Прошинаын тулыс (Пармаын асыв, 1974)

Месяц сьöрна кыссисö споррез да басниэз, и сё жö нiя вайöтiсö отирсö коланаöдз — Прошинаын аркмис колхоз. Но пырисö сэтчö не быдöнныс. Пырисö нiя, кин мыдзис ни лэдзны йöз вылö ассис сирньылöмсö и видзчисис öтласа уджись ас пон­дасис кытшöмкö отсöт. Нiя жö, кин эз тöдö нужда, кольччисö бокын.

Пырисö прошинчи артельö, а пессьöмыс ны коласын эз кус. Висьтав­ны кö веськыта, то сiя öзйис быд вынöн только öнi. Сибöтчис кöдзан кад, а артельлöн — не вöв, не додь. Эз тырмö гöррез да пиняэз, некинöс вöлi доддявны улык да валёк коласö, немöн кöдзны гöрöм мусö. А кадыс тэрмöтiс: вот-вот косьтас, и песока местаэзöт позяс ни осьтны медодзза колхознöй борозда.

Эна причинаэс и чукöртiсö прошинчисö нятьöсь апрелься рытö кол­хознöй правленнёö, собраннё вылö.

Председательыс, Волов Степан, дженытика висьталiс быдöнныслö положеннё йылiсь, кöдö и сы баснитöг ни быдöнныс тöдiсö.

Пыстогов Максим, кöдасянь одзжык некöр эз позь кывны лишньöй кывсö, öнiмедодз сувтiс да пондiс шупыта баитны:

— Весь тэ, Степан, сiдз баитан, что нем миян абу, нем оз тырмы. Одззася годдэзö гöрим да кöдзлiм быдсöн муэсö, и быдöс тырмывлiс, а таво бытьтö оз. Оз тырмы миян, голытьбаыслöн, сiйöн, что миян киэзöн быдтöм вöввес сулалöны богаттёыс картаын, миян киэзöн вундöм да вартöм сюыс куйлö ны чоммезын. Одзöсасим быд год — тырмас! А таво босьтам нылiсь — да и дöс сэтöн.

Ыджыт шум лэбтiс Пыстогов Максимлöн басниыс, лöньсьöтны кöдö öнiэз ни позь чожа.

— Сiдз, сiдз, Максим вонö, веськыта баитан! Одзöсасим! Тырмас!

— Мый кöдзысыслö весь куйлыны, кöр кулаччоыслöн муыс абу?!

— И вöввесö нылiсь босьтам!

— И гöрресö чукöртны колö! — сувтiсö артельса Максим дор. Но сэтöн жö адззисисö и нiя, кöдналö эз гленитчы эта басниыс.

— Ассит сет, а йöз доброыс вылö киэтö эн лэбтав — пиньлаласö!— сэтöн жö порог дорсянь код голосöн горöтчис Пыстогов Максимлöн томжык воныс, Васькаыс. Но эта кыввезсянь Максимлöн чужöм вылас эз вöрзьöтчы öтiк жилаок. Кажитчис, что сiя, ассис ёрттэсö кывзiкö, эз и кыв воныслiсь грöзитчöмсö.

А Васька, кöть и оз видз батраккесö, быдсöн кулаччо дор сулалö. Абу сiя кулак — кык вöв да кык мöс видзö, да муыс невнаöн унажык мукöддэзся, — но виртöм морт сiя, сотана. Кин не сы сьöртiбаитö — враг.

Максимлöн зоныс, дассизимгодся Миша, пукалiс сэтöн жö. Пеллесö öшöтöмöн кывзiс зонка айыслiсь баснисö и, ас кежас шыннялöмöн, думайтiс: «Вот эд, унасö оз баит, а висьталас — оз сорась. Этö, натьтö, сiйöн, что етша баитö, а унажыксö думайтö. Сiдз, ая, мырддьыны — и дöс сэтöн!»

Эстöн жö зонкалö усис тöдвылас, кыдз мöйму арнас, медбур погоддяö, кыкöн айыскöт нiя быдса неделя сьöрна вундiсö Бакалов Егорлö. Вундiсö йöзлö, а сы коста асланыс киссис. А кытчö нö воштiсян? Колiс вештiсьны тулыснас одзöстöм кöдзыс понда. Лунтырöн вундiкö кос сiдз мыдзö, что рытъявлас не мышкыртчыны, не веськöтчыны. Вундöмподыс вирöдз бытшкалö да гыжьялö кисойез, сюсö орöттöг нямралöмсянь чуннез вугмöны да дугдöны кöстасьны. И öддьöн курыт лоö сьöлöм вылын, кöр тöдан, что этö сьöкытся-сьöкыт уджсö ковсьö керны не ас понда, а йöзлö. Мукöд коста эта öбидасянь нельки горшö мыйкö тасасьö, быд жилаын пондö пизьны вир и сьöкыт лоö лолавны. «Но ась, лешак сiйö босьт. Чулалiс, тыдалö, эта кадыс, — думайтiс одзлань Миша. — Таво оз ни понды ковны вештiсьны. Сьывсис богаттёыслöн сьыланкывныс. Властьыс öнiасланым и муыс тожö».

Видзчисьны айсö собраннё бöрсянь Миша эз понды. Эд кадыс тулысся, а сiя том.

