Вöрмöссэз

Кытшöм сё жö охота овлö челядь коста тöдны ас гöгöр оланiсь вильсö да интереснöйсö быд лун сьöрна.

Öння кадö этаын бытшöма отсалöны радио да телевизор. Нiя и юöртöны и мыччалöны быдöс, мый эм интереснöйыс природа оланын не только матi гöгöр, но и мушарлöн быд пельöсын.

Миян челядься кадö сымдаыс эз вöв. Не война вотöдз, не сы бöрсянь, деревняын овтöн-быдмытöн, радиосö ми и вöтöн эг кывлö. А телевизор йылiсь, кöда талун сулалö чуть я не быд керкуын, сэк нельки думайтны эг кужö. Сiйöн быдöс, мый охота вöлi адззывны да тöдны ас гöгöр природа оланiсь, унажыксö сыись ми керлiм асьным.

Гожумся кадö тшыгувья ыбись-вöрись да неыджыт Сия ю дорись деревня вылас ми кодьöнсö эг и мыччасьлö. Быдлаын, кытöн бы эг вöлö, ягын ли ольын, ыбын нето видз вылын, медодз кошшим аслыным кытшöмкö кынöм пöтöс: кöзъягöд да пожум туганнэз, шöмкор да гуммез, тшак да ягöд. Но неетша эта коста пантасьлiс миянлö и сэтшöмыс, кöда саймöтлiс ас дынас кытшöмкö интерес. Тальтöм да туруна деревенскöй улица вылын орстöн-котрасьтöн ми вель дырöн видзöтлiм матiсянь малянка удж сьöрын, кöр сiя, топ мельник, бусöсьмöм быдсöн вывтырнас веж рöма цветочнöй пыльцаöн, судзöтчис аслас жалоöн сизьюр цветтэз пытшкöдз да öктiс-юис сэтчинiсь нектар. Деревня дынсянь медматiсь вöрокись, кытшöмкö лапья кöз вылiсь ми адззывлiм ракапоз и, вежöртана, что ордчöн эг мунö. Дышöтчытöг, неöтпырись лун сьöрна, ми чывлiм-кайлiм эта поз дынö, мед адззывны ас синöн да тöдны, эзö я петö кольттезiсь ракапияннэз. Колiс дзир кинлöкö миян коласiсь шыасьны вöрын тшакьявтöн «Челядь, урыс!», кыдз ми быдöнным сэтöн жö и вунöтлiм тшак йылiсь. Горöн юасьтöн: «Кытöн? Кытöн?!» быдöнным чукöртчывлiм сы гöгöр. Чож да кокнит зверёксö мийö вашöтлiм пу вывсянь пу вылö сэтчöдз, кытчöдз асьным эг мыдзлывлö руз, да кытчöдз сiя эз сайöвтчывлы дзебсисьöмöн миян син одзись.

И, конешно жö, быдыслö миян коласiсь сэк ни вöвлi öддьöн охота адззывны ас синöн ошсö и кöинсö, ручсö и вöрканьсö. И ло сымдаыс былись кинкöткö миян коласiсь, вот уж вöлi бы мыйöн ошшасьны мöдiккез одзын, мый касьтывлыны вель дыр кежö эта бöрсянь. Но этна гырись зверрез матын деревня гöгöр эзö овлö. А мунны пыд вöрöдз ми эшö и асьным эг чайтчö да эг лысьтö. Этö вермисö керны дзир пöрисьжык отир. Сiйöн миянöс и гажöтлiс сiдз стариккезлöн вöралöм йылiсь быдкодь висьтасьöм. Öнöдз эшö тöдвылын и сэтшöм картина.

Гожумнас, шондi пуксян гöгöр, деревня сайын пондö кывны öткаса джыннянлöн кыз голоса боткöм да колхознöй мöссэзлöн баксöм. Ми сэк жö колям грива вылын шар-палкаöн орсöм, кин кинöс одзалас, котöртам паныт баксiсь подалö.

Мед не сюрны гöрд нырпыса, йыла сюра, кыз голяа, бурöй рöма колхознöй пороз син одзö, кöда мунö и локтö пыр медодзын, не кулöмöсь, не ловьяöсь — ми полам сыись, кыдз биись, — шыасьтöг да вöрöтчытöг пукалам кытшöмкö йöр вылын, видзчисям. И вöлись сэк, кöр мöс табуныс чулалас миян весьтöт ферма ладорö, ловзьыштöмöсь, ми уськöтчам быд ладорсянь пöрись пастух дынö, кöда мыдз да пымалöм люзь лунтыр сьöрна жöдзöм-ветлöтöмсянь, жагвыв вешталö подаыс сьöрö гырись нинкöма коккесö.

