Глава III

Пыд вöр коласiсь неыджыт деревняö медодзза тракторрес да грузовöй автомашинаэс локтiсö вит-квать год бöртi войнаыс кусöм бöрсянь. Эта вотöдз быдöс колхознöй удж керсис вöв вынöн да отир киэзöн. Нельки сэтшöм изобретеннё, кыдз кык колесоа велосипед, деревенскöй челядь учöтсянь эз адззывлö.

Сулалiс гажа да кöс гожум. Гунадор йöрын бергалiс комбайн — вундiс рудзöг. А дженытик йöрнöс-вешьяна челядь чылiсö льöмпуэз кузя, коттисö воöм ягöд. Эта коста туй ладорсянь, кöда кыссис районö, кылiс кытшöмкö нач эшö тöдтöм гурöтöм. Недыр мыйись сы ладорсянь деревняö мыччисис вевттьöм «газик».

Кинкö льöмпуэс вывсянь горöтiс:

— Машина! Челядь! Лёкковушка!

Эта юöрыс, дзик öтпырись малыштöмöн, быдöннысö лэдзис улö. А паськыт да волькыт эшö сэк деревенскöй улица кузя и былись пöльтiс-мунiс легковöй автомобиль.

Зоночкаэз быдöнныс, мымда прок, уськöтчисö сы сьöрö. И сэк жö омöн деревня пасьта кылiс:

— Ура-а! Машина-а! Ура-а! Лёкковушка-а-а!

Газик сувтiс председатель öшын увтö. Локтiссез пырисö. А чожа мый сы гöгöр чукöртчис быдöс деревенскöй челядь. Быдöнныс коласын вöлiсö сэтшöмöсь, кöдна год нето кык сьöрна ветлiсö ни школаö. А öтлаын и нiя, кöдна котрасисö эшö вешьянтöг.

Автомобильыс вöлi важ. Аслас векын сiя, тыдалö, пöттöдз ни ештöм адззывны, кыдз баитсьö, и бисö, и васö: одзись стеклоыс жугалöм, крылоэс пиньласьöмöсь, краскаыс уналаöт зыртчöм. Нельки фараись стекло, кöдö челядь сэтöн жö и нимтiсö синбугыльöн, вöлi потöм. Но кыдз бы сэтчин эз вöв, ны одзын сулалiс быльнöй автомобиль — тор адззывлытöм да нач эшö тöдтöм, а этасянь быдöнныс понда öддьöн и öддьöн интереснöй. Нiя и видзöтiсö сы вылö, кыдз чудо вылö, нёджжалiсö быд ладорсянь, одзсянь и бöрсянь, улiсянь и вылiсянь. Видзöтiсö колесоэсö, рульсö, рычаггесö и асьныс эта коста сё дивуйтчисö, дивуйтчисö.

Чожа мый локтiссес петiсö бöр. Ны одзын челядь вешшыштiсö öтмöдöрö, лöньсисö. Быдыс пондiсö видзчисьны автомобильлiсь местаись вöрзьöм. И эстöн кинлö мый: öтiккез видзчисисö гудок шы, мöдiккез — колесоэзлiсь местаись вöрзьöм. А сера йöрнöса да лöз вешьянока, сизим год гöгöрся, ыджыткодь юра, руд сина зоночка Сизьпиян кваркыштöг видзöтiс öтiк морт вылö, кöда пуксис руль сайö. Сылö колiс адззывны öтiкö: кыдз эта мортыс пондас нуöтны машинасö.

А мöдыс пуктiс шульга кисö руль вылö, веськытнас бергöтыштiс щиток вылiсь ключ, жмитчыштiс мышкас сиденнё спинка бердö. Сэк жö кытöнкö пытшкас эрзыштiс мотор, пондiс уджавны.

Зоночка вöлi эшö учöт. Мый керсис кабина ыбöсок сайын, сiя эз адззыв. Но автомобиль, дзик повзьöтöм вöв, дрöгнитыштiс местаас, вöрзис, пондiс тарöвтчыны луд кузя. Думайттöг, колö я керны сымдасö, зоночка уськöтчис сы сьöрö. Мöддэс — тожö.

