов. Сiдз тай вот юалi. Колö жö меным, поди, тöдны, мый одзлань думайтан керны, — то ли виноватöя, то ли öбидитчöмöн горöтчис паныт Степан Фёдорович.

— А тэ, ая, эн öбижайтчы. Инженеррес эд быдкодьöсь овлöны. А ме думайта сiдз: настоящöйыс петас сыись, кöда оз пов да оз брезгуйт рабочöйлiсь инструментсö киас босьтны.

Эта басни бöрсянь чулалiс ни уна кад, но сы дынö сэсся эз бертлö. Учöтсянь ылöса Гриша думайттöг неколана шагсö аслас оланын керны некöр эз тэрмась. Öтпырись Гриша эз пондыв сувтны айыслö паныт, кылiс кö сьöлöмнас, что старикыт велöтö бурö. Но тöдiс кö, что пöрисьыт абу прав, зонка эз спорит, но керис ас мознас.

Медбöрья басни коста Степан Фёдорович бура вежöртiс зонсö. «Нем меным тэнö велöтны. Тэнат и юрыт золотöй, и синнэт лэчытжыкöсь, ылöжык одзлань адззöны. Сэтшöммес одзын и юэс косьмöны, и керöссэс киссьöны, и пемыт вöрыс югмö да паськалö, медбы сетны туй. И туйыс нылöн öтiк, и мунöны нiя сувтчывтöг, повтöг, чорыта. Зэрыс и шерыс, жарыс и кöдзытыс нылö нем туйö», — сiдз решитiс старик.

Сэсся айыс некöр эз пондöтлы важыс йылiсь басни. Но вот талун... Зоныслö лöгöн горöтчöм кыввезсянь недолыт лоис сьöлöм вылас. «Öбидитi зонкасö. Нем понда, весись öбидитi. Зонöс öбидитi сы понда, что отирыс сылö веритöны, кыдз меным жö. Эх, бöбöв ме, бöбöв, квать боль. Позорыс мымда пöрисьувья аслам зон одзын», — Степан Фёдорович öзтiс виль папироса да горшöн кыскыштiс тшынсö.

* * *

Чулалiс кынымкö неделя. Видзöтны кö боксянь, то Жуковвез семьяын кыдз бытьтö и нем эз вежсьы. Том гозъя (Гришаыс кыдз год ни вöлi гöтыра) асъяпонсянь ветлывлiсö удж вылö. Евлампия Матвеевна кузьлун бергалiс аслас хозяйствоын, мыйкö чышкис да миськалiс, мыйкö новйис, кинöскö кытсалiс да вердiс. Рытъяввылас сiя кутчисьлiс лöсьöтны ужин. Степан Фёдорович асывсянь петавлiс сарайö. Но медбöрья кадö и эстöн нем лоис керны.

Нёльöт год вöлись сулалiс вились строитöм керкуыс. И пес понда сарайыс, и оградаыс — быдöс виль. Гöгöр керöм ас киöн, бура да бытшöма, керöм не öтiк год кежö.

Сибöтчис ваöн польдан кад. Руд кымöррез эз сетö мыччасьны шондi югöррезлö. Нiя, кыдз домалöмöсь, кыссисö омöн небо пасьта öтамöдныс сьöрö. Асывсянь дугдывтöг кисьтiс мыла бырöтана поснит зэр.

Кыдзкö рытъяв кадö Степан Фёдорович петiс калитка сайö. Сулалыштiс öтмöдöрö дзирбарасьöмöн. Кутчисьны нем бердö, а гортын пукавны неохота. Старик не тэрмасьöмöн иньдöтчис городлань. Недыр мыйись сiя сюрис строительнöй площадка вылö.

— Степан Фёдорович!

— Здравствуйте, Степан Фёдорович!

— Гöститны миян дынö? — быд ладорсянь кылiсö уджалiссезлöн голоссэз. Ны сьöртi ни позис тöдны, что стариксö радейтiсö уджалiссес. Быдöнныс вöлiсö радöсь сы локтöмлö. И только Гриша, кöда тожö ни ештiс казявны айыслiсь локтöмсö, вежсис чужöм вылас. Радуйтчыны сiя эз думайт. Кин-кин, а сiя тöдiс, мый вермас петны эта бöрсянь. Жаль вöлi стариксö зоныслö. Шоччисьны ни сылö колö.