— Кöинсö адззылiн, Митипер деда?

— Эг эд, горадзуллез. Эз талун мыччась. Мыччасяс кöркö, дак висьтала бöра.

— А ошсö, деда?

— А ручпияннэсö?.. — öтамöдсö одзалöмöн сё эшö кылö быд ладорсянь. Но нельки колхознöй пастухлö, кöда гожумся кадö, лунiсь лун, вöрсис оз и петавлы, пантасьны этна зверрезкöт усьö не пыр.

Овлö, натьтö, и сiдз, кöр мукöд мортыс, ассис вексö овтöн, ош-кöинсö вöрсис и öтпырись оз адззыв. Эд натодиль адззисьлöм могись паныт мортыслö нiя некöр оз локтö, частожыксö ордйисьöны. И усьлö кö кинкöт ны коласiсь пантасьны, дак овлö эта нач видзчисьтöг, кöр одзлань эта йылiсь не тöдны, не думайтны оз позь.

Тулыснас, ыджыт ваэз коста, ме сюри командировкаö: Кöсва сайись горт ладорö. Сэтчин и майскöй праздниксö чулöтi. Но праздник мöдлунас ни звонитiсö райкомсянь да перытжыка тшöктiсö бертны бöр.

Подöна туйыс вöлi кузь — нёльдас вит километр ылына. Сэтчö жö и тöвся туйес разьсисö ни. Пыд вöрöт сё эшö пыдын да шольöм вевдöрсяняс лым. А пым шондi югöррезöн лунiсь лун бытшöма шонтöмсянь ыббезлöн лунлапöв боккес вöлiсö кушöсь ни. Оссьöм юэзын дугдывтöг ыждiс да петiс береггезiсь ва. Мукöдлаас вöлiсö ни нöбöтöмöсь поссэз. А мукöд лажмыт местаэзöт ыждöм ваэзöн вöлi босьтöм и туй.

Гортсянь ме петi одз асывнас. А час куим сьöрна öткöн да кокнита оськавтöн вуджи Сия юлiсь ойвыв вож да сибöтчи Колесуха весьтöдз. Сiдз шусис Сия ю вылын сэкся колхоз «Большевиклöн» неыджыт электростанция, кöда сетiс колхозниккезлö би.

Сiя годдэзö, вöр кыскалöм могись, эстi туйыс вöлi веськöтöм ни. Вылына лэбтöм дамбаöн öнi сiя поперегалiс непаськыт нюр да электростанциясö ордйöмöн, петкöтiс веськыта Кöсва берег дорö. Дамбаыс бердсянь öтмöдöрö негырись да шочыник нюр-вöрыс вöлi вийöм-кералöм не öтiк дас оськöв пасьтöн, бытшöма тыдалiс вель ылö.

Верми я ме тöдны одзлань, что эта вотöдз адззывлытöмыскöт медодзза пантасьöмыс лöсялас тшöтш эта луншöрся кадö да эшö сэтшöм паськыта весöтöм, прос да югыт местаын? Вежöртана, что эг. Сымдасö ме одзлань эг вöтась. Юöртны эта йылiсь меным тожö некин эз вермы. Сiйöн медперво и примитi нiйö нач не ны местö.

Сэк кежö ме ештi дзир петны паськöтöм трасса вылö. Оськала сiдз лöня да чöлöмöн колея местöт шольöм лым кузя, кöда оз ни дзурт сэтшöм горöн, кыдз тöвнас, а дзир кышöтыштлö кок увтын. Сы коста жö, одзлань видзöтiкö, син вылам меным усис, кыдз ю берег ладорсянь шочыник нюр-вöр коласiсь бура весöтöм местаас петiс бурöй рöма, кузь кока вöв.

«Но, — думайтыштi ме ас кежам. — Мыля нö сэтшöм одз пуксипинсаыс вöввезнысö лэдзалöмась?» Вежöртана, что думаыс вöлi не öддьöн ылöса. Кин жö пондас лэдзавны вöввесö сiя кадö, кöр быдлаын эшö пыдына куйлiс лым, а юэс сё эшö ыждöны да петöны асланыс береггезiсь. Но мый вöлi думайтны эшö этася, кöр ме одзын мыччисьöмыс вачкисис вöв вылö?

