Лымьягöд

Ог и тöд, веритсяс-оз кинлöкö лыддьöтiссез коласiсь, мед Москваын, Краснöй площадь гöгöр клумбаэз вылын, кыськö миян кодь запутымись локтöм морт лысьтiс öктыны гленитчан кусттэз вылiсь ягöд. Но эта и былись вöлi сiдз и некытшöм бöбöтчöм эстöн абу.

1978 годся октябрь месяцö меным усис вöвны Москваын природа дозоритан Всероссийскöй обществолöн витдасгодся юбилей коста торжественнöй заседаннё вылын. Кыдз, натьтö, и овлö унажыкыскöт, Москваас ми локтiм сутки кежö одзлань. Сiйöн регистрация да гостиницаö сувтöм бöрсянь кольччис кад тöдсасьыштны мымдакö столица шöркöт.

Эта вотöдз меным важын ни охота вöвлi кытшöвтны кöть öтпырись подöн Кремль гöгöр. А сы йылiсь басни коласын ме дынö жö öтлаасис Лысьвенскöй городскöй организацияись менам важся тöдса, пöрисьжык коллега-ёрт Александр Андреевич Шолохов. Кыкöн сыкöт ми и иньдöтчим асланым экскурсия вылö. Пондöтчис сiя миян Спасскöй башня бердсянь Кузнецкöй пос ладорö, сэсся Москва ю набережнöй пöлöн. А кончитчис площадь мöдöрись башня дынын. Эстöн миянлiсь туйсö поперегалiс Мавзолейö жагвыв кыссян очередь.

Сэтöн жö охота лоис кöть öтпырись вöвны и Мавзолейын, Ленин дынын. Вель дыр ковсис кеймисьны оцепленнёын сулалiсь постовöйезлö, мед и миянöс лэдзисö эта очередьö. Сы вотöдз Мавзолеяс ме эшö öтпырись эг вöвлы. Но кыдз бы ми эг корсьö, кыдз эг кеймисьö, лэдзны миянöс очередьтöг Ленин дынö постовöй милиционеррез эз и думайтö. Сэк Александр Алексеевич — Великöй Отечественнöй войналöн участник да инвалид — кыскис да мыччалiс ассис удостовереннё. Эта отсалiс. Менам, вежöртана, ёртöлöн кодь удостовереннёыс и эз вöв. Ме мунi сыкöт, кыдз кольлалiсьöн. Сiдз ми вöлiм Мавзолейын Ленин дынын.

Кольччис миян кад и Мавзолеяс пыралöм бöрсянь. Сэк ми ёртöкöт баитчим кежавны эшö Василий Блаженный храмö, кöда, кыдз тöдö лыддьöтiсь, сулалö сэтöн жö, Краснöй площадь вылас. Храм пытшкас лэдзалiсö дзир чукöрöн, кыкдас-кыкдас вит морт мымдаöн. Сы чукöрö, кöда ештiс пырны миян одзын, ми ёртöкöт сёрмыштiм ни, и öнi ковсис видзчисьны, кöр чукöртчас сымда жö отирыс вились.

Нем керöмсянь ме жагвыв пондi ветлыны одз да бöр храмö пыранiн весьтын, а öткоста нёджжасьыштлi ас гöгöр. Сэк меным и усис казявны лажмытик бордюрöн кытшöвтöм клумбаэз вылiсь метр сувдышта кытшöмкö тöдтöм кусттэз, кöдна öнöдз сулалiсö ась тöдчöмöн и кельдöтöм ни, но сё эшö чапкытöм да тшöк листöн. Но öддьöнжыксö дивуйтiс не киссьытöм лист, а уввес бердын комокöн-комокöн öшалан ягöд да нылöн адззывлытöм рöмыс. Öтлаын и гырисьöсь и поснитöсь, быдöнныс нiя вöлiсö чочкомöсь, кыдз йöв. Медперво меным нельки думайтсис, что нiя кынмöмöсь, кöть сiя кадö Москваас погоддяыс видзсис сё эшö шоныт, быд лун зэрис да шлячитiс. Невна сёрöнжык ылöслö мыйкö сё жö казьмöтiс, что этна причудливöй, дивуйтан рöма ягöда кусттэзкöт ме кыдз бытьтö бы невночка тöдса ни, кöть пантавлынытö нiйö этадз, кыдз талун, некысь да некöр эшö эз усьлы. И былись. Одзлань тöдвылам усис, что «Декоративнöй дендрология» учебникись ме кыдзкö гортын лыддьöтлi сэтшöм жö кустарник йылiсь. Роч кыв вылын сiя шусьö снежно-ягодникöн.

