Ягöдалiсь мöссэз

Пондöтчис гожум. Гöгрöссялiс пуэз вылын лист. Тулыссянь гöрöм-кöдзöм ыббез вевттисисö веж рöма осяэзöн. Шепасис рудзöг. А быд ыб весьтын, шондi петан кадсянь и шондi пуксьытöдз, дзик пожнассис, киссис му вылö ыбшаррезлöн сöстöм да гора питиртöм-сьылöм. Гажа видззез купайтчисö пидзöс сувдöн лэбтiсьöм сук турунын, кöда цветитiс ни сэк кежö быдкодь и поснит цветöн. Быд ладорсянь кылiс малянкаэзлöн дзингöм, син одзын быркайтiсö быд рöма, гырись и поснит бабыввез. Гора вöр весьтiсь сöстöм русö чарлалiс-поткöтлiс кöккезлöн мыдзтöм кöкöм. Погоддяыс сулалiс шоныт да лöнь, и йöррезлöн орсöмыс асывсянь рытöдз вериктiс син одзын. Неважын пондöтчис ытшкисян кад. Но медгажаыс вöлi сыын, что сэк кежö ыбын-вöрын воис ни озъягöд.

Сэтшöм кадö кыдзкö одз асывсянь ме босьтi сьöрам кыкьямыс литртöрик доз — зелёнöй рöма эмалированнöй чайник, иньдöтчи ягöдавны. Ягöдалан местанас бöрйи неважынся вöркерас, кытöн видзöтчöм могись вöлi неделяöн одзжык. Сэк кежö озъягöдлöн медодзза нырыс вöлi быгыльтчöм ни. А бöртiжык оссьöм цветыс бель видзис, кыдз лым.

Бöрйöм местаын ме эг сорась. Колiс дзир сибöтчыны тöдса керас бердöдз да кежны кынымкö оськöв ылына ыджыт туй бердсянь, кыдз шондi морос вылын воöм медодзза ягöд туссес, кöдна öшалiсö четверть да джын сувдöн лэбтiсьöм ягöдкок вылын, бытьтö биа шомрöма öгралан доннэз, усисö ни син вылö.

Ягöдкокыс быдмис унажыксö мыррез гöгöр да керас вылö чукöрттöг кольöм чашья коласын. А ачыс ягöдыс вöлi сэтшöм гырись да басöк, кытшöмö позьö öктыны дзир садын грядка вылiсь, но кытшöмö эта вотöдз вöрсис ме эшö некöр эг пантавлы.

Öктiсьнытö ме öддьöнсö эг тэрмась. Öткö, вöлi эстöн нач öтнам и кинкö одзалöмись эг пов. Деревня дынсянь ягöдалан местаыс вöлi вель ылын, и отир коласiсь сiйö етша кин тöдiс. А мöдкö, кадыс вöлi эшö одз асывся, кöр турун вылiсь ойся лысваыс косьмыны быдсöн эз на ешты. Сiйöн медодз ме видзöтчöв-кери öтмöдöрсянь öктiсян места пасьта. А сэсся вöлись гатшвывтi чайник вевт, мышкыртчи да нюжöтчи кинам чуньпон кодь ыджыт да дон кодь гöрд медодзза ягöдтусь бердöдз — пондi öктiсьны.

Кытшöвтi ме сiдз öтiк мыр гöгöр — вевтöсö тырис, кытшöвтi мöдiк гöгöр — сiдз жö. Öктiси этадз час кыным сьöрна и чайник-дозöс тыртi. Эта вылын позис бы, натьтö, бертны гортö. Но керас пасьта воöм ягöдыс гöрд видзис сымда, что кольны сiйö öктытöг жаль, сьöлöм оз лэбты. Сэтчö жö и кадыс эшö нач неуна, нельки павжуныс эз сибав.

Недырик шоччисьöм бöртi ме коли тыра дозöс паськытжык мыр вылö, чиркнитi неыджыт пуртокöн да кульыштi кыдз бердiсь симöт. Сэтöн жö орöтi да йывдi уль шатись ёссез, а ны сорöн, кульыштöм симöтсис кери джынведратöрик чуман. Öнi позис öктiсьны одзлань.

Павжун бöрас тыра доззэзöн ни петi бöр туй вылö, нетэрмасьöмöн иньдöтчи гортлань.

Мымда жö вöлi мамöлöн гаж да дивуйтчöм, кöр сiя, рытъявылас ни, бертiс удж вывсянь гортö да казялiс менчим вайöм ягöд. Не часто эд усьлö, нельки вöрын овтöн, пантавны сэтшöм гырисьсö да басöксö кöть бы литр мымда. А эта лунö менам сэтшöмыс вöлi öктöм да вайöм ведрася унажык.