То ли аслам дивуйтчöмыс, то ли мыйкö мöдiк, аслым казявтöг, менö сувтöтiс. Сэтöн ни усис син вылам, что вöлыс мылякö бöжтöм. А эта коста сiя, оськöв бöрын оськöв, пидзöс сувда шольöм лымсö нем туйö бродиттöн, сибöтчис сё матöжык туй бердас. Ме дынсянь сiя вöлi витдас-кватьдас оськöв ылына, и менö, вöрöтчытöг сулавтöнням, тыдалö, кытчöдз эз казяв.

А одзлань лоис эшö то мый. Кытчöдз ме видзöтi туй бердö сибöтчись бöжтöм вöв вылö, бöрсяняс, сы след кузя жö, мыччисис эшö мöдiк. Ог тöд да ог куж висьтавны, кöдалö ны коласiсь, то ли айпöлыслö, то ли мампöлыслö колö ветлöтны одзас. Но сiйöн дзир, что эта пантасьöм коста комолöй мампöлыс мунiс одзас, ме перво жö сiйö эг тöд да примитi вöв местö. Но кöр одзисьыс сьöрö мыччисис басöк кокошника айпöлыс, эстöн вöлись ме и вежöртi, кытшöм вöввез вöлiсö ме син одзын.

Эстöн менö вöлись и кынтiс аслам местаын, туй бердас. Öнi не только вöрзьöтчыны кöдöрöкö, ме и синöн кваркыштны эг лысьт, но сы коста жö орöттöг дзирги-видзöтi ны вылö да видзчиси, мый лоас одзлань. И мый менö медöддьöн полöтiс эта коста, дак медодз ас моросын сьöлöмлöн вынася-вынöн брякйöм-тогзьöм, кöдася ме сэсся нем и нем эг кыв. Мыччассис нельки, что эта брякйöм-тогзьöмыс ештас кывны и ны дынöдз да не аскадö нiйö жö и повзьöтас. «Дак вот нiя, сiдз-ту, кытшöмöсь и эмöсь... вöрмöссэс», — гажвевйöн дивуйтчи ме ас кежам.

Эта коста нiя, сiдз жö сьöрсьöн-бöрсьöн, кыдз и мыччисисö ме син одзын, кокнита оськалöмöн кайисö туй полотно вылö. И кöр мампöлыс ештiс ни вуджны туй мöдöрас, ме вежöртi — янсöтчынытö ныкöт сэтшöм чожа бöр лоö жаль. А сэтчö эшö мыйсянько лоис охота сетны нылö тöдны ас йылiсь: сы йылiсь, что кöть нiя менö и эз казялö, но ме нiйö адззылi. Öтпырись да горöн ме шутньöвтi. И эта шутньöвтöмыс ны понда вöлi, тыдалö, полöтана лыйöм местö. Сымда и ештi казявны эта бöрсянь, кыдз нiя кыкнанныс нюжöтчыштiсö туй мöдöрас да öтпырись кылiс уввез коласын сюррезöн сяркнитöм.

Öнi вöлись менам кынтöмкодь коккезö мынiсö ас местiсь. Сы коста жö бертiс и колана лов. Ме котöрöн уськöтчи сiя местаö, кыт нiя дзир часöт вуджисö.

Ас бöрсянь кольöм следдэзныс, кöдна бытшöма тöдчисö туй весьтöт шольöм лымас, вöлiсö, кыдз баитсьö, эшö шонытöсь. Но асьныс эта коста некытöн матын эз ни тыдалö. Этасянь быдöс неважын адззылöмыс быльнас эз и примитсьы. Сiя чожажык вачкисис вöт вылö. Вот сiдз вот, нач видзчисьтöг, и тöдсасим.

Кадыс эта медодзза пантасьлöм бöрсянь визывтiс вель уна ни. А вöт вылö вачкисян сэкся картинаыс öнöдз эшö видзсьö тöдвылын.

ВÖРПИ

Вöрмöссэзкöт медодзза пантасьöм-тöдсасьöм бöрсянь мöдöтпырись пантасьöм вотöдз кадыс чулалiс не öтiк дас год сьöрна. Лоис эта мöдöтпырись пантасьöмыс одз гожумнас, кöр му вылас лымыс эз ни вöв, юэз пырисö бöр асланыс береггезö, а видззез вылын тэрмасьöмöн лэбтiсис виль турун.

