Куимöт часть

Глава I

Буржык öтпырись адззывны, ежели сизимись кывны. Эта отирлöн мудрöй поговоркаыс талун, кыдз некöр, лöсялiс и Таисьялö.

Порсевскöй колхозлöн боквывтчöмыс вöлi не öтiк лунся да не öтiк годся. Пондöтчис сiя не тöн, и не удерлун, а эшö сэк, кöр нывка и свет вылас эз вöв. Но сiя кадсянь, кыдз Таисья пондiс тöдны асьсö, кывлiс уна сэтшöмö, кöдалiсь смыслсö да значеннёсö пондiс вежöртны вöлись талун. Нывка кывлiс, кыдз кинкö рядовöй колхозниккез коласiсь, частожыксö мужиктöм, кыдз и сылöн мамыс, инькаэз лунiсь лун, неделя, а то и кык сьöрна тальлiсö туй правленнёö да бригадир дынö, мед петкöтны турун нето вайны тöв кежö пес, а председатель, бригадир или механизаторрез керисö этö ас понда, кöр нылö усяс тöдвылö. Кывлiс Таисья и сы йылiсь, кыдз гожумся страда коста, ви вийöтан погоддяö, кöр рядовöй колхозниккез шондi петан кадсянь и шондi пуксьытöдз менöвтiсö-керисö колхознöй удж: ытшкисö да куртiсö, вундiсö да вартiсö — фермаись заведующöй, пороз кодь здоровöй мужик, кöдö нем эз видз доддявны вöв местö гöр коласö, сэтчин жö фермаас уджалiсь отир син сайын кытшöмкö взвоз увтын нето ыркытжык сарайын лунiсь лун нöитiс аслас высьтiсиссез коласiсь кытшöмкö гилялан каджа, мужиктöм инькаöс, бригадир, отирсö удж вылö вашöтöм бöрсянь, сюйыштлiс кос саяс чер, ветлывлiс ытшкисьны да куртны аслыс, а председатель — асывся наряд бöрсянь кежалiс сельповскöй магазинö, мед рытъявыв кадöдз, кытчöдз оз сайкав винаöн калитöм юр, быглясьны асьсö тöдтöг кытшöмкö ытшкытöм межа дорын, не канаваын кö эшö, öтлаын деревенскöй порссезкöт. Кывлiс и сiйö, что не рядовöй колхозниккез, а медодз асьныс правленнёись членнэз сувтöтлiсö ас пода понда турун зороддэсö колхознöй покоссэз вылын, и сiйö, кыдз сёр кадöдз вундытöм сю быдса ыббезöн шедлiс лым увтö, и сiйö, кыдз öткаса инька-кладовщик видзöтлöм увтын, кöдö мужиккес пыртлiсö складдэзас дзир рытся пемытнас, не öтiк сотня центнер мымдаöн öзйывлiс, пöдiс да сотчис тулыс кежö кисьтöм кöдзысовöй сю, а бурттэзын да гуэзын пöрлiс нятьö не öтiк вагон мымда картов. Кывлiс Таисья и сiйö, что колхозас öтлаöтöм бöрсянь, нёльдас-витдас год сьöрна ни, ылiсьжык порсевскöй ыббез эз на кывлö назёмлiсь дук, кöда керöссэзöн куйлiс быд ферма гöгöр, и сiйö, кыдз годiсь год тулыс кежö эз тырмывлы колхознöй подалö вердчан, мыйсянь подаыс вель унаöн усьлiс, а ловйöн кольччöмсö веж турун вылас кыскавлiсö геззэзнас не председатель да бригадир, не кладовщик да фермаись заведующöй, а нiя жö рядовöй колхозниккес. Кывлiс нывка и сiйö, что порсевскöй колхозас, öтлаын подаыскöт, фермаэсö сотлiсö витiсь ни. Да, быдöс этö Таисья кывлiс. Эз кывлы нывка дзир öтiкö, сiйö, мед колхозлö вайöтöм урон понда кинöскö кöть öтiкöс судитiсö: то ли пуксьöтiсö, то ли тшöктiсö вештыны ас карманiсь. Сэтшöмыс Таисья тöдвылын эз вöв сiдз жö, кыдз эз вöвлы сiя и оланас. Кывсьывлiс кö шочыника мый, дак сiя, что дзимлявтöм сюэз нето тшыгсянь усьöм пода понда партийнöй линия кузя председательлö сетöмöсь... выговор! — не öтiк дас, а мукöд коста не öтiк сотня тысяча руб вылö вайöтöм урон понда — внушеннё кылöн! А кин кутчисяс? Кин лысьтас? Кинлöн адззисяс сэтшöм совесть, мед висьтавны, бытьтö эта ыжда материальнöй ущерб да сетöм сы понда выговор — величинаэс öткодьöсь: öтыждаöсь, öтвынаöсь да öтдонаöсь? Позьö я адззыны весаэз, кöдна чашаэз вылын, кыдз нельки медучöт материальнöй урон да медыджыт (вермис кöбы сiя лоны сэтшöмнас) выговор, ас коласын öтсьöкытаöсь? Кин лысьтас висьтавны, бытьтö «медыджыт» да «медсьöкыт» выговор вермас вевттьыны медучöт, ась нельки копеечнöй материальнöй ущерб, кöр сiя нельки аслас сутьöн ущербыс сутькöт некыдз оз лöсяв, сiдз кыдз öтыслöн сiя быдсöн материальнöй, а мöдыслöн дзир моральнöй? Но сiдз кыдз кытшöмкö кадсянь да кытшöмкö не öддьöн ылöса юрсянь паныт материальнöй ущерблö лоис сувтöтöм моральнöй мщение — выговор, сэксянь öддьöн часто, не висьтавны кö, быд коста, вайöтöм материальнöй ущерб понда вештiсьö ас карманiсь не сiя, кöда эта ущербсö керис-вайöтiс, а сiя, кöдалö сiйö вайöтiсö. Не эта увья я Порсеваын и вежласисö председатель бöрсянь председатель, кытчöдз вöлi кинöн вежлавнытö. Но сы коста жö колхознöй добро понда кыдз ответственностьлöн система, сiдз и ачыс ответственность эз вежсьö, выговорся вылöжык эз кайö. Сiйöн и быд председатель — не юралiсь ас природасянь, не быдтöм-велöтöм, а дзир «бöрйöм» — уджалiс одззаысся не буржыка. Öтiклö ны коласiсь эз тырмы ылöс керны колхоз понда мыйкö вильö. Сiя эз адззы да эз тöд, кыдз, кöдöрсянь эта бердö кутчисьны. Мöдiклöн — петiс полöм кутчисьны ыджытжык удж бердö. Куимöтлöн — аслас юöм да подругаэз шогья эз тырмы кад сибавны колананёж удж бердö. А нёльöтлö — дыш петiс не только одзавны мыйынкö кинöскö соседдэз коласiсь, но нельки вöтчыны ны сьöрö.