Эстöн жö Степан Фёдоровичлö паныт шедiс Аркадий Михайлович, татiсь начальник. Сiя, кыдз варыш, уськöтчис аслас пöрись ёрт дынö:

— Но кыдз, мый? Шоччисян, сiдзкö? — Степан Фёдорович эз на ешты горöтчыны, но чужöмыс баитiс ни сы настроеннё йылiсь. Сiйöн и висьталiс Аркадий Михайлович:

— О, да мый, вонö! Висьтав эн висьтав, а ме тöда. Оз, небось, пукассьы гортын? Оз, оз, оз. Доймö сьöлöм, гажтöм отиртöг да уджтöг, гажтöм, что терпитны оз позь. Сiдз и кыскö-нималö отир коласö. Ме, Степан Фёдорович, ас сьöртöт тöда. Сьöкыт, сьöкыт уджалiсь мортлö гортын пукавны, кöр эшö невна здоровьеыт эм.

Колö жö эд сiдз: самöй дойман местаас инмисö начальниклöн кыввес. И эз тöд Степан Фёдорович: то ли радуйтчыны эталö, то ли öбидитчыны.

Неохота вöлi мунны строительнöй площадка вылiсь, кытöн одззамоз быдöс тöдса да дона тэ понда. Степан Фёдорович не тэрмасьöмöн ветлöтiс лесаэз кузя. Интересуйтчöм понда сувтчышалiс быд морт дынын. Юасисö сылiсь, и сiя юасис. Мукöд коста висьтавлiс, велöтiс, кыдз керны. А площадка вылын, кыдз и одзжык, пизис удж. Кран, кöда сулалiс ордчöн пондöтöм керкуыскöт, дугдывтöг нюжлалiс öтмöдöрö кузь кисö. Лэбталiсö то кирпич, то раствор. Дугдывтöг гурскышалiсö мастероккез. Син одзын тöдчöмöн быдмисö стенаэз.

Ая-зона гортö локтiсö öтлаын. Медперво мунiсö чöлöмöн. Джуджыт мыгöра, ён лысьöра, да только горбыльтчöмкодь походкаöн Степан Фёдорович мунiс одзас. Быдсöн сэтшöм жö, но пöлян кодь веськыт и этасянь бытьтö ыджытжык айысся, Гриша оськалiс сы бöрсянь.

— Весь эд тэ, ая, этö... Немлö вöлi вовлыны.

— Мыля тэ сiдз думайтан?

— Ме эд не слепöй, адзза. Адзза, мый тэкöт керсьö. А этасянь кокнитжыкыс оз ло. Уджалiн — тырмас.

— Тэ, зонö, вот мый, — эз сет кончитны Степан Фёдорович. — Эн кутчись менö велöтны. Вот уджав ме мымдасö, а сыбöрсянь пешлiсь гортын пукавны. Вежöртан, шуан? Мый нö тэ, квать боль, вежöртан? Вот кывза ме тэнö да и думайта, что нем тэ, квать боль, он вежöрт.

Лысьтан айытлö сэтшöм кыввез горöтчыны. А тöдан ли тэ, что менам мыла бырис уджтöг пукавны? Отирыс моз жö вот радуйтчи, что шоччисьны понда, а öнi адзза — нем сыын бурыс абу. Да и кытшöм гаж мортлö пукавны гортын, кöр сiя вермö уджавны? Вот висьтав тэ, ноко, этö меным, вежöртан кö быдöс.

— Велöтны ме, ая, тэнö ог думайт. Ачыт тöдан, но уджавнытö тэнö некин оз вашöт.

— Вашöтö или оз, делоыс не сыын. Вот ме талун нем вылö ог öбижайтчы, здоровье часöт видзсьö. А мылякö думайтсьö, что не петны кö уджавны, быдкодь думаэзсянь да немкерöмсянь и шогöтлö ме бердö недыр кутчисьны. А кутчисяс кö шогöт эна годдэзö, сiдз и тöд, коккез вылö ёна не сувтны ни.