Кыдзкö сэтшöм кадö, городас овтöн ни, кöр ме уджалi природа дозоритан окружнöй обществоын, пырис ме дынö удж коста менам земляк, вöралiссезлöн окружнöй инспекцияись начальник Анатолий Фёдорович Быков.

— Мунам отсасьны.

— Кытчö да мый керны?

— Верх-Иньваöдз, вöрпиянöс лэдзны.

Кин йылiсь мунiс басниыс, ме перво жö эг вежöрт. Вöрпияннас позьö шуны быдöс зверь-пöткалiсь пияннэсö, кöдна олöны не морт дынын, кыдз гортся пода, а ас кежаныс, вöрын.

— Кытшöм эшö вöрпиянöс?

— Вöрмöспиянöс инö.

«Аха. Вот кин йылiсь, сiдзкö, басниыс», — гажвевйöн думайтыштi ме ас кежам. Мый ковсяс керны сы понда, мед сiйö лэдзны, сымдасö ме кытчöдз и эг на тöд. Эг тöд эта увья и сiйö, кытшöм ковсяс этаын месянь отсöт. Но адззывны учöтик пиянокöс нылiсь, кöдна кöркö нач видзчисьтöг поперегалiсö Пуксиб волокын менчим туй, охота, вежöртана, вöлi.

Недыр мыйись ми Анатолий Федоровичкöт да эшö кык тöдса охотовед, пукалiм ни охотинспекциялöн служебнöй газикын, кöда жалейттöг зэркöтыштлöмöн, кыскис миянöс Верх-Иньва посад ладорö. Туй вылас ни Анатолий Фёдорович дженытика юöртiс:

— Вöрзьöтöм нiйö кинкö местасиныс. Вот и ковсяс эта бöрсянь мамыслö лунся югыт коста вуджöтны ассис пиянсö Иньва ю саяс. А öнi эд вöр кылöтöны. И тöла погоддя коста не етша сiйö берег бердас жмитö-вайöтö. Вуджасö, вежöртана, öтлаын. Причинатöг мамыс сьöрись сiя некытчö оз кольччы. А вот берег дорас чукöртöм пуэс увья йöрмас. Мамыс и ны весьтöт вуджас, а пияныс оз вермы. Бур — сплавщиккез казяласö, да умöль, что не сiдз отсаласö. Колiс перво жö мамыс сьöрö лэдзны. А нiя сiйö кутасö да бöр талань вуджöтасö. А кытчö öнi сыкöт?..

Басниыс коласын эг и казялö, кыдз локтiм Верх-Иньва посадöдз. Машинаыс сибöтчис да сувтiс местнöй лесник öшын увтö. Эстöн миянöс видзчисисö ни. Öшын увтас жö хозяиныс миянöс и панталiс да кадсö öштытöг пыртiс карта вылö. Сэтöн ми видзчисьыштiм. А ачыс сiя öтлаын аслас челядькöт пырис гидö. Чожа мый сэтчинсянь, кыт кыскöмöн, кыт тойыштöмöн, нiя вуджöтiсö порог омöн нач эшö учöтик, лажмытик бöра, дженытик бöжока, почти кöвдöм кодь гöгрöса пеля да аймамыс вылö жö вачкисян чужöма — горбыля ныра да гнедöйкодь гöна куканёкöс.

Гидсис югытiнас петкöтöмыс мыйöнкö сылö, тыдалö, эз гленитчы. Сiя не эз зурась, не эз чепсась öддьöнсö, а асныритöмöн вынсьöтчис кыссьыны кытчöкö бокö. И сiйöн, что кернытö сылö этö эз сетö, куканёк норöнакодь баксышалiс, позис кö бы сылiсь этö сiдз шуны. Сылöн баксöмыс джынысви, не висьтавны кö — унажык, вачкисис негорöн пöлясьöм вылö.

Карта вылас ни сылö голя бердас кöртыштiсö кузь кöртöт, ковсяс кö, мыйись мый, видзышавны. Сэсся осьтiсö воротаэз да, быд ладорсянь сiйö кытшöвтöмöн, жагвыв пондiсö вашöтны ю ладорö.

