Мыррез городын

Чулалiс дас годся унажык кад, кыдз ме мунi удж вылiсь, природа дозоритан окружнöй обществоись. Но одззамоз гожуммезнас, быд год, кöть öтпыр-кыкись, вынсьöтча вöвлыны быд сэтшöм пельöсын, кытöн кöркö усис пантавны мыйкö вöвлытöмö да адззывлытöмö, казявны да тöдсасьны мыйкöткö интереснöйкöт да нельки дивуйтанакöт, мый часто и омöн округ пасьта сэсся некысь он пантав. Öтi-мöдi сэтшöмыс йылiсь эстöн ме и висьтаси ни. Жаль вот только, что сы местö, мед сэтшöм местаэслö содны, лоны унажык да пантасьлыны частожык, кыным одзлань, нiя миян сё чинöны да öшöны, и öшöны, позьö шуны, век кежö, нач следтöг.

Эта увья некыдз ог вермы чöвны, мед не казьмöтны эстöн лыддьöтiсьыслö нiя кривощековскöй дуб да тополь йылiсь, кöдна кольччылiсö миянлö городас Иван Яковлевич бöрсянь, кыдз географическöй, историческöй, национальнöй, культурнöй да природнöй памятниккез. Öтыс ны коласiсь, топольыс, быдмис Горький нима улица вылын, паныт учёнöйыс керкулö. Мöдыс, дубыс, кöда вöлi дзир öтнас не только город, но и быдсöн округ пасьта, быдмис челядь паркын. Кыкнанныс нiя, сiдз жö, кыдз быдсöн челядь паркыс да и городскöйыс мымдакö тожö, вöлiсö садитöмöсь И. Я. Кривощёков киэзöн эшö 1892 годö. Сiдзкö, 1992 годö нылö тырис ни бы сто годöн. Но асланым невежество увья мийö эгö на велалö, ог кужö да ог вермö отир моз дозирайтны сы сьöрын, мый миян понда керöм да кольöм миян предоккезöн. Этасянь часто и овлö сiдз, что дозирайтöмыс местö ми стрöйдам да виям сiйö, мый керöм миян вотöдз, миян понда, и мый ми асьным кернытö эшö эг ештö, ог кужö да ог вермö, висьтавны дженытжыка — прокным оз тырмы.

Эшö 1970-й годдэзö ме неöтпырись лöсьöтлi горисполкомлö решеннёлiсь проект, мед сiйö примитöмöн кривощековскöй дубсö да топольсö керны (объявитны) национальнöй природнöй памятниккезöн, а öткоста ловья природнöй памятниккезöн сылö мортыслö, кöда киэзöн нiя вöлiсö садитöмöсь. Эд думайтны кö бытшöмжыка, дак несьöкыт вöлi вежöртны, что былись нiя сэтшöммезöн и вöлiсö, колiс дзир, мед эта йылiсь тöдiс округись быд олiсь, гордитчис нiйöн да дозирайтiс ны сьöрын. Но сэтшöм решеннёыс эз вöв примитöм, и сэтшöммезöн, кытшöммезöн нiя вöлiсö былись, гижöт вылас эзö лоö. Висьтассяс унажык, эз лоö не только памятниккезöн, кытшöммезöн вöлiсö — эз лоö немöн.

Нiя жö годдэзö И. Я. Кривощековлöн керкуыс вöлi разьöм. Сы местö да сы сад местö, кöда вöлi садитöм керку гöгöр, сувтiс партийнöй аппаратын уджалiссез понда куим сувда каменнöй керку, нимтöм отирыс басниын «дворянскöй гнездо».

Думайтсис бы, что разьöм керкуыс местö медодзза учёнöй-коми-пермяклö сувтöтасö городас памятник, то ли кöть «дворянскöй гнездо» стена бердö öшöтасö мемориальнöй доска. Но чулалiсö кыкдас годся унажык, а не öтыс, не мöдыс ны коласiсь сiдз и абу. Быдöс местö, учёнöйлiсь керкусö да садсö разьöм бöрсянь, памятникнас кольччис тополь, кöда сулалiс паныт эта месталö и некинлö да немöн эз мешайт. Но невежествоыс, кöдаö ми пасьталöмöсь, кыдз колана паськöмö, и сiйö эз ордйы. Кынымкö косьмöм ув увья и ачыс топольыс сёрöнжык вöлi тожö пилитöм.

