Глава VIII

Сибöтчис март. Эта вöлi тулыс ни. А тулыс — сэтшöм кад, кöда кык вынöн саймöтö том отирлiсь сьöлöммезнысö, гусялö он, коддзöтö юр. Эз ордйы сiя и Сизёвöс да Аннушкаöс.

Саймисö медодзза вотьваэз, и керкуас пукöтны дугдiс, кыскис öтöрö, сöстöм ру вылö. А вöрзьöм почка да вотьва дука руыс саймöтiсö кытшöмкö эшö невежöртана, но кокнит да гажа чувство. Охота вöлi мыдзтöг кывзыны тулысся зумыт тöвлiсь горöн увгöм-шутнялöм, дзирыт шондi югöррез увтын лымлiсь ружтышалöм. Сiйöн рыттэзнас, частожык, нежели эта вотöдз, Сизёв пондiс петавлыны гортiсь то киноö, то театрö, а шоныт да мича погоддя коста вель дырöн пукавлiс öтöрись посöдзын, кывзiсис, думайтiс. И дзир Аннушка, одззамоз петавтöг, бергалiс керкуын. Но кöр Сизёв лöсьöтчис кытчöкö мунны, нывка гусьöн, мед некин эз казяв, дзарышалiс зонкаыс ладорö, гусьöн жö да гажтöма ловзисьлiс ыш.

А öтпырись, кöр Сизёв вöлись лöсьöтчис пасьтасьны, Аннушка, мöдöтчöмöн ни, петiс да мунiс керкусис эшö сысся одзжык.

Пантасисö кинотеатрын.

— Мый и тэ талун татчö жö? — сибöтчис нывкаыс дынö да полöмöнкодь юалiс Сизёв.

— Меным разь оз туй?

— Да не. Мыля оз. Некöр тай одзжык эн ветлыв да сiйöн юала.

— Кинкöт меным ветлöтнытö? — Аннушка серöмтчис. — Тöдса зонкаэз менам абу, а квартирант пыр мунö öтнас, некöр оз и рочав.

— Да, — недолытсянь дженытика шыасис Сизёв. — Но, а талун кинкöт нö татчöдз локтiн?

— Öтнам. Кинкöт сэсся?

— А кыдз нö лысьтiн?

— А ме тэ одзын. Тöдi эд, что и тэ татчö жö лöсьöтчан.

Öтамöд коласын басниыс вöлi пондöтöм. Öнi колiс дзир кужны видзны сiйö одзлань. Шутка могись ни Сизёв эшö юалiс:

— А кыдз нö öтнат бöр мöдан мунны?

— Сiдз жö. Шуч туй понда котöртны да надейтчыны сы вылö, что и тэ кытöнкö неылын бöрсяням локтан. Эн повзьöт только одза-одз, что киноыс бöрсянь гортö он мун. А то ме и былись ог лысьт öтнам муннытö.

Сизёв пондiс горöн ваксьыны.

Билеттэс вöлiсö небöмöсь не öтдруг, сiйöн и пуксьынытö инмисö не öтлаын. Бур, что Аннушка пукалiс кынымкö рядöн одзланьын, и öнi Сизёв сiйö и керис, дзарышалiс нывкаыс ладорö. Чожа мый зонка нельки тöдiс ни, кин пукалiс ордчöн Аннушкакöт: öтöрланьсянь — томыник нывкаэз, мöдöрланьсянь — дзодзоглöн кодь кузь голяа, шыртöм да сынавтöм юрсиа том морт. Сэк вöлись Сизёв и думайтiс: «А эз разь позь меным сыкöт ордчöн лонытö? Позис эд. Мунны бы гортсянь сыкöт öтлаын — сымда и эм». Сэтöн жö тöдвылас усисö и нывкалöн неважын горöтчöм кыввес: «...а квартирант пыр мунö öтнас, некöр оз и рочав». И ась сiя вöлi висьталöм шутка могись, но эта и былись вöлi сiдз. «Кыдз этö ме и öтпырись эг казяв сiйö нуöтнытö?» — дивуйтчöмöн думнитiс Сизёв и одзлань сэтöн жö: «А эг казяв я? Чожажык эг лысьт. Полi, что оз мун мекöт, откажитчас. Но ась. Сэсся öтнам ог мун».

