Глава IX

Тöдса отирыс колхознöй правленнё гöгöр, кöдöн вöлi куканнезлöн виль карта, жöдзис чöлöмöн вель уна. А нiя кыкöн — Таисья да председатель — быглясисö му вылас, пессисö ас коласын. Таисья корис, мед председатель простайтiс картасö куканнез увтö. А мöдыс ваксис сы вылын, мымда горш, сир моз лякасьöм, шедталiс сылiсь пиннесö. И мымда бы нывка эз горзы, кыдз эз панлась, мездiсьны сы увья некыдз эз вермы, а некин тöдса отир коласiсь сылö эз отсав. Нельки Светлана, кöда неöтпырись ни пондылiс кутчисьны председатель бердö, керны сыкöт нем эз вермы. Мöдыс, кыдз матег, быд коста нильдывлiс сы киэз коласiсь.

Бöртiжык зоотехник пондiс вартлыны председательыс юр кузя киас сюрöм кöртöн, мыйсянь мöдыс горалiс тожö кыдз кöртовöй. А ачыс председатель эта вартлöмсянь лоис сё учöтжык да учöтжык, кытчöдз эз пöртчы дбруньгагö да эз сайöвтчы му пытшкö.

Нылыс горöн ружтöмсянь Дарья Семёновна саймис, сибöтчис порогувтö, пуктыштiс кисö сы пельпон вылö.

Таисья осьтыштiс синнэсö, перыта куркнитiс-чапкис вывсис шебрас.

— Сёр ни разь?

— Абу да... Мый тэ талун сiдз ружтан?

— Фу-у-у, — öнi вöлись Таисья ловзисис кокнита. Сiя вежöртiс, что эта вöлi не оланас, а дзир вöтöн, пуктыштiс киэсö шульга морос бердас, горöн да перыта йöткöтан сьöлöм весьтö. — Ой, ме вöтсö кытшöм страшнöйö вöтаси! Чуть и чуть, батя, предыс пиннезöс эз шедтав. Тьфу!..

— Поть тэнö, артладтöм вöтнат, — сорис Дарья Семёновна нылыслiсь баснисö. — Эн висьтась. Умöль вöттэсö оз висьтасьлö. Узь.

Таисья водiс бöр. Мыйкö дырна сiя эшö думайтöв-керис адззылöм вöт йылiсь, но сёрöнжык, казявтöг ланьтiс бöр.

Председательсö нывка сэсся эз ни адззыв. Тулыснас, мича да гажа асылö, кöр шондiыс дзир ештiс калькавны ылын вöр бердiсь да долытöдз рама пондiс шонтны мусö сунис кодь веж кузь югöррезöн, Таисья петiс тöдса ыб вылö, мед кывзыштны ыбшарлiсь сьылöм. Чуть тöдчана асывся тöлок увтын ыб пасьта жагвыв кöвьясис цветитан рудзöг. Но цветитiс сiя не аслас чочком трубчатöй да поснитик цветоккезöн, а быдсöн нiйöн быд рöма, тöдса и тöдтöм цветтэзнас, кöднаöн вермас цветитны гожум шöрнас ытшкытöдз видз. Меддивуйтанаыс жö сiя, что кытшöм бы эз вöв охота сибöтчыны ны бердö киöн, керны сымдасö некыдз эз позь. Быд сэтшöм сибöтчöмсянь цветтэс сотчисö, кыдз кальыт бисянь, син одзын пöртчисö руд пöимö, пöимöн жö лэбтiсисö вывлань. Нывкалö охота вöлi горзыны, но сы местö сiя, мый вермис, сералiс.

