Глава XIII

Шедны районöдз колхознöй транспорт вылын Таисья эз надейтчы. Сiйöн юасьны да кошшисьны, мыйкö гортсянь мунас или оз, эз и понды. Одз асывнас, кöр шондiыс вöлись лэбтiсис саймöм деревня весьтын, а отир вашöтiсö ыбö-вöрö пода, нывка петiс гортiсь. Деревнялöн мöд конецас, кыдз и баитчисö рытсяняс, сiя кежис зоотехник ордö.

Светлана вöлi кок вылас ни. Сiя сулалiс комод весьтö öшöтöм зеркало одзын, сынасис.

— Здравствуй, Таисья. Тэ мунан ни? — панталiс сiя нывкасö, босьтiс комод вылiсь лякавтöм конверт, оськöвтiс паныт. — Вот, нöбöт, пожалуйста. Эстöн быдöс гижöм. Верман лыддьöтны. Казялан кö мыйкö кольöмö, содты ачыт. Пырт да сет райкомас секретарьыслö. Эн вунöт.

— Мыля жö вунöта? — шыасис Таисья, письмонас ни петiс бöр.

Зоотехник кольлалiс нывкасö öтöрись посöдзöдз. А кöр мöдыс сюйыштiс письмосö сьöрас босьтöм сумкаö да лэдзчис поспуэз кузя, Светлана сьöрсяняс эшö горöтчис:

— Бур туй тэныт, Таисья. А куканнет понда эн пов. Ме нiйö часöт ачым лэдзала.

— Но, — дженытика шыасис Таисья, кöть эта кадö куканнес йылiсь эз ни думайт. Сылiсь паныта шыасьöмсö чожажык позис примитны бур туйсö вöрдöм понда.

Неыджыт сумкася, кытчö нывкаыс пуктiс зоотехниклiсь письмо да ассис (ковсяс кö мыйись мый) гöрдззöм кофта, сьöрас нем эз вöв. Мунны сэтшöм багажöн тöдса туй кузя несьöкыт. Но мед не меряйтны подöн эта кузя туйколас да не сёрмыны локны колана кадö школаö, колiс ештыны петны трасса вылö, вöр кыскалан автомашинаэз медодзза рейс кежö. Эта увья Таисья сыöддьöн и тэрмасис. Вöр коласöт мунтöн нывка öтпырись некöдöрö и дзар эз кер, лэбзис, дзик борддэз вылын, кытчö кокыс сибалiс, кытчö эз. Эз чулав и час мымда, кыдз öтмöдöрö чуклясян туй петкöтiс сiйö тöдса трасса дорö. Канава мöдöрсянь öдззöтчыштöмöн Таисья котöрöн кайыштiс джуджыта лэдзöм насыпь вылö, ловзисис быдсöн мороснас, нёджжасьöв-керис öтмöдöрö, кывзiсис.

Вöлi уджалан лун. Но некытшöм не тыра, не прос автомашина трасса вылын эз тыдав. Эз кыв нылöн некöдöрсянь и сибöтчöм. Кайисö я нiя öнöдз вывлань, вежöртны эз позь. Чорыт да кöс туй вылын некытшöм след эз тöдчы. Таисья тöдiс öтiкö — эмöсь кö вöрын машинаэз да пондасö кö лэдзчыны увдöрись складö, кыдз бы тэ подöн эн тэрмась, кöр-некöр сё ни вöтасö. Сiдзкö, и подöн мунöмыс лоас быдöс весь. Буржык вöлi видзчисьыштны.

Жаг оськöввезöн нывка кынымиськö муныштiс öтмöдö трасса дорöт, кежис бöр горт туйвеж ладорö, сувтöтiс сумкасö тöдса колода вылö, кöда быд мунiсь-локтiсьлö вöлi эстöн скамья туйö, пуксьыштiс.

Вöлi гажа да лöнь асыв. Лун кежö саймöтöм вöр олiс аслас оланöн. Трасса дорöт вель джуджыта лэбтiсьöм турун весьтын быркайтiсö бурöй да сьöд борда гырись бабыввез, кöдна матын деревня гöгöр мыччасьлöны нач шоча. То öтöрын, то мöдöрын, кöда горöнжык, кöда гусьöнжык, быдыс ас норов да настроеннё сьöртi, дзуртышалiсö-орсiсö кöбывкаэз. Ны весьтын руас öшавтöн, то öтöрö, то мöдöрö чепсасисö кынымкö юрсигусь — кошшисö аслыныс добыча. Матi колода весьтöт лэбавтöн кылiс нельки, кыдз кöса, тöв вылын орсöтчан симöт киль моз, силькöтыштлiсö нылöн зелёнöйкодь рöма шучкöп тыдалан борддэзныс. Не тулыссямоз ни вöрсö пöдтöмöн, но и öнi эшö горöн да гажöн сьылiсö гöгöр быдкодь поснит кайез. Кысянькö ылiсяньжык вöр колассяняс сибалiс кырлöн мыдзтöм стукöтчöм. Но эта стукöтчöмыс асывся лöньсö эз дзуг, а керис сiйö эшö ятнöйжыкöн.