Табунöн петiсö правленнёсис нывкаэз. Недыр мыйись и зонкаэз кинитчисö ны бöрö жö. Правленнё дынсянь жö табуныс паськалiс öтмöдöрö деревня пасьта. Нiя кольччисö кыкöн: Мишаыс да сы кодь жö том, винерик да кокнит кокйыла нывка Еля, кöда мунiс стын пöлöнняс зэв зонкаыс одзын. Мунiс сiя бöрас дзар кертöг да тэрмасьöмöн, бытьтö кокнит кай лэбзис борддэз вылын. Сiдз чулалiсö улица, мöдiкö. Неылын горт дынсяняс нывкаыс сувтiс.

Собраннё вылын нывкаöс бöрйисö почтальонöн. Голосуйтiкас нывкаыс шы эз лысьт сетны паныт и только öнiпондöтiс эта йылiсь баснисö.

— Мый нö öнi, Миша, менам лоас?

— Мыля?

— А почтальонас пуктiсö да. Мый ме сэтöн понда керны? Нем эд ог куж.

— А сэтöн и кужны нем. Пондан быд лун Пальникöдз котрасьны, сводкаэз да письмоэз новйыны.

— Дак ме эд уджала жö бы.

— А сiя разь не удж?

— Кытшöм ни сэтöн удж! Ытшкисьны жö бы нето вундыны, а то гижöтоккезöн котрасьны.

— И сэтöн морт колö. Боёк тэ, вот и сувтöтiсö. Сэтöн мортыс колö том, чож — не дышöтчись, — эна кыввез дырни зонка пондылiс жмитны нывкасö ас бердас.

— Ноко, эн бöбав, — горöтчис Еля, а ачыс кудель печкöмсянь чорзьöм чуннезнас жмитыштiс Мишалiсь кисö. — Видзöт жö, талун ойыс кытшöм пемыт да страшнöй.

— Мый, поди, страшнöйыс, ой кыдз ой.

— А вот видзöт.

Только öнiтоммез пондiсö дзирбарасьны öтмöдöрö. И былись, гöгöр вöлiсэтшöм пемыт, что нельки медматын сулалан керкуэс тыдалiсö умöля. Биэз эта коста деревня пасьта некинлöн эз ни сотчö. Гöгöр вöлiшы не тöв. Неважын сылöм лымыс кушöтiс увтсис сьöд мусö. Тöлiсь рытйис и абу на ештöма лэбтiсьны. Сэтчö жö вöлiкымöра. Сьöд рöма, гырись да сьöкыт кымöррез тэрмасисö кытчöкö одзасьöмöн. Еля дивуйтчöмöн видзöтiс кымöррес вылö и думайтiс ассис думаэз. Зонкаыс жмитчис зэв сы бердö. Неумöль, тыдалö, лоис этасянь и нывкаыслö: сiя лэдзис юрсö чочком лён кодь чикиссезнас Мишаыс пельпон вылö.

— Кывзы, Миша, а мыйлö быдöс этö?

— Мыйсö?

— Но вот этö, — сiя эшö зэвжык жмитiс юрсö зонка пельпон бердö.

— Сiдз ни оланыс керöм, что томмес быдöнныс любитöны. Оз позь, сiдзкö, сытöг.

— И сьöкыт кад коста, война коста, сiдз жö?

— Сэтшöм кадö, мед мортыслö кокнитжык вöлi, любитны колö эшö буржыка.

— Ой, а быль эд этö, Миша... мед кокнитжык да гажажык сьöлöм вылын вöлi. — И сэтöн жö нывкаыс вежис ассис баснисö. — Мый жö, кывзы, ашын лоас? А кыдз тэ, Миша, думайтан, сетасö богаттёыс вöввесö да кöдзыссö?

— Ог тöд, видзöтам вот. А сетасö, озö — мырддям и дöс сэтöн. Не мунны жö миянлö мöдiлаö кошшисьны, кöр асланым киэзöн дзимлялöмыс да чередитöмыс кулаккес дынын куйлö. Ме думайта мöднёж некыдз оз позь.

— И тэ тожö öтлаын öктынытö мунан? Эн, Миша, оз ков. Нiя тэнö эшö вийны ештасö.

— Ме айöкöт öтлаын. Кытчö сiя, сэтчö и ме.

Не висьтавны, мый дырна бы эшö кыссис томмес коласын баитöмыс, но эта коста правленнё ладорсянь ойыслiсь пемыт лöньсö дзугис кытшöмкö невежöртана шы. «О-ых!» — кинкö горöтiс быд вынiсь, но голосыс сэтöн жö орис. Эта вылö омöн деревня пасьта лэбтiсисö вувтны поннэз, и вежöртны сэсся нем эз позь.

— Котöрт гортö! — горöтчис Миша нывкаыслö, а ачыс сэтöн жö уськöтчис пемытiнас.

Неылын правленнё дынсянь, йöр бердас, горöн маттясикö, жöдзисö кынымкö морт. Ны коласын кылiс Волов Степанлöн голос. Миша повтöг сибöтчис мужиккес дынö. Йöр бокас, нятяс, вöрöтчытöг куйлiс морт.

— Кинöс сiдз, Степан дядь?

— А-а, лешакпиян! Мый, эн чайтчы невнасö öтлаын правленнёас пукалыштны?! — уськöтчис председательыс зонкаыс вылö. — Кытöн тэнö дявыс кыскалiс? Адззан, бандит табуныс айтö мый керисö? Э-эх! — кулаккесö пидзралöмöн гирчыктiс пиннезнас Волов Степан. — Караулитiсö, сiдзкö, сволочь табун. Но, ужо, петас тiянлö кадыс! Муыс кок увтаныт пондас сотчыны! Ужо-о!