Эта нёльöт разрядiсь, позяс кö сiдз висьтавны, и вöлi Порсеваын öнняся председатель Порсев, кöркöся учётчик да бригадир. Мед вермыны керны мыйкö вильö, ыджытö да одзлань нуöтанаö, этаö колiс пуктыны кытшöмкö вын да кад. Сылöн жö девизыс вöлi нач мöдкодь: «А колö я, кöр сытöг кокнитжык? А лоас кö мый умöльыс нем керöм коста — выговорся унажык оз сетö». Эз полöт сiйö и удж вылiсь вашöтöм. Быдöс коланажык отирыс, кöда коласiсь кинöскö вермисö бы сувтöтны сы местаö, сэк кежö колхозсис мунiсö ни, а кольччöммес — бригадир да агроном — сы вотöдз тожö предалiсö. Öтыс ны коласiсь вöлi вежöм жаг, вывтi лöнь да нерешительнöй мывкыд кузя, мöдыс — колхозниккезкöт тышкасьöм понда.

Сiдз кыдз Таисья вöлi эшö том и колхозас öння виöдз эз уджав, то и быдöс кылöмсö, кыдз кылöмö и примитiс, саймöтны кöда сы ылöсын ас дынас чувство быдсöн эз вермы. Не эта увья я и баитсьö сiдз: «Буржык öтпырись адззывны, ежели сизимись кывны». Мукöд коста сэтшöм кылöмыс примитсьö сказка местö, сiдз кыдз сiя дзир кылöм, а не адззылöм. Сiйöн кылöмыс йылiсь часто и думайтсьö сiдз: «А быль я эшö эта? Эзö я сэтчö мыйкö содтö? Позьö я сыö веритны?» Сiйöн жö, месяцöн одзжык, кöр Таисья да Галина бертiсö гортö велöтчансянь, а туй вылас басниыс öзйис колхоз йылiсь, Галина юалöм вылö: «А мыля, интересно, сiдз? Кытöн сэтöн ладыс?» — паныт Таисья висьталiс: «Кысь нö ме тöда, эг на ачым колхозаныс уджав да».

Но вот уджавнытö нывка пондöтчис. Неделя бöртi ни, кöр вежöртiс, что сы уджись абу некытшöм прок (сёйнытö подакокувтас подаыслö вöлi нем), заседаннё коста сiя ойбыт сьöрна пессис правленнёись членнэзкöт, мед сетiсö виль подакокувт да мöдiк вердчан. И вермис даки. Куканнесö буржыка вердöм вылö решеннёыс вöлi примитöм. Кажитчис бы, что эта бöрсянь ашынас жö, кадсö öштытöг, и колiс кутчисьны сiйö тыртöм бердö. Но не. Кытчöдз сiйö, гижöт вылас примитöмсö, усис пöртны быльö, Таисьялö ковсис торкны эта вылö эшö кык неделя сьöрна вын да мыла, лунiсь лун быднёж: корöмöн и кеймисьöмöн, споритöмöн и грöзитöмöн, котрасьöмöн и нельки тышкасьöмöн тшöктыны керны правленчиöс сiйö, мый понда нiя голосуйтiсö.

Сетöм подакокувтсö джынысви бöр ытшкöм да Шорсаяс, рудзöг ыб дорас, бригадиркöт оча морос вовлöм бöрсянь ой кежас куканнезлö турунсö ваявны сё жö пондiсö. Но думайтны кö, кытшöм эта вöлi турун, лыддьыны бригадирсö вермöмöн и öнi эшö эз позь. Быд лун ваялiсö оль дорись зутурун, кöдö нельки гырисьжык пода эз бы сёй. Эта сьöртi позис вежöртны, что керö сiйö бригадир дзир басни понда, мед мыччавны, бытьтö керö, мед Таисья эз ытшкы сэсся ыб вылiсь рудзöг.

Ытшкисьны нывка сэсся и былись эз понды. Этна жö луннэзö вöлi петкöтöм карта пытшкись назём, и ректiсьны тракторыслö тележканас нем эз видз пырны пытшкöдззас. Уджавны лоис тöдчöмöн кокнитжык. Бöрья неделя сьöрна Таисья сымда и керис — лэдзавлiс асывсянь пода, кутчисьлiс весöтны яслиэз. Зутурунсö, нельки пизьнас киськалöмсö, куканнез сёйисö умöля. А рытъявыв кадö сiйö жö вайлiсö вились, кöдö бöра ковсис лэбтавны да сорлавны.