Аннушка йылiсь думаэс Сизёвöс и одзлань кежö эз кольö. Зонка öнiсянь ни вынсьöтчис сувтöтны син одзас, кыдз нiя лöсьöтчöны мунны öтлаын. Вот сiя ачыс, кöмасьöм-пасьтасьöм, сулалö ни порог дорас, а Аннушка, сё эшö мöдöтчытöм, ас жыроксянь корö: «Никола-а-ай, но видзчисьышт невночкасö. Ме эд чожа». А вот нiя кыкöн ни оськалöны сёр рытöн горт ладорö. Мунöны кутчисьтöг, ордчöн. Но Сизёв орöттöг синйö, мед нывкаыс эз нильды казявтöг да эз усь, мед эз татшкы сiйö кытшöмкö код морт, эз уськöтчы кинкö ворота увтсянь да эз повзьöт казявтöг лёк пон. Аслас думаэз коласын Сизёв эз и казяв, кöд коста киноыс чулалiс. Зал югмис. Отир чеччис, сьöрсьöн-бöрсьöн пондiс кыссьыны петанiнлань. Сизёв эз тэрмась. А кöр зонка петiс öтöрöдз, Аннушка сiйö видзчисис ни. Öнi Сизёв веськыта сы дынö и иньдöтчис. А мöдыс, эшö ылiсянькодь, юалiс:

— Но дак мунан, он гортö?

— А ог кö мун, сэк мый?

— Сэк ковсяс öтнамлö.

— Он жö эд лысьт сэтшöм пемытiнас öтнат муннытö, — Сизёв сибöтчис матöжык Аннушка дынö, сувтiс ордчöн.

— А вот и лысьта. Эн думайт, что сэтшöм ни ме полiсь.

— А ме ог лысьт. Тэ видзöт, кöть менö öтнасöс эн коль, — шутитöм могись горöтчис Сизёв, серöмтчис, шутка могись жö кутыштiс нывкасö киöттяс. Но Аннушка сiйö бытьтö эз и казяв. Сiдз кыкöн, ордчöн оськавтöн, нiя и иньдöтчисö горт ладорö.

Мунiсö чöлöмöн, кыдз бытьтö ас коласын баитнытö вöлi нем йылiсь. Но сы сьöртi, кытшöм жагвыв, оськöв бöрын оськöв, тэчисö нiя коккезнысö, позис вежöртны, что кыкнанныслö эта коста бур и гажа. Этасянь и тэрмасьнытö некöдыслöн охота эз вöв.

Рытыс лöсялiс шоныт, лöнь. Пемыт-лöз рöма, сöстöм да пыдын кымöрын öтiк бöрсянь мöдiк чöлöмöн кваркышалiсö звездаэз, дзик дивуйтчисö сылö, мый эта коста керсис му вылын. Кок увтын гусьöнмоз да небытика муркöтыштлiс лым. Керку юррез бердсянь шочыника сатшкöтiсö-виялiсö вотьваэз. Öтмöдöрсянь, то жагвыв да негорöн, то шумöн да перыта кылiс лымлöн ружтышалöм — ыскöвтiс увлань. Неыджыт тошок руалiс лунлапöвсянь, и вöлi сiя небыт да рам, дзик гожумся. Öтлаын вотьваэс дуккöт тöв вайöтiс мыйкö сэтшöмö, кöдасянь чожжыка ёткöпалiс сьöлöм. Дзик кокнита коддзыштöмсянь, бергалiс юр, гажöн шардiс лов.

Мунтöнняс Сизёв вынсьöтчис не сорны ассис оськöввесö нывкаыс оськöввезкöт: видзöтiс унажыксö кок увтас, думайтiс: «Но эд сымда вот и колöм тöдсасьöмыс понда. А ме...»