Кытöн быдмöны городас пуэз? Вежöртана, что паркын. Эд сы понда сiя и эм парк, мед сэтчин быдмисö пуэз. Кривощековскöй дуб-памятникыс, вежöртана, тожö пу и тожö быдмис паркын. Не öтiк поколеннё сьöрна аслас олöм-быдмöмöн сiя гажöтiс городын олiсь отирöс. Сы вуджöрын нiя дзульзисö-орсiсö да öктiсö асланыс челядь кадö чачаэз местö сылiсь киссьöм кöдзыс — жёлуддез. Школаын велöтчытöн нiя вились тöдсасисö сыкöт, кыдз вöвлытöм миян местаэзын быдмаскöт, гажöтчисö да гордитчисö сiйöн, что ны неыджыт городын ась кöть öтiк, но эм настоящöй дуб, öктiсö асланыс гербарийезö сылiсь басöк узöра листтэз.

Сёрöнжык, дружитöм-радейтöм коста ни, эта дуб увтын уналöн вöвлi и пантасьлан места. И мымда кывлiс ны коласын пым окасьöм да кытшöм долытöсь баитсисö басниэз, эта йылiсь тöдiс дзир öтiк дуб. Но учöтсянь да томсянь гажöтчан местаыс мортыс тöдвылiсь и век сьöрна оз вун. Сiйöн эта дуб дынö, кöркöся пантасьлöм да гажöна чулöтöм кадсö тöдвылö уськöтöм могись, нiя вовлiсö и сёрöнжык, вовлiсö медперво асланыс ныв-зоннэзöн, а сёрöнжык — внук-внучаткаэзкöт. «Но кыдз тэ эстöн, миян дубиньöй? Ловья эшö кытчöдз?» «Ловья, ловья». «Вот и бур. Ась ен тэныт сетас здоровье». «Спа-си-бо». «А тöдан жö он, кыдз ми эстöн кöркö?..» «Да тöда, тöда-а», — аслас чорытвевья листтэзöн тöв увтын кышöтöмöн, шыасьлiс паныт дуб. Эта дуб одзын том отир осьтлiсö сэтшöм сокровеннöй тайнаэз, кöдна йылiсь нельки асланыс аймаммезлö казьмöтны эз лысьтö. Тöдiсö, веритiсö, что сiя некöр да некинлö оз висьтась. Вöвны бы отирсö гажöтöм понда и одзлань сiдз жö, да не. Нельки паркын садитöм дуб-памятниклö овны одзлань эз сетö.

1980-й годдэзö, сэк кежö джынысви стрöйдöм ни челядь паркын, городiсь архитекторлö юрас пырис строитны челядь сад. Кöр мортлöн колана ылöсыс оз тырмы, юрö вермас пырны быдöс, мый колö и оз, а частожыксö пырö сiя, мый некинлö оз ков. Сiйöн и пуксьöтöм вöлi челядь паркын, тшöтш парк шöрас, топ нарошно, а батi, былись нарошно челядь садлöн зданнё, да сiдз, что кривощековскöй дуб-памятниклö овнытö местаыс эз ни кольччы. И сiдз жö, кыдз и Иван Яковлевич öшын увтiсь топольыс, — дубыс вöлi пилитöм. Сiдз горисполкомын мыр кодь юралiссез увья талун кежö этна кривощековскöй памятниккезiсь город пасьта кольччисö тожö дзир öтiк мыррез. Медодзза учёнöй-коми-пермяк киэзöн садитöм пуэз, кöдна басöка век сьöрна гажöтiсö быд том и пöрись горожанинлiсь синбур да кöднöн отирыс вермисö и ошшасьны, и гордитчыны, кыдз национальнöй достояннёöн, не талун, не ашын — некöр керны сымдасö оз ни вермö.

Мыйлö ме висьтася быдсöн эта йылiсь? Мед быд том и пöрись лыддьöтiсь одзлань кежö тöдiс, кин увья эзö лоö городын кривощековскöй памятниккез да кин кытшöм след кольö ас бöрсянь национальнöй культура зорöтöм историяын. А эшö... Талун кежö стрöйдöмöсь (пилитöмöсь да кералöмöсь) не только торья кривощековскöй памятниккез. Öнöдз вывланьын вöлi казьмöтöм ни, что челядь парк местö сувтiс челядь сад. Сiдзкö, колö вежöртны, что паркыс эстöн сэсся абу ни. Но абу сiя и некытöн мöдiклаын. Вöлi да эз ло.

Сэтшöм жö незавиднöй положеннёын талун кежö и И. Я. Кривощёков нима городскöй парк, кöдалö кольччö дзир нимыс. Ачыс жö паркыс сэтшöмыс вылö немöн оз ни вачкись.