Сiдз чулалiс месяц. И примитöм кö лыддьыны мортлiсь олансö мгновеннё туйö, то месяцыс эта оланiсь — мгновеннёись мгновеннё. Но месяц сьöрна кад босьтiс Таисья оланiсь сымда вын да мыла, кöдна бытшöмжык кадö, вöвны кöбы сэтшöмыслö, тырмисö бы не öтiк год кежö. И висьтав нывкалö сымдасö кинкö одзжык — эталö сiя некöр бы эз и верит, öнi жö, месяц сьöрна, не только сы син одзын, а сыкöт аскöттяс вöлöмыс лоис кыдз личнöй достояннё, не веритны кöдаö некыдз эз ни позь,

Сэк вöлись Таисья и вежöртiс, мед керны мортлö колананёж ассис удж, кöдасянь вöлi бы унажык прок кыдз сылö аслыс, сiдз и колхозыслö, эта понда колö эшö пессьыны, пессьыны чуть я не кулöм вотöдз. Мыля сiдз? Да сiйöн, что кыдз ачыс колхозiсь юралiсь да правленнёись членнэз, сiдз ны сайсянь и рядовöй колхозниккез видзöтöны колхознöй добро вылö да отвечайтöны сы понда не сiдз, кыдз асланыс, а кыдз колхознöй понда, висьтавны веськытжыка — некыдз. И кытчöдз лоас колхознöй добро понда сэтшöм ответственностьтöм отвечайтöм, кытчöдз быд гусялöм ли, öштöм ли колхознöй копейка понда сiя жö копейкаöн оз понды вештiсьны быдыс ас карманiсь, колхозсö сувтöтöм йылiсь и думайтны нем.

Сiя асылö, кöр Таисья локтiс фермаö удж вылö, зоотехникыс сiйö видзчисис ни. Нюжöтöмöн вежвывтöм кока Светлана пукалiс конюховка бердiсь скамья вылын, видзис öт киас учöтик зеркало, кöдаö видзöтiс, мöднас жагвыв сыналiс пельпоннэзöдз лэдзчисьöм юрсисö, öткоста не öддьöн горöн да не öддьöн гажвевйöн мыйкö нузгис-сьылiс аслыс ныр увтас.

— Одз тай мыйкö талун ме дынöдз?

Зоотехник дженытика дзар керыштiс куканьвöдитiсь ладорö, дзимлялiс сумочкаö, кöда куйлiс ордчöн сэтöн жö, сынан да зеркало.

— Эг бöра и казялö, кöд коста джын гожумыс чулалiс. Эшö месяц, а сэтчин, видзöтан кö, вились ар. Сiдз, казявтöг, быдöс оланыс и кывтас, — норасис зоотехник. — Не тэныт дружитöм кинкöткö, не радейтöм. Нем кляпсö эта запутымын он адззыв. Нельки жöник сайö петавны он ешты, сiдз нывка юрöн и пöрисьман.

Светлана вöлi сiя годдэзын ни, кöр нывка мортыслö кад овны мужика оланöн — ваясьны да быдтiсьны. Да вот беда — кернытö сылö сымдасö вöлi некинкöт. Письмоасис я сiя кинкöт, надейтчис я кин вылö — ас киння пöрисьжыклiсь Таисья некöр эз юась. Сьöлöмшогыс, кöда маитiс зоотехникöс лун и ой, асьсö Таисьяöс кытчöдз эз сибöт. Горöтчыны сылö паныт нывкалöн вöлi нем.

А колö висьтавны, что гажтöмыс зоотехниклöн и былись вöлi. И кыным унажык визывтiс кад, сыным сiя быдмис да вынсялiс сё öддьöнжык. Эз вöв причинатöм Светланалöн и талуння басниыс.

Лун куимöн одзжык, кöр зоотехник бертiс Липовскöй фермасянь, горт öшын увтö сибöтчытöн казялiс улица мöдöрись милицейскöй мотоцикл коляскаöн. Сэтчö жö петiс керкуись и сылöн хозяиныс, мед йöртны отир син одзись ассис «вöв». Пес видзан сарайись сiя осьтiс воротаэз, сибöтчис машина дынö, мöдiс, тыдалö, заводитны. Но эта коста казялiс нывкалiсь горт посöдз дынö сибöтчöм, веськöтчис, öвтыштiс улица мöдöрсянь кинас, и кыдз даскыным годöн одзжык:

— А, этö тэ, принцесса? Привет! Важын ни эг пантасьлö! — оськöв бöрын оськöв пондiс поперегавны улицасö сы ладорö.

О, кыдз Светлана видзчисис этö пантасьöмсö! И сё жö талунняыс сы понда вöлi видзчисьтöм, сiдз кыдз одзжык эта йылiсь нем эз тöд. И кöр нывка казялiс, что мöдыс дышöтчытöг иньдöтчис сы ладорö, сiя дзик кынмис местаас, чапкис жарö, пымалiс люзь. Светлана видзчисис, нельки веритiс, что часöт Костя сибöтчас зэв, и не сiдз полöмöн ни, кыдз эта вöлi даскык годöн одзжык — слава богу, талун сэксяыс сьöртi сылö годдэс кыкись унажык ни, да и вывтырнас сэкся челядёкыс вылö оз вачкись — висьталас: «Но и но-о... Вот эта принцесса дак принце-есса-а». Öтiк эта думасянь ни Светлана кылiс, кыдз öзйисö, пондiсö пымйöтлыны рожабаннэс. Но... видзчисьöмыс местаö лоис быдöс сiдз жö, кыдз и даскык годöн одзжык.

Сё сэтшöм жö статя да ён вывтыра, сэтöр кодь сьöд да öгралан сина, но не устöм эшö зонка, а волькыта бритöм чужöма том мужик кокнит кок йылын, повтöг сибöтчис зэв, сувтiс, сетiс ки, кöдалö ассис паныт нюжöтöм коста нывка öзйис эшö öддьöнжык, видзöтöв-керис юрсянь кок увтöдз. «Но и принцесса». А кöр сувтiс синнэзнас сы öгралан — некыдз мöднёж висьтавнытö оз позь — чужöм вылын, дивуйтчöмöн, дзик сойлö, горöтчис:

— Да сё тай нö одззакодь челядёк. Сё сэтшöм жö полiсь.

