Репетиция

Öтiк акта, кык картинаа комедия

ОРСIССЕЗ

ВЕНЬКА — допризывник

НАДЕЖ — сылöн мам

НИКОДИМ — сылöн ай

СЕВКА, ГОШКА — Венькалöн ёрттэз

ЮЛЯ — библиотекарь

НАСТЯ — сылöн мам

Действиеыс мунö öння кадö деревенскöй клубись неыджыт библиотека жырын. Матын пыранiн дынсянь пызан да кынымкö стул, пызан вылас картотекаöн ящичок. Ылынжык саяс тыдалöны книгаэзöн стелажжез. Стена сайсянь кылö баянлöн кадiсь кадö дугдышалöмöн орсöм да хорлöн сэтшöм жö сьылöм. Пызан сайын очапаныт пукалöны ВЕНЬКА да ЮЛЯ — споритöны. Нывка пондылö бы чеччыны аслас местаись, но киöттяс видзтöн зонкаыс пуксьöтö сiйö бöр.

ЮЛЯ. Лэдз, ноко, Венька. (Пондылö мездöтны зонка киись ассис кисö.) Лэдз, висьталiсö тэныт! Кылан, он, репетицияыс пондöтчис ни?

ВЕНЬКА. Но и ась. Абу жаль. Меным сысянь не жар, не кöдзыт.

ЮЛЯ. Мыйсянь нö тэныт жарыс да кöдзытыс овлö?

ВЕНЬКА. Сiя эшö юасьö... Тэсянь, натьтö, кинсянь эшö этася? Казяла тай кысь, дак сэтöн жö жарö и чапкö. Некинöс сэсся не ог кыв, не ог адззы.

ЮЛЯ. Мун жö... Эн лёб, кöдö оз ков.

ВЕНЬКА. Мый, он верит?

ЮЛЯ. Ог, конешно.

ВЕНЬКА. Но и весь. Ме тэтöг час сьöрна овны ог вермы, минута сьöрна. Луныс год кузьöн мыччассьö, кöр тэнö ог адззыв. Не рыт, не асыв юрись он петав, колö кö тэныт тöдны дак.

ЮЛЯ (дивуйтчöмöн). Былись, бытьтö?..

ВЕНЬКА. А то, шу, не. (Чöлыштöм бöртi.) Гöтрасьны вот думайта. Мунан ме сайö?..

ЮЛЯ (одззамоз дивуйтчöмöн). Да тэ мый?.. Кöр тэныт эта юрат пырис?

ВЕНЬКА. Важынкодь ни. (Думайтöв-керö ас кежас.) Неделя етш ни, натьтö, этасянь чулалiс. Но... тöдан эд, кöр эшö военкоматас повесткаысла корлiсö.

ЮЛЯ (бергöтлöв-керö öтмöдöрö юрнас, дивуйтчöмöн, нюжвылöн). Инте-ре-сно. И кöр жö бы тэ думайтан гöтрасьнытö?

ВЕНЬКА. Да кöть талун жö. Гöтрасям, а?

ЮЛЯ. Некöр эд талун.

ВЕНЬКА (нюжвылöн да челядёк моз корöмöн). Но мыля-а-а?

ЮЛЯ. Репетиция вылö жö колö мунны. Лэдз, ноко. Нето лок öтлаын мунам. (Вились пондылö бы мездöтны зонка киись ассис кисö да чеччыны аслас местаись.)

ВЕНЬКА. Да пукав жö. Некытчö тэнат репетицияыт оз пышшы. Баитчыны сэкöдз колö да вöлись. (Чöлыштöм бöртi.) Сэк, батi, репетиция бöрсяняс, а?

ЮЛЯ. Мый репетиция бöрсяняс?..

ВЕНЬКА. Но гöтрасям, мыся.

ЮЛЯ. Да тэ мый, Венька? Сёр ни эд сэк лоас.

ВЕНЬКА (дивуйтчöмöн). Кыдз сёр?