Вежöртiс Гриша, что айыскöт споритöмыс некытчöдз оз вайöт, и сiйöн буржык лоас чöвны. Старикыт, кыдз асныра вöв, кыскис аслыс. Кольччöм туйсö локтiсö чöлöмöн, чöлöмöн пукалiсö гортын и ужин коста.

* * *

Стариклiсь шогöтсö адззис не только зоныс. Евлампия Матвеевна тожö казялiс этö и ёна пондiс тревожитчыны мужикыс понда. Тöдчöмöн умöльтчис Степан Фёдорович, горбыльтчис. Пыдынсялiсö да содiсö сы чужöм вылын чукыррез.

— Старик, кывзы жö, недолыт эд тэныт, кыдз ме видзöта. Шогалан эд, некö. Ветлiн бы враччез дынö, — пондöтiс кыдзкö баснисö Евлампия Матвеевна. Эта коста Степан Фёдорович пукалiс öшын одзын, видзöтiс ва воттез вылö, кöдна зэрсянь öксисö стеклоэз вылын да шытöг, öтмöдöрö чуклясьöмöн, ыскöвтiсö увлань. Эна кыввезсянь сiйö кинкö бытьтö чушкис ас местаас.

— Старик! Старик! Тожö меным, квать боль, адззöмыт. Нем тэ он авйы пöрисьувьят, нем он адззы аслат керкуын, — лöгöн шыасис паныт Степан Фёдорович.

Важын ни этадз лöгöн эз баитлы сiя. Этасянь Евлампия Матвеевна нельки повзис. Но мымда старуха эз думайт ас кежас, мыйсянь быдöс эта лоис, — тöдны некыдз эз вермы. Уна годдэзся öтласа оланiсь сiя тöдiс öтiкö: вöвлi кö мужикыслö мыйсянькö сьöкыт сьöлöм вылын, эз ков мешайтны. И сiйöн öнi Евлампия Матвеевна только шысеттöг, качайтыштiс юрнас да сайöвтчис кухняö.

Жагöна кыссисö арся кымöра луннэс. Эшö жагöнжыка чулалiсö пемыт-сьöд да зэра ойес. Медбöрья кадö Степан Фёдорович некытчö эз петавлы. Час бöрын час, сутки бöрын сутки джендöтiс сiя öшын одзын пукавтöн нето постеляын. Юрын бергалiсö быдкодь думаэз. Вились и вились син одзын сувтчывлiсö челядь кадся годдэз. А кад этасянь чулалiс неетша ни. Но нельки джынвекся кадыс эз вермы чышкыны памятись сiйö, мый зубыта йиджис сьöлöмö.

Öння город местын сэк сулалiс посад да кынымкö учöтик деревня. Посадiсь неыджыт пуовöй керкуоккес сайöвтчисö ойвывся тöввез шогья крут керöс увтын, визыв ю бердö жмитчöмöн. Керку-мöд вöлiсö и кыксувдаöсь. Гажа берег вылын, ыджыт туй дорын вöлi учöтик да важмöм ни керку — Степанлöн горт.

Степан Фёдоровичлöн айыс лыддиссис ремесленникöн. Тöвся кадö унажыксö сiя уджалiс гортын: вурис сапоггез, катайтiс да вочис пимиэз, дубитiс öвчинаэз. Тулыснас ас кодяс жö мужиккезкöт кутчисьлiс строитчан бердö: тшупис да лэбтiс керкуэз, картаэз, чоммез да баняэз, вартiс горрез. Купец Быковлö кыксувда керку керикö Фёдор усис крыша вывсянь.

Эта кадö Степанлö мунiс пятнадцатöй год. Нёльыс коласiсь, кöдна кольччисö айныс сьöрсянь, сiя вöлi медпöрись. Керны зонкалö кольччис нем: мунiс шедтыны нянь кусöк.