Этна видзчисьтöм кыввез бöрсянь Светлана и нач öшис, нельки дорйисьöм могись горöтчынытö паныт нем эз адззы.

— Сё я мый я айка саяс эн мун?

Сэтчö бы эд то и горöтчы: эн на пö корась да. Но да кытчö тэныт? Горöтчиссяс разь сымдасö, кöр и синнэтö лэбтыны он лысьт?

— Эг...

— Он тэрмась? Но и правильно. Оз и кол. Тöдöмöн бы, дак и меным абу колöм... Висьтась, кыдз олсьö-уджассьö?

— Сiдз тай... Уджала жагöника.

— Мхмы. А ме вот отсасьыштны лун-мöд кежö мамö дынö. Додь турун, батi, оз понды зэрны дак, ытшка-курта.

Светлана кылiс, кыдз чужöм вывсис неважынся öгралöмыс жагвыв пондö чулавны. Лэбтыштöм синнэзöн ни, сiя пондiс видзчисьны, что басниыс эшö мыйкö йылiсь пондöтчас. А мöдыс, быдöс видзчисьöмыс местö, сымда и горöтчис:

— Но ладно. Пантасьлам, öшö, — сiйöн сорöн бергöтчис, иньдöтчис бöр улица мöдöрас. Нывка, дзик кынмöм, вöрöтчытöг сулалiс одзза местаас, чöлöмöн видзöтiс сылö бöрсяняс. «Неужто сiя нем оз адззы да оз вежöрт?» Öддьöн охота вöлi горöтчыны: «Кывзы жö, принц! Ыслöтышт менö аслат мотоцикл вылын кöть деревня дорöдззас». Казяв керны сымдасö ачыс зонкаыс, Светлана вермис бы мунны сыкöт не только деревня, а нельки му дорöдз, эм кö сылöн кытöнкö дор да пон. Но керны сымдасö Костя ачыс эз казяв, а корны сiйö, нельки шутка могись, ачыс Светлана эз лысьт. Нывка кутiс асьсö сы вылын, что öнöдз вöрöтчытöг сулалö одзза местаас. И кöр мотоцикллöн заводитöм мотор горöн эрзыштiс рытся лöнь улица пасьта да тшакыльöн чапкис глушителлезiсь лöз коколя тшын, сэк вöлись Светлана, саймöтöм, чепöссис местасис, иньдöтчис поспуэз кузя вывлань.

Некöр эшö эз вöвлы сэтшöм сьöкыт чулöтны гожумся кузь рыт. Светлана бергалiс керку пасьта, бытьтö öшöм, кошшис, мыйöн бы позис вийны кад. Но мый бердö бы сiя эз кутчыв, нем тор киö эз пыр, быдöс нильдiс бöр. А сэтöн эшö сылöн орсöмыс, кöдö нывка сы дырна ни эз кывлы, кöдатöг сыбурна гажтöмтчис да кöда öнi улица мöдöрсянь сибалан, то нюжвыв да гажтöма сьылöмöн, то чож да гажа переборрезöн летiс-косялiс сылiсь местатöм сьöлöмсö. И орс зонка кытöнкö посöдз гöгöрас, кыдз эта вöвлi челядь кадö, видзчисьны Светлана, натьтö, эз бы вермы, ась стыдсянь куньöм синнэзöн, кöть недырик кежö вуджлiс бы улица мöдöрас. Но орсöмыс кылiс керкусянь. И мунны да пырны сы ордö кортöг нывка эз лысьт. Чулалiс сiя ылöстöм кадыс, кöр этö позис керны кортöг да могтöг. И гажöтiс кö эшö невночка мый, дак дзир сылöн пантасьöм вылö кöсйисьöмыс. Кыввес: «Пантасьлам öшö», — сiдз вунтöг и кольччисö уявны тöдвылын. Öнiсянь ни вöлi охота, ох, кытшöм охота тöдны öнiсянь ни, кöр, кытöн да кыдз сiя шогмас. Но да позяс разь сымдасö одзлань? И сё жö... сё жö... Ась эта йылiсь Светлана тöдны одзлань и эз вермы, но кытшöмöн бы колiс лоны эта пантасьöмлö сы понда, ас кежас адззис öддьöн бытшöма.

Ольпасяс куйлытöн ни нывка видзöтiс, кыдз пемдандорас, шондiыс пуксьытöн, бытьтö нем керöмсянь, сiя петiс недырик кежö асланыс öшын увтö. Сэтчö жö чожа мый, топ казявтöг, мыччисис и зонкаыс. Повтöг, кыдз и луннас жö, Костя поперегалiс улицасö сы ладорö. Öтамöд коласын баитчытöг, нiя керисö ордчöн оськöв бöрын оськöв. А одзлань, пондöтчöм басни коласас, сувтчынытö эз ни вермö, жагвыв петiсö деревня сайöдз. Оськалiсö Шорсай ыб ладорö. Вöлi мича да лöнь. Деревня весьтö жагвыв лэдзчисис гожумся кизерик ой, кöда пыр пыдöстöм да вылын кымöрын пиялiсö звездаэз. Кытчöдз чулалiсö деревня увтiсь непаськыт оль, зонка висьтасис аслас олан йылiсь.

«...Некöр эг думайт, что сiдз петас. Но да мый сэтöн?.. Абу кö ас коласын öтласа интерес, бурыс вылö надейтчыны оз туй». Сiя гажтöма ыш ловзисис, мыйкö дырна кежö лöньсис. А коккез нуöтiсö сё одзлань, öнi нiя оськалiсö лöньсьöм рудзöг ыб дорöт, кытöн нысся, кыкысся, некин эз вöв. Кытшöмкö кадö Костя öзтiс куритны, оськöв кыным ылына кольччыштiс бöрлань. Светлана эз адззы, но быдсöн вывтырнас кылiс, кыдз мöдыс орöттöг видзöтö сы вылö бöрсяняс, а öткоста, натьтö, сы йылiсь жö думайтö. Нывка сувтiс, бергöтчис паныт. А мöдыс, зэв сибöтчытöн, дивуйтчöмöн пыркнитiс юрнас:

— Колö жö эд... Некöр бы эг думайт, что тэись, принцесса, сэтшöм невеста кöркö петас.

