Кывбуррез мамöлö

Сёр тöвся рыт. Пурга уннялö

Öшын сайын морозыс лёк.

Би одзын лöня мам пукалö,

Жагöник гöрдззö кеписёк.

Кышалöм ныр вылас очкиэз.

Юрсиыс дзормöм, кыдз лён сöдз.

Дрöжитöны пöрисьмöм киэс,

Да сё кывзiсьöны кытчöдз.

Думайта, тöдвылам сэк усьö

Не öння кадыс — нач мöдiк,

Война-пожар кöр сотiс мусö,

Эз вöв деревняын мужик.

Вот виксö плуг. Гöрись дубасын,

Гырдззаöдз пуджöм шабур сос.

Лунтырöн плугсö бороздасис

Лэбталö. Рытнас орö кос.

Нырыштö увлань кöдзсянкудыс.

Нинкöммес бырöмöсь, топ радз.

Юр дикмö, дзик бергöтчö муыс,

Оланыс счастье вылö надз.

Литовка вартлытöм. Сы ныжсянь

Покосыс одзат кузь и кузь.

Лунтыр дугдывтöг сiйö гыжган,

Неöтпырись пымалан люзь.

Шондiтöг ыб вылö тэ петан —

Адассö синöн он судзöт.

Да эм ли сэтшöм уджыс светын,

Тэ кöдö киöн эн сибöт?!

Страда чулалас, тöв сибалö,

А уджыслöн не пом, не дор.

Бöра жö инька пес ваялö,

Пилитö ачыс, лонтö гор.

Öвиннэз ойезнас шупöто,

А киас асывсянь куран.

То вартö сю, то вот тöлöтö,

Изынлiсь бергöтö карлан.

Сартас одзын нинкöммез кыйö,

То гöрдззö вöввезлö сермöт.

А водас узьны — висьö, лыйö,

Нырыштö тшыгсяняс шогöт.

И лун, и ой уджавтöн, — кылан?! —

Дубас подолыс эз косьмыв.

Синваэз петлiсö кöр сылöн,

Пондöтлiс сьывны сьыланкыв.

И вермис öткоста быдтiсьны:

Пасьтавны, вердны ныв да зон.

И кужис фронт вывсянь видзчисьны

Письмоэз. Тöдiс нылiсь дон.

Норасис сьöкыт вылö сiя,

Но ассис уджсö эз жагсьöт.

Эд видзсис сы вылын Россия! —

Мый ордчöн немкöт он сувтöт.

Вот сэтшöм сы весьтö петалiс

Не вöтын, а былись олан.

Но мамö уджöн фронт вынсялiс

И разис враггезлiсь иган.

* Ме тэнö эг пантавлы *

Ме тэнö эг пантавлы нельки вöтöн,

Некöр эг кывлы тэнчит шыасьöм.

Ветлöтан, ог тöд, кытшöм тэ кöмкöтöн,

И ог тöд, новьян кытшöмö паськöм.

Ме ог тöд нельки сiйö, кытöн олан.

Кин тэнат эм: аймам, соёк ли вон.

И ог висьтав, кинлö öддьöнжык колан,

Кыдзи оланын медколана дон.

Но тöда, что тэ вывтырнат шöрöтiн:

Не кыз, не вöснит, визыв, кокнит стрась.

Быдсöн мушар вылас тэ только öтiк.

Некин мöдiк сэтшöм жö оз пантась.

Ме тöда, тэнат веж рöма юрсиэз,

И синнэзат лысва öгырлöн рöм.

И сир моз лякасян, но кокнит киэз,

Шондi югöр кодь тэнат пым сьöлöм.

И голос тэнат ась не сэтшöм гора,

А басни тэнат невна чорытöв.

Сьöлöмнам кыла — менö сьöрас корö

Дзир тэнат, кыдз звездалöн би, шынньöв.

Дзир тэнат лов, тэ тырппезлöн дзир öдыс

Югдöтны чайтчас дзайк менчим олан.

А тэтöг? Öддьöн бытшöма ме тöда —

Не удж, не он, не мич, не гажöтчан.

Не öтiк год ни вöттэзын вöтася,

И лунiсь лун думайтны ог дугдыв,

Кöр, кытшöм кадö тэ меным пантасян,

Саймöтан ме сьöлöмын сьыланкыв?

Ме любитöмсянь тэ он мун

Туйыс аслам звезда дынöдз,

Мый кузя, ме ог тöд.

Мунi ойвывсянь лунвылöдз,

Мымда ю оз котöрт.

Ме тэнö кошши ой и лун,

Звезда югöр сьöрö кыдз вöтчи.

Ме любитöмсянь, тэ он мун,

Ме любитöмсянь он сайöвтчы.

Кошши быдкодь столицаись

Тэнчит асывсянь след.

Рыттэс вöлiсö мичаöсь,

Но тэ паныт эн пет.

Ме тэнö кошши ой и лун,

Звезда югöр сьöрö кыдз вöтчи.

Ме любитöмсянь тэ он мун,

Ме любитöмсянь он сайöвтчы.

Горт посадын пантасимö,

Гажöн тырис сьöлöм,

Менö видзчисьöм ачымöс

Ордчöн пым любитöм.

Ме тэнö кошши ой и лун,

Звезда югöр сьöрö кыдз вöтчи.

Ме любитöмсянь тэ он мун,

Ме любитöмсянь он сайöвтчы.