Колода вылас шоччисьöм могись дас кыным минута сьöрна кад вöлi чулöтöм. Некöдöрсянь некытшöм машина эта коста эз мыччись. А нем керöмсянь эта кадыс мыччассис Таисьялö не öтiк час кузьöн. Пондiс думайтсьыны, что некытшöм машина вывланьын вöрас абу, и кадсö нывка öштö весь, кöд коста даскыным километр ылына позис бы мунны одзлань. Этна думаэз коласын Таисья чеччис бöр, дзик малыштiс, босьтiс ордчöн аскöттяс сувтöтöм сумка, вились петiс туй вылö, оськöв бöрын оськöв и кыным одзлань, сё перытжыка да перытжыка лэдзчисис мунны подöн, кыдз бытьтö час етшöн мöдiс ештыны сэтчин да бöр. Нельки вöрнас автомашинасö, кöда недыр мыйись мыччисис туйвеж весьтас да öнi локтiс сы сьöрö жö, тэрмасьтöнняс нывка медперво эз и кыв. И вöлись сэк, кöр ны коласын кольччис джын километра ылына, вына дизельлöн сьöкыт ноша увтын гугйöтлöмыс сё жö сибалiс сы пельшы бердöдз, Таисья перыта нёджжöвтiс бöрлань, казялiс, оськöввесö жагсьöтöмöн кежыштiс туй бокас, пондiс видзчисьны.

Машинаыс, кыдз нарошно, вöтiс керöс паныт и эта ыжда грузнас вермис бы и не сувтчыны. Но кöр Таисья полöмöнкодь öвтыштiс кинас, а öткоста дженытика нёджжöвтыштiс кабина ладорö, шофёрыс тыдалö, тöдiс, газсö чапкис. Руль саяс пукалiс сiя жö сьöд синкыма том зонкаыс, кöда неважын кайöтiс нiйö Галинакöт Мысва берег дорсянь горт туйвеж весьтöдз. Эталö нывка гажмыштiс: «Не нач кöть тöдтöм».

Оссис кабина ыбöсок. Шофёр гажвевйöн горöтчис:

— Бöра эд, тыдалö, пантасим.

— Пантасим тай. — Таисья судзöтчис ыбöс вугок бердöдз, сувтчыштiс кокнас натодиль öшöтöм стремянка вылö, кайис, пырис, кокнитика ляпкисьыштiс-пуксис сиденнё пельöс вылö, матöжык петанiн ладорö.

Горöн эрзыштiс пымалöм мотор: жагвыв вöрзисö одзлань.

— Думайтi Мысва дорöдззас ог ни вöт. Эг и мöд сувтчыны, — гажвевйöн юöртiс шофёр, вуджöтiс мöдiк скорость вылö.

— Сувтчин жö тай.

— Вöтi да кытчö нö воштiся? А эг бы вöт, дак эг бы и сувт.

Таисья шынньöвтiс зонкаыс шутитöм вылын, сэтöн жö думайтiс: «Ог и тöд, кöр мекöт медбöрьяись сэтшöмыс вöлi», — гажтöма ловзисис.

— Ылöдз я сiдз тшапитан? Ог и тöд, кыдз шуöны. Тöдсасьны да баитны быд берся йылiсь тöдтöм зонкакöт петiс полöм кодь. И вöлi бы унаöн буржык, чöлiс кöбы мöдыс шуч туй, мед только Мысва дорöдззас вайöтiс. Но висьтавны зонкаыслö веськыта эта йылiсь вöлi недолыт сiдз жö, кыдз и чöвны сы юасьöм вылö, сы кабинаын пукавтöн.

— Районöдз. А шуöны Таисьяöн.

— Видзöт тэ, кытшöм басöк, сырья-голькиа нимыт вöлöм, — шутка могись, а öткоста и дивуйтчöмöнмоз горöтчис шофёр. — А менö Володяöн, ковсяс кö мыйись-мый, — вежис передача да юöртiс одзлань зонка. — Вот и тöдсасим. Ог радейт, кöр ордчöн кабинаас тöдтöм отир пукалöны. И кыв горöтчыны некинкöт.