II

Пыстогов Максимöс вайöтiсö гортö, миссьöтiсö да водтöтiсö ольпась вылö. Садьыс мужиклöн эз вöв, а ачыс эшö жагвыв кыскалiс ловсö.

— Больницаö колö кыскыны, — шуис Волов Степан. — Кылiн, Миша? А ме понда кошшыны кöиннэслiсь следдэсö.

И одзжык прошинчи коласын сэтшöм историяэс вöвлiсö нешоча. Этасянь медперво этö событиесö Миша примитiс обыкновеннöй туйö. «Куйлыштас, поди, да и чеччас», — думайтыштiс сiя, кöр мужиккез сьöрсьöн-бöрсьöн петiсö керкусис.

Ашынас Миша саймис видчöмсянь.

— Вот эд, вот эд кытчöдз сiя, юртöм оланыс, вайöтö, — гор гöгöрас бергалiкö, лöгсянь гырдöсьмöм синнэзнас вирдалiкö, вартан машина моз сярзис мамыс. — Адззис, тыдалö, öтiкыс аслыс смертьсö. Кыдз эшö тэнö, срамöс, ловйöн кольöмась. Öтлаын жö колiс юрсö тальны! И Елькаытлiсь сэтöн жö кывсö орöтны — уна баитö.

Миша паныт эз шыась. Сiя сибöтчис айыс дынö и, сы пыктöм чужöмö видзöтiкö, кывзiс мамыслiсь быдкодь нимкодялöмсö да туйдöмсö. Кывзiс зонка и кылiс, кыдз сьöкытся-сьöкыт, вöвлытöм эшö öбида чукöртчис сы сьöлöмын. Некыдз эз веритсьы, что эна кыввес, кöднасянь нельки сьöкыт лоö лолавны, — мамыслöн. А Öгань эта коста дугдывтöг сярзис одзлань:

— Да кысь тiсiйö кывлiт! Ме тай эг на адззывлы, мед отирыслiсь муэсö öтлаöтiсö кытшöмкö сэтчин лешаччöй артильö, дьявыв артильö. Эз на тай эта вöвлы, мед быдсöн деревняыс öтiк бекöрись панясис. Эз, эз сэтшöмыс вöвлы, да оз и ло. Разьсяс тiян артильныт, öтiк гожумöн разьсяс, эстöн ме и эм! Кыдз тiмöдат овны, еныс одзын сiдз грешитат да! И...

Сэтчö пырисö мужиккез, мед кыскыны Максимöс районö, да и милицияö ветлыны сэтчин. Но Максим садясис и висьталiс, что некытчö оз мун, а Öгань вашöтiс отирöс керкусис.

Пондас артельыс овны али оз — этö ас ылöснас Миша эшö эз тöд. Веритiс отир, веритiс сылöн айыс, кöда неетша ни быдкодь олансö ештiс пешлыны аслас векын, этасянь веритiс и сiя. Миша айыс моз жö баитiс етша — унажыксö думайтiс да керис.

Асывся пемытсорнас зонка пасьтасис да иньдöтчис колхознöй правленнёö.

Доддялöм подводаэзöн активисттэз чукöртчисö эта асылö правленнё дынö. Недыр кыссис басниыс: мыйсянь пондöтчыны да кинлö мый бердö кутчисьны. Сыбöрсянь быдöнныс чеччисö да иньдöтчисö öтöтрö. Öтлаын быдöнныскöт петiс правленнёсис и Миша.

— А тэ кытчö? — öшын увтас ни сувтчыштiс да юалiс сылiсь Волов Степан.

— Тiянкöт жö, öтлаын...

— Э-эх! Максим! Максим! — зонкаыс вылö видзöтiкö пыдына ловзисис председатель. — Но мый, öтлаын, дак öтлаын. Мунам!

Ойся событиеыс ас мознас вöрзьöтiс быд мортöс. Бедняккез одз асывсянь чукöртчисö колхознöй правленнёö и лöгувья баитiсö повтöг быдöс йылiсь; богаттёыс коласiсь некин эз мыччась эта асылö, а Пыстогов Васька, Максимлöн учöтжык вон, кöда медöддьöн увтö артель вылö, и нач эз вöв гортын. Этасянь кöдзыс да гöран-кöдзан инвентарь вöлiсö чукöртöмöсь öтiк лунöн.

III

Чулалiсö куим лун. Эта кадö Пыстогов Максимсö песöм йылiсь прошинчи коласын эз паськав некытшöм юöр. Мишакöт пантасикö мужиккез только юасисö, мый ни керö айыс. Асывнас да рытнас мукöдыс ны коласiсь пыравлiсö недыр кежö, мед видзöтыштны ёртныс вылö. А районсянь сiдз и некин эз вовлы — не милиционер, не врач.

Мишалöн мамыс, Гöрд Öгань, кажитчис, только сiйö и видзчисис, кöр мужикыс дугдас кыскавны ловсö. Эта коста Максимлö сiя нельки öтпыр и юны эз уд. Сибöтчас сiдз порог дынас, сулалыштас невна, видзöтöв-керас поиктан вывтыр вылас, пернапасасяс да бергöтчас бöр. Позис вежöртны, что Öгань кеймис еныслö, мед сiя чожажык дзимлялiс сы син одзись мужиксö. А Максим сё олiс. Кадiсь кадö шочыника да недыр кежö сiя осьтлiс синнэсö и баиттöг, здоровöй кинас мыччалöмöн, корис юны.

