Мöдiк картина

Сiя жö рытö Венька ордын. Деревенскöй керку, пызан, комод, стуллэз. Куим öшын везтöмöсь занавескаэзöн. Сотчö би. Пыранiн дынсянь веськытланьын — койка, сы сайын диван. Телевизор комод вылын — оз уджав. Диван вылын мышкыртöм юрöн пукалö ГОША. Сы гöгöр бергалö Венькалöн мамыс: мавтö йодöн да бинтуйтö сылiсь дойдöм юрбöрсö. Сэтöн жö öтмöдöрсянь Севка да Венькалöн айыс. Ачыс ВЕНЬКА жагвыв ветлö одз да бöр керку пасьта, думайтö.

ГОШКА (пиннес пыр русö горöн вирскытöн). У-ю-юй-юй, кытшöм тай зу-бы-ыт!(Пондылö бы пышшöтны юрсö бокö.)

НАДЕЖ. Пукав жö, ноко! Терпитышт невночкасö! (Йодын кöтöтöм ватаöн тюкышалö зонкалiсь юрбöрсö, босьтö бинт, пондö каттьыны.) Пондан тöдны эта бöрсянь, кыдз силком нывкаэс бердö лякасьны.

ГОШКА. Сiя разь нывка, сэтшöмыс? Эта жö зверь кытшöмкö. Настоящöй тигра! Вирьюись пантера — вот сiя кин эта бöрсянь. Ме бы сы вылö некöр и дзар эг кер. Ог тöд, мый сыись Венькаыс адззöм.

СЕВКА. Тэ шуанöн, дак пантера жö и эм. (Веськöтчыштöмöн, горöнжык, быдöнныс понда.) Кыдз тай дбруньгас эталö моросас(мыччалö гырдззанас Севка ладорö), ...дак эта кыдз ном нöбасис^. Сiдз эд, Гошка? Чурк-барк только тай öтлаын пызаныскöт берездасит! Сiдз эд?

ГОШКА. Эн и баит, кывзы. Да ме разь тöдi сымдасö? Некöр эд эг и думайт. Тэныт сiдз дбруньгыны, дак и тэ тожö таралан.

НИКОДИМ (вежвывтöм кокöн пукавтöн да куриттöн). Зуралiс, сiдзкö, тiянöс чанёкыс.(Рыгзьö-сералö.) Вöй, тыдалö, эшö.

СЕВКА. Сiя жö и эм.

НАДЕЖ (мужикыслö). Дугды жö, абыз, сiдз нывкаыс йылiсь баитны. Абу эд, натьтö, басöк.(Гошкалö.) Но вот и кöрталiм. Бурдас гöтрасьтöдззат.(Бинтöн, йодöн да ножниччезöн киэзас оськöвтö комод ладорö.)

НИКОДИМ (иньыслö). Да мый ме сэтшöм умöльсö?.. Кыдз эм — горöтчи.

ГОШКА (пешлыштö киэзнас бинтуйтöм юрсö). Но чö-ö-öв, Никодим дядь, рамсьöтам эшö. Вот адззылат, что огö.

НАДЕЖ (комод дынсяняс ни Гошкалö). Етша разь эшö тэныт дöнзис? Часöт дзир зубытсяняс кивзiн да...

ГОШКА. Вот именно. Колö жö эд кöркö сы понда вештiсьны. Эта тигра одзын ме долгын ог кольччы. Эд и думайтö. (Горöн.) Венька! Тэ думайтан, он талун гöтрасьнытö?

ВЕНЬКА (сувтö джодж шöрас, лэбтыштö öшöтöм юрсö, жмитыштö пельпоннэзнас). Думайтi бы...(гажтöма ловзисьöмсорöн.) Да нем, тыдалö, эз пет.