Эта, натьтö, и былись вöлi сiдз, но паныта кыввезнас Таисья эз адззись. Басниыс недырик кежö лöньсис. Паныт шедöм нырок весьтын зонка чапкис газ, нырыштыштiс тормознöй педаль вылö.

— Öтнат тай мыйкö талун?

— Кинкöт нö колö? — дивуйтчыштiс Таисья.

— А подругаыткöт, кöдакöт пыр öтлаын ветлiт?

— Галинаыскöт ли мый ли? — Сёрмыштöмöн казялiс нывка. — Велöтчиссис öтлаын. Велöтчаныс чулалiс и туйезным янсалiсö.

— Аха, — дзик мыйлöкö видзчисьтöмлö дивуйтчыштiс шофёр. — Кончитiт, петö, школасö. А кытöн нö мый сiя öнi керö?

— Гортын, колхозын уджалö.

— Одзлань велöтчынытö оз думайт?

— Оз, тыдалö. А мый?

— Да нем. Сiдз тай юалi. — Зонка чинтыштiс подсос — машинаыс тарöвтчис кырывлань. — Зонкаэс деревняаныт эмöсь-абу?

— Адззисясö сымда-мымдаыс, кинлö колас дак.

Эта вылын зонка вель дыр кежö лöньсис. А Таисья сы чöлöмлö нельки гажмыштiс. «Инмис жö, батя, кыдзкö машинаыс. Мысва дорöдззас бы дзир вайöт. А сэтчин ме и подöн котöрта». Нем керöмсянь гусьöн-пöлöн нывка пондiс нёджжасьны зонкаыс удж сьöрын. А мöдыс, аслас местаын пукавтöн, уджалiс киöн и кокöн дугдывтöг. То сiя мынöтлiс сцепленнёись муфта да вежлалiс передачаэз, то чинтлiс нето содтiс газ, то сетлiс ыджытжык подсос, то нырыштлiс торомознöй педаль вылö. А быдöс коста эз дугдыв видзöтны одзлань да бергöтышалiс öтмöдöрö сьöкытвевья руль. И автомашина кывзiсис. Аслас ноша увтын горöн ружтышавтöн, мукöд коста нельки сувтчышалöмöн, сiя кыссис керöссэз паныт, тöдчöмöн кокнитжыка тэрмасис волькыт местаэзöт, жагвыв да тарашитчöмöн лэдзчывлiс керöссэз увтö. «Нем он висьтав, прокмö». Нывка топ эз и казяв, кöд коста кольччисö бöрлань том да тшöк пожумаиннэз, гора кыдзовöй рассэз да вöрсö пöрöтöм-нöбöтöм бöрсянь гажтöмсялöм куш делянкаэз. Час етш бöртi автомашина локтiс Мысва ю бердiсь увдöр складö, сувтчис прос эстакада весьтö. Эстöн вöлись нывкалöн полöмыс чулалiс. Таисья нырыштчыштiс кинас вугок вылö.

— Спасибо.

— Нем понда, — кыдз важся тöдсалö, шыасис паныт шофёр, лэдзöм стекло местöт чапкис кусöтöм истöг, кöдасянь неважын öзтiс куритны. — Кöр гортö бöр лöсьöтчан?

— Талун жö. А мый? — шыасис нывка подножка вывсяняс ни.

— Да нем. Видзчисьыштны, мыся, батi, рытъявыв гöгöрас. Ме талун кык смена сьöрна öтдруг уджала.

Таисья öшыштiс. «Неумöль бы, натьтö, сiдз-ту вöлi, кöр надейтчынытö сэсся нем вылö. Да мыйö эшö сэтшöм мунöмыс сувтас?»

Сылiсь повзьыштöмсö зонка, тыдалö, казялiс, перыта содтiс:

— А тэ сы местö привет месянь ыджытжыкö подругаытлö сетан.

— Позьö, сiдз дак... — не öддьöн веськыта висьталiс Таисья, кокнита чеччöвтiс подножка вывсянь, судзöтчöмöн пöдныштiс кабина ыбöсок, кадсö öштытöг иньдöтчис котöрöн перевоз ладорö.

Ю мöдöрас километр етш ковсис котöртны подöн. А леспромхоз контора дынын, посёлокас ни, Таисья вились сюрис служебнöй автобус вылö, кöда öтлаын мöдiккезкöт вайöтiс сiйö посадöдз. Автобусыс сувтчис топ райком весьтас, и нывка перво жö сэтчö и кежис.