— Видзöт жö, видзöт жö! — Дивуйтчöмсянь сiя вачкыштiс киэзнас боккес кузя. — Быдöс эд то чуньпон гырися, топ бöрйöм. Кысь нö тэ сымдасö да сэтшöм басöксö адззин?

Кывзi ме чöлöмöн мамöлiсь баснисö, кыдз сiя дивуйтчис да ошкис менчим вайöм ягöд, а ас кежам гажöн думайтi: «Чöв вот... Чулалас лун-мöд, и ме эшö мöдöтпыр сэтчин муна. Сэк, батi, эшö этася уна вая». Öткöн да не тэрмасьöмöн öктiсьтöн ягöдкоксö ме вынсьöтчи не тальны. А мöд нырыс, вотöмыс эшö, сы бердын сырк öшалiс. Надейтчыны одзлань кежö и былись вöлi мый вылö. Чулалiс неделя. И вот ме вились сiя жö местаын. Сьöрам сiя лунö босьтi не одззася чайникöс ни, а даскык литртöрик эмалированнöй ведра да куим литртöрик бидон. Позис разь одзлань и думайтны, и тöдны сымдасö, что сэтшöм бытшöм ягöда местаись ковсяс бертны простöн? Эд ме бытшöма тöдi, что кок вылын дзорöн кольччöм ягöдыс чулалöм неделя коста вились гöрдöтiс.

Керас дорас сибöтчытöн ни вежöртi, что некытшöм сорасьöм эз вöв. Ме öктiсьöм бöрсянь сiя местаö öнöдз эшö некин абу на сибавлöм. Вились воöм ягöдыс вöлi öктытöм, и öнi сiя мыччассис меным нельки одззася унажык.

Öштыны весись кад талун ме эг ни понды. Простöй ведраöс, мешайтчöмсис, сувтöтi тыдалан мыр вылö. Киам кольччöм бидонöн пондi öктiсьны. Но эг ешты тыртны и öтiк вевтöс, кыдз кысянькö сибалiс гора джыннянлöн шы. А чожа мый эта бöрсянь керас дорас мыччисисö мöссэз. Вöлiсö нiя пастухтöг и перыта пондiсö сибöтчыны ме дынö. Гортсяэс — не вöрмöссэз. И вежöртана, что вöрын морткöт пантасьöмыс нiйö немымда оз полöт.

Мый вермас лоны одзлань, тöдны сымдасö перво жö эз позь. Меным мылякö думайтсис, что мöссэз сувтчывтöг мунасö асланыс туй кузя. Сiйöн и панöвтны да кежöтны кöдöрланькö аскадö ме эг пондыв, кольччи öктiсьны ас местын. Но кыдз ме думайтi ас кежам да видзчиси, сiдз эз шогмы. Ме гöгöр вöлi бытшöм туруна важ керас, кытöн эта вотöдз подаыс эшö абу олöм и кытöн öнi бытшöма позис вердчыны. А мöссэзлö дзир эта и колiс. Нiя перыта сибöтчисö ме бердöдз, кытшöвтiсö быд ладорсянь, и эстöн нiйö кинкö дзик домалiс. Вежöртана, что ме öктiсьöм вылö мöссэз и дзар эз керö. Сэтчöдз нылö некытшöм дело эз вöв. Эз вод пода и шоччисьны. Нiя инмисö туруна местаö. И öнi, бытьтö тшыгйöтöмöсь быдса неделя сьöрна, горша уськöтчисö бытшöм да небыт турун вылö. Ме гöгöр быд ладорсянь кылiс горöн пишкайтöм, öвад увья бöжжезöн öвтчöм-вартлiсьöм да пиннез коласын турунлöн няжöтöм.