Но автомобильыс, нельки важыс, сё жö автомобиль. Челядь котöртiсö сы сьöрö мымда вын, но чожа пондiсö кольччыны. Автомобиль жö недырик кежö сувтчыштлiс деревня сайись воротаэз одзын Сэк челядь эшö öтпырись матöкодь сибöтчылiсö сы дынöдз. Но ворота мöдöрас сiя вились вöрзис одзлань. Эстöн зоночкаэз сувтiсö. Вежöртiсö, тыдалö, что кыдз бы эн вынсьöтчы, подöн сы сьöрö он вöтчы. Да и колiс я сымдасö? Быдöнныс понда гажыс сыын и вöлi, что первуись ас оланын, не книгаись и не киноись, кыдз вöвлi эта вотöдз, а асланыс деревняись адззылiсö автомобиль.

И дзир öтiк ны коласiсь, руд сина зоночка, кöда медодз уськöтчис автомобиль сьöрö, и воротаэс дынын эшö эз сувт. Сылö етша вöлi сiя гажыс, кöда тырмис сы ёрттэзлö. Сылö öтнасыслö ковсис мыйкö этася унажык. Быдöнныс коласiсь сiя медодз сибöтчис йöр дынöдз. Потшшес коласöт, кыдз дзöдзыв, перыта чувизнитiс-вуджис мöдöрас, уськöтчис одзлань

— Сизьпиян, кытчö тэ?

— Он эд вöт! — горöтлiсö ёрттэс сылö бöрсяняс. Но зоночка топ эз и кыв, бöрас öтпырись и дзар эз кер, некинлö паныт эз шыась. Позис думайтны: автомобиль пышшöтiс сы оланiсь кытшöмкö öддьöн дона тор, овны кöдатöг одзлань öнi оз ни позь. И мед не кольччыны век кежö эта пышшöтöм тортöг, вермыны вöтны, бергöтны сiйö бöр, зоночка сiдз атшавтöдз и пондас котöртны автомобиль сьöрö, кытчöдз оз усь кок йывсис

Челядь лöньсисö. Автомобиль мунiс. А зоночкаыслöн чочком юрокыс, кöда тыдышалiс вундытöм сюэз вевдöрöт, саясис.

Чулалiс ыб, сэсся — лог. Сэсся эшö öтiк ыб да эшö öтiк лог. Одзлань ыббес эз вöлö. Лажмытик да важ пос вылöт туйыс вуджис непаськыт юок сайö. Пос мöдöрас пондöтчис вöр. Дзик дзебсисьöм могись, туйыс перыта уськöтчис пуэз коласö. Эстöн вöлись зоночка сувтiс, пондiс кывзiсьны

Вöлi лöнь. Пос мöдöрас пу вылiсь пу вылö лэбалiсö катшаэз, горöн китшкисö. Пос увтын, кывтытас, негорöн чольскöтiс ва. Быд сэтшöм чольснитöм бöрсянь ва вевдöрöт паськалiсö кокнит кытшшез — орсiс поснит чери. Но автомобильлöн шыыс, кöдö охота вöлi кывны медöддьöн, некöдöрсянь эз ни сибав. Сiйöн зоночкалö и думайтсис, что быдöс неважын адззылöмыс не мый мöдiк, кыдз дженытик да гажа вöт. Но колесоэзлöн узöра след, кöда дзик печатайтöм песока туй вылас, тшöктiс веритны, что автомобильыс и былись вöлi. И öнi сылöн следыс гажöтiс зоночкасö сiдз жö, кыдз неважын сiя ачыс.

Автомобиль мунiс, но ассис следсö колис. И кольччис сiя не только песока туй вылын, но и зоночкаыс сьöлöмын. И незьдiс да разьсис кö туй вылiсь след медодзза жö зэр коста, то сы сьöлöмын кольччис век кежö. Пос бердсяняс зоночка жагвыв иньдöтчис бöр. Сэк ни, нач эшö челядёк мывкыдöн, сiя думайтiс: «Чöв. Кöркö быдма, дак ачым понда рулитны». И гажтöмтыштiс кö мый зоночкаöс эта кадö, дак дзир сiя, что быдмытöдззас видзчисьнытö ковсяс эшö дыр.

Но кадыс öтiк местаын оз сулав. Чулалiсö öкмыс год. Эта коста Сизёв кончитiс кыкьямыс класс. Сiйöн жö каднас зонка ештiс адззывны да тöдны олансис уна быдкодь интереснöйсö. Но челядь кадся мечта — лоны шофёрöн — сiдз и эз кус. Сiя, кыдз и ачыс Сизёв, быд годöн быдмис да вынсялiс сы ылöсын эшö öддьöнжык. Сэк кежö зонкалöн пöрисьжык воныс, Пашаыс, лоис трактористöн. Сiя и отсалiс томжыкыслö: босьтiс дынас прицепщикöн, велöтiс уджавны. Öтлаын чукöртiсö деньгаок, а мöдiк арö томжык Сизёв иньдöтчис городö, курссэз вылö. Джын год бöртi шофёрскöй праваэз, кöдна йылiсь зонка мечтайтiс сыным год, вöлiсö киын.

