Ыджыт ваэз коста

I

Одз асывнас, кöр деревня пасьта и öтiк биок эшö эз тыдав, эз кыв некöдöрсянь нельки поннэзлöн вувтöм, сьöкытвевйöн тöбалöм кузь волыса сумкаöн Аня петiс гортiсь.

Порог сайöдззас, кыдз и пыр гортiсь мунöм коста, сiйö кольлалiс пöрисьвевья ни, но чож эшö кок йылас старуха-мам. Айыс киэзöн вочöм пимиэзын да пемыт рöма шоныт шаль увтын петiс öтöрись посöдзöдз, вевдöрись поспу дорас сувтчис.

— О-ё-ёй, дитя, öддьöн эд то, видзöт, пемыт öтöрас. Одз öшö да. Он, натьтö, тэ лысьты Мысöдззас öтнат муннытö.

— Мыля нö ог? Тöдса туйыс да... — шыасис Аня, быд поспу вылö, дзик нiйö лыддьöм могись, кыкнан кокнас сувтчышавтöн. А мамыс топ эз и кыв сылiсь паныта шыасьöмсö, ассис пондöтöм баснисö одзлань нуöтiс:

— И мыйлö тэ сэтшöм одз гортсянь тэрмасян? Мунiн бы эд то югытiнас, лунся автобусыс вылö. Павжун бöрсяняс, кывсьö, сiя сэтчинсянь вöрзьö.

— Сёр ни, мама, меным сэк лоас.

— Но ачыт тöдан... мунан дак... Мун, Кристос тэкöт.

— А тэ пыр, эн ни сэтöн кынтiсь.

Поспуэз бердсянь Аня эшö öвтыштiс прос кинас мамыслö, сьöкыт сумкасö лажмыта му бердöттяс нöбöтöмöн, оськöв бöрын оськöв иньдöтчис пöрись да учöтсянь тöдса стын пöлöн увлань. Быд оськöв коста сы пимиэз увтын негорöн муркöтыштлiс ой сьöрна лажмытика усьöм лым. Эта сьöртi позис вежöртны — погоддяыс сулалiс некöдзыт.

Эстöн вöлись нывка ловзисис кокнитжыка. Мамыскöт янсöтчöм бöрсянь сiя дзик мезмис кытшöмкö сирвезiсь, кöда видзис дзикталöмöн не только сылiсь думаэсö, но и баснисö.

Весь бöбöтлiсö мама-ныла öтамöднысö, кöр мамыс бытьтö некыдз эз вежöрт нылыслiсь одз мунöмлiсь причинасö, а мöдыс бытьтö эталö веритiс. Кыкнанныс нiя одзлань ни бытшöма тöдiсö, что сэтшöм пемыт кадö да öтнас, сэтшöм сьöкыт сумкаöн да подöн, сы ылына да эшö асывся автобус кежö мунны Аня некöр оз и думайт. Сiдзкö, и керны этö былись оз понды. И эзö кö нiя баитö ас коласын эта йылiсь веськыта, дак дзир öтамöд одзын недолыт увья. Быдыс ны коласiсь и тöдiс, и вежöртiс, что этадз нылö кыкнанныслö кокнитжык.

Джын километр ылына туй колас деревнясö поперегавтöн сё жö ковсис мунны подöн. Сумкасö киись киö вежлавтöн да тэрмасьтöнняс, нывка эстöн ни пымалiс люзь. А кöр сiя петiс дорись улица вылöдз, кöда пыр кыссис öтмöдöрö тракт, вöлиськö ловзисис быдсöн мороснас, магазин весьтын сувтiс. Тэрмасьны одзлань некытчö.

Эстöн, магазин одзас, вöлi автомашинаэзлöн аскодьöм сувтчанiн. Вежöртана, что унажыкыс ны коласiсь сувтчывлiсö магазин увья. Но вöвлi кö кытшöмкö шофёрлöн прос места да адззисьлiс кö кин мунiссез коласiсь, пуксьöтлiсö сысянь жö. И ковсис кö кинлö Губановаын олiссезлö мунны Мысöдз нето Пятигор ладорö кытшöмкö попутнöй транспорт вылын (автобусыс эстi эз ветлы) нiя вовлiсö медодз магазин дынö.

Вот и Аня öнi локтiс да сувтчис сэтчö жö. Сумкасö сiя лэдзис кок увтас, дзар керыштiс часыэз вылö, а сэсся вель дыр кежö бергöтчис тракт ладорö, нёджжасьöмöн пондiс видзчисьны.

Эстöн сулавтöн ни сылö пондылiс усьны тöдвылас быд берсяыс. Но талун нывка вынсьöтчис думайтны нач не сы йылiсь, мый вöлi кöркö да эз ло öння кадö, а сы йылiсь дзир, мый эшö некöр эз вöв сы оланын, но талун вермис лоны. А эта вöвлытöмыс сiйö öткоста и полöтiс, и гажöтiс.

II

Аслас видзчисьöм-надейтчöмын нывка эз сорась. Дас кыным минута бöртi, кöр кадыс вуджис квать саяс, кысянькö керöс мöдöрсянь тракт весьтöт енöжсö жагвыв пондiс югдöтны кытшöмкö вöрöтчан югöр. Сы перыта вынсялöм сьöртi позис вежöртны, что югöрыс öтiк местаын оз сулав, вöрöтчытöн сибöтчö талань. Эта вермис лоны трактор нето автомашина. Недыр мыйись югöрыс сьöрö мыччисисö и асьныс фараэз да югдöтiсö ас одзсиныс керöс увтöдз туй. Ылiсянь не öддьöн вына би югöр сибалiс нельки нывка кок увтöдз. А сы сьöртi, что эз кыв некытшöм гурöтöм, сорасьтöг позис вежöртны — сибöтчö автомашина.

«Неужто сiя?» — дивуйтчöмöн думнитiс Аня, кöть некинöс мöдiксö сэсся и эз видзчись. Сэтöн жö кылiс, кыдз öтпыр, мöдöтпыр да кыдзкö эшö топ полöмöнмоз дзескöтчыштiс моросас сьöлöмыс, а перыта визывсялöм вирсянь сэтшöм жö перыта пондiс кокнямны вывтырыс. «Кадыс сьöртi — да. Одззамоз кыдз часы. Мый жö бы?... Не кежны я туй вывсис бöр?» Но кытшöмкö мöдiк голос сы коста жö сувтiс эта думалö паныт, висьталiс: «Кер, кыдз думайтiн. Ась, мый лоас, сiя и ло. Батi, эшö оз и сувт, тöдас одзлань да».

Сэк кежö автомашина ештiс ни лэдзчыны деревня шöрöдззас, сувтчывтöг сибöтчис сё матöжык да матöжык. Колö думайтны, что фараэзöн югдöтöм туй вылiсь и шофёрыс сiйö казялiс ни. И сё жö нывка кынымиськö кинас öвтыштiс. А кöр юзöн ыскöвтан колесоэз вылын автомашина сибöтчис зэв матö ни, Аня паймыштiс: «Эд тöдас кö перво жö, дак вермас и не сувтны». Нывка бергöтiс югытiнсис чужöмсö.

Автомашина сувтiс тшöтш сы весьтö. Сiя жö кадö ванйöв оссис сыланись ыбöсок. Эстöн вöлись нывка и адззис, и вежöртiс, что некытшöм сорасьöм абу. Руль саяс пукалiс тшöтш сiя мортыс, кöда сылö колiс талун кежö. То ли пантасьöмыс гажсянь, то ли кутöм недолытсянь, а чожажык, натьтö, öтдруг кыкнанныссянь, мыччавны сы одзын пантасьöмсö нарошно видзчисьтöмöн Аня эз ни вермы. Нельки нимсö зонкалiсь, а öнi мужиклiсь ни, здоровайтчытöнняс сiя шуис не сiдз кыдз колiс бы — Павел нето Пашка, а сiдз, кыдз шувлiс уна год сьöрна дзир сiя öтнас. Осьта ыбöсок бердас öтiк кинас кутчисьöмöн, увдöрсяняс нывка горöтчис:

— Здорово, Павлик!

Ас кежас, паныт этна кыввезлö Аня надейтчис кывны сiйö жö, мый сiя кывлiс сысянь тожö уна год сьöрна: «Привет, Аннушка». Но талун эта местö мöдыс кыдзкö видзчисьöмöн, нельки надзвевйöн, позяс кö сiдз шуны, горöтчис:

— Здорово.

Öткоста зонка дженытика нёджжöвтiс сы ладорö, сэтöн жö бергöтчис бöр, веськöтчыштiс аслас местаын, видзсьöмöн и этасянь кыдзкö негорöн, дзик сайласьöмöн, ловзисис ыш, кватитчис киэзнас бокись карманнэз бердö, то ли волнуйтчöмöн, то ли лöгвевйöн, кыскис сэтчинiсь донтöмик сигарета, пондiс öзтыны куритны.

Сэтшöм видзчисьтöм шыасьöм бöрсянь, кöдöн öтiкнас вöлi висьталöм вель уна ни, нывка паймыштiс да мыйкö дырна кежö öшис баснинас. Сiя эз тöд, кыдз да мый горöтчыны одзлань, мый пондыны керны. Эта кадö буржык бы вöлi, натьтö, извинитчыны да сiйöн-сорöн и кежны машина дынсис бöр, кöть извиняйтчынытö кыдз бытьтö вöлi тожö нем понда. «А кыдз нö сэк асывся автобусыс вылö?» Но медколанаыс сё жö вöлi не сiя, не асывся автобус вылö шедöм. Медколанаыс нывка понда талун вöлi нач мöдiк, кöда йылiсь думаэзын öнöдз чулöтöм не öтiк онтöм ой. И не пондывны кö судзöтны этö медколанасö талун — некöр мöдöтпырись сэтшöм туяна кадыс сэсся оз ни петав. А кöть бы и петiс, дак нывка одзлань ни тöдiс, что мунны сэтшöмыс вылö мöдöтпырись сiя оз ни вермы: не вын, не охота озö ни судзö. Сулавны жö öнi зонкаыс одзын этадз чöлöмöн сылö лоис öддьöн небасöк. Аня кылiс, кыдз кутöм недолытсянь пондö öзйыны-рöмсявны чужöм вылас, сайöвтны кöдö сы син шогья некыдз эз ни позь. И мед только вермыны перытжыка джендöтны öтамöд коласын чöлöм, сибдыштöмкодь да орласяна голосöн сiя одзлань горöтчис:

— Сё я мый я эшö лöгалан?

— Кин тэныт висьталiс? — дзар кертöг паныт юасьöмöн шыасис зонкаыс, öткоста лэдзыштiс асланись ыбöсок бердiсь стекло, öдззöтiс сы местöт кисис сотöм истöг.

— Ачым тай адзза.

— Сэк и юасьны нем.

Сэтшöм ответ бöрсянь горöтчынытö одзлань вились кольччис нем, но и бöр керны охота öнi эз ни вöв. И мед только не дугдöтны одззамоз да вель дыр кежö мöдöтпырись пондöтöм баснисö, зонкаыс голосöн жö, кортöг-кеймисьтöг, нывка эшö юалiс:

— Дак чапкан-он Мысöдззис? — Недырик чöлыштöм бöртi содтiс: — Сэтчинсянь ме одзлань и автобус вылын верма...

— Ачыт тöдан...

Нач поперег зонкаыс сё жö эз откажит. А буржыка корöмсö нывка и ачыс видзчисьны эз ни понды, öнöдз сiя, тыдалö, вежöртiс ни, что сэтшöмыс талун лоны оз вермы. Кок увтсис кватитöм сумкасö сiя перыта сувтöтiс кабина пытшкö, сэтшöм жö перыта пырис сы сьöрö да пуксис ачыс. Сы омöн нюжöтчöмöн Павел ас киöн пöдныштiс ыбöсок, чöлöмöн вöрзис одзлань.

III

Бытшöма весöтöм туйыс вöлi волькыт да юж. Местаыс тöдчöмöн лэдзчисис кырывлань. Саймытöм эшö деревня казявтöг кольччис бöрлань. Автомашина кокнита мунiс öтiк скорость вылын. Шофёрлö сымда и кольччис — видзны колана газ да вöрöтышавны öтмöдöрö руль, мый сiя эта коста и керис. Мыччассис, что талуння пантасьöмыс, кöда сы понда вöлi, натьтö, нач видзчисьтöм, некыдз да немымда сiйö эз и вöрзьöт. Зонка видзис асьсö сiдз, кыдз вермис бы видзны нач тöдтöм морткöт. Ордчöн пукалiсь нывкасö сiя адззис да эз адззы, кыдз бытьтö сэтшöмыс эта коста кабинаас эз и вöв.

Этö Аня и адззис, и вежöртiс. Но мед вермыны эта увья ассис недолытсö, сiя вынсьöтчис видзсьыны зонкаыс моз жö: тожö адззис да эз адззы сiйö, кöда кабинаын да кöдакöт ордчöн пукалiс. Зонкаыс ладорö нывка öтпырись кытчöдз и дзар эз кер и некытшöм басни одзлань кежö пондöтны эз тэрмась. Этасянь и мыччассис сiдз, бытьтö сiя видзчисьö дзир öтiкö, сiйö, кöр локтасö Мысöдз, мед сэтöн жö висьтавны дженытик «спасибо» да сiйöн-сорöн петны кабинасис бöр. Былись жö нывка юрын думаэс эта коста вöлiсö нач мöдiкöсь. «Чöлан и чöв, абу тай жаль. Туйыс кузь. Мыдзан туз моз пукавнытö, дак мыйкö сё ни горöтчан. А он — ог герйöвт, — думайтiс сiя кабина пельöсас вöрöтчытöг пукавтöн. — Миян коласын важын ни быдöс баитöм, и одзлань тöда — вильсö öтамöдлö сё ни нем ог юöртö. Меным талун бур сiйöн ни, что ордчöн тэкöт пукала. Этася унажыкыс йылiсь эг думайт, и унажыкыс кытчöдз оз и ков».

Мыйкö дырна машина гугйис-мунiс паськыт да волькыт нюрьяинöт, а сэсся сибöтчис ю весьтын öшалан пос бердöдз. Сы кузя мунтöн фараэс югдöтiсö дзир асьсö поссö, а öтмöдöрсянь сы увтын вöлi нач пемыт, кыдз гуын, öнi тöв, и пос бердсянь чинöм-пуксьöм ва бердöдз лоас, натьтö, дас метр вылына. «А вот сэк, — усис нывкалö тöдвылас, — вöлi нач мöднёж. Сэк ваыс вöлi посысся вылынжык. Не адззывны кö сымдасö ас синöн, дак сэтшöм картинасö ас одзын нельки сувтöтны сьöкыт. Но быдöс эта и былись вöлi. Кöр жö бы? Аха, сэк, кöр ме эшö куимöт курс вылын велöтчи, а сыкöт медодзза год дружитiм. Да, вöлi сэтшöмыс, вöлi, вöлi. А талун эта быдöс, кыдз вöт, кыдз сказка, кöдаö и веритны сьöкыт. Колö жö эд...» Эта вылын и Аня ловзисис гажтöма, аслыс казявтöг качыкнитiс кынымиськö юрнас. «Колö жö эд сiдз...»

Чожа мый поссö чулалöм бöрсянь зонка вуджöтiс машинасö мöдiк скорость вылö. Этасянь туйыс вель ылына кыссис вывлань. Тöдчöмöн горöнжыка пондiс уджавны мотор. Но сылöн гугйöтлöм-горалöмыс думайтны эз мешайт. И эстöн ни быд берсяыс нывка тöдвылö усис сымда, что сiя нельки вунöтчис ас йывсис эта кадын, быдсöн думаэзнас мунiс, дзик вöйис вöлöмас. И кыдз автомашина одзын вежлассисö картина бöрын картина, сiдз и нывкаыс тöдвылын кывтiсö мöдпöв олöм-вöлöмсис лун бöрын лун.

Кытшöмкö кадö чулалiс вöр. Кольччис бöрлань и керöс панытыс. Мыйкö дырна машина тарöвтчис ыббез пöлöн, а сэсся кокнита босьтiс эшö öтiк неыджыт керöсок, пырис Мысö.

Биэс и эстöн тыдалiсö эшö не быд керкуын. Отир вöлись пондöтчис чеччыны, öтöрын нылöн ветлöтöмыс и öнi эшö некöдöрын эз тыдав. Дзир столовöй весьтiсь автобус сувтчанiнын жöдзисö кынымкö морт, видзчисисö городскöй автобуслiсь сибöтчöм.

Одзас туй сьöрын видзöттöн, öтпыр, мöдöтпыр зонка дженытика дзар керыштiс и бокас пукалiсь вылö. Но мöдыс пыдына мунöм аслас думаэзö, сымдасö то ли эз казяв, то ли нарошно мыччалiс, что эз казяв, паныт сылань и дзар эз кер, машинасö сувтöтöм йылiсь эз казьмöт. Юасьны зонка ачыс тожö эз понды, сувтчытöг мунiс одзлань. Дзир вель ылын посад саяс ни, öтiк жугалöм посок весьтын, сiя сёрмис чапкыны газ да нырыштны тормознöй педаль вылö. Машинасö зэркнитiс сыбурна, что нывка ас местас видзсьынытö эз вермы. Сiйö люкасьтöдз шупкис вывлань. Эстöн вöлись, кöр паймыштöмкодь сiя пуксис бöр, лöсьöтыштiс юр вылас пальто воротник кодь жö бурöй рöма норковöй шапкасö, видзöтчöв-керис öтмöдöрö, дзик саймöм понсянь, юалiс:

— Кытöнöсь ни ми?

— Изгарьян сайын.

— Кöд коста нö Мыссö чулалiм?

— Кöд коста суналiн, — шутитöм-сорöн шыасис зонкаыс, сы коста жö ачыс нырыштiс стартер вылö.

Гажмыштöм этатшöм ответсянь, тöдчана шынньöлöн тырппес вылын, сы моз жö шутка могись нывка одзлань горöтчис:

— Ачыт будь суналiн, — öткоста нёджжöвтыштiс зонкаыс ладорö. Но мöдыс сэсся паныт эз ни шыась, нельки дзар сылань эз кер. Газ педаль вылö нырышавтöн сiя жагвыв петкöтiс машинасö посок мöдöрас, вежис скорость, пондiс вашöтны одзлань.

Дойдыштöм сэтшöм «вниманнёöн» нывка лöньсис бöр. «Неужто быдöс вунöтiс? Или ме этöн каднас сэтчöдз пöрисьми да сэтшöм нёштöм лои, что сiя ме вылö нельки и дзар оз кер?» Одзлань, думайттöг ни, колö-оз эта коста сымдасö, нывка кыскис кармансис неыджыт гöгрöса зеркало, недырик кежö вайöтыштiс сiйö аслас чужöм весьтас. «Да не. Нем меын этöн каднас, думайта, эз вежсьы. Весь сiя ме йылiсь сiдз... А что чукыррес син гöгöр строчитны пондiсö, дак аслас сылöн нiя не етшажык». Зеркалосö ас местö бöр дзебöм бöрын нывка эшö бытшöмжыка лöсьöтыштiс юр вылас шапка, лöсьöтчыштiс местаас ачыс, мыйкö дырна нёджжасьöв-керис автомашина одзын паныт ольсассян туй вылö, а одзлань видзсьынытö, тыдалö, эз вермы, сайласьтöг дзар керыштiс зонкаыс ладорö.

— Мый нö чöлан, он ошшась, кыдз олан?

Вель дыр чöлöм коста мöдыс ештiс кыскыны сигарета, руль бердас видзсьытöн сэтчö жö жмитiс истöг коробок, мöд кинас истöгсö чиркнитöмöн, öзтiс куритны, лэдзыштiс ас ладорсянь стекло, кынымиськö горша кыскис крепыт табак тшын, сэтöн жö лэдзис сiйö бöр, — думайтiс, кыдз да мый горöтчыны паныт.

— Быдöс син одзат — уджала вот. — А одзлань, дзик одзасьöмöн, эшö содтiс: — Ме тай тэнчит ог юась.

«Кытшöм сё жö сiя чорыт лоöм. Кöркö нач не сэтшöм вöлi, не-е, не сэтшöм. Эд мыйкö понда радейтi жö сiйö, да и öнi эшö... öнöдз эд менам нем сы дынö эз вежсьы. Эд нюжöт сiя часöт мелань кисö, öнi жö бы паныт чепöсси. А сiя?..»

— Этö тэ öтнат дзир сэтшöмыс.

Тöдны бы одзлань, мый усяс кывны паныт этна кыввезлö, этö баснисö нывка некöр бы эз и пондöт. Но бергöтны бöр горöтчöмсö вöлi сёр ни.

— Унаöс тöдны пондöмыт...

— Мый-мы-ы-ый? — нюжвевйöн юалiс нывка, мед только пöдтыны этна кыввезöн вились саймöтöм стыд-недолытсö. Но öнi эта унасö эз ни отсав. Горöтчис я мый зонкаыс эта бöрсянь эшö, сымдасö нывка эз ни кыв. Сiя кылiс мöдiкö, кыдз зонкалöн горöтчöм кыввес калитöм кöртöн сибалiсö сьöлöм бердöдз. Кутöм обидасянь Аня вöлi осьтiс ни öмсö, мед горöтчыны паныт мыйкö сэтшöмö жö, но аскадö вежöртiс, что зонкаыскöт споритöмыс öнi унасö оз ни отсав. Сiя вермас дзир тшыкöтны одзлань кежö быдöс коланасö. Да и вöлi я, адззисис я горöтчынытö паныт эталö мыйкö сэтшöмыс, кöдöн позис бы пöртны нем туйö зонкалiсь кыввесö да стыдöдз вайöтны сiйö асьсö? Эд басниыс, колö вежöртны, мунiс сэтшöм тор йылiсь, кöдö куш кыввезöн он дорйы и кöдöн асьнас, кыдз козьналöм чунькытшöн, он мыччась, он шу: «На видзöт вот, он верит дак. Некинлö не только пешлыны, нельки видзöтны эг сетлы». Но öнöдз нывка тöдiс ни, кыдз да мыйöн сiя вештiсяс бöртiжык зонкаыслö этна кыввез понда. И сiдз кыдз видзчисьнытö эта колана кадöдз кольччис нач не уна ни — колiс дзир локны городöдз — эта сiйö жагвыв лöньсьöтiс. Сiйöн одзлань нывка сэсся эз ни шыась, дзир ас кежас думайтiс: «Ладно. Адззылам эшö, кин сайын правдаыс. Видзöта вот, мый тэ сэк меным баитны пондан». Но этна жö думаэз коста асьсö сiйö кутiс стыд, сэтшöм стыд, кöда увья и воштiсьнытö эз тöд кытчö. Нывка нельки кылiс, кыдз эта ас одзын кутöм стыдсянь пым вир перыта чепöссис сылö чужöмас, чирышттöдз пондiс сотны синнэсö, пеллесö и нельки тшöкасö. И мед не сетны казявны сымдасö ордчöн пукалiсь зонкалö, кöдалö эта бöрсянь юрас вермас пырны мый колö и оз, тшып кутöм тырппезöн сiя веськöтчыштiс аслас местаын, пондiс вынсьöтчыны вуджöтны ассис одзланься думаэсö нач мöдiк вылö. «Колiс жö эд то, колiс жö эд миян коласын сiдз лонытö, кыдз некöр да некöдным эг и думайтö. Сы понда разь ми öтамöднымöс сiдз радейтiм, мед лоны бöртiжык сэтшöммезöн ас коласын? И неужто сiя ме йылiсь былись сiдз думайтö? Юавны бы вот веськыта...» Но сiдз кыдз одзлань кежö ачыс зонкаыс баснисö сэсся эз пондöт, пондöтны сiйö мöдöтпырись нывка тожö эз лысьт.

IV

Чужисö да быдмисö нiя öтiк деревняын. Учöтсянь велöтчисö öтiк школаын, дзир не öтiк классын. Зонкаыс кык годöн вöлi пöрисьжык и сiйöн кык классöн мунiс одзлань. Эта нылö эз мешайт тöдны öтамöдсö учöтсянь, кыдз быд челядёк тöдö ас деревняись не только ас годся, но и томжык, и пöрисьжык невна челядьöс. Но тöдсасисö нiя вöлись сэк, кöр зонка бертiс служба вывсянь да пондiс уджавны гортын. Семьяын сiя вöлi томжык и мед не кольны öтнанысö ассис аймамсö, мунны гортiсь кытчöкö мöдöрö эз думайт.

Эшö армия вотöдз Павел кончитiс сельскöй ПТУ да мымдакö ештiс уджалыштны трактор вылын. Служба коста зонка вермис велöтчыны шофёрö. И сiдз кыдз эта профессияыс гленитчис öддьöнжык, то перво жö корсис автомашина вылö.

Медодз зонкалö дöнзис неыджыт ГАЗ-ик-бензовоз, кöда вылын кöр городiсь, кöр кöрттуй станцияись, а мукöд коста нельки Майкорскöй пристанись ковсис ваявны колхознöй механизаторрезлö бензин да солярка.

Кузь колассэза да абутöмкодь туйез кузя «баранка» сайын удж кокнитöн и эз вöв. Но нем этася буржыкыс колхозас эз адззись. И вöлi кö дзонь автомашина, быд уджалан лунö зонкалö ковсьывлiс керны гортсянь быдса рейс — мунны асывсянь простöн, а рыт кежас вермыны бертны бöр. А мед ештыны керны этö аскадö, быд рейсö ковсис петны одз асывсянь. Бöр зонка бертлiс дзир рыт кежö. А зэра да нять погоддя коста джын тысяча километр кузя туйколаскöт вермасьöм коста ештывлiс мыдзны сыбурна, что эта бöрсянь не ки, не кок бытшöма эз ни лэбтасьö. Вежöртана, что сэтшöм мыдз бöрсянь нельки том мортöс, кытшöмöн и вöлi Павел, некытчö öддьöнсö эз ни кыскы. Сэтчö жö висьтассис и сiя, что и петнытö деревня вылас öддьöнсö эз адззись кытчö. Не кинотеатр, не стадион, не библиотека, не спортзал колхозыслöн, вежöртана, эз вöв. А сiя неыджыт колхознöй клубыс, кытчö зонка котрасис киноэз вылö эшö учöтсянь, велöтчан годдэзö, öнöдз ештiс важмыны сыбурна, что сы пытшкö и пырнытö петiс полöм.

Чукöртчынытö клубас вöлi тожö некинлö, кöть бы и вöлi сiя виль. Быдöс том отирыс видзсис деревня вылас дзир кыкьямысöт класс кончиттöдз. Эта бöрсянь унажыкыс ны коласiсь рознитчис — кинлö кытчö туй. Быдöнныс нiя мунiсö велöтчыны одзлань, а бертiсö бöр гортö дзир öтi-öтi. Сiдзкö петнытö вöлi не только некытчö, но и некинлö да некин дынö. Вот мый увья уджыс бöрсянь Павел некытчö и эз тэрмась. Рейс бöрсянь видзöтöм-лöсьöтöм машинасö сiя сувтöтлiс гаражö, а ачыс жагвыв бертлiс гортö. И вöвлi кö зонка не öддьöн мыдз, уджыс адззисьлiс эшö и керку гöгöр, кайöтыштны, шуам, мамыслö отсалöм могись öшымöс дорись гоз ведра мымда ва, поткöтны да пыртны пес, разьны да öктыны вились важся-важ, дöнзьöм пöрисьжык воныссянь мотоцикл, кöда аслас бырöм-разьсьöмсянь не только котрасьны, но и заводитчыны некöр эз ни думайт, а сулалiс кö эшö öнöдз чом бердiсь вирöдз увтын, дак дзир мыччасьöм могись, что сэтшöмыс кöркö вöвлi.

Мыдзöм коста Павел радейтлiс чулöтны ассис кад телевизор одзын. Зонка видзöтлiс, кыдз овсьö том йöзлö не миян округись колхознöй деревняэзын, а кытöнкö мöдiк местаэзын, кöть сiя жö мушар вылын. Мöдiк планетаэз вылын олiссесö сiя кадö кытчöдз эз мыччавлö. Сiдз кыссис кынымкö месяц сьöрна. И сьöкыт висьтавны, мый вермис бы лоны зонкаыскöт этатшöм олан коста одзлань, не вежсьыны кö бы сылö год нето кык сьöрна, сiдз кыдз сэк кежö сiя казялiс ни, что сы оланын öтiк уджся, сёйöм-юöмся да узьöмся оз тырмы мыйкö öддьöн колана. И ась сiя немын ассис олансö и эз веж, кыдзкö казявтöг да видзчисьтöг оланыс вежсис ачыс.

Кыдзкö рытъявыв, кöр Павел, мыдзыштöм ни сiя лунö, бертiс рейс бöрсянь гортö да пондiс отсавны пыртлыны мамыслö карчйöрись лук, сы дынö, веськыта карчйöрас, пырис акань кодь басöк чужöма, лöсьытик вывтыра да нельки моросвевья ни сэк кежö Аня. Эта вотöдз, армиясяняс локтöм бöрсянь, зонка сiйö гортiсь эз пантавлы, и кытöн да мый сiя керис — эз тöд.

— Ме тэ дынö, Пашка, — горöтчис сiя повтöг здоровайтчöм бöрсянь. Нывкаöс, тыдалö, немымда эз дзескöт зонкалöн челядь кадся нимыс, кöть сы одзын öктiс да тэчис ведраэзö луксö не дасгодся третьеклассник, зырымöсь бедь, а кыкдасгодся солдат-шофёр, кöдö сорасьтöг позис шуны ыджытöсмоз, кöть бы Павелöн. Ачыс зонка эта вылö дзар тожö эз кер. Сiя дзир веськöтчис гряд весьтас кекеркаöн пукалöмись, лöсьöтыштiс вылас ремень увтiсь пуджсьыштöм гимнастёрка, шыасис:

— Баит, Аня, ме кывза.

— Городö меным колö мунны, — пондöтiс одзлань нывкаыс. — Талун мöдi, да автобусыс вылö эг шед. Билетыс эз дöнзьы. А сытöг шофёрыс эз босьт. Уна öддьöн отирыс вöлi да. И некытшöм попутнöй машина, кыдз нарошно, эз инмы. Сiдз бöр Мыссяняс и ковсис бертны.

Кытчöдз нывка норасис аслас неудача вылö, сылiсь баснисö кывзытöн, зонка гусьöн-пöлöн ештiс ни сибавны синнэзнас нывкалöн быд тöдчан-тыдалан тор бердöдз, сэтöн жö ас кежас думайтiс: «Вот вöвны бы

ордчöн деревня вылас этатшöм аканьыслö, видзöтан кö, и оланыс гажажык бы вöлi». Горöн жö нывкаыслiсь бöртiжык юалiс:

— Жöник дынö я мый я городас?