ГОШКА. Но и ась кытчöдз эз. Эшö öтпырись пондывны колö. Мый тэ юртö öшöтiн? Весь я мый я ме эта понда вирсö кисьтi? Тэ видзöт жö. (Мыччалö кинас бинтуйтöм юр вылö.) Мунi гортсянь репетиция вылö, а берта кыдз фронт вывсянь. Гортiссес, натьтö, оз и тöдö.

СЕВКА. А мый, Венька? Былись эд, кывзы, Гошкаыс баитö. Охота эм, дак эшö пондывны колö.

ВЕНЬКА (одззамоз гажтöма). Кыдз эшö сэтöн пондылан?..

ГОШКА (дразнитöмöн). «Кыдз эшö, кыдз эшö». Тожö меным жöник адззисьöм! Рытывбытöн нывкакöт баитчыны кыдз колö эз вермы — пикан! Эта увья меным сыöддьöн и кыпалiс!(Чöлыштöм бöртi, решительнöя.) Гусявны колö и дöс сэтöн! Мый эшö думайтнытö?

СЕВКА (гажöн). Точно, Гошка!(Тапкö ёртыслö пельпон кузя.) Тэ миян гений. Уджалö гырничыт. Не весь и бинтöн каттьöм. Гусявны — и басни абу. Пасьтась, Венька. Мунам öнi жö!(Кыкнанныс сувтöны.)

ВЕНЬКА (öшöмöнмоз). Да кыдз тi сiйö гусялат?..

НИКОДИМ. Да. Кыдз тi сiйö öнi гортсис, аймамыс коласiсь гусялат, кöр и клубсис вайöтны эд вермö?

СЕВКА. Вообще-то да-а.

Öтiк бöрсянь мöдiк зонкаэз жагвыв пуксьöны бöр, пондöны думайтны.

НАДЕЖ. Эдö ни бы, челядь, кышсиныт петö. Пукалö, пуксьö да. Видзöтö телевизорсö. (Зоныслö.) Кытшöм ни, поди, öнi тэныт гöтрасьöм! Повестка ни талун киат да... Неделя бöртi колö армияö мунны. Он ешты пыртны невестатö керкуас да сэтöн жö и колян. А мый ми сыкöт эстöн пондам керны? Сiя эд тэ бöрсянь жö бöр пышшас. Ештас эшö и мöдiк сайö чеччöвтны. Талуння нывкаэссянь быдöс позьö видзчисьны. Служит, мун да, гöтыртöг. Локтас эшö тэныт кадыс гöтрасьнытö.

НИКОДИМ. Былись, зонö, мамыт тэныт баитö. Ештан армия бöрсяняс.

ВЕНЬКА (перыта бергöтчö аймамыслань). Кывлi ни ме этö тiянлiсь, кывлi!(Нерöмöн.) «Служитан, бертан». Да вежöртö тi — ог вермы ме гöтрасьтöг армияас мунны! Кольнытö сiйö сiдз ог вермы! Видзчисьны нывкаöн сiя менö оз понды! Вот мыйын делоыс. Кытчöдз служита да бöр берта, эстöн сыись и дукыс ни оз кольччы.

ГОШКА (вились чеччöвтö кок йылас). Точно, Венька! Молодец! Хвалю за храбрость! Ме тожö сiдз думайта! Охота эм — гöтрась и басни абу! Этатшöм тиграöс лэдзны бокö некыдз оз позь! Ме бы тэ местын тожö сiдз кери!

НАДЕЖ (кинас öвтыштöмöн). Асьныт тöдат. Керö ас юр выланыт, кыдз тiянлö колö.(Зоныслö.) Но он кö тэ кывзы аймамыслiсь кывсö, дак бöртiжык миян вылö, видзöт, эн норась.

СЕВКА. Да оз, оз, Надеж тётка. Вот тэныт крест. (Ладтöг пернапасасьö.) Ми нельки ас вылö некöр ог норасьö.

НИКОДИМ. Дак кыдз, мый тi мöдат керны? Ме мыйкö нем ог вежöрт. Кыдз думайтат невестанытö аймамыс дынiсь гусявны?