Уджавны велöтчöмыс бöрсянь Сизёв кольччис городö. Виль автомашинасö перво жö зонка эз кошшы. Мебельнöй фабрикаын пуксис учöтик да важ газик вылö. Тулысöдззас уджалiс, а сэтöн ковсис мунны служба вылö.

Гортö Сизёв бертiс кык год бöртi, арнас, но одзза местаас колана уджыс эз адззись. Сэк зонка и иньдöтчис эта автоколоннаö.

Том шофёррез понда оланiн эстöн эз вöв: олiсö — кин кытöн. Неыджыт торья жырок Сизёв адззис öткаса инька ордын.

Савельевна, сiдз шуисö сылiсь хозяйкасö, уджалiс няньзаводын. Кык ныв, гырисьöсь ни, вöлiсö жöниккез сайын, олiсö торйöн.

Арсяняс жö зонка вайис хозяйкалö пес, пилитiс, поткöтiс. Часто ачыс жö и васö кайöтiс, и каминсö лонтiс. Бердсис Сизёв столовöйын, сёянсö лöсьöтöмöн хозяйкасö эз дзескöт.

Кынымкö месяц сьöрна быдöс вöлi бур. Но кыдзкö тöвнас ни, юöртöг да нач видзчисьтöг, Савельевналöн локтiсö гöссез: бертiс томжык нылыс кык годся зоночкакöт. Эта вöлi том, но не аслас годдэз сьöртöт кыз да тыра мороса инька.

Медперво Сизёв думайтiс, что Дуся локтiс мамыс ордö гöститöм могись и чожа мунас бöр. Но кынымкö лун бöртi ни Савельевна, нывсис гусьöнмоз, юöртiс:

— Беда эд, кывзы жö, Николай, миян, беда.

— Мый сэтшöмыс?

— Дак эд янсöтчöм, видзöт жö тэ, бöбöвыс жöникыскöт. Тышкасьöм сiя сэтчин, леспромхозас, — висьтасис Савельевна зятьыс йылiсь. — Кинöскö нельки пуртöн бытшкалöм. Сы понда сiйö дас год кежö и сайöвтöмöсь отирыс син одзись. А мöдыс öнi вот гортö бертiс. Висьтасьö, видзöт жö, что судö лэдзöм: оз мöд сэсся сыкöт овнытö. А кин öнi, видзöт жö, сы вылö, да каганас эшö, рад?

Паныт хозяйкаыслö Сизёв висьтавнытö нем эз вермы, только юалiс:

— А ме тiянöс ог дзескöт?

— Да мый тэ, Николай, кöдö оз ков да баитан? Мыля тэ миянöс дзескöтан? Висьтала тай вот, видзöт, мед тöдiн. А эта йылiсь тэ нем эн и думайт, ов. Абу жö керкуас асланым мужикыс. Невеста эм, дак и гöтрасьны верман, тырмас миянлö местаыс, тöрам.

— Но тöрам и бур.

Чожа мый Дуся кутчисис уджавны сiя жö няньзаводö. Сьöд да читкыля юрсиа зоноксö сетiс яслиö.

Медодзза кадö Сизёв оланын этасянь кыдз бытьтö нем и эз вежсьы. Одз асывсянь зонка петавлiс удж вылö, гортö вовлiс сёрöн рытнас. Ветлöтны öддьöнсö Сизёв эз радейт, унажык кад чулöтiс книгаэз сайын, шочыника кывзiс транзисторнöй приёмник. Сiдз и чулалiс тöв. Сибöтчис тулыс, а сэтöн и садитчан кад. Савельевналöн йöрыс вöлi киссьöм..

Неделя сьöрна, рыттэзнас, Сизёв гарйисис, сувтöтiс виль столббез. Суббота лунö сiя аслас машинаöн вайис Савельевна карчйöрö назём, а ашынас, öтлаын инькаэзкöт, петiс садитчыны.

