Сера гора кай

Лыддьöтi ме кыдзкö öтiк коми поэт сборникись стихотвореннё «Соловей». Содержаннёыс дженытика сылöн сэтшöм, что кытшöм бы бытшöм-басöка колипкай эз сьыв, асыв кежас ни эта сьылöмись тöдвылын нем оз кольччы, вунöтсьö бöр. Сэк ме одзын и сувтiс öтiк вопрос: позьö я гижны эшö мыйкö бурсö сы йылiсь, кöда оз видзсьы тöдвылын, кылöмыс бöрсянь жö вунöтсьö бöр?

Вежöртана, что ответсö эта вопрос вылö сетны перво жö ме ог кутчись. Быд мортыс ас гöгöрись явленнёэсö вежöртö да примитö асмознас. Висьтала дзир öтiкö, что öддьöн обидно лоис колипкай понда, кöда сьылöм йылiсь эшö некытшöм литератураын и некытшöм ыджыт гижись этадз эз гиж. И сэк меным тöдвылам усис вот мый.

Флотын служитöм бöрсянь, эшö томувья мыйкö дырна меным усис уджавны Варышанскöй леспромхозiсь клубын заведующöйöн. Сiя кадö леспромхозыс пырис эшö Косинскöй районö, и быд колана вопросöн ковсис ветлыны Косаö. А сiдз кыдз не быд коста лöсявлiс транспорт, то куимдас километр ылына туйколассö одз да бöр лунысöн усьлiс меряйтны подöн. Сiдз öтпырись бöр бертiкö туй вылас ме пемдi. Пуксиб посадсянь Варыш деревняöдз ковсис оськавны пемытöн ни. И не беда бы, вöвны кö бы погоддяыслö мичаöн. Мича погоддя коста гожумся ойес югытöсь, ас гöгöр тыдалö бытшöма. Но погоддяыс, кыдз нарошно, лöсялiс кымöра. Не тöлiсь, не звездаэз эз тыдалö. Пöжис. Лöсьöтчис зэрны. Сэтчö жö и местаыс эстöн вöлi кытшöмкö полöтанакодь, кöр и бöрат дзар керыштны он лысьт, сiдз и мыччассьö, что тэ сьöрын оськалö кинкö ловья. И кöр ме сэтшöм состояннёын пондi сибöтчыны пемытiнас лажмыт да гажтöм оль бердö, кöдö одзлань колiс вуджны, аслам полöмувья нельки пымалi. Но сэтöн кыдзкö нач видзчисьтöг да нач неылын туй бердсяняс кылiс кытшöмкö кайлöн сьылöм да сэтшöм, кытшöмö меным эта вотöдз кывлыны ас оланын эшö эз усьлы. «Уить-фюить, чо-чо-чо-чо-чо», — паськалiс медодззаись тшöк да пемыт тальник-бадь коласын. А сэсся эшö: «Иди... иди... иди..., — а одзлань вились: «Чо-чо-чо-чо-чо, уить-фюить, сит-чак, сит-чак, чо-чо-чо-чо-чо» и сiдз одзлань. Сувтi ме, кыдз кынмöм, оль шöрись туй вылас и местаись вöрзьöтчыны ог лысьты, но не одззася полöм увья, а мед дзир басöка сьылiсь кайсö кыдзкö казявтöг не повзьöтны да сьыланкывсö сылiсь не костiавны. Эстöн ни ме вежöртi, что эта — колипкайыс и эм, сiдз кыдз быдöс кайез коласiсь, кöднö ме кывлi да тöдi эта вотöдз, некин бöрьяыс моз сьывнытö эз прокмы. Аслам неважынся полöмись сэк кежö и след некытшöм эз ни кольччы. Ме рад вöлi сылö, что вöлиськö первуись эта ойö да эта не öддьöн гажа туй вылын усис тöдсасьны колипкай сьылöмкöт. Сэксянь и пондi тöдны, что колипкайес миянын овлöны.

Кынымкö год бöртi, городас овтöн ни, кытшöмкö могöн меным ковсис шедлыны Киров нима колхозö. Одз асывнас пукси Вагановскöй автобус вылö и кытшöмкö джын час бöртi вöлi ни Порськокова деревняын. Эстöн автобуссис ковсис петны и Мижуйöдз кольччöм туйколассö оськавны одзлань подöн. Вöлi эта июньнас, кöдкоста цветитö пу-турун. Сэтшöм кадö ветлöтны подöн да эшö ловзьöм ыб-видз коласöт овлö öддьöн гажа. Кокнита пасьтасьöмöн позьö оськавны лунтыр сьöрна и некытшöм мыдз он кыв. Но ме тэрмаси, мед павжун кежас этчö жö ештыны петны бöр.