ВЕНЬКА (öшöмöнмоз). Былись эд, челяда. Кыдз жö бы, а?

СЕВКА. Да-а. Вот эта задача-а. Думайтны колö. (Гошкалö.) Висьтав, кашник юр, мый кернытö?

ГОШКА. Да эстöн и думайтны нем. Сiя ачыс керкусис петас.

ВЕНЬКА. Кыдз жö бы?

ГОШКА. А сiдз вот... Татшкис, эз Юлькаыс талун меным моросам?

СЕВКА. Татшкис, конешно. Свидетеллез жö эмöсь.

ГОШКА. И пызансö библиотекасис пöрöтiс?

ВЕНЬКА. Но этö тэ ачыт ни усьтöннят пöрöтiн, а не сiя.

ГОШКА. Ме, конешно. Но эд сы татшкöмсянь.

СЕВКА. Точно, Гошка — сы татшкöмсянь. Сытöг не тэ, не пызаныс некöр бы кок йылiсь эз усьö.

ГОШКА. Вот именно. А дойдiс сiя менö вирöдз или эз?

ВЕНЬКА. Дойдiс, Гошка, конешно, но эд не вийтöдз жö. Мыйлö тэ, кывзы, сiйö...

ГОШКА. Ме ог и шу, что вийтöдз! Кин тэныт сымдасö висьталiс — вийтöдз? (Чöлыштöм бöртi.) И вообще, Венька, тэ думайтан или он талун гöтрасьнытö?

ВЕНЬКА. Но думайта.

ГОШКА. Вот и гöтрась, думайтан дак, кытчöдз ёрттэт отсалöны, а эн сор. Öтнасытлöн эта тигракöт тэнат сё ни нем оз пет, сiдз и тöд. Эстöн ме и сулала. (Быдöнныслö.) Дак дойдiс сiя менö вирöдз или эз — ме тiянлiсь юала?

СЕВКА. Но эта жö факт. Пожалуйста. (Мыччалö ёртыс бинтуйтöм юрö.)

ГОШКА. А мый эта лоö сэтшöмыс?

СЕВКА. Уголовнöй хулиганство.

ГОШКА. Точно, Севка! Тэ молоток. (Лапкöтыштö ёртсö пельпон кузя.) Быдмыштан эшö, дак сiдз и тöд — балдаöн лоан.(Чöлыштöм бöртi.) Сiдзкö, ме, кыдз шусьö, потерпевшöй и нораси милиционерлö. И öнi этö тиграсö, но Юлькасö, ме шуа, корöны сельсоветö.

ВЕНЬКА. Да не, Гошка. Мыйлö тэ милиционерыслö — абутöмыс понда. Эд не вийтöдз жö сiя тэнö... Эд баитiмö ни неважын, что не вийтöдз...

ГОШКА. Ме ачым тöда, что не вийтöдз. Эг бы тöд, дак сымдасö эг и баит. Но тэ думайтан или он талун гöтрасьнытö?

ВЕНЬКА. Висьталiсö жö тэныт. Кынымись эшö эта йылiсь?..

ГОШКА. Вот и думайт, кытчöдз тэнат тиграыт вийтöдз менö эз дойд. А эта понда... (мыччалö кинас юрыс вылö)... ме сыкöт талун жö вештiся. Ме не ме лоа, ог кö этö кер.

СЕВКА. Молодец, Гошка! Вештiсьны колö, кытчöдз сiя досповна миянöс эз дойд.