— Да ну тэнö, Пашка, баснинат. Кытшöм эшö жöник дынö? Ме жö сэтчин велöтча, сельхозын. Некытшöм жöник менам абу, колö кö тэныт тöдны дак. Эз на вöв да...

Эта видзчисьтöм басни коста нывка вежсьыштiс чужöм вылас, а кöр кылiс-казялiс ас сьöрас сымдасö, недолытсяняс нельки вештыштiс ылöжык зонкаыс дынсянь, бергöтчыштiс мöдöрö. А мöдытлö, тыдалö, гленитчис нывка вылын шутитöм-згальничайтöмыс, сiдз кыдз лöньсьыны аслас басниöн сiя и öнi эшö эз думайт.

— Мыйлö нö сiдз бöбöтчан. Городын да бытьтö и жöник ни тэнат абу. Этö жö сказка. Сiдз, думайтан, ме тэныт и верита?

— Но и ась, он верит дак, ачыт тöдан. Висьтав, нуöтан-он?

— Нуöта — висьталан кö бöбöтчытöг, эм-абу жöникыт?

— Да честнöй комсомольскöй — некин менам эшö абу.

— Но видзчись сэк. Ашын асывнас кежала.

— Ой, спасибо, Пашка, тэныт ыджытö! — оча ки долонь гажвевйöн шовкнитöмöн, горöтчис Аня. — Вай ме тэныт эта понда луксö пыртлыны отсала.

— Видзöт, ачыт тöдан, он дышöтчы дак, — согласитчис зонка не сiдз отсöтыс увья, кыдз сы увья, мед только не янсöтчыны сэтшöм чожа нывкаыскöт бöр. — Только не пыртлыны, а ведраэзас куравны. Готов куралöмсö пыртнытö ме и ачым верма.

— Но ась и сiдз — куравны. Кытшöм эшö сэтöн дышöтчöм? — Нывка повтöг оськöвтiс простöй ведра дынö, пуксьыштiс бокöнмоз зонкаыслань — дженытöв вöлi вылас платьеыс — кутчисис удж бердö. Сы сьöрö жö гряд весьтас мышкыртчис и зонкаыс, но чожа мый кутiс асьсö сы вылын, что курасьтöнняс унажык луксö пондiс тэчны бокö, доз весьтас оз инмав. Эстöн жö Павел казялiс ас сьöрас и сiйö, что нывкалöн сэтшöм видзчисьтöм локтöмыс тöдчöмöн лэбтыштiс сылiсь настроеннёсö. Жаль дзир, что уджыс вöлi не уна и нёль ки коласын керсис перыта.

Луксö куралöм-пыртлöм бöрсянь зонка рочалiс нывкасö керкуöдз, мед вештiсьны отсасьöмыс понда — юктавны ырöшöн. Минута кыным сьöрна эта коста керкуас пукалыштiсö. Эта бöрсянь зонка кольлалiс сiйö öшын увтöдз. А кöр ачыс бертiс бöр, сэтöн жö и казялiс, что нывкаыс мунöм бöрсянь керкуыс гажтöмсялiс, пондiс мыччассьыны ыркытöн да пемытöн.

Сёрöнжык, рытывбыт сьöрна телевизорыс одзын пукавтöн, нывкаыс йылiсь Павел эз ни вунöтлы. И не только сiйöн, что вунöтны сiйö тöдвылiсь охота эз вöв, но эшö и сiйöн, что вын эта вылö эз судз. Эстöн ни öнi ковсис жалейтны, что эз казяв перво жö, эз пыр кыдзкö юрас сымдаыс, мед сiя жö рытö мунны сыкöт öтлаын, кольлавны гортöдз. Лöньсьöтiс да гажöтiс мымдакö сiя, что янсöтчисö недыр кежö. Колiс чулöтны дзир ойся кад, мед асывнас пантасьны бöр. Зонка öнiсянь ни думайтiс, что асывнас, гаражсис петöм бöрын, сiя перво жö кежалас нывкаэс ордöдз, пуксьöтас сiйö ас кабинаö веськыта посöдз дынсянь. Сiдз эд сiя рытсяняс кöсйисис. Но кыдз усис вежöртны сёрöнжык, нельки этö неунасö керны зонка эз вермы.

V

Одз асывнас, кöр Павел локтiс гаражö, мед заводитны машина, нывкаыс сiйö эстöн видзчисис ни.

— Мый, оз узьöт? А баитан эшö, что жöник городас абу, — шутитöм могись пондöтiс зонка тöння баснисö. Но пыксьыны-панласьны этаись мöдыс талун эз ни понды, баснисö перво жö бергöтiс мöдöрö.

— Полi — онмöсся асыв кежас да кольччыны ешта.

— Дак баитчимö жö рытсяняс, что ме кежала...

— Баитчим да... Вдруг вунöтiн бы кöсйисьöмыс йылiсь, то ли кежнытö мыйкö увья некöр лоис. Кин ме сэтшöмыс, мед горт öшын увтöдз мела машинанас кежавлiсö?

— Позьö разь вунöтны мортыслö сетöм кыв йылiсь? — нарошно ни юалiс зонкаыс, видзöтöв-керис веськыта нывкаыс синнэзö и мед не орöтны эта вылын пондöтöм баснисö, одзлань эшö висьталiс: — Ме, батi, талун ойбыт сьöрна тэ йылiсь эг вунöтлы...

— Да, натьтö, уж...

— Не «натьтö, уж», а былись ме тэныт висьтала.

Этна кыввезсянь вежсьыштöм чужöма нывка одзлань паныт эз шыась. Сiя дзир дженытика нёджжöвтыштiс зонкаыс ладорö, перыта бергöтчис бöр. И кытчöдз зонка бергалiс аслас автомашина гöгöр, мöдыс бокынмоз чöлöмöн сулавтöн, гуддьышалiс мыйкö кок увтас, синнэсö вывлань сэсся эз ни лэбтыв.

Нывкалiсь сьöрас вайöм сумкаэсö зонка ас кинас лэбталiс да тэчис кабина пытшкö, сэтчин жö тшöктiс пуксьыны и асьсö. А кöр ас киöн да бытшöма вöлi пöдныштöм сы ладорсянь кабина ыбöсок, сэк вöлись, машина гöгöр кытшöвтöмöн, зонка мöдöрсяняс пырис ачыс, пуксис руль сайö, жагвыв вöрзисö туйö.

Гортсянь и городöдз сiя лунö машинасö Павел нуöтiс сiдз, кыдз бытьтö ордчöн сыкöт кабинаас пукалiс не ловья да том морт, а то ли телевизор, то ли зэв дона чайнöй сервиз — некытöн и öтпырись эз зэркнит. Зонка мунiс тэрмасьтöг, сiдз кыдз одзлань ни вежöртiс — кыным перытжыка нуöтас, сыным перытжыка янсöтчас.

Кузь туй коста ас коласын баитiсö вель уна. И ась некытшöм одзланься дружитöм-радейтöм йылiсь сiя лунö öтамöдлö веськыта и эз вöв казьмöтöм, басниыс унажыксö сы гöгöр и бергалiс. Мöднёдж позяс висьтавны сiдз, мый йылiсь бы сёрниыс эз зорам, сiя быд коста вовлiс öтiк да сiя жö местаö — дружитöм-радейтöм дынö.

Городас Павел вайöтiс нывкасö зэв общежитие дынöдз, ачыс пыртiс да кайöтiс куимöт этаж вылöдз сьöкыта тöбалöм сумкаэз. А мöдыс, простöн да кокнита сы одзын оськавтöн, öнi повтöг ни да гажвевйöн баитiс:

— Спасибо тэныт, Пашка, ыджытö, вайöтöмыс понда. Да кежав кöркö ме дынöдз, дышыт оз пет дак. Öнi эд тöдан ни, кытöн ола.

— Обязательно.

Öтiкö вунöтчис, эз юöрт нывка янсöтчиканыс сiйö, что сiя ашынсянь ни гортын оз ло, быдöнныс да вель дыр кежö группаэзöн мунасö бöр деревняэзö, колхознöй картовка вылö. Сэтшöм чожа зонкалiсь локтöмсö сiя, тыдалö, эз видзчись.

Гортö берттöн зонка кузь туй думайтiс нывка йылiсь. Нем мöдiк сылö юрас öнi эз ни пыр, а сы йылiсь думаэс кыдзкö гажöтiсö. Этасянь и быдсöн кузь туй коласыс мыччассис нем туйö, чулалiс казявтöг. А гортын этна жö думаэс бергöтчисö нач мöднёдж. Зонка кутчисьлiс газетаэз бердö, но эз лыддьöт, то пуксьывлiс телевизор одзö, но эз видзöт, то кутчисьлiс мотоцикл бердö, но сэтöн жö чапкывлiс сiйö бöр, чепсасис то öтöрö, то мöдöрö, кыдз öшöм, но некытiсь колана местасö эз адззы. А кöр казялiс ас сьöрас сымдасö, сэк вöлись вежöртiс — быдöс сысянь, что нывкаыс и öнöдз эшö тöдвылiсь эз вун. То сiя сувтлiс син одзын, кыдз сулалiс карчйöрас гряддэс коласын, то — кыдз куралiс ведраэзö лук, то — кыдз шуч городöдз пукалiс сыкöт ордчöн кабинаас, то кыдз оськалiс сы одзын, городас ни, общежитие ладорö. Зонка дивуйтчис ас кежас сылö, кыдз сэтшöм бытшöма вермисö кольччыны сы тöдвылын не öддьöн топ тöдчана торрез, кöдна кыдзкö йитöтiсö нiйö ас коласын. А колiс дзир лöньсьыны недырик кежö, кыдз сэтöн жö пондывлiс кывны эшö и сылiсь голоссö, быд тöдчан и нельки не сэтшöм тöдчан шыасьöмсö. Этасянь вöлi кыдз бур да кокнит, сiдз и гажтöм да сьöкыт. Мый зонкаöс сыбурна гажöтiс, сiя жö да сыбурна жö и гажтöмтiс. И сё жö, кыдз думайтiс Павел ас кежас, быдöссянь этасянь гажыс вöлi унажык, нежели гажтöмыс. Эд ась нывкаыс гортiсь и мунiс, ась и эз вöв зэв ордчöн, но мунiс сiя неылö и эта янсöтчöмыс вöлi дзир недырик кежö, сiдз кыдз городас зонка ветлiс быд лун. И лоас кö охота сiйö адззывны, этö позис керны кöть кытшöм лунö. Сiйöн ашынас ни, кöр одз асывсянь сiя вились петiс рейсö, тöдiс ни, что öткоста мунö и сы дынö.

Былись кыдзкö сiдз и петiс, что зонка и ачыс эз казяв, кыдз локтiс да сувтiс машинанас тöдса ни öнi общежитие дынö. Но сэтöн жö сiя вежöртiс, что талуння пантасьöм йылiсь некытшöм басни ны коласын эз вöв. Эта увья и пырнытö сы дынö эз лысьт, тöдiс, что талун сiйö сэтчин нывкаыс оз видзчись и керны сымдасö вöлi небасöк. Этадз жö вöвлi и мöдiк, и куимöт лунас, а сэсся эшö да эшö — быдса неделя сьöрна. И дзир суббота лунö, выходнöй панытас, кöр зонка мыдзис ни лунiсь-лун весись кежласьöмсянь, сiя кежöтыштiс машинасö туй бокö, ачыс иньдöтчис недырик кежö тöдса общежитиеö. Но и сэк эшö сiя нывкасö эз пантав.

Пыранiн дынсянь ни, кöр Павел казьмöтiс, кинöс бы сылö колiс адззывны, инька-вахтёр паныт зонкаыслö юöртiс, что гортын öнi некин ны коласiсь абу. Что быдöс студенттэс öнi колхоззэзын, картовка вылын и месяц сьöрна эстöн некин оз ло.

Эта юöрыс зонкаöс невночка гажтöмтiс, но öткоста и гажöтiс тожö. «Ась. Понда кöть тöдны, мед туйсö весь не тальны». Эта бöрсянь вöлись Павел и дугдiс кежласьны быд лун тöдса общежитие дынö. Но кыдз усис вежöртны сёрöнжык, гажыс этасянь вöлöм тожö не уна. Адззисьлытöг чулöтöм каднас гажтöмыслö колiс бы чулавны, а гажтöмтчöмыслö лöньсьыны. Былись жö петiс нач мöднёж. Быд лунöн эта гажтöмтчöмыс дзик быдмис, лоис сё ыджытжыкöн да кыным одзлань, сё вынöнжык сетiс тöдны ас йывсис.

VI

Ар кежас, зэра погоддя коста, пондiсö тшыксьыны туйез. Кыным одзлань — ветлыны городас лоис сё сьöкытжык. А месяц бöртi, медколана кадас, эшö и машинаыс зонкалöн жугалiс — киссис бöрись мост. И кыдз бы сiя эта увья öнi эз чепсась, чожа керöмыс некыдз эз шогмы. Мед вежны жугалöмсö виль вылö, медперво этö вильсö колiс эшö кыськö адззыны, небны да вайны. А öтiк лунö миян колхоззэзын сэтшöмыс и вöтöн оз петав. Машинасö вочöм вылö зонкалöн чулалiс кык неделя сьöрна. А эта увья нывкакöт мöдöтпырись пантасьöмыс шогмис зонка понда нач видзчисьтöг.

Сiя рытö, пемытсорнас ни, мыдзöм да тшыг Павел ештiс дзир бертны удж вывсянь гортö, вежтöм эшö выла, пондiс миссьыны. Айыс зонкалöн, пöрись тракторист, а öнi кузнец, локтiс удж вывсянь кытöнкö бöрсяняс, а мамыс пондiс гундыртны залавка гöгöр, лöсьöтiс мужиккеслö сёйны. Эта коста öтöрсяняс и кылiс кинлöнкö кокнитика ёркöтчöм. Паныт шыасьöмыс вылö оссис ыбöс, порог омöнняс оськöвтiс Аня. Этаö зонкалö медперво нельки эз и веритсьы.

— Аня? Неужто тэ? Гортын?! — гажвевйöн öдззис юасьны сiя нывкаыслiсь здоровайтчöм бöрсянь. — Лок талань, пуксьы. Ме часöт.

— Ме тай. Вовлi вот öтiк лун кежö, гажтöм лоис да... Мый нö сiдз öтпырись эн и кежав, кöсйисин да?...

— Эг кö бы... А то эд... — чышкисьтöнняс ни пондiс висьтасьны зонкаыс.

— А ме, кывзы, нач и нач эта йылiсь вунöтi казьмöтнытö. Сы увья вот и ковсис... — Мый ковсис сы увья, сымдасö нывка одзлань эз ни юöрт. Недырик чöлыштöм бöртi аслас мог йылiсь казьмöтiс: — Локтi вот бöра юасьнытö, нуöтан-он ашын городас?

— Дак эд эг на эшö ешты досповна разьсьöм драндулетсö вочны. Мыля нö тэ локтiн, да перво жö эн юась? Тожö, натьтö, сымдасö эн думайт, сiдз эд?

— Эг, конешно. Тöдi разь ме одзлань сымдасö. Кыдз нö ме сэк асывсянь городас муна? — унажыксö тыдалö, ас понда ни горöтчис нывка да сэтöн жö пондiс лöсьöтчыны петны бöр.

— Видзчисьышт, Аня, часöт ме пасьтася. Некытшöм сёйöм йылiсь зонкалö сэтöн эз ни думайтсьы.

Порог дорас нывкаыс и былись сувтчыштiс. А кöр мöдыс кышыштiс вылас капюшона куртка, öтiк ыбöсын петiсö.

Адззисьлöмыс кежö погоддяыс эз лöсяв. Öтöрас сулалiс октябрь. Вöлi тöла, кымöра да кöдзыт. Ойвыв ладорсянь дугдывтöг вачкис чужöмö поснит да кöдзыт зэр. Но некöдыслö эта öддьöнсö, тыдалö, эз мешайт. Ас коласын баиттöн нiя петiсö тракт дорöдз, а сэсся нач вунöтiсö, кöдöрö мунöны. Да и колiс я нылö эта коста сымдасö тöднытö? Быдыслö ны коласiсь вöлi охота не только висьтасьны, кыдз вöлi чулöтöм янсöтчöм бöрсянь кад, но и кывзыны мöдiклiсь паныта висьтасьöм. И кöр зонка висьтасис ас йывсис, чöлöмöн кывзытöн нывка и öтiк кыв сы басниись бокö эз лэдз. А кöр мöдыс баитнытö дугдiс, Аня мыйкö дырна думайтöв-керис ас кежас, юöртiс:

— А ме тэныт нельки письмо мöдi гижны.

— Мыля нö эн гиж? Повзин, натьтö, что ме и лыддьöтнытö ог куж, букваэсö вунöтчи. Сiдз эд?

— Да не. Эгö жö сiдз баитчылö.

— Но и мый, кöть эгö дак? Еныс эд эта понда оз чарöт.

— Кин сiйö тöдö. Вдруг кутас да и чарöтас. И мый тэ сылiсь босьтан, — шутитыштiс паныт нывкаыс аслас кыввезлö вериттöг.

— Сэк уж ась кыкнаннымöс öтлаын, мед не янсöтчыны. Сё ни меным тэтöг оланыс оз ло.

— Да уж, натьтö... Эн баит, Пашка, кöдö оз ков.

— Да ме тэныт былись висьтала. Праздник кежас, забыль, гортö локтан-он?

— Ог на тöд öнiсянь. Ылын эшö сэктöдз да. Перво колö вермыны гортiсь мунны да вöлись бöр локтöмыс йылiсь думайтны.

— Да мунан. Эн тöжды тэ сы понда öддьöнсö. А меным öнiсянь ни колö тöдны, локтан-он сэк кежö.

— Мыйлö бы тэныт сымдасö, абу кö секрет? — Шынь-серöмöн тырппес вылын да сэтшöм жö шыннялан пöвсинöн нывка дженытика нёджжöвтыштiс ордчöн оськалiсь ёртыс вылö. Но мöдыслöн сысянь некытшöм секрет эз вöв, и сiя сайласьтöг горöтчис:

— Но мыля жö, Аня, мыйлö? Да вежöртан тэ он, одзлань ни охота тöдны, лоам-огö öтлаын праздник коста. Ачыт жö адззан — не пырны, не петны эстöн öткаса мортыслö некытчö. Висьтаси жö вот, кыдз меным эта öткаса оланыс дöнзьö. Кутас гажтöмыс, дак кöть кöин моз унняв.

— Ме тöда, Пашка. Но сэк кежö туйес эшö умöльжыкöсь лоасö. И билеттэсö автобусыс вылö праздник паныттэзас босьтны сьöкыт.

— Но и мый?

— Мый, шуан?.. — шыасис паныт нывкаыс. А недырик думайтыштöм бöрсянь шутитöмöнмоз ачыс жö одзлань горöтчис: — Локтi бы, батi, вайöтiн кö бы аслат машина вылын, бензовоз вылас ме шуа.

— Мый, гленитчис?

— Думайтан, эз я мый я? Конечно, гленитчис. И билет некытшöмö босьтны оз ков, и сумкаэзнас кыскасьны тожö. Кыдз тай гортсянь пуксян и сiдз зэв общежитие дынöдз.

Колö висьтавны, что ачыс зонка думайтiс эта йылiсь эшö нывкася одзжык. И дзир сы увья, что талун нуöтнытö сiйö эз вермы, кöсйисьны праздник кежас вöлi кыдзкö недолыт, öнi жö, кöр нывка ачыс казьмöтiс эта йылiсь, мöдыс этасянь сэтчöдз гажмис, что видзчисьнытö одзлань вын эз ни судз. Павел сувтчыштiс, бергöтчис сылань паныт, перыта сывйыштiс-жмитiс нывкасö ас бердас, сэтшöм жö гажвевйöн горöтчис:

— Аня, кытшöм тэ сё жö молодец вöлöмыт! Вай жö ме тэнö эта понда кöть öтпырись окышта.

Мöдыс понда эта, тыдалö, вöлi нач видзчисьтöм.

— Тэ мый этö, Пашка! Лэдз, ноко! — перыта да паймыштöм голосöн шыасис нывкаыс, перыта жö мездiсис бöр зонкаыс киэз коласiсь. — Этадз эд и весьö пöртны недыр. Не сы понда жö ме тэ дынö... баитчöм могись, — нуöтан-он городас — локтi. Видзöт жö вот, кытчöдз ни мунсьöм. Ме нач кынмыны пондi. Бертам лок бöр.

Эстöн вöлись кыкнанныс нёджжасьыштiсö ас гöгöр, дзик саймисö, вежöртiсö, что басниыс коласын, казявтöг, ештöмöсь мунны деревня дынсянь не öтiк километр ылына и öнi жагвыв сибöтчисö Лолог ю бердö. Нывка бергöтчис бöр, ёртсö видзчисьтöг, перыта иньдöтчис деревня ладорö.

— Аня! Сулав жö! — горöтчис бöрсяняс зонкаыс, котöрöн уськöтчис сы сьöрö. — Кытчö тэ сiдз тэрмасян? Обидитчин я мый я абутöмыс понда? Нем жö ме тэныт умöльсö эг кер. Ме жö дзир шутка могись, аслам гаж увья.

— Кысь нö ме тöда, кытшöм могись. Сымдасö тэ меным эн висьтав. Ме тэныт перво жö, кыдз вонлö веритi, а тэ?..

— Ладно. Вежöртi. Быдöс. Ась одзлань кежö быдöс тэ нёж и лоас. Баитчим?

— Видзöтам эшö. Ме, батi, тэкöт адззисьлöм могись дзир гортö и локтi. Тэ вылö только и надейтчи. А тэ меным öнöдз эшö эн висьтав, кыдз ме понда городас бöр мунны.

— Эн обижайтчы, Аня, пожалуйста. Но кыдз ме видзöта, дак тэ кытшöмкö йöймöм кодь.

— Кысь тэ сымдасö босьтiн? — юалiс нывкаыс. Но мöдыс сiйö дзик эз и кыв, ассис пондöтöм баснисö нуöтiс одзлань:

— Эд эта понда меным тэнö колö киэз вылын новйöтны. Ойбыт сьöрна талун окавны колiс. А тэ менö и сибöтчыны бердат он лэдз.

— Эз на лок, сiдзкö, сэтшöм кадыс, ог лэдз дак. Меным жö эшö кык год сьöрна велöтчыны колö. Оз разь позь сытöг дружитнытö? Висьтав вот, лучше, кыдз ашын кежö городас мунны? Пропуск жö менам лоас, вежöртан тэ, он сымдасö? Ме жö дзир öтiк лун кежö юаси.

— Пуксян автобус вылö да и мунан. Кыдз эшö этася, жугалöм кö менам машинаыс.

— Мыссяняс ме бы пукси — и басни абу. А Мысöдззас кыдз? Кыдз ме сэтчинöдз ойнас öтнам муна?

— Не öтнат, а мекöт.

— Кольлалан, бытьтö, сы ылынаас?

— Ковсяс, дак ме тэнö и тшöтш городöдз кольлала.

— Спасибо инö. Эта понда и ме тэнö кöркö окала.

— Ог мыйкö ме верит сымдасö, — нарошно гажтöмакодь ловзисьöмöн шыасис зонка нывкаыс кöсйисьöм вылö. А мöдыс, гажмыштöм ни невна эта басни коста, шутитöм могись одзлань содтiс:

— Быль и быль, Пашка. Вот адззылан, он верит дак.

Деревня ладорас бертiсö перытжыка, дзик полiсö кытчöкö сёрмöмись. Но сiдз кыдз тöв-зэрыс öнi сöздiс паныт чужöмö, локтöнняныс и шонавны бытшöмика эз ештö. А янсöтчылiсö сiя ойö дзир кынымкö час кежö.

VII

Мöдiк петуххез бöрсянь Аня вöлi кок йылас ни. Нывка перыта пондiс лöсьöтчыны туйö.

— Кытчö тэ öтнат, сэтшöм пемытiнас — чеччис нылыс сьöрö да юалiс мамыс, Майбыр Парась.

— Да не öтнам ме, мам... Пашкаыс менö кольлалас.

— Он разь и пов сыкöт муннытö?

— Сыкöт ме кöть тöлiсь вылö.

— Ог тö-ö-öд. Зонка морт эд, эз бы обидит. Да мыля тэ сiйö, ас киння пöрисьжыксö, öнöдз челядь нимнас шуан? Сiя эд абу ни челядёк, армиясянь ни зонкаыс бертiс да?

— Кыдз нö öшö меным сiйö шунытö? Кыдз велассьöм учöтсянь. Мый кöть невночка пöрисьжык дак? Öтлаын эд быдмим.

Кöр несьöкыт сумкаöн кисой вылас да котöрöн тэрмасьтöн, нывка сибöтчис тракт дорö, мöдыс эстöн сiйö видзчисис ни.

Асыв кежас погоддяыс ештöм вöлi мичасявны. Зэрнытö дугдöм. Вöлi дзир одззакодь тöла да кöдзыт. Бокись карманнэзö киэсö сюйöмöн зонка чеччалыштлiс кок вылiсь кок вылö öтiк местаын.

— Ештам? Эшö эд и билет ковсяс босьтны.

— Колö ештыны, мунан бы дак.

Зонка нёджжöвтыштiс арся пальтоа нывка вылö, эстöн ни босьтiс сы киись сумкасö, мöднас, кыдз учöтикöс, кутiс сiйö кипöлöт, и нiя лэдзчисисö туйö.

Шоналöм могись зонка перво жö öдззöтчис мунны перыта. Вынöн да чорыта сiя вешталiс одзлань армейскöй сапога коккесö, шупыта керис оськöв бöрсянь оськöв. Эз кольччы, вежöртана, сы сьöрись и нывкаыс, кöда кань моз кокнита, топ му бердас сибавтöг, вöтчис ёртыс сьöрö.

Эз чулав и джын час сьöрна этадз оськавтöн, кыдз нiя локтiсö Лолог ю бердöдз. Сэк кежö кыкнанныс ештiсö шонавны ни и асывся ыркытсö да тöвлiсь орöттöг пöльтöмсö кывны дугдiсö.

Ю сайсянь туйыс кыссис шуч керöс паныт, Но и эстöн некöдыс ны коласiсь чожсö эз чинт. Тэрмасьтöнняныс нем йылiсь нельки эз и баитсьы, кыдз бытьтö быдöс коланаыс сэтчöдз вöлi висьталöм ни, и горöтчынытö сэсся öтамöдлö кольччис нем. Ордчöн оськавтöн, нiя дзир гусьöн-пöлöн дзарышалiсö öтамöд вылö, мед казявны, кин ны коласiсь мыдзас медодз да то ли жагсьöтыштас оськöввесö, то ли мыйöнкö мöдiкöн казьмöтас эта йылiсь. Но некöдыскöт да нем сэтшöм вылö вачкисяныс эз ло и син вылö некöдыслö эз усь. Этасянь быдыслöн ны коласiсь и зорамис öтамöд дынö кытшöмкö вöвлытöм эшö эта вотöдз уваженнё да ас думаэзын этöн гордитчöм. А сiя гажöтiс, сетiс кыкнанныслö одзлань кежö вын да чож, кокньöтiс оськöв, и нельки асывся пемытыс сорны-дзугны нылiсь оськалöмсö эз вермы. Эз вöв нывкалöн и некытшöм полöм, кöда йылiсь гортсянь петiко казьмöтiс сылö мамыс, кöть эстöн, пемыт вöр коласас, зонка вермис бы сувтöтны сiйö быд оськöв вылын, кутны да керны, то ли кöть пондывны керны быдöс, мый сылö пырас юрас. Эта йылiсь нывкалö кыдзкö нем нельки эз и думайтсьы. Думайтсис нач мöдiк. «Мунны бы вот этадз ордчöн шуч олан пыр, век сьöрна». А быдöс, натьтö, сысянь, что зонка видзис ассяняс сетöм кыв. Эта кадö сiя ас кежас думайтiс тшöтш сiйö жö думасö, оськалiс кыдз сойкöт.

Мысас локтiсö одз, кöр билетнöй кассаыс, кöда уджалiс гостиницаын, вöлi эшö пöдана, и кöдö осьтiсö ны локтöм бöрсянь ни.

Зонка ачыс сулалiс очередьын, ачыс небис билет, а сэсся эшö видзчисис, кöр сибöтчас автобус. И вöлись сэк, кöр нывкасö, былись кыдз сойöс пуксьöтiс колана местаö да кольлалiс вöрзьöм автобуссö туйö, ачыс, öнi öтнас ни да сiдз жö подöн, иньдöтчис бöр гортö. Кыкьямыс километр кузя туйколас дöнзис сылö öтмöдöрö асывся прогулка местö.

Чожа мый эта бöрсянь зонка лöсьöтiс и ассис машинасö: разьсьöмыс местö сувтöтiс виль мост, вились лунiсь-лун пондiс ветлыны рейсö.

Праздник вотöдззас Павел ештiс кежавны нывкаыс дынö кык-куимись: овны адззисьлытöг öнi нiя эз ни вермö. А праздник панытас, кыдз и баитчисö одзлань кежö, зонка пуксьöтiс сiйö городсянь аслас кабинаö, вайöтiс горт öшын увтöдз. Нельки эстöн сiя осьтiс сы одзын ыбöсок, горöтчис:

— Вай ме тэнö киэз вылын керкуöдззас пырта.

— Мыйнö тай, он да. Адззылас эшö кинкö дак... Вешшы, ноко, ме ачым пыра.

А кöр нывка аслас тöбалöм сумкаöн кайис поспуэз кузя вывлань, сэтчинсянь вöлись, «адззисьлытöдзсö» висьталöм бöрсянь, эз вунöт, рочалiс:

— Пырав ашын миянöдз.

— Гортын лоан?

— Лоа, натьтö. Праздник эд ашын.

— Видзчисьны пондан?

— Понда, понда, — унажыксö дразнитöм могись ни горöтчис нывкаыс да сiйöн сорöн саясис ыбöс коласас.

VIII

Петны том отирыслö деревня вылас и былись вöлi некытчö. Но праздник коста Павел да Аня сымдасö кыдзкö эз и казялö.