Мыйкö дырна вöрпиян дуритчис. То сiя перыта чепöссьывлiс кытчöкö бокö, мед мунны видзтöг да öтнасыслö кöдöрö шедас, то сувтчывлiс öтiк местаö да пондывлiс тарашитчыны мымда вын. Этöн сiя нач и нач вачкисис гортся куканёк вылö, кöда одз тулыснас лэдзалöм бöрсянь абу на эшö велалöм поводок дынö, оз кывзiсь да керö бы мыйкö асмознас.

Вежöртана, что воротаэс сайын жö вöрпияныс тöдтöм дук вылö перыта чукöртчисö дас етш деревенскöй поннэз да öдззисö лявгыны-вувтны, кöда кыдз прокмö. Мукöдыс ны коласiсь, голя вылын пушитöм гöнöн, сибöтчывлiсö зэв матöдз и готовöсь вöлiсö сэтöн жö уськöтчыны вöрпиян вылö. Но сибöтчыны зэв поннэсö ми сё жö эг лэдзö. А ачыс сiя ны вувтöм вылö, кыдз баитсьö, и виш эз кер. Сы понда нiя вöлiсö да эз вöлö. Сiдз, кыт тэрмасьöмöн, кыт сувтчышалöмöн, ми быдöнным и лэдзчим ю берег дорö.

Мырсьыштны вöрпиыскöт ковсис эшö и эстöн. А быдöс сысянь, что сiя годö, кыдз нарошно, Иньва ю весьтöт эз вöв пос, кöда кузя сiйö позис бы вуджöтны ю мöдöрас да нуöтны вöрöдз. Эта увья вуджöтнытö сiйö колiс пыжын. Пыжыс берег дорас сэк кежö вöлi лöсьöтöм ни, но кайны сы вылö ачыс вöрпи некыдз эз мöд. Медперво сiя нельки ваыс дынö матö мылякö эз сибöтчы, чепсасис то öтöрö, то мöдöрö, то тарашитчис, кыдз прокмис. Босьтны асьсö киö сiя тожö эз сет, пондывлiс пессьыны. Эта увья и полöм петiс кайны сыкöт пыжас. А öтпырись, кöр кинкö охотоведдэз коласiсь пыжас сiйö сё жö кайöтiс, пыжыс вöрöтчöмсянь вöрпи сэтöн жö чепöссис бöр ваö да петiс берег дорö.

«Но вот тэныт бурсö и кер», — кöритiс сiйö эта бöрсянь кöдакö охотоведдэз коласiсь.

Купайтчöмыс бöрсянь вöрпи васис повны дугдiс. Сэк сiйö пондылiсö кыскыны пыж сьöрö, мед вуджис ачыс, уйöмöн. Быдöнныс тöдiсö, что уявнытö сiйö не велöтны: кужö да вермö учöтсянь. Но и этаись тожö нем эз пет. Кынымись бы сiйö эз вайöтлö ва бердö, мед поводок вылын ли, сытöг ли сiя вуджис ю мöдöрас, куканёк быд коста бергöтчывлiс бöр. Сэтчö жö и лэдзны сiйö уйны, кыдз сэтöн жö казялiм, ю мöдöрас некыдз оз позь. Вуджанiн весьтас талун вились сулалiс тöлöн чукöртöм да жмитöм вöр, кöда пыр кайны берег дорöдз öтнас вöрпи некыдз бы эз вермы.

Вуджöтöмыс кузя аслас пессьöм шогья сэк кежö сiя, тыдалö, тöдчöмöн мыдзыштiс ни и кыным одзлань, баксышалiс-пöлясис сё частожык да норöнжыка. А бöрья кадö неöтпырись ни сибöтчылiс горба нырокнас ва бердö, пыравлiс пидзöсöдз, юис.

Медбöрын öтласöн баитчим — пондывны вуджöтны эшö плот вылын. Бур, что кошшисьнытö эта понда дырсö эз ковсьы. Колана пуэс вöлiсö сэтöн жö, кок увтын. Перыта адззисисö кынымкö скоба, кöрттуввез да проволока. И былись... Кöр плотыс вöлi керöм да сувтöтöм матö берег дорас, пессьыны куканёк эстöн эз ни понды. Кык морт коласын сiя кокнита кайис плот вылö. Сулавны сы вылын сiя мылякö тожö эз повзьы; не пышшыны, не чепсасьны эз пондыв. Эз думайт керны сымдасö нельки сэк, кöр плот жагвыв вöлi татшкöм берег дорись да жагвыв жö иньдöтчис мöдöр береглань.