Пуксисö Максимлöн рожабаннэс, вöйисö да сьöдöтiсö сингуэс, косьмис, вöснямис да нюжалiс нырыс. Быдсöн чужöмыс сылöн вöлiбытьтö лякöма воскись, виртöм, чочком да шучтыдалана. Не чеччöтны сiйö, не пуксьöтны эз туй — орлалöм гырксянь нырöт и öмöт чепöссьывлiс вир.

Нёльöт лунас, шондiпуксян гöгöр, Максим садясис, осьтiс синнэсö. Öгань дзар керыштiс мужикыс вылö, перыта босьтiс ведра да петiс чилькöтчыны. Максим корис дынас зонсö.

Кок чуннес вылын, мед не гымöтны джодж кузя, Миша перыта кыскис пызан увтiсь джек, сувтöтiс сiйö айыс ольпась дынö да пуксис. Медперво Максим корис юны. Зонка жагвыв лэбтыштiс öтлаын подушканас айыслiсь юрсö и гульк-мöд кисьтiс айыслö öмас.

— Но, зо-нö, ов-сис. Дзе-бан, а-чыт, — сьöкыта вöрзьöтiс тырппезнас Максим.

— Эн кув, ая, эн кув... Верман, дак висьтав, кин тэнö... Висьтав, ме сыкöт ачым вештiся! Кула, но вештiся, висьтав только, ая.

Максим дыр видзöтiс зоныс синнэзö, бытьтö юалiс да мöдiс тöдны, быль я сiйö зоныс баитö. Одззамоз жö видзöтöмöн сiя кынымиськö осьтлiс жагвыв öмсö, сэсся горöтчис медбöрья кыввез. — Да... дя-дьыт, Васька дядьыт.

Эта жö минутаö Максим вывтыр пасьта паськалiс кытшöмкö кöдзыт, кöдасянь нельки пиннес пондiсö чакöтны öтамöд бердö. Быд вынiсь видзсьöмöн Миша неöтпырись качыкнитiс юрнас.

— Вежöртi, ая, вежöртi.

Максим эшö пондылiс вöрöтны тырппезнас, старайтчис мыйкö висьтавны, но вежöртны эта басниись нем эз позь. Вежöртiс Миша только сiйö, что басниыс мунiс мамыс йылiсь, но мый? Эта коста Öгань пырис керкуас, и Максим лöньсис. Сiя чöлöмöн мöдöтiс синнэзнас иньсö комланяс, а сэсся öтпырись дзар керыштiс зоныс вылö. Миша сэтöн жö кватитiс айыслiсь сырлёль мунöм кисö, но сiя вöлiкöдзыт ни, не олiсьлöн. Сэк жö айыс кынымиськö дрöгнитiс, тшöкаыс пондiс лэдзчисьны, тырппес кынмисö.

Быдсöн вывтырнас дрöжитöмöн Миша лэбтiс юрсö. Шондiлöн медбöрья югöррес нильдыштiсö öшын косяк пöлöн да петiсö керкусис. Керкуас пондiс пемдыны. Лун чулалiс.

IV

Максимöс мöдöтiсö медбöрья туйö. Эта луныс инмис медодзза гöран лункöт. Сiйöн кольлалiс сiйö чуть ли не быдсöн деревняыс. Гöриссез гробыс бöрсянь поводдэзöт нуöтiсö ассиныс гöррезö доддялöм вöввез.

Эз брякöтчы гробыс вылын Максимлöн иньыс, Öгань. Сылöн сьöлöмыс аслас мужик дынö ештöм сайкавны эшö Максимыс кувтöдз. Горзiсö инькаэз, кöдна лыддисö Максимсö бур соседöн, бур мортöн.

Вильмыс ыб пондöтчö самöй Прошина понсянь. Медперво чöвпан моз сiя лэбтiсьö вывлань, а сэсся кыссьö лунвыв скатлань не öтiк верста сьöрна вöр дорöдз. Вылын да паськыт, сiя медодз мыччисьö тулыснас лым увтiсь, а песока местаыс медодз косьмö гöр увтö. Ыб шöрас, десятина кык-куим пасьтöн сулалö неыджыт вöрок. Пуэс эстöн унажыксö садитöмöсь морт киöн — пожуммез, кöззэз, кыдззез, льöмпуэз. А ны коласын öтмöдöрын гажтöма руд видзöны пуись жö керöм, тöвсянь да зэррезсянь лöзöтöм кресттэз — эта и эм могильник.

Торйынмоз мöдiккез дынсянь, матöжык туй бердö, вöлiгарйöм Максимлö могила. Гробсö лэдзисö чöлöмöн. Пальников Паша, гöрд партизан, медодз чапкис зырнас гробыс вылö мусö да висьталiс:

— Но, Максим вонö, тыртам... Тыртам тэнö, а тэкöт öтлаын и сiйö олансö, кöда не аскадö водтöтiс тэнö гробас. Не тэнö, не тэнö бы эстöн талун тыртнытö, но эн вермы берегитчыны вирьюиссес шогья.

Эна кыввес да гробыс вылö киссян муыс бытьтö кыз онiсь саймöтiсö Мишасö. Видзсьыны сэсся эз вермы — пöдтiсö синваэз.

Отир пондiсö рознитчыны, а гöриссез сэтöн жö межа дорас сувтöтiсö лёдззезöн вöввезнысö да бергöтiсö сабаннэзнысö увлань.