Асывся югытöн, кöр ештiсö деревенскöй горрез, а песок сорöн яйеджöдз зыртöм джоджжез пасьта вöлiсö ольсалöмöсь горткыйöм праздничнöй половиккез, не быд лунся уджалан паськöмöн ни, а лöзвевья костюмöн, арся пальтоöн да первуись, вежалуныс увья жö кышалöм норковöй шапкаöн зонка — рочалiсö эд — кайис чышкöм ни сы вотöдз поспуэз кузя, ёркöтчис, осьтiс ыбöс да оськöвтiс нывкаэс порог омöн.

Пасьтасьöм асывсяняс цветастöй дженытик халатö, Аня, эта коста сулалiс комод вылiсь зеркало одзын, сынасис.

— Май, тэ тай чеччöмыт ни, — недолытсö сайöвтöм могись нарошно дивуйтчöмöн горöтчис сiя зонкаыслö да перыта сайöвтчис комись заборка сайö. Одзлань сэтчинсянь ни негорöн кылiс:

— Пантав мун, гöсь тэнат локтiс.

Недыр мыйись, тыра кружкаöн киас, комсянь мыччисис Майбыр Парась, нывкалöн мамыс, гажвевйöн дивуйтчöмöн öтпырись плеснитiс пöвкинас, горöтчис:

— Былись тай, мак, гöсь вöлöма. Здорово инö тэныт. Да мый нö он пуксьы? Али кöзяйкаыс эз и рочав пуксьынытö, сiдз комас и пышшис? Вот эд сiя, отир смекыс кытöн — луншöрöдз узьнытö. Пуксьы жö, зонö. Пуксьы, кут кружкасö да ю вежалунсясö. Сöветскöй праздник эд талун.

Чожа мый комсис мыччисис и ачыс нывкаыс. Вöлi сiя öнi не халатöн ни, а югыт гöрд рöма, кыдз и ачыс октябрьскöй праздникыс жö, бытшöм платьеöн, кöдасянь югмыштiс-гажмыштiс не только зонкалöн син одзас, но и быдсöн керкуыс. Пуксьыны да баитны нывка и эз понды. Сiя дзир öтпырись, дзик козьналiс, нёджжöвтыштiс веськыта зонкаыс ладорö, мыйсянь ачыс жö рöмсялiс, кыдз выввежöтыс, гужгыштiс-сувтöтiс клеёнкаöн везтöм пызан вылö пым пирöг-шаньгаэзöн важвевья (шоча ни öнi сэтшöммесö панталан) пуовöй шердын, перыта сайöвтчис бöр. Мöдöтпырись нывка петкöтiс пань-вилка да яйöн шыд, а сэсся нöкьяйöв да яишница, пуягöд, капуста да сола тшак. А кöр быдöс праздник кежö керöм-лöсьöтöмыс вöлi кайöтöм-сувтöтöм пызан вылö, сэк вöлись нывка сувтчыштiс паныт зонкаыслö, тырппес вылын сылöм шынньöлöн горöтчис:

— Вешшы, гöсь, пызан саяс.

— Спасибо, Аня. Ме пöт, оз тöр. Часöт дзир пызан сайсянь.

— Мымда тöрас. Эн шванитчы. Пуксьы, тшöктöны дак, — горöтчис нывка и, кытчöдз эз мыччись комсис мамыс, оськöвтiс сы бердö зэв, перыта пöрччалiс зонка пальто бердiсь киззез, чöвтiс, öшöтiс пальтосö стена бердiсь тув вылö. А кöр кыкöн öтамöд бöрсянь пуксисö пызан сайö, Аня, öнi комланяс ни, горöтчис:

— Мама! А, мам! Оз я тэнат сэтчин мужицкöй нем адззись?!

— Мыля жö бöра оз? — шыасис заборка сайсянь паныт нывкалöн мамыс, а чожа мый мыччисис сэтчинсянь чочком вина бутылкаöн, вайис да сувтöтiс сiйö пызан вылас, зонкаыс одзö.

— Осьт, зонö, да кисьтлы ас кинат. Мужик мортыслö лöсялöжык.

Сёрöнжык, зонкасö кольлалöм могись, Аня пасьтасис, öтiк ыбöсын петiсö. Поспуэс кузя лэдзчытöн сiя гажвевйöн горöтчис:

— Видзöт жö, май, öтöрас талун кытшöм гажа.

— Да ме адззылi ни татчö локтöн.

Аслас басниын нывка эз сорась. Праздничнöй öтöрас сiя лунö и былись вöлi гажа. Кузь да зэра ар бöрсянь, кöда мыдзöтiс отирсö аслас быд лунся нять-ваöн да ульвевья кöдзытöн, эта ойö лажмытика ештöм усьны медодзза лым. öтiк ойöн сiя вевттьöм мулiсь пемыт рöма краскаэз, вежöм-белитöм öтвыв сылiсь чужöмбан. Гажтöм да пемыт местö öтöрыс öнi мыччассис тöдчöмöн югмыштöмöн, просжыкöн и былись топ праздничнöйöн да гажöн. Погоддяыс эз вöв кöдзыт. Сiйöн и лымыс усис уль да нюдз, кöдаись бур вöлi быглявны лым бабаэз. А кинлö жар-буса гожум да гажтöм зэра ар бöрсянь оз овлы охота ветлöтыштны шоччисьöм могись небыт да сöстöм лым кузя, кытчöдз судзö кок, бытшöм да гажа настроеннёöн тальыштны сiйö да кольны сы вылын ас бöрсянь серöтан след?

То ли зонкаыс первуись вовлöмсянь, то ли мыйсянькö мöдiксянь, сiя лунö Анялöн настроеннёыс и былись вöлi бур да гажа. Посöдз дынсяняс неылö муныштöм коста сiя кывзiсьöв-керис аслас оськöввез увтö, гажвевйöн дивуйтчыштiс:

— Кылан, кыдз кок увтын муркöтö? Кынымись тальччан, сё мурк да мурк. Тэныт гленитчö?

— Мыля жö оз? Гленитчö, конешно.

— И меным тожö. Вот бы ветлöтыштны сы кузя, дак нять эд деревня вылöттяс.

— Позьö и деревня сайöт.

— Дак петалам я мый я?

— А кин миянöс видзö?

— А отирыс? Адззыласö, дак мый баитны пондасö?

— Ась адззылöны. Ми эд некин увья ог сайласьö. Кинлö мый охота, ась сiйö и баитöны. Нiя и адззывтöг вермасö баитны, мый колö и оз.

Эта басни коласын ни чулалiсö улица дорись осьта воротаэз, петiсö деревня сайöдз. Одзаныс, непаськыт кырас сайын, пондöтчис öзимöн вевттисьöм ыб, кöда куйлiс сiя жö лым увтын.

— Дак вуджалам кырас сайöдззас?

— Мыля бы и не? Конешно, вуджлам. Талун ми тэкöт öзим ыбсö быдсöн кытшöвтам.

— И дыш бытьтö тэнат оз пет сы ылына подöн оськавнытö?

— Шоччисьöм могись тэкöт оз, кöть лунтыр сьöрна.

Нывкасö усьöмсис видзöм могись крутiнсö лэдзчикö зонка кутiс сiйö кипöлöт. А кöр мöдыс нильдiс да невна эз пöр гатш, зонка ештiс лэбтыны сiйö киэс вылö.

— Лэдз жö! Адззыласö деревня вывсяняс отирыс! — горöтлiс Аня. Но мöдыс тöдiс, что кырас пыдöссис нiйö некин оз адззы, да сiдз жагвыв и лэдзчöтiс сiйö улöдз. Сiдз жö, öтамöд бердын киэзнаныс видзсьöмöн да котöрöн öдззöтчöмöн, кайисö нiя нильыг лым кузя и кырас мöдöрас. А сэсся некöдыс öтамöд бердiсь эз ни лэдзчисьлö, сiдз ордчöн и вешталiсö коккезнысö ыбыс пöлöн, тэрмасьтöг керисö оськöв бöрын оськöв.

Баитнытö нылö ас коласын некин да нем эз мешайт. Быд берся коласын кытшöмкö кадö Аня юалiс:

— Кöр нö гöтрасьнытö мöдан? Ар эд вот локтiс? Зонка понда нывкалöн юасьöмыс вöлi нач видзчисьтöм, но паныта кывнас, кыдз баитсьö, карманö сiя эз пыр, адззисис перыта.

— Тэ мый, разь мунан ни бы? Согласитчан, дак ме кöть талун жö готов. Локтам вот часöт деревня вылас, кежöта гортö, сымда и эм. Сiдз эд öнi унажыксö керсьö.

— Мыйнö тай, он да. Не ме йылiсь басниыс. Ме коддес быдлаын тырмöны.

— Миян деревня вылын сартаса биöн кошшись, дак öтiкö тэ кодьсö он адззы. А тэ мый, он мöд согласитчыны?

— Кытiсь нö, Пашка? Ме жö эшö челядёк. Меным жö эшö кык год сьöрна велöтчыны колö. Тэ эд сё сы дырнасö видзчисьны он понды.

— Мыля нö ог, кöсйисян кö тэ öнiсянь мунны ме сайö да он кö бöбöтлы.

Шутка могись пондöтöм басниыс, кöда йылiсь эта вотöдз некöдныс, натьтö, эз и думайтö, пондiс вачкисьны нач серьёзнöй вылö, кежнытö кöда увья öнi некöдöрö эз ни позь.

― Ачыт, батi, менö одзжык бöбöтлан да... Тöдан эшö сэтчöдз ваыс мымда котöртас. Неöтпырись гöтрасьлыны ештан.

— Ог, натьтö. Ог думайт сымдасö. Сэтчöдз меным уджыс тожö тырмас. Кынтыштас вот, дак вöр ковсяс петкöтны.

— Строитчыны думайтан?

— Пондывны колö, кытчöдз айö ловья. Мымдакö сё отсалас. А то сылöн важ керкуыс нач ни мöдö пуксьыны. Сэтшöм керку пытшкас и свадебшанасö стыд лоас корнытö да и полöм пондас петны: свадьбаыс коста киссьыны ештас. Кытчö ме эта бöрсянь ичмоньыскöт узьнытö вода?

— Мун жö! Эн ректав, кöдö оз ков! — Нывка кокнитика татшкыштiс ас бердсис зонкасö, öткоста ачыс бергöтчис мöдöрö, баснисö вежöм могись одзлань юалiс: — Он разь мöд некытчö гортiсь мунны?

— Ог, натьтö. Мунны, дак служба бöрсяняс перво жö колiс. Да оз меным позь муннытö. Куима ни мунiсö, кинлöкö и гортын колö овны. Пöрисьöсь аймамö лоисö. Нiйö некытчö он вöрзьöт и öтнаснысö тожö он коль.

Одзлань нывка нем эз ни горöтчы öтласа басни бöрсянь, мыйкö пондiс думайтны ас кежас. А мöдыс, недырик чöлыштöм бöртi, эшö öтпыр юалiс:

— Но дак мый, баитчим эта вылын? Тэ кытчöдз велöтчан, ме — строитча. Сэтшöм дворец тэныт гымга-строита, кытшöм Губанова пасьта некинлöн и öтiклöн абу, а? Служиттöнняс ме быдкоддезö отирыслiсь адззывлi и öнiсянь ни тöда, кытшöм меным колö.

Рöмсялыштöм чужöм вылас сэтшöм баснисянь, медперво Аня и паныта кывнас эз адззись, нёджжöвтыштiс зонкаыс вылö шынь-серöмöн тырппес вылын, жмитыштiс пельпоннэзнас: ме пö ог тöд бытшöмика, кыдз керан, сiдз и кер. Но кöр зонка юалiс эшö и куимöтпырись, сэк вöлись нывка, синнэсö лэбтывтöг, паныт шыасис:

— Но баитчим.

Одзлань зонка эшö вель дыр висьтасис сы йылiсь, кыным öшын лоасö писькöтöмöсь виль керкуас да кöдöрö пондас видзöтны быдыс ны коласiсь. Кытшöмöсь лоасö керöмöсь ны гöгöр наличниккез да кыдз лоас серöтöм öтöрись посöдз.

Этна басниэз коста, унажыкыслö кöдна коласiсь нывка и веритнытö эз лысьт, öзим ыб гöгöр кытшыс шогмис вель паськыт. Сайись дорас, кытöн сiя сибалiс вöр бердöдз, öтiклаын нiя пуксьыштлiсö нельки шоччисьны. Деревня вылас бöр бертiсö пемдандорас, мыдзвевьяöсь да тшыгöсь. Нывка сэтöн жö вöлi иньдöтчис гортас, и дзир телевизорсö видзöтöм могись зонка вермис кежöтны сiйö ас ордас.

Пырисö öтiк ыбöсын, но чöвтны нывкасö перво жö зонка кыдзкö вунöтiс, медперво пондiс пöрччавны киззесö ас пальто бердiсь.

— Нач тай кытчöкö öшин, асывсянь гортiсь мунiн да, — горöтчис телевизор одзын пукавтöн зонкалöн айыс. Эта вылö мöдыс шутка местö паныт юöртiс:

— Адззиси жö тай. Корасьны вот ветлi, моньöс тiянлö вайöтi. Вермат тöдсасьны.

Сэтöн жö кылыштiс ыбöслöн негорöн пöдныштсьöм. А кöр зонка дзар керыштiс бöрас, нывкаыслöн керкуас не дук, не след, кыдз баитсьö, эз ни вöв.

Вöтiс сiйö Павел дзир улич вылын, но кыдз да мый дырна бы эз кеймись, бергöтны сiя рытö бöр сiдз и эз вермы. — Вот тэныт и монь. Вот и вайöт сэтшöмсö керкуас. Умöль, батя, эта приметаыс, сiдз и тöд. Унаись сэтшöмыс керкусис пышшылас, кöть и вайöтан кöркö дак. А, батi, оз и лок, кадсö дзир весись манитас.

Павел — морт öнняся и некытшöм приметаэзлö да йöз баснилö, вежöртана, эз верит. Мамыслiсь кыввесö зонка примитiс сэтшöм жö шутка местö, кыдз и ассис нывка вылын шутитöмсö.

Праздник мöдiк лунö, одз асывсянь, сiя вились иньдöтчис нывкаэс ордö. Локтiс не гöститöм могись, кыдз одзза лунас, а мед отсавны мама-нылалö пыртлыны карчйöр зородiсь сарайö турун. Уджыс керсис павжун кежö, а эта бöрсянь эшö вель дыр пукалiсö пызан сайын. Отсöтыс понда Майбыр Парась «зятьыслö», кыдз сiя шутитöмöн неöтпырись ни шуис басни коласас зонкасö, винасö эз жалейт, кисьтлiс стопка бöрын стопка да пöдтiс-юкталiс.

Сiя рытö нывка пыксьыны öддьöнсö эз ни понды, кеймисьтöг локтiс да пырис зонкаэс ордö, а сэсся рытывбыт сьöрна пукалiсö öтлаын диван вылын да видзöтiсö телевизор. А одз асывнас Павел, кыдз вайöтiс, сiдз и нуöтiс Аняöс городас бöр.

Кыдз бы сэтчин эз вöв, но öтлаын чулöтöм праздникыс гленитчис, тыдалö, кыкнанныслö, сiдз кыдз этадз жö сы бöрсянь вöлiсö чулöтöмöсь и Виль год, и март вывся инькаэзлöн лун.

IX

Сибöтчис май. И сэк кежö Аня тожö лöсьöтчис гортö. Но эшö неделя кыкöн одзжык праздник вотöдз зонкаыс городас мыччасьны дугдiс. «Жугасис, натьтö, бöра машинаыс. Но ась, вочас сэктöдз, дак локтас. Некыдз сiдз лоны оз вермы, мед сiя праздник вотöдз ме дынö эз кежав. Баитчимö жö одзлань», — вынсьöтчис лöньсьöтны нывка асьсö.

Эз вермы, да лоис. Праздник панытас зонкалiсь локтöм-казьмöтчöмсö нывка видзчисис лунтыр сьöрна, но быдöс весь. Мöдыс сiдз и эз мыччась.

Праздник лунас Анялö, öтлаын аслас подругаэзкöт, кöдна эз мунö горттэзö, а кольччисö праздник кежö городö, колiс лоны демонстрация вылын. Но эта местö одз асывсянь нывка вöлi автовокзалын, сулалiс очередьын, билетнöй касса одзын. Но кыдз нарошно и овлö сэтшöм кадö: билетыс нывкалö эз дöнзьы. Сэк сiя уськöтчис шофёр дынö, корис-кеймисис сiдз, что откажитны, не пуксьöтны, кöть бы местатöг ни, шофёрлöн вын эз судз. Вежöртана, что аслас нывкалöн некытшöм пуксян места йылiсь и дума эз вöв. Сiя согласитчис бы сулавны кок йылын кöть лунтыр сьöрна, мед дзир вермыны мунны. И вот... Нёль час сьöрна коккез вылын сулалöм бöртi — сiя Мысын. А кöр узьтöм да мыдзвевья, öтлаын мöдiк локтiссезкöт нывка петiс автобусiсь, сэтöн ни сюрис зонкаыс киэз коласö.

— Здорово, Павлик!

— Привет, Аня!

— Тэ кытчö сiдз?

— Тэ дынö. А тэ?

— Ме тожö тэ дынö. Тöдi эд, что он вермы терпитнытö да гортö праздник кежас локтан.

— А мыля нö тэ ме дынö городас сы дырна эн кежав?

— Эн вермы видзчисьнытö?

— Эг, конешно.

— Адззан, эг ешты локнытö. Видзчисин бы эта автобуслiсь бертöмсö, дак сэтчин бы и пантасим.

— Не сiйö ме шуа. Мыля ас машинанат эн кежав. Кöсйисин жö вайöтнытö. Ми жö одзлань эта йылiсь баитчим.

— Кöсйиси да... Кöсва вылöттяс кывтiс. Ас машина вылын ме джын месяц сьöрна ни некытчö гортiсь эг петав.

— Жугасин я мый я бöра?

— Эг да... Сёрöнжык вежöртан.

— А öнi кытчö-кöдöрö?

Нывкаыс вылö гажа шынньöлöн видзöттöн зонка жмитыштiс пельпоннэзнас.

— Видзöт, кöдöрö тэныт буржык. А меным кöть кöдöрö — сё öтiк. Праздник жö талун — ми тэкöт öтлаын.

Мый йылiсь казьмöтiс зонка бöрья кыввезнас, вежöртнытö эз вöв сьöкыт. Ас понда сiя лыддис праздникнас не сiйö майскöйсö, кöда сiя лунö вöлi быдöнныс понда, а дзир ассиныс пантасьöмсö. Медколана да медгажа праздникнас ны понда вöлi сiя.

Мыссяняс öнi матынжык вöлi гортлань, и недыр мыйись нiя сылань и иньдöтчисö.

Подöна туйыс вöлi нять дзир мысовскöй шойна весьтöдз. Одзлань пондöтчис кöс яг, кöда кыссис тшöтш Лолог ю бердöдз. А песока туйыс кузя — коктö вешты тöд. Но сiдз кыдз нылöн праздникыс — радейтöм да сысянь гаж — кыкнанныслöн быдсöн вöлi сьöраныс, то нельки тшыг да мыдзувья гортлань öддьöнсö нем эз тэрмöт, и нiя нельки нарошно эз тэрмасьö. Ордчöн зонкаыскöт гажöн да кокнита оськавтöн, нывка дивуйтчöмöн баитiс:

— Некöр и некöр, кывзы, эг бы думайт, что тэ менö сiдз бöбöтлан, кöсйисян и он лок. Мый, интересно, сэтшöмыс лоис? Эз разь позь некыдз эта йылiсь юöртнытö? Мед ме весь эг видзчись да эг надейтчы.

— Да ме кыдзкö ачым сымдасö эг думайт. Сё видзчиси, что пуксяс сэктöдз ваыс да позяс ветлыны, оз кö поссö нöбöт.

— Кытшöм ва? Кытшöм пос? Нем ме мыйкö тэ басниись ог вежöрт.

Эта коста нiя чулалiсö чукыль да петiсö сiя местаö, кöда дынсянь неылын одзаныс колiс мыччисьны ю весьтiсь послö.

— Видзöт кытшöм, он вежöрт дак.

Нывка лэбтыштiс синнэсö, нёджжöвтыштiс одзлань, сы коста жö ойкнитас аслас повзьöмувья, джын оськöлыс вылын сувтiс. Не тöдса береггезлöн, не ны коласiсь сэтшöм жö тöдса послöн и след некытшöм эз вöв. Быдöс эта местö, кытчöдз судзöтiс син, вöлi öтвывса ыджыт, сьöкыт да сьöд ва, кöда, дзик ловья, быгыльтiс-мунiс син одзöт быдсöн этöн полöтана вывтырнас да кышöтiс, кыдз ылiсянь сибöтчись ураган-тöв. Вылынся-вылын пос местö, кöда вывсянь тöлöн-гожумöн и видзöтнытö увлань петiс полöм, öнi ва вевдöрас тыдыштiсö дзир перилаэз, кöдна вачкисисö идзас тылöппез вылö, мыччассис, бытьтö вöрöтчöны, быд вынiсь катöны паныт, но öткоста кольччöны сё сiя жö важ местын.

Аслас повзьöмувья Аня кылiс, кыдз кöдзöтiс сылiсь вывтырсö. А öткоста сыкöт кöдзалöм гыркыс пондiс лэбтiсьны вывлань. Повзьöмыс увья жö синваэзöн тырöм синнэзöн ва вылас видзöтöмсянь сiя казялiс, кыдз пондö дикмыны-бергöтчыны юр, а горшö пыкöтасьöм кöдзыт гырксянь эз понды тырмыны ру, мед бытшöма ловзисьны. Быдöс эта сыкöт вöлi нач видзчисьтöм. И мед дзир не öштыны казявтöг садь да не усьны кок йылiсь, нывка перыта бергöтчис бöр, оськöв кыным ылына кежис туй вывсис бокö да лэдзчисис джынысви сiсьмöм пожумовöй мыр вылö.

— Вежöртiн öнi, мый увья ме тэ дынö машинанас локны эг вермы?

Паныт эта вылö нывка öнi эз ни шыась. Дзир дыр мыйись чöлöм-думайтöм бöрсянь сiя одзлань пондöтiс:

— Некöр тай Лологас сэтшöм ыджыт ваыс эз вöвлы, мед нельки пос вевдöрöт мунiс. Кыдз нö сэк гортöдз шеднытö? Кыдз тэ ачыт талань вуджин? Мый нö ми öнi эстöн пондам керны? Тöдöмöн, дак тай абу и колöм гортö локны.

— Вуджны пондам, мый разь этася, — дженытика шыасис зонка нывкаыс басни вылö, шутитöм могись одзлань содiс: — Перилаэс тай тыдалöны. Котöртам часöт ны кузя мöдöрöдззас да и дöс сэтöн. Адззан-он, ме татчöдз сiдз вуджи и нельки кок некыт эг вад.

— Мун жö, Павлик! Эн баит, кöдö оз ков. Эстöн ни Аня перыта сувтiс коккес вылö, оськöв кыным ылына керис бöр Мыс ладорö. И пондыв зонка былись вуджöтны сiйö кипöлöт этна перилаэз кузя, нывка чожажык пышшис бы подöн бöр Кудымкарöдз, но гортлань сыкöт эз бы вудж.

— Мый, полан бытьтö? И нельки мекöт он лысьты?

— Пола, конешно, кöть и тэкöт дак. Ме коли синнэзöс сылань лэбтыны ог лысьт.

— А ме бы вуджи. Ковсис бы, шуам, тэкöт адззисьлöм могись, ме бы и пыжтöг, и перилатöг... некытшöм не нюр, не ва эз бы видз.

— Сiдз, батi... А ме вот ог лысьты.

— Но ладно, он лысьты дак. Лок, пыжöн сэк вуджöта.

Берег пöлöн зонка иньдöтчис вывлань. Но нывка, тыдалö, и öнi эшö сылö эз верит, оськöвтiс сьöрсяняс полöмöн, нето-нето.

Неылын туй бердсянь, берег дорись пожум бердö игналöмöн, и былись сулалiс пипуись гарйöм, учöтик да кокнитик важ пыжок. И кöр зонка осьтiс замок да лэдзис пыжсö ва вылас, нывка жагвыв сибöтчис сэтчö жö.

— Кыдз нö ме сы вылын... Полöм петö да...

— Полан, дак ваыс вылö эн и видзöт. Сэк и юрыт дикмыны оз понды. И эн вöрöтчы öддьöнсö, пожалуйста, а то купайтчам. Пыжыс учöт, он и казяв, кöд коста бергöтчас.

Зонка пуксис бöрсяняс, жагвыв татшкисис пелыснас берег дорсянь. Сiдз жö жагвыв вöрзис местасис и пыж.

Джын час сьöрна, кытчöдз Павел уджалiс пелысöн, а быд сыныштöмсянь жагвыв одзлань чепсасьöмöн учöтик пыж вуджис мöдöр ладорас, полöмсянь чочкоммöм чужöма нывка пукалiс пыжас не кулöм, не ловья и не только вöрзьöтчыны ас местын, нельки ловзисьны горöнжык эз лысьт. И вöлись сэк, кöр пыж сибöтчис да кокнитика татшкисис нырнас мöд берег дорас, а Аня кылiс ас кок увтiсь чорыт му, пыдына да гажвевйöн ловзисис.

X

Погоддяыс майскöй праздник коста сулалiс мича да кöс. Куим лун сьöрна пос вевдöрись ваыс пуксис бöр, а ачыс посыс кольччис дзонь да ас местын. И ась сiя öнöдз и вöлi эшö ваын, и кайны сы вылö петiс полöм нельки подöн, нывкасö бöр городас нуöтöм понда Павел нельки ассис бензовозсö кайöтны сы вылö эз повзьы.

Гожумся практика вылö Аня сюрис не гортö, а йöз районiсь колхозö, и абутöмкодь туйез увья гортын часто эз мыччась. И ась этасянь мукöд коста зонкасö и кутлiс гажтöм, öддьöнсö сiя эз тöждiсь. А висьтавны кö веськытжыка, дак тöждiсьнытö эта гожумö сылö вöлi некöр. Арсянь петкöтöм вöрись колiс тшупны да лэбтыны керку сруб, и сы увья уджыс зонкалöн вöлi горшви.

Быдöс петкöтöм вöрыс вöлi вольöм-лöсьöтöм эшö майскöй праздник вотöдз, а праздник бöрас пондöтчисö тшупны. Обложитчöмыс бöрсянь вит стенаа сруб вылö ковсис öксьывлыны помечнас витiсь жö. Кык лун сьöрна каттисö-панiсö шатёрöн керку юр. Рыт-асыввезöн вöлiсö гарйöмöсь гуэз да кисьтöмöсь-тэчöмöсь фундамент местö квать столб. Эшö лун сьöрна, и бöра жö ыджыт помечöн, срубсö лэбтiсö да пуксьöтiсö нитш вылö. Но нельки эта вылын строитчан уджыс быдсöн эз керсьы. Не етшажык этася вöлi сiя и одзлань кежö. Кольччис эшö писькöтны ыбöссэз да öшыннэз, сувтöтны ны бердö косяккез, керны ыбöссэз да рамаэз, лöсавны стенаэз, вöвдны джодж да потолок, а этася эшö унася-уна быд торсö, кöднатöг некытшöм керку оз шогмы. Сiйöн, усьлiс кö кöс да бытшöм погоддя коста бертны зонкалö невна одзжык рейссянь, лунiсь лун, сёр рытöдз сiя бергалiс аслас сруб гöгöр, сё мыйкö пилитiс да лöсалiс, стружитiс да дорис.

Строитчан уджыс, кöр мортыс керö мыйкö ас понда, сiйö пыр гажöтö. Гажöтö нельки сэк, кöр мыйкö увья этö уджсö ас оланын мортыслö ковсьö керны мöдöтчид нето куимöтчид, сiдз кыдз ас понда строитчöмыс — пыр надея одзланься олан вылö. Павел ассис керкусö строитiс первуись да томувья, эшö гöтыртöмöн. Но сэк кежö зонка тöдiс ни, что строитö сiйö не только и не сiдз ас понда, кыдз сiя колана морт понда, кöдö любитö и кöда сылöн эм. Что овнытö эта керкуын ковсяс не öтнаслö, а кыкöн, сыкöт, кöда век кежö сайöвтiс асьнас сы весьтiсь шондiсö и некин мöдiк кöдася сылö оз ков, некин йылiсь этася нельки оз и думайтсьы. Этасянь строитчан уджыс, сьöкыт сiя нето кокнит, вöлi сы понда кытшöмкö аскодьöм, вöвлытöм эшö öнöдз сы оланын, öддьöн дона, сэтшöм жö колана, гажа да шоныт праздник туйö, кöдасянь нельки дыш некытшöм эз кут, мыдз некытшöм эз вермы. Часто уджавтöнняс, кöр зонка сувтöтлiс син одзас, кин да кытшöм хозяйка пондас эта керкуын лöсьöтны сылö сёйны, миськавны джодж, пукавны тöвся рытö ордчöн сыкöт телевизор одзын, бергавны поснит челядь, сы челядь, гöгöр да ольсавны сылö ольпась, аслас гажсянь, аслас поздiсян праздниксянь сэтшöм кокнит да долыт вöвлi сьöлöм вылын, что не öддьöн сьылiсь-гажöтчись мывкыда, сiя, аслыс казявтöг, негорöн пондöтлiс мыйкö сьывны нето йöктöмсорöн муныштлiс плотиттöм эшö джодж плахаэз кузя. Кин некöр эз поздiсь сiдз ас оланын, аслас ёрт да семья понда, сiя сымдасö и оз вежöрт. Но Павел понда эта поздiсьöмыс и былись вöлi öддьöн ыджыт да югыт счастьеöн, кöдаын сiя адззис ас оланiсь быдöс дон.

Арланяс, кöр нывка бертiс гортö гожумся каникуллэз кежö, зонкалöн керкуыс сулалiс вевт увтын ни. И ась сыын öшыннэс писькöтöмöсь эшö эзö вöлö, шатёрöн вевттьöм керку юр да кружеваöнмоз серöтöм-баситöм карниззэс мыччалiсö öнiсянь ни, кытшöмöн сiя мöдöтчис лоны быдсöн строитöм бöрсянь.

— Но и кыдз? — юалiс зонка, кöр кыдзкö рытъявыв нывкаыс кежис сы ордö телевизор видзöтöм могись.

Гажвевйöн шынньöвтöм коста кытшöмкö недолытсянь Аня вежсьыштiс чужöм вылас, но бöртiжык, кöр вермис недолытсö, шыасис:

— Кертöм эшö да... Но басöк, натьтö, лоас. Былись тай дворец кодь мöдö шогмыны.

