«Прикашайтчис»

Колхоз лöсьöтчис кöдзан кад кежö. Эта увья правленнёын чукöртöм заседаннё кыссис дыр. Быдöнныс баитiсö сы йылiсь, мый эшö кольччис керны, мед аскадö петны ыб вылö.

Митрош Опонь-старик, кöда узьлiс правленнёас сторож местö, кывзыны правленчилiсь баснисö мыдзис. Порог дорас пукавтöн, медбöрын сiя пондiс нельки сунасьны. Ас кежас Опонь öнi кеймис дзир öтiкö, мед быдöнныс да перытжыка мунiсö гортö.

Рознитчисö правленчи сёрöн ни, кöр омöн деревня пасьта китсасисö петуххез.

Опонь, öнi öтнас ни, осьтiс форточка, ачыс петiс öтöрö.

Сибöтчис тулыс. Вель уна ештiс содны лун. Но ойес вöлiсö эшö пемытöсь. Вот и талун. Погоддя сулалiс мича да лöнь. Юр вевдöрын звездаэс — топ анькытш киськалöм. А му вылын кöть синö рос мöрт — немись нем оз тыдав. Но нельки пемыт да ыркыт ойö сöстöм руас кылiс ни сэтшöм тöдса да аскоддьöм тулыслöн дук, кöдасянь нельки он палялö.

Посöдзас Опонь сувтiс уна киэзöн бытшöма волькöтöм перила бердö, кыскис зепсис кöркö гöрд рöма, а öнi, дыр вöдитöмсяняс сальзьöм да бурöйсялöм, простöй табак кисет, пырис сы пытшкö тупика чуннезнас, пондiс чукöртны öтiк пельöсö кольччöм бус. «Колисö то вот бöра менö асланыс заседаннё увья ойбыт кежö тшыгйöн», — лöгтöг думайтiс ас кежас. Чепöльнас Опонь кыскалiс пельöсас чукöртöм табак буссö газета тор вылö, каттис сыись векнитик цигарка, öзтiс куритны.

Эта коста кытöнкö деревнялöн мöд дорас кынымиськö негорöн вувтыштiс пон. Сыланьсянь жö кылiс ыбöс дзирлöн кöза голосöн мергыштöм. Керкуэзын, то öтöрын, то мöдöрын, недырик кежö öзйисö биэз. Мукöдыс ны коласiсь чожа кусiсö бöр. Этö правленчи локтiсö гортаныс заседаннё бöрсянь да водiсö шоччисьны.

Крепыт табак тшынсянь да сöстöм русянь Опоньлöн он палялiс. Öнi сыын саймис охота кинкöткö баитыштны. Но некин ловьяыс сы гöгöр эта сёр кадö эз вöв. Опонь недырик педзыштiс местаас, а сэсся чатыртчис вывлань, пондiс видзöтны звездаэз вылö. Эта коста «кöшлöн» созвездиеыс, кöдö шуöны Медведицаöн, öшалiс веськыта сы юр весьтын. Видзöтöв-керис Опонь-старик сы вылö да сэтöн жö ас кежас и думайтiс: «Эм жö эд вот мыйкö сэтшöмыс. Пуксьöмась öтамöд дынö кöш моз. А мыля бы и не мöднёж кыдзкö? Мыля бы, шуам, не ероплант моз? Сэтшöмыс вылö и тасянь видзöтнытö басöкжык бы вöлi. А батi эм кытöнкö сэтшöмыс да?»

Аэроплан кодь созвездиесö кошшытöн, Опонь жагвыв и пондiс бергöтлыны öтмöдöрö юрнас. Но мымда бы сiя эз нёджжась, мымда эз вынсьöтчы, коланасö некысь эз казяв.

Медбöрын старик вились бертiс синнэзнас «кöшыс» дынö и сэтöн... «Но-но-но... Эта эшö мый сэтшöмыс?» Видзöтö Опонь вывлань и аслас синнэзлö оз верит. Казялiс сiя мыйкö адззывлытöмö да невежöртанаö. Эттшöмыс йылiсь некöр эшö и кывлынытö эз усьлы. А сэтöн... Видзöтö Опонь вывлань, а кымöрöттяс ыджыт да гöрд звезда шытöг лэбзьö. Дивуйтчытöнняс старик и синнэсö тiльыштiс. А кöр вились чатыртчис, сэтöн жö бöра и казялiс, кыдз гöрд звездаыс мунö сё одзлань. Вот сiя и «кöшыс» дынö ни пондiс сибöтчыны, сiйö и видзöт — мöддэскöт люкасяс. «А мый жö нö лоас, былись кö люкасяс?» — Повзьöмувьяс Опонь нельки синнэсö недырик кежö кунис, пондiс видзчисьны одзлань, мый лоас. Но чулалiс минута сьöрна, то и дыржык, а нем полöтанаыс сiдз и эз ло. Эз кыв звездаыс люкасьöмсянь горöн гымыштöм, эз паськав и синбур гусялан чарньöв. А кöр Опонь вились осьтiс синнэсö да дзар керыштiс вывлань, сы весьтын сё одззамоз öшалiс югыт звездаа пемыт-лöз кымöр. Нельки «кöшлöн» созвездиеыс вöлi дзонь да одззамоз аслас местаын. А гöрд рöма звездаыс, кöда эшö неважын сэтшöм перыта сибöтчис «кöшыс» дынö, öнi сiйö ештöм чулавны ни да тэрмасьöмöн лэбзис одзлань.

Эта вылын Опоньлöн полöмыс невна чулалiс. Öнi сы местö зорамис интерес. Сiя чапкис сотчöм цигаркасö посöдз бокас, ачыс пондiс видзчисьны, мый лоас одзлань.

Одзлань умöльыс тожö нем эз ло. Эта коста гöрд звездаыс не эз усь, не эз кус, не эз люкась мöдiк звездаэз бердö. Сiя лэбзис сё одзлань да одзлань. Позис думайтны, что сылöн, дзик «нарочнöйлöн», вöлi кытшöмкö аслас заданнё, кöдö колiс тыртны, кыдз позьö перытжыка. Этасянь сiя и тэрмасис аслас туй кузя. Созвездие бöрын созвездие, звезда бöрын звезда кольччисö сы сьöрись бöрлань. А сiя сё мунiс, сё тэрмасис. Быд чулалöм минутаöн звездаыс лоис сё ылынжык, а этасянь сё чинiс, учöтсялiс. Медбöрын сiя и нач öшис син одзись кытöнкö ылiсь кымöр дорас.

Вель дыр эшö сулалiс Опонь-старик перила вылö нырыштсьöмöн, чöлöмöн видзöтiс кымöрас быд звезда вылö. Но нiя одззамоз öшалiсö быдыс аслас местаын да лöня куньышасьöмöн дзиргисö-видзöтiсö ойся пемытöн каттисьöм му вылö.

Думайтiкас Опоньлöн киыс вились пырис зепö да кыскис сэтчинiсь важын ни просмöм табак кисет, куравнытö кöдаись öнi вöлi нач нем ни. Жöдзыштiс старик местаас, думайтiс: «Котрасьлыны разь гортöдз? А то кытшöм эта олан, кöр куританыс сьöрын абу. Кыдз вот только муннытö?»

Аслас горт дынöдз туйсö Митрош Опонь-старик кытчöдз и эз вунöт. Но вöлi сэтшöм кад — тулыс. Луннас, шондiыс шонытсянь, гöгöр ва да нять, а ойнас кынтö. А кыдз кынтас, — нильыг, тальччыны полöм петö. Сiйö и видзöт — берездасян кытчöкö кын вылас да сивилёнтö пиньöвтан, ки нето кок чеган. Но нем кö куритны...

Правленнё ыбöссö Опонь игналiс замок вылö, босьтiс сьöрас öзтöм фонарь, петiс.

Йöррес пöлöн, кыт видзсьышалöмöн, кыт беддясьöмöн, сiя жагвыв иньдöтчис деревня кузя, аслас керку ладорö. Тшупöм война бöрас ни, ас киöн, гырись да ён пожумовöй вöрись Опоньлöн керкуыс сулалiс самöй деревня дорас.

Кадыс вöлi асывлань ни. Биэс керкуэзын кытчöдз и эз сотчö, но то öтöрын, то мöдöрын петуххез жалейттöг летiсö ассиныс горшшезнысö. «Öт жö, батя, кыдз нiя весь овтöнняныс велалöмöсь. Кансерт да и дöс сэтöн», — думайтiс мунтöнняс Опонь-старик, а ачыс, кадiсь кадö сувтчышавтöн, сё эшö дзарышалiс юр вевдорас öшалан звездаэз вылö да вынсьöтчис вежöртны ас кежас неважын адззылöмсö. Сiдз сiя и сибöтчис аслас керку дынö.

Мед не нильдыны кынувья кок увтын лöгвевйöн дзуртышалан поспуэз вылын, Опонь-старик не тэрмасьöмöн кайис вывлань, öтпыр, мöдöтпыр ёркöтчис.

Дыр мыйись негорöн дзуркнитiс керку ыбöс.

— Кин сэтчин? — онувья повзьöмкодь голосöн юалiс иньыс.

— Да ачым локта.

— Мый только тэныт тöдвылат усис ойшöрнас гортö локны, некöр эн вовлы да? Ме дöс повзи.

— А сiя и усис, кöда томувья вöвлi. Гажтöмтчи тэтöг, но и ужо, мыся, кежала...

— Тьфу! Пöрись бес! Грекас менö еныс одзын пыртан, — горöтчис Маланья-старуха мужикыслö ыбöссö осьттöн. — Мый тэныт, стыдтöмлö, весь олiкат тöдвылат оз и усь.

— А мый, батя, тулыс эд öнi, кöр не только кин ловьяыс, а и чагыс чаг бердö жмитчö.

Басниыс коласын Опонь-старик вуджис порог омöн, пöдныштiс сьöрсяняс посöдз ыбöс. А керкуас пыртöн ни, шутка могись малыштiс бöрсяняс старухасö.

— Мун жö, вешшы ме дынiсь, грекö пыртан сотана! Саймöтiн то вот весь. Узи бы эшö эта коста.

— Сымда тэнат и удж, ештан. Ме вот талун ойнас мыйкö адззылi, дак эта бöрсянь нельки он палялiс, некыдз сэсся ланьтны ог вермы.

— Мый сэтшöмсö? — нач мöдкодь голосöн ни юалiс Опоньлöн иньыс.

— Сымдасö ме и ачым ог вежöрт.

— А кысь?

Опонь-старик сибöтчис пызан дынöдз, пуксис, кыскис зепсис простöй кисет, горöтчис:

— Да кымöрсис вот...

— Кымöрсис, шуан? А мый сэтшöмсö? Кыдз?

— Да сiйö ме тэныт и висьтала, что öнöдз ачым ог вежöрт, мый эта сэтшöмыс. Петi ме быдöнныс бöрсянь правленнё посöдзас куритны, а куритiкам вывлань дзарышасьны пондi, сэк и казялi, кыдз... — Одзлань старик дышöтчытöг пондiс висьтасьны иньыслö быдöс йылiсь, кыдз да мый адззылiс.

Джодж шöрас, мужикыс одзын сулавтöн, Маланья кывзiс шыасьтöг, нельки öмсö осьтыштöмöн. Но кыдз только Опонь лöньсис недырик кежö, мöдыс, тöдчöмöн дрöжитан голосöн ни, сэтöн жö сылö и горöтчис:

— О, господи! Ен-батюшко! — Маланья перыта бергöтчис ен угöв ладорö, öтпыр, мöдöтпыр пернапасасис.

— Ой, Опонь, Опонь! Прикашайтчис эд, кывзы жö, тэныт, прикашайтчис. А мый нö öнi лоас? Мый нö ми тэкöт пондам кернытö?

Опонь кыскис пызанiсь джыннялöм табак восьмушка, пондiс пыркöтны сыись табаксö аслас кисетö. А кöр сэтiсь жö каттис бытшöм цигарка да öзтiс куритны, сыбöрсянь вöлись горöтчис:

— Но игнась лок, пет да. Меным мунны колö.

— Кытчö? Тэ разь эшö бöр мунан? Опонюшко, да тэ мый? Кытчö тэ ойшöрнас, туйыс нильыг да?.. Кыдз тэ öтнат мунан? Öтöрас, видзöт жö, дзирс пемыт, немись нем оз тыдав. А ме?.. Кытчö нö ме öнi воштiся? Ме, батя, ог лысьт öтнам кольччынытö. Эн ни бы тэ талун, Опонюшко, правленнёас мун, а? Узин ни бы мекöт гортын. А то мыйись мый...

— Но и тырмас! Кин тэись, дявылыс, тшыг, öтнас менам сэтчин правленнёыс сулалö.

— Сэк ме тэкöт öтлаын муна. Ог лысьты, висьталöны тэныт, öтнам эта бöрсянь кольччыны.

— Дугды жö абутöмсö ректавны. Мый тэкöт ас керкуын пукавтöн лоас? Игнась, кай горвыв сёрдас да узь. — Опонь босьтiс киас западня вылiсь ассис фонарь, петiс.

Правленнёас сiя эшö вель дыр куйлiс осьта синнэзöн чорыт скамья вылын, сё думайтiс ас кежас, мый жö бы эта сэтшöмыс вермис лоны. Но и öнi эшö сымдасö сiя вежöртны эз вермы. Вежöртан разь, кöр эта вотöдз сэтшöмыс сы оланын эшö некöр эз вöвлы, мед звездаэс кымöрöттяс лэбалiсö.

Дзир югдандорас, кöр öтöрас вöлi рöма-дзара ни, аслас думаэз коласын Опонь-старик и ачыс эз казяв, кöд коста ланьтiс. А гортын Опоникалö эта ойö сэсся сiдз и эз узьсьы. Мужикыс мунöм бöрсянь Маланья старуха сэсся и ольпась дынö эз ни сибöтчыв. Узьöтас разь сэтшöм полöтан юöр бöрсянь? Мед етшажык повны öтнасыслö керкуас, Маланья сэк жö сюйыштiс горö би, пондiс ештöтчыны.

Эшö пемытсорнас Опоника вердiс-юкталiс карта вылiсь пода: мöс, кукань да куим баля. Подаыс гöгöр бергавтöн сылöн полöмыс эз пет. А югдандорас, эшö шондiыс петтöдз, Маланья кыскалiс горись няннез, сувтöтiс иганыс местö посöдз ыбöс одзас кöртзыр да и иньдöтчис деревня пасьта.

Пыравлiс Опоника керкуись керкуö, аскодьöм жö старухаэз дынö и быд керкуын мыдзтöг висьтасис: «Ой, кевья, кевья. Ой, господи, помилу-у-уй! Беда эд миян, беда-а-а! Прикашайтчöм эд талун ой Опоньыслö, прикашайтчö-ö-öм. Эта уж сiдз и тöд, не весь. Сё ни öнi мыйкö лоас, сё ни лоа-а-ас. То ли старикыскöт аскöттяс, то ли мекöт. Ой, истиннöй Кристос-батюшко. Да пöрисьувья ни э-э-эд, пöрисьувья-а-а.. Вот эд сiя кытöн, рокы-ы-ыс! Эд пондас кö сiя вöтны, дак сы увья он ни пышшы-ы-ы, он ни сайöвтчы-ы-ы. Ой-ой-ой да ой-ой-ой! А, батi, челядьöкöт мый? Степаныскöт, дитяöкöт, армияын эд служитö. Батi, Конаныскöт, леспромкозас машинаэс вылын уджалö да. А, батi, Евгаöкöт.. Мый ни бöра сэтчин и керö. Нять то öтöрас лоис. Мисеч етш ни сы дынö эг ветлы. А эд сiя менам бöра тыра. Бöрья ой-лун ветлöтö. Ой, олан, олан. Кытчö сы увья и воштiсь!»

Эта «прикашайтчöмсянь» Опоника старухалöн быдкодь «толиэс», «батiэс» да «подиэс» зорамисö сымда, что нысянь сылöн нельки юрыс кудмис. Ны увья жö Маланья и котрасис асывсянь омöн деревня пасьта.

Медбöрын, шог сьöлöма да мыдз аслас котрасьöмсянь, сiя вöлi кежис ни горт ладорö. Но эстöн сылö эшö усис тöдвылас, что нач вунöтiс пыравны Лукерья кумаыс ордö. Сэтчö жö эта керкуö Маланья старуха вовлiс не öддьöн часто.

Пашаыс, Лукерьялöн зоныс, мужик вöралiсь, видзö не öтiк понöн. Ыджытжыкыс ны коласiсь, кöдö Люшпельнас шуöны, пöрись отирсö, да кöдна эшö бедьöн ветлöтöны, öддьöн оз радейт. Сэтшöммесö сiя и матö керку дынö оз лэдз. Эта причина кузя Маланья часто и эз вовлы кумаыс ордö. Но талун сы киын «вöлыс» эз вöв, то ли тэрмасикас гортсяняс вунöтiс босьтнытö, то ли котрасикас ни ештiс кытчöкö кольны. Сэтчö жö и поннэс эта асылö матын посöдз дынас некытöн эз тыдалö.

«Пырала, ужо, кöть недырик кежö», — думайтiс старуха ас кежас да и кежис Лукерья кумаыс керку ладорö.

Лукерьяэзлöн керкуыс виль да ыджыт. Арсяняс вöлись и петiсö сэтчö овнытö. А öтöрись посöдзсö тшупнытö öнöдз абу на ештöмöсь. Тэчöмöсь поспуэсö чуркаэз вылö да ны вылöт кытчöдз и ветлöны. Кайыштан сiдз ны кузя вывлань, ыбöс дынöдззас, а сувтнытö бытшöмик некытчö. Да и поспуэс вылын виялöм васянь нильыг. Но киэзнас видзсьышалöмöн Маланья сё жö кыссис вывлань. Пешлыштiс ыбöссö — игана.

— Кума! А, кума? Осьт жö ыбöссö! Мый нö луншöрнас игнасьöмöсь? — горöтчис Опоника старуха, öтпыр, мöдöтпыр ёркнитiс. А эта коста пытшксяняс Люшпельыс кыдз вувтыштас лёк горшöн да кыдз чепöссяс паныт ыбöс дынас. Эстöн Маланья ладсис и öшис. Повзис сэтчöдз, что сьöлöмыс сэк жö топ кок увтöдззас лэдзчисис. Ачыс сiя перытакодь бергöтчыштiс бы ыбöс дынсис, а йызьöм поспу вылас коккес и нильдiсö. Кутчисьны порог нето ыбöс вуг бердö Маланья эз ни ешты. Тульк-мельк, стук-бряк, кытöн юр вылас, кытöн бöр вылас, лэдзчисис сiя поспуэз кузя увлань. Усикас ни Опоника кылiс, кыдз кок гумас топ черöн сöздыштiс.

Чеччö бы старуха местасис, да повзьöмувья чеччынытö етшыс оз тырмы. А сэтчö эшö и кокыс нач не аслас кылö. И сэтшöм сiя зубыт, что и местаись вöрзьöтчыны оз позь

— Ой-ой-ой, кокöс эд чеги-и-и! Да весь разь кöркö прикашайтча-а-ас! Прикашайтчас разь ве-е-есь! — мымда горш, герьялiс Маланья-старуха кумаыс посöдз дынын куйлытöн.

Гажтöм чужöма пырис эта рытö правленнёас Опонь. Жаль вöлi стариклö ассис старухасö. Кöр öнi сылöн, пöрисьувья, чегöм кокыс веськалас? Ковсяс уж кытчöдз аслыс керку гöгöрас бергавны. «Не весь, сiдзкö, меным прикашайтчис. Кыдз киö, видзöт тэ, пуктiс».

А правленнёас сiя рытö отирыс том и пöрись вöлi чукöртчöм вель уна. Баитiсö мужиккез ас коласаныс, дивуйтчисö. Эшö бы не дивуйтчыны. Эд эз на вöвлы отирыс оланын сэтшöмыс, мед мортыс ас выннас кымöрас звездаэсö лэбталiс.

Председательыс, Степан Петрович, кыдз казялiс Опоньлiсь правленнёас пырöмсö, шынньöвтiс ас кежас, сэтöн жö юалiс:

— Висьтась, Опонь дядь, кыдз талун тэныт прикашайтчис?

— А мый, поди, сэтöн висьтасьнытö? Кыдз прикашайтчис, сiдз и прикашайтчис. Кысь тэ сымдасö тöдан?

— Иньыт тай асывнас висьтасис, бытьтö бы прикашайтчöм мыйкö.

— Но прикашайтчис и прикашайтчис, весь эд эз жö.

— А мый? Мыйкö ештiс лоны ни?

— Кыдз инö, оз да. Мунöм тай асывнас Маланьыс деревня пасьта дубаснас треситны да и черпезьдöм кумаэс посöдзсянь кыныс вылö. Сэтчö и коксö чегöм. Гортын öнi и мöссö чилькöтны некинлö, кöть ачыт няняэсö нюжлав.

— Вот кыдз, — нарочитöя дивуйтчöмöн, шыасис паныт председатель. — А ме тöн горт öшын увтсянь спутникыслiсь лэбзьöмсö тожö адззылi и иньöлö тэ моз жö висьталi. Но сылö, фермаас уджавтöн, некöр деревня пасьтас котрасьнытö, сiйöн кытчöдз и дзонь ветлöтö, — сералiс председатель Опонь-старик вылын. — А талун асывнас и радиоыс ни висьталiс, и газетаэзас гижöмöсь, что космосас нельки медодзза морт кайлöм, Юрий Гагаринöн шуöны. На вот, лыддьöт, он верит дак. — Председатель нюжöтiс стариклö газетасö, содтiс: — А басöка эд, Опонь дядь, лэбзьö?

— Басöка тай... А лыддьöтнытö ме ог чайтчы. Поснита газет вылас гижöны. — Ас кежас жö Опонь одзлань думайтiс: «Тьфу, позорыс отирыс син одзын. Вот эд сiя кытöн, кöр аслат юрат оз тырмы да ылöстöм басниэсö кывзан. Эта бöрсянь кöть и деревня вылас эн мыччись, — ыджыт и учöт серавны пондасö. Вот тэныт и прикашайтчис».

ЛЁХА

Городскöй садын орсiс неыджыт эстраднöй оркестр. Электрогитаралiсь триньгöм, трубалiсь туткышалöм да контрабаслiсь бобгöм кадiсь кадö вынсьöтлiс то барабанлöн зэв горöн буткöтöм, то тарелкаэзлöн пель чанöтан чирзышалöм. Этна музыка шыэс, кöр горöнжык, а кöр и не сэтшöм горöн, паськалiсö омöн неыджыт город пасьта, сибалiсö сылöн быд ылiсь и матiсь пельöсöдз, быд кылiсь пель бердöдз, дзик кытсалiсö-корисö быдöс ловьясö ас дынö. И нiя том отирыс, кöднö эз пукöт гортын, кöдналö гленитчис кывзыны этö музыкасö да кöда вайöтiс ны сьöлöмлö аслас горалöмöн кытшöмкö гаж, чукöртчисö сы кытсалöм-корöм вылö сiдз жö, кыдз чукöртчöны би вылö ойся бабыввез.

Танцевальнöй площадка вылын, кöда вöлi вöвдöм паныт эстрадалö, танцуйтiс эта музыка увтö унася-уна том йöз: нывкаэз да зонкаэз. Не öтiк сотня гоз мымда коккезöн кышöтöм вачкисис валöн гырись иззэз коласöт песок да галька нöбöтöм вылö.