Одзлань миянöс полöтiс эшö öтiк тор: кыдз вермыны петкöтны вöрписö плот вывсис берег дорö. Вдруг берег увтас тöлöн чукöртöм вöр вывтi вуджнытö сiя бöра оз чайтчы? А то эшö сюрас ваö да бöр мöдöрас бертас. Эта увья ми кынымöнкö сэтöн жö пуксим учöтик пыжок вылö, плотсö одзалöмöн вуджим мöдöрас да кутчисим удж бердö. Кин веськыта пыж вывсянь, кин берег дорсяняс, тойлалiм сы увтiсь чукöртчöм вöрсö увлань, пондiм видзчисьны, мый шогмас одзлань.

Сэк кежö сэтчö жö берег дорас сибöтчис и плот, кöда вылын, поперег пуэслö, кыдз ылöса пон, вöрöтчытöг сулалiс вöрпи. Сiя вöрöтчыштлiс ас местас да мышкыртлiс и сытöг ни мышкырöн видзан юрсö вöлись сэк, кöр, тыдалö, казявлiс береглiсь паныт сибöтчöм. Но нем умöльыс, кöда полöтiс быдöннымöс, эстöн эз ни ло. Кыдз только плот сибöтчис матöжык берег увтö, вöрпи, и эстöн кыдз пон жö, чеччöвтiс ачыс плот вылiсь, чуклясьтöг иньдöтчис вывлань. Некытшöм домöт сы бердын öнi эз ни вöв, да и видзнытö сiйö эстöн, гортас ни, вöлi немись. Поннэс эстöн эз ни вöлö, и уськöтчыны сы вылö вöлi некинлö. Эз позь дзир кольны сiйö матö берег дорас, отир син одзö, кöда коласын пантасьлöны быдкодьöсь. Эта увья ми и пондiм вашöтны сiйö ылöжык.

Ю бердсяняс одзаным куйлiс вель паськыт видз, ылынжык кöда сайын тыдалiс öзимöн зеленитан ыб. Эта ыб ладорö медодз ми сiйö и иньдöтiм. Но мырсьынытö вöрпикöт усис эшö и эстöн.

Öтiклаын миянлiсь туйнымöс поперегалiс лажмытiн, кытöн öнöдз эшö сулалiс вонясянöдз тулысся ва. Эта лажмыт да ва местаын тшöка вöлi петалöм стрелолист. Туруныслöн гырись, кузь да ота листтэс, кöдна кайисö вуж бердсянь дзир кыкöн да паныт öтамöдлö, сэк кежö вöлiсö лэбтiсьöмöсь ва вевдöрöдз ни. И кыдз только вöрпи сибöтчис эта местаöдз, вашöтны сiйö одзлань сэсся эз ни позь. Эстöн сiя лэдзчисис пидзöссэс вылö, горша пондiс вердсьыны. И ась ордчöн эта быдмаскöт адззисисö и мöдiк туруннэз, нельки öтiкö ны коласiсь сэсся сiя эз вöрзьöт, бöрйöмöн сёйис дзир öтiк стрелолист. Интересно и сiя, что сёйис вöрпи не только сылiсь ва вевдöрöдз мыччисьöм листтэсö, а сюйыштiс нырсö ва пыр му бердöдз да йирис вужöдз. Кыдз да кынымись бы ми эг пондылö вашöтны сiйö одзлань эта местаись, нем эз отсав. Бытшöма, сiдзкö, ештiс тшыгьявны вöрпи колана сёяныстöг гидас сулавтöн. Керны миянлö кольччис нем, кыдз сетны куканёклö сёйны пöттöдз. Ми сэтöн жö пуксим лиалöм бöрсянь косьмöм да пöрöм кыдз вылö, öзтiм куритны. А дас оськöв ылына миян дынсянь сулалiс ва гöп шöрас пидзöссэс вылын да вердсис вöрмöспиян. Кöр бырсьывлiсö сы одзись колана туруннэз, сiя сiдз жö пидзöссэс вылын, вешшыштлiс неылö одзлань.

Час етш бöртi, кöр вапукöтсис гленитчан туруныс унажыксö вöлi сёйöм, вöрпи вöлиськö сувтiс коккес вылö, петiс вапукöтсис бöр да ускок уськöтчис деревня ладорö, кöдöрсянь öнöдз эшö кылiс поннэзлöн вувтöм. Ковсис вöтчыны да панöвтны. Но ылöжык вöрпи мунны некыдз эз мöд.