ЮЛЯ. Кыдз инö не да?.. Думайтышт вот юрокнат. Кытчöдз репетицияыс кыссяс, дак эд ойшöр ни лоас. Сэктöдз и челядь кадыс чулалас. Узьны пондас ковны.

ВЕНЬКА (обидитчöмöнмоз). Но вот адззан тэ кытшöм...

ЮЛЯ. Кытшöм жö бы? Небытшöм? Да?

ВЕНЬКА (одззамоз обидитчöмöн). Да не сiйö тэныт шуöны. Ме тэныт сьöлöмсянь баита, а тэ быдöс шуткаö бергöтан да ме вылын сералан.

ЮЛЯ (дивуйтчöмöн). Былись я мый я?..

ВЕНЬКА. А то, шу, не?..

ЮЛЯ (серьёзнöя ни). Былись, дак былись. Сiдз перво жö и колiс висьтавны. Мунам репетиция вылас.(Бöра пондылö бы чеччыны.) Лэдз, Венька, видзчисьöны менö сэтчин.

Эта коста стена сайын сьылöмыс недырик кежö лöньсьö.

ЮЛЯ. Лок петам эстiсь. Чулалiс, кылö, репетицияыс.

Кыкнанныс пондöны кывзiсьны. Недыр мыйись орсöм-сьылöмыс пондö кывны одзлань.

ВЕНЬКА. Видзöт тэ, кытшöм сiя хитрöй вöлöма. Репетиция вылö дак ачыс кыскö, а жöник сайö, дак кыдз кöза, тарашитчö. Но не-е, Юлька... (Легöтöв-керö нывкаыс ныр одзын чуньнас.) Тэ менö он бöбöт. Висьтав вот сэк перво, мунан-он ме сайö репетицияыс бöрсянь?

ЮЛЯ. Мыйлö нö ме öнiсянь тэ сайö муна? Тэ жö неделя бöртi армияö лöсьöтчан.

ВЕНЬКА. Но и мый, лöсьöтча дак?

ЮЛЯ. Колö я неделя кежас гöтрасьны?

ВЕНЬКА. Колö, конешно. Ась и неделя кежö. Тэ жö тöдан, кыдз ме тэнö любита. Сiдзкö, обязательно колö. Ась и öтiк лун кежö. Сэк менам кöть сьöлöм местаын лоас.

ЮЛЯ. Сiдз, батi. А менö кытчö колян, мунан служитнытö да?

ВЕНЬКА. Но эд не улич вылö жö. Гортö, аймамö дынö. Ме понда служитны, тэ — видзчисьны. Кыдз баитсьö — кöиныс пöт и баляыс дзонь. Мыйöн умöль?

ЮЛЯ. Мый нö сэтöн бурыс? Жöник саяс петтöдз меным эшö велöтчыны колö, институт кончитны. А петны öнiсянь, дак велöтчансö сэсся он ни адззыв.

ВЕНЬКА. Мый, полан, что сьöктан да кага ваян?

ЮЛЯ (зонкаыс одзын прос кинас öвтышалöмöн). Мун жö, стыдтöм! Эн бызды, кöдö оз ков.

ВЕНЬКА (нарошно горöн да гажöн).А мый тэ сыись повзин? Ваян и вай! Быдмас эд!

ЮЛЯ (негорöн). Дугды, висьталiсö тэныт.(Дзирбарасьыштö öтмöдöрö.) Кыласö эд отирыс. Кытшöм ме эшö... Смех тай...(Мышкыртö юрсö, бергöтчö мöдöрö.) Ме эшö ачым... Думайтны эд только. Дассизим вöлись тырис да... А видзчисьны тэнчит бертöмтö ме и петтöг верма... Колö кö тэныт öддьöн дак.