Светлана кылiс, кыдз этна кыввезсянь чужöмö чепöссис вир, и сiя чöлöмöн — вöлi я мый паныт горöтчынытö? — лэдзис синнэсö.

«Учöтсянь эд, учöтсянь öтлаын... быдмим... велöтчим... Быдöс син одзын... а вöт на тэныт... Кыдз этö сiдз, что некöр нельки öтiк письмо эг гиж? Велöтчöмтö эг видзчись... Не ылöстöм я?.. Казялi вот, да, кыдз баитсьö, гырдззаыт матын, а он курчöлт».

«А ме мылякö надейтчи, что быдöс этадз и лоас, и сё видзчиси».

«Былись, Светлана? Кыдз нö ме сымдасö эг тöд? Кыдз эг казял? Сё думайтсис — челядёк. А öнi? Öнi кыдз? Ме жö вот, ачыт адззан...

«И öнi сiдз жö... одззамоз. Не сiдз, дак ме бы важын ни айка сайын вöлi. Эшö велöтчытöн позис».

«Дак вот тэ кытшöм принцессаыс вöлöмыт. Вай жö ме тэнö эта понда окала».

Не окалöмыссянь — эта вотöдз Светланаöс зонкаэс коласiсь эшö некин эз окавлы, — а дзир сы йылiсь казьмöтöмсянь чапкис жарö. Но мед не повзьöтны этöн зонкасö, кыдз эта вöвлi одзжык, нывка сымда и керис, чöлöмöн сайöвтiс увлань синнэсö: видзöт пö, ачыт тöдан, мый керан, сiйö и кер. А мöдыс, повтöг ни, жмитiс сiйö ас бердас, вель дыр кежö, дзик мöртчис, лякасис öгралан тырппезнас сы öзйöм тырппез бердö, кöдасянь долытыс юр бергöтчытöдз паськалiс да йиджис вывтыр пасьта. Вöлi я мыйкö этася эшö, сымдасö Светлана эз ни тöд. Эз тöд нельки сiйö, локтiс я, панталiс я сiя ачыс кыдзкö зонкаыслiсь сы бердö сибöтчöм.

Быдöс адззылöмыссянь лоис сэтшöм кокнит да гажа сьöлöм вылын, что сiйö нем эз видз примитны и быль туйö. И дзир саймöтöм охота да вöрöттöг кольччöм вывтыр, кöдалö мыйкö öнöдз эшö эз тырмы, одззамоз öгралiс-сотчис вöвлытöм да тöдтöм жарöн. Эз тöд нывка, а жаль, что эз тöд, что сiя жö кадö Костя-принц пукалiс аслас öшын увтiсь козла вылын, куритiс сигарета бöрсянь сигарета да дзарышалiс кадiсь кадö улица мöдöрись керку ладорö, видзчисис сэтчинсянь нывкалiсь мыччисьöм. Но сiя сiдз и эз мыччись. А ёркöтчыны сы öшын увтын зонка эз лысьт, сэтчö жö и öшыныс сы жырись, этö Костя тöдiс бытшöма, вöлi карчйöр ладорсянь, сибöтчынытö сы дынö эз позь. Бöртiжык, кöр надейтчынытö кольччис нем вылö, зонка иньдöтчис мöдiк тöдса туй кузя.

Одз асывнас нывка иньдöтчис фермаö. Поспуэс кузя лэдзчытöн, сiя видзöтöв-керис улица мöдöрись паныт öшыннэз вылö. «Сё, натьтö, узьö». Но кыдз жö усис дивуйтчыны, кöр деревня кузя мунтöн нывка казялiс, кыдз сылöн принц сы син одзын петiс Груша-Öгруш керкуись, кытöн, тыдалö, чулöтiс ой. Нывкасö Костя тожö казялiс. Недолытсянь сiя, тыдалö, мöдiс бы сайöвтчыны Светлана син одзись, но öтöрас вöлi югыт ни. И мый сылö пырис юрас, — мыччавны, бытьтö нывкасö то ли эз тöд, то ли эз казяв, а пантасьöмныс увья бергöтчис бöр бокись улицаö, иньдöтчис деревня сайись ыб ладорö.

Груша-Öгрушыс и вöлi Костялöн сiя важ модзыс, кöда кольлалiс зонкасö армияö, но бöр бертöмсö видзчисьны эз понды, год бöртi петiс мöдiк сайö, вайис ныв да янсöтчис. Öтнас овтöн ни, Öгруш бокись адззис эшö мöдiкö и öнi домалöм бöжöн олiс мамыс дынын, быдтiсис, уджалiс фермаын высьтiсисьöн.

Кывсьы Светланалö ас синнэзöн адззылöм йылiсь кинсянькö мöдiксянь, натьтö, некöр бы эз и верит. А öнi этаись и воштiсьнытö вöлi некытчö, охота или не — ковсис веритны. «Сiдз и тöд, бöра талун высьтiсьнытö эз мун». Но этася талун Öгруш вылö вöлi нывкалöн эшö и мöдiк, не учöтжык лöг.

Кöсйöм пантасьöмыс эта бöрсянь ны коласын эз ни шогмы. Кынымкö лун бöртi Костя принц петкöтiс сарайись мотоцикл, чапкис коляскаö тöбалöм сумка, иньдöтчис бöр. А Светлана сiдз и кольччис сiйöн гажтöмнас, кöдöн олiс даскыным год сьöрна.

— Мый нö ме сулала, куканнесö ог лэдзав, — кватитчöмöн горöтчис Таисья öтамöд коласын чöлыштöм бöрсянь, оськöв кыным ылына муныштiс воротаэз ладорö.