ГОШКА. Вот и кывзö, мый миянлö колö керны. Часöт мунам веськыта эта тигра ордö, ёркöтчам, висьталам — сельсоветö корöны. Ась только порог дорöдззас нырсö мыччас. А одзлань ми сылö сельсоветсö мыччаламö ни. Оз и казяв, кыдз юр вылас пасьсö хлоп, асьсö — цоп, сымда сэсся аймамсö и адззылас. Вежöртана, что некытшöм сельсоветö ми сiйö ог нуöтö. Вот сылö кытöн талун сельсоветыс лоас. (Пельпоныс омöн мыччалö певнас угöлын сулалан койка ладорö.) Ась медодз сэтöн гижсясö.

СЕВКА Идея, челяда! (Гошка йылiсь быдöнныслö.) Эшö, шуат, не гений? Гырнич дак гырнич жö и эм.

НАДЕЖ. А айыс кö невестаыслöн петас да эшö пишальöн?.. Сэки мый думайтат? Сiя жö тiянöс, кыдз кöччезöс точкöтас.

ВЕНЬКА. Точкöтнытö, шуам, и нем понда. Нем ми сылö сэтшöм умöльсö эг керö.

СЕВКА. Да. Ми и сылö, петас дак, сiйö жö висьталам, что нывсö сельсоветö корöны.

ГОШКА. Молоток, Севка. Правильно.

НИКОДИМ. Да веритас я эшö тiянлö Семёныс?

ГОШКА. Кытчö сiя воштiсяс, кöр менам юрö бинтуйтöм? (Севкалö.) Кытöн тэнат талун уазикыт сулалö?

СЕВКА. Горт öшын увтын тай. Кытöн эшö сылö этася?

ГОШКА. Мунам сэк, заводитам.

ВЕНЬКА. Мыйлö эшö машинасö заводитны? Лишньöй шум...

ГОШКА. Кыдз этö мыйлö? Мыйöн нö тэ ассит тигратö гортö вайöтан? Или тэ талун он ни думайт гöтрасьнытö? Он думайт, дак сiдз и висьтав.

ВЕНЬКА. Кыдз этö ог?

ГОШКА. А думайтан, дак тöд одзлань кежö, что сiйö ковсяс тöбавны да сьöвтавны. Ас кок йылас сiя тэнат оз лок, эн и думайт. А кыскавны сиви вылын тэнчит кöбылатö некин оз понды. Тэ бы сыкöт узьлан, дак ачыт и кыскав, он кö тшöкты машинасö заводитны.

ВЕНЬКА. И кыска, вот адззылан.

ГОШКА. Кодзыв тэ... Кыскан кö тэ сiйö вылат шуч деревня пыр, да эта бöрсянь, сiдз и тöд, неделя сьöрна пондан садьтöг куйлыны.

СЕВКА. Да тырмас тiянлö споритнытö. Мунам, Венька, пасьтась да — ойыс чулалас. Севка да Гошка петöны.

ВЕНЬКА (оськöвтö вешалка дынö, перыта пасьтасьö, кышыштö юр вылас шапка). Мунiм ми. А тi видзчисьö. Лöсьöтö мыйкö пызан вылас.(Оськöвтö ыбöсö, но сэтöн жö керö бöр.)

НАДЕЖ (киэзнас плеснитöмöн). Мыйлö нö эшö бöр бергöтчин?

ВЕНЬКА. Одеялосö сьöрам вунöтi босьтнытö. (Кульыштö аслас ольпась вылiсь одеяло, сiйöн сорöн сайöвтчö ыбöс сайö.)

НАДЕЖ (одззамоз киэзнас боккес кузя хлопöтöмöн). Но сiдз и тöд, нем нылöн оз пет. Бöр простöн бертасö.

НИКОДИМ (зонкаэс сьöрö кинас öвтыштöмöн). Абу жаль, кöть и простöн дак. Оз я кöть эта бöрсянь лöньсьы.

НАДЕЖ (дивуйтчöмöн). И пырис жö эд то кыськö юрас армия вотöдззас гöтрасьны. Вот и пыртö грекас.

НИКОДИМ. Мый тэ сыкöт вельмöмыскöт керан. Петö тай то кышсис.