Нывкаыс, натьтö, эз тöд, а ачыс зонкаыс эз казьмöт сiйö, кытшöм ыджыт да колана отсöтöн вöлiсö сы понда этна висьталöм кыввес, кöдна вайöтiсö не только гаж, а зорöтiсö вын да мыла одзланься строитчан уджын.

XI

Умöль арвыв погоддя коста Павел петалiс отпускö и быдсöн этö кадсö чулöтiс гортын. Зонка лунiсь лун гуддисис-бергалiс аслас керку гöгöр. А кöр первуись эта бöрсянь петiс рейсö да кежис бöр туй коста нывкаыс дынö, пантасьöмныс бöрсянь мöдыс горöтчис:

— Мый нö он кежав? Вунöтiн я мый я туйсö?

Зонкаыс понда эта мыйкö вöлi виль, позьö висьтавны, вöвлытöм. Горöтчыны сымдасö йöз дырни нывка, вежöртана, некöр эз бы лысьт. Басниыс пондöтчис общежитие жырын, кытöн эта коста нiя вöлiсö дзир кыкöн. Зина, Анялöн подругаыс, кöда зонкаыс локтiк кежö вöлi сэтöн жö, эшö басниыс пондöтчытöдз казявтöг кытчöкö петiс.

— Гажтöмтчин я мый я? — шутитыштiс зонкаыс.

— Думайтан эг я мый я? Конешно, гажтöмтчи, — басöка зэгнитыштiс юрнас да тырппес вылын сыланкодь шынньöлöн шыасис паныт нывкаыс, но мед кежны сэтöн жö эта басниись, нач мöдiк йылiсь ни одзлань пондöтiс: — Адззан, миян кытшöм кöдзыт?

То ли дыр осьтöн видзöм форточкасянь, то ли умöля лонтöмсянь жырокас нывкаэзлöн и былись вöлi ыркыт. Аня вештыштiс матöжык зонкаыслань стул, лöсьöтыштiс пельпоннэс вылiсь нильдöм шаль, öтпыр, мöдöтпыр ушкыштiс кöдзытсянь вугмöмкодь чуня киэс вылö да нюжöтчис не öддьöн пым батарея бердö.

— Некин разь тэнö татöн оз и шонт?

— Оз, конешно.

— Вай ме кöть киэтö шонтышта.

— На шонт, — нывка бергöтчис батарея бердiсь, нюжöтiс кыкнан кисö зонкаыс ладорö.

Паськöтöм пась полаэзöн Павел оськöвтiс паныт. И кöр нывка сюйыштiс зонка конувттэзö ассис кöдзалöм киэсö, мöдыслö нем эз кольччы, кыдз вевттьыштны пась полаэзнас нывкалiсь пельпоннэсö, сывйыштны да жмитны ас бердö сiйö асьсö. Некöр эшö сэтшöм матö нiя эз сибöтчывлö öтамöд коласын, некöр сэтшöм матынсянь эз видзöтлö öтамöдлö синнэзö. И мымда бы эта бöрсянь нывка эз бергöтлы öтмöдöрö юрсö, кыдз эз чатрась, сайöвтчыны-мездiсьны зонкаыс тырппез увья öнi эз ни вермы.

— Лэдз жö! Стыдтöм! Нывкаэс адззыласö! — негорöн да перыта шушкышалiс Аня, но чепсасьны-пессьыны одззамоз эта лунö сiя эз ни пондыв. И вöлись сэк, кöр зонка лэдзис сiйö аслас киэз коласiсь, сы увья ассис синнэсö сайöвтöм могись нывка перыта бергöтчис мöдöрö, одззамоз негорöн висьталiс: — Позьö разь луннас... Казяласö нывкаэс, дак мый сэки думайтан?

Но жырас эта коста нысся кыкысся некин эз вöв и казявнытö вöлi некинлö. Сэтöн жö Аня сувтчыштiс пызан вылын сулалан зеркало одзö, чышкыштiс öнi эшö ёнжыка рöмсялöм тырппесö, а сэсся шутка могись грöзитыштiс неыджыт кулакнас ёртыслö: то пö тэныт эта понда. А мед дзугны эта бöрсянь ас коласын чöлöм, одзлань ачыс жö юöртiс:

— Ми талун нывкаэскöт театрö лöсьöтчим. Ветлан, батi, öтлаын?

Предложеннёыс вöлi öддьöн бытшöм. Мый эшö позис адззыны этася буржыксö, кыдз мунны колана морткöт театрö да рытывбыт сьöрна лоны сэтчин сыкöт ордчöн, öтлаын? Но... Зонка нёджжасьöв-керис недырик аслас паськöм вылö, сералöмöн сы вылö жö мыччалiс нывкаыслö.

— Этаöн я мый я ме сэтчин муна? Сэтшöмсö жö менö нельки туалетöдз оз лэдзö, — недырик чöлыштöм бöртi одзлань содтiс: — Босьт ашын кежö билеттэсö, ветлам кыкöн.

— А он вунöтчы ашынöдз?

— Пондыла не вунöтны.

И былись. Ашынас Павел босьтiс сьöрас рейсö вежалунся кöмкöт-паськöм. Заправитчöмыс бöрсянь ни городас зонка кежöтiс ассис автомашинасö общежитие котельнöй сайö, кытöн сiя некöдöрсянь эз тыдав, а видзöтышавны сы сьöрын час кыным сьöрна кежö баитчис котельнöйись кочегаррезкöт.

Сiя лунö, эшö спектакль вотöдз, аслас выввежöтын ни зонка первуись öтлаын нывкаыскöт иньдöтчис городö. Видзöтчöм могись нiя ештiсö пыравны кынымкö магазинö, гуляйтыштiсö тэрмасьтöг городскöй улицаэз пасьта, ужнайтiсö столовöйын öтiк пызан сайын, а спектакль пондöтчöм кежö локтiсö театрö.

Чöвтчöмныс бöрсянь фойеас Аня эшö вель дыр бергалiс зеркало одзын, то öтöрсянь, то мöдöрсянь лöсьöтышалiс басöка кыйöм юрсисö, унаись сибöтчылiс кинас чочком кружевнöй воротничок бердö, кöда вöлi кышалöм югыт-зелёнöй рöма шерстянöй платье вылö. А кöр öтамöд бердын киэзнаныс кокнитика видзсьышавтöн нiя кайисö вывлань, эстöн ни зонка казялiс, кытшöм любопытствоöн, нельки завистьöн видзöтлöны ны ладорö сы годся жö нето пöрисьжык зонкаэз. И сiйöн дзир, что быдыслö син вылö усись нывкаыс вöлi сылöн да ордчöн сыкöт, öтiк эта ни лэбтiс сiйö кыдз ас, сiдз и быдöнныс син одзын.

Мый мыччалiсö сцена вылын, киннэз да кыдз орсiсö, этаись зонка тöдвылын нем унаыс эз кольччы. Но рытывбытнас сiя пöттöдз видзöтiс сы вылö, кöда пукалiс ордчöн, кывзiс сы сьöлöмлiсь ас бердын гажвевйöн ёткöптöм да сылiсь шоныт ловшысö. Быдöс спектакльыс Павел понда вöлi сыын и этася унажыкыс сылö нем эз ков.

Быдöс эта вöлi сiдз жö и мöдыскöт, кöда нет-нет да и лöйышалiс гусьöн-пöлöн öгралан пöвсиннас ордчöн пукалiсь ёртыс ладорö. И ась видзöтöм спектакльсис унаыс тöдвыланыс и эз кольччы, театрö öтлаын ветлöмыс гленитчис кыкнанныслö. Сэксянь нiя и велалiсö ветлыны сэтчин быд неделя.

Сибöтчис мартовскöй женскöй лун. Сэк кежö чулалiс нывкалöн и техникумын велöтчан кад, мый вöлi кыкнанныс понда тожö ыджыт да тöдчана событиеöн. Вот мый увья зонка вель дыр жугдiс юрсö сы вылын, мый бы позис козьнавны нывкаыслö этна событиеэз кузя. Охота вöлi козьнавны мыйкö тöдчанаö, кöда кольччис бы тöдвылын вель дыр кежö. Сэтшöмнас вермис бы лоны мыйкö новьяна торрез коласiсь. Но зонка одзлань ни тöдiс, что сэтшöм козинсö нывка сысянь оз примит. Оз примит не сiйöн, что быд тор дынö сылöн аслас öддьöн кужöма бöрйисьöм, кöда увья и гленитчан торсö небны сылö зонка оз куж, а чожажык сiйöн, что нiя вöлiсö эшö öтлаасьтöмöсь. Сiйöн медбöрын Павел сымда и керис, что гижис нывкалö бытшöм поздравительнöй открытка да öтлаöтiс сы бердö козиныс местö быдса пачка лотерейнöй билеттэз.

ХII

Не öтiк час сьöрна учöтик бензовоз пырöтiс аслас фараэзöн асывся пемытас туй да, двигательнас лöгвевйöн гугйöтлöмöн, вöтчис аслас би сьöрö. Туйыс вöлi юж. Но Мыс бердсянь не öтiк дас километр ылына сiя вöлi вöвдöм важ гужевöй тракт кузя и этасянь сэтшöм чукыльöсь, что вачкисис öддьöнжыксö гармоння мех вылö, мыйсянь быд минутаö машинасö крута ковсис веськöтлыны то шульгалань, то веськытлань. Вежöртана, что видзны сэтшöм туй вылын нельки шöрöт чож эз позь. Сiйö и видзöт — сёрмыштан кытöнкö секунда кежö да сы коста жö öтлаын автомашинаыскöт берездасян канава мöдöрö.

Дзир Юксьöв сайын, кöр районнэз коласiсь границаыс кольччис бöрын ни, туйыс пондöтчис нач мöдкодь. Эстöн сiя эз ни чепсась öтмöдöрö, кыдз дуритчись вöв, а кыссис веськыта, кыдз нюжöтöм пöкрöм, и видзны кö бытшöмжыка киын руль, канава мöдöрö берездасьöмыс эз полöт. Эз сорö мунтöн кытчöдз и мöдiк машинаэз. Городсянь трасса вылас öнöдз нiя, вежöртана, и петiсö ни, дзир пантасьтöдззас локны паныт эшö эз ештö. Повны прос туй вылас кинкö вöтöм да кинкöткö пантасьöмись эз ковсьы. Ылiсянь öдззöтчöмöн, бензовоз кокнита кайлiс кытшöмкö крут керöс панытö, нето сэтшöм вывсянь жö кадiсь кадö вöв моз тарашитчöмöн, жагвыв лэдзчывлiс увлань. Бöрлань кольччисö то пемыт кöзъя везöввез, то рач-рач видзан куш кыдзовöй рассэз, то саймöтöм ни öшына деревняэз, ыббез, видззез да лымöн кундöм, гырись и поснит юэз. И кыным одзлань, тракт пöлöн пыд вöр-рассэс пантасьлiсö сё шочжыка: вешшисö ылöжык. Ны местö сё отöнжык паськалiсö ыббез да тшöкжыка пантасьлiсö гырись и поснит деревняэз.

Кык морт коласын, кöдна пукалiсö ордчöн бензовоз кабинаын, нем умöльсö боксянь видзöтiкö казявны эшö и öнi эз позь. Нельки нач мöднёж. Пондыны кö думайтны сысянь, мый вöлi висьталöм ны йылiсь эта одзын, ны дружитöм-радейтöм йылiсь, дак этö öтласа мунöмсö позис бы примитны одзжыкся местö. Висьтассяс унажык. Нывкаыс, кöдалö талун колiс, мед эта и былись вöлi сiдз, одзжыкся местаö сiйö и примитiс. Эд талун сiя вились пукалiс сiя жö тöдса морт кабинаын, кытöн эта вотöдз пукавлiс унаись ни. Ордчöн руль саяс вöлi не кин мöдiк, а тшöтш сiя жö, кöдалö усис лоны сы оланын, сы томся радейтöмын медодззаöн. И нельки туйыс, кöда кузя нiя öнi мунiсö, вöлi тожö сiя жö, важынсянь тöдсаыс — гортсянь городöдз, — кöда тöдсöтiс да йитöтiс нiйö öтамöдкöт и, тыдалö, — не дженыт кад кежö. И дзир öтiк тор — зонкаыслöн шуч туй сьöрна быд вынiсь чöлöмыс, кöда кыдз изын, недолытöдз нырыштiс нывкаыс вылö, этöн жö нырыштöмнас сетiс вежöртны, что ны коласын талун не быдöс бур.

Час кыным бöртi, кöр ас коласын чöлöмыс вайöтiс шонытiнас сунавтöдз, öтöрись пемытыс мыйкö дырна кежö лоис эшö пемытжык. Сiя топ жмитчис-лякасис öтöрсяняс автомашина бердö, но недыр мыйись ачыс жö пондiс бытьтö незьдыны да жмитчыны-лэдзчисьны му бердас. Сэк кежö кольччисö бöрлань Юксьöв да Кöч посад, а паныт пондiсö мыччисьны машина бöрын машина.

Эстöн и сунöтнытö дугдiс. А кыным одзлань, нывка пондiс лолышавны ыш сё частожык да частожык, дзик городас локтöмыс сiйö одзлань ни мыйöнкö полöтiс.

Мыйкö мымда эта и былись вöлi сiдз. Нывка одзлань ни тöдiс, что городас локтöм бöрсянь нылö ковсяс янсöтчыны. Зонка аслас бензовоз вылын мунас одзлань, а сiя кольччас öтнас. А янсöтчынытö талун нывкалö некытшöм охота эз вöв.

Чулалiсö Юрла посад. Эшö посадсис петтöдз, «Чайнöй» весьтын, зонка кежöтыштiс машинасö туй бокас, сувтiс.

— Мыйкö лоис я мый я?

— Нем эз... Сёйыштны колö. Тэнат кынöмыт оз симав?

— Сималö кöть оз... абу ни ылын городöдззас да. Или полан, что сёйнытö сэтчин нем оз адззись?

— Ог тöд. Эн кытчöдз рочав.

— Мый йылiсь нö ме тэныт баита?

— Город шöрас быдлаö машинасö он сувтöт, — шыасис Павел, кыскис зажиганнё бердiсь ключ, петiс руль сайись, кокнита пöдныштiс бöрсяняс кабина ыбöсок, сайöвтчис.

Зонкалöн откажитчöмыс не только обидитiс. Медодз сiя повзьöтiс. Аня öнiсянь ни вежöртiс, что быдöс одзлань кежö думайтöмыс эта увья вермас и не петны.

Эта коста автобус сувтчанiн вылö, кöда бöрын сулалiс бензовоз, сибöтчис да сувтiс городскöй рейсовöй автобус. Видзчисись отирыс вöлi не öддьöн уна, адззисис бы местаыс и сылö. «Не сьöвзьыны я быдöс вылö да вуджны автобусас?» Нывка кутчисис кинас сумка кöв бердö. Вот сiя думанас петö кабинаись да котöрöн сибöтчö автобус дынö. Вот пырö пытшкас, небö билет, казялö нёджжасьтöнняс прос места, пуксьö. Вот и автобусыс вöрзьö местасис, а час сьöрна ыббез да деревняэз пыр мунöм бöртi пырö городö, сибöтчö да сувтö автовокзал дынö. Öтлаын мöдiккезкöт нывка петö салонiсь, киись киö сьöкыт сумкасö вуджöтлытöн, оськалö город кузя гортас. Вот сiя тэрмасьö вывлань лиснич кузя, колана площадка вылын осьтö ас квартираись ыбöс, пырö. И эстöн сiйö кынымöтпырись ни — тысячаись, а то и унажыкись, панталö сэтшöм бытшöма бöрйöм, небöм да сувтöтöм виль, но не ловья, а этасянь кöдзыт да гажтöм обстановка, пантасьны кöдакöт некытшöм охота абу ни, и сьöлöм оз кыскы.

Сувтчанiн вылiсь отирыс пуксисö. Мыйкö дырна кежö автобус эшö кольччис сулавны осьта ыбöсоккезöн, дзик кылiс Анялiсь мöдöмсö да видзчисис сылiсь пуксьöм. Но вот, бытьтö охотатöг, ыбöсоккес жагвыв пöднассисö и автобус, нето-нето, вöрзис местасис, жагвыв пондiс кыссьыны керöс паныт. Аня жö, сумка кöввесö одззамоз киас видзтöн, сiдз и кольччис пукавны бензовоз кабинаын. Осьтны бокись ыбöсок, петны да вуджны автобус вылö не вын, не охота сылöн сiдз и эз адззисьö.

Мöдöрись ыбöсокыс оссис кыдзкö казявтöг. Тшыннялан сигаретаöн шульга киас, зонка перыта оськöвтiс кабина пытшкöдз, сюйыштiс да бергöтiс ас местын зажиганнё ключ, вöрöтыштiс скоросттезлiсь ки увтас рычаг — абу я скорость вылын, — судзöтчис шульга кок нырнас стартер кнопка бердöдз. И кöр кытöнкö капот увтас саймис да эрзыштiс двигатель, зонка включитiс скорость, содтыштiс газ, жагвыв вöрзьöтiс местасис машинасö, веськöтiс туй шöрö.

XIII

Техникумсö кончитöм бöрын тулыс кежас Аня, кыдз зоотехник-специалист, локтiс уджавны гортас, öнi томмезлö нем эз видз пантасьлыны ас коласын быд лун, вöлi бы охота, öтамöд дынö кыссьöмсö отир син шогья некöдыс эзö ни сайöвтö. Пантасьлiсö не только дружитöм-баитöм могись. Ась нывкаыс зонкаыс строитчан уджын отсасьнытö кытчöдз и эз лысьт, зонка отсасис öнiсянь ни.

Тулыснас Павел ачыс вайис да пилитiс нывкаэс ордын пес, ачыс жö поткöтiс, нельки отсалiс тэчны. Сёрöнжык, сы отсöтöн жö, вöлi петкöтöм нывкаэс карчйöрö назём да вежöмöсь öтiк ладорсянь стын бердiсь сiсьмöм столббез. И думайтны кö эта сьöртi, дак немись нем эз позь казявны сэтшöмсö, кöда вермис бы дзугны-разьны ны коласiсь тöдчöм-дружитöм да янсöтны нiйö öтамöдкöт. Пондöтчис эта ны коласын нач мöдiк ладорсянь.

Тулыс кежас фермаэзын эз тырмы колхознöй подалö вердчан. Тшыг кулöмсис мöссэсö пондiсö вердны пöдöм да сiсь öвершаэзöн, кöднö ковсис öктыны мöдпöв зород местаэзiсь. А этатшöм вердчансянь пондiсö чöвтчыны сы вотöдз пиявтöм мöссэз, а куканнес шогмисö кулöмöн.

Лунiсь лун колхознöй начальство дынö ветлöтöмыс немöн эз ни отсав. Эз кö вöв заптöм колана вердчаныс чулалöм гожум шöрнас, тулыснас, шоррес визывттöн, мегырнас унасö он ни ытшкы. Ваялiсö, правда, станциясянь колёснöй тракторрез вылын астраханскöй идзас. Но сiдз кыдз некытшöм запарник не мый мöдiк фермаэзас эз уджав, куш кöс идзассö подаыс тожö эз сёй.

Немымда эз отсав нывкалö нельки райкомын да райисполкомын норасьöм, не висьтавны кö, что эта бöрсянь кулöм куканнес понда винитнытö пондiсö сiйö жö асьсö.

Июньнас, эшö ытшкисян страда вотöдз, Павел чукöртлiс эшö öтiк помеч, кöда коста вöлiсö стружитöмöсь да вöвдöмöсь виль керкуас джодж да потолок, писькöтöмöсь да косячитöмöсь öшын-ыбöссэз, лöсалöмöсь стенаэз. Эта бöрсянь кольччис дзир вартны гор и позис бы петны овны. Аслас мечта дынöдз, кöда дынöдз зонка кыссис сы вынöн не öтiк год сьöрна, кольччисö кынымкö оськöв. Но...

Неделя бöртi чулöтöм помеч бöрсянь районын чулалiс нывка вылын суд. Вежöртана, конешно жö, что дойдны сiйö мыйöнкö усьöм колхознöй куканнес понда и эз позь, а вот олансö да уджсö эта сылiсь тшыкöтiс, и тшыкöтiс не кынымкö лун нето неделя, месяц нето год кежö, а кыдз эм — век кежö.

Сiя жö рытö, кöр Павел, кыдз и пыр, бертiс рейссянь, гаражас нывкаыс сiйö видзчисис ни.

— Но и кыдз? — лöня юалiс зонкаыс, кöр нiя петiсö гаражись отирыс коласiсь да иньдöтчисö подöн деревня ладорö.

— А некыдз. Висьтав вот, мый понда менö вöлi судитнытö? Сы понда, что пöдöм туруннас подасö вердны эг мöд? Дак эд сiйöн вердöмыс усьöмöдз подасö и вайöтiс. Но эд и виновниккескöт нем эз керö, быдöс сiдз, одззамоз и кольччис. Эд судитны кö эта понда, дак колö быдöннысö, колхознöй председательсянь райкомись секретарьöдз, кöдна годiсь год асланыс юралöмöн колхознöй подаыслö оз вермö колана мымда вердчансö заптыны. А кин нiйö судитас, кöр нылöн судыс и законыс талун асланыс? Вот мый увья ме заявленнёсö и сетi.

— Кытшöм заявленнё?

— Расчёт вылö. Кытшöмö эшö этася?

— Да тэ мый, Аня?.. Ачыт жö висьталан, что нем тэкöт судыс эз кер, нем понда судитнытö вöлi.

— Но и мый? Öнi эз кер, дак сёрöнжык керас. Висьтала жö вот, что быдöс важмоз кольччис. А сiдз, дак кин нö меным уджавнытö одзлань сетас? Думайт жö вот ачыт. Эд эта бöрсянь нiя менö ульöн сёясö.

Басниыс коласын Павел да Аня сибöтчисö нывкаэс керку дынöдз, но пырны керкуöдз эз ни пондö, пуксисö посöдзас, вывлань поспу вылö. Эстöн нывка одзлань эшö висьталiс:

— Да, нем понда вöлi ме вылö судас лэдзнытö. Этö правленчиыс не только суд вылас вежöртiсö. Этö нiя и одзжык бытшöма тöдiсö. А кыдз меным эта бöрсянь аслам удж бердö кутчисьнытö? Кöдöрсянь? Мый пондыны кернытö? Сувтны ны ладорö, киннэз судитны мöдiсö?

Но быдöс этна вопроссэз вылö зонкалöн ответыс эз вöв. Сы понда расчёт йылiсь юöрыс вöлi сэтшöм видзчисьтöм, что эта сiйö ладсис нач öштiс. А одзланьын сiйö видзчисьöм эшö этася умöльжык.

— Лэдзасö, думайтан, заявленнёсö гижин да? Тэныт жö техникумыс бöрсянь кык год сьöрна уджавны колö, кытчö ыстiсö.

— Сiдз да... Кин менö оз лэдз. Думайтан, видзны пондасö? Да нiя жö асьныс эталö радся-радöсь лоасö, мездiсясö ме увья дак.

— Но ась. Ась, шуам, лэдзасö. А одзлань мый? Мый бердö кутчисян? Мöссэз я мый я эта бöрсянь чилькöтны пондан?

— Мöссэз чилькöтны, шуан? Смех тай, техникумыс бöрсянь. Этö ме и велöтчытöг бы верми. Не китöм-коктöм кытчöдз, ас син одзат.

— Кытчö нö сэк?..

Чöлöмöн да юрсö увлань мышкыртöмöн пукалiкö Аня вель дыр новйöтiс öтмöдöрö кок увтiсь поспу кузя сюрöм кыськö киас турун тылöпöн, думайтiс. Сёрöнжык нывка гажтöма ловзисис, нёджжöвтыштiс дженытика ёртыс вылö.

— Мунны ме, Павлик, гортiсь мöда.

— Мунны, шуан? Кыдз мунны?

— Да сiдз жö, кыдз быдöнныс мунöны.

— Кытчö?

— Да кöть кытчö.

— Аня? Да тэ мый? Думайт жö, мый тэ баитан.

— Думайта вот, не медодзза лун ни эта йылiсь мырся-думайта.

— А кыдз нö сэк?.. Мый нö сэк меным кернытö?

— Уджавны, овны. Мый эшö этася. Ме вылын жö тэ одзись светыс оз пöднассьы.

— Тэтöг? Ми жö тэкöт баитчим. Кыв жö öтамöдлö сетiм, что велöтчöмыс бöрсянь öтлаасям. Ме жö кык год сьöрна тэнö видзчиси. Ме жö тэ понда строитчи, виль керку строитi. Гор ни эд только, öтiк гор кольччис вартны и позяс петны овны.

— Тöда, Павлик. Но оз пет миян сiдз, дак мый нö керан. Да и мый ме сэтöн?.. Мыйлö тэныт ме кодьсö? Мöдiкöс адззан. Абу эшö сёр.

— Некöр эг и думайт мöдiккесö кошшыны. Зонкалiсь горöтчöм кыввесö нывка бытьтö эз и кыв, аслас пондöтöм басни дынö одзлань эшö висьталiс:

— Тэ сайö да тэ керкуö кöть кытшöм нывка локтас.

— Ме сiйö не кöть кытшöм понда строитi. И меным не кöть кытшöм, а дзир тэ, кытшöм эм, колан...

Этадз споритöмыс ны коласын кыссис сёр рытöдз, но сiдз нем дорöдз и эз вайöт; некöдöрö баитчыны эз вермö. Тшыгöсь, мыдзöсь да гажтöмöсь, тшыкöтöм настроеннёöн сiя рытö нiя и янсöтчисö.

Эта жö басниыс баитсис ны коласын рытiсь-рыт эшö и неделя, и мöдiк сьöрна. Унаись эта коста вовлiсö спориттöдз, видчытöдз, горзытöдз, нельки öтамöд вылö лöгасьтöдз. Сэтöн жö, öтамöднысö öлöм-жалейтöм коста, миритчывлiсö бöр, вились споритiсö да лöгасьлiсö да бöра миритчисö, дзир коланави быдöс эта некöдсö эз вайöт.

XIV

Неделя кык бöртi нывка и былись босьтiс расчёт да зонкаыскöт жö корсис ветлыны городöдз. Вежöртана, что и мöдыс откажитнытö эз лысьт. Павел аслас думаэзын сё эшö надейтчис падтыны нывкалiсь гортiсь мунöмсö.

Кыдз унаись ни вöвлi эта вотöдз, петiсö туйö одз асывнас. Но пукалiсö ордчöн кабинаас шуч туй топ тöдтöмöсь, кöть öтамöд вылö кыдз бытьтö и эз лöгалö. Да и мый эшö кольччис керны этася? Эд сэк кежö ас коласын быдöс йылiсь вöлi баитöм унапöв ни, а эта басниыс некытшöм гаж да долыт некöдыслö эз вайöт. Öнi нiйö кыкнаннысö этасянь дзир кезöтiс.

Городас нывка юöртiс, кытöн пондас видзчисьны зонкасö кык лун бöртi. Эта вылын и янсöтчисö. И ась одзланься пантасьöмыс нем бурсö да гажöтанасö зонкалö и эз кöсйы — не сувтчыны да не вайöтны нывкасö гортö бöр сiя и öнi эшö эз вермы. И кöр маршрутнöй городскöй автобус вылын Аня локтiс город сайись автозаправка дынö, сэк кежö мöдыслöн бензовозыс сiйö сэтöн видзчисис ни

Öтамöдтöг кык лун сьöрна гажтöмтчöм бöрсянь пантасисö да здоровайтчисö кыдз и пыр, дзик немись-нем умöльыс да неколанаыс некöр ны коласын эз и вöвлы. Но одзланься басниыс некöдсö эз гажöт. Нывкаыс ветлöмлiсь могсö зонка тöдiс одзлань ни и, вежöртана, что видзчисьны, кöр да мый юöртас сiя ачыс, Павел эз вермы. Местасиныс вöрзьöм бöрсянь жö сiя и юалiс:

— Но висьтась, мый городсис адззин? Батi, виль жöникöс панталiн?

— Жöниккес йылiсь эг думайт. Некöр вöлi, — обидитчытöг шыасис паныт нывкаыс. — Кежалi кык хозяйствоö. Местаэз эмöсь, примитöны, но...

— Кытшöм нö сэки эшö «но»? Мыйöн оз гленитчы?

— Пола, что и сэтчин мекöт сiя жö лоас.

Этна бöбöтчытöг висьталöм кыввез бöрсянь зонка недырик кежö дзик ловзьыштiс.

— Вот эд вежöртан жö, Аня, сымдасö, что быдлаын öтiк. Дак не буржык я не кошшыны сiйö абутöмсö, кöда тэныт колö, а уджавны гортын, кыдз уджалiн. Некин да некытöн эд этö коланасö миянлö эз лöсьöт да оз и лöсьöт, кытчöдз ми сiйö асьным аслыным ог лöсьöтö. А уджавнытö кытöнкö сё ни колö.

— Сiдз, натьтö. Колö. Сымда-мымдасö эстiсь ме тожö вежöрта. Но сiдз, кыдз колö меным, уджавнытö гортын сё ни оз сетö. А миритчыны сэтшöмыскöт ме ог вермы. И висьталi кö, что гортын сэсся ог кольччы, сiдзкö, ог. Эн и думайт, эн и баит. Мунам öтлаын. Тэныт эд быдлаын уджыс адззисяс.

— Адззисяс, да отирыс серавны пондасö. Сы понда разь ме кык год сьöрна гортын поздiси, мед быдöс вылö öвтыштны киöн да кольны? Да и аймамöс öтнаснысö он коль. Вöрзьöтны нiйö гортiсь, тожö он вöрзьöт. Дзебсьыны йöз муын нiя оз согласитчö.

Эта вежöртана басни бöрсянь, кöдö нiя баитлiсö унапöв и эта вотöдз, баитны одзлань ны коласын вились лоис нем. Быдыс янсöтчис аслас думаэзöн ас кежас. Сiдз нiя и чулöтiсö кольччöм туй.

Погоддяыс сiя луннэзö сулалiс кöс. Туйыс вöлi бытшöм. И ась тэрмасьнытö кыдз бытьтö некытчö и эз ковсьы, то ли öтамöд коласын гажтöм чöлöмсянь, то ли эшö мыйсянь зонка пондiс тэрмасьны. И кыным матöжык нiя сибöтчисö горт дынö, сыным Павел вашöтiс сё перытжыка, что нельки туй вылiсь бытшöма тыдалан ныроккез вылö öддьöнсö эз ни видзöт. Этасянь кынымкö местаын тыра бензовозсö зэркнитiс сыбурна, что нывка эз вермы видзсьыны аслас местаын, зубыта люкасьлiс юрнас кабина вевтöс бердö.