Пыстогов Максимлöн пöрись Сивкоыс мунiс медодзын. Гöрсö видзис Миша.

V

Жагвыв пондiс вежсьыны ыблöн чужöмбан. Одзжык янсöтчöм уна торрез вылö, öнiсiя свалитчис öтлаö. Омöн ыб пасьта петiс межатöм пашня.

Медодзза лунсянь Миша уджалiс быдöнныскöт öтлаын. Зонка старайтчис быд вынiсь, пизис уджас, кыдз тулысся визыв шор. Лунтырöн, одз асывсянь сёр рытöдз, сiя вöтлiсис гöрыс сьöрын, но эта коста и минута кежö эз янсöтчывлы думанас айыс йылiсь. Зонка öнiвежöртiс ни быдöс лоöмсö.

Вежöртана вöлiсiя, что дядьыс, Пыстогов Васька, эта рытö вöлiкод. И юкталiс сiйö не кин-нибудь, а кулаккес. Нiя и ызйöтiсö сiйö эта нятьöсь удж вылö. Но сэтшöм ли кокнит лэбтыны ки морт вылö, пöрисьжык вон вылö? Тöдiс Миша, что нiя и одзжык олiсö не дружнöя, но мыйсянь, кытшöм причина увья — зонка понда эта вöлiнач тöдтöм. Сэтчö жö и гортын, айсö дзебöм бöрын, оланыс Миша понда лоис кыкись умöльжык. Дугдывтöг видчöм понда мамыслöн причинаöн вöлiзонкалöн отиркöт öтласа удж. Кык неделя сьöрна нiя эз баитö лоöмыс йылiсь сiдз, кыдз колiс бы мама-зоналö. И только öтпыр Öгань юалiс зоныслiсь:

— Мый нö айыт кувтöнняс баитiс?

— Мый сiя кывтöгьяс баитас? — шыасис паныт Миша. — Ачыт эд тöдан.

— Поди, мыся, и висьталiс — кин сiйö...

Нельки эна кыввезын зонка кылiс ас пондасис кытшöмкö невежöртана öбида. Сiя только ыш ловзисис сьöкыта да петiс керкусис. Мамыс, тыдалö, веритiс зоныс кыввезлö и юасьны сэсся эз понды.

Айыс юöртöм йылiсь Миша эз баит некинкöт и отир коласын. И кольччис кö мый сы оланын гажöтанаыс да кокньöтанаыс, то этö Еля. Чуть ли не быд рытö пантасьлiсö нiя эта сьöкыт кадö. Миша сылö веритiс, кыдз аслыс, и баитiс нывкаыскöт быдöс йылiсь, висьталiс и Васька йылiсь.

— Кывзы, Миша, а дядьыт я? Думайта вот ме, и некыдз оз веритсьы.

— Не сiя, шуан? А мыйсянь сэк сiя гортiсь пышшавны пондiс? Эд сэксянь öнöдз и син одзын оз мыччась.

— Быль эд, кывзы, быль, — соглашайтчис нывкаыс. — Но колö ли тэныт сэтшöмыскöт öтнатлö кутчисьны? Сiя эд тэнö сiдз жö... — медбöрья кывсö Еля эз лысьт горöтчыны.

— Мый лоас, сiя и ло, но айö понда ме ачым вештiся. Вежöртан, Еля, ме сылö кувтöнняс кыв сэтшöмö сетi.

Эта баснисянь нывка эз понды сэсся падтыны ассис ёртсö.

Пантасьлiсö нiя векнитик улицаын, кöда петкöтiс ыббез вылö. Петанiнас öтмöдöрсянь сулалiсö баняэз, öтыс Еляэзлöн, а мöдыс Пыстогов Васькалöн, кöда олiс ордчöн Еляэскöт.

Öтпыр рытнас, пантасьöм коста, пондiс зэрны. Томмес сайöвтчисö Еляэс баня передникö. Вдруг кытöнкö неылын ны дынсянь дзуркнитыштiс йöр потш увтын ньöр.

— Пон, натьтö, кинлöнкö, — шушкыштiс Еля.

— Чöв тэ, эн шыась, видзöтам, — негорöн шыасис паныт Миша да сэтöн жö зэвжык сибöтчис осьта дынас.

Недыр мыйись улица мöдöрас, йöр пытшкас, баня сайсянь гусясьöмöн моз мыччисис мужик. Горбыльтчöмöн, вамöм паськöмнас кышпашасьöмöн да пишальсö конувтасмоз видзöмöн, сiя межа бердiсь бороздаöттяс иньдöтчис керкулань. Вамöм дзира воротаэз, кöдна карта вывсянь петкöтiсö веськыта садник йöрö, оссисö и пöднассисö шытöг. Миша тöдiс локтiсьсö. Важын ни сiя видзчисис этö пантасьöмсö, но мылякö эз думайт, что лоас эта лунö, и öнi, öшöм, эз тöд, мый бердö кутчисьны, мый керны.

Недыр нiя эшö сулалiсö, видзчисьöв-керисö, кöр быдöс лöньсяс, сэсся петiсö деревняас. Эстöн Еля пондiс панлавны Мишаöс:

— Миша, дона менам, кывзы менö öтпырись: эн мун öтнат. Сiя эд зверься-зверь. Сiя тэнö вияс. Баитчö кинкöткö да сiдз. Мöдöтпыр позьö, сiя эшö локтас. Кылан, Миша?