Шуксис том йöзыс не только танцевальнöй площадка вылын. Не етшажык этася гуляйтiс сiя и площадка гöгöр садын. Кинкö ны коласiсь эта музыка увтö дюттясис дюттяннэз вылын. Кинлöкö гленитчис лэбавны руöт карусель вылын. Мукöдыс мыдзтöдз пешлiс ассис кужöм-вермöм быдкодь аттракционнэз вылын, а сэсся, öзтöм сигаретаöн, пуксьывлiс матiсьжык скамья вылö, мед шоччисьыштны. Уна том йöз чулöтiс ассис кадсö сад пасьта аллеяэз жагвыв кытшлалöмын. Тырмöмви жöдзис сiя и танцевальнöй площадка вылö пыранiн гöгöр. Мукöдыс ны коласiсь видзчисисö эстöн кинöскö танцуйтiсь ёрттэз коласiсь. Вöлiсö и сэтшöмöсь, кöдна сулалiсö сэтöн сiдз, нем керöмсянь. Нiя кывзiсö оркестрлiсь буткöтöм-орсöм да видзöтiсö мöдiккез танцуйтöм вылö. Унажыкыс жö эстöн сулалiсь том да пöрисьжык зонкаэз коласiсь видзчисисö танеццезлiсь чулалöм, сiйö, кöр дугдас орсны музыка, а пöттöдз танцуйтöм том йöз, кöдна коласын унажыкыс вöлiсö нывкаэз, пондасö мунны гортö. Сэк позяс вöтны да адззыны ны коласiсь тöдса ли, тöдтöм ли нывкаöс, мед кольлавны сiйö гортöдз, а этöн кольлалöмнас нюжöтны дыржык кежö лöнь да гажа гожумся рыт.

Быдöнныс коласын эстöн жö бергалiс эта рытö и Изъюров Алексей, а городскöй ёрттэз коласын — просто Лёха. Сылöн вöлi сiя жö мог — адззыны, пантавны, вермыны казявны быдöнныс коласiсь öтiк нывкаöс, кöда öтпырись пантасьöм коста, кыдзкö нач видзчисьтöг, то ли домалiс, то ли вурис ас бердас сылiсь синнэсö да сiдз, что орöтчыны-янсöтчыны эта бöрсянь сы бердiсь некытшöм вын эз ни судз. Но кадыс вöлi эшö одз. Горсадыс оссис неважын. И чукöртчыны сэтчö быдöнныс эзö на ештö. Сiйöн мымда бы Лёха öтмöдöрöт эз кытшлав, казявны быдöнныс коласiсь колана мортсö сылö кытчöдз эз усь. «Кыдз жö сiдз? Неужто сiя талун оз лок? Эта дырна ме лöсьöтчи сыкöт пантасьöм кежö и быдöс весь?»

Мыдзвевья аслас видзчисьöм-кошшисьöмсянь да гажтöмтчыштöм этна думаэзсянь, бöртiжык, кынымöтпыр ни эта рытö, Лёха вились сибöтчис танцплощадка дынö. Решетитöм забор пыр сiя видзöтöв-керис площадка пасьта дзöрись-танцуйтiсь том йöз вылö, но быдöнныс коласiсь колана мортсö и öнi эшö эз казяв. И сiдз кыдз муннытö вöлi некытчö, а кернытö нем, Лёха öзтiс куритны да мыйкö дырна сiдз и кольччис сулавны местаас. Бур кöть сiя ни, что вöлi зонкаыс не öтнас. Неылын сы дынсянь кынымкö морт тожö сулалiсö ни, видзчисисö, тыдалö, тöдса нывкаэзöс, мед пырны öтлаын танцплощадка вылö. «А ме нельки сымдасö керны ог вермы», — думайтiс Лёха ас йывсис, зонкаэс ладорö нёджжасьтöн. Эта и былись вöлi сiдз, öткö, велöттöм, сiя некöр эз танцуйт, а мöдкö, кöть бы и кужис керны сымдасö, дак пыртнытö вöлi некинöс.

Сiя кадö, кöр Лёха сё эшö жугдiс юрсö сы вылын, мый керны одзлань, сы дынö кыдзкö нач видзчисьтöг, дзик усис кысянькö енöжсяняс ^, сибöтчис важся тöдса, «не женатöй-холостöй», кыдз сiя радейтлiс баитны ас йывсис тöдса и тöдтöм нывкаэз одзын, Генко-Сьвис.

Куимдас саяс ни Сьвис и былись некытшöм семья эз видз. Олiс сiя благоустроеннöй квартираын öтiк пöрись мамкöт, кöда видзöтнытö сы сьöрын бытшöма эз ни чайтчы. Эта увья Сьвис вылын часто позис казявны не öддьöн сöстöм сикöджа йöрнöс нето орласьöм кизя да резьдалöм конувттэза пиджак. Инь да семья местö город пасьта сылöн вöлiсö тырмöмви ас кодьöм жö ёрттэз. Нимöн я нимкодьöн Сьвис тöдiс быдöннысö нiйö, кöдна некытöн эз уджалö, а лунiсь-лун бергалiсö то рынокын, то виннöй магазиннэз дынын да быд рыт кежö вöвлiсö ляс кодöсь. Сэтшöммес и сiйö быдöнныс тöдiсö, сiдз кыдз ачыс Сьвис кодьöн тожö некытöн эз уджав да бергалiс сiя жö кытшын. Сiйö нем эз видз пантавны кодöн улица шöрись одз асывсянь. Сэтшöмöн жö вöвлi сiя и рыт кежö. Юöм вывтi Сьвис радейтлiс ошшасьны аслас вынöн, эмись и немись вермис кутчисьны тышкасьны кинкöт шедас, кöть частожык ноппесö усьлiс кыскавны аслыс. Эта кузя сiя и ветлöтiс томсянь кералöм тырпöн да орöтöм пельöн. А бöрья годдэзö эта дынö содiс эшö кинкö пиннезöн курччöвтöм ныр. Но быдöс эта зонкаöс, мыччассис, немымда эз гажтöмт и колана местаö эз сувтöт. Быд тулысö Сьвис грöзитчис гöтрасьны медбасöк нывка вылын. Эта кузя гожумбытöн, лунiсь-лун и вöтлiсис ны сьöрын. Но годiсь-год, быд ар кежö не медбасöксö, не кытшöмкö мöдкодьö сiдз и эз адззывлы да кольччывлiс тöв кежас öтнас. Сiя одззамоз некытöн эз уджав, но тшыгйöн этасянь эз кув, а лунiсь-лун адззис нельки мый вылö юны.

Вот и öнi тöдчöмöн кодыш сибöтчис сiя Лёха дынö, кыдз бурся-бур ёрт дынö, видзчисьтöг тапкис сылö пельпон кузя.

— Тэ разь этö, Лёха? Здорово! Сколько лет, сколько зим, а? Кытöн пропадаешь? А прифрантился, видзöт тэ — ылiсянь он и тöд, матiсянь не заметишь, э-хе-хе. Японскöйö эд кыськö, видзöт тэ, кышöмыт, а? Богата пондöтчан, зонка, жить... — Сьвис дышöтчытöг судзöтчис Лёха пельпон бердöдз, не öддьöн сöстöм чепöльнас пешлыштiс сы вылiсь курткасö. — А шик уж, кывзы жö, ничего не скажешь. А карманнэс, спенёккес, замоккес, цепочкаэс! У-юй-юй! Кытiсь достал?

— Да магазинiсь жö.

— И важын я тэ сiйö носишь?

— Первуись талун пасьталi.

― Ши-ик, ши-и-ик. Дзескытöв вот только, видзöта ме, сiя тэ вылын. Адззан, вильсяняс жö пельпоннэзат жмитö. — Сьвис и öнi эшö эз дышöтчы малыштны-пешлыны öтмöдöрсянь Лёха пельпоннэз гöгöр курткасö. — Сiдз ме баита? Жмитö эд?

— Сiдз, батi, сымда-мымдасö, да олас. Меным сыын не из сёртны.

— Вот и ме тэныт сiйö жö баита — дзескытöв, мыся. И рöмыс сылöн, э-э-э, кыдз бы тэныт висьтавны... немного не мужскöй. Югытöв невна, дамскöй, позьö шуны. Не сэтшöмö бы невночка тэ вылö колiс.

— Эз адззись мöдiкыс. Немись вöлi бöрйынытö.

— Хочешь? Выручу, кыдз ёртöс.

— Кыдз?

— Да очень просто. Вузав — ме босьта.

— Ог на. Ачым новйышта да вöлись. Сё ни тэнат сымда сьöммес оз адззисьö.

— Дак тэ не жмоться öддьöнсö. Донтöмжыка и сет. Не йöзлö эд. Корешшез ми тэкöт али не? Сотня етшсö ме тэныт часöт верма адззыны. — Сьвис сэтöн жö кутчис шарчитны аслас письтöм-резьдöм карманнэзын, кöть Лёха одзлань ни тöдiс, что сэтчин и шырыс эз пырав.

— Да оз ков, Сьвис. Висьталi — ог на кытчöдз вузав.

— Мый, жаль лоис? Ме сiдз и тöдi. Но ладно. Успеем куртканас. Новйышт лун-мöдсö, а сэсся бутылка туйö сетан. Унажыксö сiя тэнат сё ни оз сулав.

Кошшисьтöн мöдöртöм карманiсь, кöдаын и былись нятьöсь копейка мымда эз адззись, зонка пыркнитiс бус.

— Висьтав, мый эстöн зырымтö кынтан? Сё сiйö кралятö видзöтлан, кöда сэк кок пятаэсö мыччалiс, помнишь?

— Видзöтла вот, да оз мыйкö талун тыдав.

— Брось, Лёха. Не стоит, ме тэныт висьтала.

— Мыля?

— Да скурвилась ни сiя тэнат этöн каднас, сiдз и тöд. Сикöджасис кинкö öнджа вылö.

— Адззылiн я мый я?

— Эг. Сытöг тöда. Кышав лучше кинöскö этна коласiсь. — Юрнас öвтыштöмöн, Сьвис мыччалiс танцплощадка ладорö. — Эта товарыс и сытöг тырмö. Лöз только, смотри, öтмöдöрын видзö. А этатшöм куртка сьöрö кöть кытшöм бöбасяс.

Сьвислöн видзчисьтöм мыччисьöмыс да медодзза басниыс медперво Лёхаöс мымдакö и гажöтiсö. Но нывкаыс йылiсь баитöм коста сылö лоис недолыткодь. А кöр эшö Сьвис казьмöтiс сылö сiя медбöрья рыт йылiсь, кывзыны сылiсь одзланься баснисö охота öшис. Сэтчö жö зонка вежöртiс, что сулалö сiя аслас «корешкöт» дыр ни, и эта коста ештiс лэдзны син увтсис мыйкö öддьöн коланаö. А не янсöтчыны кö сылö öнiсянь, дак сёрöнжык вермас вöтны тшöтш сiя жö, мый шогмис сэкся пантасьöм коста. Лёха вежöртiс ни, что сэтшöм ёрткöт, кытшöмöн вöлi Сьвис, этася унажыксö и видзчисьны нем.

Мöдыс жö, вежöртана, сэкся йылiсь öнi нем эз ни думайт, одзлань баитiс:

— Нывкаэс миян шогья некытчö оз пышшö. Мый колö, ныкöт и сёрöнжык позяс. Вот пузырёк бы öнi кыськö öтiкö личкыны, дак стрась бы вöсяис. Асывсянь, кывзы, юр шöри потö-висьö.

Былись я Сьвис баитiс аслас юр висьöм йылiсь, сымдасö Лёха бытшöма и эз тöд. Но мый баитсяс пузырёксö личкöм йылiсь, эстöн сiя эз бöбöтчы.

— Ветлы, вай.

Сьвис кöть и ошшасис неважын, что сотня етшсö курткаыс понда сэк жö адззас, öнi сiя вились мöдöртiс Лёха одзын карман, сы вылö «корешыслö» мыччалöмöн, юалiс:

— Кытiсь? Адззан жö вот, что сiя менам осьта. Лёха жагвыв пыралiс аслас моросiсь карманö, кыскис да нюжöтiс Сьвислö öтiк лöз гижöток.

— Вот этö другой разговор. Этö и ме вежöрта. Кытöн видзчисян?

— Эстöн, конешно.

— Баитчим. Ме мигом.

Кырым пыдöсас пидзыртöм-жмитöм деньгаöн Сьвис перыта кежис танцплощадка дынiсь да сэтöн жö и öшис-сорлассис син одзись, дзик незьдiс öтмöдöрö шуксись том отир коласын.

Öтнас кольччöм бöрын Лёха мыйкö дырна эшö нёджжасьöв-керис решетитöм забор коласöт танцплощадка ладорö. Танцуйтiссес сэтчин öнi вöлiсö унажык ни, но колана сылö тöдса чужöма мортыс ны коласын эшö эз тыдав. Нем вöлi видзчисьны и Сьвислiсь бöр бертöм. Сiя дзир кöсъясис, что бертас, а былись сымдасö некöр оз кер. Сюрöм деньга вылö бутылкасö сiя, вежöртана, и небас, но вайны татчöдз мыла сылöн некöр оз тырмы, сэтöн жö магазин бöрас кинкöткö и юас. Дармовöйыс вылö кытшöмкö винагаг сё ни адззисяс. Этö Лёха тöдiс одзлань ни, но öддьöнсö эз жалейт. Сiя сы понда и сетiс Сьвислö деньгасö, мед дзир мездiсьны сы бердiсь да кольччыны öтнаслö.

Кадыс вöлi эшö не öддьöн сёр, и мунны садiсь охота кытчöдз эз вöв. Но и сулавны весь эта танцплощадка дынын мыла тожö бырис ни. Лёха жагвыв кежис аслас местаись, ас гöгöр одззамоз нёджжасьтöн сибöтчис прос скамья дынöдз, вились öзтiс куритны, пуксис. Сьвисыс неважынся баснисянь эстöн сылö и усис тöдвылас быдöс сiя, мый сыкöт шогмис бöрья кадö. А быдöс пондöтчис эта жö садын.

Вöлi эта тулыснас, чожа мый армияись бертöм бöрсянь. Сiя рытö Лёха пукалiс тöдса зонкаэз коласын неылын садö пыранiн дынсянь, медодзза скамья вылын. Кадыс вöлi эшö одз. Но саймöтöм музыка шыэзöн том йöз тэрмасьöмöн чукöртчис быд ладорсянь. Ны скамейка весьтöт пыранiнланьсянь вывлань орöттöг кыссисö тöдса и тöдтöм нывкаэз да зонкаэз. Кинкö ны коласiсь локтiс öтнас, кинкö кыкöн аслас ёрткöт нето подругакöт, а эшö унажык — куим-нёльöн.

Сэк кыдзкö нач видзчисьтöг и усис Лёхалö син вылас быдöнныс коласiсь öтiк. Нывкаэс вöлiсö куимöн, а казялiс сiя ны коласiсь дзир сiйö öтнассö, кöда оськалiс не матынжык сы бердöт, а сайланьсяняс. И юавны кö бы перво жö, мыйöн сiя мыччассис буржыкöн нето басöкжыкöн аслас подругаэзся, дак сымдасö зонка и висьтавнытö эз бы куж. Сiйöн медперво эталö сiя и значеннёсö некытшöмö эз сет. А сiдз кыдз городас овтöн быдöнныс коласын басöк чужöма да лöсьыт вывтыра нывкаэс пантасьлiсö вель уна, кыдз баитсьö, быд оськöв вылын, эта видзчисьтöм пантасьöм йылiсь ашын кежас зонка вунöтiс бöр.

Неделя бöртi пантасьöмыс нiйö вöтiс мöдöтпырись, вöтiс сiя жö садын да сiя жö местаын. И вöлi сiя ны коласын сэтшöм жö видзчисьтöм, кыдз и медодззаыс. Аслас ёрткöт Лёха ештiс дзир сибöтчыны да пуксьыны тöдса скамейка вылö, мед öзтыны куритны. Эта коста нывкаэс (а вöлiсö нiя сэк кыкöн) мыччисисö бокись аллеяын да, кыдз сэк жö, сувтчывтöг, пондiсö чулавны ны весьтöт. И дивуйтiс кö мый зонкаöс эта мöдöтпырись пантасьöм коста, дак дзир сiя, что неделяöн одзжык öтпырись адззылöм бöрсянь нывкасö сiя абу вунöтöм, казялiс, тöдiс, некинкöт мöдiккöт эз сорав. Эта вöлi тшöтш сiя жö, кöда сэк, чулалöм суббота рытö, падмöтiс мыйöнкö ас вылас сылiсь синнэсö. То ли сысянь, то ли эшö мый, талун Лёха, ась кытчöдз и аслыс казявтöг, видзсьыштiс сы вылын синнэзнас невночка дыржык ни, не кывны да не казявны кöдö мöдыс некыдз эз вермы.

Сьöкыт висьтавны, мый бы думайтiс зонкаыс сэк, нёджжöвтны кö бы эта коста мöдыслö да эшö бöб сина шынньöлöн, — часто оланас овлö сэтшöмыс, — сылö тöдтöмыслö паныт. Вермис бы лоны, что Лёха сiя жö рытö и лякасис бы сы бердö тöдсасьны, мед сёрöнжык, гортö кольлалöм коста, кежöтлыны сiйö отир син одзись кытшöмкö туянажык местаö. Но шогмис невночка мöднёж. Зонкалiсь ас бердас лякасьöм синнэсö казялöмсянь нывка медодз дзик падмыштiс. Сiя нельки жмитчыштiс кыдзкö этасянь быдсöн вывтырнас, сы коста жö перыта дзар керыштiс мыйкö вылö аслыс кок увтас, мöдöрö бергöтчöмöнмоз лэбтыштiс вывлань юрсö, кöдзытвевйöн öгралан синнэсö дзебис гöгрöса да сьöд синкыммес увтö, мыйсянь пондiс вачкисьны нач эшö неважын оссьöм жельнöг чача вылö, бытшкасьöмыс увья кöда бердö куш киöн он сибöтчы. Сэтшöмöн да бöрас дзар кертöг и саясис сэк сiя зонкаыс син одзись. А мöдыс, дзик домалöм синнэзöн, одззамоз видзöтiс сы сьöрö, öткоста первуись ас кежас думайтiс: «А неумöль бы, натьтö, сэтшöмыскöт тöдсасьнытö».

Рытывбыт сьöрна Лёха неöтпырись казявлiс нывкасö аслас подругакöт танцплощадка вылын танцуйтiсь йöз коласiсь. Тöдсасьöм йылiсь зорамöм думаыс сы юрись сэсся эз ни петав, öнi сiя видзчисис дзир колана кад, кöр чулалас рыт да быдöнныс пондасö мунны горттэзö. Сэк позяс корсьыны кольлавны.

Сёрöнжык рытыс и былись чулалiс. Лöньсисö музыка шыэз. Быдöнныс иньдöтчисö петанiн ладорö. Ны коласын жö, вежöртана, вöлi и Лёха. Но мымда бы зонка эз смекайт нывкасö гамазöн рознитчись йöз коласiсь, сiдз сэсся сiйö некытiсь и эз казяв.

Ашынас, гаражын удж коста, двигательтöм эшö да кабинатöм ЗИЛ-ок гöгöр бергавтöн, Лёха кутiс асьсö сы вылын, что мылякö öнöдз думайтö тöдтöм нывкакöт сэтшöм видзчисьтöм пантасьöм йылiсь. А кöр зонка эшö уськöтiс тöдвылас, кытшöмöн адззылiс сiйö бöрья пантасьöм коста, сылö пондiс мыччассьыны, что тöдö нывкасö сэтшöмнас быдса век сьöрна ни, кöдö олö эта свет вылын. И что некытшöм мöдiкöн да мöдкодьöн сiя и лоны оз вермы. А кöть бы и вермис, дак сымдасö сысянь эз бы и ков. Эта Лёхаöс гажöтiс. А öткоста сiя кылiс да вежöртiс эшö öтiк тор, что сыын зорамö охота пантавны тöдтöм нывкасö эшö.

Не аслас ёрттэзкöт пантасьöм кузя ни, кöдна сылöн городас вöлiсö тырмöмви, а дзир тöдтöм нывкасö адззылöм могись и ветлiс зонка эта бöрсянь горсадас лунiсь-лун быдса неделя сьöрна. А мöдыс этöн каднас, топ нарошно, сэсся сэтчин и öтпыр эз мыччась: бытьтö кытчöкö вöйис. Сiйöн бöрья луннэзö Лёха нельки повзьыштiс. Пондiс думайтсьыны, что эта коста нывкаыс городсис ештiс мунны кытчöкö пыр кежö и сэсся некöр оз ни пантась. «Да не вöт я эта быдöс? Некöр, батi, былись сэтшöмыс эз и вöв да?..» Но сэтшöм думаыс öддьöнсö эз ни гажöт. Сiя дзир настроеннёсö зонкалiсь öддьöнжык тшыкöтiс.

Чулалiс неделя мымда кад и зонка вежöртiс, что быдöс эта вöлöм сё жö не вöт. Суббота рытö нывкаыс вились мыччисис. Талун сiйö Лёха казялiс эшö горсад воротаэз сайын, кöр öтамöд дынсянь коласыс вöлi эшö не öтiк дас оськöв ылына и öтмöдöрö шуксись отир коласын нем эз видз соравны нывкасö кинкöткö мöдiккöт. И ась сiя талун вöлi мöдкодь вылвежöта, а ас коласын нiя кытчöдз нач тöдтöмöсь, некöр эшö и кылiсь джын мымда öтамöдныслö эз горöтчö, ась зонка нельки эз тöд, кыдз сiйö шуöны, сiя вермис бы казявны да тöдны нывкасö и тысяча морт коласiсь и некöр да некинкöт мöдiккöт, кöть полюс вылын пантасьöм коста, эз ни бы сорав. И колiс дзир сылö усьны сы син вылö, кыдз сы коста жö Лёха кылiс, кытшöм горöн, дзик саймис, ёкнитiс моросас сьöлöм, мый некöр эшö эта вотöдз сыкöт эз вöвлы. А кöр нывка чулалiс сы бердöт зэв матi, быдöсöн, мый эта коста ештiс усьны син вылö, вились мыччассис сiйöн жельнöгнас, кöда вылö вачкисис сэк, неделяöн одзжык пантасьöм коста. Этатшöмыслö, натьтö, колiс бы татшкыны ас дынсис, а Лёхаöс сiя кыскис асланяс эшö öддьöнжык.

Эта бöрсянь зонка ассис тöдтöм нывкасö син вывсис эз ни öштыв. Ась сiя зэв матö сы дынöдз сибöтчыны кытчöдз и эз лысьт — гöгралiс сы ылына, мед казявтöг не öштыны.

Оз позь тöдны бытшöма, казялiс я нывка ас сьöрас зонкалiсь сэтшöм «лесуйтöм, вöралöм», но дразнитны сiйö дыр эз понды. Аслас басниа подругакöт, кöда вöлi невночка учöтжык вывтыра, но эз и дугдыв, мыйкö сё висьтасис, ваксис, а баиттöнняс сiйö и керис, öвтышалiс öтмöдöрö киэзнас, нiя дзир öтпырись кытшöвтiсö дюттяннэз гöгöр, но пуксьыны дюттясьны мылякö эз пондö, не тэрмасьöмöн иньдöтчисö танцплощадка вылö.

Недыр мыйись и Лёха сибöтчис нывкаэс сьöрö сэтчö жö. А мед не сулавны рытывбыт кок йылын танцплощадка вылö пыранiн одзын, сiя тожö небис билет, пырис пытшкöдззас. Велöттöм да некужись, танцуйтны, вежöртана, зонка и эз пондыв. Но эта местö сiя вермис эстöн пукавны да пöттöдз видзöтны гусьöн сы вылö, кöдö адззылöм могись и локтiс садас.

Орсiс эстраднöй оркестр. Музыкалöн горалан шыэс, öтамöд коласын одзасьöмöн, кывтiсö сад весьтöт вывлань. А танцуйтiсь том йöз, кыдз калейдоскоп, то жагвыв, то перыта жöдзис-вöрис син одзын.

Мед не усьны öддьöнсö быдöнныс син вылö, Лёха перво жö поздiсис пыранiн дынсянь матiсьжык пельöсö. Этасянь и тыдалiс быдöс да бытшöма, и ковсис кö бы, шуам, мыйись мый, дак перыта позис петны бöр.