ВЕНЬКА (видзöтöв-керö нывкаыс синнэзö, ловзисьö ыш, öвтышалö öтмöдöрö юрнас). Не-е. Кольны тэнö öтлаасьтöг ме некыдз ог вермы. Вежöртан, Юлечка, некыдз.

ЮЛЯ. Мый, он верит, что видзчисьны понда?

ВЕНЬКА. Ог эд.

ЮЛЯ. Мыля бы, кöр ме тэныт кыв сетi?

ВЕНЬКА (вились видзöтöв-керö нывкаыс вылö, дыр мыйись). Травитчан тэ эстöн метöг...

ЮЛЯ (дивуйтчöмöн). Мый-мый-мы-ый?

ВЕНЬКА (чöлыштöм бöртi, горöн). Йöвдозсö, мыся, горшаласö!

ЮЛЯ (сьöвзьöмöн). Тьфу тэнö баснинат! Стыдтöм!(Бергöтчö мöдöрö, китшсьытöн-серавтöн). Кин жö бы?

ВЕНЬКА (лöгвевйöн, дразнитöмöн). «Кин жö бы, кин жö бы!» Етша я мый я деревня вылас кык кока кобоннэс^, кöдна тэ кодь аканнес сьöрын ойбыт-ойбыт лесуйтöны?

ЮЛЯ (одззамоз китшсьытöн-серавтöн). Былись я мый я? Ме мыйкö некинöс эшö ас сьöрись эг адззыв.

ВЕНЬКА. Чö-öв. Адззылан эшö, муна служитнытö дак. (Öшöтö увлань юрсö, пондö думайтны.)

Эта коста стена сайын дугдö кывны репетируйтöм, матын ыбöс саяс пондöны кывны кокшыэз, баитöм, сералöм.

ЮЛЯ (перыта чеччö пызан сайись, мынöтö тув вылiсь ассис пальто, пасьтасьтöнняс). Мунам, Венька. Чулалiс репетицияыс.

Венька пукалö öшöтöм юрöн, паныт оз шыась. Оссьö ыбöс, пырöны СЕВКА да ГОШКА.

СЕВКА (порог дорсянь). Но кыдз, Венька? Баитчит?

Венька чöлöмöн öвтыш-керö öтмöдöрö юрнас, сувтö.

ГОШКА. Мый, рытыс бытьтö тiянлö эз тырмы?

ВЕНЬКА. Некыдз оз согласитчы.

СЕВКА. Оз и ков, оз согласитчы дак. Ми и юасьны сылiсь ог пондö. Часöт кутам, нуöтам — сымда и эм.

ГОШКА. Точно, челядь. Мый эшö сэтöн кеймисьнытö? Зонкаыслö чожа армияö мунны, а сiя сэтöн эшö чегласьны пондас. (Кыкнанныс оськöвтöны нывкаыс ладорö).

ЮЛЯ (повзьöмöнсорöн да горöн). Зонкаэз! Да тi мый? Йöймит я мый я? Лэдзö öнi жö!(Пондылö бы уськöтчыны ыбöс ладорö. Зонкаэз сувтöны паныт.)

СЕВКА (дразнитöмöн). Шедiн, чанёк? Часöт ми тэнö сермöталам. Некытчö он пышшы.

ЮЛЯ. Дугдö, зонкаэз, кышсиныт петны! Лэдзö, висьталiсö! А то айöлö норася! (Вились пондылö бы петны ны коласöт.)

ГОШКА. Абу тай жаль. Доддявлас ойнас Венькаыс, дак ашын кöть мымда норась.

ЮЛЯ (сьöвзьö). Тьфу! Совестьтöм отир!(Горöн ыбöс ладорö.) Нывкаэз! Нывкаэз, мыся! Эдö на менö кольö!(Кыкнан кинас казявтöг татшкö Гошкалö моросас. Гошка турйöвтö пызан вылö, öтлаын сыкöт пöрö. Кыкнан ёртыс уськöтчöны отсавны сылö чеччыны. Сы коста Юля уськöтчö ыбöсö.)