Но нывкалöн кыввес эз ни пырö зонкаыс юрö. Сiя только старайтчис перытжыка янсöтчыны Еляыскöт. Йöррез пöлöн, мед некинкöт не пантасьны, Миша тэрмасьöмöн локтiс гортас.

VI

Пуляöн зарядитöм пишальыс куйлiс сарайын. Воротасö осьтны Миша эз понды, пырис и петiс увтöттяс. Дас минута бöртiсiя сибöтчис ни баня дынас, потшшез коласöт тöрöтчис йöрас. Стена пöлöнняс, важ петшöр коккез коласöт, кыссис передникöдз да пуксис плашникöн поткöтöм драннез сайö.

Дженыт тулысся ойыс. Шондiпуксян кадсянь и пемдыны бытшöмик эз ешты, а асывлань скатыс пондö ни бöр югмыны. Чулалiс час-мöд. Ойшöр пора дугдiс зэрны. Неыджыт тöв орлалiс да вашöтiс öтмöдöрö зэран кымöрресö. Му весьтын шытöг öгралан звездаэз пондiсö чочкоммыны, бледöтны. Ятнöйсялiсö ылiсь вöррезлöн да ыббезлöн доррез. Тöлыс вайöтiс льöмпулöн да топольлöн оссьöм почкаэзлiсь чöскыт дук. Шондiыс эшö эз на пет, но муыс, небыт да веж мича рöма, бытьтö паськалiс син одзын, гажмис. Сибöтчис асыв, сибöтчис сувтчывтöг, мед югдöтны да шонтны цветитан мусö, мед саймöтны да гажöтны сы вылын олiссесö.

Мишалöн пондiс петны он. Охота вöлiвашöтны юрись быдöс сьöкыт думаэсö, вунöтны сьöлöм пидзыртан öбидасö и водны эта пыдöстöм, небыт-лöз рöма кымöр увтö, онмöссьыны сöстöм ру вылас сьöкыт да кыз онöн и узьны пöттöдз, а кöр петас шондi, кутчисьны гöр бердö и гöрны, гöрны, уджавны садь быртöдз.

Асывся картинаыс вылö дивуйтчикö зонкалöн небзис сьöлöмыс. Недыр кежö сiя нельки вунöтiс, мыйлö локтiс татчö, мыйлö сiя пукалö баня передникас дзебсисьöмöн эта сöстöм асылö. Эз казяв Миша, кыдз оссис воротаыс и кöр петiс дядьыс. Сы кокшысянь ни зонка лэбтiс юрсö и казялiс: спина саяс пишальöн, кузь патронташöн коскöттяс, сiя жö бороздаöт, кöдаöт локтiс рытнас, Пыстогов Васька сибöтчис баня дынас. Вöлiнач югыт ни, и сiя тэрмасис сайöвтчыны отир син одзись. Эз тöд и эз адззы эта коста бандит ас одзсис некытшöм полöтöм, этасянь и чужöмыс кажитчис лöньöн и нельки рамöн. Роднöй вон Максимлöн, сiя быдсöн вачкисис сы вылö: и вывтырнас, и чужöмнас, и походканас. Öнi, кöр сiя вöлiмушка увтын, но нем эз тöд эта йылiсь, зонкалö жаль лоис дядьсö. Миша нельки недыр кежö вунöтiс сы вылö ассис öбидасö, и сувтiс син одзас картина, кöда вермис шогмыны часöт. Кылiс Миша, кыдз кöдзыт да сьöкыт ньылöм воттез вевттисö сылiсь кымöссö, чеччалöмöн пондiс пессьыны моросас сьöлöм, а дрöжитан киэзын пишальыс жагвыв лэдзчисис увлань. Эта коста бандит шытöг да кокнита петiс йöр мöдöрас и межаöттяс иньдöтчис кыраслань, кöда нюжалiс вöр бердöдз.

VII

Лöньсис невна öбидаыс эта ой бöрсянь Миша сьöлöмын. Зарядитöм пишальсö зонка одззамоз видзис ас кипод увтас, но эта йылiсь старайтчис не думайтны. Но недыр усис овны этöн лöньсьöтан думанас: нёльöт лунас Еля эз берт Пальниксянь.

Чулалiс ой. Асывнас ветлiсö Пальникöдз юасьöм могись, но сэтчинiсь нывка мунöма эшö луннас. Одзлань видзчисьны вöлiнем — пондiсö кошшыны. Гöранiсь вöлiсö босьтöмöсь кынымкö морт, öтлаын ныкöт и Миша.

Дыр кошшисьны эз ковсьы: адззисö нывкасö нёльöт верста вылын. Нач пасьтöм, курччалöм тырппезöн да пиньлалöм киэзöн.

Дзебисö Еляöс ордчöн Пыстогов Максимкöт. Дзебисö öддьöн шоныт да гажа кадö, кöр и ыбын, и вöрын горöн дзульзисö кайез и чочком-чочком цветтэзöн тырисö льöмпуэз. Медъюгыт мечта, оланын медгажа счастье, медыджыт да медбöрья надежда колис Мишаöс нач öтнасö.

Только öнiвежöртiс Миша, кытшöм ыджыт ошибка керис сiя баня передникас чулöтöм ойö. И проститны этö ошибкасö аслыс сiя некыдз эз вермы.