Боксянь видзöтiкö нем эз видз думайтны, что пукалö эстöн зонка сiдз, нем керöмсянь, видзöтö быдöнныс сьöрын да сiйöн-сорöн и вийö ассис рытся кад, кöдö оз тöд, мый вылö этася воштыны. Былись жö эта вöлi ылын не сiдз. Да, сымда-мымдасö Лёха, конешно, и видзöтiс быдöнныс вылö, но быдöнныс коласiсь орöттöг видзис син вылас дзир öтiкö. И быд коста, кöр танцуйтiсь отир коласын бергавтöн, эта öтiкыс сибöтчывлiс сы весьтöдз, быдöнныс йылiсь, кöдна вöлiсö танцплощадка вылас сы киння, зонка вунöтлiс. Горöн зыркöтан сьöлöмöн да нывкаыс бердö топ домалöм нето лякасьöм синнэзöн, сiя кольлавлiс сiйö сэтчöдз, кытчöдз мöдыс эз сорлась быдöнныс коласын да эз саясь син одзись. Минута кыным бöртi нывкаыс, одззамоз öвтчышавтöн да бергавтöн, мыччисьлiс мöдöрсянь ни. А сылiсь мыччисьöмсö видзчисьтöн, сылань жö зонка и видзöтiс.

Некöр да некинлö эз завидуйтлы Лёха сiдз, кыдз сiя завидуйтiс эта рытö нылö зонкаэслö, кöдна танцуйтiсö сы одзын асланыс нывкаэзкöт. Быдöнныс нiя вöлiсö зэв-зэв öтамöд бердын, кылiсö ас морос бердын нылiсь паныта ловшы, а öткоста вермисö баитны-тöдсасьны, юасьны да висьтасьны быдöс йылiсь. Но медöддьöн Лёха завидуйтiс сылö, кöда танцуйтiс сы тöдтöм нывкакöт: сылöн басниа да визыв подругалö, кöда новйöтiс. Сiя и эстöн, öтмöдöрö вешшышавтöн да кадiсь кадö бергавтöн, дугдывтöг мыйкö висьтасис. А мöдыс эта коста сымда и керис — шыннялыштлiс сы висьтасьöм вылö да кывзiс, кывзiс. И ло Лёха эта коста сы местын, счастливöйжык сы киння морт эта свет вылын эз бы вöв. Вот мый увья ас пытшкын да ас вылö жö лэбтiсьöм лöгсянь, кадiсь кадö зонка и думайтлiс: «Дурак ме, дурак. Мыля ме учöтсянь эг велöтчы да ог куж быдöнныс моз танцуйтнытö?» Но этна сёрöнöв зорамöм думаэс öнi немöн эз ни отсалö. И мед только кыдзкö вермыны лöньсьöтны асьсö ас вылö жö лэбтiсьöм лöг шогья, думайтiс: «Ась. Рытыс не век сьöрна, кöркö сё ни чулалас».

Мый лоас сэк, танеццес чулалöм бöрсянь, сымдасö Лёха и эз на тöд. Но кытшöмкö вöвлытöм эшö эта вотöдз охота сибöтчыны нывкаыс дынö тöдсасьöм могись, тшöктiс веритны мыйöкö бурö да коланаö. И сiя веритiс этаö, веритiс, что быдöс лоас сiдз, кыдз колö. Талун зонка одзлань ни тöдiс, — мед не öштыны син одзись колана мортöс, пондас пукавны эстöн рытывбыт, танеццез чулавтöдз. А кыдз только нывка аслас подругакöт петас сад воротаэз сайöдз, Лёха сэтöн жö нiйö и панталас. Сiя сибöтчас зэв и ... повтöг висьталас, что казялiс, видзчисис, локтiс вот, мед тöдсасьны да кольлавны. Вöлi, правда, эстöн öтiк сэтшöм тор, кöда сiйö полöтiс, и кыным одзлань — сё öддьöнжык. Öнöдз зонка эшö эз тöд, лысьтас я сiя öтнас, кыдз думайтiс ас кежас, сибöтчыны нывкаэс дынö? Но сэтöн жö вынсьöтчис веритны, — колö кö, то колö лысьтны. Одзлань сiя эз на тöд, что и эта рытыс чулалас сылöн весь, нем сы думайтöмись оз пет.

Сiя кадö, кöр Лёха сё эшö жугдiс юрсö — кыдз повтöмжыка кужны-вермыны сибöтчыны тöдсасьöм могись нывкаэс дынö, танцплощадка вылын кысянькö мыччисис Сьвис. Вежöртана, кыдз и пыр, сiя вöлi юыштöм ни. Но эта сылö немымда эз мешайт, а нельки отсалiс повтöмжыка лякасьны быд нывка бердö, корны аскöттяс танцуйтны, мый сiя кужис-вермис Лёхася невна буржыка.

Кынымкö танец вылö нывка-мöд Сьвискöт и былись петалiсö, но сы вежмасьöм кузя нiя чожа мый откажитчисö бöр. Эз адззисьö этася и мöдiк охотитiссез, и чожа öтнаслö ны коласын кернытö сылö кольччис нем. Сьвис иньдöтчис ни вöлi бöр петанiн ладорö и сэк вöлись казялiс ёртсö, кежис.

— Здорово! Татöн жö. А мый он танцуйт? Коккет не по циркулю? Менам вот тожö. — Сiя пуксис ордчöн, ответсö аслас юасьöм вылö видзчисьтöг корис куритны, Лёха кисянь жö сигаретасö öзтöм бöрын ас йывсис ни одзлань юöртiс:

— Гöтрасьны вот мöда. Гажтöм лоис öткöн узьлынытö. А то тiянкодь мелюзгаыс быдöс нывкаэсö пырöтлас, сэсся меным и гöтрасьны некин вылын лоас.

Сьвислiсь ладтöмкодь баснисö Лёха тöдiс важын ни, горöтчöм кыввез понда обижайтчыны эз понды, юалiс:

— Мый нö видзчисян, он гöтрась? Важын ни колiс.

— Нем ог видзчись. Смотрю вот, кöда медöддьöн гленитчас. — Юрнас öвтыштöмöн Сьвис мыччалiс танцуйтiссес ладорö. — А тэ мый?

— И ме сiйö жö... видзöтла.

— Кöда син вылат усис?

Сайласьны Сьвис увья, кыдз думайтiс Лёха ас кежас, вöлi нем. И кöр танец коста нывкаэс сибöтчисö ны весьтöдз, зонка мыччалiс синнэзнас ны ладорö.

— Кöда бы ны коласiсь? Или кыкнанныс öтдруг?

— Ыджытжыкыс.

— Ух ты-ы-ы! Вот этö да-а! А не весь я? Лысьтан разь? Он пов сэтшöмыс дынö швартуйтчынытö?

— А мыля бы и не лысьтны? Люкыштас, думайтан? Абу топ сюра да.

— Люкыштас-оз, ог тöд. А вот бытшкавны вермас, öддьöн мыйкö сiя желля сина.

Аслас кыввезын Сьвис эз сорась. Лёха и ачыс вежöртiс, что сымда-мымдаыс и былись вöлi сiдз. Горöтчынытö паныт кольччис нем, и сiя дзир жмитыштiс пельпоннэзнас.

Куриттöнняс Сьвис мыйкö дырна эшö нёджжасьöв-керис нывкаэс сьöрын, кöдна, натьтö, сымдасö эз и казялö, бöртiжык юöртiс:

— Ей богу, Лёха, ме бы тэ местын мöдсö бöрйи. Тэ только посмотри, кытшöм турöпöн сiя ветлö-новйöтö. И гажа мывкыда, тыдалö, и басниа, кыдз воробей. Ух! Кыдз ме сэтшöммесö радейта. Сэтшöмыскöт не пропадё-о-ошь.

— Дак и бöрйы ас местат, абу жаль. Мыля тэ ме местö бы бöрьян. Аслым ме уж кыдзкö ачым.

— Тэ былись этö, да?

— Кытшöм эшö былись — не былись? Тэныт сiя гленитчö, меным мöдыс. Кыдз баитсьö — и юкавны нем.

— Лёха-а! Да тэ молоток. Быдмыштан — балдой будешь. — Сьвис дышöтчытöг лапкöтыштiс ёртсö пельпон кузя. — Тöдса ни кöдакöт?

Мöдыс суськисьöмöн пыркнитiс юрнас.

— Не беда. Талун жö тöдсасям. Вот увидишь. Эта баснилö Лёка невночка гажмыштiс. Вежöртана, что сибöтчыны нывкаэс дынö кыкöн эзжык пет полöм.

Кытчöдз зонкаэз баитчисö öтамöд коласын, кыдз да мый, танеццес чулалiсö. Лöньсисö музыка шыэз, и быдöс танцуйтiсь том йöз, зэв-зэв öтамöд бöрсянь, иньдöтчис петанiн ладорö.

— Видзöт, эн кольччы ме сьöрись, и нiйö син вывсит эн лэдз, — кыдз учöтиклö, горöтчис бöрьясö Сьвис, и нiя пондiсö пелитчыны быдöнныс коласын петанiн ладорö.

Лёхалö мылякö думайтсис, что нывкаэс, кыдз и унажык йöз, иньдöтчасö город ладорö. Этасянь сiя и видзсис матынжык сылань. А мöддэс, кыдз нарошно, воротаэс сайö петöм бöрсянь бергöтчисö нач мöдöрö. Эстöн ни нiя вель ылö янсöтчисö öтамöд дынсянь да чуть эз öштö нывкаэсö син одзись. Сэк Лёха и вежöртiс, что перво жö ны дынö сибöтчöмись, кыдз сiя думайтiс керны этö одзжык, öнi нем оз ни пет. И былись. Кытчöдз зонкаэз вуджисö быдöнныс коласöт нывкаэс ладорö, сэк кежö мöддэс некытöн син одзын эз ни тыдалö. Бур кöть сiя, что кадыс вöлi тулысся, ойес югытöсь, кöр нельки югдöттöм городскöй улицаэз вылын тыдалö бытшöма. И кöр одзын мунiсь отирсö котöрöн-одзалöмöн кык ёрт петiсö матiсьжык улица вылö, сэк вöлись казялiсö, что сiя жö улицаö кежöм нывкаэз кайöны вывлань. «Но и ась. Гортланьын матынжык лоас», — думайтiс Лёха асьсö лöньсьöтöм могись.

Керöс йылöдззас, öтамöд сьöрын, том отирыс кайис уна. Сэтöн ни кинкö кинöскö вöтiс, кинкö кинöскö одзалiс. Вывланьын пондiсö рознитчыны, кинлö кытчö туй. Недыр мыйись зонкаэс одзын нывкаэс кольччисö öтнаныс. Мед не öштыны весись кад, эстöн нiйö колiс бы вöтны. Но кыдз только нывкаэз казялiсö бöрсяняныс тöдтöм зонкаэзлiсь сибöтчöм, сэк жö содтыштiсö чож да сэтöн жö вуджисö канава мöдöрö. öнi нiйö буржык бы вöлi кöдöрсянькö одзавны, а кысянькö, полöттöг да не тэрмасьöмöн, сибöтчыны паныт. Но эстöн Сьвис видзсьынытö эз вермы, горöтчис:

— Эй, тi! Малинтуссез! Видзчисьыштö тöдса зонкаэсö да öтлаын мунам!

Нывкаэслö сiя, тыдалö, и былись вöлöм тöдса. Недырик кежö бöрлань бергöтчыштöм коста нiя и былись сувтчыштiсö. А кöр вежöртiсö, кин нылö шыасис бöрсяняныс, паныт шыасьтöг, дзик кöин шогья баляэз, нiя котöрöн чепöссисö туй мöдöрö да медодзза жö бокись улицаас и кежисö.

Эстöн ни зонкаэз вежöртiсö, что вöтчыны нывкаэс сьöрö одзлань нем вылö, нем коланасö сiя оз сет. А ас понда Лёха вежöртiс эшö и сiйö, что нывкаэзкöт сэтшöм колана пантасьöм-тöдсасьöмыс эз лöсяв дзир Сьвис кузя. Сiя мылякö надейтчис, что öтнас сибöтчöмöн нiйö некöр бы сiдз эз повзьöт, сiдзкö и пышшыны сы шогья нiя некöр эз бы пондö. «Бöбöв. Адззи тожö аслым ёртсö. Тöдöмöн бы, дак и казьмöтны сылö нем йылiсь абу колöм», — жалейтыштiс Лёха. Но веськöтны нем öнi эстöн эз ни позь. Сiйöн-сорöн зонка и бертiс гортас.

Гришунь воныс, кöдакöт Лёха узьлiс öтiк жырын, сы локтiк кежö гортын эшö эз вöв, но неважын небöм сы вылö японскöй курткаыс öшалiс гортын, зонкаыс юрöдз весьтын. «Свитерын, сiдзкö, гуляйтö».

Эшö чöвтчытöдззас Лёха сибöтчис неыджыт гардероб одзö, öтнёж-мöднöж дзар керыштiс ас вылас зеркалоö, мыйсянь сылöн и сiдз ни не öддьöн бытшöм настроеннёыс тшыксис эшö öддьöнжык. Медперво зонкалö усис син вылас аслас жö кузьмöсакодь да эшö учöтсянь шадраöсь чужöмбан, кöть не нырсö, не öмсö нёштöммезöн шуны эз позь, а негырись да серавевья синнэс ылöстöмöсь эз вöлö. Эз гажöт зонкаöс и ас вылас паськöм: эшö армия вотöдз неблöм сьöд рöма брюкиэз да киззез вылын одзсяняс коричневöй куртка. Кыкнанныс нiя öнöдз вöлiсö не только новйöмовöйöсь ни, но тöдчöмöн эшö и кольччöмöсь сы сьöрись. И позис кö эшö кыдзкö миритчыны брюкиэзкöт, кöдна рытся пемыт коста не сiдз усисö син вылö, то миритчыны зыртчöм да джендамöм соса курткакöт сьöлöм некыдз эз ни лэбты. Бытшöм да дзонь вöлi Лёхалöн дзир солдатскöй форма, кöдаын сiя бертiс неважын армиясянь. Но новйыны сiйö гражданскöй отир коласын зонка эз радейт.

Зеркалоас видзöтчöм коста Лёхалö аслыс жö лоис недолыт, сэтшöм недолыт, что сiя нельки чуть эз сьöвзьы аслыс синнэзас. Сэтöн жö зонка ас вылас издевайтчöмöн висьталiс: «Сэтшöм тэ и вöлöмыт, сусликыс? И тэ эшö бы нывкаэз сьöрын вöтлiсян? Да тэнö жö эта робаын некин и матö ас дынас оз сибöт, сизим верста ылына пондас ордйыны, сiдз и тöд. Кыдз эта меным одзжык юрам эз пыр?»

Этна думаэзöн Лёха сёрöнжык чöвтчис, кусöтiс би да водiс узьны. И ась сiя Гришунь-воныс бертöм кежö и эз ланьт, сы юасьöм вылö: «Мыля одз гортын?» — паныт эз и шыась, лэдзчисис узьöмöн.

Одз асывнас, пызан сайын пукавтöн, кöр отчимыс керкуас эз вöв, а томжыккес эшö узисö, Лёха мамыслö горöтчис:

— Куртка, мам, меным небны колö.

— Кытшöм эшö куртка?

— Кытшöмö Гришуньыс новйö.

— Японскöйсö ли мый ли? — повзьыштöм голосöн шыасис мамыс, лэдзис кисис сковородка вылö сорласян пань, мыйкö вылö пондiс зыртны одзас кышыштöм запонок бердö киэсö. — Да тэ мый, зонö, сымдасö баитан? Тэ кöть тöдан жö, мымда сiя сулалö?

— Двести саяс, натьтö.

— Но вот. Кысь нö ме тэныт öтдруг сымдасö вая?

— Небöмась жö тай Гришуньыслö...

— Этö сылö папыс, школасö кончитöм понда, аслас отпускнöйез вылö.

— Сiя разь папыслö школасö кончитiс — не аслыс.

— Баитчылiсö нiя сiдз ас коласаныс, что школасö кончитöм понда...

— А джинсовöй брюкиэсö мый понда? А виль свитерсö?..

— Но мыля жö мый понда? Быдöс эд том отирыс öнi нiйö новйö. Том жö эшö сiя...

— А ме, выходит, пöрись? Старик ме армияас служитöм бöрсянь.

— Да кин тэныт, Лёха, сымдасö висьталiс?

— А кытöн, мам, тэнат отпускнöйет?

— Менам, шуан? Эг на вöв ме таво отпускас да. А мöймусяэс вылö сойытлö öтi-мöдiкö босьтасим.

Ачыт адззан — невестасявны пондiс. Эд и сылö быдöс чожа пондас ковсьыны.

— Дела-а-а, — негорöн шыасис Лёха мамыс кыввез бöрсянь. Эта вылын ны коласын басниыс недырик кежö лöньсьыштiс. Зонка вермис бы, натьтö, эшö висьтавны, что Гришуньыс эшö томöв сэтшöм паськöмсö новйыны, кöр сiя эшö и пöрисьжыкыслöн абу, но сiя одзлань ни тöдiс, что эта бöрсянь нем унаыс сылö оз сод. Сiя бытшöма вежöртiс, — мöдiк поз увтiсь мыччисьöм свет вылас, аслас томжык сой-вонкöт öтвесьтын некöр эз вöвлы, и корсьыны сылö мам да отчим одзын лоны ныкöт öтвесьтын — вöлi нач нем вылö. Эта йылiсь сылö бытшöма сетiс тöдны часöт чулалöм басниыс. «Шöрыштöм шöрöмсö бöр он лякöт». Лёха гусьöнмоз лэдзис кисис пызан вылö вилка, кöдöн бытшкалiс тöння жаритöм картов, мöдiс ни вöлi чеччыны пызан сайись. Эта коста мамыс одзлань горöтчис:

— А мый тэнат важ курткаытлö лоис? Мыля бы сiйö он новйы? Быдлаöт тай эшö дзонь, видзöта вöлi ме да ...

— Важмис сiя, кöть и дзонь дак, — модасис петiс.

— Мый жö сэк...

Лёха видзчисис, что одзлань мамыс вот-вот горöтчас мыйкö гажöтанаö, кöда увья позяс чеччöвтны кок йылö, оськöвтны зэв сы бердö да окыштны, кыдз мамöс. А сiя одзлань висьталiс:

— ...терпитышт уж невночкасö, кытчöдз ачыт он шедты. Кутчисин тай то уджавнытö...

Лёха вöлi осьтыштiс öмсö, мед горöтчыны, что терпитнытö эстöн и лун мымда оз позь. Но зонка аскадö вежöртiс, что и этна висьталöм кыввес сылö нем оз сетö.

— Спасибо, — тэрмасьтöг шыасис сiя быдöс местö, öнi вöлись чеччис пызан сайись, сiйöн-сорöн кухнясис петiс.

Мый бы зонкалö мамыс эз висьтав, ас кежас öнöдз сiя вежöртiс, что ассис важ брюкиэсö да курткасö рытся вылвежöт местö сiя некöр сэсся оз пасьтав. Но и эта думаыс, кыдз неважынся мамыскöт басниыс, сiйö немымда эз гажöт. Лёха вежöртiс, что гортiссес сылö немöн оз отсалö и надейтчыны ны вылö нем. Öнiсянь позьö надейтчыны дзир ас вылö. А эта надейтчöмыс нем бурсö чожа тожö эз кöсйы. Киссьöм-разьсьöм автомашинаыс, кöдö сiя примитiс служба бöрсянь, «кок вылö» эшö эз вöв сувтöтöм. А кöр сiя сувтас да кöр позяс морт моз сы вылын шедтiсьны, ваыс визывтас эшö вель уна.

Гаражас, аслас гажтöм думаэз коста, мыйкö дырна Лёха бергалöв-керис ловзьöттöм эшö кöдзыт шойöн куйлан автомашина рама гöгöр да, кынымöтчид ни этна луннэзö, вились иньдöтчис автоколоннаись механик дынö.

— Кöр нö, Николай Николаевич, двигательсö сувтöтны пондам?

— А кин сiйö тöдö, дорогой? Кöр уж ваясö. Абу тай то кытчöдз. Мый тэ сы понда тöждан?

— Дак эд кернытö сытöг нем. Уджавны жö колö. Одзлань механик дзир паськöтыштiс öтмöдöрö киэсö: вежöрта пö — колö, да отсавнытö немöн ог вермы. А кöр видзöтöв-керис öшöмкодь чужöма зонка вылö, неыджыт охотаöн содтiс:

— Пырав начальникыс дынö, мый висьталас. Начальник дынö пыралöмыс нем унажыксö зонкалö тожö эз кöсйы, и мунiс сiя сэтчин дзир кадсö вийöм могись. Колiс жö эд кытчöкö сiйö воштыны, кöр кернытö этася кольччö нем.

Кабинетас, начальникыс пызан одзын сулалiс Лёхася год кынымöн пöрисьжык Володя Сырчиков, баитiс:

— Ме жö, Вячеслав Николаевич, график сьöртi кора, вежöртат тi сымдасö, график сьöртi. Висьтала жö — сруб менам петкöтöм, керку колö лэбтыны. Некытöн жö городас овнытö, квартира тi меным од сетö, а менам семья. Тöвйыны эд кытöнкö пондас ковны.

— Вежöрта, Сырчиков, но план менам, план. Тэ петан отпускö, а сэтшöм ходовöй машина быдса месяц сьöрна сулавны пондас. Адззы кинöскö ас местат, сэк вöлись и пондам баитны отпускыс йылiсь.

— Да мый ме тiянлö, отдел кадров ли мый ли ас местö уджалiссесö кошшыны? Да и кытiсь ме кинöс адзза, кöр вексö тiян гаражаныт водителлес оз тырмö?

— Адззан вот, кыдз тi баитнытö велалöмöсь. А менам талун кежö кряшыс карьерсис петкöттöм, щебёнкаыс пристань вывсис кыскытöм, угольыс станциясис вайтöм...

Öнöдз Лёха вежöртiс ни, мый понда лэбтiсис шофёр да начальник коласын эта спорыс. Зонка нельки гажмыштiс, что инмис ны коласö сэтшöм колана кадö. Лёха тшöктытöг лэдзчисис матiсьжык стул вылö, а кöр начальник лöньсьыштiс, сiя сэтчö горöтчис:

— Да лэдзö тi мортсö, Вячеслав Николаевич. Позьö разь сiдз, кöр график сьöртi корсьö.

— Эшö öтiк сэтöн адззисис. А кинöс ме сы местö машинаыс вылö пуксьöта? Тэнö ли мый ли?

— А мыля бы и не? Менам сэтшöм жö праваэз. Ме жö кык неделя сьöрна ни гаражас тöвсö чужьяла. А мымда эшö одзлань ковсяс, дак и асьныт, натьтö, од висьталö.

— Сё я мый я двигательыс абу?

— Абу, конешно.

— Да сетас я эшö Сырчиковыс тэныт ассис автомашинасö?

Этмымдасö Лёха, вежöртана, эз тöд, и горöтчынытö сылö одзлань лоис нем. Зонка жмитыштiс пельпоннэзнас: ачыс пö тöдö.

— Гижö приказсö, Вячеслав Николаевич, — горöтчис Сырчиков, бергöтчис, кинас Лёхалö öвтыштöмöн корис мунны öтлаын. — Мунам механикыс дынö, — öтiк ыбöсын петiсö.

Эшö механикыс дынö кежавтöдз Сырчиков вайöтiс Лёхаöс аслас автомашина дынö.

— Видзöт вот. Тэ жö ачыт сымдасö вежöртан. Быдöс сiя менам, кыдз колö: зэлöтöм, мавтöм, некыт и дзурк оз кер, — кыдз невестаöс ошкис Сырчиков машинасö, öтмöдöрсянь сы гöгöр бергавтöн. — И уджалö, висьтала ме тэныт, кыдз часы. Виль жö эшö нач. Ачым эд заводсис вайöтi. Сорок тысяч гöгöр вöлись и мунiс. — Сырчиков басни сьöртi позис вежöртны, что сiя полiс сыись, оз кö мыйöнкö гленитчы Лёхалö машинаыс, то сiя вермис откажитчыны.