Небыт осяэзöн вевттисьöм ыббез сайсянь шондiыс вöлись лэбтiсис. Сылöн кузь да сё эшö öмидзрöма югöррез, кöдна кыссисö му коласын, вöлiсö эшö вынтöмöсь. Нiя эзö на сотö-калитö сiдз, кыдз эта овлö луншöрся кадö, а дзир рамыника шонтiсö. Небыт голубöй рöма пыдöстöм да сöстöм енöжас то öтiклаын, то мöдiклаын öшалiсö неыджыт точкаэзöн гажа мывкыда ыбшаррез. А пельшы бердöдз кöда горöнжыка, кöда не сэтшöм горöн, но дугдывтöг киссис-сибалiс нылöн, кыдз и эта жö сöстöм да гора асылыс, питиртöм-сьылöм. И оськавны подöн сэтшöм кадö эз вöв сьöкыт да жар — вöлi кокнит да гажа. Кыным километр ылына ештi ме мунны сiдз подöн, сымдасö öнi бытшöма ог ни тöд. Но öтiк местаын туйыс лэдзчисис ыббес вылiсь непаськыт да лажмытик местаö, кöда веськытланьсяняс вöлi тырöм негырись, но тшöк бадь-тальник вöрöн. Эстöн ыбшаррез сьылöм дынö содiс и мöдiк поснит кайезлöн питиртöм. Но быдöнныс коласiсь эшö ылiсянькодь тöдчöмöн горöнжыка, ятнöйжыка да сöстöмжыка сибалiс: «Фюить-фюить-фить-фить-фить-фить-фить...» Эта öтiк шыасьöмсянь ни, кыдз кытшöмкö важ, но тöдса да дона торсянь, саймыштiс да чепöссьыштiс аслас местаын сьöлöм, öдззис вартны вынöнжык да перытжыка. Сьылiсьыс меным и былись вöлi тöдса ни. И ась эта ыркыт эшö асывся лöнь кадö руыс пöдiс быдкодь кайезлöн уна голоса сьылöмсянь, быдöнныс коласiсь этö шыасьöмсö соравны мöдiккескöт эз позь. Быдöнныс питиртöм коласын сэтшöмыс сiя вöлi дзир öтнас, и аслас ятнöй да сöстöма горалöмöн некытшöм мöдiк вылö нельки матын эз вачкись, а сэтчö жö эшö и пöдтiс быдöс мöдiк кайезлiсь сьылöм. Этасянь быдöнныс питиртöм коласiсь сылiсь сьылöмсö дзир и позис шуны сiдз, что сiя горалiс, кыдз шуöны: горалö пöлян, горалö гармошка, горалö сьöдкай, горалö колипкай. Не весь и отирöн лöсьöтöм частушкаын сьывсьö сiдз: сера кай пö, гора кай, басöка горалö. Этнöн куим дженытик фразанас висьталöм сэтшöм бытшöма, что этася бытшöмжыка и висьтавнытö оз ни позь. И думайтсьö, висьталöм сiдз, конечно жö, не сырчик нето пышкай, а дзир колипкай йылiсь.

И кыдз бы ме эта асылö эг тэрмась, сылiсь горалöмсö кылöм бöрсянь, кыдз и медодззаись жö, кынымкö годöн одзжык, Варыш туй вылас, медперво жагсьöтыштi оськöввезöс, а бöртiжык кыски сигарета, öзтi куритны, думанам нач недырик кежö кежыштi туй вывсис сьылiсьыс ладорö, пондi кывзыны. А эта коста бадь-тальникыс ладорсянь сё одззамоз жö лэбалiс: «Уду... уду... уду... сий-чак, сий-чак, чак-чак-чак-чак-чак... фюить-фюить, фить-фить-фить-фить-фить, чо-чо-чо-чо-чо».

