Тöдiсь (Иньва, 1976)

Велöтчи ме школаын, куимöт классын. Гортын отсавлi мамöлö поткöтны пес, сёдны пода, чапкыны керку юр вылiсь лым. Гожуммезнас уджавлi колхозын вöлöн: верми и доддявны и юскыны. А вот нинкöммез панны... Кыдз баитöны — кöть юр вылат майöг лöсав — эг велав да и дöс сэтöн. Велöтчöмыс понда деревнясö омöн ветлöтi, том и пöрись нинкöмкыйись дынын вöвлi. Вöвлi нельки Варвара тётка дынын, кöда, топ мужик, кужлiс ачыс и паннытö и кыйнытö. И сiя менö велöтiс. А вот эг велав да и дöс сэтöн.

Кера, вöвлi, шуллез, муна кужись ордö. Рытывбытнас быднёж велöтасö: бура и умöля, видöмнас и матькöмнас. Адзза, кужа, ылöста. Ойшöр гöгöр локта гортö:

— Велалi эд, мама, велалi.

— Вот и бур, дитя. Ужо вот пондан ни öнi ачыт кыйны. Кöть эта тоска-печались петам.

Радуйтчö мамö, радуйтча сысся не етшажык и ме ачым. Да и кыдз ни сэтöн он понды радуйтчынытö? Эд сiя кадö этася некытшöм кöмкöт эз вöвлы. Тöв и гожум сё öтiк нинкöм новйимö. А гоз нинкöмыс, новйыны кö сiйö дугдывтöг, месяцся дыржык оз тырмы. И абу кö заптöммес гоз-мöдiк, сiйö и видзöт, кöмтöг кольччан.

Гортын пукся, сэтöн жö кера шуллез. Пондöтча панны öтнам. И кыдз только ог пондыв, кыдз ог кусняв шуллесö — вились нем оз пет. И сэтшöм этасянь обида кутас — горзытöдз локта. Но он кö куж, кöть лун и ой буав, тэныт сё ни нем оз сод. Этасянь ме и ветлöтi пыр бырöм нинкöммезын, кöднö нельки и сьöктавнытö эз ни туйлывлы.

Казялiс менö сiдз öтпырись гуна дорын Иван дед, кöда тöвнас сэтчин öвиннэз шупöтлiс. Казялiс пöрись морт и юасьтöг быдöс вежöртiс. Öтпыр, мöдöтпыр сiя дзар керыштiс ме кокись разьсьöм нинкöммез вылö, горöтчис:

— Кытшöм нö тэ сэтшöмыс жöник, кöр и нинкöммесö аслыт кыйнытö он куж? Некин эд тэ сайö, сэтшöмыс сайö, оз и мун.

Эта кадö деревняас лыддиссис, что кыйны нинкöммесö колiс кужны быд том мортлö. И корасьö кö, шуам, зонка ас саяс нывкаöс, сiя часто шувлiс: «Кый меным гоз нинкöм. Видзöта киподыт вылö. Гленитчас — муна...»

Сiйöн öнi и шутитыштiс ме вылын, пöрисьувьяс, Иван дед. А одзлань ачыс жö бöра и шуö:

— Кай талун ме дынö рытнас шупöтчынытö, велöта нинкöммесö панны.

Эталö ме радся-рад. Сэтöн жö котöртi гортö, пукси керны шуллез. А кыдз только пемдыштiс — пондi лöсьöтчыны гуна дорö. Луннас эг ни лысьты отирыс син одзöт ветлöтнытö — сералiсö.

Пельпон вылам — нин кöлас, конувтам — симöт гырдзим, чöвтöтовöй сера сумкаын — пурт да сьöктан. Гортын керöм шуллесö кöрталi öтлаö да босьтi киам. Сiдз ме и петi гортiсь, иньдöтчи гуналаньö. Муна-тэрмася, а ачым эта коста дугдывтöг думайта сё öтiкö — ойбыт талун понда велöтчыны, а сёровно ни велала.