— Оз ков, Таисья, талун куканнесö лэдзавны, — шыасис зоотехник. — Чулалiс месяцыс. Öшлыны пондам.

— Да? — гажвевйöн дивуйтчыштiс куканьвöдитiсь. Бура ли умöля шогмис Таисьялöн месяц сьöрна подасö вердöм, но уджавнытö сiя старайтчис. Этасянь и öшлiсян лунсö сiя видзчисис важын ни. Кыкнанныслö охота вöлi тöдны, мый мыччаласö привессэз. Кадсö öштытöг, нывкаэз кутчисисö удж бердö.

Таисья кежалiс чомö да петкöтiс сэтчинiсь гоз ведра мымда пизь. Сы сьöрö куканнес асьныс и вöтчисö и кайисö весаэз вылöдз, нельки поводок некытшöм эз ков. Кытчöдз нывка сулалiс пизь ведранас весаэз бердын, зоотехник öшлiс. А кöр Таисья иньдöтчывлiс воротаэз ладорö, кукань вöтчис сьöрсяняс. Бöр нывка бертлiс öтнас ни, кытсалiс да кайöтiс весаэс вылö мöдiкöс. А воротаэз сайö лэдзöмыслö нем эз кольччыв, кыдз кежны осьта завор пыр подакокувтö.

Сёрöнжык сэтчö жö, кукань карта дынас, локтiс аслас «Беларусь» вылын Поликарп дядь, вайис кубометр етш вöснитик горбыль. Öтлаын сыкöт вöлi и Светланалöн айыс, Савелий Григорьевич. Сэк кежö нывкаэзлöн даскыным кукань вöлiсö öшлöмöсь ни.

Ректiсьöмныс бöрсянь Поликарп дядь недырик кежö кежалыштлiс нывкаэз дынö, видзöтöв-керис ны удж вылö.

— Не шутка могись, видзöта дак, Таисья, уджавнытö кутчисьöмыт.

— Мыля, Поликарп дядь?

— Öддьöн ни то бытшöма тэнат быдöс петö. Вот и куканнет, кыдз поннэз, сьöрсянят вöтлiсьöны, нельки вессэс вылö асьныс кайöны.

— Кытчö нö воштiсясö, тшыгöсь да? Ме жö нiйö пизьöн бöбöтла.

— Нiйö-ту пизьöн, вежöрта. А мыйöн тэ бригадирсö вермин бöбöтлыны — некыдз ог.

— Мый жö тi, Поликарп дядь, кöдö оз ков... — Эта жö басни коста Таисья перыта öзйыштiс чужöм вылас. — Некöр ме сымдасö эг думайт...

— Да не, Таисья. Нем ме тэ йылiсь умöльсö... эн пол. Кыдз только сiдз вермис лоны: то неважын турунсö татчö эз лэдз ваялны, ас öшын ултас пöрлалiс, то быд лун ачыс наряд пондiс сетны.

— А сылö кöдöрсянь тöв, Поликарп дядь, сыланьсянь и мывкыд, — шыасис зоотехник.

— Сiя жö, тыдалö, и эм, — горöтчис тракторист, сiйöн сорöн сайöвтчис бöр воротаэс сайö.

Савелий Григорьевич нывкаэс дынö эз сибöтчыв. Сiя кутчисис чер бердö, пондiс вольны воротаэз сайын горбыль. Дзир павжун гöгöр зоотехниклöн айыс пелитчис непаськыта осьтöм воротаэз коласöт карта пытшкöдз, вель дыр видзöтiс яслиэз гöгöр, кöднö колiс вочны, и вöлись сы бöрын оськöвтiс матöжык инькаэс дынö.

— Павжнайтнытö разь од думайтö?

Зоотехник дзар керыштiс часыэз вылö, сэсся сiдз жö öшлытöм куканнез ладорö.

— Нем ни эта мымдасö сэтöн видзны.

— Да. Öшлыны да лэдзавны колö, — сэтчö жö шыасис и Таисья.

— Асьныт тöдат, — Савелий Григорьевич дзимлялiс кисис чер, öзтiс куритны, иньдöтчис гортö. Нельки павжун бöрсянь, кöр вöлi öшлöм да лэдзöм подакокувтö медбöрья кукань, а Савелий Григорьевич бертiс бöр да вились кутчисис удж бердö: мыйкö меряйтiс, пилитiс да дорис — мунны павжнайтны нывкаэз кыдз бытьтö эз и думайтö. Нiя пырисö конюховкаö, пуксисö неыджыт пызанок сайö, кутчисö лыддьыны.

Лыддисис ачыс зоотехник. А куканьвöдитiсь видзöтiс сы удж сьöрын, видзчисис.

Зоотехник вель дыр (сiдз мыччассис Таисьялö) мыйкö чинталiс да содталiс, янсöтiс да ыждöтiс. И, кыным одзлань, чужöмыс сылöн гажмис сё öддьöнжык да öддьöнжык. Вот вöлись Светлана петкöтiс медбöрья колана цифра, лэдзис кисис ручкасö осьта журнал вылö, шовкнитыштiс кынымиськö оча ки долонь.

— Ура! Таисья! Тонна да джын вылö куканнес месяцнас содöмöсь!

— Быдöнныс-ту? — повзьыштöм сорöн шыасис Таисья, жмитыштiс морос бердас киэсö. — Тьфу! Ме думайтi, кöть вит мымда лоас. Мыйлö нö сэк колiс лунiсь лун вердчансö ытшкыны да ношаэзнас кыскавны?

— Да чöв тэ, «вит мымда». Не вывтi я уна перво жö пондöм ковсьыны? Сэтшöм привессэс некöр и лонытö оз вермö, колö тöдны дак.

— Да уж, натьтö,

— Не «да уж, натьтö», а былись ме тэныт висьтала. — Но и ась. Озö и озö, — согласитчис нывка. — А сутки кежас, сутки кежас öтiк куканьыс мымда вылö содiс?