Сёрöнжык, сэтöн жö ыб дорас мыччисис Борис. И кöр нiя казялiсö öтамöднысö, кыкнанныс пондiсö тэрмасьны паныт. Нывка одзлань ни тöдiс, что колö только сибöтчыны öтамöд бердöдз, и ны коласын лоас сiя, оланiсь медважнöйыс, кöда и овлö öтамöдöс любитöм коста быдöс томыскöт да ловьяыскöт. И ась эта вöлi лунся югытö, талун сiя Таисьяöс эз ни полöт. Талун нывка вöлi нельки рад эталö, и тэрмасис паныт зонкаыслö, кöть и адззис, и вежöртiс, что сы одзын ачыс сiя нач пасьтöм. Но колiс дзир нылö сибöтчыны öтамöд бердöдз, кыдз зонкаыс павкöтчöмсянь мыйкö вына да невежöртана нетшкöвтiс Таисьяöс му бердсис, пондiс лэбтыны руас сё вылöжык да вылöжык. И кытшöм бы эз вöв жаль янсöтчыны Таисьялö аслас цветитан ыбкöт, тулысся мича асывкöт да аслас зонкакöт, лонытö кöдакöт медколанаыс сiдз и эз ешты, лэдзчисьны бöр му вылас сiя эз ни вермы. А сы сьöртi, кыдз югыт бичирöн киссис сы бöрсянь ыб пасьта ыбшарлöн сьылöм, Таисья вежöртiс, что ачыс пöртчис ыбшарö. Гора я вöлi сылöн сьыланкыв руас, сымдасö сiя ачыс эз кыв. Нывка кылiс мöдiкö, кытшöм горöн сибалiсö му бердас поснит бисерöн киссян шыэс. Ны горалöмсянь саймис и ачыс.

Кöр Таисья осьтыштiс синнэсö да казялiс ольпасись асьсö, сэк вöлись и вежöртiс, что некытшöм ыб вылын сiя эз вöв, некытшöм цветтэз эз адззыв, некытшöм зонкаöс эз пантав и бордтöг или борддэз вылын (сымдаыс мылякö тöдвылын эз видзсьы), эз лэбав. А ыбшарыс сьылöм местö сiя примитiс будильниклiсь пызан вылын сярзьöм.

Мыйкö дырна кежö Таисья эшö кольччис куйлыны, думайтiс, мый одззын сылö усис адззывны сказка кодь вöт. Но вежöртны этаись сiдз нем и эз вермы. А сiдз кыдз паныт зонкаыслö тэрмасьöм увья вöтыс вöлi стыдитана кодь, мыйсянь нельки ас одзын öнi лоис недолыт, висьтасьны мамыслö сiя эз ни понды, быдöс адззылöмсö тэрмасис вунöтны бöр.

Миссьöм бöрын Таисья пуксьыштлiс недырик кежö пызан сайö сёйны. А кöр öшыннэз сайын пемытыс сукмис эшö öддьöнжык, нывка петiс гортiсь, кыдз и пыр, котöрöн, иньдöтчис удж вылö.

Ноябрь медодзза числоэзö, кынымкö лун сьöрна, дугдывтöг усис чорыт да кöс лым. Тальтöм местöт сiя куйлiс вонясянся джуджытжыка ни, мыччассис, что усис тöвбыт кежö. Но талун асывсянь вились руалiс лунвыв тöв, нырыштiс му бердö керку трубаэзiсь лэбтiсян тшын да сьöкыта кывтан руд кымöррез: сiйö и видзöт — зэрмас.

Деревня дорас Таисья сувтчыштiс, нёджжöвтiс бöрлань. Чочком лым вывтi нельки эта асывся пемытö тыдалiс ылына. Йöррез пöлöн тальöм туёк вылiсь нывка казялiс сылань жö тэрмасись мортöс, сорасьтöг тöдiс Галинаöс. Тöдiс сiйö и мöдыс, тэрмасьтöнняс горöтчис:

— Шонтiс эд, Тайка, видзöт жö. Мый нö лоас, быдöс кö сылöтас?

— А сiя, натьтö, и лоас, что кöть керкуись эн пет. Баитiкас иньдöтчисö одзлань.

Лымыс усьöм бöрсянь сёйнытö подалö кок увтас лоис нем. Кынымкö лун сьöрна нывкаэз куканнезнысö эз и лэдзавлö, не лыддьыны кö, что рыт-асывнас лэдзчöтлiсö шор дорö юктавны. Дугдiсö ваявны одззамоз и подкормка. Эта местö вайисö кынымкö тракторнöй додь мымда тöвся вердчан: турун, кöрым да силос. Бур, что тырмис кытчöдз одзлань ваялöм картовка дзоля, кöдö нывкаэз лöсьöтлiсö лун кежö.