Приёмнöяс ни Таисья кыскис сумкасис лякавтöм конверт, нёджжасьöв-керис öтмöдöрись ыбöссэз ладорö. Сы юалöм вылö, позьö я адззывны Аркадий Николаевичöс, кыдз вöлi мыччалöм конверт вылас, годдэза ни, коричневöй платьеа да голя гöгöр чочком кружевнöй сикöджа и этасянь велöтчись вылö вачкисись инька, кöда сы пырöм бöрсянь лэбтыштiс юрсö печатайтчан машинка сайсянь, юöртiс:

— Абу сiя кытчöдз. Павжун бöрсянь вöлись лоас. — Дзар керыштiс Таисья киын письмо вылö. — Кольö письмонытö. Ме пырта.

Что письмоыс мыйкö увья вермас не сюрны колана мортлö, эстöн, райкомас, эта нывкаöс эз ни полöт. Но сiйöн, что конвертыс вöлi лякавтöм, а кольнытö сiйö колiс не веськыта адресатыслö, ас кежас думайтыштöм бöртi нывка бергöтiс сiйö бöр аслас сумкаö, дзар керыштiс кык öшын коласын öшалан часыэз вылö, кöдна мыччалiсö дасöтiкöт час. Нывка повзьыштiс. Эта кадö сылö колiс лоны школаын ни.

— Ме бöртiжык кежала, — юöртiс сiя инька-секретарьлö, бергöтчис да петiс бöр.

Этасянь школаöдззас эз ни вöв ылын: колiс дзир вуджны кынымкö тöдса улица.

«Мыйлö, интересно, менö сэтчин корöны?» — кынымöтчид ни письмосö босьтöм бöрсянь думайтiс Таисья, школа ладорö оськавтöн. Но тöдны одзлань юöрттöм причинасö нывка сiдз и эз ешты. Непаськыта вöвдöм пуовöй тротуаррез чожа мый вайöтiсö тöдса калитка дынö.

Невынöн татшкыштöмсянь калитка шыасис тöдса дзуркнитöмöн, оссис. Сы сайын Таисья сюрис розаэзiсь садитöм аллеяö.

Сулалiс гожум — пу-турунлöн быдман да цветитан кад. Листасялöм кусттэс, кöдна тöвнас вачкисьлiсö öддьöнжыксö кöс россэз вылö да пыр вöвлiсö тыртöмöсь лымöн, öнi Таисья син одзын мыччассисö тöдчöмöн гырисьжыккезöн, паськытжыккезöн да басöкжыккезöн. Нельки ем кодь йыла шиппес, кöдна увья матö кусттэс бердö некöдöрсянь и сибöтчыны эз позь, öнi листтэс коласiсь эз и тыдалö. Но медбасöкöн аллея мыччалас асьсö вöлись сэк, кöр быд кустыс дзик киськалöм, вевттисяс гырись розовöй да чочком цветтэзöн.

Школаö пыранiн весьтын лöсьöтöм клумбаэз гöгöр бергалiсö, натьтö, сизимöт классын велöтчись нылочкаэз. Кинкö кекеркаöн пукавтöн нетшкис ёг, кинкö рудзöтiс шлангись ва, киськалiс лейка понiсь цветтэз.

Кирпичись тэчöм кыксувда школаыс, кöда ыбöссэзöн горöн вартöмсянь коридорын и классэзын уна челядь кок увтын джоджжез гудитöмсянь, быдкодь шыöн руыс тырöмсянь да öшын стеклоэз норöн-норасьöмсянь эшö неважын вачкисис мош чурка вылö, öнi вöлi лöнь, мыччассис пустаöн, нельки гажтöмöн. Но мый бы эз усь эта коста Таисья син вылö, волнуйтчöмыс, кöда сыын быдмис да вынсялiс сё öддьöнжык, кольччыны немлö сы ылöсын дыр кежö эз сет.

Нывка сибöтчис пыранiн весьтöдз, кайыштiс кынымкö лажмытик поспу кузя, оськöвтiс стеклитöм ыбöс дынöдз, павкöтчис уна киöн куталöмсянь шонавтöдз югмöм да волькамöм вуг бердö, кöда бердö сiя и ачыс кутчисьлiс лунiсь лун не öтiк год сьöрна. И öнi эта павкöтчöмыс топ саймöтiс да öдззöтiс сы моросын сьöлöмлiсь ёткöтöм, сiдз жö, кыдз эта вöлi и кык годöн одзжык, кöр нывка локтiс öкмысöт классö да первуись кутчисис эта жö вуг бердö.

Таисья оськöвтiс пытшкас.