— Поткöтан эд юрöс.

Öтпыр, мöдöтпыр сiя дженытика нёджжöвтыштiс зонкаыс ладорö. Но эта коста мöдыс сы пыдына вöлi мунöм аслас думаэзö, что Анялiсь шыасьöмсö эз ни кыв и нельки дзар сылань эз кер.

Горт деревня кузя мунтöн, нывкаэс керку весьтö машинасö Павел мылякö эз сувтöт. Эз кежöт сiя и гаражö. Деревнясö шучкöп чулалöм бöрсянь бензовоз чепöссис ыббез вылöдз кыссян тракт кузя, но ылö тожö эз мун, а чожа мый кежис веськытлань, öтмöдöрсянь йöртöм улицаö, кöда кузя вашöтлiсö Лолог ю дорö деревенскöй пода. Километр кык бöртi эта улицаыс петкöтлiс крутся-крут берег дорö. Туйыс лэдзчöтiс кырывлань и нельки неволькыт подаыс коккезöн пичиктöм-тальöмсянь машиналiсь чожсö сiя эз жагсьöт.

— Мый тэкöт, Павлик?! Кытчö тэ сэтчин? Колин ни эд гаражсö! — паймыштöмкодь вежöрттöмыссянь горöтыштiс нывкаыс. А кöр казялiс зонкалiсь чышьян кодь чочком, бель вачкöм чужöмсö да кытшöмкö ылöстöм биöн öгралан синнэсö, сэтöн вöлись кöдзалiс быдсöн: и вывтырнас, и сьöлöмнас. Кöдзыт жö да недолытöдз нильыг-сук ньылöмсянь, кöда дзик öтпырись койыштöмöн везъясис омöн вывтыр пасьта, юрсянь и кок чуннез бердöдз, вöрöтчöмсö дзикталöмöн, пондiс лякасьны паськöм. Аня сорасьтöг вежöртiс, мый нiйö видзчисьö эта берег увтын, не сувтöтны кö аскадö машинасö, то ли не ештыны кö петны эта вотöдз сы кабинаись.

— Сулав, Павлик! Тэ мый сымдасö?!.. Меным жö чеччыны колö! — повзьöмувьяс чирзiс-горзiс Аня, мымда горш, öтпыр, мöдöтпыр сiя вынöнкодь вачкис зонкалö ки кузя.

— Некытчö тэ сэсся он чеччы, — кöдзыта, кыдз приговор, висьталiс мöдыс сы горöтлöм-корöм вылö. Ачыс сiя нывкаыс ладорö öнi и дзар эз ни кер, мымда вын, нырыштiс газ педаль вылö, быд вынiсь жö видзис киэзнас ныроккез весьтын машинасö зэгöтöм-пиньлалöмсянь дугдывтöг треситчан руль, кваркышавтöг дзиргис-видзöтiс одзас. Аслас тувдöтчöмсянь да чочкоммытöдз бледöтöмсянь ас вылас зонка öнi кодьöн эз ни вачкись. Полöтанаöдз лöг нёштöмсялöм, а этасянь бытьтö пöрисьмöм чужöма, öнi сiя вачкисис чожажык кытшöмкö пышшалiсь вылö, кöда сьöрö вöтчисö, мед кутны, и кöдалö, мый бы сэтчин эз вöв, колiс вермыны пышшыны, сайöвтчыны, дзебсисьны этна вöтчиссез шогья. Быдöсiсь этаись Аня вежöртiс и сiйö, что некытшöм чирзöм-горзöм да корöм-кеймисьöм эстöн öнi озö ни отсалö.

Дзик пöртмасис син одзын, медбöрьяись тыдыштiс кабина сайын да кольччис бöрлань ытшкытöм эшö быд рöма цветтэзöн киськалöм видз. Сы коста жö одзланьын бытьтö пемдыштiс. Этö туйыс уськöтчис непаськыт яг коласö, кысянь ю берег дорöдз сотня оськöвся унажык эз ни кольччы. Син одзын öтмöдöрсянь пондiс вериктыны пуэзлöн бöрлань чепсасьöм, а веськыта машина одзын тыдыштiс ни ю весьтын вылына öшалан берег дор, кöда увтын нем эз тыдав.

Колiс бы уськöтчыны руль бердö, мед кыдзкö вермыны кежöтны автомашинасö туй вывсис да кöть сiйöн ни сорны, не сетны сылö сибöтчыны ю берег дорöдз. Но руль бердас зонкаыс вöлi дзик лякасьöм и ас вын вылö нывка эз надейтчы. Сiя кутчисис вуг бердö, татшкис вывтырнас ыбöсок, но эшö кабинасис юркниттöдз зонка ештiс кватитны сiйö кипöлöт. Пессьöмныс коста машинасö ёнакодь зэркнитiс кытшöмкö нырок весьтын, кöдасянь нетшкöвтчис зонка киись руль. Туй бокö чепöссьöм бензовоз öдззис каждыны-тальны да нильны колесоэс увтын томыник пожум вöр. Даскыным метр ылына этадз мунöм коста сiя öштiс одззася чож, но веськöтны бöр туй вылас зонка сiдз и эз ешты. Машина данасис буфернас кыз пожум бердö, пöрöтны да тальны кöдö вын сылöн эз ни судз. Лöньсис двигательлöн быд горшись гугйöтлöм-визжитöм да колесоэз увтын том пожумник вöрлöн ризьöтöм-кажöтöм. Лоис лöнь, сэтшöм лöнь, что позис нельки кывны, кыдз ружтышалöмöн веськöтчö бöр машина колесоэзöн му бердö нырыштöм турун. Эта сувтöм лöнь увья Аня нельки эз тöд, мый керны одзлань, то ли горзыны, то ли серавны. Рожабаннэс пасьта визывтан синваэсö чышкытöг сiя нёджжöвтыштiс кабина сайö. Машинаыс дынсянь Лолог ю берег дорöдззас вит-квать оськöвся унажык эз ни вöв. Спина пасьта кöдзытыс паськалöмсянь нывка ёжгыльтчис быдсöн вывтырнас, жмитчыштiс кабина пельöсас.

XV

Зонка зэркыта осьтiс ас ладорсянь кабина ыбöсок, чöлöмöн оськöвтiс подножка вывсянь.

— Тэ кытчö, Павлик?!

Паныт шыасьöм местö кылiс, кыдз негорöн муркнитiс-чегис сы кок увтö сюрöм кöс ув. Оськöв кыным бöртi зонка саясис син одзись томыник пожум вöр коласын.

Оськöвтны сы сьöрö перво жö нывка то ли эз казяв, то ли эз лысьт. Сiя вöрöтчытöг кольччис пукавны аслас местаын, мый керны одзлань, эз тöд. Öнi, кöр медполöтанаыс сё жö эз шогмы, вöлi ордйöм, кыкнанныс кольччисö ловйöн, но зонкаыс шыасьтöг колис сiйö öтнассö, позис бы, натьтö, петны кабина пытшкись да иньдöтчыны гортö. Но быдöс лоöмыслiсь причинасö нывка вежöртiс бытшöма и некытшöм лöг эта понда зонкаыс вылö эз вöв. А кöр сiя эз берт бöр не вит, не дас, не дасвит минута бöртi, нывка повзис сы понда ни.

— Павлик, кытöн тэ? — юалiс Аня не öддьöн горöн. Но зонкаыс паныт эз шыась. «А вдруг сiя öтнас мыйкö аскöттяс?.. Мый нö ме, бöбöв, эстöн пукала?» Эта думаыс, кыдз зубыта вачкöм, перыта нетшкöвтiс сiйö местасис. Нывка чепöссис кабинаись, котöрöн уськöтчис берег ладорö. Матын берег дорас Аня сувтiс, видзöтöв-керис юр бергöтчан вылынсянь увлань. Крута усян берег увтын, кытчöдз судзис син, некин ловьяыс эз тыдав.

— Павлик! Павлик, мыся! Мый нö тэ паныт он шыась?! — нач ни повзьöм голосöн да вились сöдзöм синваэз пыр горöтлiс Аня, пондiс котрасьны, медперво берег пöлöн, а бöртiжык сё пыдынжыка вöр коласöт.

Дыр мыйись, люзь пымалöм аслас котрасьöмсянь да вынöн тогзян сьöлöма повзьöмсяняс, зонкасö нывка сё жö адззис. Мышкыртöм юрöн Павел пукалiс ыджыт да öткаса пожум увтын, неадззан синнэзöн видзöтiс кытчöкö одзас, думайтiс.

— Мый нö, май, укса-укса, а тэ шы паныт он сет? — Нывка повтöг сибöтчис зэв, пуксис ордчöн, кокнитика пуктыштiс кисö сы пельпон вылö.

— Павлик! Павлик, мыся! Мый тэкöт лоис сэтшöмыс? Кыдз тэныт сымдаыс юрат пырис? Öтлаын, батi, эшö кöркö лоам. Ловьяöсь жö ми. Ловйöн кольччим. А не пондывны бы меным уськöтчыны кабина пытшксис, дак öнi бы эгö ни эд вöлö. Думайтны эд только, мый вермис шогмыны. — Аня зэгöтöв-керис зонкасö пельпонöттяс. — Тэ менö кылан или он? Видзöтышт жö, ноко, талань.

Öнi вöлись Павел лэбтыштiс вывлань юрсö. Зонка пельпон вылын нывкалöн небыта куйлан киыс да öтамöдлö синнэзö вель дыр видзöтöмыс, виль вынöн саймöтiсö ныын сiйö радейтöмсö, кöда вöлi зорöтöм ны коласын лунiсь лун кык год сьöрна.

— Аня! Аннушка! Сьöлöмгаж менам! Счастье менам! Мечта менам! Некытчö тэ он мун. Некытчö, некытчö, некытчö. Ог лэдз, ог и ог. Тэ кольччан гортын, мекöт, öтлаын... талунсянь и пыр кежö. — Первуись повтöг нывкаыс обидитчöмись да лöгасьöмись зонка сывьялöмöн пöрöтiс сiйö пожум увтас, пондiс окавны, кыдз эшö и öтпырись эта вотöдз эз окавлы — тшöкасö, öмсö, нырсö, синнэсö. Первуись и нывкаыс этаись эз пыксьы, паныт керис сiйö жö, сэтчöдз, кытчöдз зонкалöн öтiк киыс эз сибав сы куш пидзöс бердöдз.

— Сiйö оз ков, Павлик.

— Колö, Аня. Одзжык эз, а талун колö. Дзир сiя миянöс и öтлаöтас, талунсянь и пыр кежö.

— Эн, Павлик. Оз. Весь тэ быдöс этö. Лэдз, ноко, да мунам эстiсь. Лэдз, то кинкö эшö адззылас. Тыр жö öнi отирыс вöрас ветлöтö.

Нывка пондылiс мездiсьны, мед сувтны коккес вылö. Но öт киыс сылöн эшö эта вотöдз вöлi сюрöтöм зонкаыс увтö, мöдсö сiя öнi ни, нывкаыс юр увтöт вывлань пиньöвтöмöн, кутiс ас киас. Панласьны-дорйисьны нывкалö кольччис нач немöн, ковсис дзир корны-кеймисьны.

— Павлик, эн. Оз ков. Ме жö эшö некöр... ачыт тöдан. Лун жö видзöт öнi. Быдöс жö тыдалö. Адззылас эшö кинкö дак... Мый сэк думайтан? Лэдз, кывзы, оз ков, а то горöтлыны понда.

Но кыным öддьöнжык нывка корис-кеймисис, сыным мöдыслö этасянь öддьöнжык шедiс öд, мыйсянь и вачкисис, что кывзыны сылiсь корöм-кеймисьöмсö öнi сiя оз ни думайт.

— Кöть мымда горöтлы, абу жаль.

Косви кушöтöм нывкалiсь прос кинас зонка косялiс да лэдзис увтiсь мешайтчан паськöм. Эта бöрсянь нывка вежöртiс, что корöм-кеймисьöмыс да чирзöм-горзöмыс öнi эстöн озö ни отсалö, джынысви керöм удж вылын зонкасö он сувтöт. Корны эта коста отсöтсö кысянькö боксянь стыд-позорыс увья тожö он понды. «Не буржык я сетчыны? Сё ни сыкöт пессьöм вылö вын менам оз судз», — думайтыштiс нывка кытшöмкö кадö. И шогмы этадз ны коласын ылынжык горт да тöдса отир дынсянь да эшö рытся пемытö, мырсьыны-панласьны сыбурна сiя, натьтö, и эз бы понды. Но дзир сiйöн, что зонка пондöтiс этö сы соглассётöг, вынöн да лунся югыт коста, нывкалöн сьöлöмыс эз лэбты. Вöлi этася эшö öтiк причина, не лыддисьны кöдакöт тожö некыдз эз позь. «Лэдзны кö öнiсянь, сiдз и тöд, эта бöрсянь гортiсь мунсяс. Сэк ковсяс петны сы сайö гортын да сэтчö жö и кольччыны век кежö». А согласитчыны этакöт Аня эз вермы, нельки эз и думайт. И ась киэзтöг, öтiк кокнас да вывтырнас (мöд кокыс нывкалöн сэк кежö тожö вöлi нырыштöм ни) сiя, кыдз вермис, мырсис-панласис одзлань.

Сы коста жö, увтас сiйö видзтöн, зонка лэдзис и ассис вешьян. А кöр пелитiс коккесö нывкаыс коккез коласö да бытшöма личкис сiйö ас вывтырöн му бердас, эшö колана местаö сибöтчöм вотöдз, нывка недырик кежö лöньсьыштiс, корöмöн горöтчис:

— Ладно, Павлик, киэзöс кöть лэдз. Умöль жö, кывзы меным сiдз куйлынытö. Мый, издевайтчан я мый я?

― Он понды сэсся пессьыны?

— Ог. Кытчö ни сэтöн...

Эталö зонка мыдзöмувьяс и былись веритiс. Эта басни бöрсянь сiя нельки гажмыштiс.

— Важын ни бы сiдз.

Но колiс дзир сылö ештыны простайтны нывкалiсь киэсö, кыдз мöдыс сэтöн жö кокнита, ась и недырик кежö, боквывтiс сiйö ас вывсис. И ась нывка эта дженытик кадö чепöссьыны коккес вылö и эз ешты, — зонка сэтöн жö кутiс да личкис сiйö бöр, — сiя ештiс сайöвтны киэзнас да коккес коласöт нiйö öтамöдкöт чуннес сорöн замокалöмöн, пöднавны öтмöдöрсянь, зонкаыс увья колана сылö местасö. И кыдз да мый бы эта бöрсянь зонка эз пондыв, керны нывкаыскöт сэсся нем эз ни вермы.

— Вий лучше. Верман вийны. Пондылiн ни талун öтпырись, да ачым сори. Сэк менам киэз просöсь вöлiсö. А öнi тыраöсь, панласьны меным немöн. Но эг кö перво жö лэдз, дак быдöс бöрсянь, мый тэ мекöт эстöн керин, öнi сё ни ог лэдз, — висьталiс медбöрын нывкаыс да кынымöтпырись ни этöн каднас вились пондiс горзыны. Мöдыс жö, руз мыдзöм эта пессьöм коста да лöг, кыдз зверь, дзик эз и кыв нетшкöм-вольöм паськöма да косви кушöтöм нывкалiсь горзöм-кеймисьöмсö, сё быглялiс да бергöтлiс сiйö бок вылiсь бок вылö да быднёж пиньлалiс-монлалiс сылiсь киэсö.

То ли эта негора басни да нывкаыс сыркьялöм-горзöм вылö, то ли öтамöд коласын пессьöм-мырсьöм шум вылö, кытöнкö нач ордчöн пуэс колассянь кынымиськö негорöн лявгыштiс-вувтыштiс кычановöй пон. Кыкнанныс понда эта вöлi сэтшöм видзчисьтöм, сэтчöдз повзьöтiс да öштiс ладсис, что нывка казявтöг мынöтiс коккес коласiсь подзалöм чуня, рудзавтöдз мыдзöм да зонкаыс быднёж пиньласьöмсянь зубытся-зубыт киэсö, и сiдз кыдз эта коста зонка сiйö эз ни видз, öткоста чепöссис коккес вылö.

— Стыдтöм! Совестьтöм! — сё эшö лöгвевйöн горöтчис сiя зонкаыслö, сы вылö дзар кертöг котöрöн уськöтчис туй ладорö. Котöртiкас ни нывка ас кежас думайтiс: «Сiдз и тöд, быдöс кинкö адззылiс. Тьфу! Вот тай вöлись кытöн стыд-позорыс. Öнi отирыс син одзö кöть эн и мыччись. Ашынсянь жö омöн деревня пасьта паськöтасö».

Кыдз нывка оськалiс подöн кык километр ылына деревня бердöдз, сымдасö нельки эз и казяв. А гортас локтöм бöрсянь сэтöн жö пондiс мыччасьны мамыслö, öткоста баитiс:

— Видзöт вот, мый любимöй зятёкыт тэнат талун мекöт керис. Вот, вот. Нывка бергöтлiс мамыс одзын ки и кок, кöдна вылын уналаын тыдалiсö печенича кодь лöзöтöм местаэз.

— Но-но-но. Эта эшö мый сэтшöмыс? Вартлiс я мый я мыйкö понда сыöддьöн?

— Вартлiс кö бы, дак буржык ни... Насильничайтны тай кутчылiс, оз бы лэдз гортiсь муннытö да.

— А ме чайтi гортас ни пыртны пондылiс. Сiдз дак, эд сiйö судитны колö эта понда. Судö колö лэдзны, справка босьтны да.

— Кин нö меным судас веритас, кöр нем эз вермы керны да свидетеллес абу.

— Весь, батi, эн да... öнджа, гöтрасис бы, батi...

— Мый нö тэныт не да, весь, натьтö, — керыштiс нывка мамсö. — Сiя эд сiйöн и пондылiс, мед эта бöрсянь меным воштiсьнытö некытчö лоис да гортас пыртны. Вермис кö бы, дак кытчö меным эта бöрсянь кольччис бы воштiсьнытö?

— Да ладно я öшö ачыт керан, силком гортiсь мунан да? Кöр эшö воныт гортö локтас. Быдса год эшö сылö кольччис служитнытö да. Мый нö ме эстöн öтнам...

— Ме эд тэныт сё не век гортын олiсь, — панöвтiс нывка мамыслiсь забедуйтöмсö. — Талун ог мун, дак ашын муна.

Эта вылын быдöс йылiсь ны коласын и баитсис.

Сiя жö рытö Аня тэчис туйö чемодан, а одз асыв ашынас гортсис мунiс.

XVI

Лолог ю дорас ны коласын мырсьöм-пессьöм йылiсь юöрыс чожа мый паськалiс омöн деревня пасьта. И паськöтiс этö юöрсö не сiя кычан-поныс, кöда инмылiс сэк ны вылö öткаса пожум увтас да повзьöмувьяс кынымиськö лявгыштöм бöрсянь сэтöн жö вотялiс-пышшис бöр. Паськöтiс этö юöрсö ачыс Анялöн мамыс, Майбыр Парась, сiдз кыдз нылыс мунöмлiсь причинасö сiя медодз сыын и адззис.

Вöлi этася эшö и мöдiк — отирыс коласын болк баитöмнас кыдз позьö бытшöмжыка нятьöсьтны зонкасö да этöн-сорöн тшöктыны мунны гортсис, вöтчöтны нывкаыс сьöрö. Ась эта йылiсь мама-ныла коласын сэтшöм баитчöмыс и эз вöв, но этö нiя ас коласын и баитчытöг вежöртiсö бытшöма.

Вежöртана эта бöрсянь, что быдöс стыд-позорыс öнi усис зонкаыс вылö, дзир öтнасыс вылö. Но дойдiс Павелöс нач не сiя (тöдiс — мый вылö мунiс), а ачыс нывкаыскöт янсöтчöмыс. Аняыс мунöм бöрсянь сылöн вöвлытöмöдз гажтöмсялiс деревня вылын олан. Быдса месяц сьöрна зонка и чочком светсö син одзсис кодьöн эз адззыв, öшис охота керны одззамоз гортся удж, кöда строиттöм керку гöгöр сё эшö вöлi тырмöмви. Лунiсь лун зонка сымда и тöдiс, что ветлiс рейсö. А гортö бертöм бöрсянь нем бердö öнi эз ни кыскы. Сiйöн Павел то ли пукалiс чöлöмöн телевизор одзын, то ли сiдз жö чöлöмöн куйлiс ольпасьын осьта синнэзöн — думайтiс. Но мунны, вöтчыны нывкаыс сьöрö не дума, не охота сылöн эз вöлö. И месяц сьöрна рейсö лунiсь лун ветлöтöм коста, сiйö кошшöм-панталöм могись городас сiя нельки öтпырись эз кежав.

Месяц бöртi, айыс тшöктöм увтын, виль керкуас горыс вöлi сё жö вартöм. Бöртiжык и стенаэс вöлiсö стружитöмöсь, и заборрес öктöмöсь, и джоджыс вильсяняс жö краситöм. Но быдöс этö зонка керис öдтöг да охотатöг, мед только вийны кад. Этасянь, вежöртана, что уналаöт керсис не сэтшöм бытшöма, не сiдз, кыдз бы колiс да позис. Петны жö овны виль керкуас Павел кыдз бытьтö эз и думайт. Да и кинкöт вöлi петнытö? Эстöн кöть думайт, кöть эн — прокыс сыись сё сымда. Сiйö нельки вичку кодь югыт, прос, гора да гажа, кыдз пытшксянь, сiдз и öтöрсянь, ас киöн да ас понда строитöм виль керкуыс немымда эз и гажöт. Гажыс местö, кöдö зонка видзчисис сiйö строитöмсянь, öнi сiя бергöтчис сы понда ыджыт да сьöкыт шогöн. Но, кыдз баитсьö: «Нет худа без добра». Бур кöть сiя ни, что эта шогыс маитiс зонкасö не öддьöн дыр, и тшыкöтны этöн каднас кöдкö ладорсянь эз ешты.

XVII

Сёр арöн, ыркыт да зэра погоддя коста, вились костöмсялiс зонкалöн айыс. Саймис Василий Абрамовичлöн важ радикулит, кöда маитлiс сiйö быд год. Районнöй больницаын, кытчö нуöтлiс сiйö зоныс, том врачиха гижöтiс уколлэз. Но сiдз кыдз рыт и асыв ветлöтны фельдшерскöй пунктöдз Василий Абрамович эз вермы, уколлэсö керисö гортын. Эта увья ны ордö рыт и асыв пондiс пыравлыны Аняыс кодь жö томыник, лён кодь чочком юрсиа акушерка Полина, кöда неважын локтiс уджавны ны деревняö училище кончитöм бöрсянь.

Медодзза рытас нывка локтiс сёрöн ни, пемдандорас. А кытчöдз ушкис-шонтiс арся тöв вылын кынмöм киэсö да керис уколлэз, öтöрас и нач пемдiс.

Павел, кöда эта коста пукалiс телевизор сайын, нывкаыс ладорö бытшöмжыка öтпырись и дзар эз кер. А кöр сiя пондiс лöсьöтчыны мунны бöр, зонкалöн мамыс вайис сылö кастрюляöн ырöш, горöтчис:

— Ю жö, нылö, кут да. Горшыт, поди, косьмö тöв вывсяняс. Кытчö тэ сiдз рыт и асыв тэрмасян?

— Пемыт ни öтöрас да, — шыасис нывкаыс, кастрюлясö примиттöн. — Ме поннэзiсь пола. А нiя тiян тыр деревня вылас. Он и казяв пемытiнас, кöдöрсянь кок увтö чепöссясö. — Кынымиськö чипыштöм бöртi нывка бергöтiс кастрюлясö бöр, висьталiс спасибо да иньдöтчис аслас сумкаöн петанiнлань. Эстöн вöлись Василий Абрамович аслас ольпассянь горöтчис:

— Мöдöт жö, Паша, нывкасö кöть тракт дорöдззас. Нем жö он кер, пукалан. Некытчö сiйöн каднас тэнат телевизорыт оз пышшы. Кыдз сiя öтнас сы ылынасö пемытiнас мунас.

Зонка шыасьтöг чеччис, кышыштiс вылас куртка, сюйис коккезас резиновöй сапоггез, петiс.

Эта вотöдз нiя вöлiсö тöдсаöсь ни, кыдз шуöны, öтамöднысö тöдiсö. Тöдсасьны мöдпöв эз ковсьы. Погоддя, деревенскöй нять да пурсись поннэз йылiсь басни коласын локтiсö тракт дорöдз. Эстöн нывкаыс горöтчис:

— Спасибо, Павел, кольлалöмыс понда. Эстöн ме öтнам ни муна. Ылын лоас тэныт бöр бертнытö.

Нывкаыс олiс деревнялöн мöдöр дорас, öткаса старуха ордын.

— Сэтчинсянь тэ менö мöдöтан.

— Миян баитöны кольлалан, а не мöдöтан. Мöдöтны, мöдöтчыны миян нёдж лоö нач мöдiк. Мöдöтчыны, шуам, пасьтасьны бытшöмжык паськöмö кытшöмкö праздник кежö.

— А мыля праздник кежö?

— А кыдз эшö этася?

— Татöн миян сiдз тожö баитöны, томжык отирыс. А пöрисьжыккес праздникыс местö частожык шуöны вежалун кежö, комиöн, а мöдöтчыны местö баитöны — вочöтчыны.

— Интересно. Не сюрны кö бы татчö уджавнытö, дак некöр бы эг и тöд сымдасö. Отирыс öтiк, а басниыс не. Ме уна öтi-мöдi татiсь ог вежöрт. А овны год кыным, дак кык кыв понда тöдны.

— А мыля дзир год кыным? Оз гленитчы татöн?

— Гажтöмкодь тай мыйкö, некытчö петнытö да.

— А жöник кö татiсь пантасяс? Или эм ни кинкö?

— Тöдса зонкаэс гортын эмöсь, а жöникыс... — нывка жмитыштiс пельпоннэзнас.

Кыдз перво жö зонка баитiс, сiдз сёрöнжык и шогмис. Медперво сiя мöдöтiс нывкасö горт дынöдззас, сэсся нывкаыс кольлалiс сiйö бöр, а сэсся сiдз жö паныт эшö да эшö. Кöдзыт ойтöвсö, кöда дугдывтöг пöльтiс то одзсяняныс, то бöрсянь, некöдыс ны коласiсь топ эз и кылö.

Янсöтчисö сёрöн ни, кыдз важся тöдсаэз, но баитчытöг да кöсйисьтöг тöдiсö одзлань ни, что öтамöд коласын пантасьöмыс не бöрья.

Ашынас, сiя жö рытся кадö, кöр Полина вились ёркöтчис да пырис ны ордö, сылiсь локтöмсö зонка видзчисис ни. Сiя медодз шыасис паныт нывкаыс здоровайтчöм вылö, тшöктытöг чеччис да оськöвтiс паныт, примитiс ас киас сылiсь сумкасö, недырик кежö, бытьтö казявтöг, кутыштiс сылiсь киэсö — öддьöн я кынмисö кöдзыт öтöрас — а сэсся ачыс жö отсалiс сылö чöвтчыны, ас киöн öшöтiс тув вылö сылiсь кокнитик пальто.

Уколлэсö керöм бöрсянь нывка недырик кежö пуксьыштлiс телевизор одзö: гортын, квартирнöй хозяйкаыс ордын эта дивоыс кытчöдз эз на вöв, видзöтнытö вöлi нем. А кöр сiя чеччис да пондiс лöсьöтчыны мунны бöр, видзчисьны аймамыслiсь тшöктöмсö, мед кольлавны нывкасö, зонка талун эз ни понды. Сiя пасьтасис öткоста да öтiк ыбöсын петiсö. А сэсся сiдз жö рыт бöрсянь рыт, чулалiс эшö неделя кык.

— Мунас оз сiя гортас вежалун кежас? — юалiс кыдзкö этна жö луннэзö зонкалiсь мамыс. Кин йылiсь пондöтöм басниыс, вöлi вежöртана висьтавтöг.

— Кысь нö ме тöда, эг юав да?

— А тэ юав. Кылыт сы дорын оз усь. — И одзлань эшö: — Мыйöн вот то не инь, видзöт дак? И басниа, и абу йöйкодь кытшöмкö, кыдз Парасьыслöн учкись-нылыс, кöда оз и тöд, кытчö асьсö воштыны. Эта и уджсö ассис, видзöта ме дак, тöдö и отирыс коласын оз лэбтiсь. Ачым тöда — не гортiсьöвöй. Да кысь нö сiйö, абутöмсö, ваян? Гортiсьöвöй вот мöдыс вöлi, да не то штö жöниксö, мамсö ассис чунь öтнассö керку шöрас колис. Думайтö, натьтö, буржыкö кинöскö кыськö адззас. А вот адззылат ужо, некинöс сiя ас киння буржыксö оз адззы, эстöн ме и сулала. Ме тэныт, зонö, öшö сэк баитi — умöль, мыся, эта приметаыс, кöр сiя шуткасис эстiсь чывкнитiс да пышшис. Сiдз, адззан, сiя и эм. Бур — гортöдз вайöтнытö эн ешты, стыд-позорыс етшажык. Сё ни бы кодя морт моз эз ов, кöть бы и вайöтiн дак. А эта, Полинарьясö ме шуа, некытчö оз пышшы. Гортас, висьтасьö, соя-вонаыс эшö вит-квать кольччöмöсь. Ог тöд... но меным даки öддьöн нывкаыс гленитчö.

— Да прока, тыдалö. Деревенскöй жö эд, натьтö. Оз тай öддьöн чеглась и ас кыв вылын баитö, — содтiс ассяняс Василий Абрамович.

— Дак тi мый, менö гöтрасьны я мый я тшöктат?

— Вайöтны, ме думайта дак, колö. Эмöсь ни годдэт. Не видзчисьны жö, кöр тошсявны пондан. Кин сэк тэ сайö мунас? Колö, натьтö, зонö. Бытшöм, висьтала, нывкаыс. Тэ он, дак мöдiккез сэтшöмыс вылö адззисясö. Тырмöны тэ кодь гöтыртöммес деревня вылас. Кежöтас кинкö рытöн ас ордас, сымда и адззылан.

Мамыс басни бöрсянь зонкалöн пондiс петны серöм. Сiдз, сералöм могись, сiя нарошно и юалiс:

— Да мунас я эшö сiя ме сайö, öддьöн гленитчисьыс?