Аслыс жö Лёхалö быдöс лоöм-лöсялöмас медперво нельки эз и веритсьы. И вöлись сэк, кöр машина бердiсь ключчес лоисö сы киын, а рейсö гижöм путёвкаыс карманас, зонка ловзисис кокнитжыка. Сiя и вежöртiс, что эта не пыр кежö, но аслас положеннёын эталö вöлi радся-рад.

Öштыны весись кад Лёха эз понды. Эта жö лунсянь сiя и кутчисис удж бердö. Думайтны öнi нывкаыскöт пантасьöм-тöдсасьöм йылiсь вöлi некöр, кöть тöдвылiсь эта сылöн и лун кежö эз вунлы.

Машинаыс сы киын, кыдз баитiс Сырчиков-хозяиныс, и былись вöлi туяна: кывзiсис-уджалiс бытшöма. Эта увья öнi зонка не гортö, не гаражö кодьöн эз и пыравлы. Часто эшö шондiтöг, то ли тшöтш шондi петан кадас, кöр ойбыт сьöрна да пöттöдз гуляйтöм бöрсянь том йöз, öтамöд бердын мыдзвевйöн да дыша оськавтöн, бертлiсö матiсьжык вöроккезiсь город ладорö, Лёха пуксьывлiс руль сайö, петавлiс рейсö, мед вашöтны грузла то кöрттуй станцияöдз, то пристань вылö. Гуляйтiсь том йöз ладорö руль сайсянь кадiсь кадö дженытика дзарышавтöн кутлiс не сымда завид, кöда, вежöртана, тожö вöлi, мымда петiс полöмыс, видзчисьтöг пантавны ны коласын ассис тöдтöм нывкасö. И бур, что сэтшöммес коласiсь зонка сiйö öтпыр эз казяв. И кин бы тöдiс, кин вермис вежöртны, кытшöм вын, гаж да мыла эта сылö сетiс. Сэтшöм лунö сiя вынсьöтчис ештыны сымда, мымда мукöдыс и кык-куим лун сьöрна эз ешты.

— Усян эд кок йывсит. Он и пыравлы кодьöн гортö да... — казялiс кыдзкö öтпырись суббота лунö зонкалöн мамыс, кöр öтöрас асывсянь люзьгис-зэрис. — Öтiк лунсö сэтшöм погоддяö позис бы и шоччисьыштны.

— Ог. Некинлö кытчöдз ме понда горзынытö, — шыасис Лёха паныт ыбöс колассяняс.

Мый вöлi казьмöтöм зоныс кывввезын, мамыс, конешно жö, вежöртiс бытшöма. И дзир сiйöн, что паныта кыввезнас сiя перво жö эз адззись, эта вылын ны коласын басниыс и баитсис.

Машинаыс сiя ойö узис Лёхалöн горт öшын увтын. Гажтöма гиззян-кышöтан зэр пыр кылiс, кыдз негорöн оссис-пöднассис кабина ыбöс, заводитчис мотор и машина перыта вöрзис местасис.

Месяцыс чулалiс казявтöг, кыдз öтiк лун. Сырчиков бертiс отпускись и Лёхалö ковсис мунны йöз машина вывсис бöр. Но öнi эта зонкаöс öддьöнсö эз ни гажтöмт. Сэк кежö ас машина вылö двигательыс вöлi вайöм ни, чожа позис пуксьыны сы вылö. Бурыс жö зонка понда вöлi сыын, что медодзза получка вылö, кöдö сiя не эз гусяв, не эз мырддьы некинлiсь, а шедтiс ас киэзнас, ас уджöн, öнi позис небны быдöс коланасö. И кöр суббота лун кежö куртка, свитер, брюкиэз да туфлиэз Лёха вайис гортö, Гришунь воныс, аслас завид кузя öзйыштöм синнэза, горöтчис:

— А кроссовкаэз тэ меным некытiсь он адззы? Быдлаöт жö машинаыт вылын ветлан.

— Кöть ашын жö... эмöсь кö тэнат ны вылö шедтöм сьöммес.

— Аслам менам нiя, допустим, кытчöдз и шедтытöмöсь. А тэнат?

— Тэ понда ли мый?

— Да. Вон эд сё жö тэ менам, да эшö и пöрисьжык.

— И стыд тэнат абу, сэтшöм туша-рожанат корисясьнытö?

— Кытшöм эшö стыд? Не йöзлiсь ме, пöрисьжык вонлiсь кора.

— Сiдз, батi. Только вот тэ увья меным некин и одзöсöн оз сет.

Но не сэтшöм вöлi Гришунь, мед сiйö падмöтiсö пöрисьжык воныслöн горöтчöм кыввес. Некöда местаö, не юрас, не сьöлöмас, нiя сылö эз мöртчö, кыдз стена бердсянь анькытш, чеччисö бöр. И, кыдз баитсьö, воныс кыввезсянь Гришунь и несйыны эз думайт, некытшöм местаöн нельки чутыр эз кер. Одззамоз риз-риз шыннявтöн, одзлань сiя горöтчис:

— Сэк, батi, курткаэзнас вежсям? Тэныт аслат дзескытöв, тыдалö, а меным аслам невночка просöв. Тожö эд виль. Даскынымись вöлись пасьтавлi, дак сiйöн каднас эг жö бырöт.

Гришуньлöн ыджытöв курткаыс Лёха вылö и былись вöлi топ-топ, а аслас небöмыс, кыдз баитiс Гришунь — и былись дзескытöв. И вежсьыны кö бы нылö öтамöд коласын, сiдз и былись кыкнанныслö вöлi бы буржык. И ло кыкнан курткаыс небöмöсь аймам деньга вылö, Лёха и шы эз бы сет, вежсис бы. Öнi жö Гришунь кыввезiсь сiя кылiс ас вылас издевайтчöм-сералöм, и согласитчыны эта вежсьöм вылö, вежöртана, некыдз эз вермы.

— Кытшöмö небисö, сэтшöмö и новьян. Не ас киöн шедтiн — вежласьнытö.

Думайтсис, что сэтшöм ответ бöрсянь Гришунь лöньсяс ни.

Быдöс небöмсö воныс син одзын меряйтöм-видзöтöм бöртi Лёха иньдöтчис кухняö миссьыны. А сэтчин мамыс, тыдалö, кывзiсьöм бöрсянь бöра сiйö жö Гришунь зоныс ладорö пондöтiс:

— Мый нö эшö зонкаыскöт куртканат он вежсьы, босьтiн дак?

— Ме разь сiйö вежласьны босьтi?

— А мый, кöть и эн дак? Лöсялöжык, баитö, сылö тэнат дак.

— Ась ачыс шедтö да вöлись вежласьö. Меным ас небöмыс и аслым бытшöма лöсялö.

— Но жö тэ, батя, и жмо-о-от, — нюжвылöн горöтчис Лёхалö мамыс, дивуйтчöмöн оклалöв-керис öтмöдöрö юрнас. — Кин сьöрья только тэ сэтшöмыс свет вылас шогмöмыт?

Ась эта лунö öтöрыс и вöлi кымöра. Но талун зонка, кыдз некöр, натьтö, эшö ас оланас, асывсянь лöсьöтчис пантасьöм кежö. И кыдз некöр, асывсянь жö, бытшöм вöлi сылöн и настроеннё, кöдö эз вöв охота дзугны да тшыкöтны лунтыр сьöрна. Но эстöн öнi сiя казялiс ни, что гортiссез коласын да ныкöт неколана споритöмсянь сылöн настроеннёыс дзугсьö сё öддьöнжык. И мед только вермыны сайöвтчыны эта увья кöть бы гортiсь мунтöдз, мамыс бöрья кыввез вылö Лёха паныт эз ни шыась. Миссьöм-чышкисьöм бöрсянь сiя кышыштiс тув вылö чышкöт, чöлöмöн петiс кухнясис бöр. Но кöр зонка бертiс асланыс узьлан жырö, усис казявны сэтшöм видзчисьтöмö, кöда йылiсь одзлань кежö кыдз бытьтö бы и думайтны эз позь. Сы курткаö ни пасьтасьöм Гришунь сулалiс сылань мышкнас зеркало одзын да сыналiс ассис баличаэз кыйтöдз лэдзöм юрсисö. Пöрисьжык воныс курткаын зонка, тыдалö, лöсьöтчис нильдыны керкусис эшö сы локтöм вотöдз. Öнi сiя бергöтчис зеркало одзас, сё одззакодь жö риз видзан шынньöлöн горöтчис:

— Пасьтавлан, батi, менчим рыт кежас? «Неужто сiя, мый керö, öнöдз сымдасö оз вежöрт?

Или сё эшö асьсö челядёкöн лыддьö, öслöпина?» — думайтiс Лёха ас кежас, а горöн висьталiс:

— Чöвт, öнi жö вывсит.

— Мый, жаль лоис?

— Чöвт, эшö öтпыр мортлö моз висьтала.

— А вот и ог. И мый тэ мекöт керан? Но мый? — Сы коста жö, одззамоз риз видзан чужöмöн да бокöнмоз, оськöв, мöдiк, Гришунь оськöвтiс петанiн ладорö, мед вуджны порог сайö да сайöвтчыны сiдз воныс курткаын сы син одзись, но тшöка увтас Лёха киöн топыта вайöтöмсянь чер-чер керис киэзнас, и, сiдз кыдз руыс бердö кутчисьнытö эз позь, нöбасис гардероб бердöдз, öтлаын горöн кажнитöм-пазалöм зеркалокöт, пуксöн пырис пытшкас.

— Но ... Адззылiн, мый?

Эз чулав и минута сьöрна, кыдз лэбтiсьöм шум вылö кухнясянь чепöссис мамыс. Повзьöмсяняс мöслöн кодь шардöм синнэзöн сiя дзар керыштiс лоöмыс вылö.

— Тэ мый этö, Лёха?! Тэ тай абу ни морт! Мый сымдасö керин?! Кыдз тэ лысьтан?! Кыдз тэнат томжыкыс вылö киыт лэбтiсьö? Вийин эд тэ Гришуньсö! Вийи-и-ин! Вийи-и-ин!

Этадз горöтлöмöн сiя чепöссис томжык зоныс дынö, отсалiс сылö сувтны гардероб пытшксис коккес вылö, пондiс чышкышавны одзись запонок бердас сылiсь стеклоэз бердö вирöдз кералöм киэсö, а öткоста ачыс сё одззамоз горöн, а öнi эшö и горзöм сорöн, горöтлiс:

— Неморт тай тэ вöлöмыт! Нач тай тэ неморт! Абутöмыс понда сымдасö керан! Да сёйис я мый я бы сiя тэнчит курткатö, öтпырись пасьтавлiс дак. — И одзлань, öнi мöдöтпырись ни: — Кин сьöрья-а-а-а? Кин сьöрья-а-а тэ ме юр вылö сэтшöмыс чужöмы-ы-ыт?!

— Дугды, мам, герьясьнытö! — орöтiс Лёха мамыслiсь горöтлöмсö. — Ог ме тöд сымдасö. Этö не менчим, а тэнчит ассит колö юавнытö. Сы йылiсь тэ буржыка тöдан.

— Тьфу! Стыдтöм! Совестьтöм! — горöн вальскис-сьöвзис аслыс кок увтас да горöтчис паныт Лёхалö мамыс. Эта вылын одзлань кежö и лöньсис. Томжык зонсö сё эшö кипöлöт видзöмöн, öнi сiя пондылiс петкöтны сiйö кухняöдз, мед миссьöтны. Но койкаэс коласын мама-зоналiсь туйнысö поперегалöмöн, Лёха кыкнаннысö панöвтiс, Гришунь воныслö, ылöса мортлö моз, эшö öтпыр висьталiс:

— Чöвт, висьталiсö, вывсит курткасö — вöлись петан. Он — ачым чöвта.

— Чöвт, дитя да брызьгы син одзас. Мыйлö тэ сылiсь, некодя мортыслiсь, силком пасьталан? Брызьгы-сет, ась сiя джагалö аслас курткаöн. Тэнат аслат виль. А оз кö, шуан, гленитчы öддьöн, дак мöдiкö небам, — öнi вöлись сэтчö жö горöтчис и мамыс. Но пöрисьжык воныслöн мыччалöм-висьталöмыс Гришуньлö и öнi эшö, тыдалö, вöлi нем туйö, дзик некытчö эз и сибав. Нельки мамыслöн тшöктöм-кеймисьöмыс немымда эз отсав. Гришунь жагвыв мынöтчис мамыс киэз коласiсь, чепöссис Лёха койка вылö, кокнас öтпырись чужйöмöн петкöтiс öшын рама, ачыс уськöтчис сы сьöрö. И дзир вывсис курткаыс, кöдö медбöрья кадö Лёха сё жö ештiс кватитны голя сикöджöттяс, Гришунь вылiсь гышкöптчöмöн, кольччис сы киö.

— Гришунь! Кага! Тэ мый сымдасö керан?! Мыйлö тэ öшынöттяс? Вийсьыны я мый я мöдан?! — вились горöтыштiс мамыс, дивуйтчöмсяняс киэзнас боккес кузя клопöтöмöн, уськöтчис ыбöсöт зоныс сьöрö.

— Да оз сiя тiян вийсьы, оз аслас смертьöн кув, вот адззылат. Этна шмоткаэз увья сiя медперво морт-мöдöс ачыс куляс-джагöтас, а сэсся вöлись ассис юрсö кытöнкö мургыльтасö, — шыасис Лёха мамыс басни вылö. Но сэк кежö мöдыс ештiс ни саясьны ыбöс коласас, пöрисьжык зоныслiсь висьталöмсö эз кыв.

Сiя жö кадö öшын увтас, öнi вöлись бöбмытöдз кутöм лöгсянь, Гришунь, аслас кучикись петöмöн, нарошно каждiс-талис кок увтас уськöтöм öшын рама, öткоста лёк горшöн горöтлiс:

— Вия! Начкыла! Сота! Палита!

Быдöс лоöмыс бöрсянь мунны горсадö или эшö кытчöкö мöдiклаö некытшöм настроеннё, вежöртана, Лёхалöн эз ни вöв. Кольччыны этöн тшыкöтöм настроеннёöн гортö — сiдз жö. И кöр бöбсялöмкодь Гришуньöс мамыс öшын увтсис кытчöкö сё жö нуöтiс, öшöмкодь Лёха пуксис, вель дыр пукалiс чöлöмöн аслас кровать вылын.

Гажтöм думаэз коласын отчимлiсь удж вывсянь бертöмсö зонка не эз кыв, не эз казяв. А кöр мöдыс сё эшö уджалан паськöма, сувтчыштiс недырик кежö жыр порог дорас, паныт сылö зонка и юрсö кодьöн эз лэбтыв. И вöлись сэк, кöр Лёхаöс рочавтöг, нiя гозйöн мамыскöт, пуксисö пызан сайö ужнайтны, — Гришунь керкуас эз мыччась, а Таня сойныс вöлi практика вылын, — да пань-бекöрыс горалöм коласын зонка мыдзис кывзыны мамыслiсь сы вылö пурöтчöм, паськöма ни сэк кежö, сiя шыасьтöг петiс керкусис.

Кымöртчöм погоддя увья шондiыс эта рытö и эз тыдав. Но öтöрас öнöдз сулалiс лунся югыт. Эз ешты пондöтчыны и зэр. И горсад ладорсянь, кыдз и сэк, месяцöн одзжык, паськалiсö город пасьта нiя жö эстраднöй музыкалöн шыэз. Быдöс гортсяыс местö нiя перыта уськöтiсö тöдвылö эта рыт понда зонкалiсь месяц сьöрна уджалöм, да сы кежö жö, эта рыт кежö, талун асывсянь лöсьöтчöм. И сэк сылö мыйсянькö пондiс думайтсьыны, что быдöс эта вöлi керöм весь. Что эта рыт кежö сiя сёрмис ни, сiдз кыдз этöн чулалöм каднас нывка, натьтö, ештiс тöдсасьны мöдiккöт. И мед только тöдны бытшöмжыка, былись я эта сiдз, этöн могнас Лёка и иньдöтчис горсад ладорö. Но...

Кыдз ми тöдам ни, быдöнныс коласiсь нывкасö зонка перво жö эз казяв. Не öтнас, не кинкö мöдiккöт Лёха син одзын сiя кытчöдз эз мыччась. И мед не сулавны рытывбыт сьöрна коккез вылын танцплощадка бердын, зонка кежис бокö да пуксис öткаса клён увтiсь прос скамейка вылö. Но и эстöн пукавнытö дыр сiя эз вермы. Кыным одзлань кутöм гажтöмыс нырыштiс сё öддьöнжык. И тöдны кö бы сэк кежö, кытöн олö нывкаыс, гортын или квартираын, зонка важын ни иньдöтчис бы сы дынö. Но бедаыс сыын и вöлi, что нывкалiсь адрессö сiя эз тöд. Этасянь нельки этö неунасö керны сiя эз вермы.

Кытшöмкö кадö зонка нельки думайтiс, мед чожажык бертiс Сьвис да вайис сьöрас кöсйöм бутылкасö. Öнi сiя эта вылö вöлi бы радся-рад, кöть одзлань ни тöдiс бытшöма, что и Сьвиссö видзчисьö тожö весь.

Сёрöнжык, кöр öтöрас пондiс пемдыны ни, а öткöн сулалан клён листтэз вылö горöн усисö медодзза зэр воттез, кынымöтчид ни эстöн пукавтöн Лёха вились öзтiс куритны да тожö не первуись ни сувтiс коккес вылö, но сэтöн жö, дзик паймыштöм мыйсянькö нач видзчисьтöмсянь, пуксис бöр аслас местаö. Зонкалö мыччассис, что нiя нёль подружка коласын, кöдна сёрмöмöн мыччисисö сэк кежö садас, и öнi, пондöтчöм зэр шогья сайöвтчöм могись, тэрмасьöмöн, чуть я не котöрöн, öтамöд коласын иньдöтчисö танцплощадка ладорö, — нiя нёль подружка коласын öтiкыс вöлi сiя. Быдöс ассис надейтчöмсö öштöм бöрсянь медперво этаö Лёха эз и верит. Часöт дзир сы син одзын ни лоöмыс, былись лоöмыс вылö эз и вачкись. И примитны сэтшöмсö быльнас нельки эз и позь. Быдöс чожажык вачкисис вöт вылö, вöт местö сiйö примитнытö и колiс. И ась сiя талун нёль нывкаыс коласын, кыдз кытшöмкö вежалун кузя, вöлi пасьтасьöм медкокнита да медгажöн, но кöр зонка казялiс быдöнныс коласiсь эшö и пантавлöм ни öнöдз сылiсь учöтжык вывтыра, чож да басниа подругасö, кöдакöт сiя мыччасьлiс садас эта вотöдз, да кöда аслас чож басни кузя сыöддьöн гленитчис Сьвислö, некытшöм сомненнё одзлань кежö эз ни кольччы.

Зэрыс шогья перытжыка сайöвтчöм могись нёльнан нывкаыс котöрöн сибöтчисö кассовöй будочка дынöдз, сувтчыштiсö сы лажмытик козырёк увтö, зэв-зэв öтамöд бердö. И ась ны дынöдз коласыс вöлi не öтiк дас оськöв ылына, а пемытыс кузя öтöрас тыдалiс умöля ни, нёльыс коласiсь и öнi зонка сiйö некинкöт эз сорав.

Зэрнытö пондöтчис орсöмöн. Медодзза нырыс мунiс тучки-пачки, мусö вевдöрсяняс эз и вад. Сэк нывкаэз, сьöрсьöн-бöрсьöн да ас коласын тэрмасьöмöн, уськöтчисö танцплощадка вылö и чожа мый сорлассисö быдöнныс коласын. А ловзьыштöм да саймыштöм Лёха видзöтiс ны сьöрö бöрсяняныс, кывзiс саймöтöм сьöлöмлiсь моростыр горöн ёткöтöм да сы сьöрö жö ас кежас негорöн шувлiс: «Локтiс эд, видзöт жö, локтiс, локтiс». Сiя гажтöмись, кöдаись эшö нач неважын и петанiн некытшöм эз адззись, öнi и след некытшöм эз кольччы. Эз пукöт сэсся öтнассö зонкаöс и клён увтiсь скамья вылын. Сiя чеччис да жагвыв сибöтчис танцплощадка дынö. А кöр эшö öтпыр, öнi нач матiсянь ни, казялiс быдöнныс коласiсь тöдса нывкасö, нач вунöтiс быдöс умöль да неколана йылiсь, кöда вöтiс зонкасö сiя лунö гортас, öнi сылö охота лоис сулавны эстöн кöть ойбыт сьöрна, мый лыддис бы аслыс счастье туйö. Но видзчисьны сы дырнасö погоддяыс сё жö эз сет. Сэк кежö зэрмис мöдöтпырись да сiдз, что сылiсь перыта дугдöмсö видзчисьны одзлань эз ни позь. Сiя и дзугис садын шоччисись том отирлiсь рыт. Эзö на ештö лöньсьыны музыка шыэз, а ведрапонiсь кисьтан зэр увтын танцплощадкаыс просмис. Быдöс том отир, öтдруг тэрмасьöмöн, иньдöтчис сад воротаэз ладорö, а сы сайын котöрöн пондiс рознитчыны город пасьта.

Нывкаэз дынö сибöтчöмыс Лёхаöс и талун эшö полöтiс. И оз позь висьтавны, кыдз бы сiя этö керис сэк, эз кö бы отсав сылö этаын зэр.

Эшö садсис петöм вотöдз зонка казялiс, кыдз сы кодь жö курткаа нето пиджака зонкаэз сайöвтöны зэр шогья паськöтöм полаэз увтö ассиныс тöдса нывкаэсö. Этö жö öнi керис и сiя. Кыдз только воротаэс сайын котöрöн Лёха вöтiс нывкаэсö, тожö кыдз важся тöдсаэзлö горöтчис:

— Сайöвтчö чожжык! Быдöс вадас! — Сы коста жö зонка паськöтыштiс ны одзын ассис куртка полаэсö. И сiя кадö, кöр сьöд синкымаыс бокöмоз кежыштöмöн да дивуйтчöмöн сё эшö видзöтiс зэрыс пыр и тöдса ни топ невночка, а öткоста сё эшö тöдтöм зонка вылö, сылöн боёкжык подругаыс перыта оськöвтiс паськöтöм пола увтö, сэтчинсянь ни горöтчис:

— Сайöвтчы, Нинка! Мый видзчисян?!

Эта бöрсянь и мöдыслö кернытö кольччис нем.

Сiдз öтiк куртка увтын куимöн нiя сибöтчисö котöрöн продуктовöй магазин бердöдз. Эстöн зэрыс эз сидз, позис видзчисьыштны.

Медодзза лöсялöм оськöлыс зонкаöс невночка смевмöтiс. «Сымда эд вот и колöм», — гажвевйöн думайтiс сiя ас кежас, кöть дзар керыштны веськыта сьöд синкыма «жельнöг чачаыс» вылö öнöдз эшö и эз лысьт. Но мед не öштыны весись кад, эстöн сулавтöн ни сiя юалiс:

— Кин кузя тi талун танеццес вылö сёрмит? Нывкаэс, кыкнанныс öтдруг да дивуйтчöмöн, видзöтöв-керисö öтамöд вылö, но некöдыс ны коласiсь юалöмыс вылö перво жö эз шыась.

— Кин кузя, главное, — горöтчис сёрöнжык учкись кодь боёк нывкаыс, сэтöн жö паныт юалiс: — Кысь тэ тöдан, что сёрмим?

— Рытывбыт локтöмнытö видзчиси да мыля нö ог тöд. Ми жö тiянкöт важын ни тöдсаöсь. Сiдз эд, Нина?

Вились дивуйтчöмöн нывка дзар керыштiс дженытика, но повтöг зонкаыс ладорö, суськисьöмöн öвтыш-керис öтмöдöрö юрнас, но горöтчынытö нем эз ешты.