Пыранiн дынсянь öтмöдöрö нюжалöм коридорын, да и не только коридорас, но и быдсöн школаас, быд классын, сулалiс сэтшöм лöнь, что медперво этасянь нывка нельки паймыштiс, горöнжык ловзисьнытö эз лысьт, а коккес мыйкö дырна кежö кывзiсьнытö дугдiсö, дзик кынмисö асланыс местаö. Эстöн ни Таисьялö тöдвылас усис быдöс, мый петалiс бурыс и умöльыс, гажаыс и гажтöмыс кык велöтчан год сьöрна. Но кöр нывка нёджжöвтiс коридор мöдöрись паныта ыбöссэз вылö, а сэтчин вöлi физзал, нiя медодз вайöтiсö сы тöдвылö выпускнöй рыт, сiйö выпускнöй рытсö, гажажык да донажык кöдася сы оланын эшö некöр да нем эз вöвлы. Вежöртана, что гажсянь, счастьесянь да ыджытся-ыджыт волнуйтчöмсянь падмöтны тöдвылын быдöс сэксясö и эз позь. Но медтöдчанаыс, медколанаыс, кыдз да мый вöлi эта рытö, сёжö кольччис. И öнi, эта полöтана кодь лöнь стенаэз коласын сулавтöн, быдöс вöлöмыс аслас дукöн да рöмöн, шыэзöн, напряженнёöн да настроеннёöн, ловзис Таисья син одзын виль вынöн. Бöрья экзамен сетöм бöрсянь, кыдз велöтчиссез, сiдз и велöтiссез, кынымкö лун сьöрна шоччисисö, позяс кö сiдз шуны выпускнöй кежö лöсьöтчöм. Эта рытö куимнан дасöт классыс чукöртчисö öтлаö, эта физзалö, кöда сэк кежö вöлi пöртöм актовöйö и кытöн вöлi лöсьöтöм быдöс коланаыс: пызаннэз, скамьяэз, цветтэз, музыка.

Уна выпускниккез, кöдна олiсö посадын да ветлiсö школаö гортсянь, локтiсö öтлаын аймаммезкöт. Унаöс жö ны коласiсь, öддьöнжык нывкаэсö, асланыс мöдöтчöм, виль причёскаэз, краситчöм-баситчöм да вöвлытöмнёж бытшöма кöмасьöм-пасьтасьöмсянь нельки тöдны эз позь. Но мый медöддьöн усис син вылö быд чужöмись, дак этö саймöм гаж да волнуйтчöм, сайöвтны кöдö эта рытö некыдз эз ни позь.

Колана кадö саймис ыбöс вевдöрын электрическöй звонок. Аслас гора сярзьöмöн сiя пöдтiс чукöртчöм выпускниккез коласын возбуждённöй басниэсö и дзир волнуйтчöмсö некинлiсь эз ни чинт. Сiя жö сувтöтiс быдöннысö и кок вылö.

Залас сьöрсьöн-бöрсьöн пырисö директор, класснöй руководителлез да мöдiк велöтiссез. И сы сьöртi, кытшöм лöня, торжественнöя нiя кайисö да сувтiсö ордчöн öтамöдкöт унася-уна цветтэзöн пызан сайö, несьöкыт вöлi адззыны да вежöртны, что и нiя эта кадö тожö волнуйтчöны. Пуксьынытö топ некин эз и думайт. Минута сьöрна сулалiс лöнь, кöд коста нельки ачыс директор, шöрöт вывтыра, годдэза ни Иван Никифорович, волнуйтчöмсяняс неöтпырись ни вайöтлiс кисö галстук бердö, кöда талун и сiдз öшалiс морос весьтас, дзик лякöтöм.

Лöньсö дзугисö ловзьöм динамиксянь гимнлöн торжественнöй шыэз, кöдна эшö öддьöнжык веськöтiсö быд мортсö. И вöлись сэк, кöр нiя лöньсисö, Иван Никифорович юрнас качыкнитöмöн быдöннысö тшöктiс пуксьыны. Ачыс сiя оськöвтiс ордчöн сулалан трибуна сайö, негорöн куршыктiс, мыйöн сетiс тöдны, что пондас баитны.

— Дона ёрттэ.! Выпускникке. да велöтчиссе.! Дона миян гöссе.! — волнуйтчöмсяняс бöрья согласнöйсö шувлытöг, пондöтiс директор. — талун миянö. чукöртi. öтлаö бöрья звонок. Быдöнным понда, а öддьöнжыксö ны понда, кин локтi. янсöтчыны аслас школакöт, эта öддьöн ыджыт, öддьöн важнöй событие. Быдöнныт тi, кöдна адззисö ас пытшкын вын да мыла, мед дас год сьöрна вермыны мунны шöрöт школалiсь программа — керит ас оланын медодзза гражданскöй подвиг. И ме öддьöн рад, кыдз ассяням, сiдз и быдöс велöтiссезсянь поздравитны тiянöс эта ыджыт событиеöн тiян оланын.