Гортыс эта кустарниклöн — Севернöй Америка. Сэтчин сы родiсь быдмöны дасвит вид. Быдöсыс коласiсь миян озелененнёö интродуцируйтöм (пыртöм) сэтчинiсь дзир öтiк, кöдалöн кусттэс öнi и вöлiсö ме одзын. Книгаись лыддьöтöм сьöртi, некытшöм сорасьöмись одзлань ме эг ни пов. Öнi, кыдз мекöт и овлö быдкоста, кöр усяс кысь син вылö тöдтöм, а сэтчö жö эшö и гленитчана мыйöнкö пу нето куст, меным лоис охота, мед сiя быдмис не только татöн, Москва шöрас, Краснöй площадь бердын, но и миян округын. Виль жö. Вöвлытöм, позьö шуны. А сэтчö жö эшö öддьöн аскодьöм да дивуйтана аслас ягöдöн. Но кыдз позис керны сiдз, мед пыртны сiйö миян округö? Вежöртана, что гарйыны сы ыжда куст да нöбöтны сiйö быдсöн гортö не самолётын, не поездын, не автобусын эз позь. А кöть бы, шуам, и позис, дак кин жö лэдзас керны сымдасö — гарйыны вужжезнас Москва шöрись клумбаись озелененнё понда садитöм куст? Эд нiя быдмисö не вöрын, а бордюр сайын, клумба вылын. А приличнöй да колананёж быдтöм-велöтöм морт клумбаыс вылö и кокöн оз тальччы. Öддьöн небытшöм да небасöк лоö — тальны морт киöн да отир гаж понда керöм-лöсьöтöм клумбаэз. Небытшöм да небасöк нельки сэк, кöр этна клумбаэз вылын нем абу да оз быдмы. А мый баитсяс столичнöй клумбаэз тальöм йылiсь, да сэтчö жö эшö кöдна нач столица шöрас, ордчöн Кремлькöт да Краснöй площадькöт, дак эта йылiсь, кыдз ме вежöртi, и думайтнытö вöлi нем. Но мый керны, кöр эта адззывлытöм да гленитчан кустсö, кöдö сэтшöм охота вöлi вайöтны гортö, ас округö, ме первуись панталi столица шöрись? Ме сулалi, думайтi.

А не весь сё жö отирас баитöны, что оз вермы лоны морт оланын сэтшöм положеннё, кöдаись бы эз адззись некытшöм петанiн. Пондыны кö бытшöма кошшыны да думайтны — адззисяс. Адззисис и эстöн. А петанiныс вöлi сiя, мед öктыны кусттэз вылiсь ягöд, кöднаын эмöсь кöдзыссэз. И лоасö кö нiя сэк кежö воöмöсь да кужны кö нуöтны стратификация, а сэсся кöдзны муö, кöдзыссэс вермасö петавны. Сiдзкö, колiс öктыны кусттэз вылiсь ягöд. Но позьö я? Долыт я керны этö лунся югытö столица шöрын, унася-уна отир син одзын? Вежöртана, что öддьöн и öддьöн недолыт. Сэтчö жö эшö и полöм петö. Вдруг кытшöмкö постовöй милиционер казялас? Пуксьöтны сэтшöм преступленнё понда, батi, оз жö пуксьöтö, но, мыйись-мый, дак стыд-позорыс отирыс син одзын дöнзяс эта увья пуксьöтöмысся не донтöмжыка, сiдз и тöд. И сё жö... Планыс, кыдз этö позяс керны, сэк кежö ме юрын зорамис ни. Но и кадыс öтiк местаын тожö эз сулав.

Кытчöдз ме ветлöтi öтмöдöрö клумбаэз гöгöр асфальтируйтöм туёккез кузя да думайтi, кыдз да мый керны, сы коста храмö пыранiн весьтын отирыс ештiс öксьыны вель уна ни. Öнi сiйö и видзчись — оссяс ыбöс да висьталасö, что позьö пырны. Öштыны одзлань кад эз позь. Сэк ме кыски пытшкись карманiсь записнöй книжка, нетшкöвтi торсис сöстöм гижöт лист. Негорöн кори сибöтчыны матöжык ас дынам ассим ёртöс да нюжöтi сылö гижöтсис каттьыштöм неыджыт чумпель. «Видз». Сы коста жö ачым öтпыр нёджжöвтыштi ас гöгöр — абу я кин матын миян гöгöр постовöй милиционеррез коласiсь? Но некин ны коласiсь матын эз тыдав. Сэк вöлись ме перыта оськöвтi бордюр ладорö, кыдз позис, нюжöтчи öтiк кинам колана куст бердöдз. Но нiя сулалiсö ылынöв — эг судз. Охота или не — ковсис сувтчыштны кокнитика öтiк кокöн бордюр вылöдз. Öнi вöлись öтiк кинам, öдва-öдва, верми судзöтчыны матiсьжык улок бердöдз, кöда вылын öшалiсö ягöддэзнас кынымкö роз. Улоксö асланям жагвыв нёкыртöмöн мöд кинам ме перыта коттьыштi сы бердiсь ягöд, а сэсся одззамоз судзöтi эшö и мöдiк, и куимöт ув.