И Стёпа босьтiс киас айыслiсь инструментсö. Тöвбыт зонка вурис да вочис пимиэз. Тулыснас айыс моз жö кутчисис чер бердö. Кöть и вачкисьлiс ни сiя вывтырнас мужик вылö, но вöлi эшö öддьöн том да некрепыт. Уджсö пöриссезкöт ковсис нуöтны öткодьö, и сiйöн вöлi öддьöн сьöкыт. Уль вöрсö лунтырöн кыскалöмсянь, бергöтлöмсянь да лэбталöмсянь Стёпа сiдз мыдзлiс, что рытъяввылас нельки юр дикмывлiс. Киэз мыдзöмсянь дугдывлiсö лэбтасьны вывлань, рудзалiс-висис кос, а син одзын сiдз и ветлiсö-бергалiсö веж круггез. И эшö бы эта сьöкыт уджсянь вöлi не сэтшöм курыт, кöбы вежтiсö зонкалö мöдiккезлö моз жö или кöть невна етшажык пöрисьжыккес сьöртi, а не джынсö. Эна сьöкыт керрез дорын, йöз пимиэз да сапоггез дорын и чулалiс сылöн томся кад. Чулалiс сiя сэтшöм чожа, что зонка и синнэзнас эз ешты кваркыштны.

Вежсис кад, вежсис и Стёпа. Сiя не только вежсис, но и чужис бытьтö мöдпöв. Вежис зонка нельки уджсö — велöтчис каменщикö. «Кирпичыс кöть и сёйись керöм, да сё ни кокнитжык керысся, а мастерокыс — черысся», — думайтiс Стёпа.

Неетша кад чулалiс, неетша ва котöртiс эта кадсянь. Неетша строитны ештiс эта коста Степан Фёдорович. Кöр сiя босьтiс киас мастероксö, посадын каменнöй керкуэс вöлiсö öтi-öтi. А талун... О, да мый сэтöн баитны! Талун быд олiсьыс адззö, мый городас керсьö. И училищеэс, и техникуммес, и школаэс, и больницаэс — быдöс кирпичись лэбтöм. А мымда отирыслöн квартираэс кык да куимсувда каменнöй керкуэзас! Дзар керан эта кöркöся посад вылö — и сьöлöм радуйтчö. Улица бöрын улица оссьö городас, керку бöрын керку быдмö ордчöн öтамöдкöт. И ны коласын оз, натьтö, адззись сэтшöмыс, кöдаö бы эз вöв пуктöм кирпич Степан Фёдорович киэзöн. И некин, натьтö, оз адззись отир коласын, кин бы висьталiс, что сiя, кöдö аслас удж понда правительство наградитiс ни не öтiк орденöн, эз заслужит аслыс шоччисян кад. Этасянь бур, öддьöн бур вöлi сьöлöм вылын, но вöлi и мöдiк дума, кöда эз сет некытшöм спокой, пышшöтiс он, косьтiс да чукыртiс стариксö. Мыйлö пукавны гортын сэк, кöр тэнат быдöс тырмö: и юны, и сёйны, и пасьтавны, и мый главнöйыс — кöр тэ чайтчан уджавны? Некöр одзжык Степан Фёдорович эз думайт сэтшöм думасö. Пöрись отир вылö видзöтiкö сiя тожö видзчисис ассис кад, видзчисис шоччисьöм понда. Но нерад лоис старик эта кадлö, кöр сiя локтiс. Одзжык Степан Фёдорович оланын быд луныс чулалiс уджын. И эз тöд эта вотöдз сiя, что сэтшöм гажтöм да сьöкыт вермас лоны уджтöг. Вöлi кö одзжык любо кывны кинсянькö кыв «пенсионер», то öнi эта кывсянь сылöн жмитчывлiс сьöлöмыс, дзик зубытсянь.

Сибöтчисö октябрьскöй праздникся луннэз. Степан Фёдоровичöс, кöда одзжык сiдз любитiс этö праздниксö, öнi нем эз гажöт. И шуч праздник старик куйлiс. А куимöт лунас, рытъяввылас, шытöг пасьтасис да петiс гортсис.

Город вöлi праздничнöй. Флаггез, лозунггез, плакаттэз да портреттэз быдкодь рöмöн пежьялiсö биэз увтын. Öтмöдöрсянь киссис гажа музыка. Степан Фёдорович вельдыр ветлöтiс улицаэз кузя и казявтöг, кыдз и одзжык, вились сибöтчис строительнöй площадка дынö. Керкулöн куимöт этажыс вöлi кончитöма ни. Кранлöн вылына лэбтöм стрела бердö крепитöм кумачовöй флаг горöн шовкöтiс тöв вылын. Флаглöн сотчöмыс да павьялöмыс тыдалiс омöн город пасьта, быд пельöсöдз.