— Но кыдз жö? — одзалiс сiйö зонкаыс. — Вунöтчин ни разь, кыдз эшö месяцöн одзжык эстöн жö садас пантасьлiм. Не öтпырись нельки.

— Нинка? Былись я мый я? Кыдз нö ме тэ сайын сымдасö эг казяв? — нарошно дивуйтчöмöн, сэтчö жö öтлаасис сылöн подругаыс.

— Да мун тэ! — кутöм недолытсянь сё эшö суськисьöмöн горöтчис Нина. Рытся пемыт шогья сы чужöм вылын эта кадö рöмсялöмыс и эз тыдав, но сысянь, кыдз дзебöмöн сiя лэдзис увлань синнэсö, позис вежöртны, что зонка кыввезöн казьмöтöмсö тöдвылас сё жö уськöтiс. И мед не сетны орöтны бöр сiйö вöснитик суниссö, кöда нiйö öтлаöтiс этöн казьмöтöмнас öтамöд коласын, бöбöтчытöг и этасянь повтöмжыка ни Лёха одзлань юöртiс:

— Сэксянь ме тэнö син вылiсь эг ни öштыв.

— Вот эттö да, — гажвевйöн да одззамоз нарошно дивуйтчöмöн горöтчис Ниналöн подругаыс. — Мый жö бы, кывзы, эта сэтшöмыс?

— Да ладно тэныт... — зэркытöла шыасис Нина. — Мунам. Дугдiс зэрнытö. — Синнэсö вывлань лэбтывтöг сiя швыркнитiс-бергöтчис мöдöрö, оськöв кыным ылына вештыштiс кыкнанныс дынiсь бокö.

Зэрнытö невночка и былись дугдыштiс. Но колiс дзир нылö петны асланыс вевтöс увтiсь да вуджны улица мöдöрись бетоннöй тротуаррез вылö, кыдз зэрыс сэтöн жö вынсялiс бöр. Керны кольччис нем, кыдз куимнанныслö вились пырны öтiк куртка увтö. И сiя кадö, кöр Ниналöн чож да неполiсь подругаыс керис этö одззамоз ачыс, то мöдсö öнi ковсис пыртны кипöлöт. Эстöн боёкжыкыс одзлань горöтчис:

— А мыля ми öнöдз тöдтöмöсь? Менö даки Аняöн шуöны.

— Да, былись эд. А ме — Лёха.

— А кытшöм эта ним? — Аня жагсьöтыштiс оськöввесö.

— Алёша, натьтö? — юалöмöн веськöтiс Нина.

— Да, да. Алёша, Алексей, сiдз метрикаас гижöм. Лёханас менö отирыс учöтсянь шуöны, вот и велалi сы дынö.

Кытчöдз оськалiсö вывланьöдз öтамöд коласын сёрниттöн, нывкаэз öнi вöлись юöртiсö, что кыкнанныс нiя не городiсь, а ойвыв районiсь, вöр посёлокись. И что олöны нiя не общежитиеын, а частнöй квартираын, öткаса старушка ордын. Кыкнанныс велöтчöны медучилищеын акушерскöй отделеннё вылын, а öнi, гожумся каникуллэз коста, чулöтöны ассиныс практика окружнöй больницаын. Эстöн жö вöлись, то ли сорасьöмöн, то ли нарошно, Аня казьмöтiс и сiйö причинасö, кöда кузя сiя рытö нiя сёрмыштiсö локны садö. Сiя лунö вöлöм Ниналöн нимлун, и нывкаэз чукöртчывлöмась хозяйка самовар сайö, юны тортöн чай. «Дак вот мый увья талун сiя сэтшöм вежалунсяöн меным перво жö и мыччассис», öнi зонка гусьöн нёджжöвтыштiс зэв ордчöн аскöттяс оськалiсь нывка вылö, кöда чулалöм зэрыс бöрсянь, кыдз миссьöтöм жельнöг чача, аслас голубöй рöма шифоновöй платьеын да розовöй ленточка сорöн кыйöм чикисьöн, мыччассис сылö эшö одззася басöкжыкöн.

— Мыля нö менö асланыт нимлун вылö эд корлö? Чуть тöдчана шынньöлöн, чöлöмöн да дженытика

Нина дзар керыштiс пöвсиннас зонкаыс ладорö, а Аня и эстöн перыта адззисьöмöн, паныт юалiс:

— Мыля сёрмин тöдсасьнытö?

Кытчöдз оськалiсö нывкаэс оланiн дынöдз, зэрнытö дугдiс. Кадыс эшö эз вöв сёр, позис бы кытöнкö и пукалыштны. Но неылын пыранiн дынсянь не мужскöй киэзöн керыштöм скамья косьмыны зэрыс вадöм бöрсянь эшö эз на ешты, пуксьынытö вöлi некытчö. Эз косьмы нывкаэз вылын и вадöм паськöм, мыйсянь, тыдалö, кыкнанныслö лоис ыркыт. Аня перво жö иньдöтчис поспуэз ладорö, вылiсянь ни юöртiс:

— Ме пасьтасьны пырала, — сайöвтчис ыбöс коласас.

— И меным мыйкö тожö петкöт, — сёрмыштöмöн горöтчис Нина, кöр мöдыслöн ыбöс саяс кок шыэс лöньсисö ни. Зонка перыта чöвтiс вывсис курткасö, лöсьöтыштiс колананёж нывкаыс одзын, тшöктiс:

— Пасьтав.

— Да ог. Вевттисьышта, батi, дзир недырик кежö. — Пасьтав, висьталiсö, перытжыка шоналан, — зэркытöла горöтчöмсö сайöвтöм могись одзлань шутитöмöнмоз, но чуклясьтöг ни эшö содтiс: — Кынман, кулан, дак кин вылын нö ме гöтрасьнытö понда? — Öткоста кышыштiс нывка ки вылö öтiк соссö, отсыштiс кышавны мöдсö, а кöр улiсянь вылöдз визьгыштiс-пöдналiс замок, курткасö нывкаыс вылын лöсьöтöм могись бытьтö казявтöг, волькöтыштiс киэзнас пельпон да морос гöгöр.

— Да сiя тай тэ вылiсь и вöлöм! Ме вылын невна дзескытöв, а тэ бердö, видзöт, кыдз лякасис. Часöт шоналан. — Эстöн Лёха вились жмитыштiс нывкасö ас бердас нето ачыс жмитчыштiс сы бердö. А мöдыс, синнэсö паныт лэбтывтöг, перыта мынöтчис зонкаыс киэз коласiсь, то ли одззакодь недолыт, то ли полöм увья горöтчис:

— Но жö Аннушкаыс кытшöм. Менö колис, а ачыс сэсся эз и пет. — Одзлань зонкаыслö ни: — Мыйлö тэ сы дырни абутöмкодь тöдсасьöмыс йылiсь?..

— Эз разь ков?

— Недолыт меным Аннушкаыс одзын.

Басниыс коласын, аслыныс казявтöг оськöв бöрын оськöв ордчöн оськавтöн, нiя иньдöтчисö керку дынсис югдöттöм улица кузя.

— Ме полi, что тэ эшö суськисьны пондан.

— И мый бы сэк?..

— Но кыдз жö мый, кöр ме неделя сьöрна эта бöрсянь видзчиси, кöр тэ вились ме син одзын мыччисян. Быд рыт эта увья садас вовлi.

— И быдöс весь, сiдз эд? А сэсся лöгасин и быдса месяц сьöрна эн мыччась. Сiдз?

— Не эд. Не сiдз... — одзлань зонка пондiс висьтасьны кыдз да мый вöлi сы оланын эта бöрсянь.

Казялiсö нiя асьнысö, дзик саймисö, город сайись пруд дорын. И юавны кö бы эта коста, кытшöм туй вайöтiс нiйö эта крут берег дорö, висьтавны бытшöма некöдыс ны коласiсь эз бы вермö. Сэтöн жö нывкаыс, дзик паймыштiс, пондiс корсьыны бертны бöр. А гажмыштöм сыкöт тöдсасьöмсянь да рытсö öтлаын чулöтöмсянь, бертны городас бöр Лёха эз тэрмась.

Погоддяыс сэк кежö мичамис ни. Зэран кымöррес, кöдна эшö неважын öшалiсö город весьтын, öнöдз ештiсö кывтны кытчöкö ылöжык да сайöвтчыны син одзись, öнi ны местö, пыдöстöм да лöз енöжын öшалiсö унася-уна гырись и поснит звездаэз да мыччис ылын вöр сайсянь ассис мича чужöмбансö быдса тöлiсь.

Морос тырйöн да гажвевйöн ловзисьöм бöртi зонка чатыртчис, нёджжасьöв-керис вывлань.

— Мыччав, кöда медъюгыт звездаыс.

— Вот эта, — нывка мыччалiс чуньнас сы вылö, кöда öшалiс веськыта ны весьтын.

— Вот сiя менам талунняыс и эм.

— Нет, менам.

— Менам.

— Менам.

— Сэк öтласа, кыкнаннымлöн, тэнат и менам. Баитчим?

— Баитчим. Бертам бöр. Меным асывсянь дежуритны мунны.

Öтамöд бердын кокнита видзсьышалöмöн, жагвыв иньдöтчисö бöр.

— Кöр пантасям? — юалiс зонка тöдса посöдз дынас янсöтчикö.

— Мый вылö бы? Эшö разь колö? Эгö на эшö янсöтчö да? — шутитыштiс öнi нывкаыс ни.

— Колö эд, басöк нима. Басни ыджыт эм.

— Мöд субботанас сэк.

— Ме кувны ешта неделя сьöрна видзчисьтöн.

— А ашынöдз он кув? Ашын рытнас сэк локтан.

— Спасибо, Нина. Бур он тэныт. Аслат дежурство вылö дзир эн сёрмы. Адззисьлытöдз, ашынöдз.

— Но, — шыасис паныт нывкаыс. Кöр зонка лэдзис ас киись сылiсь шоналöм кисö да иньдöтчис посöдз дынсис, нывка тожö кайис поспуэз кузя вывлань, кутчисис ни вöлi öтiк кинас ыбöс вуг бердö, сэтöн вöлись кватитчис, уськöтчис бöр.

— Алёша! Сулав жö! Чуть эд, видзöт жö, тэ курткаын эг пыр. Смех тай! — Нывка сэтöн жö пондiс чöвтчыны.

Лёха бертiс бöр, кутöмöн сувтöтiс сылiсь киэсö.

— Эн чöвт. Оз ков. Нимлун жö талун тэнат.

— Но и мый?

— Да нем. Ась сiя лоас тэныт козин местö.

ЛЁКЬЯЙ

(Иньва, 1993)

Окружнöй глазнöй диспансерись главнöй врачлö

Владимир Иванович Голевлö

посвящайтчö

I

Чулалiс март. Быд лунöн öтöрас лоис сё шонытжык да шонытжык. И ась асывся мороззэз коста эшö горöн тачкöтыштлiсö-потласисö пуэз, а эта тачкöтöмсянь, бытьтö нöшöн тышкöтöмсянь, ны уввез бердiсь киссис кружева моз басöка гöрдззöм-куржавитöм лым; луннас, мича погоддя коста, бытшöма ни шонтлiс пым югöррезöн вылына му весьтас öшалан шондi.

Городскöй улицаэз пасьта, шондi морос вылас, гажтöма, дзик шогувья, ойзiс-ружтышалiс шольöм лым. Сорлассьöм тöвбытся бус-нятькöт сiя син одзын ляпкамис да жмитчис му бердас — сылiс. Нiя жö улицаэз пасьта, керöс вывсянь лунлапöв покатöт, эта сылöм лымыс кунва кодь гудыр да чож шороккезöн писькöтлiс аслыс туй, мыдзтöг швыльгис-визывтiс увлань. Дзирыт шондi югöррез увтын бытшöма лёмзьöм, лёлльыт пу уввесö кокнита да паськыта павтыралiс öтмöдöрö зумыт, чож тöв. Сiя жö, öтлаын шондiыс шоныткöт, мынöтлiс керку юррез бердiсь эшö рытсянь кузьвевйöн нюжалöм йыжоллез. Кадiсь кадö, то öтöрын, то мöдöрын, син одзын югйöвтöмöн, нiя öдззöтчывлiсö увлань. Чорыт асфальт бердö сьöкыта кротшкисьöмсянь горöн чижнитöмöн, кыдз стекло, йыжоллес пазавлiсö унася-уна гырись да поснит торрез вылö, гажöн да перыта резсисö-паськалiсö öтмöдöрö.

Луншöр кежö шонавлiс да небзьывлiс ульсалöм ру. Öнi сiя эз ни пöдты ас пытшкас быд ловзьöм шысö, кыдз эта овлö кымöра да уль погоддяö, нето тöвся тшынмороз коста, а дзир вынсьöтiс нiйö эшö öддьöнжык. Этасянь важ вичку гöгöр пöрись садын поздiсись сьöдракаэзлöн орöттöг да горöн карзöм паськалiс омöн город пасьта, сибавлiс чуть я не быд сы пельöсöдз. Нельки учöтик кöрымкайлöн гажвевйöн да сöстöма теньгöм, кöда тöвнас шоча сибавлö пельшы бердöдз, öнi бытшöма сорлассис быд саймöтан да гажöтан шыкöт.

Сiя жö тулысся шонытыс саймöтiс да ловзьöтiс пуэз вылын пугыр. А ны кодззöтан дукöн тырöм ру, öтлаын эта тулысся шоныткöт, сiдз жö саймöтiс да ловзьöтiс быд том и пöрись мортöс. Отир адззисö, кылiсö да вежöртiсö, что кадыс бергöтчис тулыслань. И бимороза кузь тöлыс, кöд коста полöм петiс мыччыны öтöрö ныр, мöдöтпырись бöр оз ни берт. Сэксянь нылöн и чулалiс полöм. Сэксянь и пондiс усьны син вылö нылöн саймöм-ловзьöм. Медодз эта саймöм-ловзьöмыс тыдалiс сыын, кыдз асьнысö кокньöтöм могись отир пондiсö вежны вывсиныс тöвся паськöм. Кыз да шоныт подклада пальтоэз да джуджыт воротника гöна пассез местö ны вылын пондiсö мыччисьны вöснитик да кокнитик, а сэтчö жö эшö и мичажык рöма ар-тулысся пальтоэз да плащщез. Кузь гöна тöвся шапкаэз местö мыччисисö то шляпаэз, то гöрдззöм береттэз. А сьöкыт унттэз да умöля куснясян пимиэз местаö син вылö сё частожык усьлiсö кокнитжык да моднöйжык сапожкаэз.

Босьтны, шуам, пример туйö кöть бы сiйö жö Евгений Матвеевич Вартановöс, кöда уджалiс природа дозоритан городскöй обществоын председательöн. Морт сiя вöлi сэтшöм жö, кыдз и быдöс сы гöгöрись ловья отирыс: сина да пеля, юра да сьöлöма. Сiдзкö, колö думайтны, что и адззис, и кылiс да вежöртiс тулыслiсь сибöтчöмсö мукöдся не умöльжыка. Сiйöн, кыдз только öтöрас сувтiс мича да лöнь погоддя, а керку юррез вывсянь лунлапöв ладорсянь пондiс кывны медодзза вотьваэзлöн ась кытчöдз эшö и полöмкодь, а этасянь не öддьöн гора сатшкöтöм-виялöм, Евгений Матвеевич, саймöтöм да ловзьöтöм тулысыс медодзза казьмöтчöмöн, кадсö öштытöг, сэтöн жö тулысыс сьöрö и уськöтчис.

II

Ашынас, гортын Евгений Матвеевич асывсянь вештiс бокö ассис пась, унттэз да шоныт гöна шапка, кöднаись кузь тöв сьöрна кодьöн эз и петав. Ны местö öнi сiя кыскис шифоньерись ась и новйöмовöй ни эта вотöдз, но дзонь эшö да бытшöм пемыт-коричневöй рöма арся пальто, сы рöмаö жö, тожö новйöмовöй ни, но туяна эшö кытчöдз шляпа. Сьöкыт унттэз местö адззис тöдчöмöн нысся кокнитжык, шоныт тöвся сапожкаэз. Ны увтö жö ас киöн вöлiсö гладитöмöсь пым утюг увтын брюкиэз.

— Не одзöв я мöдан тулысыс сьöрö вöтчыны? — юалiс тыра öмнас гортiсь петöм вотöдз Вартановлöн иньыс — лöнь мывкыда, жаг да не öддьöн басниа Валентина, кöда кык челядьсö чужтöм-сувтöтöм бöрсянь ештiс кызны сэтчöдз, что аслас костöм тушаöн да вöснитик коккезöн важын ни вачкисис, кыдз примитöм баитны отир басниын, кертöм гыр вылö, кöда вот-вот оз понды тöрны ыбöс косяккес коласö. А быдöс сысянь, что аслас жаг коста Валентина вöлi вывтi горш чöскыт сёян вылö, и некытшöм мера этаын аслыс эз тöд. Простöн ассис сумкасö, пряник-конфетаэзтöг, сьöрас сiя некöр эз кыскав, а удж вылö мунтöн да бöр гортö берттöн кадсö весись эз öшты, ватшкис-рöмысьтiс изын кодь аннэзнас, кыдз мöс, дугдывтöг, дзик век сьöрна вöлi вердтöм да тшыг. Сiя жö, колö думайтны, вöлi сыкöт лунтыр сьöрна и пукалан удж коста. А уджалiс Валентина городскöй ательеын вурсисьöн. И мымда бы эта кузя Евгений Матвеевич аслас инькöт эз баит, кыдз эз грешит, немись-нем эз отсав. Неöтпырись эта чöскыт сёян шогья Вартанов вайöтлiс сiйö нельки горзытöдз, но и эта иньыс ылöсын некытшöм след эз коль. Мужикыслiсь баснисö Валентина кылiс да эз кыв и ассис привычкасö — сёйны дугдывтöг — сiдз и эз чапкы. Кыдз баитсьö отир басниын — куньöм синнэзöн, но керис ассис. Этасянь кытшöмкö кадö и локтiс сэтчöдз, что Вартанов öвтыштiс иньыс вылö кинас, сiдз кыдз нельки мужик могöн сибöтчыны сы дынö охота öшис.

Сэк жö Валентинаыс горöтчöм кыввез вылö Евгений Матвеевич паныт висьталiс:

— Мый, поди, одзыс?.. Быдöнныс тай сiдз пасьтасьны пондiсö. Мöдiк тöлыс öнi сё ни оз лок.

— Март вылас эшö пö öшка сюррез чеглавлö, — панöвтiс иньыс Вартановлiсь баснисö, неылын петанiн дынсянь пондiс пасьтасьны.

Сiя кадö зонныс гортын эз ни вöв. Саша медодз ештiс лöсьöтчыны да мунны школаö. Зонка ветлöтiс дасöт классö и туйдынытö сiйö эстöн эз ни ковсьы. Елена нывныс, кöда велöтчис мöдiк сменаö, одз асывсянь эз тэрмась. Неважын чеччöм бöрсянь, эшö кыйтöм юрсиа, нывка пукалiс аслас торья жырокын, мыйкö велöтiс.

Мужикыскöт басни коласын Валентина мынöтiс коксис гортся тапочкаэз, кышалiс ны местö сьöд пимиэз, пуктiс юр вылас пемыт гöна норковöй шапка, а вылас пасьталiс сьöд рöма пась. Кеписясьтöдззас сiя эшö öтпырись пыралiс кисой вылас öшöтöм сумкаö, дзик нарошно, мужиксö дразнитöм могись, кышöтöв-керис чуннес коласын конфета бердiсь разьöм кышокнас, а асьсö, весöтöм конфетасö, иньдöтiс подушка кодь тыра аннэс сайö. Видзчисьны одзлань мужикыслiсь пасьтасьöм-лöсьöтчöмсö Валентина эз ни понды. Керкусянь жö, кыкнан кинас сiя лэбтiс вывлань пась воротник, оськöвтiс порог сайö, сiдз кыдз одзлань ни тöдiс, что эталö мöдыс лоас только рад.

Эстöн корсьö висьтавны, что кыкнанныс Вартанов гозъя уджалiсö город шöрын, неылын öтамöд дынсянь да сэтчö жö эшö öтiк да сiя жö кадö. Этасянь, кыдз асывнас удж вылö, сiдз и рытнас гортö, нылö кыдз бытьтö бы нем эз видз мунны да локны öтлаын. Медодзза годдэзö öтлаын овтöн сiдз ны коласын частожыксö и вöвлi: мунiсö и локтiсö пыр öтлаын. Тшыксис-разьсис эта ны коласын кынымкö годöн одзжык, и бöра жö Валентинаыс кызöм увья, кöр сiя чердöм кынöмнас öдва буглясьтöн, эз понды ештыны оськавны аслас кокнит вывтыра да сэтшöм жö кок йыла мужик сьöрö. Сэксянь сiя и велалiс автобус вылö и нельки кык-куим автобуснöй сувтчанiн ылына туйколас подöн ветлыны дугдiс. А мед не сёрмыны автобус вылö колана рейс кежö, гортiсь сылö быд асыв ковсьывлiс петны мужикысся одзжык.

III

Öшка сюрресö мартнас чеглалöм йылiсь иньыс Вартановлöн горöтчис, тыдалö, не весь.

Кöр Евгений Матвеевич петiс сы бöрсянь гортiсь, осьтiс да пöдналiс бöрсяняс посöдз ыбöс, сы дзирлöн векнита да зубыта дзуркнитöм-викöстöм сьöртi йи вежöртiс, что öтöрас и былись эшö тöвсямоз кöдзыт, и вежны тöвся шапкасö тулысся шляпаыс вылö одз.

Этасянь эшö нем эз видз бертны бöр. Но керны этö охота эз ни вöв. «Этö дзир асывсяняс сiдз... Лун кежас шонтас», — думайтiс Вартанов асьсö лöньсьöтöм могись, повтöг петiс калитка сайö да кокнит шупыт оськöввезöн иньдöтчис тöдса улица кузя удж вылö.

Асылыс эта лунö, кыдз нарошно, и былись лöсялiс сэтшöм бимороза, сэтшöм кöдзыт, кытшöмöн сiя шоча овлö нельки тöв шöрнас. Кыдз бетон, тон-тон горавтöдз вöлi швангöм-кынмöм кольччöм эшö сэк кежö городскöй улицаэз вылын да шольöм рытсяняс лым. Эз кыв некöдöрсянь и öтiк шороклöн ловья шыасьöм, кыдз бытьтö сэтшöммес эта вотöдз эшö некöр эз и вöвлö. Отир саддэзын да улицаэз пöлöн садитöм пуэз асывся кöдзытсяняс тачкöтiсö-потласисö сэтшöм горöн, кытшöм горöн нiя эз потласьлö нельки тöв шöрнас: быд сэтшöм шовкнитöмыс вачкисис пишались лыйöм вылö.

Но медöддьöн лёкасис морозыс шондi петан кадас. Сэк сiя вöлi сэтшöм вына да лöг, что сотiс-заваритiс ныр да сайöвттöм пеллез, кыдз ключöн пизян-бергöтан дзирыт ва.

Вежöртана, мед казявтöг не кынтiсьны город шöрас, — смех эд лоас, — Вартанов кадiсь кадö то зыртышалiс чуня кепися кинас нырсö, то сайöвтлiс пеллесö. Асывся мороз чирышттöдз сотiс-палитiс не только нырсö да пеллесö, рожабаннэсö да сайöвттöм тшöкасö. Сiя сiдз жö чеплялiс-сотышалiс кисойесö да пидзöссэсö и, тыдалö, готов вöлi тувдöтны нельки быдсöн вывтырсö. Сiйöн, кытчöдз Евгений Матвеевич оськалiс город шöрöдз километр ылына туйколас, жаритчис, кыдз карась дзирыт сковорода вылын. Эта коста сылö неöтпырись усьлiсö тöдвылас иньыслöн неважынся кыввес мартовскöй морозлöн öшка сюрресö чеглалöм йылiсь. «Этатшöмыс не только öшкаыслiсь, сiя и вакульыслiсь, эм кö сэтшöмыс кытöнкö свет вылас дак, чеглалас». Эта дума коста Евгений Матвеевич чуть я не котöрöн сибöтчис исполкомö пыранiн дынöдз, мöдiккез коласын пелитчöмöн пырис. А кöр сiя чулалiс коридор да сюрис аслас неыджыт, дзир öтiк öшына каморкаö, кытöн и бергöтчыны кодьöн эз позь, сэтöн вöлись и кылiс, кыдз кöдзытыс вывсянь шонытiнас пондö жугдыны-поткöтны сылiсь вывтi сайкалöм кымöссö.