Чожа мый ме вежöртi, что быдöсiсь этаись бурсö видзчисьны нем. Туруна местасö мöссэз топ бритiсö. И вежöртана, что эта коста нiя эз бöрйисьö, няжйисö-сёйисö быдöс, мый только шедiс, а öткоста и ягöдкоксö тожö öтлаын воöм ягöдыскöт. Öктынытö ны бöрсянь меным кольччис нач нем. Сэк ме чеги шать, и кытчöдз эшö эз вöв нач сёр, шатьнас öвтöм-полöтöмöн пондылi бы вашöтны нiйö ас дынсим. Но колананёж эта эз ни отсав. Шатьнас вувьясьöмсянь мöссэс недырик кежö и кежавлiсö ме дынiсь кöдöрö шедас. Но колiс меным дзир мышкыртчыны öктiсьны, кыдз нiя сэтöн жö чукöртчывлiсö ме гöгöр бöр. А то вöвлi эшö, что öтöрлань кöднöкö ме вашöта, а мöдiккез мöдöрсянь сэтчö бöра пырöны ни. Сiдз ме час сьöрна, а батi, дыржык эстöн ныкöт и «воюйтi». А эта коста медъягöда местаас не только öктiсьнытö, но и аслыныс мöссэслö сёйнытö кольччис нем. Сэк ме петi ны коласiсь да пондi шепасьны керас дорöттяс, кытчö эта вотöдз табуныс эшö эз на сибав. И ась эстöн ягöдыс вöлi не сымда ни, шепасьнытö öтiк мортыслö тожö адззисис мый дорын. Но кöр одзза ягöда местаас туруныс быдсöн вöлi бритöм-сёйöм, нiя быдöнныс иньдöтчисö ме сьöрö.

Чожа мый мöссэз, кыдз нарошно, вились чукöртчисö зэв ме гöгöр. Вились быд ладорсянь пондiс кывны ныррезöн горöн пишкайтöм, бöжжезöн öвтчöм-вартлiсьöм да ны пиннез коласын веж турунлöн няжöтöм. А недыр мыйись и эстöн шепасьнытö лоис нем дорын.

Тшыкöтöм настроеннёöн ни ме пондылi янсöтчыны мöссэз дынiсь эшö да эшö. Но керны меным сымдасö нiя öнi эз ни сетö, и этаись нем эз пет. Кöдöрö бы ме эг пондыв сайöвтчыны ны син шогья, час нето джын бöртi нiя вöтлiсö менö вились да вились жö чукöртчывлiсö быдöнныс ме гöгöр.

Ог тöд да ог лысьт висьтавны сымдасö, что мöссэз сiдз радейтöны сёйны гöрдъягöд турун нето асьсö ягöдсö. Нельки сiйö бытшöма ог тöд, адззöны я нiя быликтчöм синнэзнаныс воöм ягöдлiсь гöрд рöмсö. Тöда дзир, что гöрдъягöдкокыс лэбтiсьö бытшöмжыка не нюрын-ольын, лабазник да осока коласын, а вылын, кöс да югыт шондi мороса местаэзын. Но сэтшöм жö местаын частожыксö быдмöны и мöдiк, чöскыт да подалö гленитчана туруннэз, кыдз, шуам, пырей да шыранькытш, сизьюр да брыжьятурун. А инмасö кö кытöн пода сэтшöмыс вылö, кöдна коласын быдмö и гöрдъягöдкок, вежöртана, что бöрйисьны оз пондö. Чöскыт пырейсö да брыжьятурунсö сёйтöн нiя и гöрдъягöдкоксö öтлаын тожö бритасö-сёясö. Сiдз сiя лунö лоис и ме гöгöр.

Медбöрын керас пасьта ягöда местаыс вöлi топ бритöм. И керны меным одзлань эстöн кольччис нем, öктiсьны некытöн. Лöгувья ме öвтыштi кинам, пукси тöлöн пöрöтöм кыдз вылö, сувтöтi ордчöн простöй доззэзöс, пондi шоччисьны. Чожа мый ме сьöрö и мöссэз керисö сiйö жö. Пöтöсь, нiя водiсö ме гöгöр, кöдалö кытчö шедiс. Позис думайтны, что нiя примитiсö менö асланыс пастух местö, кöда ныкöт эз вöв, а менчим шоччисьöмсö примитiсö, натьтö, пажнайтöм местö. Но простöй доззэзöн кольччöм увья эта менö немымда эз гажöт. Кошшыны мöдiк ягöда местаэз охота эта лунö менам тожö эз ни вöв. Сiдзкö, одзлань öктiсьöм йылiсь думайтны кольччис нем. Сiдз, простöй доззэзнам, павжун гöгöр ме и бертi гортö.

— Мыччав, ноко, мымда бöра талун ягöдсö вайин, — бертiс рытнас удж вывсянь да корис менö мамö.

Шыасьтöг ме дзир качыкнитi юрнам простöн кыминьтöм доззэз ладорö.

— Мый, простöн бертiн? Кинкö одзалiс я мый я?

— Мöссэз.

— Кытшöм эшö мöссэз? — дивуйтчис мамö.

— Кытшöмöсь разь нiя овлöны? Сюраöсь, комолöйöсь, сьöдöсь, гöрдöсь, сераöсь, джыннянаöсь да джыннянтöмöсь.

— Дак нiя разь ягöдсö сёйöны жö?

— Эзö тай мыйкö бокö керö.