Кытшöм миян бадьöг

Дзар керыштас кинкö лыддьöтiссез коласiсь рассказыс ним вылö да сэтöн жö, натьтö, и висьталас: «Чочком. Кытшöмöн эшö сылö этася лонытö?» Уна год сьöрна и ме думайтi тожö сiдз жö, но вот...

Вöлi кыдзкö тöвнас командировкаын, горт районын. Мунi сэтчин енöжöт — самолёт вылын. А бертны бöр городас лöсялiс му кузя, легковöй автомашина вылын.

Бертiм рытъявыв. Пемдандорас чулалiм Юрла, пондiм сибöтчыны Белоево посад дынö. Сэк кежö öтöрас тыдавны пондiс умöлякодь ни. Эстöн, кытшöмкö ыб дорын, зэв матын машинаыс одзись, туй бердсис, лэбтiсисö öтдруг вит-квать мымда кытшöмкö сера да гырись кайез. Вöлiсö нiя гулюся тöдчöмöн гырисьжыкöсь, кöть сьöлаэз нето таррез вылö тожö эз вачкисьö, сiдз кыдз сэтшöм табунöн тар-сьöлаыс пантасьö етша. Да и кайес асьныс эз вöлö сы гырисяöсь, мед примитны нiйö сьöлаэз нето таррез местö. Но кыдз вывтырнаныс, сiдз и лэбзьöмнаныс — кытшöм лöня да перыта лэбтiсисö борд вылö да сэтöн жö, пуэс гöгöр кытшöвтöмöн, сайöвтчисö син одзись — нiя мыйöнкö мыччассисö тöдсаэзöн. А вот тöдны перво жö ме нiйö некыдз эг вермы.

— Видзöт, бадьöггес туй дорöдззас вердчынытö петöмась, — юöртiс сэтöн ме одзын пукалiсь Евгений Константинович Чулков, кöдакöт ме корси бертны автомашина вылын гортöдз.

— Бадьöггез разь нiя? Сераöсь да...

— Кытшöммезöн нö нылö этася лонытö?

— Чочкоммезöн, конешно, — сорасьöмись повтöг шыаси ме паныт. — Öнi жö тöв. А сераöсь нiя дзир гожумнас.

Евгений Константинович, даскыным годöн месся пöрисьжык да сэтчö жö эшö вöралiсь морт, ме вылын шутитöм могись одзлань содтiс:

— Нiя эд дзир тiян, ойвыв ладорас чочкомöсь. А эстöн, матынжык лунвывлань, кыдз адззан, сераöсь ни.

Чужи да быдми ме вöр коласiсь деревняын, кöда гöгöр сiя кадö быдкодь вöр пöткаыс вöлi эшö тырмöмви. И ась ме, кыдз том коста, сiдз и сёрöнжык, вöралiсь-кыйсисьöн и эг вöв, быдöс кай-зверь йылiсь усьлiс не только кывлыны отир басниись. Унаöс ны коласiсь ме адззывлi ас синöн. Этö жö позьö висьтавны и бадьöг йылiсь.

Арсяняс, эшö кушмупод коста, часто этнö кайесö, быдсöн позувтöн, кытöн нiя вермисö лоны и дас мымда, а кöр нельки и унажык, позис пантавны ыббез пöлöн, вундöмпод коласiсь. Эстöн нiя вердчисö: кыдз курöггез жö, öктiсö-кокалiсö ыб вылiсь дзимлялöм бöрсянь му вылö кольччöм сю тусь. Вежöртана, что эта кадö нiя вöлiсö эшö сераöсь.

Частожык нiя пондывлiсö усьны син вылö сэк, кöр усьлiс лым. Сэк кежö чочкомöсь ни, бадьöггез пантасьлiсö сю шороммез гöгöр да туйез пöлöн, кыт отир вöлöн-додьöн ваявлiс кольтаэзöн сю, турун да кöрым. Но медкокнит вöлi пантавны этнö гöна кока кайесö тырöм видззез вылiсь, кытöн тшöка быдмис том да поснит бадь. Этö сысянь, что тöвнас бадь пугырыс бадьöггез понда медколана сёян. Сiдзкö, сэтшöм вердчана местаэзын нiя и чулöтöны унажык кад. Овлö, что инман мукöд коста том бадь вöр коласын сэтшöм местаö, кытöн быд куст гöгöр лымыс кыдз бытьтö серöтöм унася-уна да кузя нюжлалöм басöк крестока следдэзöн, дзик кинкö вышивайтöм дышöтчытöг чочком лым кузя синбур бурмöтан узöр, кытöн шöрись гыжлö кык бокисьыс бергöтчöмась нач поперег. Этасянь и аркмöм следыс правильнöй крестокаö. Этна и эмöсь бадьöглöн следдэс. А сюрны кö сэтшöм местаö одз асывнас, чуть я не кокувтiсь позьö саймöтны да лэбтыны борд вылö и асьнысö кайесö. Ойсö бадьöггез чулöтöны не пуэз вылын, кыдз шуам, катша-рака, а кыдз и сьöлаэз да таррез, тожö гарйисьöны лым пытшкö. И овлö, что эта кадö ны дынö позьö сибöтчыны зэв матö.