Вугмöм чуня киэзнас Евгений Матвеевич вель дыр сьöрна перкйис-пöрччалiс тувдöм пальто бердiсь киззез, чöвтчис. Но эшö уджалан пызан саяс пуксьытöдз мыйкö дырна сiя жмитышалiс, зыртышалiс да видзис киэзнас юрсö, öткоста ачыс, дзирыт батарея бердас зэв-зэв сулавтöн, шонтiсис.

Сёрöнжык, кöр и кымöсыс, и вугмöм чуня киэс да дубалöм пидзöссэс жагвыв сё жö шоналiсö, Вартанов пуксис аслас пызан сайö, пондылiс кутчисьны быд лунся удж бердö. Но эшö павжун вотöдз сiя вежöртiс, что асывся кынмöмыс эстöн шонтiсьтöн быдсöн эз чулав и шонавнытö, кыдз колiс бы, сiя эз вермы. Эз отсав колананёж и столовöйын бытшöма павжнайтöм да не öтiк стакан мымда юöм чай. Павжун бöрсяняс пондöтчис висьны юр да тöдчöмöн кынтны. Охота вöлi сюрны кытчöкö шонытiнö: то ли бытшöма лонтöм баняö, то ли гор вылö, мед только вермыны мездiсьны сiя кынтöмись, кöда коскаэз зубытöдз зэгйис сылiсь быдсöн вывтырсö.

Вежöртана, что кыдз бы Евгений Матвеевич эз мöд да эз вынсьöтчы керны сiя лунö бытшöма ассис удж, эта сылöн эз ни пет. Потласьтöдз висян юрöн думайтны мыйкö йылiсь бытшöма сiя эз чайтчы, гижны прок эз тырмы да и лыддьöтöмсис етша мый кольччис шог юра ылöсын. Сы коста жö, уджалан кадсö пызан саяс жагвыв вийтöн, аслыс казявтöг, Вартанов кынымиськö сибöтчылiс ни гыжжезнас веськыт синкым бердас, мед гыжйыштны. Сэт сылöн мыйсянькö пондiс лудны.

Рытъявыв, кöр не кынтöм-зэгöтöмыс, не юрвисян шогыс маитны сiдз и эз дугдö, Евгений Матвеевич костi колис удж, мунiс гортас.

Гортын сiя, каттисьöмöн, вель дыр пукалiс жара лонтiсян камин одзын, а сёрöнжык юис öмидз-вина сора пым чай, кайис гор вылö да шебрасис ой кежас аслас пасьöн, кöдö асывсянь вештылiс бокö ни.

Быдсöн эта кад коста эз сет вунöтны ас йывсис и синкымыс. Некытшöм зубыт, вежöртана, сыын и эз вöв, но сiя лудiс, лудiс сё одззамоз. И эз тырмы некытшöм вын, мед видзсьыны эта лудöмись, не сибöтчыны сы бердö киöн то ли гыжйыштöм, то ли кöть небурика зыртыштöм могись. Медöддьöн эта лудöмыс сетiс тöдны ас йывсис горвылас куйлöм коста, ойнас, кöр пасьыс увтын дзик шебрасьöмсяняс Вартанов пымалiс люзь, и сы вылiсь дзулля ваöн визывтiс ньылöм. И вежöртана, что этö лудан местасö кадiсь-кадö сiя гыжьялiс.

IV

Пым гор вылас, шоныт пасьыс увтын ойсö чулöтöм бöрсянь асыв кежас Вартановлöн жарыс усис бöр. Дугдiс висьны юр, дугдiс зэлöтны-кынтны. Эта бöрсянь нем бы, натьтö, эз видз петны одззамоз удж вылö, кöбы... не синкымыс. Етша эшö, что этöн каднас луднытö сiя сiдз и эз дугды, а лудöм-гыжьялöм бöрсянь пондiс пыктыны. Но одззася лудöмыс и öнi эшö эз чулав. Нач мöднёж, — пыктытöнняс сiя öдззис лудны эшö одззася öддьöнжык.

Асывся бритчöм бöрсянь Вартанов вель дыр шонтiс пыкöса синкымсö электробритваись пымöдз шоналöм штепсельöн, а сёйтöнняс — пым чай заваркаöн. Мыччисьны кöдзытiнас пыкöса синнас сiя сё жö эз лысьт, и эта увья кынымкö лун сьöрна уджыс вылö эз петав.

Гортын пукавтöн Вартанов весь эз ов, сiя сiйö и керис, веськöтчис. Этна луннэзö сiя унапöв шонтлiс пыкöса синкымсö лонтiсян гор да камин одзын, сы бердö жö пымöн кöртавлiс да видзис пöжалöм лук, бытшöма пывсьöтiс баняын. Но немись-нем колананёж мылякö эз отсав, и некытшöм прок эта веськöтчöмись эз вöв. Пыкöсыс, кыдз нарошно, эз ям, а быдмис сё одзлань. Куимöт лунас, баня понсяняс, асыв кежас Евгений Матвеевичлöн синыс и нач тупкасис. Лэбтiсьöм пыкöссянь янсалiс кытшöмкö лöзвевья ньывпу голи кодь гадь, кöда öшöтчис син весьтас да сайöвтiс сы весьтiсь аснас быдсöн чочком светсö. Эта Вартановöс медöддьöн и повзьöтiс. Но öткоста сiя жö мыччассис мыйöнкö топ тöдсаöн ни. И былись... Дыр мыйись думайтöм бöрсянь тöдвылас сылö усис, кыдз учöтнас, эшö школаын велöтчытöн, физкультура урок коста, кöр нiя быдсöн классöн ысласисö лыжаэз вылын керöс вывсянь, öтпырись, öтамöд сьöрын усьöм коста, кинлöнкö лыжа нырыс инмис казявтöг сылö тшöтш эта синкымö. Вывтi зубытыс этасянь и эз вöв. И вирыс дойдöм местасис уна тожö эз пет, сiдз кыдз ранаыс эз вöв ыджыт. Но повзьöтiс кö мый, дак медодз сiя лöз рöма голи кодь швавыс, кöда перыта лэбтiсис лыжа нырöн дойдöм местаас да сэтшöм жö перыта пöдналiс-сайöвтiс синсö.

Некытшöм одзланься ысласьöм йылiсь сiя лунö, вежöртана, и дума лоны эз вермы. Повзьöмувья горзöмöн-сорöн ковсис костi бертны чой вывсис классö. Но некытшöм врач дынö Вартанов эз ветлы. Чулалiсö кынымкö лун, и пыкöсыс ямис бöр. Неделя бöртi сыись и след некытшöм эз кольччы.

Öнöдз сiя кадсянь чулалiс не öтiк дас год. Этöн каднас сэкся доймылöмыс некыдз да немöн эз сетлы тöдны ас йывсис. Этасянь важын вöлöмыс йылiсь Евгений Матвеевич нач вунöтiс ни. И вот, на тэныт...

Вежöртана, что öнi, сэтшöм голиа сина чужöмöн, мыччасьны отир син одзö и эз вöв басöк. Но думайтны кö одзза сьöртi, дак позис надейтчыны, что кытшöмкö кад бöртi пыкöсыс ямас бöр. Эта увья перво жö Евгений Матвеевич врачыс дынö и эз мун.

Лун кыным сьöрна гортас пукалöм бöрсянь, сэтшöм голиа синöн сiя петiс и удж вылö. Но сiдз кыдз мыччасьны отир син одзын сэтшöмнас вöлi недолыт, кыдзкö ковсис сайласьны. Öнi Евгений Матвеевич юр вывсис шляпасö пондiс новйыны веськыт ладорсянь, кыдз позьö лажмытжыка веськыт син весьтас лэдзöмöн, кыдз бытьтö вöлi сэтшöм мода. Былись жö сiя дзир сайöвтiс сiдз ассис голиа синсö, кöда зэв ёна нёштöмтiс-тшыкöтiс сылiсь чужöмсö. Сiйöн жö öтпырись отир коласын Вартанов и юрсö вывлань кодьöн эз лэбтав, мунтöн-локтöн унажыксö вынсьöтчис видзöтны аслыс кок увтас. Но нельки сэк эшö сайöвтчыны быд тöдса и тöдтöм син шогья досповна эз позь. Сiйöн, кыдз гортiссез, сiдз и ёрттэз да матiсьжык тöдсаэз, кыным одзлань, сё частожык баитлiсö: «Мый жö тэ, кывзы, Женя (Евгений) томсянь сiдз лэдзчисян? Мыля враччез дынö öнiсянь он мун-мыччась? Этадз эд и калекаöн недыр кольччыны. Вдруг сысянь мыйкö эшö синыткöт неладно лоас... Мый сэк думайтан?»

Асьсö Евгений Матвеевичöс эта думаыс тожö полöтiс. Сiйöн неделя кык сьöрна весь видзчисьöм бöртi, кöр пыкöсыс ачыс сiдз бöр и эз ям, надейтчыны лоис нем вылö. Сэк вöлись, кытшöмкö лунö асывсянь, кыдз и пыр, шляпанас вевттисьöмöн да юрсö вывлань лэбтывтöг, Вартанов иньдöтчис глазнöй диспансерö, врач дынö.

V

Регистратураас, кытчö эта вотöдз Евгений Матвеевич некöр и öтпырись эшö эз вовлы, некытшöм очередь эз вöв. Вит-квать морт, кöдна ештöмöсь вöлi локны сы вотöдз, босьтöмöсь ни ассиныс карточкаэз да талоннэз и öнi пукалiсö просвевья вестибюльын, öтмöдöрсянь сулалан диваннэз да креслоэз вылын, видзчисисö ассиныс очередь.

Регистратура öшынок сайын пукалiс пöрисьвевья, нач сивмöм юрсиа, но ён эшö, шöрöт вывтыра, очкиа инька, нем керöмсянь видзöтiс одзас осьтöм книгаö — лыддьöтiс. Вартановыс сибöтчöм коста сiя вештыштiс книгасö бокö, здоровайтчöм бöрсянь юалiс:

— Тiянлö врач дынö?

— Да колiс бы...

— Карточканыт эм, абу?

— Абу, натьтö. Некöр эшö татöн эг вöвлы да...

Ас местас пукавтöн регистраторша бергöтчыштiс веськытлань, кöда ладорсянь стена бердö сувтöтöм «стенка» вылын вöлi меститöм картотека да куйлiсö карточкаэзлöн сöстöм бланкаэз. Кöр регистраторша нюжöтчис ны бердöдз кинас, сы морос вылын шульгаланьсянь оссьыштöм халат увтсянь тыдыштiсö Вартанов син одзын кынымкö ряд орденскöй планкаэз. «Фронтовичка, сiдзкö, ветеран. Важын ни, натьтö, сизимдас саяс, а сiйö сё эшö гортын оз пукöт, öнöдз уджалö», — дивуйтчöмöн думайтiс Евгений Матвеевич. Сы юасьöм вылö Вартанов, кыдз мамлö, кыдз велöтчись аслас велöтiсь одзын, вежöрöн юöртiс ассис фамиллё, ним, айним, чужан год, адрес да уджалан места.

Сёрöнжык, тыртöм карточкаöн да талонöн киас, Евгений Матвеевич нёджжöвтыштiс пöвсиннас быдöнныс ладорö, юалiс, кинлöн ны коласiсь витöт талон (аслас сылöн вöлi кватьöт) чöвтчис, казялiс öтiк диван вылiсь простöй пельöсок, сибöтчис, пуксис. А кöр нем керöмсянь видзöтöв-керис аслас талон вылö, печатайтöмöн гижöм «врач» кыв бöрсянь лыддьöтiс: «Левин В. И.» öтiк синыслö Вартанов перво жö эз верит, сiдз кыдз эта фамиллёыс сы понда вöлi нач видзчисьтöм. Сiйöн талон вылас петкöтöм фамиллёсö ковсис лыддьöтны эшö и мöдöтпыр, и куимöтпыр. Но нельки сэк некытшöм сорасьöм Евгений Матвеевич эстiсь эз адззы. Талон вылас врачлöн фамиллёыс и былись вöлi Левин, а инициаллэс сьöртi несьöкыт вöлi вежöртны, что шуöны сiйö Владимир Игнатьевичöн. Эд сiдз тшöтш и шувлiсö диспансерись главнöй врачöс... одзза годдэзö, джын годöн одзжык. А талун? Мед лоны сылö сэтшöмнас талуння виöдз, сымдасö Евгений Матвеевич нельки думайтны эз вермы. И висьтав сылö эта йылiсь кинкö тöдсаэз коласiсь, этаö сiя некöр бы эз и верит, «Не главнöй ни, батi, да?.. Сiдз, натьтö, рядовöйöн только кольччис, вермис дак. Кöть быдöс бöрсянь и сэтшöмнас лонытö эз ни вермы. Мый жö бы, интересно, сiя этö или не?» — думайтiс Вартанов. Тöдны сылö сымдасö обязательно колiс и колiс не простöй любопытствоись.

Мед не жугдыны весись юр, кытшöмкö кадö Евгений Матвеевич сувтiс бöр, оськöв бöрын оськöв, вились сибöтчис öшынок дынас.

— Извинитö, пожалуйста. Кин менö примитас, кытшöм врач?

— Дак тiян жö талон выланыт гижöм. Или од чайтчö лыддьöтнытö?

Регистраторша дышöтчытöг калькöтiс книга бердiсь синнэсö, лöсьöтыштiс ныр вылас очкиэз.

— Левин топ кытшöмкö... — нарочитöя горöтчис Вартанов.

— Мыля жö кытшöмкö, гражданин Вартанов? Не кытшöмкö, а диспансерись главнöй врач, Левин Владимир Игнатьевич. Некöр я мый я, городас овтöн, сэтшöмыс йылiсь эд кывлö?

— Да мыля?.. Кывлi жö...

— Дак мый нö сэк юасят?

— Ме думайтi, сiя оз ни татöн уджав.

— Интересно, — дзик ловзьыштiс, дивуйтчöмöн горöтчис одзлань регистраторша. — Мыйсянь тi сiдз думайтiт? Мыля сiя, ас морт, том да тöдiсь специалист, татöн оз ни уджав?

Эта вопрос одзын Вартанов баснисис öшис кодь. Причинасö, мыля сiдз думайтiс главнöй врач йылiсь, сiя тöдiс бытшöма. Но висьтавны эта йылiсь веськыта орденскöй планкаэза регистраторшалö эз лысьт, одзлань ни и кылiс, и вежöртiс — казявтöг ештас обидитны. Эта местаö, мый медодз кыв вылас инмис, сiйö паныт и горöтчис:

— Кывсьывлiс, бытьтö бы мунны татiсь лöсьöтчö...

— Но этö тi весь, гражданин Вартанов, сы йылiсь сымдасö. Мымда ме тöда öтлаын уджавтöн, дак Владимир Игнатьевичлöн и дума некöр сэтшöмыс эз вöв, мед мунны гортiсь кытчöкö мöдiклаö. Немöн сiя сэтшöммес вылö оз вачкись, кöдна горт мöдöрись бытшöм местаэсö кошшöны. Бöбöтчанаö тi кинсянькö юöрсö кылöмöсь.

— Сiдз, батi, — пельпоннэзнас жмитыштöмöн шыасис паныт Вартанов. — Извинитö сэк, пожалуйста.

— Пожалуйста, — дженытика шыасис регистраторша Вартанов кыввез вылö, вились вештыштiс матöжык асланяс осьтöм книгасö, лэдзис очкиа синнэсö сы страница весьтö.

Евгений Матвеевич бертiс бöр аслас местаö, пуксис, лöньсис. Регистраторшакöт баснисянь кутöм недолытыс жагвыв чулалiс, а вот одззася дивуйтчöмыс — эз. Эта дивуйтчöм увья сы син одзын и сувтiс сiя, мый шогмис эстöн эшö нач неважын, чулалöм арö.

VI

Уна год сьöрна кыскöмöн строитöм бöрсянь мöймуся сёр арö больничнöй городокын, вöлиськö, вöлi кончитöм вит сувда виль лечебнöй корпус, видзчисьны кöдö городын олiсь отирыс мыдзисö ни. Öнi сiйö кольччис дзир шонтны. Эта понда котельнöйсянь виль корпус дынöдз колiс нюжöтны трасса, кöда пыр позис бы сетны пым ва.

Сувтöтöм проект сьöртi трассаыс водiс веськыта больничнöй городок кузя, кыдз сылö и колiс лоны. Веськыта вöлi унаöн матынжык, сiдзкö, и уджыс петiс бы донтöмжыка. Но эстöн виль трассаыскöт поперегасисö эшö сы вотöдз тэчöм уна мöдiк коммуникацияэз, гарйыны кöдна пыр колана траншеясö экскаваторöн чожа эз позь. Этадз сы вылö ковсис бы торкны уна кад, кöда строителлезлöн вексö оз тырмы. Эта увья нiя и бöрйисö мöдiк туй — кыскыны виль трассасö не веськыта, кыдз керöм проект, а кытшöлöн, ордчöн больничнöй городоккöт сулалан глазнöй диспансер территория кузя. И ась сiдз трассаыс нюжалiс куимись кузьжыка да сымдаись жö сувтiс донöнжыка, эта йылiсь мылякö некинлö эз думайтсьы. Эз думайт некин нельки сы йылiсь, что виль местаöт траншеясö гарйытöн гарйиссяс да тшыкöтсяс глазнöй диспансер гöгöрись пöрись парк, и эта бöрсянь сыись нельки след некытшöм оз кольччы.

Строителлезлöн бöрйöм туй, кöда кöсйис нюжöтны колана трассасö перытжыка, гленитчис не только больничнöй городокись администрациялö. Не етшажык сiя гленитчис и городiсь юралiссезлö. А сiя пöрись паркыс, кöда сюрис эта траншея увтö, быдöнныс понда вöлi да эз вöв. Сiдз лоис благословитöм виль проект, кöда сьöртi гажмöм строителлез и кутчисö удж бердö. Но...

Пöрись парк да сы одзланься судьба йылiсь öтiк морт Морт моз сё жö думайтiс. Эта вöлi глазнöй диспансерись главнöй врач, нач эшö том, а этасянь, кыдз челядёк, кöсыник вывтыра, устöм, тоштöм да кынöмтöм Владимир Игнатьевич Левин, кöда территория вылöт лöсьöтчисö кыскыны виль трассасö, но кöда йылiсь сылö, кыдз диспансерись администраторлö, мылякö некин нельки эз и казьмöт. И кöр трасса увтö траншеяыс вöлi вайöтöм глазнöй диспансерись ограда бердöдз, главнöй врач петiс строителлеслö паныт, висьталiс: «Одзлань дзир ме шой вывтi».

Пондöтöм уджыс сувтiс. Кынымкö лун сьöрна экскаватор, кыдз рапмöм вöв, хобот-нырнас му бердас сунгисьöмöн, сулалiс заводитлытöг. Эта коста сы местö пымавтöдз уджалiсö главнöй врач кабинетiсь ыбöс дзир да телефон. Строителлез — мастерсянь управляющöйöдз, а öтлаын ныкöт больничнöй городокись главнöй врач Михаил Антонович Гуляев аслас заммезкöт — асывсянь и лунтыр сьöрна талисö кöр öтамöд бöрсянь, а кöр быдöнныс öткоста Владимир Игнатьевич дынö туй. Вежöртана, что эта коста быдöнныс жö, кин кыдз кужис-вермис, корисö-кеймисö öтiкö, мед сiя дугдiс сорны-панлавны пондöтöм удж да лэдзис строителлесö гарйисьны одзлань. А гырись и поснит городскöй начальство орöттöг звонитiс телефонöт: полöтiсö, грöзитiсö, мыйöн позис и эз. Но Владимир Игнатьевич, кöда кывзiс быдöс этö корöм-кеймисьöм да полöтöм-грöзитчöмсö, мыччассис, сулалiс нач не эта грешнöй, а кытшöмкö мöдiк планета вылын и веритiс не этаö, а кытшöмкö нач мöдiк, дзир сылö öтнаслö вежöртана, истинаö. И кин да кыдз бы сылö эта коста эз грöзит, немись-нем сiйö эз повзьöт. Сiя, фанатик, одззамоз кольччис сулавны öтпырись сетöм кыв вылын. Нельки горкомовскöй да горисполкомовскöй ковёррез вылö кынымиськö корлöм бöрсянь кежöтны Владимир Игнатьевичöс аслас туй вылiсь некыдз эз вермö. И сэк этö вопроссö ковсис решайтны натодиль чукöртöм комиссия вылын.

Сiдз кыдз басниыс мунiс глазнöй диспансер гöгöрись пöрись парк да сы одзланься судьба йылiсь, эта комиссияö, öтлаын депутаттэзкöт да горком-горисполкомовскöй специалисттэзкöт, вöлi сюрöтöм и Евгений Матвеевич Вартанов, кыдз природа дозоритан городскöй обществоись представитель. А юралiс этöн комиссиянас ачыс горисполкомись председатель Аркадий Анатольевич Попов — аслас положеннё сьöртi веськыт да чорыт мывкыда партийнöй морт.

VII

Öнöдз эшö Евгений Матвеевич тöдвылын комиссиялöн сiя заседаннёыс, кöда вöлi чукöртöм горисполкомись председатель кабинетын ноябрь шöрöт числоэзö, павжун бöрсянь.

Причинасö, кöда увья глазнöй диспансерись главнöй врач сувтiс поперёг траншеялö, горисполкомись председатель тöдiс бытшöма. Но колана траншея сьöртi этö сiя лыддис, тыдалö, сэтшöм абутöмöн, что аслас басниын сы йылiсь нельки эз и касьтыв.

Председательыс кабинетö диспансерись главнöй врач пырис медбöрын, кöр комиссияись быдöс членнэз вöлiсö чукöртöмöсь ни да чöлöмöн пукалiсö стенаэз пöлöн лёдзöн сулалан стуллэз вылын. Сiйöн, кыдз только пöднассис Владимир Игнатьевич пырöм бöрын ыбöс, а ачыс сiя здоровайтчис негорöн быдöнныскöт да пуксис неылö пыранiн дынсянь, горисполкомись председатель пондöтiс:

— Беспрецедентнöй случай, ёрттэз! Этатшöм уджсö вермасö керны дзир нiя отирыс, кöдналö этася кернытö нем. Петö, что и миянлö тiянкöт сiдз жö. Сьöкыт висьтавны, мымда городскöй власттезлö ковсис пуктыны вын да кад, мед корны государстволiсь деньга, вермыны сюрöтны планö да строитны городын олiссез понда виль лечебнöй корпус. Но талун кежö сiя лэбтöм-сувтöтöм, мунö отделка.. И мед перытжыка сiйö лэдзны, мед ештыны вайöтны тöв кежö шоныт ва, кольччис кыскыны сы бердöдз котельнöйсянь трасса. Бöрья кадö эта вылö иньдöтöм строителлезлöн быдöс вын. И кин бы, ёрттэз, вермис думайтны, что кинкö миян коласiсь, кöда вежöртö миянлiсь öтласа нужда, сувтас эталö паныт? Но, к сожалению, оказывается, эмöсь, миян коласын и сэтшöмöсь, кöдна самöй ответственнöй, самöй решающöй моментö сюйöны колесоэзö палкаэз, дзугöны пондöтöм удж. Öтiк сэтшöм морт пукалö талун и миян коласын. — Чöлыштöм коста председатель нёджжöвтыштiс быдöнныс ладорö. А кöр казялiс пыранiн дынсис диспансерись главнöй врачöс, аслас пызан сайсянь тшöканас сылань öтпырись öвтыштöмöн дзик горöтчис: вот пö сiя, вермат тöдсасьны, а горöн одзлань висьталiс: — Этö глазнöй диспансерись главнöй врач, Левин, кажется, фамиллёыс, Василий Иванович.