Столовöяс эта лунö ветлыны вöлi некöр. Сизёв ужнайтiс хозяйкаыскöт öтiк пызан сайын. Савельевна жаритiс картов да кольттез, сувтöтiс бутылка вина. А кöр юыштiсö, öтпыр-мöдöтпыр ыш ловзисис, но бöртiжык видзсьынытö, тыдалö, эз вермы, Сизёвыслань юрнас гогиньтыштöмöн, нылыслö горöтчис:

— Адззан вот, кыдз мортыс кужö уджавнытö? Немись оз пов, некытшöм уджись. Мый бердö бы эз кутчись — быдöс керö, быдöс сы киись петö. Вот эд меным керкуас зятьсö кытшöмö колiс. А тэнат мый морт вийисьыт, горттöм поныт?.. Кытшöм сыись прок? Адззöмыт кытшöмкö винагагöс да и сыкöт, страмыткöт, видзöт жö, овнытö эн вермы. Век ме тiянöс айтöг песси-быдтi. А öнi эшö и тiянлiсь колö быдтыны. А уна я меным этасянь гажыс да шонытыс?

— Мама, мыйлö тэ йöз мортыс дырни, кöдö оз ков...

— Кинöс тэ эстöн йöзнас лыддян? Николайсö я мый я? Да тэ меным, аслат айтöм дитяöн, сысся эшö йöзжык, вот!

— Но дзескыт тэныт, дак ме верма и петны, — Дуся перыта чеччис пызан сайись, сайöвтчис узьлан жырö

— Не сы йылiсь талун басниыс, — баитiс одзлань Савельевна. — А и петан кö, дак тожö ог герйöвт Тiян кодьыслöн вексö не горт, не жыр. Велалöмöсь, видзöт тэ, ветлöтнытö. Но и шатласьö, кытöн шедас, абу жаль. — Савельевна кисьтiс бутылкасис кольччöм винасö Сизёвыс стопкаö, одзлань, öнi сылö ни горöтчис: — Ю, Николай, сёй да вод, шоччись

Эта кадсянь Сизёв и казялiс, что Дуся пондiс кыссьыны сы дынö. Частожык этö позис казявны сэк, кöр том отир вöвлiсö керкуас öтнаныс. Кöр Сизёв бертлiс удж вывсянь, Дуся тöдчöмöн боёксявлiс кок йылас, гажмывлiс чужöмнас. Сы сьöртi ни позис казявны да вежöртны — сiя видзчисис зонкалiсь бертöмсö.

Сизёв чöвтчис, пöрччасис. Мöдыс эта коста тэрмасис кисьтны миссян дозö ва, лöсьöтiс чышкöт. А кытчöдз зонка миссис, чышкисис, Дуся сулалiс неылын сы дынсянь, гусьöнмоз видзöтiс сы вылö, дзик аслас мужик вылö, кöдö важын ни эз адззыв. Мукöдпырся синнэзнаныс пантасьлiсö. Сэк инька тöдчöмöн вежсьывлiс чужöм вылас, но сайöвтны этö зонкаыс шогья эз тэрмась Сiя дзир жагвыв лэдзлiс увлань синнэсö, и этöн бытьтö баитiс: видзöт пö, мый керан, сiйö и кер, ме пö тэись ог пов.

Оз позь висьтавны, мед зонкаыс сымдасö эз казяв да эз вежöрт. Но сибöтчыны Дуся дынö, нельки шутка могись, сiя эз тэрмась. Сизёв пыравлiс аслас жырö, пöдныштлiс бöрсяняс ыбöс да то ли кутчисьлiс книга бердö то ли вежлiс вывт, петавлiс гортiсь.

Сёрöнжык кусöтлiсö би, водлiсö. Но векнитик да щелля забор пыр вель дыр эшö кывлiс Дусялöн гажтöма лолалöм. Том инькалö овны мужиктöг вöлi гажтöм. Сiя вежöртiс, что гöтыртöм зонка, кыдз бы сiя сылö эз гленитчы, сы вылын, челядя вылын, гöтрасьнытö оз понды. Но эд этö сiя эз и видзчись. Сылö колiс öтiкö: мед зонкаыс сибöтчис сы дынö. Эд узьлiсö öтiк керкуын, и öтамöдыс увья эз игнасьлö. И не лыддьыны кö учöтик Сашикöс, керкуас сэсся некин эз вöвлы. Бокись бок вылö бергавтöн, ас кежас Дуся думайтiс «Неужто сiя сымдасö оз вежöрт? Или полö мыйиськö?» Эз думайтсьы дзир сы йылiсь, что оз кö кыскы мортöс морт дынö, видзчисьны сысянь нельки сiйö неунасö, кöдö сiдз эз тырмы Дусялö, оз позь.