Аннушкалö, кöда первуись ас оланын, вот сiдз вот, ордчöн да эшö кутчисьöмöн оськалiс зонкакöт, лоис нельки жар. Нывка кылiс, кыдз пымавтöдз шоналiс вывтыр. Сылö öнöдз сё эшö эз веритсьы, что эта шоныт, лöнь да сьöлöм саймöтан тулысся рытö сiя оськалö ордчöн зонкакöт, мый йылiсь сымда ни вöлi думайтöм медбöрья годдэзö. И ась эта эшö не любитöм, ась эта йылiсь и кылiсь джын эшö эз вöв висьталöм öтамöдлö, вермас лоны, что некöр сымдасö оз и казьмöтö, сiдз эта вылын быдöс и чулалас, но и ордчöн оськалiсь зонкаыс — нач вöвлытöм да виль сы оланын. Öтiк эта ни саймöтiс сылiсь том сьöлöмсö, гажöтiс да бордсьöтiс сiйö асьсö. «Вöвны бы сылö не квартирантöн, а сiйöн мортнас, кöдö ме сы дырна ни видзчиси, этася меным нем бы эз ков». И одзлань сэтöн жö: «А мый, кöть квартирант дак? Мый сэтöн сэтшöм умöльыс? Не быдöнныс жö эд ас горттэзын олöны. Ковсяс, дак и сылöн квартираыс кöркö лоас».

Чулалiсö югдöтöм улица. Одззамоз жагвыв одзлань оськавтöн, кежисö горт ладорö. Эстöн вöлись Аннушка горöтчис:

— Гленитчис, Николай, киноыс?

— Тэ перво юав, видзöтi, эг ме сiйö.

— Мыля жö эн видзöт, сэтчин вöлiн да? Мый тэ сэк керин?

— Думайтi тай. — Мый думайтiн? — дивуйтчыштiс Аннушка. — Думайтнытö эд и мöдiклаын нем эз видз.

— Сiдз, батi. Но меным эстöн думайтсис, вот и думайтi.

Басниыс одзлань эз лöсяв. Колiс бы мыйкö мöдiк йылiсь. Но кыдз да мыйсянь пондöтны сiйö, мöдiксö, некöдыс ны коласiсь эз тöдö. Дыр мыйись Аннушка жö бöра одзлань юалiс:

— Тэ ме вылö он лöгав?

Эта коста и Сизёв думайтiс сiйö жö думасö, сiйöн паныт нывкаыс юалöмлö горöтчис:

— Кывзан я мый я, мый йылiсь ме часöт думайта? Ме тэнчит сiйö жö мöдi юавны. Мый понда меным тэ вылö лöгавнытö?

— А сы понда, что Виль год панытас падтi тэнö гортö мунöмись.

— Эн баит, Аннушка, кöдö оз ков. Ме вот думайта, что сэксяыс понда тэ ме вылö öнöдз лöг, мыля праздниксис мöдi пышшыны.

— Этö ми айöкöт неладно керим. Падтынытö падтiм, а сёрöнжык ме ачым вöлись казялi, что небаскö петiс. Тэнат, батi, гортын тöдса нывка эм... видзчисис праздник кежас.

— Весь тэ, Аннушка, сiдз думайтан. Мамся да вонся менам гортын некин абу. А лöсьöтчи кö ме сэтчин ветлыны, дак дзир сьöд паськöмыс увья: эг казяв аскадö чемодансис видзöтнытö и эг тöд, что сiя важын ни песлалöм. Но, а тэнат?

— Мый менам?

— Но... кинкö эм, абу?

— Николай, да тэ мый? — Аннушка видзöтöв-керис зонкаыс вылö боксяньмоз. Эта кадö сылöн синнэс öгралiсö сэтшöм югыта да шоныта, кыдз некöр эшö эта вотöдз. — Менам эшö некöр да некин эз вöвлы. Кин ме кодьыс вылö видзöтас.

— Былись?

— Но он верит, дак ачыт тöдан. А ме и былись талуннявиöдз этадз ордчöн некинкöт эг мун.

— Мый нö видзчисин? — шутитöмöн юалiс гажмыштöм Сизёв.

— Видзчиси тай мыйкö, некинкöт вöлi да.

— Сiдз бытьтö некин эз и пантась? — одзлань шутитiс зонкаыс.

— Эг так öнöдз казявлы, мед кинкö панöвтiс.

— А ме думайтi, что тэнат кинкö эм ни. Сы увья эд öнöдз эг и лысьт öтпырись тэнö некытчö нуöтнытö. Мыйсянь тэ сiдз думайтiн?

— Да кыдз бы тэныт висьтавнытö... Сысянь, натьтö, что гленитчан меным мыйöнкö.

Эта вылö Аннушка эз шыась. Нывка дзир лэдзыштiс юрсö увланьö, бергöтыштiс мöдöрö чужöмсö, мыйкö пондiс думайтны. Сiдз нiя и сибöтчисö асланыс керку дынö, посöдз бердас сувтiсö.