Зал пасьта паськалiс уна киэзöн медодзза шовкöтöм.

— Быдöнныт понда пример туйö ог вермы не казьмöтны ны йылiсь, кин бытшöма велöтчис да сетiс выпускнöй экзаменнэсö четвёркаэз да пятёркаэз вылö. Этö и Вавилина Наташа да Гордеева Надежда, и Кочева Марина да Селищев Анатолий, и Кузнецов Павел да Сивцева Светлана. А Кырасова Таисья, кöда велöтчис миян школаын кык год сьöрна, адззис вын да мыла кончитны школасö воистину подвигöн — золотöй медальöн. Сувт, Таисья, мыччась эшö öтпырись аслат ёрттэзлö да миян гöссезлö. Тэнат фотография öнiсянь и пыр кежö кольччас öшавны миян школьнöй «Доска почёта» вылын.

И вились, кыдз взрыв, паськалiс зал пасьта киэзöн шовкöтöм.

Иван Никифорович, тыдалö, думайтiс казявны нывкасö одзись рядын, сэтiсь и видзöтлiс. Но не öддьöн тöдчана быдöнныс коласын, Таисья пукалiс медбöрын. И кöр киэзöн горöн шовкöтöм увтö ковсис сё жö сувтны, пуксьыны бöр одзза местаас директор сылö эз ни сет, мыччалiс кинас трибуна одзö, мед нывка петiс, а сэсся сiдз жö тшöктiс пуксьыны одзись рядö.

Сёрöнжык Иван Никифорович, волнуйтчытöг ни, баитiс эшö выпускниккез одзланься велöтчöм, государстволö нысянь колана знаннёэз, киэз да удж йылiсь.

Таисья, кöда öнi быдсöн вывтырнас кылiс бöрсяняс уналiсь видзöтöм да вынсьöтчис лöньсьöтны вились лöдсыштöм волнуйтчöм, падмöтны тöдвылын директорлiсь баснисö сiдз быдсöн и эз вермы. Ылöсын кольччисö дзир нiя кыввес, кöднö Иван Никифорович висьталiс медбöрын:

— ... Оланныт тiян вöлись пондöтчö. А сiя, отирыс басниöн, не ыб поперегалöм. Сiя медодз — быдлунся пессьöм. И ме желайта быдöннытлö не только сорасьтöг кужны бöрйыны одзлань кежö колана удж, бытшöм да колана профессия. Ме желайта тiянлö адззыны бöрйöм уджын да оланын асьнытö, адззыны, кыдз личносттезöс. А вермат тi сiйö сэк и только сэк, кöр сорасьтöг сувтат колана моральнöй да нравственнöй позиция вылö, адззат ас пытшкын вын да мыла пессьыны асланыт убежденнёэз понда, од пондö тöдны эта пессьöмын некытшöм мыдз, од жалейтö сетны ассиныт олан бöрйöм мечтаэз судзöтöм вылö! Бур туй тiянлö этаын, дона ёрттэз!

Директорлöн медбöрья кыввес сыбурна йиджисö Таисья сьöлöмö, что кутöм восторгсянь сiя эз и казяв, кöд коста сöдзисö синваэз.

Сы йылiсь жö, мед быд выпускник бöрйис ас оланын колана туй да петiс мортö, баитiсö бöртiжык и класснöй руководителлез.

Кытшöмкö кадö ордчöн директоркöт сувтiс дасöт «в»-ись класснöй руководитель, годдэза ни, кöсыник, лöнь чужöма да сё эшö дзик том увья югыт сина Парасковья Андреевна. И ась класснöй журналын Таисьялöн ним-фамиллёыс сулалiс не медодзын, класснöй руководитель öнi сiйö и горöтчис. Таисья сувтiс, оськöвтiс трибуна ладорö, кытöн, паныт сулавтöн, сiйö видзчисис Иван Никифорович.

Мымда бы одзжык эз баитсьы золотöй медаль йылiсь, сыö, что сiйö сетасö былись да эшö сiя жö выпускнöй рытö, öтлаын аттестаткöт, Таисьялö и öнöдз эшö эз веритсьы. И кöр Иван Никифорович öт кинас жмитыштiс нывкалiсь кисö, а мöднас нюжöтiс сылö золотöй букваэзöн печатайтöм аттестаткöт коричневöй рöма неыджыт коробочка, Таисья повзьыштiс. «Былись, сiдзкö. А мый понда? Ме жö ас понда велöтчи».