Сибöтча пемытiнас гунаыс дынö, а сэтчин не шы, не тöв. Тöлöтчиссез да вартiссез важын ни горттэзаныс мунöмась. Этасянь гунаыс лоöм пуста да лöнь. Сiя, топ ыджыт да страшнöй чуд аслас паськöтöм öмöн, видзöтiс меным паныт ванйöв осьта воротаэзнас. Öнi, полöмувья, меным тöдвылам усис эшö и сiя, что Иван дед йылiсь отир коласын басни кывсьывлiс небасöк. Баитлiсö, что сiя тöдiсь да кужись морт, вермö и тшыкöтчыны.

Старикыс эта невылын мыгöра, сьöд ота тоша и öддьöн лэчыт сина. Дзар керыштас тэ вылö синнэзöн — топ пыжьянöн шучкöп пырöтас.

Пöрись отир сыкöт озö тöдчö, поснит челядь полöны топ биись. И дзир том зонкаэз, кöдна немлö оз веритö, быд коста шутитöны стариккöт повтöг. Кытöн бы нылö эз усь пантасьны, том зонкаэз Иван дедлiсь пыр юавлiсö:

— Кытчö нö, деда, мунан?

А сiя дзик радмыштас сылö, что юалöны. Модейтыштас недырик, бытьтö думайтöв-керас, кыдз паныт горöтчынытö, мед не сорасьны, не бöбасьны, а медбöрын и горöтчас паныт: «Луктурун чеплявны» нето «Пизь пожнавны», а то эшö — «Каннез кульны». Висьталас сiя сiдз, мышкыртас увлань юрсö да и мунö одзлань. Сэсся не сылöн дело. А зонкаэс кынöм кучик доймытöдз висьталöмыс вылын сералöны.

Но сэтшöмыс вöвлi луннас, гырись зонкаэзкöт. Ме жö эта тöдiсь старик дынö лöсьöтчи ой кежö да эшö öтнам. И кöр быдöс эта усис меным тöдвылам — повзи. Медодз чинтi оськöввезöс. Сыбöрын, кöр гуна воротаэз дынöдз кольччис кынымкö дас оськöв ылына, сувтi. Мунны сэсся ог лысьт, мый керны одзлань — ог тöд.

Пемытыс сё сукмис, а тöлiсьыс петнытö эшö эз ешты. Ой кежас и кöдзытыс лоис сё лёкжык да лёкжык. Сiя жагвылика пырис векнитик да бырöм паськöм увтö, пондiс чеплясьны сё öддьöнжык. Медъёна дöнзис коккезлö. Разьсьöм нинкöммес нiйö сайöвтiсö умöля.

Мый дырна усис сулавны воротаэс дынын — висьтавны сьöкыт. Кöдзытсянь, полöмсянь да нуждасянь, кöда вайöтiс менö татчö эта пемыт тöвся рытö, кутiс сэтшöм обида, что ме готов вöлi горзыны. Медбöрын ме бергöтчи, мед мунны гортö бöр. Но эта коста пемытiнас кинкö вуджöртчис. Сьöд ворота öмсис петiс морт, сибöтчис öвин бокас чапкалöм кряжжез дынö. Ме тöдi Иван дедöс.

Пöрись морт кутчис керавны пес. Сiя вылына лэбталiс юр весьтас да лэдзалiс ассис черсö пес кряж бердö. Быд сöтöмсянь черыс увтiсь öтмöдöрö чижйисö-чеччалiсö чаггез. Мукöдыс ны коласiсь лэбзьывлiсö ме дынöдз. Ме нельки кылi, кыдз нiя усялiсö небытик лымас. И сiйöн, что горöн камöтiс чер, а сы увтiсь чеччалан чеггес лэбзисö топ ме дынöдз, менам полöмö пондiс чулавны. Сэк ме жагвыв сибöтчи матöжык пес керисьыс дынö. Иван дед казялiс. Öтпыр-мöдöтпыр сiя дзар керыштiс мелань.

Ыб сайсянь мыччисис тöлiсь, жагвыв пондiс югдöтны гöгöр. Тыдавны пондiс буржыка.

— Мый нö шы он сет? Висьтась-баит, мымда нин симöтыт понда коран, — горöтчис меным Иван дед.

— Ме эд ог вузась. Ме эд велöтчынытö кайи.