Павжун кежö, кытöн ки вылын, кытöн кыскöмöн да мышксяняс одзлань тойлалöмöн, ми петкöтiм сiйö öзим ыб вылöдз. Колiс бы, кыдз баитiс Анатолий Фёдорович, вуджöтны сiйö ыб сайöдз, мый ми одзлань и мöдiм керны. Но эстöн вöрпикöт шогмис мыйкö нач невежöртана да видзчисьтöм. Кытшöмкö кадö сiйö мыйкö дзик саймöтiс да ловзьöтiс. Мыйсянькö сiя чепöссис местаись, перыта петiс миян кытшись да одззамоз негорöн баксышавтöн-пöлясьтöн, уськöтчис не веськыта ыб шöрöт, а шульгалань чукыльтчöмöн. Быдöннымлö медперво думайтсис, что вöрмöспиян, кыдз и неважын эта вотöдз, вились уськöтчис бöр посад ладорö. Сiйöн кынымкö морт уськöтчисö сы сьöрö, мед вöтны да панöвтны, то ли не сетны кöть бы бертны бöр ю ладорö. Но некöдсö эта коласiсь керны öнi эз ни позь. Да и колiс я сымдасö? Öткö, бергöтчыны бöр посад ладорö вöрпилöн, тыдалö, и дума некытшöм эз ни вöв. А мöдкö, котöртiс сiя одзлань сэтшöм перыта, что вöтны да панöвтны сiйö и думайтны вöлi нем.

Сувтчывтöг, кынымкö минута сьöрна, вöрпи поперегалiс чуть я не километр пасьта ыб. Дивуйтчöмöн, бöрсяняс сы вылö видзöттöн, миянлö öнöдз эшö думайтсис, что эта сылöн кытшöмкö ылöстöм орсöм. Быдöнным надейтчим сы вылö, что вöрпи котöртас сiдз межа дорöдз, а вöр бердас сувтас. Но и сымдаыс тожö эз ло. Эз сувтöт сiйö не ыб дорись межа, не неылын межа бердсянь пондöтчан вöр. Медодзза жö пуэс коласын сiя сайöвтчис миян син одзись.

— Вот тэныт и на...

— Мый сыкöт сэтшöмыс лоис?

Но висьтавны эта вылö некин и нем кытчöдз эз вермы. Дивуйтчыштiм быдöнным лоöмыс вылын, а керны одзлань кольччис нем.

Эта коста кинкö охотоведдэз коласiсь иньдöтчис ни вöлi жагвыв межа ладорö, мед бертны бöр. Но кынымкö оськöв бöрын сiя, тыдалö, казялiс мыйкö интереснöйö, кок увтас видзöтчöмöн муныштiс öтмöдöрö одз да бöр, сэтöн жö юöртiс:

— Да вот жö сылöн мамыс кыт неважын ветлöтöм.

Быдöнным уськöтчим сiя местаö и чожа мый былись казялiм нач неважынся да гырись следдэз. Вöлiсö я нiя былись вöрпиыс мамлöн, сымдасö бытшöма висьтавны и эз позь. Но что вöлiсö нiя былись вöрмöслöн да былись неважынсяöсь, эстöн эз вöв некытшöм сорасьöм. Öткö, сiйöн, что гортся мöсыс сы кузьöн некöр оз оськав, а мöдкö, — некытшöм мöс эта кадö лоны öзим ыб вылас эз вермы. Сэтчö жö и следдэс этна нуöтiсö тшöтш сылань жö, кöдöрö неважын да сэтшöм перыта котöртiс миян дынiсь вöрпи.

— Неужто сiя мамыслiсь дуксö кылiс? — дивуйтчыштi ме горöн.

— Но кыдз жö эз? Вежöртана — кылiс, — висьталiс меным паныт Анатолий Фёдорович. — Видзöт вот, татчöдз вайöттöн, кыдз упадьöс кыским. Некыдз ачыс эз мун. А кöр петiс мамыс след вылö, дак дзик ловзис. Не кыскыны, не тойыштны одзлань эз ни ков. Чепöссис местасис, дзик петшöралöм, мамыс сьöрö.

Одзлань кинкö охотоведдэз коласiсь эшö содтiс:

— Нимасьö ни, батi, öнi кытöнкö... Но мый жö?.. Бур бы сiдз дак.