— Не быдöнныс жö эд, натьтö, öткодь йöймöмöсь, — вились Аня йылiсь казьмöтöмöн, шыасис эта вылö мамыс.

Не уна эшö чулалiс кад Аняыс мунöм бöрсянь. И, вежöртана, конешно жö, кыдз да мый бы эз шогмы ны коласын, янсöтчыны перыта быдöскöт одззаыскöт зонкалö эз вöв кокнит, öткоста Павел вежöртiс и сiйö, что надейтчыны Аня вылö одзлань сэсся тожö эз позь. Эд мунiс кö нывка гортiсь силком, дак бöр сё ни оз берт. А вöтлiсьны сы сьöрын зонкалöн некытшöм охота эз вöв.

XVIII

Октябрьскöй праздник вотöдз кадыс кольччис неделя мымда. Сiйöн кыскыны нывкакöт баитöмсö зонка дыр эз понды. Лун кыным бöртi, рытöн пантасьöм коста, быд берсяыс коласын сiя юöртiс:

— Гöститны тэнö, Полина Михайловна, праздник кежас корöны.

— Но эд висьталiсö жö тэныт, Павел, мед менö айнимнас эн шу, — не лöгвевйöн да обидитчöмöн, а чожажык корöмöн-кеймисьöмöн, панöвтiс нывка зонкалiсь баснисö.

— А меным сiдз öддьöнжык гленитчö, — дорйисис мöдыс. — Одзжык, висьтасьöны, деревенскöй интеллигенциясö пöрись отирыс пыр только сiдз и шувлöмöсь.

— Дак этö одзжык. А öнi? Öнi одзжыксясö только, кыдз сказка, касьтывлыны кольччис. И ми тэкöт не кöркöся отир, а öннясяöсь. Кытшöм эшö ме тэныт Полина Михайловна, тэсся томжыкыс? Эта жö смех! Меным нельки ас одзын недолыт сэтшöмсяняс лоö. А гöститнытö, забыль, кин корö? Эн тай мыйкö висьтав. Не тэ я ачыт? Абу эд менам татöн уна сэтшöм тöдсаэс.

— Стариккес тай менам висьтавны тшöктiсö, что видзчисьны пондасö.

— А тэ ачыт он? — кыдз тырппес вылын, сiдз и синнэзас тöдчана шынньöв сорöн нывка видзöтöв-керис зонкаыс вылö.

— И ме тожö.

Вежсьыштöм чужöмöн ас кежас думайтыштöм бöрсянь, кыдзкö лöня, дзик полöмöн, Полина одзлань юалiс:

— А эта... менам локтöмыс инö, тэныт оз мешайт? Зонка перво эз вежöрт, мый йылiсь вöлi казьмöтöм нывкаыс басниын.

— Кыдз сiя вермас мешайтны? Мыля?

— Но кыдз?.. Локтас кö, шуам, Аняыс праздник кежас гортö?..

— Ах, вот тэ мый йылiсь? — дивуйтчыштiс Павел, сы коста жö ас кежас думайтiс: «Кыдз этö ме ачым эта йылiсь одзжык эг думайт? Сiя жö быдöс тöдö». — Весь тэ этаись, Полина Михайловна, полан. Не меным, не тэныт öнi сiя немöн ни оз мешайт, кöть и локтас гортö дак. Не öнi, не некöр.

— Кин сiйö тöдö...

— Ме тэныт кыв сета — некöр.

— И мый сэк меным керны? Эд менам жö вон армиясянь бертiс. Тожö, между прочим, Павелöн шуöны. И праздник кежас, вежöртана, менö гортын видзчисьны пондасö. Гожумбыт жö сэтчин эг вöв. Туйыс только öнi умöль. Ог и тöд, сюра — ог автобусыс вылö.

— Тёзка, сiдзкö, менам. Интересно, — горöтчис Павел нывкаыс вон йылiсь. — А туйес, Полина Михайловна, и былись не öддьöн бытшöмöсь. И отирыс праздник коста автобуссэзас уна. Не буржык я праздник кежас татчö кольччыны, а гортö телеграмма сетны, мед весь эз видзчисьö. А сёрöнжык ме тэнö ачым нуöтла — гортöдз и бöр.

Эта вылын бöртiжык и баитчисö.

Сiя жö басни коста Павел юöртiс, что гöстясö пондасö видзчисьны павжун гöгöр. Но праздник лунас, гор гöгöрын ештöтчöм бöрсянь жö, зонкалöн мамыс горöтчис:

— Мый нö тэ асывсянь телевизерыт одзын пукалан?

— А мый эшö меным кернытö?

— Дак эд гöстяöс эн я корны мöдiн...

— Мыля мöдi? Ме кори сiйö. Кыдз тшöктiт, сiдз и висьталi. Кöсйисис тай.

— Кöсйисис, батi, корин дак. Да öтнас эд сiя тэныт сё ни, нывка мортыс, оз лок.

— Дак мый, эшö я мый я сэк ветлыны?

— Мун öнi жö, пасьтась да. Мый öшö сэтöн, кöдö оз ков, юасян. Видзöт только менам, мед öтнат бöр эн лок. Сьöрат и вайöтан. Кöр сiя, кодя нывкаыс, öтнас зонкаыс ордö локтас.

— Меным абу сьöкыт, тшöктат дак, — шыасис Павел мамыс басни вылö, сэтöн жö пасьтасис, петiс.

Öтöрас ни, ас кежас дивуйтчöмöн, зонка думайтiс: «Пырас жö эд то пöрисьыслö юрас. И час сьöрна терпитны оз вермы. Кыдз пожар вылö тэрмöтö. Ойбыт, натьтö, эта увья талун эз и узь. И парадсö видзöтны меным эз сет». А кöр сiя локтiс да пырис нывкаыс ордö, пöрись Маланья старуха керкуö, сэк вöлись вежöртiс — мукöд отирыс сы моз оз узьö и сiйö ештöмась одзавны ни.

Шульга лабич вылын пукалiсö ны деревняись жö кык тöдса ёрт — Васька Иван да Зуй Васька, öтыс ны коласiсь вöлi гöтыра, а мöдыс, кытöнкö куимдас саяс ни, öнöдз эшö олiс мам да кöть и томжык, но ветлöмовöй ни сой коласын и деревня вылас лыддиссис жöникöн. Ась вежалуныс вöлись и пондöтчис, но кыкнан «гöсьыс» сэк кежö тöдчöмöн вöлiсö юыштöмöсь ни. И сiя кадö, кöр Васька Иван сiйö и керис, дугдывтöг кыйис синнэзнас нывкасö да горша ньылалiс дуль, Зуй Васька кадiсь кадö кутышалiс асывсянь кальыт юрсö да дугдывтöг бырзис-норасис кытшöмкö кызпыд да «насмука» вылö, кöдна увья, сы басни сьöртi куим лун сьöрна и ончир эшö абу керöм. Сiя жö, здоровайтчöмныс бöрсянь, Павеллiсь медодз юалiс:

— Тэ мый, Кот пиян (Кот нимкодьнас шуисö зонкалiсь айсö) тожö, бытьтö, мыйöнкö шогавны пондiн?

— Пондi тай. Праздник лунö можно и шогалыштны. Не пыр тэныт öтнасытлö — буддень и вежалун.

Паныт горöтчöмсö Зуй бытьтö эз и кыв, лэдзис пеллес бокöт, нывкасис стыдитчытöг, дзик ас коласын, одзлань быздiс:

— Кольккетö, натьтö, кинкö вылын кабинаат кынтiн? Сiдз эдö?

— Эз на лок тöлыс да. Кабинаас менам абу кöдзыт, — Зуй моз жö шыасис паныт Павел.

Сэк кежö вежалунся паськöма ни, миссьöм-сынасьöм, Полина öтпырись петкöтлiс комсянь кастрюляöн ырöш, юктасис. А кöр сувтöтiс джыння кастрюлясö пызан вылö, Павел нывкаыслö горöтчис:

— Вашöтiсö талун гортiсь.

— Кыдз вашöтiсö? Мыля?

— Мыля дыр он лок. Висьталiсö вот, мед öтнам гортын эг мыччась.

— Дак одз эд эшö. Асыв вöлись кадыс да...

— Мый, поди, одзыс... — Павел дзар керыштiс ки бердiсь часыэз вылö. — Даскыкöдз ни сибалö, чожа павжун. Кытшöм нö сiя одз?

— Сэк ме часöт. Только вот... — юрнас качыкнитöмöн нывка мыччалiс ордчöн пукалiсь ёрттэз вылö, — ...шогавны эшö пондöмась. Кытшöмкö пöрöс я мый я, баитöны, кутчисьöм, лекарствоэз корöны. А татöн менам нем абу. Ковсяс медпунктöдз кежавны.

— Да тöння бöрсянь, натьтö, нылöн пöрöсыс...

— А тэныт-ту сэтчöдз кытшöм дело, тöння ли удерлуння бöрсянь? — öмалiс Павелöс Зуй Васька, кöда кывзiсис ны басниö, и кылiс, тыдалö, сыын ас понда мыйкö неколанаö. — Праильнö Полинаыс баитö, что медперво колö медпунктас миянкöт кежавны. Колö или оз очередьсö тöдны? Ми жö медодз сiйö корны локтiм.

— Но тi, дак тi, ме жö ог спорит, — согласитчис Павел. Но, кыдз баитсьö, заводитчöм «с полоборота» Зуй Васькаöс öнi эта эз ни лöньсьöт.

— Вот сiдз вот перво жö и колiс висьтавны! А то адззисьöм сэтöн кытшöмкö Кот пиян да пондас эшö, кытчö колö и оз, кот нырсö сюйны. Сёрмин, дак и пукав, шымырт бöжтö бöр гöгöрат да, а шытö эн сетав! Вешшы лучше син одзись! Пет мун керкусис! А то видзöт, мый ме тэкöт эстöн кера! — Сэтöн ни Зуй Васька перыта чепöссис коккес вылö, кутчисис Павел морос бердö, öтпыр-мöдöтпыр вынöн летöвтiс.

— Зонкаэз! Дугдö жö! Не гортаныт эд! А ноко, кыш öнi жö керкусис. Петö öтöрас.

Местасис чепöссис куимöтыс. Васька Иван зэркыта нетшкöвтiс Павел морос бердiсь Зуй Васькалiсь киэсö.

— Дурак! Думайтан жö, он, мый керан? — нывкаыслö одзлань горöтчис: — Эн видзöт. Сьöвзьы тэ, Полина, сы вылö. Ветлам лучше медпунктöдззас.

Пыксьыны одзлань нывка эз понды. Сiя сэтöн жö пасьтасис, и быдöнныс öтiк ыбöсын петiсö.

Деревня кузя отир син одзын медпункт ладорö оськавтöн матö нывкаыс бердö мöддэс моз Павел эз сибöтчыв. Полина мунiс одзас. Сы бöрсянь, кöр öтамöд коласын одзасьöмöн, кöр кыдз, вöтчисö Васька Иван да Зуй Васька. Павел тэрмасьтöг оськалiс бöрсяняныс. Медпунктас пыранiн одзын сiя юалiс:

— Дыр тi сэтчин, Полина Михайловна?

— Дыр, конешно, — одзасьöмöн шыасис Зуй. — Мун, лучше, гортö, кай горвылат да узь. Сё ни тэнат кань вытьыт оз тырмы видзчисьнытö. Он тэ сiйö сэсся адззыв. Нювсьы öнi. Сiдз эд, Полинка?

— Да не-е, — поперегалiс Полина Зуй Васькалiсь баснисö. — Меряйта вот часöт «шогнысö»... — сералöмöн содтiс сiя, — да и дöс сэтöн. Тэ верман эстöн видзчисьыштны, он пыр дак.

— Видзчись, видзчись, кытчöдз ми сэтчин меряйтчыны пондам, — ректалiс одзлань Зуй. — Он я эстöн сы коста таракан моз тöрсты. Швачкан оча кок, дак öддьöн бур лоас.

Паныт эта быздöм вылö Павел эз ни шыась.

XIX

Сулавны öтöрас и эз вöв öддьöн кöдзыт, кöть и шонытöн арся погоддясö шунытö эз позь. Вöлi кымöра да ойтöла. Шочыника чажгис-усис каша шыдöс кодь чорыт лым.

Нем керöмсянь Павел нёджжöвтыштiс часыэз вылö, öзтiс куритны, öтпыр, мöдöтпыр муныштiс öтмöдöрö медпункт весьтöт, а сэсся кежис тöв шогья медпункт пельöс сайö, кытöн поткöттöг вöлi тэчöм кыдзовöй важ пес. Сэтöн жö костёрись чуркаэс коласын усис сылö син вылас тыртыштöм вевдöрсяняс усьöм лымöн колун вылö вачкисян важ да бырöм поткöтчан чер. Зонка босьтiс сiйö киас, сувтсöн лэдзис костёр вылiсь чурка, поткöтiс, а сэсся сiдз жö и мöдiкö, и куимöтö.

Чулалiс джын час сьöрна, а медпунктсис öнöдз сiдз некин и эз пет. А кöр Павел, мыдзыштöм ни, сувтчыштiс недырик кежö поткöтчансис да лэдзис кисис чер, мед вились öзтыны öмсис кусöм сигаретасö, сэк вöлись и сибалiс сы пельшы бердöдз медпунктсяняс нывкалöн горöтлöм. Зонка чепöссис поспуэз кузя вывлань, кутчисис ыбöс вуг бердö, но ыбöсыс пытшксяняс вöлi игана. Эстöн вöлись сiя и вежöртiс быдöс: мыйлö кык ёрт локтiсö асывсяняс нывкаыс ордö, мый понда пондылiсö кутчисьны сы бердö да мыйлö сiйö йöртiсö медпунктас.

— Лэдзö менö! Осьтö ыбöссö! Мунö вакрамеш, нето горöтлыны понда! — видчис ыбöс саяс нывкаыс, а одзлань эшö этася горöнжык: — Па-а-авли-ик! Отса-а-ав!

Мöдöтпырись Павел нетшкöвтiс асланяс ыбöс вугсö сэтшöм вынöн, что кöрттуввес сорöн сiя шедiс ыбöс бердiсь да кольччис сы киö. Кутчисьнытö одзлань лоис нем бердö. Быд вынiсь жö зонка гымгис-вачкис кулакнас ыбöс кузя, юалiс:

— Осьтат или одö?

— Меным, Павел, оз сетö ыбöс дынас сибöтчыны! — юöртiс пытшксяняс нывкаыс. А Зуй Васька сэтöн жö ассяняс содтiс:

— Кывзы, тэ, Кот пиян! Мунан, дак мун эстiсь, кытчöдз коккет новйöтöны. А он, дак сiдз и тöд, юртö голя вывсит мургыльта!

— Ладно, — шыасис негорöн Павел, бергöтчис, петiс.

Мöдöтпырись сiя кайис посöдзас киас черöн ни, сюйыштiс сiйö дорышнас ыбöс коласас, öтпырись бытшöмжыка нырыштöмсянь крючокыс пытшксяняс чеччöвтiс, ыбöсыс ванйöв оссис. Порогсö вуджтöн ни Павелöс панталiс кöртовöй клюка, но паныт черыслö сiя вöлi нем туйö и зонкасö эз сувтöт. Медодззаись вачкöм коста жö, кöр Зуй невна сорасис да инмис ыбöс косякö, сы киын клюкаыс кусiньтчис. А кöр Павел вылiсянь öдззöтiс сы вылö чер, мед сöздыштны юр кузяс, дорйисьöмыс местö Васька Иван вотьыштiс ыбöсö. Ачыс Зуй Васька смертьыс одзын повзьöмсянь секунда сьöрна чочкоммис, кыдз лым, кисис уськöтöм клюка сьöрö дырснитчис-пуксис джоджас. Медбöрья кадö черсö сы юр весьтiсь Павел и кежöтiс, но кокнас öтпырись чужйöмöн вирöдз разис сылiсь нырöмсö. А сiдз кыдз медпунктас отсöтсö эта коста Зуй Васькалö видзчисьны эз ни позь, то эта бöрсянь и паныт кутчисьны сiя эз ни лысьт, тпрутюбаöн уськöтчис ыбöсö.

Кöр Павел да Полина, öнi öтлаын ни, петiсö медпунктiсь улич вылö, мöд кыкыслöн некытöн матын не дук, не след эз ни вöв.

— Отсавны, батi, сылö колiс, öддьöнöв жö, тыдалö, тэ сылö сибöтiн.

— Мун отсав, вöтчы да, жаль дак, — зэркытöла шыасис паныт нывкаыслö öнöдз эшö лöньсьытöм, тогзян кикока Павел, невна вежсьыштöм голосöн сэтöн жö содтiс: — Висьтав спасибо, что ачыт дзоньöн кольччин.

— А былись эд. Павел, — дивуйтчöмöн горöтчис нывкаыс. — Ме жö медперво эг и думайт, мыйлö нiя менö силком медпунктас корöны. Да и кинлö сымдаыс юрö пырас? А эстöн нiя перво жö игналiсö ыбöс да корасьны менö пондiсö, мед эта Зуй сайö петны. А он кö пö согласитчы да миянкöт мун, дак ми пö тэнö и эстöн вермам... Спасибо, Павел, что кыдзкö кöть тэ лöсялiн. А то бы... Нельки думайтны полöм петö, мый бы менам тэтöг эстöн вöлi. — Ордчöн зонкаыскöт оськавтöн нывка йыг-йыг-йыг зэгöтыштiс быдсöн вывтырнас, кыдзкö аслыс казявтöг кутчисис зонкаыс ки бердö, сы бердö жö жмитчыштiс ачыс.

XX

Сiдз ордчöн, öтамöдкöт кутчисьöмöн оськавтöн нiя и сибöтчисö зонкаэс керку дынöдз.

Боксянь видзöтiкö мыччассис, что Полина öнöдз эшö примитö зонкасö дзир ёрт местö. Эз кыв да эз висьтав, тыдалö, нывкалö одзлань сьöлöмыс, что эта керкуö гöстя местö нывка юрöн пырöм бöрсянь бöр сэтчинiсь сэтшöмнас сiя оз ни пет, пöртчас инькаö да сiдз сэтчин и кольччас пыр кежö хозяйкаöн. Виль керкуыс одзын нарошно сувтчыштöм коста сiя юалiс:

— Кинлö жö бы тэ, Павел, сэтшöм теремсö строитiн?

— Тэ разь эшö он тöд?

— Кысь нö тöда, эн на висьтав да.

— Ладно. Сёрöнжык висьтала.

— А позьö пытшкас кöть öтiк синöн дзар керыштны?

— Мыля нö оз? Пырам, видзöтам.

Одззамоз кипöлöт кокнита видзышавтöн зонка кайöтiс нывкасö поспуэз кузя вывлань, осьтiс сы одзын посöдз ыбöс, лэдзис одзас. Сiдз жö нiя вуджисö и виль керку порог омöн. Но осьта ыбöс колассянь ни зонка казялiс, что виль керкуыс талун лонтöм, вöлi шоныт. А кöр пöдныштiс бöрсяняс ыбöс да öтлаын нывкаыскöт дзар керыштiс керку пасьта, дивуйтчис эшö öддьöнжык. Кытчöдз сiя ветлiс нывкаыс дынöдз да мырсис аслас мужскöй правоэз понда, важ керкусис диван да телевизор ештöмöсь вуджны этчö жö. Ыджыт жыр шöрын сулалiс виль пызан, а сы гöгöр да стенаэз пöлöн — вились небöм стуллэз. Виль занавескаэз öшалiсö и югыт öшыннэз весьтын, а пыранiн дынiсь стена бердын — вешалка. Эстöн жö эта коста вöлiсö и зонкалöн аймамыс. Кот Васька, или кыдз ми шуим перво жö зонкалiсь айсö, Василий Абрамович, öктiс узьлан жырын паськöм увтö зеркалоöн шкаф-шифоньер, кöда важын ни вöлi небöм да видзчисис ассис кад, а Сергей Наталь, зонкалöн мамыс, лöсьöтiс кышавны сiя жö узьлан жырись ыбöс весьтö зелёнöй рöма занавескаэз.

— Тi тай татöн жö, — öшыштöм сорöн шыасис зонка мамыслö. — Ми мöдiм только видзöтчöм могись пыравны, а эстöн талун овны ни позьö. Вайöтi вот гöстянытö.

— Ештiн?

— Ештi, кое-как.

— Вот и бур. Чöвтчы, Полинарья, пуксьы, шоччись, мыдзин дак. Видзöт миянлiсь керкусö — гленитчас, оз.

— Öддьöн тай гажа. Вывтi нельки югыт. Сiдз топ быдöс öтöрсяняс и тыдалö, — гажвевйöн горöтчис нывка ас гöгöр недырик нёджжасьöм бöрсянь.

— И ме бы сiдз жö шуа — югыт, гажа, — пысалöм шнурсö кöртыштöм бöрсянь Наталья Сергеевна лöсьöтыштiс ыбöс весьтö нюжалöм занавеска. — Невна то локтöдззаныт эг ештö. Тэ, Паша, отсышт мун айытлö шкапсö сувтöтны. А ме ужо пызан вылас мыйкö понда лöсьöтны.

Кытчöдз мужиккез öктiсö да сувтöтiсö узьлан жырын шифоньер, пызан вылас сёян-юаныс вöлi чукöртöм. Пуксисö сёйны.

Пызан саяс горалiс ачыс Василий Абрамович. Медодзза стопканас юисö праздник увья. Мöдöтпырись кисьтлöмсö мужиккез мöдiсö лэбтыны виль керку понда, но эстöн Наталья Сергеевна нiйö сорис.

— Эдö жö тi, мужиккез, сiдз тэрмасьö. Кывзö, мый ме висьтала, да сы понда вöлись и юö. Ештат керкуныт понда вексö овтöн юнытö. Некытчö öнi сiя тiян оз ни пышшы, — а одзлань веськыта Полиналö: — Öддьöн ни то, дитя, тэ меным гленитчан да сiйöн и тшöктi гортöдз вайöтны. Монь вылö аслым ме тэнö корасьны мöда. Мун, давай, миян Паша сайö. Годдэт эмöсь ни, велöтчин, уджалан вот. Кад и семья йылiсь думайтны. Кöр-некöр эд муннытö сё ни ковсяс. Нывка оланас век он ов. Мый тэныт йöз патераэзас овнытö. Да и бокисьыт абу ни том, гöтрасьны сылö колö. Сы киння эд миян некин томжыккес абу, некин увья дзескöтчынытö. Да и керкусö вот... — Наталья Сергеевна öт кинас ас гöгöр öвтыштöмöн мыччалiс керку пасьта, — ...нем сiйö öтнассö вильсяняс простöн сулöтны-сiсьтныны. Овны сiя керöм. Ачым вайöта, дак ачым жö, кыдз нылöс, и видзны понда. Узь-ов мужикыткöт да ваясь, тöд.

Сiдз ни видзчисьтöм баснисяняс рöмсялöм чужöма да мышкыра юра Полина этна кыввезсянь рöмсялiс эшö öддьöнжык да эшö увланьжык лэдзис синнэсö, нельки ловзисьны бытшöмик эз лысьт. А Наталья Сергеевна, сыкöт паныт пукавтöн, одзлань эшö баитiс:

— Керку гöгöрас, кытчöдз он велав, ме öшö и ачым бергала. И нучёк-нучаткасö, лоасö дак, кытчöдз ловья, ачым сiт-кудзсис петкöта. А эта ыжда керкуас эд нiйö розваль мымда колö ваявны, быдöнныслö местаыс тырмас. Мый тi, мужиккез, сералат? Ме не смех вылö, былись сымдасö горöтчи. Давайти, öнi эта понда и юам, — эстöн Сергей Наталь вöлi кутчисис ни аслас стопка бердö, но кватитчöмöн керис бöр.

— Ой-ё-ёй! Норовитö жö, мужиккез! Дöс тi менö асланыт тэрмасьöмöн ладсис öштiт. Мый ужо вот эшö ачыс невестаыс эта вылö висьталас.

Öнi куимнанныс пондiсö чöлöмöн видзöтны нывкаыс ладорö, видзчисисö, мый горöтчас паныт сiя.

— Кыдз нö ме сiдз... мамöлiсь эг и юась да?.. — Недырик кежö синнэсö лэбтыштöм коста не висьталiс, а юалiс паныт нывкаыс.

— Да уна я öнi маммезныслiсь томпöлöсыс юасьöны? Кытöн шедас, сэтöн быдöнныс и öтлаасьöны öтамöдныскöт да? — Горöтчис Абрам Васька. А Сергей Наталь содтiс:

— Талунсянь, дитя, ме тэнат сэтшöм жö мам. И корася кö ачым, дак обидитнытö некинлö ог сет, сiдз и тöд. Ю кут да аслат чассё понда.

Быдöнныс тшöктöм увтын пыксьыны дыр Полина эз понды, кутчисис аслас стопка бердö. И кöр Сергей Наталь, мыччасьöм могись горöн сувтöтiс ассис простайтöм стопкасö пызан вылö, нывка öтпырись тожö чипыштiс, зэгöтöв-керис кезöтöмсяняс юрнас да босьтiс öмас сола тшак.

Пызан саяс пукавтöн сёйисö-юисö одзлань. А коласас Сергей Наталь сiйö и керис, вештышалiс нывкаыс одзö матöжык то янтарь рöма сахаралöм вежьягöд, то жаритöм баран яй, то йöла шаньгаэз, то мыччывлiс кадiсь кадö сылö пызан омöнняс неыджыт эмалированнöй кастрюляын веж быгья, сук, кыдз ма, тагья деревенскöй сур, тшöктiс: «Юышт жö, дитя».

Дыр мыйись, кöр Абрам Васька чеччис пызан сайись, öзтiс куритны да пуксис вöлi телевизор одзö, иньыс, Васикаыс, горöтчис:

— Некöр эд миянлö, айыс, телевизер одзас тэкöт пукавнытö. Петав жö мун картавылас да сёд подасö. А меным öшö мöдöрас дзимлясьны колö.

Эта бöрсянь кыкнанныс сьöрсьöн-бöрсьöн петiсö.

Чеччисö и томмес. Пызан саяс часöт дзир быдöссянь лоöмыссянь кыкнанныслö öтамöд одзын вöлi, тыдалö, недолыт. И мед только чожажык мездiсьны эта недолытсянь, зонка оськöвтiс зэв нывкаыс бердöдз, босьтiс сылiсь киэсö ас киэзас, видзöтöв-керис сылö синнэзас.

— Вот сiдз вот, Полина Михайловна. Пуксям диван вылас, баитыштам.

— Эшö разь мыйкö йылiсь кольччис баитнытö? Быдöс ни топ миян местö баитiсö да...

Öткоста оськöвтiсö диван бердöдз, пуксисö.

— Кывзы жö, Павел. Эта понда тэ менö гортат и вайöтiн? Эз разь позь перво жö веськыта висьтавнытö?

— Не эд, Полина Михайловна. Сымдасö ме перво и ачым эг думайт. Тэ жö ачыт адззан — пызан саяс пукавтöн ме некöдöрö и шы эг сет. Но думайтны кö пондыны сы сьöртi, мый вермис шогмыны тэкöт эшö сэтчин, медпунктас ме шуа, то ли кытöнкö мöдiклаын, эта сьöртi эстöн лоöмыс медбур. Неужто ме тэнö сы понда дзир дорйи, мед тэ шедiн нылö жö кытöнкö мöдiклаын да мöдöтчид? А эд лэдзны кö öнi тэнö öтнастö деревня вылас, дак эта и мöдöтпырись вермас шогмыны. И ме думайта — мамö керис быдöс правильно.

— Меным сысянь недолыт, что нем йылiсь эг тöд да ачым кортöг локтi. Локтi, бытьтö гöститöм могись, а петö, что...

— Но мыля жö ачыт, Полина Михайловна? Да, локтiн тэ ас кок вылат, но эд не öтнат жö и не ачыт. Ме тэнö и иган сайсис шедтi-судзöтi, и гортö ачым вайöтi, колö кö тэныт тöдны дак. И некытшöм буржык петанiн этася тэнат эз вöв, кыдз только локны татчö. Мыля бы тэ сымдасö некыдз он вежöрт? Висьтав спасибо, что эг сёрмы, аскадö ештi, и нем умöльыс тэкöт эз ло, и ми тэкöт öтлаын. Или тэнат эз вöв охота öтлаын мекöт лонытö?

Ответсö этна кыввез вылö нывка видзис синнэзнас. Повтöг да быдöс висьталöмыскöт согласитчöмöн сiя вель дыр видзöтiс веськыта зонкаыс синнэзö, а сёрöнжык, шутитöм могись, юалiс:

— А кинлö эта понда спасибосö висьтавны?

— Меным, конешно. Кинлö нö эшö этася? Эд ме жö тэнö, ме ас пондаись дорйи. Но и нылö тожö, зонкаэслö, ме шуа. Тожö, натьтö, öтлаасьнытö миянлö мымдакö отсалiсö. Эта басни коста зонка жмитыштiс ас бердас нывкасö.

— Спасибо инö... тэныт... — шыасис мöдыс, первуись нюжöтчис киэзнас зонкаыс голя бердöдз, сывьялiс, жмитчыштiс ачыс.

XXI

Горт деревняись мунöм бöрсянь некытшöм колхозö Аня сэсся эз кежав. Сiя одзлань ни тöдiс, что овны да уджавны сувтчас городö.

Эстöн корсьö висьтавны эшö и сы йылiсь, кыдз да мыйсянь сiдз петiс.

Сэк кежö, кöр уджсö кошшöм могись Аня Павелкöт иньдöтчисö городö, лотереялöн колана тиражыс кытшöмкö центральнöй газетаын вöлi печатайтöм ни. Но гортö нывкалö эта газетаыс эз лок. А юасьны-кошшыны сiйö деревня пасьта кадыс эз петав. Сiйöн öнi сiя билеттэсö босьтiс сьöрас.

Городас Аня чеччис зонкаыс автомашина вылiсь автовокзал дынын. Кадыс эшö эз вöв сёр. Уджалан луныс вöлись пондöтчис. А сiдз кыдз быдöс коланаыс вöлi думайтöм одзлань ни, ештыны весись кад нывка эз понды, перво жö небис билет матiсьжык рейсiсь автобус вылö.

Час етш бöртi нывка пукалiс автобусын ни, кöда кыскис сiйö ас кежас бöрйöм хозяйствоö.

Колхознöй правленнёас, кытчö Аня локтiс медперво, асьсö председательсö и эз ни застанит. Пукавны страда коста аслас кабинетын уджалiсь председательлö вöлi некöр. Некин эз вермы юöртны бытшöмжыка и сiйö, кöр да кöдöрсянь сiя мыччисяс. Но бухгалтерияын уджалiссезсянь нывкалö усис тöдны, что колхозас оз тырмы главнöй зоотехник.