«Ме тöда: оз, небось, пукассьы гортын. Оз, оз, оз», — площадка вылын сулалiкö усисö тöдвылö Аркадий Михайловичлöн кыввес. Эстöн жö усис тöдвылö и сiя случайыс, кöда неважын петiс начальниккöт.

* * *

Аркадий Михайлович кынымкö годöн вöлi пöрисьжык Степан Фёдоровичся. Сiя жö и советуйтлiс кöркö кутчисьны мастерок бердö. Уджалiсö öтлаын. Этасянь и крепамис ны коласын бур дружитöм. Кыдз и Степан Фёдорович, Аркадий Михайлович не öтiк дас год ни строитiс керкуэз. Кытшöмкö тулысö Аркадий Михайлович дыр эз чеччыв койка вылiсь, а кöр веськалыштiс — сетiсö курорт вылö путёвка.

Море берег дорын, лунвывся климатын да бур враччез дозор увтын здоровье жагвыв лöсялiс. Эта кадсянь Аркадий Михайлович сiдз гажтöмтчис уджтöг да отиртöг, что аэродром вывсянь локтiс веськыта строительнöй площадка вылö. Радся-рад петiс сiя автомашинаись. Панталiс сiйö медперво стройка вылiсь главнöй инженер Всеволод Васильевич, том да весёлöй морт:

— Аркадий Михайлович, здравствуйте! Ми эстöн думайтiм, что тэ он ни берт миян дынö. Пöрись ни эд, кад ни тэныт шоччисьны. Баитчимö вот ми и решитiм лэдзны тэнö пенсия вылö. А тэныт, тыдалö, гортын оз пукассьы.

Весись висьталöм юöрыс сiдз öбидитiс Аркадий Михайловичсö, что сiя кыдз чышкöт чочкоммис инженерыс одзын сулалiкö. Кыв эз вермы горöтчыны старикыт, но перыта бергöтчис да машинаö — сымда и адззылiсö.

Кык лун Аркадий Михайлович эз петав гортiсь, сё думайтiс, кыдз сiдз вермис петны, а куимöт лунас Всеволод Васильевичлö ковсис мунны старикыт ордö да извинитчыны аслас шутка понда.

* * *

Öнi, тöдвылö усьöм случайсянь, Степан Фёдорович гажмис и перыта иньдöтчис ёртыс ордö.

— Ноко, ноко, пенсионер, лок матöжык, мыччась миянлö, — Степан Фёдоровичöс панталiкö баитiс Аркадий Михайлович. — Тэ нö мый, вонö, сiдз пöрисьмин? Видзöт жö, видзöт... Тöн петiн пенсия вылö, а талун он я кувны мöд? — сё эшö шутитiс начальник. Но эстöн жö голосыс вежсис, и серьёзнöя ни сiя юалiс: — Мый, шогалан я мый я?

Юыштiсö ёрттэз кынымкö кружкаöн сур, кöдö сэтшöм бытшöма кужöны керны коми отирыс. Öзйис басни. Касьтылiсö быдöс, мый усис пантавны, мый пырйöт мунны ас оланын: и революциясö, и медодзза пятилеткасö, и тшыгьялан годдэсö, и войнасö. Мыйыс эз мун ны пельпоннэз кузя! Этасянь öнi öтiкыслöн юрыс вöлi куш, кыдз галя, а юрсиыс мöдыслöн вачкисис кудель вылö. И, натьтö, сiйöн, что уна усис ны пельпоннэз вылö, нiя бура тöдiсö оланыслiсь донсö, бура вежöртiсö öтамöднысö. Этасянь нiйö талун эз узьöт уджтöг, эз адззись места спокойнöя шоччисьöм понда. И лыддисö кö нiя ас оланын мыйкö счастье туйö, то этö удж.

Сёрöн ни эта рытö локтiс гортö Степан Фёдорович. А асывнас чеччис медодз да пасьталiс ассис уджалан паськöм.

Сулалiс кöдзыткодь мича асыв. Эз на ешты петны шондi, но асывлань скатыс пондiс öзйыны гöрд, öгралан биöн. И кыдз уна годдэзöн одзжык, Степан Фёдорович шыннялöмöн иньдöтчис паныт эта асывлö.