Эта вотöдз ме кывлi ни, что колипкайын, кыдз кайын, нем басöкыс абу. Вывтырнас бытьтö бы сiя сьöдкайся тöдчöмöн учöтжык, а гöннас сэтшöм жö руд сера, дзик пышкай и дзир моросокыс да кынöмокыс этася невночка югытжыкöсь. Кывсьывлiс сэтчö жö, что сiя полiськодь и некинöс матö ас дынас оз сибöт, а аслас полöм увья и олан местасö быд коста бöрйö сэтшöм сук чашья коласын, кытчö кокнита да казявтöг, гусьöн он пыр. Но эта мöдöтпырись пантасьöмыс лöсялас не ойнас, а лунся югыт коста. Сiйöн, мый бы эз баитö колипкай йылiсь сiйö тöдiсь отир, меным лоис öддьöн охота сибöтчыны сы дынö кыдз позьö матöжык да кöть недырик кежö адззывны сэтшöм басöка горалiсьсö ас синöн. Сэтчö жö и бадь-тальникыс бердöдз туй вывсяняс вöлi неылын — джын сотня оськöв ылына. Но местаыс эта вöлi осьта, сайöвтчыны матöжык сибöтчöм коста нач некытчö. Этасянь и думайтсис, что казявтöг сибöтчыны некыдз оз позь. А повзьöтны кö горалiсь каёксö аслат сибöтчöмöн, сiя вермас лöньсьыны да пышшыны. И сэк не только асьсö он адззыв, но и сьылöмсö сылiсь сэсся он кыв. Эта увья и ковсис кольччыны одзза местаын. Сэк ме видзöтöв-кери жагвыв ас гöгöр, бöрйи туянажык места да пукси туй бокас, пондi кошшыны сьылiсьсö синнэзнам. Но кыдз бы ме эг вынсьöт ассим синбур да мый дырна эг нёджжась сiдз тшöк бадь-тальник ладорö, казявны сэтчинiсь сера гора кайсö сiдз и эг вермы. Ме син вылö сiя некысь да некыдз эз усь. И дзир сылöн гора да сöстöм горалöмыс, кöда эшö эз и думайт лöньсьыны, сё одззамоз пöдтiс сы ладорсянь мöдiк кайезлiсь чивзöм-питиртöм, и быдсöн лажмытiн весьтiсь сё эшö ыркыт, лöнь да сöстöм асывсö.

Эта горалöм увтын ме казявтöг куритi сигарета, куритi мöдiкö. Сэк кежö, видзöта, и шондiыс ни лэбтiсис вылынжыка ыббес весьтын да тöдчöм ылына вешшис одзза местасис. Меным тожö бы колiс тэрмасьны да вот беда — горалiсь кайыскöт янсöтчыны охота эз вöв. А кöр сё жö дзар керыштi часыэз вылö, сэк вöлись и вежöртi, что эта местаын казявтöг пукассьöм быдса час сьöрна ни, кöд коста позис бы оськавны быдсöн туйколас. Сэк ме вöлись и сувтi бöр коккез вылö да иньдöтчи аслам туй кузя. А бöрсяням, кайезлöн быд голосöн питиртöм коласын эшö вель дыр кылiс: «Иди... иди... иди... фюить-фюить, фить-фить-фить-фить-фить, сип-чак, сип-чак, чо-чо-чо-чо-чо». Этö колипкай менö сiдз кольлалiс.

И эшö öтiк неыджыт эпизод, не висьтавны кöда йылiсь некыдз оз позь. Сiя годö ме строитi Кудымкарас медодзза керку. Строитчынытö пондöтчи одз тулыснас, кыдз только сылiс лым. Но сiдз кыдз эта коста жö ковсис эшö и уджавны, строитчöмыс сетчис öддьöн сьöкыта. Лунiсь лун ковсис ветлыны уджавны, и строитчан уджыс вылö кадыс кольччывлiс дзир рыттэзнас да выходнöй луннэз коста. Бур кöть сiя ни, что тулыс понсяняс, май да июнь месяццезö ойес миян югытöсь, бытшöма тыдалö ойбыт сьöрна и уджавнытö эта коста позьö, кыдз баитсьö, ныр вылö усьтöдз. Сiдз ме и уджалi. Сiйöн май конецас ни ештi керны медсьöкыт удж, гарйыны траншея да кисьтны керку увтö фундамент.