— Но, кайин и бур. Пыр мун öвин увтас, шонтiсь. Ме часöт пессö кера да тожö локта.

Ме кöть и кывзi Иван дедлiсь баснисö, но полöмыс менам и öнöдз эшö эз чулав. Сiйöн сы локтöм йылiсь медбöрья кыввес кажитчисö меным топ сказкаын вöрисьыс кöсйисьöм йылiсь. Эта баснисянь вились пондiс петны полöм. «Буржык бы, — думайтi ме ас кежам, — мунны гортö бöр. Но кыдз нö сэк велöтчöмнас? Бöра эд ог понды кужны нинкöммесö паннытö». Думайтi-кери, а велöтчынытö сё ни колö. Чапки ме вывсим нин кöлас, лэдзи конувтсим симöт гырдзим, дöраовöй сера сумкаöс öшöтi пеледа ув вылö, пондi отсасьны.

Иван дед кералiс пес. Ме, кöр кыкöн, кöр куимöн — кыдзовöй песыс сьöкыт — пыртлi сiйö öвин увтас. Дыр мыйись ми пырим и асьным. Öвин увтас вöлi дзирс пемыт, кöдзыт да гажтöм, топ джоджулын. Пондiм жарöтчыны. Вель дыр горас ковсис сюйны кöс сартассэз да песыс жö бердiсь кульöм симöт. Кыдзовöй уль песыс жаралiс сьöкыта. Но вот бикыввес пондiсö ыждыны, паськавны, гажöнжык да вынöнжыка чепсасьны вывланьö. Öвин увтас лоис тöдчöмöн югытжык. Пемытыс пондiс жмитчыны угöввезас да миян спинаэз сайö, топ мöдiс дзебсисьны.

— Но вот, — Иван дед лэбтiсис пидзöссэз вылiсь, пуксис векнитик потшшезiсь лажмытик му бердсяняс вöвдöм нараэз вылö.

Ме сё эшö полi сыись, что сiя мекöт вермас мыйкö керны. Кадiсь кадö полöмöн ме видзöтышалi сы ладорö и эг тöд, мый лоас одзлань. Мыйсянькö кажитчис, что Иван дед орöттöг видзöтö ме вылö, а эта коста сылöн тырппес, кöдна умöля тыдалiсö сьöд тош коласас, дугдывтöг вöрöны. Мукöд коста ме топ кылi сылiсь шушкöтчöмсö. Этасянь вились пондiс петны полöм, охота вöлi пышшыны öвин увтсис. Но мыйкö тöдтöм да невежöртана видзис менö эта оськöвись, и ме эг лысьт керны сымдасö.

Вель дыр эшö усис пукавны чöлöмöн да полöмöн, кытчöдз эз жарав бытшöмика да эз понды шонтны биыс. А кöр гажа да пым югöррезсянь öвин увтыс югмис, а вывтырлö лоис шоныт, Иван дед сэк вöлись горöтчис:

— Но, пуксьы ноко да пондыв паннытö.

— Да ме ог куж. Нем менам оз пет, — полöм сорöн шыаси ме паныт.

— Да мыля, поди, оз пет, пе-е-етас. Тэ эд эн на пондыв. Эстöн сiя судзöтчис киэзнас шуллез бердöдз, кыскис нiйö асланяс. Но паннытö ачыс Иван дед эз пондыв. Сiя нельки эз и пондöт, а сетiс меным ны коласiсь кык шуль. Сы кыввез бöрсянь мылякö былись пондiс думайтсьыны, что колö дзир кутчисьны и петас, быдöс петас.

А эта коста Иван дед одзлань менö велöтiс:

— Пукты öт шульсö пидзöс вылат доль, мöднас крестав. Сэсся одззасö кусiньт мöдыс вылö. — Эстöн сiя меным нюжöтiс эшö кык шуль, а одзлань висьталiс: — Лэбтыны кö öнi увтiсь шульсö веськыт ладорсянь, нинкöмыс петас шульга кокись. Лэбтыны кö сiйö жö шульга ладорсянь, нинкöмыс петас веськыт кокись.