Не öтiк кадö эстöн, и сытöг ни дзескытöла садитöм пуэз да кустарниккез коласын строитсисö: то гожумся театр, то столовöй, то челядь понда сказочнöй кремль-городок, кöдкоста кыдз колiс и эз ков гарйисö, кералiсö да орлалiсö пуэзлiсь вужжез. Ас коласын дзескыт увья да вужжезнысö стрöйдöм-кералöм увья парксис унажык пуэс öнöдз косьмисö ни. Позьö видзчисьны, что и ныкöт неунаыскöт, кöдна талун кежö кольччöны эшö ловйöн, чожа мый лоас сiя жö, но... Городскöй паркын И. Я. Кривощёков киэзöн садитöм пуэз да кустарниккез коласын эм эшö öтiк куст, кöда, кыдз и челядь паркын вöлöм дубыс жö, дзик öтiк. Некытiсь округ пасьта сэсся сiйö он пантав.

Первуись сiя усис меным син вылö кыкдас годöн одзжык, тулыснас, тшöтш цветитан кадö. Сэк сiя мыччассис не кустöн. Сулалiс öтiк, томсянь унаись чеглавлöм и этасянь метр кык сувда, чукыля-викыля пуок. Чеглалöмыссянь жö, натьтö, сiдз кыдз сулалiс сiя зэв матын туёк бердсянь, быдöс увтiсь уввес вöлiсö кöсöсь. Ловьяэс кольччöмась дзир йылас, кöдна, тшöка петöм да паськалöм листтэзсянь, аркмöтiсö басöк шапка. Негырись, дженытик заока, тшöка пукалан, вöснитик да небытик пластинаа листтэзöн некытшöм тöдса пу нето кустарник вылö сiя эз вачкись. Эз вачкись пуок некытшöм мöдiк вылö и аслас цветитöмöн. Нёль лепестока поснитик цветоккес вачкисисö ыбкушман цвет вылö. Но сiдз кыдз нiя вöлiсö не вежöсь и не чочкомöсь, а кыдз и листыс жö, дзир сысся югытжык-зелёнöй рöмаöсь, то листтэс коласiсь öддьöнсö эз и янсалö. Кытшöм бы пуокыс эз вöв, ме понда сiя виль, адззывлытöм да тöдтöм, и этасянь ни дона да интереснöй.

Гожумбыт сьöрна ме вöвлi сы дынын унаись, видзчиси цветитöм да, то ли ягöд, то ли кöть кытшöмкö кöдзыссэзлiсь зорамöм. Но не öтсö, не мöдсö видзчисьнытö сiдз и эг вермы. Не ягöд некытшöм, не кöдзыссэз, кöдналö лонытö колiс бы, сiдз и эз аркмö. Причинаыс лоис вежöртана сёрöнжык, кöр медицинскöй литература отсöтöн усис тöдны не только асьсö пуоксö, но и сылiсь аскодьöм особенносттез.

Эта кульльöм. Но не сiя видыс, кöда быдмö быдлаын миян вöррезын да шусьö роч кыв вылын крушина ольховидная или ломкая, а нач мöдiк. Эта крушина слабительная или жостер. А оз сет сiя не ягöд, не кöдзыссэз сы увья, что быдмасыс эта, кыдз, шуам, облепиха жö, двудомнöй. Висьтавны мöднёж — öтiк куст вылас цветтэс вермасö лоны дзир куш мужскöйöсь нето куш женскöйöсь, и опыляйтчынытö сылö лоö немöн. Эта понда колö эшö öтiк куст: мужскöй цветокаыслö — женскöй цветока, или мöднёж: женскöй цветокаыслö — мужскöй цветока. А сiдз кыдз городскöй паркын кустыс быдмö дзир öтнас, цветтэслö опыляйтчыны лоö немöн. Эта увья не ягöд, не кöдзыс аркмöтны сiя оз вермы.

Олö миянын виль быдмасыс не öтiк поколеннё сьöрна ни, не оз кынмы, не оз кув. Сiя öткаса пуоклöн, кöдакöт ме тöдсаси кыкдас годöн одзжык, öнöдз векыс овсьöм ни, и сiя косьмöм. А вужжес бердсянь лэбтiсьöм виль летöрöс, кöдаись öнöдз лэбтiсьöм сы сувда жö куст.

Быдмаслöн доныс не только кыдз кривощековскöй памятниклöн, кöда бесспорнöй. Дона сiя округ понда кыдз нач виль да сэтчö жö эшö и целебнöй. И вöлi бы öддьöн бур, пыртiсö кöбы юнаттэз ли, природа ли радейтiсь отир эта кустлö сы родiсь ёрттэзöс, мед вöлi мыйкöт опыляйтчыны. Сэк бы сiя вермис сетны кöдзыс да паськавны жагвыв округ пасьта. Но кольччас кö одзлань кежö талуння состояннёын городскöй парк, нем бурсö этасянь видзчисьны оз позь. Ми век кежö янсöтчам эшö öтiк виль культуракöт, кольччам сытöг, мый керис да колис миянлö И. Я. Кривощёков.