Öнöдз эшö тöдвылын сiя ойыс, кöр му бердсянь öктöм опалубка коласö ваялi гоз ведраöн ящикын соровтöм бетон, кисьтi, тойöтi да волькöтi сiйö вевдöрсяняс мастерокöн. А кöр бетоныс кыскассис, а фундаментыс кисьтсис, шоччисьöм могись пукси сэтчö жö му вылас, да öзтi куритны. Пымалöм увья ме вылын паськöмыс вöлi рудзавтöдз ва, кöть сэтöн жö чöвт да пидзрав. Сiя жö визывтöм ньылöмыс солькöтiс и ме сапоггезын. Но пидзрасьнытö менам вын эз ни тырмы. Нельки вöрöтчыны охота эз вöв. Ме сымда и кери — мыдзсяняс поснита зэгалан киöн кадiсь кадö сибöтлi тырппез бердöдз сигарета, пыдына лолавтöн шоччиси.

Ме гöгöрись соседдэз сэк кежö важын ни узисö. Город пасьта сулалiс лöнь. И эта лöнь пыр вдруг нач видзчисьтöг кылiс: «Сип-чак, сип-чак, чак-чак-чак-чак-чак, фю-ить, фить-фить-фить-фить». Шыэз вöлiсö тöдсаöсь ни. Но медперво нельки эз и веритсьы. «Неужто колипкайыс и городас вермас лоны?» — думайтi ме ас кежам. Сэк кежö дзик кытшöмкö паймыштöмсянь ёкнитiс ни моросын сьöлöм, а ачым ме нельки одззася мыдз йылiсь вунöтыштi. Сiя жö, мед, тыдалö, сетны веритны меным эта кадö одзлань горалiс: «Уду... уду... уду... Фю-ить... фю-ить, фить-фить-фить-фить-фить, чо-чо-чо-чо-чо» и сiдз одзлань. Эта бöрсянь некытшöм сомненнё эз ни кольччы. Этö вöлi сiя, колипкайыс.

Öддьöн охота лоис тöдны, кин садын сiя поздiсис. Но мунны кошшисьны ойнас йöз саддэзö да сэтчö жö мыдзöм коста, ме, вежöртана, и эг пондыв. Вöрöтчытöг пукавтöн, ме сымда и кери, что кывзi сылiсь горалöм да сы сорöн шоччиси. А горалöмыс кылiс Горький нима улица увтсянь. И кылiс öддьöн бытшöма.

Час сьöрна, а батi, дыржык колипкайлiсь сьылöм-горалöмсö кывзöм коста, ме дынö бертiсö вын да садь, мед сувтны коккез вылö да мунны узьны.

Ашын кежас колипкайыс йылiсь ме эг вунöт. И рытъявыв кадö, кöр локтi аслам участок вылö керны сьöкыт строитчан удж, одзлань ни тöдi, что эта удж бöрсянь, сёрöнжык, ой гöгöрас, менö видзчисьö колипкай сьыланкыв сора бытшöм шоччисьöм.

Сiдз ме и уджалi быдсöн июнь да июль сьöрна аслам керку вылын: быд вынiсь да быд кужöмись кайöтлi кирпич, соровтi раствор, тэчи пельöссэз да простеноккез, öктi опалубка да кисьтi бетон. А ойшöр гöгöр, мыдзöм руз да пымалöмсянь люзь ва паськöма, пуксьывлi шоччисьны, мед кöть недырик кывзшытны колипкайлiсь горалöм.

Сы сьылöмсянь гажыс, кöда йиджлiс сьöлöмöдз да вынсьöтiс-саймöтiс сiйö, перытжыка да ёнжыка ёткöтöм-пессьöм вылö, тöдчöмöн отсалiс чулавны мыдзлö, бертöтiс меным одзлань кежö вын. Сiдз колипкай отсöтöн и вöлiсö лэбтöмöсь керку стенаэз.

Август кежö сера гора кай горавнытö и дугдiс. Но сэк кежö и керку стенаэс менам вöлiсö тэчöмöсь ни, кольччис вöвдны потолок да каттьыны керку юр. И ась керку пытшкас быдкодь уджыс кольччис эшö горшви, лöньсьöм колипкай вылö обида менам эз вöв. Спасибо сылö ыджытö сы понда, что аслас быд ойся горалöмöн гажöтiс менö медсьöкыт удж коста, отсалiс лэбтыны керку стенаэсö.

А öнi эшö öтпыр бертам вопрос дынö: позьö я вунöтны асыв кежö ни колипкайлiсь рытся сьылöм? Думайта, что оз. Колипкайкöт быд пантасьöмыс, а ме оланын нiя вöлiсö öнöдз дзир вита, эзö вунö, кольччисö тöдвылын век кежö. А мöднёж кö, кыдз гижö поэт аслас стихотвореннёын, дак и этö рассказсö гижнытö меным вöлi бы нем йылiсь.