Томувья, опыттöг да институтскöй образованнётöг лоны главнöйöн Аня эшö и эз вермы. И тшöктiсö кö бы, шуам, кутчисьны сiйö эта должность бердö, сымдасö нывка ас юр вылö некöр бы эз кер. Но хозяйствоыс сылö гленитчис. Басниыс коласын ни лоис вежöртана, что подаыс колхозас унажыксö племеннöй и не сымда усьö тшыгсянь. Сiдзкö и вердчаннас бергалöны буржыка. Этö позис вежöртны и высьтöм йöв сьöртi, кöда вöлi тöдчöмöн унажык, ежели горт колхозын. Бурыс нывка понда эшö и сыын, что том отирыс колхозас видзсис унажык, и город дынсянь, ковсяс кö мыйкö вылö, неылын, а рейсовöй автобусыс ветлö быдкоста.

«Сувтöт бы кинöскö фермаись зоотехниккес коласiсь главнöйнас, а менö сы местö», — зорамис нывкалöн дума. Но эта йылiсь колiс баитны председательыскöт аскöттяс. Сы увья Аня и кольччис видзчисьны сылiсь бертöм.

Председательыс, Юрий Семёнович Пыжьянов, пöрисьвевья, кöсыник да лэчыт сина морт, правленнёас локтiс мыдзкодь. А кöр кывзiс Анялiсь баснисö, дженытика горöтчис:

— Абу местаэс.

— Кинöскö, батi, главнöйнас керат, дак ме бы сы местö.

— Сы местö и ме бы рад вöлi, да быдöнныс тэ кодь жö томöсь — велöттöмöсь, — кузьжыка ни юöртiс председатель. И кöр Аня вежöртiс, что ачыс юралiсьыс тожö кöркöся зоотехник, одзлань кежö надейтчöмыс и нач кусiс. Кытшöмкö кутöм недолытсянь горöтчынытö нем нывка одзлань эз ни письты. Курччöвтыштöм тырпöн сiя бергöтчис пызан дынсис, не öддьöн чорыт да лöнь оськöввезöн петiс бöр.

«А жаль — эз примитö. Вöлi бы эстöн мый бердын видзсьынытö», — думайтiс нывка ас кежас, кöр невночка öшöмкодь оськалiс кыксувдöн строитöм колхознöй правленнё дынсянь автобуссэз сувтчанiн ладорö. Председательыскöт сэтшöм басни бöрсянь енöвтчыны этчö ой кежö кольччис нем вылö. Бöрья рейснас Аня бертiс городö.

Гажтöм думаэз коласын эстöн нывка кыдзкö казявтöг перво жö иньдöтчис асланыс техникумись общежитиеö. Но талун сiя мыччассис нач тöдтöмöн. А быдöс сысянь, что сулалiс гожум, студенттэс мунiсö каникуллэз да практика вылö. Эшö ылiсянь Аня казялiс куимöт этаж вылiсь раматöм да коробкатöм öшыннэз. А кöр нывка сибöтчис матöжык, син вылас усисö му вылын куйлан батареяэз, трубаэз, виль да важ öшын коробкаэз, рамаэз да ыбöссэз. Сiя сувтiс. «Мый нö ме, май, перво жö эта йылiсь эг думайт?..» Сiя бергöтчис бöр, жагвыв иньдöтчис гостиница ладорö.

Бур, что гостиницаас местаыс адззисис. Лунтыр сьöрна тшыг да мыдзыштöм Анялö столовöйын ужнайтöм бöртi нем йылiсь сэсся эз ни думайтсьы. Номерас шоччисьöм могись думанас недырик кежö нывка пöрöтчыштiс койка вылö. А одзлань и ачыс эз казяв кöдкоста онмöссис.

Ашынас, одз асывсянь, Аня вились вöлi автобус вылын, кöда кыскис сiйö город дынсянь ылiсьжык хозяйствоö. Тöння кошшисьöм бöрсянь талун нывкалöн надейтчöмыс вöлi не сэтшöм ыджыт ни, но правленнёас асывсянь сёрмöмыс эз полöт.

И былись. Кöр Тшакылёва деревняын сiя лэдзчис автобус вылiсь да юасьöмöн локтiс колхознöй правленнёö, сэтчин эта кадö некинлöн юралiссез коласiсь и дук эшö эз вöв.

Сёрöнжык, öтiк бöрсянь мöдiк, нiя, правда, и чукöртчисö. Но эшö председательыскöт басни вотöдз эстöн Аня панталiс асланыс группаись подружкаöс. А кöр Лена Тшакылёва кылiс Аня мог йылiсь, сайласьтöг юöртiс:

— Примитасö, корсян дак. Но ме бы тэ туйын некöр и некöр сымдасö эг кер.

— Мыля?

— Нем кляп эстöн буржыкыс абу. Быдöс и быдöс кывзы, сiдз жö, кыдз горт колхозат висьтасян. Сiдз жö быд год и вердчаныс оз тырмы, и подаыс тшыгсяняс усьö-кулö, и фермаэс киссьöны-разьсьöны, и отирыс пышшö-мунö.

— А кыдз нö тэ, сiдз дак, ачыт уджалан?

— Ме-ту? Кыска тай арöдззас, видзчися, кытчöдз жöникö армиясяняс оз берт. А бертас, дак ми öтiк лун кежö эстöн ог кольччö. Сiя эшö армия вотöдз Перемын уджалiс.

Эта басни бöрсянь корсьыны этчö удж вылö Аняöс эз ни кыскы. Нывка нельки подругаыс ордö гöститöм могись эз кежав. Сiя жö асывся автобус вылын бертiс бöр городö.

Павжун бöрсянь позис бы ветлыны кытчöкö эшö. Но эстöн нывкалö тöдвылас усисö сьöрас босьтöм лотерейнöй билеттэз. «Кежавны колö сберкассаас. Вдруг тысяча мымда вылö инмас», — шутитыштiс нывка думанас ас вылас.

Павжун бöрсянь сберкассаын отирыс вöлi вель уна. Кинкö сулалiс очередьын, мед пуктыны счёт вылö, кинкö — мед босьтны бöр.

Лотерейнöй тираж таблицаэз дынын, кöдна öшалiсö стена бердын, кынымкö морт тожö бергалiсö. А кöр öтiк бöрсянь мöдiк, нiя вешшисö бокö, Аня сибöтчис ны местö.

Кыскыны сумочкасис перво жö пачкасö быдсöн вöлi кыдзкö недолыт. Нывка янсöтiс сiйö кык тор вылö, пондiс видзöтны.

Джын пачкасис öтiк рубöн инмисö дзир кык билет. Быдöс жö простöйесö ковсис лэдзавны урнаö. «Этадз, тыдалö, и пачка донсö бöр он бергöт». Кык инмöм билетсö нывка сюйыштiс бöр сумочкаö, ны местö кыскис да пондiс видзöтны одзлань мöд джын пачкасö. И вот... Кöр киас кольччисö дзир дас етш ни — быдöс вöлiсö лэдзöмöсь урнаö — öтiк билет вылын нывкалöн синнэс сувтiсö. Кыдз таблицаас, сiдз и билет вылас номеррес мыччассисö öткоддезöн. Перво жö этаö кыдзкö эз и веритсьы. «Сораси, батi, да....» Нывка вайöтыштiс билетсö матöжык таблица дынö, видзöтiс мöдпöв. Некытшöм сорасьöм эз вöв. Кыдз öтöрас, сiдз и мöдöрас цифраэс вöлiсö тшöтш öткодьöсь. Эталö Аняыс гажмыштiс. А кöр сiя нёджжöвтыштiс одзлань, казялiс инмöм тор да сылiсь вит цифраа донсö, эстöн вöлись повзис да öшис сэтчöдз, что и кынмис местаас, нельки думайтны нем эз лысьты.

— Онмöссин я мый я сэтöн? — топ былись он пыр кылiс сiя кытшöмкö кадö бöрсяняс кинлiськö лöгвевья шыасьöм. Сэк вöлись нывка кежыштiс тираж таблица весьтiсь бокö, но мый колiс керны одзлань — эз тöд.

Сёрöнжык Аня сё жö вежöртiс, что инмöм билетсö сэтöн жö и колö мыччавны. Зэв ёна сiйö киас жмитöмöн, сiя сувтiс öтласа очередьö.

Öнi нывкалöн полöм петiс сыись, что читкыля юрсиа, сьöд да чож сина нывка-оператор, кöда пукалiс стекло саяс, мыйкö пондас горöн юасьны, сэтöн жö лэбтас кытшöмкö шум инмöм билет кузя. Но сымдаыс эз ло. Сiя чöлöмöн примитiс Аня киись билет, öтпыр-мöдöтпыр, чöлöмöн жö, нёджжöвтыштiс таблицаö, корис паспорт да тшöктiс видзчисьыштны, а ачыс кытчöкö петiс.

Видзчисьнытö ковсис дырöв. И öнi, нем керöмсянь, öтпыр-мöдöтпыр нывка нёджжöвтыштiс ас гöгöр, ыркыт, лöнь да сöстöм зал пасьта, а öткоста и сыын уджалiсь вит-квать нывка вылö, кöдна, быдыс ас местын пукавтöн, лöня керисö ассиныс удж. Сэк ни Аня первуись ас кежас думайтiс: «Тожö вот уджалöны. И сьöкытыс нем оз тыдав, югыт, шоныт, лöнь да сöстöм. Вот бы сюрны сэтшöминö».

Дыр мыйись читкыля юрсиа нывка бертiс, лöня юöртiс:

— Билетнытö ыстам экспертиза вылö, а сы местö сетам квитанция, кöда понда ковсяс гижсьыны.

Нывка гижсис, бергöтöм паспортöн да квитанцияöн сберкассасис петiс бöр.

Инмöм билет увья и одзланься думаэс Анялöн кыдзкö вежсисö. Весь кошшисьöмсянь недолытыс сы ылöсын ныжмис. А сiдз кыдз кадыс сэк кежö лоис рытъявыв ни, мунны юасьöм могись кытчöкö эшö охота öшис. Час кыным сьöрна нывка тэрмасьтöг ветлöтiс магазиннэзöт, öтi-мöдi босьтасис.

Эз тэрмась сiя некытчö ойсö чулöтöм бöрсянь и асывнас чеччис сёрöнжык. А уджалан кад пондöтчик кежö думаэс вайöтiсö сiйö бöра жö сберкассаö.

Быдöнныс коласын читкыля юрсиаыс талун мылякö эз тыдав. Сы местö пукалiс понпутша кодь чужöма (гожумнас нiя тöдчöны медöддьöн), но бытшöма кыйöм басöк да кузь чикися, гырись да басöк моросвевья, лöзчача рöма сина.

Аняыс юалöм вылö: «Колöны-озö нылö уджалiссез?» — нывкаыс перыта мыччалiс бокись ыбöс ладорö, горöтчис:

— Пырав заведующöйыс дынö.

Даскыным минута бöртi, кöр Аня, гажвевья шынньöлöн чужöм вылас, петiс сэтчинсянь бöр, некытшöм колхоз нето совхоз йылiсь сылö эз ни думайтсьы.

Лун кыным сьöрна нывка ветлöтiс, юасис город пасьта: кошшис квартира. Бöртiжык сувтчис öткаса инька ордö, кöдалöн торйын городас олiс гöтыра зон.

Уджсö аслас специальность сьöртi позис бы, натьтö, адззыны окружнöй нето районнöй сельхозуправленнёын, специалисттэз отделлэзын, кытöн, быдöнныс коласын, вöлiсö и зоотехниккез. Но уджавны эта специальность сьöртi öнi сiйö эз ни кыскы, кезöтiс. Кутчисис Аня городскöй сберкассаö контролёрöн. Не нять, не пода, вежöртана, эстöн эз вöлö. Эз ков чеччыны одзся-одз асыввезöн, мед лым ли зэр коста болскыны пидзöсöдз лойöм деревенскöй нять да сiдз пемытiнас кыссьыны фермаöдз высьтiсян кад кежö. Эз ков лунiсь лун тальны сiйö жö нятьöсь туй колхознöй начальство дынö да клянчитны-корны тшыг подалö абутöм вердчан. Эз ков кывзыны лунiсь лун мыдзöм отирсянь быднёж видчöм-горзöм, начальствосö, уджсö да фермаись абутöмкодь порядоккесö прокленитöм. Эз ков кисьтны синваэз усьöм пода понда. Быдöс уджыс эстöн сыын и вöлi, мед колана мымда кад пукавны аслат местаын да öтiк бöрсянь мöдiкö лэдзны öшынок одзын очередьöн сулалiсь отирöс: кинсянькö примитны, а кинлöкö сетны бöр колана мымда деньга, гижышавны быдöс сетöм-примитöмсö лицевöй счёттэзö да отмечайтны сберегательнöй книжкаэзö.

Вештiсö етшажык — да. Но не быдöс коланасö морт оланiсь позьö небны деньга вылö. А колхознöй фермаын уджавтöн öштöм здоровьесö некытшöм миллионнэз вылö некытiсь бöр он ни неб. Сэтчö жö нывкаыс счёт вылын городас, кöда йылiсь некин сы киння эз и тöд, сэк кежö суммаыс, кыдз баитсьö, вöлi гöгрöса, а быд лунöн, неделяöн да месяцöн сiя сё быдмис да быдмис. Сiйöн эта ладорсянь Аняöс нем эз полöт. И мый бы ны коласын гортын эшö зонкаыскöт эз пет, аслас мунöм бöрсянь сiя веритiс, что одз ли, сёрöн ли, мöдыс сiйö сё ни пондас кошшыны вились: медодз кöть бы сiя стыд-позор увья, кöдаö сюрöтiс асьсö сэкся пондылöмнас. Этаö нывка веритiс сэтшöм бытшöма, что некытшöм сомненнё и воть мымда эз вöв.

Но чулалiсö лун бöрын лун, а зонкаыс мылякö сiдз и эз мыччась. Эз отсалö нывкалö нельки мамыслö гижöм письмоэз, кöднаын сiя эз вунöтлы юöртны, кытöн да мый керö. Тöдiс, что мамыс гортын чöвны оз понды, быдöс коланасö неöтпöвсöн новйöтас-паськöтас омöн деревня пасьта. Но адззыны да пантавны сiйö городын, кыдз эта вöвлi кык год сьöрна, öнi зонка, тыдалö, эз тэрмась.

Нёль месяц сьöрна сiдз весись видзчисьöм коста нывкалöн мылаыс бырис. Сiйöн октябрьскöй праздник кежö, первуись аслас мунöм бöрсянь, сiя локтiс гортö. Локтöмлöн причинаыс — конешно жö, мамыс ордö гöститöм могись, но не етшажык, вежöртана, и сы понда, мед пантавны зонкасö, то ли кöть кывны да тöдны, кыдз да мый сыкöт. Пантасьнытö колана мортыскöт и эз усь, но...

Праздник мöдiк лунас, асывсянь ни, быдсöн деревня пасьта паськалiс юöр зонкаыс гöтрасьöм йылiсь. И ась некытшöм бöбöтчöм нето сорасьöм эстöн и эз вöв, Аня эталö эз верит. Не сiйöн, конешно, что эта вöлi быль, а сiйöн дзир, что веритны сымдаыслö некытшöм охота эз вöв. «Не и не. Некöр ог верит. Сiя жö кык год сьöрна менö видзчисис. Кык год сьöрна, кыдз пон, ме сьöрын нюкьясис-вöтлiсис. Да эта кö бы дзир. А то эд силком пондылiс. Нагöлеч, позьö шуны, чöвтлiс, быдöс, кытшöм эм, лунся югыт коста адззылiс. Ась сэк, шуам, ме и эг сетчы. Мый, дикöй я мый я, мед эстöн сы сайö петны да век кежö эта запутымын кольччыны? Но позьö я сылö эта бöрсянь мöдiкыс вылын гöтрасьнытö? Неужто сiя сэтшöм стыдтöм-совестьтöм? Некöр и некöр ог кывзы. Некöр и некинлö ог верит», — думайтiс Аня асьсö лöньсьöтöм могись. Но кывсьöм юöр бöрсянь керкуас кодьöн эз ни пукöт, местаыс некытöн эз адззись. Охота вöлi тöдны сорасьтöг — быль эта или не быль.

Пасьтасьöм вежалун кузя кыдз позьö бытшöмжыка, нывка петiс гортiсь, иньдöтчис деревня вылöт зонкаэс керку ладорö. Охота вöлi кöть ылiсянь, кöть öтiк синöн адззывны сiйö, кöда лысьтiс поперегавны сылiсь туй. Но пырны эта увья зонкаэс ордö, ась и вежалун коста, кöть бы гöститöм могись, öтнас, Аня, вежöртана, эз лысьт. Эз бы лысьт сiя керны сымдасö нельки унася-уна отир коласын. А öткöн медодз нельки матö керку дынöдззас сибöтчыны вын сылöн эз судз, эшö вель ылына сы дынсянь коккес бергöтчисö бöр.

Горт посöдз дынö сибöтчикö нывка дзик саймис, вежöртiс, что бертö простöн, что керкуас сiйö оз кыскы и кöть пырас силком, местасö сэтчин сё ни оз адззы. Сiя бергöтчис бöр, мöдöр ладорсянь кытшöвтöмöн, иньдöтчис сэтчин мöдöтпырись.

Сибöтчыны зэв зонкаэс керку дынöдз нето кöть мунны матiжык öшын увтöт Аня и öнi эшö эз лысьт. Но чожа мый вежöртiс, что кернытö сымдасö оз и ков. Кöр нывка кежис тракт вылiсь да петiс колана улицаö, эшö вель ылын зонкаэс керку дынсянь казялiс öшымöс дорись öткаса нывка мортöс, кöда лэбталiс ва. Этасянь ни Анялöн сьöлöмыс ёкнитiс, а ачыс сiя сувтiс.

Томыник акушеркасö, кöда дзир эта жö тулысö локтiс уджавны ны деревняö, нывка тöдiс медодзза лунсянь. Тулысбытнас нiя вель унаись и пантасьлiсö, и баитлiсö, не висьтавны кö унажык — вöлiсö подругаэзöн. И не тöдны сiйö ва кайöтiсьсö öнi, ась нельки и ылiсянькодь, некыдз эз позь. Эта вöлi сiя, Полинаыс.

Кöр кыкнан ведраыс вöлiсö тыртöмöсь, томыник ичмонь, не öддьöн тэрмасьöмöн, кышалiс нiйö коромысла вылö, плавока оськавтöн, сiдз, что ведра дор омöн и öтiк воть мымда бокö эз плеснитчы, иньдöтчис тöдса керку ладорö. Соравны тöдса нывкасö зонкаыс пöрисьвевья ни мамкöт, ась нельки ылiсянь, öнi некыдз эз ни позь. А Полина вылын зонкалöн тожö важынсянь ни тöдса уджалан пась эшö öтпыр тшöктiс веритны кывсьöм юöрö.

Дзик кынмöм, Аня вöрöтчытöг сулалiс аслас местаын. И кыным матöжык сибöтчис том ичмонь ва ведраэзнас зонкаэс посöдз бердö, сыным нывкалöн вывтырыс сайкалiс сё öддьöнжык да öддьöнжык. Кутöм обидасянь да сьöлöмшогсянь сöдзöм синваэзпыр охота вöлi чирöстны-горöтны быдгоршись мыйкö сэтшöм жö зубытö да курытö, уськöтчыны да вын сорöн панöвтны ичмоньлiсь ва ведраэзнас посöдз дынö сибöтчöм. Но кинкö одзын кытшöмкö недолытсянь керны сылö коланасö совестьыс сё жö эз сет. Этасянь нельки местаись вöрзьöтчыны вын сылöн эз тырмы. Сöдзöм синваэз пыр посöдз ладорас видзöтiкö Аня сымда и керис, ас кежас шувлiс: «Былись, сiдзкö, былись, былись, былись». И вöлись сэк, кöр ичмонь, тыра ведраэзнас пельпон вылас, поспу бöрсянь поспу, кыдз нарошно мыччасьöм могись сё одззамоз плавока тальччалöмöн, кайис вывлань, оськöв кыным бöртi, падмытöг-кышасьтöг вуджис порог да сайöвтчис син одзись ыбöс коласас, нывка дзик саймис, бергöтчис бöр, кок увтсис мусö кывтöг-адззытöг котöрöн уськöтчис гортас. «То тай вöлись кытöн стыд-позорыс. А мый, эшö кö сэксяыс йылiсь, кыдз вöлi, быдöнныслö Павелыс висьтасяс? Эта бöрсянь сысянь быдöс позьö видзчисьны. Сэк эд кöть синнэтö ни эн осьт. И гортö, тöдса отирыс коласö, некöр он ни мыччись».

Стыдсянь да зонкаыс вылö кутöм лöгсянь сотчан-öгралан чужöмбана, Аня бертiс гортö, уськöтчис комись ольпась вылö. Но некытшöм синва эстöн эз ни отсав. Сэтчö жö курыт-зубытсö содтiс ас кыввезнас и нывкалöн мамыс.

— Сiдз и мунiн жöник саяс, лöсьöтчин, лöсьöтчин да? Мыйлö нö колiс пинтиклюшкалö бöжнат öвтны, не мунны дак? Кык год сьöрна эд, стыдтöм тэ, совестьтöм тэ, зонкасö ылöтiн. А кин ноко вот отир смекас кольччис? А мыйöн сiя тэныт не жöник вöлi? Мыйöн тэся куже? Зонкаыс эд, кутшöм бы эз вöв, сё ни зонка. И тэ сы местö додяс сё ни он пуксьы да корасьнытö он мун. А сiя?.. Мымда этöн каднас отсасис. Эд сiя тэныт гортö и пессö вайис да пилитiс-поткöтiс, и турунсö пыртлiс-лэбталiс, и йöрсö, киссьöмсö, вочис, и керкусö тэ понда вичку кодьö стрöитiс. А öнi мый? Поди, городсис — гортiсь пышшин да — мöдiн буржыксö адззыны? Но и кошшы öнi буржыксö, адззан дак. Мый понда нö сэк эстöн уливайтчан-горзан, синваэтö кисьтан? Мун да кошшы буржыксö. Видзöта вот ме, кутшöм бурö да кодяö, кутшöм кужись-вермисьö тэ меным сэтчинiсь вайöтан.

— Да олас я эшö тэнат кодя зятьыт сэтшöм кульвугырыскöт? — эз вермы видзсьыны одзлань да горöтчис Аня паныт мамыслö. — Вот адззылан, и годсö оз кыскы, бöр янсöтчас.

— Не тэ кодь да. Ог тö-ö-öд. Янсöтчас, натьтö, да тэ сьöрö кинитчас. Мый нö бы тэныт не да. Öмтö осьт да видзчись.

— Кинитчас. Рад эшö лоас. Вот адззылан, что оз. Ась. Ась и гöтрасис, но некöр сiя эта кульвугыркöт, эта сивöй чавканыскöт оз ов! — Сьöлöм шогсянь, обидасянь да мамыс зубыт кыввезсянь, кыным одзлань Аня öзтiс асьсö сё öддьöнжык да öддьöнжык, мед кöть эта басниöн пöдтыны мымдакö мамыс син одзын ассис стыд-позорсö. — Позьö разь сэтшöм нярьянсö, гырсö сэтшöмсö, кöда и тальччö и оз, мекöт ордчöн сувтöтнытö? Да кытшöм, батi, эз и вöв эта вотöдз, кинкöт эз и кыскась. Тöда ме, кытшöмöсь медас велöтчöны. Не сэтшöм бы вöлi, дак некöр бы йöз жöникыс вылö, тöдтöмыс вылö, эз и пысась. Тöн бытьтö тöдсасисö, талун свалитчисö и век пондасö овны. Кысь тэ, мама, сэтшöмсö кывлiн? Да этö жö Пашкаыс нарошно дзир, нарошно сiдз керис, мед меным досадитны. Но и ась. Видзöтам вот, мый дырна нiя оласö.

— И оласö. Красуйтчасö-оласö. А тэ öнi видзöтлы боксяняныс, юрат эз тырмы дак.

— Да вот адззылан — озö олö, эстöн ме и пукала, — горöтчис Аня койка дорыш вывсянь.

— Пукав. Шöммы нянь шöмöс моз. Меным тэ дынöдз некытшöм дело сэсся абу, — öвтыштiс кинас Майбыр Парась нылыс ладорö. Мед не нюжöтны одзлань абутöм баснисö, «не пырны весись грехас», сiя кышыштiс вылас вевдöрись паськöм, петiс керкусис.

Кыдз да мый бы Аня эз думайт зонкаыс гöтрасьöм йылiсь, кыдз эз верит ас кежас да аслас думаэзын сы янсöтчöмö, терпитны син одзын лоöмсö вын сылöн эз судз. Сiйöн и видзчисьны праздниклiсь чулалöмсö гортын сiя эз понды, сiя жö лунö, рытъявыв кадö мунiс бöр. Но зонкакöт пантасьöм вылö надейтчöмыс сiйö и эта бöрсянь эшö эз коль,

XXII

Чулалiс кад. Арыс вежсис тöв вылö, тöлыс — тулыс вылö. И дзир Анялöн зонкакöт пантасьöм йылiсь думаэс некытшöм мöдiк вылö кытчöдз эз вежсьö. Нывка видзчисис одззамоз, что вот-вот кытшöмкö лунö сы öшынок дынын очередяс сулалiсь отир коласын казялас и сiйö, кöдö видзчисис, сэтöн жö нетшкöвтчас местасис да уськöтчас паныт.

Медзубыт эта видзчисьöмыс вöлi тулыснас, кöр нельки öтöрись руыс саймöтö пыд узянiсь том сьöлöм, дзирдöтö да öдззöтö вир, уськöтö тöдвылö быдöс вöлöмсö да зорöтö ылöсын виль мечтаэз. Но нельки сэк öтпырись зонкаыс эз мыччась.

Отпускыс усис турунасян страда вылö. И кытшöм бы эз вöв стыд мыччисьны тöдса отир син одзö, кыдз бы эз пет полöм кывны ны басниись ас йывсис неколана да небасöк слава, мамыслö отсасьöм могись гортö сё жö ковсис локны. И ась гортын чулöтöм кад коста отирас нывка кодьöн и эз петав, сiя тöдiс öтiкö, колана мортыс, сылöн мортыс, кöда öнi и узьö-олö мöдiккöт, ордчöн сэтöн жö. И сыкöт пантасьöмыс, кöда вермас лоны, шогмыны нач видзчисьтöг, кöть кöр, быд оськöв вылын, ыбын ли гортын, и полöтiс, и гажöтiс — быдöс öткоста. Но петiс сiдз, что этöн каднас нылöн туйезныс некытöн нельки öтпырись эз поперегасьö. Эта местö нiя жö луннэзö кывсис дзир öтiк гажтöмтан юöр: зонкалöн иньыс челядясьöм.

— Адззылiн вот. И годсö эз ештö овны, а сiя сылöн ныв ни торскöм. А тэ меным эшö баитан — оз олö, — пондöтiс баснисö нывкалöн мамыс. — Да сiя жö ассис иньсö Полинарья Микайлöвнаöн оз я кö величайтö, колö кö тэныт тöдны дак. Некинлö и видзöтны оз сет. Вот. Сэтшöм мужикыскöт... — дивуйтчöмсяняс Майбыр Парась неöтпыр клопнитiс боккес кузя, — ...сэтшöм мужикыскöт бы да öшö не овны.

— Годсö эшö эз олö. Сизим пиянöн, овлö, янсöтчöны. Ась потласьö, абу жаль.

— Сiдз янсöтчывлöны, да не быдöнныс. А тэ öнi и видзчись нылiсь янсöтчöмнысö, кöть гагсявтöдз.

Одзлань этна кыввез вылö и горöтчынытö кольччис нем. Эта сорöн Анялö и ковсис бертны городас бöр.

Сэк кежö коланаыс местö янсöтчис мöдiк морт — городiсь хозяйкалöн куимдас годся да кык челядя зон Сашка, кöдö дугдывтöг юöм кузя иньыс ас дынсис вашöтiс.

Кодувья Сашка часто кежавлiс мамыс ордö и эта вотöдз, мукöд коста кольччывлiс нельки узьны. Сэк ни тöдчис-тыдалiс, что мамыс квартирантка вылö сiя видзöтлö дульсö ньылалöмöн да быд коста пондöтчö бы сыкöт орсны. А эстöн зонка вуджис овны мамыс дынö и видзчисис, тыдалö, дзир колана кад.

Кынымкö лун бöртi сiя жö кодöн бертiс удж вывсянь ойшöр гöгöр, кöр Аня узис ни. Кухняын чöвтчöм бöрсянь Сашка юасьтöг-висьтасьтöг пырис нывкаыс жырö да силком пондiс пелитчыны сы бокö.

Оз позь висьтавны, что аслас жырсянь хозяйкаыс сымдасö эз кыв, но öвны этаись зонсö сiя мылякö эз пондыв. Быдöс, тыдалö, керсис ас коласын одзлань баитчöмöн ни. Лэбтыны ой кежö керкуас шум нывкалöн охота тожö эз вöв. Кыдз некыдз зонкаыс вöлi гортын, мамыс дынын, а Аня ны ордын дзир квартирантка — йöзын. И вöтiс сiйö эстöн сiя жö историяыс, кöда вöлi нывкаыскöт годöн одзжык Лолог ю дорын.

Ойбыт сьöрна пессьöм-мырсьöм бöрын ашынас ни этö квартирасö ковсис кольны. Бур, что сэк местаыс сылö адззисис асланыс неыджыт общежитиеын, сэтшöм жö том да петавтöм эшö нывкаэз коласын.

И вились чулалiс одзлань кад. Гожумыс вежсис арöн, арыс — тöлöн да тулысöн. Дзир нывкаыс оланын нем эз вежсьы.

— Да пет тэ мöдiк сайö. Тыр тай городас зонкаэс. Мый тэ сiйö, гöтырасö, деревнясис видзчисян? Сё ни сiя ассис семьясö оз чапкы да тэ дынö оз лок, — кыным одзлань, сё частожык баитлiсö öтлаын олiсь нывкаэз, кöдна тöдiсö Аня сьöлöмшог йылiсь.

— Тi эд од тöдö. Вдруг кутас да и локтас, — ас вылас сералöм могись ни нарошно баитлiс нывкаыс.