НАДЕЖ. Кытчö сыкöт воштiсян. Лöсьöтны уж ковсяс мыйкö пызан вылас. Кресь вайöтасö. (Кыскö комодiсь да павдöтö пызан вылö пызандöра, пондö кайöтлыны. комись посуда, нянь да сёяннэз.)

Сцена вылын недырик кежö куслö би. Пызан вылын лöсьöтöм быдкодь сёян-юан. НАДЕЖ да НИКОДИМ вежöм вывтыраöсь, пукалöны öтмöдöрсянь пызан угöввезын, видзчисьöны. Надеж видзö киэзнас пидзöссэс вылын шаль. Öтöрсянь пондö кывны автомашиналöн сибöтчöм.

НАДЕЖ (киэзнас плеснитöмöн). Машинанас эд кылö локтöны. Не простöн, сiдзкö...(Чепöссьö кок йылас, öшöмöнмоз.) Пантавны жö эд, натьтö, колö али кыдз?

НИКОДИМ (сувттöнняс). Куль сiйö оз тöд.

Öтöрсянь кылö машиналöн нюжвылöн да горöн пикöстöм.

НАДЕЖ. Сiдз и тöд — вайöтiсö. (Мужикыслö.) Чапкы жö мыйкö вылат. Порог дорöдззас кöть петалам.(Везтö кисис шальсö юр вылас, оськöв кыным оськöвтö петанiн ладорö.)

Öтöрсянь пондöны кывны гора да чож оськöввез, ванйöв оссьö ыбöс, турöпöн пырö ВЕНЬКА.

ВЕНЬКА (кынымиськö вылына чеччöвтö джодж шöрас, быдгоршись). Ура, аймам! Гусялiм эд невестасö! Гусялiм! Гусялiм!

НИКОДИМ. Кытöн нö, гусялiт дак? Мыля öтнат керкуас пырин?

ВЕНЬКА (одззамоз гажöн). Да вот сьöрсяням пыртöны!(Мыччалö ыбöс ладорö.) Часöт адззылат.

Ыбöс коласын асланыс ношаöн мыччисьöны СЕВКА да ГОШКА, каттьöмöн вайöтöны сiйö киэз выланыс джодж шöрöдз.

ГОШКА. Но, тигра, зурассис, тыдалö, тэнат. Пышшöтiм сё жö. Сувт, ноко, коккет вылö. (Сувтöтöны, пондöны разьны.)

НАДЕЖ (мынöтö юр вывсис да лэдзö стул вылö шаль, босьтö чышкöт сорöн нянь чöвпан, сетö джынсö мужикыслö, сувтöны джодж шöрас, невестаыслö паныт, зонныслö). Сувт, Венька, ордчöн невестаыскöт. Благословитны колö.

ВЕНЬКА (гажöн). Былись эд!(Оськöвтö, сувтö ордчöн.)

ГОШКА. Севка, крючокав мун ыбöссö, ась оз кинитчы бöр керкусис. Мый тэ сылiсь, тигралiсь, босьтан.

СЕВКА оськöвтö ыбöс ладорö, крючокалö. ГОШКА кытш бöрын кытш разьö одеяло, пась, лэдзö быдöс невестаыс кок увтö, кульыштö сы юр вылiсь шаль.

НАДЕЖ (баралöм синнэзöн, повзьöмувья горöн). О, господи прости-и!(Уськöтö кисис чышкöт да нянь чöвпан, кутчисьö юр бердас, усьö садьтöг джоджас.)

ВЕНЬКА. Мама! Мый тэкöт лоис?!

НИКОДИМ (зоныс вылö кинас öвтыштöмöн). Ы-ы, баран! Тэ жö тёщатö гусялöмыт!

Быдöнныс сулалöны осьта öммезöн, дзик кынмöмöсь.

ГОШКА (дыр мыйись гогинялыштö юрнас). Вот эта репетиция дак репетиция!

Занавес