— Владимир Игнатьевич, — веськöтiс негорöн кинкö комиссияись членнэз коласiсь председательлiсь сорасьöмöн горöтчöм кыввесö.

— Сiдз, батi, ог тöд бытшöма, — согласитчис председатель, боксянь висьталöмсö сэтöн жö вунöтчис бöр, одзлань баитiс: — Ог тöд нельки, кин сiйö эта должность вылö сувтöтiс. Ме вотöдз эшö, тыдалö, эта ошибкаыс шогмис. Но не сыын, ёрттэз, талун делоыс. Эта йылiсь, надейтча, ми сёрöнжык кöркö баитам. А талун вот мый. Кинлö бы, кыдз не врачлö, былись кö сiя лыддьö асьсö сэтшöмнас, не вежöртны, мый öддьöна талун колö миянлö виль лечебнöй корпус. Но думайтны кö сы действиеэз сьöртi, дак сымдасö некöр он висьтав. Этö сiя, ёрттэз, неделяöн одзжык сувтöтiс экскаватор, мед только не сетны гарйыны диспансер территория кузя трасса увтö траншея. Сы увья талуння виöдз сулалöны уджтöг строителлез. Сы увья весись чулалö кад. Сы увья ми вермам не ештыны кончитны аскадö колана удж. Сы увья жö талун ковсис чукöртны этчö тiянöс, мед сетны оценка этна партизанскöй действиеэзлö да сувтöтны асьсö диспансерись врачсö колана местаö.

Чöлöмöн да вöрöтчытöг, кыдз и быдöнныс, пукалiс диспансерись главнöй врач председатель басни коста, нельки синнэсö некин вылö кодьöн эз лэбтыв. Этасянь, натьтö, и мыччассис сiдз, бытьтö быдöнныс син одзын винитöмыс сiйö сэтчöдз личкис-нырыштiс, что дорйисьöм могись паныта кывнас сiя оз ни адззись. Эта увья главнöй врач öнi и вынсьöтчис мыччавны, бытьтö басниыс мунö нач не сы йылiсь. Нельки сэк, кöр председатель баитнытö дугдiс ни, ассис охотасö — то ли согласитчыны быдöс висьталöмыскöт, то ли решительнöя сувтны сылö паныт — диспансерись главнöй врач немöн эз мыччав. Этасянь нем эз видз думайтны и сiдз, бытьтö ас йывсис сэтшöм небасöк баснисö сiя нельки эз кыв да эз вежöрт. Быдöс местаö, мый эта кадö видзчисисö сысянь быдöнныс, сайöвтöм могись ловшысö падмöтышалöмöн, Владимир Игнатьевич, дзик мыдзöм понсянь, дзир öтпырись ловзисис ыш, лэбтыштiс некин вылö синнэсö, ас кежас мыйлöкö дивуйтчöмсянь невынöн пыркнитiс юрнас и эстöн пыркнитöмнас бытьтö горöтчис: «Видзöт тэ, мый сэтöн керсьö.»

Чöлöмыс кыссис дырöв. Сiйö дзугöм могись городскöй больницаись главнöй врач Михаил Антонович Гуляев, кöда пукалiс паныт аслас коллегакöт да, натьтö, медöддьöн видзчисис сысянь ас понда колана баснисö, кытшöмкö кадö кыскис чышьянок, вайöтыштiс сiйö мыйсянькö вазьыштöм синнэс бердö, голосöн, кöдöн не дойдны, не лöгöтны öддьöнжыксö эз ни позь, горöтчис:

— Владимир Игнатьевич, былись эд, голубчик, сiдз петö. Тi жö, коллега, адззат, кытшöм миян положеннёыс, вежöртат, кытшöм миян дзескыт быд отделеннёын. Травматологическöяс талун койкаэс нельки коридорын сулалöны. А родильнöйыс йылiсь дак и баитны нем. Сiя миян не öтiк год сьöрна ни подвальнöй, позьö шуны, помещеннёын ютитчö. Меным мыйкö оз и веритсьы, мед тi, коллега, сымдасö эд вежöртö.

Эта вотöдз диспансерись главнöй врач, тыдалö, эз ни надейтчы сы вылö, что эстöн сылö вермасö сетны кыв баитны, то ли сiя вöлi обидитöм ни сыöддьöн, что нельки корнытö сiйö эз понды. Пуксöн да шляпа полеэсö чуннес коласын нöиттöн, паныт висьталiс:

— Ме вежöрта, Михаил Анатольевич, тiянлiсь положеннёсö и виль корпус лэдзöмсö немымда ог видз. Лоа нельки рад тiян понда, лэдзат кö тi сiйö аскадö. И трасса увтö траншеясö гарйыны немымда ог мешайт. Гарйö, пожалуйста. Кöть öтiк лунöн, вермат дак, нюжöтö, только не диспансерыс территория кузя.

— Здрассс, — пон моз дразнитöмöн перыта фыркнитiс сэтöн городскöй архитектор Сталина Иосифовна. — Кыдз этö не диспансерыс территория кузя, кöр миян трассаыс сiдз проектируйтöма. Миян жö проектнöй документация эта вылö эм.

— Абу эд, Сталина Иосифовна,.. — панöвтiс Владимир Игнатьевич архитекторлiсь баснисö, — ...сiдз кыдз диспансерыс администрациякöт эта вопросыс абу согласуйтöм. Эд вöв сiя тiян согласуйтöм аскадö, дак öнi этадз строителлес эз бы и сулалö.

— Вот эшö... Сы понда тi öнi быдöнныслö паныт и ордалат?

— В принципе — да, сы понда, сiдз кыдз öддьöн нечистоплотнöя уджалат.

— А тiянлö-ту, Владимир Игнатьевич, кытшöм разница, кыдз ми уджалам, вермам кö ми этадз перытжыка трассасö нюжöтны? — Этö юалiс строительнöй организацияись управляющöй Степан Петрович Буров.

— А сэтшöм, Степан Петрович, что тi асланыт липовöй проект сьöртi лöсьöтчат нюжöтны трассасö диспансер гöгöрись пöрись парк кузя, кöдаись трассасö нюжöтöм бöрсянь и след некытшöм оз кольччы.

— Подумаешь, мый понда адззöм горзыны. Парксис, видзöт тэ, след сылö оз кольччы, — горöтчис местасянь председатель. — Колö думайтны, мый талун донажык отирыс понда. А вит сувда лечебнöй корпуссö, кöда колö городiсь быд мортлö, долонь пасьтышта паркыскöт ордчöн сё ни он сувтöт. Сэтчö жö сiйö нем оз видз и мöдпöв садитны, кöр трассаыс лоас нюжöтöм.

— Лечебнöй корпусыс паркыслö немöн оз мешайт, и сувтöтны нiйö ордчöн öтамöдкöт нач нем вылö, — панöвтiс Владимир Игнатьевич. — Басниыс мунö парк да траншея йылiсь. И эстöн колö висьтавны, что траншеяныт тiян паркыс сьöртöт нем оз сулав.

— Но эд траншеяыс, в конце концов, колö не ас пондасис, кыдз траншея, а сiя жö лечебнöй корпус понда, — поперегалiс Владимир Игнатьевичлiсь баснисö Степан Петрович. — Кыдз бытьтö тi, образованнöй морт, сымдасö од вежöртö?

Этатшöм стыдитöмсянь Владимир Игнатьевичлö и горöтчынытö топ нем эз ни кольччы. Но сiя и öнi эшö паныт висьталiс:

— Что трассаыс да траншеяыс колöны лечебнöй корпус понда, этö ме вежöрта тiянся не умöльжыка. А вот мыйлö тiянлö колiс сувтöтны виль липовöй проект, мед, кыдз нарошно, кыскыны трассасö не тiян киэзöн садитöм парк кузя, этö ме, кыдз морт, и былись ог вежöрт. И не ме öтнам сэтшöмыс. Думайта, что и городын олiсь отирыс эстöн тiянöс тожö оз вежöртö.

VIII

Евгений Матвеевич, кöда пукалiс сэтöн жö, быдöнныс коласын, некöдöрö кытчöдз эз баит. Сiя кывзiс да думайтiс ас кежас. Вежöртана, что сылö, кыдз природа дозоритан обществоись представительлö, тшыкöтны глазнöй диспансер гöгöрись пöрись парксö вöлi жаль. Эд мед быдтыны сiйö сэтшöмнас мöдöтпырись, эта понда вились ковсяс джын век. Думайтны жö мöдöрсянь, дак не гарйыны траншея да не нюжöтны трассасö виль лечебнöй корпус дынö тожö некыдз эз позь.

Быдöнныслiсь баснисö кывзöм бöрсянь Евгений Матвеевич вежöртiс ни, что комиссияись быдöс членнэз сувтасö траншея дор. Да и позис я эстöн чукöртчöм отирсянь видзчисьны мыйкö мöдiкö, кöр быдöнныслö, кыдз öтiк мортлö, дзир сiя и колiс. Пöрись парк дор жö кольччис öтнас диспансерись главнöй врач. И думайтны, кöда ладорын лоас вын, öнi эз ни ковсьы. Эта вöлi вежöртана одзлань ни. Öнi ковсис думайтны, мый видзчисьö сiйö, кöда сувтiс быдöнныслö паныт. Евгений Матвеевич вежöртiс, что диспансерись главнöй врачлö паныт чукöртöм вын бергöтас вужжес сорöн не только пöрись парксö, но и сы дор сулалiсь мортлiсь олансö. Эта кузя, кöр сiя кынымиськö дженытика нёджжöвтыштiс матын пыранiн дынсянь пукалiсь öткаса морт ладорö, сы йылiсь жö ас кежас думайтiс: «Жаль меным тэнö. Не буржык я согласитчыны? Сё ни эд миян нёж оз ло. Нюжöтны виль больничнöй корпус дынöдз трассасö сё ни ковсяс. И тэ нiйö немöн он падмöт, дзир ассит олантö пыр кежö эта увья тшыкöтан».

Вежöртана, что кывны Евгений Матвеевичлiсь сэкся думаэсö диспансерись главнöй врач эз вермы. То öтiккöт, то мöдiккöт, а висьтавны веськытжыка — быдöнныскöт öткоста спориттöн, сiя одззамоз чорыта сулалiс аслас убежденнё вылын.

Бöртiжык, кöр быдöнныс тöдчöмöн мыдзисö ни эта конечтöм спорын, а бергöтöны ас ладорö глазнöй диспансерись главнöй врачöс сiдз и эз вермö, ачыс жö председательыс висьталiс:

— Тырмас, ёрттэз! Пондам голосуйтны. Талуння протокол сьöртi лоас примитöм решеннё и сулöтны колана удж сэсся, думайта, ог пондö. Виль год пондöтчытöдз лечебнöй корпус должен лоны лэдзöм. А сы вылö, — эстöн председатель кыдз абутöм тор вылö öвтыштiс кинас диспансерись главнöй врач вылö, — видзöтны сэсся ог пондö. Кöр вештас ас кармансис строителлесö сулöтöм понда, сэк, думайта, не только вежöртас, кин эстöн прав, кин виноват, но и аслыс ачыс нерад лоас.

Владимир Игнатьевич кывзiс. Но председательлiсь грöзитчöмсö сiя, вачкисис, и öнi эшö нем туйö эз пукты. Позис думайтны, что эта сы пельшы бердöдз эз и сибав. Öнöдз сiя, натьтö, вежöртiс ни, мыйöн кончитчас сы понда голосуйтöм, но ассис полöмсö да öшöмсö, кöдналö колiс бы лоны эта коста, и кöдна сы пытшкын, натьтö, и былись вöлiсö, сiя и öнi эшö некыдз эз мыччав. Дзир одззамоз ас кежас кытшöмкö дивуйтчöмсянь Владимир Игнатьевич öтпырись да невынöн юрнас пыркнитöмöн горöтчис:

— Думайтны эд только, мый керсьö.

Евгений Матвеевич, кöда жалейтöм могись кадiсь кадö сё эшö дзарышалiс диспансерись томыник главнöй врач ладорö, сы коста жö ас кежас думайтiс: «Мый вылö эшö сiя надейтчö?» Думанас Вартанов öддьöнжыксö и öнi эшö вöлi сы дор, но öткоста бытшöма вежöртiс, что главнöй врач дор сылöн сувтöмыс нем оз ни веж. Сiя дзир öддьöнжык лöгöтас быдöннысö да öзтас одзланься спор, кöдасянь öнöдз быдöнныс мыдзисö ни. Сiйöн сувтöтны асьсö öтлаын диспансерись главнöй врачкöт паныт быдöнныслö Евгений Матвеевич эз ни понды.

И кöр председатель корис голосуйтны аслас предложеннё понда, Вартанов лэбтiс кисö быдöнныскöт öтлаын.

Паныт эталö диспансерись главнöй врачся голосуйтнытö кольччис некинлö. Сэк вöлись, öтнас лэбтöм ки сьöрö, сiя дзик сьöвзис быдöнныс чужöмö, горöтчис:

— Ме паныт. Сiдзкö, парк весьтат траншеясö гарьят дзир ме шой вывтi.

Öтвыв голосуйтöм бöрсянь главнöй врачлiсь кыввесö быдöнныс примитiсö не унажык, кыдз абутöмкодь, нем туйö пуктана фарисейство местö, мыйсянь и споритны сыкöт одзлань некин эз понды. Быдöнныс ас понда лыддисö вопроссö решитöмöн и öнi дзир шыннялыштлiсö чöлöмöн öтамöд коласын: ась пö, мый пö тэ сылiсь, фанатикыслiсь, босьтан.

А эта коста Владимир Игнатьевич сувтiс, оськöвтiс петанiн ладорö. И кöр кутчисис ни öтiк кинас ыбöс вуг бердö, то ли быдöнныс вылын паныт издевайтчöм, то ли дразнитöм, то ли грöзитöм могись (вежöртны сымдасö вöлi сьöкыт) горöтчис: «Адззисьлытöдз сэк» да сiйöн сорöн и сайöвтчис быдöнныс син одзись ыбöс коласас.

Кöр пöднассис диспансерись главнöй врач бöрын ыбöс, Евгений Матвеевич, вöлиськö, и кылiс, и вежöртiс, что сы неважынся голосуйтöм да сы ылöс коласын мыйкö оз йитсьы. Недолыт вöлi кыдз диспансерись главнöй врач одзын, кöда властьлöн молот да наковальня коласын кольччис дзир öтнас, недолыт вöлi сiдз жö и ас совесть одзын. Сэк сiя тэрмасис сайöвтчыны быдöнныс син шогья, а быдöс лоöмыс йылiсь вынсьöтчыны не думайтны, сiдз кыдз бергöтны керöмсö бöр öнi эз ни позь.

IX

Сэкся недолытыс мыйкö дырна эшö и видзсис Вартанов тöдвылын, но быд берся коласын, кыдз письтöм чирей, жагвыв ямис, и кытшöмкö кадö дугдiс казьмöтлыны ас йывсис.

Виль год паныттэзö окружнöй газета страницаэз вылын мыччисис репортаж виль лечебнöй корпус лэдзöм йылiсь. Сэк кежö одззася недолытiсь Евгений Матвеевич ылöсын некытшöм след эз ни кольччы. Нельки ачыс диспансер гöгöрись пöрись парк да сы дор сулалiсь фанатик-врач, кöдна эта юöр кузя недыр кежö усьлiсö тöдвылö, чожа мый вунiсö бöр, кыдз бытьтö сэтшöммес некöр эз и вöвлö.

Висьтассяс эшö и сы йылiсь, что чулалöм кад коста сибавлыны больничнöй городокö Евгений Матвеевичлö кыдзкö эз усьлы. А мунны сэтчин натодиль, мед адззывны ас синöн, мый кольччис пöрись паркись трасса увтö сы кузя траншеясö гарйöм бöрсянь, охота кыдзкö эз вöв, сiдз кыдз быдöс этö Вартанов тöдiс одзлань ни. Эз тöд сiя сэкся кадö дзир öтiкö, сiйö, что диспансерись главнöй врачкöт, паныт кадлö, ась и не öтнас, ась быдöнныскöт öтлаын сiя лэбтiс ки, пантасьнытö оланас ковсяс эшö мöдöтпырись, пантасьны не просто сiдз, кыдз пантасьлöны тöдса отир улич вылöт мунтöн, кöр позьö бергöтчыны öтамöд увья мöдöрö, не шыасьны, не здоровайтчыны, мыччавны, бытьтö тöдса мортсö эн казяв да эн тöд, а пантасьны, кыдз баитсьö — оча син, колана могöн, кöр мöдöрö бергöтчынытö оз ни позь. Одзлань эта йылiсь кыдзкö эз думайтсьы. Зато öнi, кöр не ордйыны, не кежны эта пантасьöмись некöдöрö эз ни позь, сы одзын недолытыс да сылöн дзескöтöмыс Евгений Матвеевич ылöсын вынсялiсö сё öддьöнжык. Сiя öнöдз эшö эз тöд, кыдз, кытшöм синнэзöн пантасяс диспансерись главнöй врачкöт да мый сылö горöтчас. Но полöтiс не только эта. Эшö этася öддьöнжык Вартановöс полöтiс сiя, кыдз сiйö, быдöс сэкся вöлöмыс бöрсянь, панталас ачыс диспансерись главнöй врач, кытшöм синнэзöн видзöтас да кытшöм басни пондöтас. Öтiк эта гажтöмтан дума увья мездiсьöм могись Евгений Матвеевичлö охота вöлi öнi жö петны да мунны эстiсь бöр. О! Кытшöм бы гажöн, кытшöм кокнита этö сiя керис, эз кöбы сiйö видз эта коста лöз гадя синыс, видзöтнытö кöдöн нач эз ни позь.

Час сьöрна чулалöм кад коста куим-нёль морт врачыс дынö пыралiсö ни. Медбöрын, кöр сэтчинiсь петiс пöрисьвевья ни, галя кодь куш юра да нач сивмöм тоша старик, корисö и Вартанов бокын пукалiсь томыник нылочка-велöтчисьöс, кöдалöн вöлi витöт талон.

Диван пельöсас чöлöмöн пукавтöн Евгений Матвеевич, кынымöтпырись ни этöн каднас, нёджжöвтыштiс пöвсиннас аслас талон вылö, кытöн вöлi петкöтöм врачлöн тöдса фамиллёыс, сё жö дзескöтан недолытсянь ас кежас дивуйтчöмöн вились пыркнитiс юрнас: «Колö жö эд... Кыдз жö сiдз?.. Эд сылö сэк ни судöн грöзитiсö. А эта бöрсянь и виль лечебнöй корпуссö лэдзисö. Вермисö сё жö, сiдзкö, грöзитöмнаныс ас ладорö бергöтны. Не сiдз бы, дак важын ни бы, натьтö, эстöн эз вöв. А кыдз нö сэк пöрись паркыс? Мый сыись талун кежö кольччис?» Сэтöн жö Евгений Матвеевич нёджжöвтыштiс öткаса ладорö, но öшыныс петiс мöдöрö, и казявны сы пыр нем коланасö эз позь. Вартанов öнi жö мöдiс петавны öтöрöдз, мед дзар керыштны диспансер гöгöр, но кернытö сымдасö эз ни ешты. Сэк кежö оссис кабинетiсь ыбöс. Томыник нылочка-велöтчись, кöда пыралiс врачыс дынö Евгений Матвеевич одзын, петiс бöр. Сы бöрсянь, осьта ыбöс коласас, кынымöтпырись ни эта асылö, мыччисис годдэза, сьöд сина да сэтшöм жö синлыса-синкыма, шöрöт вывтыра сестра, кыдз кинлöкö гортiссез коласiсь тöдсалö юöртiс:

— Пырам кватьöт талонöн.

«Мый жö бы?.. Тöдас или оз? Мый сiя меным сэксяыс понда горöтчас? А, батi, эта нач не сiя ни врачыс? Батi, ме сiйö кыдзкö соралi? Вот бы бур вöлi, былись кö бы сiдз...» — Этöн лöньсьöтан думанас Вартанов сувтiс коккес вылö, оськöвтiс осьта ыбöс коласöт кабинет пытшкас.

Некытшöм сорасьöм, кöдö сыöддьöн видзчисис ассяняс да кöда вылö надейтчис Евгений Матвеевич, вежöртана, эз вöв. Кабинетас, пызан бердiсь стул вылын пукалiс тшöтш сiя, томыник, устöм, тоштöм, кынöмтöм да сивмытöм эшö кытчöдз, кöсыник да шöрöт вывтыра и этасянь öнöдз эшö студент вылö вачкисись, тöдса ни сэкся пантасьлöм бöрсянь глазнöй диспансерись главнöй врач Левин Владимир Игнатьевич, фамиллёыс да инициаллэс кöдалöн сулалiсö талон вылас. Этасянь ни Евгений Матвеевич паймыштiс. А сiя недолытсянь, кöда сiйö эз лэдзлы асывбыт сьöрна диван вылас пукавтöн, öнi Вартанов кылiс, кыдз пондö вежсьыны чужöм вылас да пымавны быдсöн вывтырнас. Но томыник врач, кöда сэк, быдöнныс коласын, горисполкомас мыччассис сэтшöм лöгöн, чорытöн да бытшкасянаöн, кыдз синнэзнас, сiдз и баснинас, топ петшöр нето жельнöг, талун сэксяыс вылö немöн эз ни вачкись. Эта одззаись немтор сыын эз ни тыдав. Эз позь казявны сы синнэзiсь да сы чужöмись и некытшöм мыдз да лöнь гажтöм, кöднö часто позьö пантавны кытшöмкö ыджыт обида нето сьöлöмшог коста. Нельки сiйö, тöдiс я главнöй врач Евгений Матвеевичын, кыдз пациентын, ассис неважынся да паныта сылö сулалiсь мортöс да казялiс я сыын саймöм öнi недолытсö, немöн эз мыччав и вежöртны сымдасö эз позь. Кыдз важся тöдсакöт гажвевйöн паныт здоровайтчöм бöрсянь сiя мыччалiс кинас аскöттяс паныт сулалан стул вылö. А кöр Вартанов пуксис, том врач, эшö кинас сибöтчытöдз, дивуйтчöмöн нёджжöвтыштiс сы öшöтчöм синкым вылö, сiдз жö дивуйтчöмöн юалiс:

— Охо! Мыйсянь бы эта тiян? Дойдiт кытчöкö?

— Да эг топ кыдз... Лудны мыйсянькö пондiс...

— И гыжьялiт, натьтö... Сiдз эд?

— Сiдз мымдакö.

— Кынтiсит кытöнкö?

— Вöлi сэтшöмыс.

— И баняын пывсьöтiт?

— Да.

— Вот этö весь. А дойдлiт кöр?

— Сэтчин гижöм ли мый ли? — дивуйтчöмöн юалiс Евгений Матвеевич паныт врачыс юасьöм вылö.

— Да гижöм вот. Эз бы вöв гижöм, дак сымдасö бы эг и юав.

— Важын ни эта, доктор, вöлi. Учöтнам эшö. Лыжаöн меным сэтчö инмылiсö.

— Вот сiйö вот ме и видзöта, что мыйкö эм. Зубыт, абу? — Эстöн врач мышкыртчис матöжык Вартанов син весьтö, первуись сибöтчис кинас лöз голиа синкым бердöдз, пешлiс сiйö, дзик полöмöн, небурика быд ладорсянь нырышавтöн.

— Не öддьöн сiдз.

— Терпитнытö позьö?

— Да позьö топ.

— А видзöтнытö оз мешайт?

— Мешайтö, доктор. Эз бы мешайт, дак и татчö бы эг лок. Да и кыдз сiйöн отирыс син одзын...