Вылынжык вöлi юöртöм ни, что тöвнас бадьöггез вердчöны унажыксö бадь пугырöн и олöны тожö бадьяин местаэзын. Этасянь и нимыс нылöн, кыдз ме думайта, зорамис коми кыв вылын сiя жö бадь кывсянь — бадьöг. Медтöдчанаыс жö ме понда кольччис сiя, что кынымись бы ме этнö кайесö эг пантавлы эта вотöдз тöввезнас уна год сьöрна ни, нiя пыр вöвлiсö чочкомöсь. Сьöддэзнас тöв кежö кольччывлiсö ны бöжын дзир кынымкö бордтыв. Сiйöн Евгений Константиновичлiсь шутитöмöн горöтчöм кыввесö ме шутка местö и примитi. Но эта шутитöмсянь зорамöм вопросыс «былись я сiдз?» ме юрись сэсся эз ни петав. Веритны сыö, что бадьöггес чочкомöсь дзир округын ойвывланись районнэзын, а матынжык Кудымкар гöгöр нiя сераöсь ни нельки тöвнас, ме, вежöртана, и эг вермы. Но и не веритны ас синöн адззылöмыслö — сiдз жö.

Колö висьтавны и сiйö, что сера бадьöггес йылiсь эта вотöдз ме тожö кывлi ни. Тöдi нельки, что олöны нiя не миян кодь уль да пемыт лыса вöррезын, а лиственнöй вöра и этасянь югытжык да шонытжык местаэзын, югыт вöрсора степпезын. Но öнi, кöр ме нiйö адззылi ас синöн да асланым местаэзiсь, охота лоис сибöтчыны матöжык эта истина дынö.

Тöдса вöралiссез коласын юасьöм колана ответсö эз сет. Öтiккез ны коласiсь лыддисö, что бадьöгыс миян округын пантасьлö дзир чочком, мöдiккез — что сiя миян сера. Куимöттэз баитiсö, бытьтö бы и чочкомыс, и сераыс — öтiк да сiя жö кай. И сера сiя дзир гожумнас, а чочком — тöвнас. Но адззылi кö ме серасö ас синöн не гожумнас, а тöвнас, то, вежöртана,что сэтшöм баснилö веритны некыдз эг вермы.

Бытшöмжыка отсалiс бадьöггез йылiсь книгаэзын гижöм. Сiдз сельскохозяйственнöй энциклопедическöй словарьын висьталöм, что бадьöггес миян государство территория вылын олöны кык семействоись. Öтыс ны коласiсь — чочкомыс, пырö дозмöррез семействоö, а мöдыс — сераыс, фазаннэз семействоö. А этна кык видся эмöсь эшö и мöдiк виддэз, кыдз, шуам, тундрянöй бадьöг, каменнöй бадьöг да мöдiккез.

Эшö бытшöмжыка висьталöм эта йылiсь книгаын «Животный мир Коми АССР». Эстöн гижöм сьöртi петö, что кыкыс коласiсь, кöдна олöны сэтчин: чочком бадьöг да тундрянöй бадьöг, миян округын частожыксö пантасьлö чочкомыс, кöть вермас сiдз жö пантасьны и мöдыс. Но мединтереснöйыс гижöм сера бадьöг йылiсь. Ась эта кайыс и лыддиссьö шонытжык местаэзiсь, но кыным одзлань, паськöтö ассис оланiнсö сё паськытжыка да паськытжыка. Сiдз 1920 годдэзö Коми АССР территория вылын сiя эшö нач абу пантасьлöм. Но 1930 годдэз кежö уна лоöм миян Пермскöй областьын.

Сiдзкö, и миян округын сiдз жö. И эз кö сiя öнöдз паськав округлöн ойвыв ладорись районнэзöдз, то Кудымкар гöгöр районнэзын олö важын ни. Сiйöн Евгений Константиновичлöн шутка могись висьталöм кыввес, что бадьöггес чочкомöсь дзир округлöн ойвыв ладорын, а лунвывлань нiя сераöсь ни, нач и не шутка, а быль. Эмöсь миян и öттэс, и мöддэс.