— Видзöт. Ошшась, — рожабанас öтпырись окыштöм бöрсянь ай голосöн висьталiс директор. Эта вылын Таисья нач öшис.

Класснöй руководитель эшö одзжык юöртiс, что аттестатсö босьтöм бöрсянь сылö ковсяс баитны. Но мый колiс керны öнi: то ли былiсь пондыны мыччасьны сетöм медальöн, то ли мыйкö висьтавны, Таисья эз тöд. Паймыштöм шогья сiя вöлi мöдiс ни оськöвтны увлань да пуксьыны аслас местаö, но эстöн сылö отсалiсö бöра жö Иван Никифорович да Парасковья Андреевна.

— Да эн пов, Таисья, эн пов, баит, — негорöн висьталiс Иван Никифорович, кокнитика бергöтiс сiйö трибуна ладорö, кöть пондöтны ассис баснисö нывка нач эз тöд мыйсянь. Волнуйтчöмсяняс сы юрын не думаэз, не колана кыввез эз вöлö. А Парасковья Андреевна жагвыв босьтiс сы киись коробочка, осьтiс, пöлiньтыштiс сiйö залын пукалiссез ладорö, новйöтöв-керис ны одзын сiдз, мед быдöнныслö позис адззыны, мый вöлi пытшкас. А кöр лöньсис зал пасьта горöн шовкöтöм, сэк вöлись Таисья лэбтыштiс синнэсö трибуна сайсянь быдöнныс ладорö.

— Ёрттэз-выпускниккез! Дона миян велöтiссез! — волнуйтчöмсянь не öддьöн горöн пондöтiс Таисья, — талуння выпускнöй рытыс ме понда ыджыт да гажа праздник. Этася ыджытжыкыс ме оланын эшö нем да некöр эз вöвлы. И кытшöм бы олан одзлань кежö эз петав, эта рытыс некöр оз вун, век сьöрна кольччас тöдвылын. Ми мунiм тiянкöт кузь да сьöкыт туй. Но мунiм не öтнаным. Дас год сьöрна миянöс туйдiсö быд оськöв вылын миян велöтiссез. И быдöс понда ми сьöлöмсянь висьталам нылö ыджытся-ыджыт спасибо...

Таисья, кöдалöн одззася волнуйтчöмыс невночка ештiс чулавны ни, сувтчыштiс эта вылын дзир ловзисьöм могись. А залын пукалiсь ёрттэс вежöртiсö, тыдалö, что басниыс сылöн баитсис. И кöр зал пасьта, кынымöтпырись ни эта рытö, вились паськалiс горöн шовкöтöм, нывка кежис трибуна сайись, лэдзчис да пуксис аслас местаö.

Öнi, кöр быдöс эта неважынся вöлöмыс сэтшöм ятнöя сувтiс Таисья син одзын, а öткоста тöдвылö усис фермаись сiйö вашöтöм, нывка кылiс, кыдз виль вынöн саймöм обидасянь пондö кильöтны нырсö, сотны-курöтны синнэсö. Лоöмыслöн причинаыс важын ни вöлi вежöртана, дзир примитны сiйö аслас ылöсöн Таисья öнöдз эшö эз вермы, эшö да эшö думайтiс: «Но кыдз, кыдз быдöс этö вежöртнытö, кöр школаын бытшöма велöтчöм понда золотöй медальöн лэдзисö, а колхозас сэтшöм жö удж понда фермаись вашöтiсö? И кыдз часöт эта йылiсь директорыслö юöртны? Кыдз сiя этö примитас? Мый паныт висьталас?»

Чулалiс кад. А гажтöм думаэзöн тырöм юра Таисья одззамоз сулалiс пыранiн дынас, лöнь школьнöй стенаэз коласын и некыдз эз вермы адззыны вын оськöвтны учительскöй ладорö, кытöн сiйö, натьтö, видзчисисö. Сiя горзiс. Но сылöн талуння горзöмыс немöн эз вачкись вит годся челядёклöн ылöстöм горзöм вылö. Рожабаннэз кузя визывтан синваэс вöлiсö дассизим годся нывкалöн, кöда öнöдз ештiс кончитны не только шöрöт школа, но кужис да вермис керны мукöдся унаöн буржыка ассис удж и дзир эз куж да эз вермы миритчыны сiя рутинакöт да косностькöт, кöднöн, кыдз чераньвезöн везтöм оланлöн быд пельöс, кöдна эз сетö тырмöмви лолавны руöн, падтiсö бытшöм да колана удж, паджисö вын да мыла, падмöтiсö быд оськöв одзлань мунöмлiсь, мырддисö оланлiсь гаж да кусöтiсö сьöлöмлiсь сотчöм.