Елялöн мунöмыс нем эз веж му вылас. Одззамоз цветитiс льöмпу, видззез вылын оссисö тулысся мича цветтэз, гажöна шумитöмöн паськалiс пуэз вылын лист, ыбшаррез дугдывтöг кисьтiсö ассиныс басöк да гора сьыланкыв. Одззамоз асывся югытыс рамыника югдöтлiс мусö, лэбтiсьлiс да шонтiс золотöй югöра шондi, а ойнас вылiсянь шыннялöмöн шытöг видзöтчисö звездаэз. Быдöс, мый вöлiодзжык, сiдз жö кольччис ас местаö, только Миша понда нем öнiэз вöв этаись. Зонка эз адззы сiйö, мый вермис бы гажöтны мортлiсь синбур, эз кыв пельшынас муыслiсь морт понда сьыланкывсö.

Быд вынiсь видзсис сiя отир син одзын шойна дорись бертiкö. Зубытыслö да курытыслö волясö сетiс гортын. Сымда ни ештöм öксьыны эта тулысö Миша моросын, что сьöкыт вöлiлолавны, пöдтiс. Этасянь кыдз учöтик кага, чапкасис сiя сараяс, зубытöдз пиньлалiс чуннесö.

Лöньсис зонка сэк, кöр выныс бырсис, а сьöлöмас лоис пустота. Сарайын вöлiжар, сьöкыт лолавны, и ой кежас Миша кайис вöскö. Но и сэтчин вöлiжар, и сiдз жö сьöкыта кöсичаэзö вартiс вир. Öтлаын сыкöт чулавтöг бергалiс дума: вештiсьны, вештiсьны, вештiсьны. Вештiсьны одзжык, нежели этö керасö Волов Степан да мöдiккез.

VIII

Миша саймис стукöтöмсянь. Медперво, повзьöмувья, зонка эз вежöрт, кытöн да мый лоис. Но вот негорöн стукöтöмыс паськалiс мöдöтпыр. Кылiс сiя öшын увтын, карчйöр ладорсянь.

Миша кыссис стена бердöдз да дзар керыштiс увлань. Керку стена бердö зэв жмитчöмöн сулалiс морт. Ёна мыйкö дернитiс зонкалiсь сьöлöмсö, кöдасянь сiя пондiс пессьыны вынöн да перыта.

Дыр мыйись öшыныс жагвыв оссис.

— Васька, тэ? — юалiс Мишалöн мамыс.

— Ме. Зоныт кытöн?

— Сарайын валяйтчö.

— Но пöднав, ме увтöттяс пыра.

Самöй öшын увтас, джоджулас пырны вöлiлöсьöтöм неыджыт ыбöс, кöдö тупкавлiсö бытшöмика только тöв кежö. Жагöника, медбы не дзуркнитны, Пыстогов Васька осьтiс сiйö и недыр мыйись саясис джоджулас.

Асылöдз кольччöм кадсö киас пишальöн зонка чулöтiс вирöдз увтын.

IX

Петiс Пыстогов Васька деревнясис эшö лысваыс усьтöдз. Конувтас мешöкöн вуджис сiя льöмпу увтöт йöрсö, дзирбарасьöмöн кыссис понуллез да бадь кусттэз дынöдз.

Эз позь öштыны весись кадсö. Час бöртi, кöр пондiс ни усьны лысваыс, Миша петiс гортсис. Бандитыс следдэз кузя сiя вуджис непаськыт оль да петiс веськыта ыббез вылö. Кöдöрö мунны, думайтны ковсис недыр. Бандитлöн босьтöм направленнёыс уськöтiс зонкалö тöдвылас сылiсь позсö.

Кыкьямыс верста ылынаын деревня дынсянь куйлiсö дедыс киэзöн весöтöм гажа вилиннэз. Некокнит вöлiшедны сэтчин зэра кадö. Туйыс унажыксö кыссис зыбуна оллез пыр. Сэтчö жö таво, гырись ваэз коста, Пиканшор вылiсь вöлiнöбöтöм пос. Ольсö вуджнытö вöлiнекыт. Этасянь и отирыс ветлiсö сылань етша. Энö тöдса местаэсö и бöрйис бандит аслыс сайöвт туйö. Вилиннэс коласын строитöм будка, кытöн позис сайöвтчыны и овад да зэр шогья. Буржык места некытiсь сiя сэсся бöрйыны эз вермы. Этасянь сэтчин медодз и видзис Миша ассис туй. Сьöрас зонка босьтiс только заряда пишаль да шапка пель бердö вöлiдомалöм сьöла пис.

Пиканшор дорын Миша чинтiс оськöввесö и унажыксö пондiс видзöтны кок увтас. Кыдз и видзчисис, следдэс петiсö шор дорас — неохота, тыдалö, вöлiбандитлö вуджны ольсö веськыта вöрöттяс.

Рознитчöм керрез кузя Миша вуджис шор мöдöрас. Недыр мыйись следыс кежис туй вывсис шульга бокас. Этасянь пондöтчисö гажа кыдзовöй рассэз. Следитны эстöн лоис сьöкытжык. Тшöка быдман пуэз коласын туруныс вöлiшоч, унажыксö кöчазь, кöда вылын умöля тöдчис пыркöтöм лысваыс. Неылöдз мунöм бöрсянь следыс нач öшис. Миша сулалыштiс öтiк местаын, эшö öтпырись кыдз колö видзöтiс ассис пишальсö и сьöкыта ловзисис. Вöррес эстöн конецтöмöсь, и öштыны кö след, кошшисян кувтöдз — он пантав. «Только бы эз казяв сiя менö одзжык», — гажтöмкодя думайтыштiс зонка да буржыка кутiс киас пишальсö.