Зоотехник вились кутчисис ручка бердö, пондiс янсöтны öтлаö петкöтöм привессö суткиэз да юррез вылö.

— Вот, видзöт. Шестьсот шестьдесят граммöн. Етша ли мый ли? Думайтны эд только, Таисья, а? Да миян колхозын эшö век сьöрна сэтшöм привессэс эз вöвлö. Нельки вöтöн некин эз вöтась. Мый тэ, кывзы жö, юртö öшöтiн? Сьывны, йöктыны эта бöрсянь колö.

— Вöлi бы мыйсянь. Смех тай. Менам жö обязательствоэс — восемьсот. А колö, мед килограммся не етшажык вöлi. — Таисья гажтöма ловзисис, гажтöма жö гогинялыштiс юрнас.

— Да лоасö эшö, Таисья, лоасö. Вот адззылан, что озö. Пондыны кö одзлань этадз уджавны, дак не только килограммöн — унажыкöн лоасö.

Нывкаэз сё эшö сёрнитiсö асланыс удж йылiсь, кöр видзчисьтöг оссис конюховкаись ыбöс. Порог саяс мыччисис Светланалöн томжык воныс, Борис, кöдö годöн одзжык кольлалiсö служба вылö.

— Позьö тiян дынö? — юалiс зонка, паймыштöм кодь нывкаэзсянь ответсö видзчисьтöг, лажмыта мышкыртчöмöн, оськöвтiс порог омöн. — Здоровöн овлат. Здравствуй, Таисья, — кисö сеттöг, дзик тöння янсöтчöм бöрсянь, горöтчис зонка. Эта увья Таисья нельки чужöм вылас эз вежсьышт, кыдз часто овлö нывкаэзкöт ки понiсь здоровайтчöм коста. Дивуйтiс кö нывкаöс мый, дак сё сiя жö, Борислöн нач видзчисьтöм локтöмыс, а эшö öддьöнжык этася — сы вылын кöмкöт-паськöмыс, кöда вöлi нач не солдатскöй. Пуджöм соса, тыдалö, новйöмовöй ни, радзза йöрнöс, новйöмовöйöсь жö весöтöм да гладитöм гражданскöй брюкиэз, не солдатскöй туфлиэз, пöртiсö сiйö студентö, кытшöмöн зонка и мунiс служба вылö сельскохозяйственнöй институтiсь медодзза курс кончитöм бöрсянь. И не кыдз солдатлö жö, а кыдз студентлö, кытшöмöн Таисья тöдiс сiйö годöн одзжык, кытшöмкöт шочыника усьлiс пантасьлыны, а мукöд коста, кöр зонкаыс юасьлiс, висьтасьны аслас велöтчöм йылiсь, кытшöмлö нывка завидуйтiс ас кежас, кыдз сельхозинститутын велöтчисьлö, öнi горöтчис:

— Здравствуй, Борька. — А кöр казялiс неладно горöтчöмсö, сэк вöлись пондiс вежсьыны чужöм вылас. Но не ачыс зонкаыс, не сылöн сойыс Таисья чужöм вылiсь перыта вежсьöмсö дзик эз и казялö. Некöдыс да немöн сымдасö эз мыччав.

— Мый, отпускник, оз пукассьы гортын öтнатлö? — юалiс Светлана воныслiсь, сы бöрсянь вöлись Таисьяыслö юöртiс: — Отпускö неделя кежö лэдзöмöсь. Тöн гортö локтiс.

— А мый сэтчин весь пукавнытö, — шыасис зонка. — Межаэсö гортiсь ытшки, зород местасö лöсьöтi, пес баняö лэдзчöтлi, ва кайöтлi. Павжнайтiм вот неважын папöкöт. Сiя татчö локтiс, а ме сы сьöрö. Верма тiянлö отсавны мыйкö, примитат дак. — Зонка видзöтöв-керис ас гöгöр, пуксис лажмытик скамья вылö.

— Одзжык бы локтiн — примитiм. А öнi миян уджыс керсис ни.

— Но и кыдз? Ыджытöсь я привессэс петiсö? Таисья чöлöмöн дивуйтчыштiс зонкаыс юасьöм вылö.

— Привессэз, Борька, бытшöмöсь, вöвлытöмöсь, колö висьтавны. Нельки оз и веритсьы. А вот куканьвöдитiсьыслö, — Светлана качыкнитiс юрнас Таисья ладорö, — оз гленитчö, учöтöсь, баитö.

— Учöтöсь, конешно. Кытшöм нiя привессэз, кöр нельки обязательствоэзöдз эг вермы кыскыны?

— Но тэ жö, Таисья, вöлись пондöтчан уджавнытö, — гажвевйöн шыасис зонка. — Медодзза месяц уджалан. А пондан кö одзлань этадз старайтчыны, дак, натьтö, и гырисьжыкöсь вермасö лоны.

«Кысь сiя тöдö, мымда да кыдз ме эстöн уджала?» — вились дивуйтчыштiс Таисья ас кежас.

— Но тэ, шуан, павжнайтiн, а ми эшö тшыгöсь. Мунам, Таисья, горттэзö, сёйыштны колö. А тэ, Борька, отсасьны локтiн дак, мун айöлö мыйкö отсав. Таисьяыскöт сёрöнжык баитат. Шутитöмöн содтiс: — Öнi сiя тшыг да лёк.

Öтiк ыбöсын конюховкасис быдöнныс петiсö. Нывкаэз иньдöтчисö горттэзö, а зонка кежис кукань карта ладорö, айыс дынö.

Гортын, пызан саяс пукавтöн, Таисьялö вились усис тöдвылас зонкаыслiсь сэтшöма нимсö горöтчöмыс. И вились, нельки öтнасыслö, лоис недолыт. Асьсö дорйöм могись, сiя думайтiс: «Кыдз нö эшö этася ме сiйö шуа, кöр не гортiссез сылöн, не ёрттэз, некыдз мöднёж эз шувлö? Борисöн? Нельки кыв оз бергöтчы. Тöдöмöн бы, дак некыдз абу и колöм шуны».