Кöр асывсяняс подаыс вöлi вердöм-юкталöм, а дзоляыс миськалöм да пыртлöм, нывкаэз пондiсö кайöтлыны взвоз кузя сарайö турун. Вердны сiйö веськыта додь вывсянь вöлi небытшöм. Сэтчö жö охота лоис сайöвтны начальство син одзись кöть неыджыт запас.

Павжун вотöдз погоддяыс сiдз и эз мичам. А рытъявылас пондöтчис зэрны. Электрическöй проводдэс бердсянь, кöдна вöлiсö лэдзöмöсь столб вывсянь карта бердöдз, кадiсь кадö мынлiсö да усялiсö нывкаэс вылö гырись ва воттез — турун додьыс сулалiс нач проводдэс увтын. А сiя местын, кытöн проводдэс вöлiсö вайöтöмöсь стена бердас, да пыртöмöсь карта пытшкö, сiсьмöм тёссэс коласöт виялiс вотьва. Лоны проводдэслö бытшöм изоляцияын, нем полöтанаыс и эз бы вöв. Но ва да тöв увтын кусiньтöмыс весьтöт резиновöй изоляцияыс ештöм чегласьны ни. И инмывлiс кö öнi сы весьтö вотьыштöм ва, замыканнёсянь лöз рöма, поснит, лёк бичир, сяткöтöмöн, чепсасис ни проводдэс коласын. Сяткöтöмыс эз вöв гора, и кывны сiйö ылiсянь эз позь, а лунся югыт коста поснит бичирлöн чепсасьöмыс син вылö эз усь. Полöтiс кö нывкаэзöс мый, дак чожажык крыша вылын ульсалöм лым, кöда вермис нырыштны картасö, а öтлаын и нiйö асьнысö. Этасянь и турунсö сараяс нiя кайöтлiсö полöмöн: ношаэзнас воротаэс сайын нельки лолавны кодьöн эз лысьтö.

То ли адззылöм вöтсянь, кöда öнöдз эз петав юрись, то ли эшö мыйсянь сiя лунö Таисья и местасö кодьöн эз адззы, а сьöлöмыс готов вöлi петны öмöт. Лунтыр пидзыртiс кытшöмкö полöтана гажтöмтчöм. Мед вермыны мездiсьны эта невежöртана гажтöм увья, кытшöмкö кадö, удж коласас, Таисья пондöтiс сьывны.

Рябиналiсь вежöтöм листсö

Öшынö пыртiс рам тöлок.

Видзчися сьöлöм гажöтiсьсö,

А сiя ме дынö оз лок.

Сьыланкылыс и Галиналö тожö вöлi тöдса. Но Таисья сьылöмын, сылöн быд коста чорытöв голосын, талун кылiс сымда гажтöмтчöм да тöждiсьöм, что нельки вöтчыны сы сьöрö, мед не сорны, Галина эз тэрмась и только кывзiс.

Нем ог вежöрт, мый лоис мекöт,

Покойыс абу, пышшис он...

Сьöлöмö йиджтöдз петкöтiс Таисья одзлань, но эта сьылöмыс ас вылас эз ни вачкись. Сiйö чожажык позис примитны горзöм местö.

— Мый талун тэкöт сэтшöмыс?

— Ме, кывзы, и ачым нем ог тöд, мыйсянькö сьöлöм öмöт петö.

— Былись видзчисян кинöскö?

— Видзчися, Галка.

— Ме сiдз и думайтi. Письмоасят?

— Да. Мöдiгод институтö öтлаын лöсьöтчам.

— Счастливöй тэ сё жö...

— Кыдз сэтöн висьтавны... Счастьеыс козин местö оз сетсьы, кымöрись ачыс оз усь. Сы понда колö пессьыны.

Рытся юктасьöм-сёдсьöм бöрсянь Таисья игналiс карта воротаэсö замок вылö (сiдз тшöктiс зоотехник), пыртiс да öшöтiс конюховкаö ключ, люзь ва паськöмаöсь да мыдзöсь, нывкаэз иньдöтчисö гортö. Гажтöмтчöм-тöждiсьöмыс Таисьяöс и öнi эшö эз коль. Горт туйвеж весьтын Галинакöт янсöтчöм бöрсянь, нывка думайтiс: «Гортын, батi, мыйкö неладно лоис да?» — пондiс тэрмасьны. Öтöрас сэк вöлi пемыт ни. Унажык керкуэзын сотчисö биэз. Тэрмасьтöнняс нывка эшö ылiсянькодь казялiс, что и ны керкуын биыс тожö эм: кык неыджыт öшынок, кöдна видзöтiсö улица ладорö, вöлiсö югдöтöмöсь. Но Таисьяöс нельки эта эз лöньсьöт. Сiя котöрöн кайис поспуэз кузя, а керкуас пырис сiдз, дзик пышшис кинкö кутöмись. Рытся ештöтчöм бöрсянь мамыс пукалiс западня вылын, гырскис-летiс вурун.