Иван дедлiсь баснисö кывзытöн ме лэбтi шуль конецсö веськыт ладорсянь да бергöтi одзлань. Сэсся пуктi медбöрья кык шуль, вились лэбталi да бергöтлi. Старик öтпырись эз сибöтчыв нинкöмыс бердö, öтпырись нем эз мыччав. Отсалiс сiя меным дзир баснинас, висьтавлiс, кыдз да мый колö керны, а ме кери. И эта коста ачым эг казяв, кыдз петiс пята. Пыдöссö панны вöлi несьöкыт, сымда и тöд, что лэбтав да чукляв öтмöдöрö шуль конеццесö. Сiдз локтiм нырöдз. Эстöн Иван дед вились висьталiс öтi-мöдiкö, но кыдз и одзжык, нинкöмыс дынö киэзнас и матö эз сибöтчыв.

Петiс и нырыс. Нинкöмыс и былись аркмис шульга кокись.

— Вот эд мый кузя и басни, а тэ, шуан, он куж. Кытчöдз ме бергöтлi шуллесö нырас гöгöр, Иван дед шöралiс симöт. Мöд нинкöмсö, сэтöн жö, былись ни панi ачым. Велöтiсь дзир чöлöмöн дзарышалiс сы сьöрын, мый менам петö. А петiс сiя жö нинкöм, дзир öнi веськыт кокись. Сэсся кутчим кыйны. Ме тэрмасьöмöн бытшкалi сьöктаннас да кыскалi сьöрсяняс симöт шуллесö. Гöгöрресö гöгравтöн Иван дед висьтавлiс, кыдз буржыка да басöкжыка позьö этö керны.

Эта коста пым пöим коласын пöжасисö картовкаэз, кöднö ме кайöтi сьöрам дöраовöй сера сумкаын. А кöр нiя вöлiсö сёйöмöсь зöровöй йикиа нянь сорöн и ныись кольччисö дзир кышшес, шонытiнас пондiс петны он. Одззася полöм öнi чулалiс ни.

— Вод, шоччись. Он жö эд ойнас гортат мун.

— Невна инö узьышта.

— Мымда верман...

— Дырсö некöр.

— Но, но...

Узи ме гор бокын, нараэзöн моз тэчöм потшшез вылын. Кадiсь кадö саймöтлiсö шыррез. Нiя повтöг котрасисö стенаэз вылöт, горöн пиксiсö, а мукöд коста нельки мынлiсö стенаэс бердiсь, усьлiсö му вылас. Öтлаын этакöт кылiс Иван дедлöн сьöктанöн нинкöм бердö шваткöтöм.

Асыв кежас гоз нинкöм вöлi кыйöм.

Югдандорас ме вились öшлiси нин-симöтöн, иньдöтчи гортö.

Туй вылас ни вились кутiс полöм, что гортö локтiкö, кыдз унаись ни вöвлi одзжык, панны нинкöммесö бöра вунöта.

Сiйöн, кыдз только локтi да пыри гортö, сэтöн жö и кутчиси нинкöммез бердö. Тэрмасьöмöн кери шуллез, пондi панны. Панi гоз, мöдiкö — петöны. Эта аслам кужöмыс гажмöтiс менö сэтчöдз, что и ачым эг казяв, кöд коста синваэз сöдзисö.

Эстöн и ме веритi отирыс басниö, что Иван дед — морт былись тöдiсь. Некин менö эз вермы велöтны нинкöммесö панны, а сiя öтiк рытöн велöтiс. Да и кыдз велöтiс! Эд сiя нельки öтпырись эз мыччав, эз отсав киэзнас, висьталiс только кывнас. Но кужис, тыдалö, пöрись морт висьтавнытö — öтпырись висьталöм бöрсянь велалi. Тöдвылам усис эшö и сiя, что велöтiкас Иван дед öтпырись эз горöт, эз матькышт да эз нимкодяв менö сiдз, кыдз этö керлiсö мöдiк велöтiссез.

Öвин увтын чулöтöм ойсянь кадыс чулалiс не öтiк дас год ни, но панны да кыйны нинкöммесö ме и öнi эшö эг вунöт, кужа.