Луншöрся кадö да столица шöрын, унася-уна отир син одзын «гусясьтöн» ачым ме сiйö и кери, дзирбараси öтмöдöрö. Öддьöн петiс полöм сыись, что кинкö да мыйкö то ли горöтчас, то ли лэбтас шум. Вермисö лоны и öтыс, и мöдыс. Но отирыс коласiсь, кöда, кыдз кöдзыв, шуксис-ветлiс одз да бöр ме гöгöр, ме вылö некин кыдзкö и дзар эз кер. Быдыс тэрмасис кытчöкö аслас мог увья. А тэрмасьтöнняныс нiя менö, тыдалö, эз и казялö. А кин кöть и казялiс, дак, натьтö, одзлань ни тöдiс, что ягöддэс кусттэс вылын несёянаöсь, и нiйö öктöмсянь прокыс меным лоас сё сымда.

Кинiсь ме полi эта коста медöддьöн, дак этö постовöй милиционеррезiсь. Тöдi эд, вежöртi, что боксянь видзöтiкö менам уджыс вачкисьö ась и неыджыт, но хулиганство вылö. И пондыв-ко сэтöн дорйисьнытö, кутас кö эта вылын милиционер. Кысь сiя кывзас да веритас, что ме асьнысö кусттэсö ог стрöйды, а öкта дзир ягöддэсö ны пытшкын кöдзыссэз понда. Бур, что и постовöй милиционеррес коласiсь менö некин эз казяв. Быдöс чулалiс бытшöма.

Чожа мый ёртö киын, кöда ме моз жö сiйö и керис, дзарышалiс öтмöдöрö, учöтик чумпельыс тырис. Сэк ме сiйö сэтöн жö каттьыштi да тэрмасьöмöн дзеби-сюйыштi ас пальто карманö. А öткоста ми кыкнанным кежыштiм ылöжык кусттэс дынiсь да керим вид, кыдз бытьтö нем эз и вöв.

Сэк кежö чукöртчöм отир одзын храм ыбöсыс оссис ни, и нiя, öтiк бöрсянь мöдiк, иньдöтчисö сы пытшкö. И кöр ме быдöнныскöт öтлаын тожö сюри храм стенаэз сайö, сэтöн вöлись аслам «гусясьöм» увья кутöм полöмыс невночка чулалiс, и ме лöньси. Одзлань меным пондiс думайтсьыны дзир аслам мечта йылiсь. А вöлi сiя сыын, мед не вунöтны да не öштыны некытчö чумпельö öктöм ягöд, вермыны вайны сiйö гортöдз да кöдзны. А кöр петаласö ны кöдзыссэзiсь виль быдмассэз, сетавны нiйö город пасьта природа радейтiсь отирлö. И пондас сэксянь быдмыны да цветитны округ пасьта озелененнёын да гажöтны аслас розовöй рöма цветтэзöн отирлiсь синбур нач эшö тöдтöм, адззывлытöм быдöнныс понда, первуись меöн пыртöм виль кустарниковöй культура — лымьягöд.

Вежöртана, что сэтчöдз вöлi эшö ылын. Но кытшöм мечта овлö матынöн? Быд сувтöтöм цельсö сiйöн и примитiм шуны мечтаöн, что сiя ылын да вылын. Менö жö аслам мечта дынöдз матынсьöтiс сiя, что сылöн бöжыс, позяс кö сiдз висьтавны, вöлi киам ни. Висьтавны веськытжыка — виль быдмаслöн кöдзыссэс куйлiсö ме пальто карманын. Медколана уджыс вöлi керöм.

Рассказ конецсö кыдз бытьтö позис бы видзчисьны сэтшöмö, что öктöм кöдзыссэзiсь быдтöм да округ пасьта паськöтöм лымьягöд öнöдз цветитö ни. Эд кыдз-некыдз, а кадыс сэксянь чулалiс кыкдас год сьöрна. А не. Талуннявиöдз округ пасьта и öтiк кусток лымьягöдыслiсь он пантав.

Да, столица шöрын öктöм ягöддэсö ме и былись гортö вайи, не эг вунöт некытчö, не эг öшты. Но бертi ме ноябрь медодзза числоэзö, кöр гортын муыс вöлi кын ни, а вевдöрсяняс куйлiс вонясянöдз лым. Кöдзны вайöм кöдзыссэсö арсяняс жö эз ни позь. А кöдзöмöсь тулыссянь да стратифицируйттöг, нiя эз ни петалö.

Вель уна чулалiс эта бöрсянь кад, а Москва шöрын весись керöм уджсö меным и öнöдз эшö жаль. Эта увья и рассказсö гижи. Öнi кöть лоас мый вылö надейтчыны. Думайтсьö сё жö, что адззисяс природа радейтiсь отир коласын кöть öтiк сэтшöм морт, кöда пондас шогавны ме шогöтöн — охота лоас пыртны миян округö кытшöмкö виль быдмас. Ме рад благословитны сэтшöм удж вылö быд мортöс. Мый эз пет менам, ась петас мöдiклöн.