Кытшöмкö кадö оссис учительскöйись ыбöс. Коридорас мыччисис Парасковья Андреевна.

— Таисья? Тэ мый ыбöс дынас сулалан? — Вуджöр моз кокшытöг сiя сибöтчис нывкаыс дынöдз. — Мыля учительскöяс он пыр?

Велöтiсьыс син одзын нывкалö колiс бы лöньсьыны. Но аслас думаэзсянь досадаыс дойдiс сэтшöм вынöн да зубыта, что велöтiсьыс кыввез бöрсянь видзсьыны горзöмсис некытшöм вын эз судз.

Бöртiжык, учительскöяс ни, кытöн нысся кыкысся сэсся некин эз вöв, Парасковья Андреевна пуксьöтiс нывкасö пызан сайö, ачыс пуксис паныт, лöньсьöмсö видзчисьтöн внимательнöя видзöтöв-керис сы вылö, вынсьöтчис вежöртны, мый сэтшöм умöльыс вöтiс нывкасö сы оланын.

Эстöн вöлись Таисья чышкыштiс рожабаннэс кузя визывтан синваэсö, пыдына да гажтöма ловзисис, недолытсянь курччöвтыштiс тырпсö, лэдзис увлань синнэсö.

— Висьтась, кыдз овсьö? Кывсьö, куканнез дынын уджалан?

— Уджалi тöння виöдз...

Мед не сорны Таисьялiсь пондöтöм баснисö, одзлань Парасковья Андреевна эз ни шыась. Нывкаыс висьтасьöм коста сiя пызан бердсис нельки синнэсö эз лэбтыв, видзöтiс кытшöмкö öтiк точкаö, кывзiс, думайтiс. Дыр мыйись, кöр Таисьялöн басниыс баитсис, Парасковья Андреевна веськöтчыштiс стул вылын, гажтöма ловзисис.

— Ой, Таисья, Таисья! Ми тэнö институтiсь лыддям, надейтчам тэ вылö, что велöтчыны мунiн да специалистöн петан, а тэ?.. Мый думайтан одзлань кернытö?

— Немись нем ог тöд. Батi, мунны меным гортiсь кытчöкö?

— Сiдз, батi, но не кытчöкö, а велöтчыны. Тэ жö кöсйисин. Ми сiдз и надейтчим. А сэтöн институтсянь районоö звонитöны, что тэсянь заявленнё öнöдз абу. Вот эд кытшöм небасöка петö. Вежöрт, пожалуйста, что некытшöм мöдiк туй мунны гортiсь тэныт абу. Эд оз кö, висьталан, лэдз мамыт мунны гортiсь велöтчöм увья, дак мунны мыйкö мöдiк увья эстöн и думайтны нем. Но велöтчытöг, Таисья, колана образованнётöг, овны да уджавны талун оз позь. Сэтшöм ылöса нывка, думайта, этö тэ и ачыт вежöртан. И пондывны кö баитны эта йылiсь бытшöмжыка мамыткöт, сымдасö сiя тожö вежöртас. Эд не йöз жö сiя тэныт и керны умöльжыксö аслас нывлö оз понды.

Мый гажöтiс Таисьяöс эта басниын, дак не сiдз сыö надейтчöм да веритöм, что бытшöма баитöм бöрсянь мамыс сiйö и былись вежöртас, а медодз сiя, что нывкаыс одзланься олан да велöтчан йылiсь Парасковья Андреевна думайтiс топ сiдз жö, кыдз сiя ачыс. А сiдз кö, дак мыля бы и мамыслö не вежöртны?

Час бöртi, бурмыштöм сьöлöмöн ни, Таисья петiс бöр. Парасковья Андреевна кольлалiс сiйö калитка дынöдз.

— Бур туй тэныт, Таисья. Да видзöт, некöдöрö эн ни кежлась.

— Спасибо, Парасковья Андреевна.

Эта басни бöрсянь вились зорамис одзланься велöтчöм вылö надейтчöм. öнi Таисьялöн думаэс дзир эта йылiсь и вöлiсö. Эз думайтсьы нывкалö нем гортын кольöм удж йылiсь, сiдз кыдз эта коста сiя эз кыв да эз тöд, мый керсис сэтчин.