— Вöтчисö я мый я сьöрсянят?

— Вöтчисö тай, — гажмыштöм мамыс шуткалö, шутитöмöн жö шыасис Таисья, порог дынас пондiс чöвтчыны-пöрччасьны.

Пызан вылын öтлаын газеткаэзкöт нывкаöс видзчисис Бориссянь письмо. Эта тожö гажöтыштiс. Лыддьöтны мамыс син одзын Таисья сiйö и эз понды, но одзлань ни тöдiс, что умöльыс сэтчин тожö нем абу. Эта местö нывка паськöтiс окружнöй газета.

— Кынöмыт разь талун оз симал?

— Сималöкодь жö.

— Ужнайтышны нö сэк... — Дарья Семёновна вештыштiс бокö удж, сувтiс, оськöвтiс комö. Горись сiя кыскис да чöвтiс бытшöма пöжсьöм тусяшыд, Таисья кайöтiс пызан вылö нянь, пыралiс джоджулö юанла.

Ужнайтöмыс бöрсянь Дарья Семёновна мыйкö дырна эшö бергалiс комын, занавеска сайын: миськалiс пань-бекöр, а бöртiжык лöньсис. Чожа мый сэтчинсянь пондiс кывны негорöн коргышалöм. Мамыс узис.

Сэк вöлись Таисья пуксис пызан сайö, осьтiс зонкасянь локтöм письмо, лыддьöтiс. Кыдз и пыр, сiя вöлi гижöм веськыта, дженыта да бытшöма. Зонка не сымда висьтасис ас йывсис да аслас служба йылiсь, мымда юасис сы удж, олан, думаэз да кад чулöтöм йылiсь.

Öтпыр-мöдöтпыр письмосö лыддьöтöм бöртi Таисья кутчисис гижны паныт. Отвечайтiс нывка быд вопрос вылö. Гижис не только аслас удж да олан йылiсь, но нельки нетуяна погода да гажтöм вöттэз йылiсь, кöдна öнöдз эшö эзö вунö тöдвылiсь. А кöр быдöс вöлi висьталöм и гижны кольччис нем, Таисья вежöртiс, что лунтырся состояннёыс нельки письмоэс бöрсянь эз чулав. Вöлi сэтшöм гажтöм да гудыра сьöлöм вылын, что охота лоис, кыдз некöр, адззывны асьсö зонкасö, кöть недырик кежö. Сiйöн и письмосö ассис кончитiс сiдз: «Гижи тэныт, Боренька, быдöс йылiсь, а топ нем и нем эг висьтав. Мыйсянькö и сьöлöмö местасö оз адззы, готов öмöт петны. Быдöс я тэкöт ладно, дона менам ёрт? Меным мыйсянькö мыччассьö, что и письмосö тэсянь ог ни босьт, дзик ола эта свет вылас медбöрья лун. Вöлiсö бы борддэз, ме бы ачым тэ дынö лэбзи, но...» Таисья эз и казяв, кыдз сöдзöм синваэс, öтамöдсö одзалöмöн, брызнитiсö сэтчö жö, бöрья строкаэс вылö. Кончитöм письмосö, косьмыштöм синваэс сорöн, нывка кöстiс да сюйыштiс конвертö. Но нельки эта бöрсянь видзсьынытö эз вермы, синваэс пöдтiсö. Мед не саймöтны горзöмнас мамсö да вермыны кыдзкö лöньсьöтны асьсö, Таисья тэрмасьöмöн кусöтiс би, водiс.

Кадыс вöлi ойшöр саяс ни. Керку стенаэз пöлöн одззамоз гажтöма кышöтiс поснит зэр, кыдз песок, гиззис-вартiс öшын стеклоэз кузя.