Сiя рытö Сизёв директорыс дынсянь бертiс бöр гаражö, чöвтчис, кутчисис удж бердö. Мед не öштыны весись кад, зонка талунсянь жö кутiс вежны карданнöй вал. Сiя рытö и гортö эз кыскы. Савельевна вöлi удж вылын, а гортын Дусяыс öтнас.

Сiя кадö, кöр гаражись да мастерскöйезiсь отир пондiс мунны, Сизёвлöн орöм кардан автомашина бердiсь вöлi мездöтöм. Öнi сы местö кольччис кышавны вильö. Эта коста боксас пырис Егор Егорович.

— Тэ мый, бöра важыс бердö кутчисин?

— Да вот.. ковсис.. — одзлань зонка дженытика висьталiс директорыскöт неважынся басни йылiсь.

— Но чöв. Ашын асывсяняс ме эшö ачым сы дынö пырала. А этö уджтö талун позис и кольны ни. Эд и ашын лун локтас. Слесарьöс кинöскö сувтöта, кыкöн кокнитжык лоас.

— Ашын асывсянь, Егор Егорович, колö уджавны петны. А ог кö ме сiйö талун лöсьöт, ойнас менö и узьöтны оз понды.

— Но мый тэкöт, зонка, пондан керны? Ковсяс уж отсавны. Сьöкыт лоас öтнасытлö кардансö кышавны. — Удж коласас ни механик одзлань горöтчис: — Дак узьöтны, шуан, нельки ойнас оз понды? А тэ гöтрась. Мый öнöдз öтнат олан? Лоас кин бердö жмитчыны и узьöтны пондас буржыка. Или невестаыс öнöдз бöрйытöм?

— А сiдз, натьтö, — шыасис паныт Сизёв, гайкасö болт вылас бергöтлiкö, пильскис-серöмтчис аслыс ныр увтас.

— Дак отсавны я мый я тэныт сiйö адззыны?

— Сымдасö, Егор Егорович, кытчöдз и оз ков. Квартира бы вот меным медперво кыськö адззыны.

— Квартира тэныт?.. — дженытика юалiс механик, лöньсис, пондiс думайтны. Бöртiжык сiя дзик вунöтiс пондöтöм басни йылiсь, сэсся эз шыась.

Колана удж вöлi керöм. Сизёв перыта чукöртiс инструмент, дзимлялiс кабинаö. Гаражсис петiсö öтлаын. Егор Егорович юалiс:

— Дак чожа тэныт квартирасö? — Да кöть талун жö.

— Вот кыдз. Но ойсö видзчисян. Ашын асывнас мыйкö висьтала. А и былись кö некытöн узьнытö, дак мунам ме ордö.

Пырны механик ордö уджалан паськöмöн да эшö сэтшöм нять погоддя коста Сизёв эз лысьт. Егор Егоровичкöт янсöтчöм бöрсянь зонка кежалiс столовöйö, ужнайтiс. Гортö сiя эта рытö локтiс сёрöн ни: керкуас биыс эз сотчы. Ыбöссö Дуся осьтiс перыта, ачыс вештыштiс пыранiн весьтiсь, горöтчис:

— Эн биась, ме пасьтöм.

Пемытiнас зонка оськöвтiс аслас жырокö, чöвтчис, пöрччасис. А кöр петiс миссьыны, мöдыс сё одззамоз сулалiс гор бокас.

Зонка нарочно миссис дыр, чышкисис, кусöтiс кухняись би, оськöвтiс петанiн ладорö. Эстöн Дуся видзчисьтöг сувтiс паныт.

— Николай... но Коля... — сэтöн жö сылöн киэс везъясисö зонкаыс голя гöгöр. Вывтырнас Дуся, талун нач повтöг ни, жмитчис Сизёв бердö. — Но мыйись тэ полан? Сашикыс эд эшö нем оз ылöст, а гортын сэсся некин абу.

Сизёв öшöмкодь, чöлöмöн ыш ловзисис. Но кöр сiя мышкыртчыштiс Дусяыс чужöм весьтö, сэк вöлись кылiс, кытшöм сьöкыт вина дукöн вайöтö сы лов шысянь. Пемытiнас зонка чöлöмöн öвтыштiс öтмöдöрö юрнас, чöлöмöн жö мездöтiс голя бердсис сылiсь киэсö, асьсö вештыштiс ыбöс колассис.