— Вежöрта, и отирыс син одзын абу басöк. Да-а, лёкьяй, лёкьяй. Сы дырна сiя тiян пукалiс, некыдз эз сет тöдны ас йывсис и вдруг — на тэныт — решитiс мыччисьны. Да-а. Но мый жö?.. Овлö. Овлö и сiдз. Кыдз миян оланас оз овлы, кöр берегитнытö асьнымöс ог кужö, — пондöтчис философствуйтны врач.

Эстöн ни, сы бöрья кыввезын, Вартанов кылiс ас понда мыйкö полöтанаö. Паймыштöм, сiя видзчисис ни, что одзлань мöдыс вот-вот горöтчас: «Вот и мекöт неважын тожö вöлi...» И мед только не кывны сымдасö, не сетны пондöтчыны эта неколана да недолыт сы понда баснилö, врачсö одзалöмöн Матвеевич юалiс:

— А бöр сiя, доктор, оз ни пуксьы?

— Оз, ме думайта, пывсьöтöмыс.

— А мый сэк сыкöт керны?

— Дзимлявны, натьтö, ковсяс, мешайтö кö, висьталат. — Эстöн врач дзар керыштiс аслас часыэз вылö, сестраыслiсь, кöда лöня сулалiс неылын ны дынсянь, юалiс:

— Кыным морт эшö, Надежда Михайловна, кольччис примитнытö?

— Эта бöрья. Некин сэсся сэтчин абу.

— Вот я бур, — шыасис врач сестраыс юöр вылö. — Мунö сэк, пожалуйста, операционнöйö да инструмент сэтчин лöсьöтö.

— Öнi жö?

— Да, пожалуйста, öнi жö, Надежда Михайловна. Талун миян операционнöй лун. Дасвит минута бöртi операция.

Сестраыс одзлань сэсся эз шыась. Сiя сы коста жö бергöтчис, оськöвтiс петанiн ладорö, ыбöс коласас саясис.

Сестраыс мунöм бöрсянь ни главнöй врач Вартановыслö одзлань юöртiс:

— Бур, что колана лунö инмит локнытö. Некытшöм очередь операцияэс вылö абу. Талун жö ми тiянлiсь этö лёкьяйсö и дзимлялам.

Колö висьтавны, что эта вотöдз Евгений Матвеевичлö некöр да некытшöм операция эшö эз керлö. И эта медодззаыс, кöда вылö сiя сюрис кыдзкö видзчисьтöг, кöр локтiс врачыс дынö дзир мыччасьöм могись, öнi сiйö невночка повзьöтiс. Но мед не казьмöтны эта йылiсь веськыта, врачыскöт öнöдз паныт пукавтöн, сiя юалiс:

— А некытшöм лöсьöтчöм, доктор, сэк кежö оз ков?

— Кытшöм эшö лöсьöтчöм, кöр колана лунö локтiт? Мешайтö жö, висьталат, лёкьяйыс тiянлö. А дзимлявнытö сiйö нем сьöкытыс абу. Не синаныт эд операцияыс и повны эстöн нач немись. Мунам часöт öтлаын, ме тiянöс кольлала.

Вестибюльсяняс ни нiя иньдöтчисö öтамöд сьöрын кытшöмкö бокись ыбöсö, кöда петкöтiс нiйö диспансерись коридорö. Этасянь вывлань кыссян лиснич кайöтiс мöдiк этажö. Операционнöй палатаö пыранiн одзын врач мыччалiс Вартановлö скамья, вылö.

— Видзчисьыштö эстöн недырик. Ме чожа берта, — горöтчис врач да кежис аслас кабинетö.

Öтнас кольччöм коста Евгений Матвеевич вились паймыштiс. Öнi вöлись, эта скамейка дорыш вылын пукавтöн, сiя и кылiс, кытшöм вынöн да перыта, дзик вель ылына подöн котöртöм бöрсянь, вартö сы моросын сьöлöм, а паськöм увтын вывтырыс пондö вевттисьны кытшöмкö нельки недолытöдз кöдзыт да нильыг ньылöмöн.

Бур кöть сiя ни, что видзчисьнытö эстöн дыр эз ковсьы. Кынымкö минута бöртi оссис операционнöй палатаись ыбöс, и сестра, ныр-öм весьтас марляись домалöм кöртöт пыр, горöтчис сылiсь фамиллёсö да кинас мыччалöмöн тшöктiс пырны ас сьöрас.

X

Кыдз бы Евгений Матвеевич эта вотöдз эз крепитчы, мед вермыны видзны асьсö, кыдз баитсьö, киын, петiс эта сылöн сё жö умöля. Операционнöй палатаись порогсö вуджöм бöрсянь, а батi, эшö этася одзжык, кыдз только сувтiс сестраыс корöм бöрсянь скамейка вывсис коккес вылö, нiя сылöн лоисö бытьтö ватаовöйöсь и кывны ас увтсиныс краситöм джоджлiсь чорытсö дугдiсö. Эз кыв Вартанов бытшöма и врачлiсь да сестралiсь ас коласын баитöм, пеллес пондiсö мыччассьыны тупкалöмöн.

Кöдзыт операционнöй пызан вывсяняс ни, кöда сулалiс палата шöрас да кöда вылö мыччалöмöн сiйö тшöктiсö водны, Евгений Матвеевич сё жö эз вунöт казьмöтны сы йылiсь, что аслас слабöй нерваэз увья вир вылö сiя видзöтны оз вермы и юр дикмöмсянь вермас усьны. Сестраэз моз жö кöртасьöм чужöма главнöй врач оськöвтiс сэк матöжык Вартанов дынö, пель одзас паныт шыасис:

— Эд полö. Эстöн тi вирсö одö адззылö. Да и усьнытö, пызан вылас куйлытöн, тiянлö некытчö ни.

Эта шутитыштöм сьöртi Евгений Матвеевич вежöртiс, что главнöй врач одззамоз бытшöм настроеннёын. А эта и сiйö невночка тожö лöньсьöтiс.

Кыдз усис вежöртны сёрöнжык, повнытö и былись вöлöм немись. Кöр Евгений Матвеевич водiс гатш, кыдз и висьталiсö, паськыт, чорыт да кöдзытвевья операционнöй пызан вылö, сэтöн жö сылiсь синнэсö кöрталiсö. А колана местаö, пыкöса синкым гöгöрас, керисö кынымкö укол и главнöй врач кутчисис аслас удж бердö.

Евгений Матвеевич, кöдалöн неважынся полöмыс и öнöдз эшö быдсöн эз чулав, сё эшö видзчисис скальпель увтын зубытлiсь сибалöм. А эта местö сiя дзир кылiс карандаш йылöн синкым весьтöт чуть кылöмöн чиркнитöм. Сiдз жö чиркайтöм увтын одзлань пондiс кывны, кыдз мыйкö няжйышалö да янсалö жагвыв сы синкым бердiсь сiдз жö, кыдз вермас янсавны ныж пурт дорыш увтын кучик бердiсь гос. Кылiс эшö и сiя, кыдз скальпель увтсянь кöсича весьтöт пеляс, кöр вотялiс, а мукöд коста нельки визывтiс неыджыт шорокöн мыйкö кöдзыт, кöдö Евгений Матвеевич примитiс ва местö.

Мый мыччассис умöльöн, дак этö сiя, что операцияыс кыссис öддьöн дыр. Этöн каднас, куйлыны вöрöтчытöг да öтiк положеннёын, Вартанов нельки мыдзис. Ас кежас öнi сiя жалейтiс кад, кöдö сымда ковсис öштыны эта некодя швав-пыкöс кузя не только сылö аслыс, но и диспансерись главнöй врачлö, кöда керис операциясö, да сестраэзлö, кöдна сылö отсалiсö. Мый вöлi бурыс, мый тöдчöмöн лöньсьöтiс сылiсь одззася полöмсö, дак этö сiя, что быдсöн операция коста некытшöм зубыт эз кыв.

Кöр быдöс коланаыс вöлi керöм, сэк вöлись кольччöм ранасö вурисö да клеитiсö мöдiккез ни. А кöр Евгений Матвеевич сувтiс коккес вылö, сэк Владимир Игнатьевич дивуйтчöмöн юöртiс:

— Эг и думайт, что сымда вирыс петас. Пондас кö юрныт бергöтчыны, дак коридорас шоччисьыштат.

Öнi вöлись Евгений Матвеевич сорасьтöг вежöртiс, что сiя, мый сэтшöм убеждённöя сiя примитiс одзжык ва местö, вöлöм, сiдзкö, не ва, а аслас жö вирыс. Но сiдз кыдз не адззывны сiйö сэк, не казявны кыськö öнi сiдз и эз усь, эта сiйö öддьöнсö эз ни полöт. Сэтчö жö, кöр Вартанов сибöтчис сувттöнняс коккезнас джодж бердö, сылiсь чорытсö ны увтын кылiс бытшöма. Медöддьöн жö Евгений Матвеевичöс гажöтiс сiя, что веськыт синыс, кöда операцияыс вотöдз вöлi дзебöм-сайöвтöм, кыдз горпöдан сайын да видзöтнытö кöдöн нем эз ни позь, öнi оссис бöр да вились пондiс адззыны.

— А ранасö немöн оз ков каттьыны?

— Абу сiя ыджыт да и клеитöм вевдöрсяняс. А каттьынытö нем вылö. Вöрöтны дзир лун кыным сьöрна оз ков.

— И ветлöтны сiдз позяс?

— Нем, натьтö, оз видз.

— Спасибо, доктор, ыджытö.

— На здоровье.

Сестра кольлалöм увтын Евгений Матвеевич иньдöтчис операционнöй палатаись петанiн ладорö. И сiдз кыдз юрлiсь некытшöм бергöтчöм эта коста эз казяв, не сувтчыны, не пуксьыны кытчöкö шоччисьöм могись эз ни пондыв.

XI

Погоддяыс сiя лунö асывсянь сулалiс мича, югыт да гора. А луншöр кежас, кöр вылына лэбтiсьöм шондi югöррез увтын шоналiсö руда лым увтiсь кушамöм му, гöгöр лоис шоныт.

Глазнöй диспансерись Евгений Матвеевич петiс лэбтiсьыштöм ни ни операция бöрсянь гажа настроеннёын. Кутöм гажсянь медперво сiя нельки эз и тöд, мый пондыны керны одзлань. Сiйöн сiя сувтчыштiс диспансерö пыранiн одзись лажмытик да тöвзьöм ни öнöдз и этасянь кöс поспуэз вылö, синнэсö ёрöмсянь лэдзыштiс ны весьтö шляпасö, гажа шынньöлöн чужöм вылас нёджжасьöв-керис ас гöгöр. Но кöр Вартановлö син вылас усис улица мöдöрись вит сувда виль лечебнöй корпус, сiя сэтöн жö уськöтiс тöдвылö и пöрись парк, и сы пыр кыскöм траншеясö. Плащ карманнэзö сюйöм киэзöн Евгений Матвеевич оськöвтiс увлань, иньдöтчис кушамöм ни сэк кежö да тöвзьöм пуовöй тротуаррез кузя, мед петны улица вылö.

Диспансер пельöс сайын ни Вартанов син вылö усис ордчöн тротуарыскöт кыссян важынсянь тöдса пуовöй забор, кöда, тыдалö, одзза гожумö вöлöм краситöм голубöй рöмöн. Но дивуйтiс Вартановöс эстöн медодз сiя, что заборыс пельöссянь пельöсöдз вöлi одззакодь дзонь, некытшöм разьöм нето разьлöм да вочöм некытöн эз тыдав. Меддивуйтанаыс жö Евгений Матвеевич син одзын оссис сiя, что заборыс кодь жö дзонь вöлi и ачыс сы сайись пöрись паркыс, адззывны кöдö сэтшöмнас Вартанов некöр эз ни надейтчы. Кыдз лиственницаэзлöн дорись лёдз, сiдз и сы сайын шочыника садитöм пемыт лыса сыспуэз да сэтшöм жö пемыт листа сирпуэз сулалiсö, кыдз нiя сулалiсö эстöн джын век сьöрна. Нельки ны увтiсь шочыник туруна лудыс, кöда лым увтсис тожö вöлi мыччисьöм ни, некыт да немöн эз вöв вöрöтöм. И кытшöм бы эз вöв охота не веритны ас синнэзлö, керны сымдасö — не веритны кыкнан адззан синлö — некыдз эз позь, кöть, сэкся примитöм решеннё бöрсянь не аслыс пöрись паркыслö, не сы гöгöр сулалан пуовöй заборлö лонытö эстöн ловйöн да дзоньöн важын ни эз бы ков. Öтыслö ны коласiсь колiс лоны гарйöм-мöдöртöмöн вужжес сорöн, мöдыслö — разьöмöн-жугдомöн öтлаын столббескöт. Но нем сэтшöмыс нето сы вылö мыйöнкö вачкисянаыс Вартанов син одзын эз тыдав.

Сы коста жö паныт сулалан виль лечебнöй корпусыс, кöда вöлi лэдзöм виль год панытö да мый йылiсь сэтшöм гажöн юöртiсö асланыс репортажжезын окружнöй газета да радио — и былись уджалiс. И уджалiс, колö думайтны, не шоныттöг. Но мед вермыны веритны эталö не йöз баснисянь, Евгений Матвеевич дышöтчытöг вуджис улица мöдöрас, виль лечебнöй корпус дынö, сибöтчис пыранiн весьтöдз, кыт дугдывтöг ветлiсö öтмöдорö, кыдз кöдзыв, то шогалiсь отир, то враччез, сестраэз да няняэз — öтлаын быдöнныскöт пырис пытшкöдз. Сэтчин Вартанов кежис медодзза жö отопительнöй батарея дынö, сибöтчис сы бердö киэзнас. Батарея вöлi шоныт, нельки пым, и дивуйтны эта бöрсянь, что сiйö оз шонтö, некыдз эз позь.

Öтöрас Евгений Матвеевич эшö öтпыр бертiс бöр диспансер дынö, тшöтш сiя местаö, кытöн главнöй врач панöвтöмöн вöлi сувтöтöм экскаваторлöн гарйисьöм. Быдöс лоис вежöртана вöлись сэк, кöр сiя ас синнас казялiс, кыдз эта местасянь траншеяыс крута бергöтчис улицаыслö поперег, кöда сайын сулалiс виль лечебнöй корпусыс да лыддиссис, что гарйынытö сэт веськыта оз позь. Кын сорнас ни гарйöм да тыртöм бöр траншея весьтын тöвбытнас муыс пуксьынытö быдсöн эшö абу ештöм, гарйöм местаыс тöдчис бытшöма. «Сэтчöдз, петö, гарйынытö эз позь, кытчöдз эз понды кыдз колö ковсьыны. А кöр зэлöтiс колананёж — и позьöмыс адззисис. Сiдзкö, быдöс чулалiс бытшöма: и шонытыс виль лечебнöй корпусас вайöтöм, и диспансер гöгöрись пöрись паркыс дорйöм-сайöвтöм. Не весь, сiдзкö, главнöй врач сулалiс сы дор сэтшöм чорыта, бытшöма тöдiс да веритiс аслас правотаö, кöр, кыдз приговор, быдöнныслö висьталiс, что гарьясö дзир сы шой вывтi. Петанiныс, кыдз öнi тыдалiс ни, и сытöг адззисьöм.

Дзоньöн кольччöм пöрись паркыс медперво Евгений Матвеевичöс нельки гажöтiс. Но сэтöн жö траншея весьтас сулавтöн сылö тöдвылас усис сэкся предложеннё понда голосуйтöм, кöда бöрсянь эта пöрись паркись не дук, не след эз бы кольччы. И ась главнöй врачлö паныт сэкся голосуйтöмыс и вöлi сылöн не öтнаслöн, а быдöнныскöт öтласа, öнi этасянь Вартановлö кокнитжыкыс эз ни вöв, сiдз кыдз öнi ковсис думайтны не быдöнныс йылiсь, а медодз ас йывсис. И кöр сiя вежöртiс ассис сэтшöм стыдитана сорасьöм, лоис сэтшöм гажтöм сьöлöм вылын да недолыт ас одзын, что видзöтны адззан синнэзнас чочком светыс вылö охота öшис. Сiйöн вывлань нiйö лэбтывтöг Евгений Матвеевич тэрмасьöмöн иньдöтчис эта местаись.

XII

Гажтöминсис сiя лунö Вартанов и пышшис-сайöвтчис. Но пышшыны-сайöвтчыны ас киння, ас пытшкын саймöм совесть киння, не сiя лунö, не сёрöнжык сiдз и эз вермы. Ловйöн кольччöм пöрись парк, кыдз медыджыт укор сы совестьлö, сiдз сэксянь и кольччис сулавны сы син одзын, сiдз вунтöг и олiс сы тöдвылын, не кежöтны, не сайöвтны кöдö немöн öнi сэтчинiсь эз ни позь.

Лунiсь лун аслас недолыткöт пессьöм коста Евгений Матвеевич думайтiс, что вöлi бы нельки буржык, ежели бы эта несчастнöй паркыс и былись вöлi гарйöм-бергöтöм вужжес сорöн, мед и след некытшöм сыись эз кольччы. Сэк кокнитжык бы вöлi кывзыны сы понда отирлiсь видöм, а öткоста ас вынöн: ас кадöн да ас киэзöн позис бы сiйö вились садитны бöр. Öнi жö, кöр главнöй врач пессьöмöн пöрись парк весьтiсь траншеяыс вöлi сё жö бергöтöм, нем полöтанаыс одзлань кежö лоны эз ни вермы. А вот врачыслö паныт голосуйтöмсянь вились саймöм недолытыс осьтны одзлань кежö синнэз да видзöтны повтöг чочком светыс вылö эз ни сет.

Эшö синыс дойман вотöдз Вартанов лöсьöтчис гижны окружнöй газетаö борда гöссезöс панталöм йылiсь статья, но кернытö сэк сымдасö эз ешты, сьöдракаэс одзалiсö. Нiя бертiсö гортö эшö статья гижтöдз. Чожа мый ны бöрсянь колiс видзчисьны сьöдкайезлiсь бертöм. И сёрмыны сэк кежö статьянас некыдз эз бы ков. Вот мый увья, операция вывсянь удж вылö бертöм бöртi, медперво Евгений Матвеевич эта удж бердö и кутчисис: сiя жö лунö пуксис пызан сайö, пуктiс одзас гижöт да шариковöй авторучка, пондiс думайтны. Но мымда бы сiя этадз эз пукав аслас пызан сайын, мымда эз мырсьы, эз жугды юрсö статьясö пондöтöм вылын, колана думаэс, мый йылiсь колiс гижны, эз локтö, колана кыввес эз адззисьö. А быдöс сысянь, что думайтсис Вартановлö нач не сы йылiсь, мый йылiсь колiс гижны. Чожа мый сiя и ачыс сымдасö вежöртiс.

Кöр Евгений Матвеевич видзöтiс öшын сайись бель видзан чочком вывтыра кыдззез вылö, кöдна лёмзьöм уввез коласын гажöн орсiс-шутнялiс зумыт да чож тöв, а ны коласын жö, горöн карзытöн, лэбалiсö öтмöдöрö да тэрмасьöмöн поздiсисö сьöдракаэз, сэк эшö кыдзкö думайтсис колана статья йылiсь. Но кыдз только усьлiс син вылö ордчöн этна кыдззезкöт джуджыта нюжалöм вывлань котельнöй труба, кöда лун и ой дугдывтöг чапкис ас гöгöр город весьтас дьöгöдь кодь сьöд тшын-са, кöдасянь сьöдöтлiс не только тавося лым, а нельки чочком гöна кань-поныс пöртчывлiсö руддэзö, Вартанов юрись статьяыс йылiсь думаэс öшлiсö. Нiйö дзик пöльтiс-нöбöтiс кытшöмкö тöв, а ны местö зорамисö нач мöдiкöсь.

Сiдз Евгений Матвеевич тöдвылö усис, кыдз сiя вит-квать годöн одзжык локтiс уджавны эта обществоö. Председательлöн должностьыс вöлi гижöт вылын, а этася нем: не уджалан места, не телефон, не счёт вылын деньга, не первичнöй организацияэз. Медперво нельки ачыс счётыс, кöда вылiсь позис бы босьтны зарплата, эз вöв. Медперво сiйö мыйöнкö колiс осьтны. Сы коста жö тöвся кадö городыс пöдiс котельнöйез тшынсянь, а гожумнас вöйис помойнöй ямаэзö да дзимлявтöм нять-ёгö, кöдö позис пантавны быд оськöв вылын не только город сайись, но и город шöрсис.

О! Кытшöм колана да бытшöм мечтаэзöн кутчисис Вартанов аслас удж бердö. Быдкодь литератураись, мый колö керны природа дозоритан обществоын, сымда-мымдасö сэктöдз сiя тöдiс ни. Этасянь и думайтсис сiдз, что колö дзир кутчисьны аслыс, не дышöтчыны думайтны, кыдз да мый керны буржыка. А кутчисьны кö, думайтöмыс сьöртi ни, быльнöй удж бердö, позяс вермыны керны быд берсясö.

Öтi-мöдiкö Вартанов и былись вермис. Кынымкö месяц сьöрна начальство пороггез дорын йирсьöм бöрсянь каморка кодь жыроксö, кытöн одзжык вöлöм то ли кытшöмкö кладовка, то ли чулан, сылö сё жö сетiсö. Ачыс ни сiя осьтiс городскöй общество вылö банкын счёт да пондiс зорöтны обществолiсь первичнöй организацияэз. А кöр чукöртчыштiс ны öктöм взноссэзiсь деньга, вöлiсö небöмöсь пызан да стуллэз, сувтöтöм эта каморкаö телефон.

Джын год бöртi, кöр быдöс коланаыс вöлi лöсьöтöм ни, позис кутчисьны удж бердö. Но не быд мероприятиесö Вартанов вермис нуöтны ачыс да ас вынöн. Мед вермыны керны мыйкö коланаö да тöдчанаö быдсöн город понда, решеннёсö колiс примитны городскöй власть вынöн. И мымда бы эстöн Вартанов эз мырсьы, этаись сылöн нем эз пет. Вöвлi, что одзлань сувтöтöм план сьöртi, кöр месяц, кöр кык-куим сьöрна, сiя öтнас, кыдз вермис, готовитлiс вопрос исполком вылö. Но мед сюрöтны сiйö заседаннёись повесткаö, ковсис ветлöтны да корны эшö сы дырна жö. А сiдз, кыдз колiс бы, кыдз сiя корис да тшöктiс, мылякö некöр эз пет. Исполком вылö вопроссэс тырмисö и сытöг. Эта увья Вартанов вопроссэзлö не кад, не места сэтчин эз адззись. Сiйöн и чулалiс одззамоз год бöрын год, а городлöн экологическöй состояннёыс буржыкöн эз ло: эз содö улицаэз вылын вились садитöм пуэз, а важ садитöммесö вийисö-талисö да кералiсö сё одззамоз. Одззамоз весöттöг чапкöм городскöй стоккез тшыкöтiсö город бердiсь пруд да ю. Эз чинö, а сё быдмисö да содiсö сы пытшкын да сы гöгöр быдкодь мусорöн кучаэз, кöдна эз дзимляссьö годiсь годö и лоисö сё гырисьжыкöсь да паськытжыкöсь.

Но мый бы быд берсяыс коласiсь тöдвылö эз усь, медöддьöн Вартановöс уджсис сорис, конечно жö, кыдз чудо, ловйöн кольччöм пöрись парк, паныт кöдалö сiя сэтшöм кокнита голосуйтiс öтлаын мöдiккезкöт. Öнi сiя, ловйöн кольччöмыс, сы син одзись некöдöрö эз ни вешшыв и тöдвылiсь эз вун. Сы увья нельки воштiсьнытö öнi вöлi некытчö. И сэк вöлись Евгений Матвеевич вежöртiс, что куньны эта вылö синнэз, проститны аслыс сымдасö, совестьыс сылö оз ни сет.

Куимöт лунас рытъявыв Вартанов вежöртiс, что некытшöм статья сылöн оз ни пет и мырсьыны эта вылын весись нем. Эта местö сiя гижис ассяняс заявленнё, мед мунны удж вылiсь.