Бöр фермаас Таисья бертiс сёрöн ни, перво жö кежис карта пытшкö, кутчисис вилаэз бердö, пондiс лэбтавны яслиэзö вайöм турун.

Сэк кежö Савелий Григорьевичлöн лунся уджыс вöлi уджалöм. Петтöнняс куканьвöдитiсьыслö сiя дженытика юöртiс:

— Эг ештö дöс, мый колiс. Ашын öшö усяс воллыны.

— Но и ась. Ашын, дак ашын. — Вилаэз вылö лэбтöм ношаöн Таисья оськöвтiс яслиэз ладорö, сы коста жö бöрсяняс кылiс:

— Отсыштны, батi, невночка?

Шыасьöмыс вöлi зонкаыслöн, кöда мыйкö вылö кольччыштiс айыс сьöрись. Ачыс Савелий Григорьевич эта коста вöлi воротаэс сайын ни.

Панöвтöм могись Таисья мöдiс бы мыйкö горöтчыны. Но эшö этася одзжык кылiс, что вились, кыдз и конюховкаас, пондö вежсьыны чужöм вылас, а паныта кыввес перво жö мылякö эз адззисьö. И мед только не сетны казявны ассис вежсьöмсö паныт сулалiсь зонкалö, увлань лэдзöм синнэзöн нывка мышкыртчыштiс вилаэз сьöрö, но лэбтыны ношасö эз ни ешты. Зонка оськöвтiс зэв, кутчисис вила ороп бердö.

— Ме эд эг тшöкты отсасьнытö. Ачым лэбтала, не первуись.

— Кöр нö тэ сымдасö öтнат лэбталан. Уна ни кадыс да.

Горöтчыны нывкалö кольччис нем. Ковсис босьтны мöдiк вилаэз.

Чöлöмöн, кыдз бытьтö быд берсяыс ны коласын вöлi важын ни баитöм, быдса тележка мымда турун вöлi лэбталöм. Этадз Таисья понда вöлi нельки буржык, но öтiк дума сы юрись сё жö эз петав. «Мыйлö сылö ковсис отсавны? Кадсö некытчö вöлi воштыны? Или эшö мый этася?» Но ответтэс эстöн вермисö лоны сымда жö, мымда и вопроссэс, и сорасьтöг адззыны ны коласiсь коланасö вöлi не кокнит.

Сiя кадö, кöр вилаэс вылын бöрья турун ношанас зонка оськöвтiс яслиэз ладорö, Таисья думайтiс: «А одзлань мый?» Öнi, кöр öтласа уджыс керсис, сылö мылякö пондiс кажитчыны, что одзлань мыйкö эшö лоас. Колiс я сылö этö, эз я, — аслас недолыт увья Таисья сымдасö эз вежöрт. Сылö дзир думайтсис, что мыйкö вермас лоны эшö. И этасянь, кыным одзлань, сьöлöмыс сы моросын ёткöтiс сё вынöнжык да вынöнжык. И мед вермыны кыдзкö мездiсьны эта недолытiсь, эта полöмись, эта сьöлöм ёткöтöмись, кöда увья нывка нельки умöля пондiс кывны, мый керсис сы гöгöр, сылö охота лоис öнi жö уськöтчыны кытчöкö, дзебсисьны, сайöвтчыны зонкаыс син шогья. Но сы коста жö кытшöмкö мöдiк ылöсöн ачыс вежöртiс, что керны сiдз лоас небасöк, и сiйöн вöрöтчытöг кольччис сулавны одзза местаас. «Мый ме сылö отсалöмыс понда висьтала?»

Просмöм вилаэзнас Борис сибöтчис Таисья дынöдз, сетiс бöр, сэтöн жö пыркöтöв-керис ассис паськöмсö, кöть и пыркöтнытö сы бердiсь öддьöнсö вöлi нем — уль туруныс эз лякась, веськöтчис, горöтчис:

— Вот и лэбтассис. А кöр бы тэ сiйö öтнат? Эм эшö мыйкö талун кежö кернытö?

— Спасибо... сэсся нем. — Öтдруг иньдöтчисö воротаэз ладорö.

— Но мый сэк... — Зонка нёджжöвтiс часыэз вылö.

— Ашынöдз сэк, Таисья. Извинит, пожалуйста, что баитнытö нем йылiсь эг ештö. Но ми эшö пантасям. А часöт меным баняö колö. Гортын, натьтö, видзчисьöны ни.

Колiс я мыйкö горöтчыны паныт, позис я — сымдасö Таисья эз тöд. Сiя дзир öтпырись и то недырик кежö лэбтыштiс зонка вылö синнэсö, сэтöн жö уськöтiс тöдвылас öгралан чужöмсö, мышкыртчис бöр, оськöвтiс подакокувт ладорö.

— Тэ он лöгав ме вылö? — юалiс Борис нывкаыс сьöрö.

Таисья сувтчыштiс, джынысви бергöтчыштiс вывтырнас зонкаыс ладорö, казявтöг шынньöвтöм коста паныт шыасис:

— Мый понда бы?..

— Ашынöдз сэк.

— Но, — кыдзкö казявтöг петiс сы тырппез коласiсь, и сiя жö, аслас дженытика шыасьöмыс лöдсыштiс сыын одзза недолытсö.

Нёджжöвтыштны бöрланяс, кöть öтпырись, заворняэсö кыскавтöн, Таисья сэсся эз ни лысьт. А кöр дзар керыштiс йöр мöдöрсяняс деревня ладорö, зонкаыс эз ни тыдав. «Мый эта мекöт сэтшöмыс? Мыйсянь? Некытшöм жö причина абу... Некöр тай сымдаыс эз вöвлы».

Куканнесö йöртöм бöрсянь Таисья вöлись казялiс, что аслас недолыт шогья яслиэзас пыртлöм турунсö пизьнас сорлавны вунöтiс.