Чуклясис Миша öтмöдöрö тшöк рас коласöт и сувтчышалöмöн кывзiсис чуть ли не быд оськöв понсянь. Вöрзьöтчытöг сулалiсö том листöн вевттьöм пуэз, быдкодь голоса кайпöлöс дугдывтöг дзульзис паныт петан шондiлö. Сылöн золотöй рöма еммес первуись нильдыштiсö пу йыввез вылöт, и этасянь пемыткодь вöрыс бытьтö ловзисис да öзйис. Шондiюгöррес содтiсö кайпöлöслö öд. Но вот ны коласын, кытöнкö ордчöн кылiс сьöлалöн тöдса вöснитик шы. Мöдöрсяняс сылö паныт шыасис мöдiк — öтпыр, мöдöтпыр. Недыр чöлöм бöрсянь вились кылiс пискöмыс, а минута бöртiпаськалiс лыйöмлöн говк. «Вöралан, сiдзкö, вот и бур», — думайтыштiс ас кежас Миша и сэтöн жö чуть ли не кынöм вылас иньдöтчис сылань. Пуэс коласöт Миша видзöтiс, кыдз турун коласын пессис ранитöм, вирöсьмöм борда кай.

Пыстогов Васька босьтiс кок увтсис кайсö да сюйыштiс голянас ремень сайö. Сэсся сiя дженытика пискыштiс и не тэрмасьöмöн иньдöтчис одзлань. Миша мунiс бöрсяняс. Öнiзонка старайтчис не лэдзны ни сiйö син вывсис. Чулалiс эшö верста етш, и вот нiя бергöтчисö шондiньылат. Этö только Миша и видзчисис. Öнiсiя сувтiс и недыр дзирбарасис öтмöдöрö. Син вылö усис улiсянь вожöн быдмöм кыдз, кöда коласö пöрöмöн сибдöм кöс валёжина. Сэтчö и пуксис Миша. Неылын одзас кадiсь кадö кылiс пискöм, но öнiзонка тöдiс ни этö «кайсö». Сiя лöсьöтiс пишаль дулосö пöрöм пу уввез коласö и босьтiс öмас сьöла пис.

— Си-и-ип, си-и-ип, сип-сип-сип-сип-сип, — кылiс неылын одзас.

— Си-и-ип, си-и-ип, сип-сип-сип-сип-сип, — шыасис паныт Миша. И кынымись бы эз кыв пискöм, зонка аслас местасянь быдпырись шыасис паныт. Пондöтчис аскодя орсöм — кин кинöс бöбöтас. Öнiколiс только мыла. Этö Миша тöдiс.

Вот писыс матынжык ни, эшö матынжык, но мортыс оз на тыдав. Но вот уввес шульга боксянь паськалiсö, и вились мыччисис гöрд тоша чужöмыс. И вились Мишалö уськöтiс сiя тöдвылас айыслiсь тöдса чужöмсö, но нельки и сiя öнiэз ни вермы небзьöтны сылiсь сьöлöмсö.

Öтмöдöрö жагвыв юрсö бергöтлöмöн бандит смекайтiс пу уввез коласiсь кайсö, но синнэзас паныт вачкисö шондiюгöррез и эз сетö бытшöмика видзöтны. Вельдыр видзöтiс сiя и валёжина вылö, но сiйö, мый кошшисö сылöн синнэс, некытiсь эз вермы казявны. А сэтöн, кыдз нарошно, кытöнкö веськыта ныр увтас: «Си-и-ип, си-и-ип, сип-сип-сип-сип-сип!» Бандит жагвыв тiльыштiс синнэсö да керис одзлань эшö кынымкö оськöв. Öнiны коласын öтамöд дынсянь кольччис квать метрся не унажык. Мушкаыс пыр видзöтöмöн Миша думайтiс, кытчö сылö лыйны. «Сьöлöмас? Не, сьöлöмыс сылöн абу, — кымöсас!» Мушкаыс жагвыв лэбтiсис вывлань да сувтiс синнэс коласö.

Кöдзыт да гырись ньылöм воттез вились пондiсö вевттьыны зонкалiсь кымöссö, вирыс öдззис вартны кöсичаэзас, но талун этö сiя эз ни кыв. Дубалöм чуньнас Миша лэдзис куроксö.

Ыкöстнытö бандит эз ешты. Только öтпыр дрöгнитiс сiя быдсöн телонас, бытьтö калькöтiс кинкö сiйö му бердсис, и сэтöн жö мешöкöн лэдзчисис кыдззес коласö.

Только öнiМиша кылiс, кытшöм вынöн вартö сы моросын сьöлöмыс. Сырлёль мунiсö киэс, синнэс куньсисö, юрыс, кыдз сьöкыт гири, лэдзчисис пишаль ложа бердö. Кöдзыт пишаль дулолöн кымöс бердас павкöмыс садьöтiс зонкасö. Öддьöн мыдзöм, сiя чеччис аслас местаись да петiс валёжина сайсис. Только öнiказялiс, что бандитыс кокын сапоггес айыслöн. Миша кыскалiс сы кокись сапоггесö, ассис пишальсö öшöтiс кыдз ув вылö да иньдöтчис туйлань.

Сёр рытöн ни Миша пантасис Волов Степанкöт и висьталiс сылö быдöс.

1966 г.