— Тэ любитöм увья? Пöрисьман видзчисьнытö. Тэнат любитöмыт — не вевтöс. Вöлi бы квартира благоустроеннöй, то ли керкужуг аслат, дак эшö бы, батi, позис надейтчыны. А сытöг... и думайтны нем.

Аня öнi этö и ачыс ни вежöртiс. Вежöртiс, что зонкаыс вылö аслас надейтчöмын сорасис. Городас олöм коста сы дынö зонкаыс сiдз öтпырись и эз кежав. А юöррес, кыным одзлань, локтiсö сё гажтöмжыкöсь. Куим год бöртi кывсис, что зонкалöн деревняас чужöм зон, эшö год бöртi — мöдiк. Сэксянь нывка, сьöкыт сьöлöмöн, вöлиськö и öвтыштiс сылань кинас, да, кыдз велöтiсö-туйдiсö аслас подругаэс, пондiс видзöтлыны мöдiккез вылö. А городас, кыдз баитiсö нiя жö, зонка отирыс и былись вöлi тырмöмви. Да и думайтны кö сы удж сьöртi, дак тöдсасьнытö позис быд лунö, вöлi бы охота.

Сэк кежö нывкалöн сiя и былись вöлi ни. Но вöлi сы мывкыдын этася эшö и мöдiк тор, полöм, а эта увья асьсö видзöм. А эта аскодьöм мывкыдыс йитсьыны сылö перыта некытшöм зонкакöт эз сет. Вöлiсö нывкаэз, нельки Аняыс тöдсаэз коласiсь, кöдна кытшöмкö зонкакöт тöдсасьöм бöрсянь сiя жö лунö вермисö мунны сыкöт киноö нето театрö, танеццез вылö нето ресторанö. Аня жö, кыдз бы сылö эз кеймисьö, кыдз эз корö, керны сымдасö медодзза жö лунсянь некыдз эз вермы. Мед лысьтны керны сымдасö кытшöмкö зонкакöт, нывкалö етша вöлi тöдны сылiсь ним. Сылö колiс адззыны сiйö быд ладорсянь кыдз ки долонь вылын: кинкöт да кыдз олö, кинöн да кытöн уджалö, кытшöм ёрттэзкöт тöдчö. Но нельки эта бöрсянь мунны сыкöт кыкöн киноö нето театрö сiя эз лысьт. Эта понда колiс, мед сiйö эшö кольлалiс кинкö подругаэз коласiсь. Эта увья часто и вöвлi сiдз, что недыр мыйись сыкöт тöдсасьöм бöрсянь унажык зонкаэс кежлiсö сы дынiсь бöр и сэсся некöр эз ни мыччасьö.

Не етшажык быдöнныс коласiсь нывка кежöтлiс ас дынсис и ачыс, частожыксö нiйö, кöдна быд лун юисö, кöдна некытöн эз уджалö, кöдна вöлiсö гöтыраöсь и кöдна янсöтчöмöсь да вештiсö алименттэз. Некинöс ны коласiсь сылö эз ков. Пантасьлiсö уна и пукалöм бöрсянь, да эшö сэтшöмöсь, кöдна тöдсасисö дзир öтiк ой чулöтöм понда. Некинкöт сэтшöммес коласiсь нывка и баитны эз думайт.

Пантасьлiсö морт кыным и сэтшöмöсь, кöдналö нывка гленитчис не только öтiк ой кежö да кöдна и сылö аслыс мыйöнкö тожö гленитчисö. Сэтшöммес и корасисö сiйö ас сайö, мед гижсьыны, öтлаасьны да пондыны овны öтлаын. Вот кöть бы, шуам, сiя жö художник Андрейыс, кöда олiс мамкöт асланыс керкуын. Зонка эз дышöтчы вöтлiсьны нывка сьöрын быдса год сьöрна. Этöн каднас ны коласын ештiс ни зорамны кытшöмкö йитöт. Но видзис кö мый Аняöс сыкöт öтлаасьöмись, дак этö сiя, что зонкаыс уджись нывка нем эз вежöрт. И ась сылöн картинаэс, кöдна коласiсь мукöдыс вöлiсö кончитöмöсь ни, а мукöдыс эшö уджын, мыйöнкö нывкаыслö и гленитчисö, быдсöн сылiсь уджсö примитны серьёзнöй местö сiя эз вермы, лыддис кытшöмкö челядьлöн кодь орсöм туйö. И нельки деньгасö, кöдö зонкалö вештiсö сы удж понда, былись шедтöмöн Аня эз лыддьы, адззис этаись аслыс кытшöмкö бöбöтчöм. Нывка понда вöлi бы унаöн буржык, ежели бы гленитчись сылö зонкаыс вöлi не художникöн, а кытшöмкö слесарьöн, сантехникöн, шофёрöн нето трактористöн. Нылiсь уджсö сiя адззис, вежöртiс да лыддис öддьöнжык коланаöн. И эз кö нывка примит коланаöн да эз куж донтны зонкалiсь удж, эз вöв некытшöм интерес кывзыны эта удж йылiсь и сылiсь басниэз. И нельки сэтшöм гырись ниммез, кыдз Суриков, Поленов, Репин, Айвазовский да уна мöдiккез, кöдна йылiсь сэтшöм восторженнöя баитлiс зонкаыс, Аня понда вöлiсö нач нем туйö. Ны йылiсь да ны удж йылiсь басни коста нывкаöс пыр кутлiс сэтшöм гажтöм, что чожа мый сiя пондывлiс сунавны. А эта кузя и Андрей тожö обижайтчис.

Но янсöтiс нiйö öтамöд коласын не эта причинаыс, а нач мöдiк тор. Кыдзкö öтпыр ас коласын быд берся йылiсь сёрнитöм коста зонка юöртiс, что Анялöн öддьöн бытшöм да аккуратнöй классическöй фигура, кöдöн сiя вермис бы лоны натурщицаöн.

— А мый эта сэтшöмыс? — эз вежöрт перво жö да юалiс паныт нывкаыс. А кöр зонка висьталiс, мый эта сэтшöмыс и кыдз да мый сылö эта понда колö керны, öтiк эта баснисянь ни нывкаöс чапкис жарö. Сiя пымалiс люзь, дзик кöтöтiсö.

— Мый нö тай не да. Понда, натьтö, ме сымдасö, — поперегалiс Аня зонкалiсь баснисö, сы коста жö ас кежас думайтiс: «Тырмас месянь и сiйö, что некытшöм мужикöс эшö ог тöд, а насильно кыкись ни нагöлеч чöвтлiсö». Эта рытö костi янсöтчöм бöрсянь сэсся зонкаыскöт сiя эз ни пантасьлы.

Öддьöн гленитчис Анялö и драмтеатрись том актёр, кöда спектакллез вылö сiя мыдзтöг ветлöтiс быдса год сьöрна. Öддьöнжыксö, натьтö, сiйöн, что чужöмнас зонкаыс вачкисис Павел вылö.

Гожум кежас тöдсасисö. Но кытшöмöн зонкаыс мыччассис сцена вывсянь, ордчöн нывкаыскöт сэтшöмнас сiя и матын эз вöв. Сэтчö жö кывсис, что эта вотöдз сiя кынымиськö вöлöм гöтыра ни. А кöр, куимöтпырись пантасьöм коста зонка казьмöтiс отпуск кежö море дорö кыкöн ветлöм йылiсь, нывка вежöртiс, что этася дыржык кежö зонкаыслö сiя оз ков. Вежöртана, что эта бöрсянь и сыкöт пантасьлöмись ковсис откажитчыны.

XXIII

Бöрьянас быдöнныс коласiсь вöлi Сергей. Тулыснас, шоныт да гажа цветитан кадö зонка бертiс служба вывсянь. А кöр тöдсасисö, гленитчис нывкаыслö, кыдз некин эта вотöдз. Бытшöм, ён да лöсьыт вывтыра, паськыт кымöса, югыта шыннялан сина да осьта чужöма, сiя быд нывкалiсь вермис вöрзьöтны сьöлöм. Сыкöт тöдсасьöмыс и Аняöс тожö гажöтiс. Быдöнныс коласiсь сiя вöлi дзир öтiк, кöдакöт нывка лун кыным бöртi лысьтiс мунны киноö, а сэсся сыкöт пантасьöмсö пондiс видзчисьны быд лун. Полöтiс сiйö эта дружитöмын öтiк тор. Зонкаыс кынымкö годöн нывкаысся вöлi томжык. А нывкаэс городас и сытöг тырмисö: нем эз видз пантавны зонкаыслö кинöскö томжыкöс да мыйöнкö нельки буржык-басöкжыкöс. Этасянь сыкöт быд янсöтчöмыс мыччассис нывкалö медбöрьяöн, и эта бöрсянь сiя дугдывтöг думайтiс дзир öтiк йылiсь, локтас эшö сы дынö зонкаыс или оз. Эта и гажа, а öткоста и полöтанакодь думаэзын, кыдз чад-кольмöтын и чулавлiс Анялöн быдсöн, кузься-кузь, дзик год сьöрна, уджалан лун, кöд коста пантасьöмсö видзчисьöм кузя сiя сэтчöдз мыдзлiс, что рытъявыв кадö öшынок ладорас очередьын сулалiсь отир вылö и синнэсö лэбтыны охота эз ни вöвлы.

Эз вöв нывкалö нем кокнитжыкыс и удж бöрсянь. Сибöтчывлiс рыт да пантасьöмлöн кад. И öнi ковсис жугдыны юр сы вылын, кыдз кужны-вермыны сэк кежö пантасьны сiдз, мед мыччасьны отирыс одзын, а медодз, вежöртана, зонкаыс син одзын некинся мöдiкся не умöльжыкöн. И ась, кыдз вывланьын вöлi казьмöтöм ни, сы «классическöй» шöрöт сувда, аккуратнöй вывтыр вылын, кöда шогмис-зорамис тöчитöмкодь басöк кикокись, öтмоз тöдчана бöр-моросiсь, коланави вöснитик косiсь да горделивöй чатырöн новйöтан юрись, кöть кытшöм паськöм пукалiс вексö бытшöм-басöка, а öтнас овтöн нывка пыр вынсьöтчис небны ас вылас быдöс дзир медбытшöмсö, медбасöксö да меддонасö, полöтöмöн сылö сё эшö мыччассис, что и этаын эшö вермас лоны мыйкö не сiдз, кыдз колiс бы, и кытшöмкö, ась неыджыт да не öддьöн тöдчана торöн ештас усьны зонкаыс син вылö. Сiйöн, кöр нывка кыскывлiс да гладитлiс рыт кежö бордовöй нето изумруд рöма кримплен, лöзчача нето öмидз рöма шёлковöй шифон, нето киськалöм, кыдз видз пасьта, селько-белько чачаэза крепдешин, эшö вылас везтытöдз видзöтлiс вежалунся паськöм вылiсь быд вурысок-сунисоксö, а кöр пасьтавлiс вылас, зеркало одзын öтмöдöрö бергавтöн, сiйö жö эшö синйис быд ладорсянь: одзсянь и бöрсянь, вылiсянь и улiсянь. Лöньсьывлiс Аня дзир сэк, кöр нем тор эз позь казявны сы паськöм бердiсь сэтшöмсö, кöда нетöдчана жельöн вермис бы усьны то ли зонкаыс, то ли кинкö мöдiк син вылö. Но нельки сэк, кöр нiя пантасьлiсö да зонкаыс, кыдз и пыр, одзлань ни нюжöтлiс сылö кисö, оськöв кыным ылына öтамöд дынсянь сулавтöн, нывка видзчисьлiс сэтчöдз, кытчöдз мöдыс эз нёджжöвтлы сы вылö юрсянь кок увтöдз. И вöлись сы бöрсянь, кöр зонка тырппез вылын да сы синнэзын, кыдз шондi югöр, сывлiс-паськавлiс шоныт да гажвевья шынньöвтöм, а ачыс сiя сэтшöм жö гажвевйöн шувлiс: «Здорово, менам королева», сы кодь жö паныта шынньöлöн нывка оськöвтлiс сы ладорö да сетлiс зонкалö кисö.

Полöтiс Аняöс и сы подругаэзлöн, кöднакöт сiя олiс общежитиеас, завидуйтöм, лоны сы местö ордчöн Сергейкöт кöдна коласiсь (а вöлiсö нiя быдöнныс даскыным) и öтiк бы, натьтö, эз откажитчы. Этö нывка адззис ас синнэзöн да вежöртiс ас ылöсöн. Мукöдыс ны коласiсь эз полö баитны эта йылiсь веськыта. А нiя «новйöмовöйес ни» (быдöнныс коласын и сэтшöммес кынымакö тожö вöлiсö) нельки лысьтiсö корны нывкалiсь зонкасö «не совсем», кыдз нiя баитiсö, а кöть «одзöсöн, öтiк ой кежö», кöть одзлань ни, натьтö, и тöдiсö, и вежöртiсö, что этöн каднас пöттöм аднысö век кежö сё ни оз пöткöтö. И мед дзир вермыны сайöвтны эта увья асьсö, а öтлаын и ассис зонкасö, недыр мыйись асланыс тöдсасьöм бöрсянь нывка зонкаыслö висьталiс, мед ны ордö общежитиеас сiя сэсся эз мыччась. Асланыс пантасьöм кежö местасö нiя пондiсö бöрйыны одзлань. И öнi нывка вовлiс колана местаас ачыс да öтнас, некытшöм кольлалiсьöс ас подругаэз коласiсь эз ни кошшы.

Сэксянь жö дугдiс полöтны Аняöс и зонкакöт öткöн ветлöтöм. Сыкöт нывка кыдз лунся югыт коста, сiдз и сёр рытöн лысьтiс мунны быдлаö, кытчö вöлi охота да кытчö нуöтiс зонкаыс. Кыдз ылöснас, сiдз и сьöлöмнас Аня и кылiс, и веритiс, что зонкаыс сiйö немын оз обидит, и некинлö мöдiклö оз сет. Кыкöн нiя вöвлiсö не только киноын да театрын. Часто кыкöн жö ветлiсö танеццез вылö. Но мый гленитчис нывкалö медöддьöн, дак этö зонкаыскöт ыбöт-вöрöт ветлöтöм. Эта увья унажык гожумся кад чулалiс нылöн öтласын город сайын.

Ась зонкаыс год кынымöн и вöлi томжык, сы басни сьöртi несьöкыт вöлi вежöртны, что олансö быд ладорсянь сiя тöдö бытшöмжыка: унажык адззылiс, лыддьöтiс, велöтiс. Быд сы явленнё йылiсь Сергей кужис-вермис думайтны ас юрöн, юралiс ас вежöрöн, примитiс олансö сэтшöмöн, кытшöм сiя вöлi. Сэтшöм жö оланын сiя кошшис местасö и ас понда. Этасянь быд думаын да басниын зонкаыс вöлi вежöртана.

Тöдсасьöмныс бöрсянь медодзза кадö Сергей баитлiс, что мунас велöтчыны одзлань педагогическöй институтö, кöдаись медодзза курс бöрсянь сiйö босьтiсö армияö.

— И сы дырна тэнö ковсяс видзчисьны? — паймыштöмöн юалiс сэк нывкаыс, мый некинлiсь мöдiклiсь аслас одззася тöдсаэз коласiсь юавнытö некöр бы эз лысьт. Нывка годдэс Анялöн чулалiсö и эта сiйö полöтiс. Бытшöма этö вежöртiс и ачыс зонкаыс. Висьтавны мыйкö бытшöмжыкö сы юасьöм вылö сiя кадö Сергей эз вермы. Сымда и горöтчис: «Видзöтам эшö», да эта вылын и дугдöтiс баснисö. А месяц бöртi, кöр нiя öтлаын чулöтiсö видз вылын рыт да мыдзкодьöсь и гажаöсь, иньдöтчисö город ладорö, зонкаыс жö бöра шутка местö горöтчис:

— Дöс тэ, королева менам, тыдалö, ладсис менö сорин. И велöтчынытö одзлань колö бы, и тэнö öштыны жаль, ог вермы. Сё ни эд сы дырнасö видзчисьнытö он понды.

Кыв Аня сэтшöм баснисö кинсянькö мöдiксянь, сiя вермис бы и обидитчыны. Вермис бы нельки öвтыштны киöн, бергöтчыны да и мунны, мед эта бöрсянь век сьöрна сэсся сэтшöмыскöт не пантасьны ни. Но Сергей сы понда вöлi не сiйöн зонканас, кöда вылö вот сiдз вот позис öвтыштны киöн. Быдöс местö Аня, дзик виноватöй мыйöнкö зонкаыс одзын, дзир юалiс:

— А мый сэк керны?

— Да вот и ме бöрья кадö сiйö жö думайта, мый керны? Но кыкыслö öтласа олан йылiсь öткöн думайтны оз позь. Сэтöн кыкöн и колö.

— А кыдз сэтöн?.. Ме вежöрта — тэныт велöтчыны колö. Дак велöтчы. Мымдакö, батi, ме верма отсавнытö. Ме жö уджала.

— Да не, Аня. Не дело сэтшöмыс. Небасöк сiдз лоас, кöр тэ пондан уджавны, а ме — велöтчыны. Янын овтöн сiдз, натьтö, бы и позис, но öтлаын овтöн — оз.

— А кыдз эшö сэк позяс?

Быднёж думайтöм, баитöм бöрсянь бöртiжык сувтчисö сы вылын, что адззисяс кö места кытшöмкö городскöй школаын да примитасö кö удж вылö, зонка пондас öткоста уджавны и велöтчыны. Но öтiк условие нывка одзын сiя сё жö сувтöтiс, мед и сылö тожö пондыны велöтчыны одзлань.

Öтнас овтöн одзланься велöтчöм йылiсь Аня кыдзкö эта вотöдз и эз думайтлы. Но öнi, кöр эта йылiсь пондiс баитны зонкаыс, поперечитны сылö нывка эз понды, думайтiс. «Ковсяс кö тэкöт öтлаын олöм понда, ме и кык институт кончита». А горöн паныт шыасис:

— Позяс и велöтчыны... отсалан кö тэ меным экзаменнэс кежö лöсьöтчыны.

— Кытшöм басни? Вежöртана, отсала, öтлаын овтöн позяс быдлаын öтамöдлö отсавны.

Öтлаасьöм да одзланься велöтчöм йылiсь ас коласын баитчöмыс йитöтiс нiйö эшö öддьöнжык. Чожа мый Аня да Сергей ветлiсö загсö да колисö заявленнёэз, мед месяц бöртi гижсьыны, öнi повтöг ни позис не только думайтны быдыслö ас кежас, а и баитны öтамöд коласын öтласа олан йылiсь, сувтöтны одзлань кежö öтласа планнэз. Эта гажöтiс нiйö, кыдз гажöтö быдöс том отирсö радейтöм да öтласа олан бердö кыссьöм.

Аня и былись любитiс, любитiс ас оланын мöдöтпырись, но первуись сэтшöм повтöма да видзсьытöг, что ассис медодзза любитöмсö, кöда вöлi Павелкöт, ордчöн этакöт и матö сувтöтны эз позь. Причинаэс эталö унаöсь. Öткö, натьтö, сысянь, что сiя годдэзö нывкаыс вöлi эшö том да полiсь. Мöдкö, томувья жö сiя эз чайтчы тöдны бытшöма, сiя я Павел мортыс, кöдö Аня вермис бы сорасьтöг бöрйыны ас понда быдöнныс коласiсь. Эд нывка оланын сiя вöлi медодзза, и сувтöтны ордчöн сравнитöм могись вöлi эшö некинкöт. Куимöткö, кыдз нывка öнöдз вежöртiс ни, кыкнанныс нiя ылын не öтмоза вермисö саймöтны-öзтыны ас дынö сы сьöлöмын радейтöм, мед эта радейтöмöн паныт локтöм коста сiйö нем эз полöт. А быдöс этö сысянь, что нывкаыс паныт локтöм коста нiя вермисö видзны асьнысö ылын не öтмоза. Эд колiс Анялö сэк, Лолог ю дорас, Павелöс жалейтöм могись повтöмжыка сибöтчыны сылö паныт, кыдз мöдыс эз вермы видзсьыны да сэтöн жö кутчисис мöдiк бердö. Нывка и вежöртiс, что эта понда сэк сылöн вöлiсö аслас причинаэз да интерессэз, но сiдз кыдз нiя вöлiсö дзир сылöн öтнаслöн, а не öтласаöсь кыкнанныслöн, нывкаыс интерессэзлö нiя сувтiсö паныт.

Вежсисö нывкалöн этöн каднас и интерессэз да обстоятельствоэз. И ло öнi сымдаыс Сергей ладорянь, панласьны-дорйисьны эта увья одззамоз нывка, вежöртана, некöр бы эз понды, сiдз кыдз кыкнанныслöн эта коста öтамöд дынö интерессэс вöлiсö öткодьöсь — öтлаасьны, кöдна нельки быдöс ны коласын лоöмыс бöрсянь, лоны кö бы сымдаыслö одзлань, некыдз да немымда эз бы вежсьö. Этö Аня тöдiс и вежöртiс, сiдзкö и веритiс зонкаыслö, кыдз аслыс. Этасянь сiйö нем и эз полöт, сiдз кыдз сувтны паныт зонкаыслö аслас веритöм коста некытшöм нужда эз вöв.

Не етшажык нывкаысся веритiс быдöсö и ачыс зонкаыс. И сы йылiсь, мый вермис бы лоны ны коласын не ас кадö, кыдзкö повзьöтны да татшкыны ас бердiсь нывкасö, зонка сылö некыдз да немöн, нельки öтпырись эз казьмöт. Тшöтш эта и отсалiс Анялö радейтны сiдз, кыдз сiя вермис этö керны первуись ас оланын, повтöг да видзсьытöг.

Бöрья месяцсö янын овтöн нiя пантасьлiсö чуть я не быд рыт кежö. А мед не мозолитны отирлiсь син асланыс тöдчöмöн, не петкöтны быдöнныс син одзö ассиныс радейтöм, (сiдз керöны дзир пода), нiя частожыксö петавлiсö город сайö: видззез вылö, вöрö да ю дорö. Сэтчин кытöнкö адззисьлiс гленитчанажык места, кытöн нiя вермисö пукавны нето куйлыны быдса чассэзöн, сёрнитны ас коласын быдöс йылiсь, мый пыравлiс юрö. Эта коста зонка нывкасö кыдзкö сё ни сибöтлiс. То сiя жагвыв каттис киэс коласын сылiсь юрсисö, то час сьöрна вермис вöдитны ас киын сылiсь учöтик да басöк кисö, то сiйöн жö вель дыр вермис малавны пельпон кузя. А кывны да кывзыны ас вывтырöн зонка килiсь рам, лöнь да шучкöп йиджана сибöтчöмсö нывкалö пыр вöвлi долыт, нельки мыдз некытшöм эз кут. Сы коста жö эта сибöтчöмыс öзтывлiс сы пытшкын кытшöмкö öнöдз эшö невежöртана öд, саймöтлiс охота лоны зэв сы бердын. Сэтшöм кадö, чöлöмöн, дзик он коста, нывка кывзiс да видзчисис, кöр зонкаыс, медперво жмитыштас ас бердас, то ли ачыс жмитчыштас зэв-зэв сы бердö, а сэсся бергöтас асланьö сылiсь чужöмсö, мед пондыны окавны. И кöр зонкалöн тырппес сибавлiсö сы тырппез ли, тшöка ли, ныр ли, синнэз ли бердöдз, эстöн Аня видзны асьсö дугдывлiс ни. Нывка перыта каттьыштлiс ассис киэсö сы голя бердö, мыдзтöг пондывлiс окавны паныт. И окавлiс кö сiйö зонка пыма да небыта, то ачыс Аня тырппезöн быд сибöтчöм коста сотiс, дзик калитöм кöртöн, мыйсянь окалöм местаэс зонка тшöка да голя вылын гöрд видзисö не öтiк лун сьöрна и кöднö некытшöм матег, вежöртана, эз мынöт.

Эта коста нiя часто вунöтлiсö нельки кад йылiсь и вермисö окасьны сiдз, кыдз баитсьö, садь быртöдз, кöда бöрсянь нельки коккез вылö сувтны вын эз кольччыв, а юр дикмöмсянь мушарыс пондывлiс бергöтчыны онняюрöн.

Эта жö окасьöмыс вайöтлiс сэтчöдз, что нач ни не кöркöся полöмсянь, а öзтöм-саймöтöм охотасянь нывка быд коста думайтлiс: «Вот часöт быдöс и лоас». Сiя нельки видзчисис, что вот-вот зонкалöн киыс кытшöмкö кадö жагвыв лэдчисяс сы морос бердiсь увлань, вештас мешайтан паськöм, а сэсся сибалас колана местаöдз, коланаöн жö пырас сы пытшкö, мед этöн пырöмнас то ли ладзöтны, то ли öзтыны эшö вынöнжыка сыын жаралöм öд, кöдасянь дикмытöдз бергöтчö юр, пемдö ылöс, а ачыс сiя, дзик би вылын, сотчö быдсöн вывтырнас. Аня видзчисис. Но зонкаыс, кöда вöвлi öзтöм-калитöм сiйöн жö öднас, нывкасö жалейтöмись керны сымдасö эз тэрмась. Кусöтны-пöдтыны ас пытшкын сэтшöм вынöн саймöм охотасö да вермыны видзны асьсö эта неколана (кыдз сiя лыддис ачыс) оськöлiсь, сылö вöлi тожö öддьöн сьöкыт. Но сiйö полöтiс öтiк тор — ежели керны, то ли кöть пондывны керны сымдасö öнiсянь, этöн сiя нывкасö вермас обидитны. Сiдзкö, сiйöн жö обидитас и асьсö. Вöлi этася и мöдiк полöм — кытшöмкö причина увья эта бöрсянь нiя вермасö öштыны öтамöд дынö интерес одзлань кежö. А эта некöдыслö ны коласiсь тожö эз ков. Сы увья öтпырись и локтiс сэтчöдз, кöр окасиканыс саймöтöм охота да зонкалiсь колана сибöтчöмсö видзчисьöм коста нывкаöс выныс колис.

— Серёженька, ог сэсся вермы, öзйи ме, сотча. Ачыт тöдан, мый керан, сiйö и кер, — гырк палитан öдсянь орласян голосöн жарöн шушкыштiс нывкаыс окавтöнняс зонкаыс пель одзö, öткоста янсöтiс сы голя бердiсь сырлёль мунöм киэсö, пöрöтчис гатш, бергöтiс мöдöрö куньöм синнэза чужöмсö, осьтыштöм öмöн пыдына лолавтöн кольччис видзчисьны, нельки платье увтiсь вылына кушöтчöм пидзöссэсö эз ни сайöвт.

Кыкнанныс понда öтiк колана торся видзчисьны ны коласын одзлань кежö кыдз бытьтö кольччис нем. Но... Сы коста жö вачкисис, что öтiкся этася зонкаыс понда оланас эм мыйкö эшö тöдчанажык, коланажык, ыджытжык да донажык, кöда и видзис сiйö эта медбöрья оськöлiсь. Öшыштöмкодь эта одзын да аслас думаэз коласын — кытшöм сё жö сьöкыт овлö мортлö кольччыны век сьöрна Мортöн! — зонка видзöтöв-керис лöньсьöм-лöсьöтчöм нывка вылö, вывтыр бердас сибöтчытöг везтыштiс сылiсь куш пидзöссэсö, зубытöдз нырыштiс аслыс одзсяняс киэзнас, аслыс казявтöг вештыштiс ылöжык, бергöтчис мöдöрö, вель дыр кежö пидзöссэс коласö юрсö öшöтöмöн, пуксöн кольччис видзчисьны.

Сёрöнжык, кöр торйын öтамöд дынсянь кыкнанныс жагвыв сайкалiсö, öтамöд одзын недолытсянь чöлöмöн этö местасö колисö. И вöлись дыр мыйись, ордчöн гортлань оськавтöн, öтпыр, мöдöтпыр зонка жмитыштiс нывкасö ас бердас.

— Сьöкыт тэныт?

— Недолыт, — дженытика шыасис нывкаыс, лэдзис увлань синнэсö.

— Терпитышт эшö невночкасö. Жаль меным тэнö одзлань... вежöртан-он?

Кумач кодь вирсялöм чужöма Аня эшö увланьжык мышкыртiс юрсö, но сы коста жö эшö зэвжык жмитчис зонкаыс бердö.

— Спасибо, Серёженька. Ме быдöс вежöрта. — А одзлань, дзик дорйисьöм могись: — Этö эд окасьöмнымсянь быдöс. Оз ков сэсся сыöддьöн.

XXIV

Свадьбанас лöсьöтчисö суббота кежö. Сэк кежö Аня петiс отпускö. А сiдз кыдз лöсьöтны свадебнöй пызан да чукöртны гöссесö общежитиеас вöлi дзескыт, чулöтны сiйö баитчисö зонкаэс ордын.

Неделя сьöрна, лунiсь-лун, нывка видзсис виль гортас. Кыкöн зонкаыскöт нiя быд лун ветлöтiсö магазиннэзöт, босьтасисö: небисö аслыныс кровать да ольпась, свадебнöй пызан вылö быдкодь колана посуда да свадебшаналö козиннэз. Эта лöсьöтчöм кузя гуляйтны одззамоз кадыс эз петав. Дзир сьöд ой кежö зонка кольлавлiс нывкасö общежитиеö.

Быдöс колана лöсьöтчöмыс вöлi ештöтöм вöлись суббота панытö, кöр зонка вылын эшö öтпырись лоис меряйтöм виль костюм, галстукöн чочком йöрнöс да виль туфлиэз.

Сiя рытö ужнайтiсö сэтöн жö, зонкаэс ордын, сы аймамкöт да томжык сойкöт, Люсякöт, öтiк пызан сайын. А сёрöнжык томмез, бöрьяись свадьбаныс вотöдз, петiсö гуляйтны. Ас коласын баитчöмöн нiя иньдöтчисö город сайись Кува юлöн медджуджыт берег дорö, кöда быдöс тöдса местаэз коласiсь кыкнанныслö гленитчис медöддьöн да кытöн нiя, асланыс недырик дружитöм-тöдчöм коста чулöтiсö медуна кад.

— Ветлам эшö öтпырись том каднымкöт прощайтчöм могись. Ашын сэтчинöдз, натьтö, некöр ни лоас.

— Ветлам, конешно, эм охота дак, — поперечиттöг шыасис нывка. Город саяс оськалiсö ыббез пöлöн, кöдна пасьта сiя кадö шепасис шогдi да розъясис зöр. Рытыс сэк кежö эшö эз вöв уна, нельки шондiыс пуксьынытö эз ешты. Ыджыт да гöрд шарöн сiя öшалiс ылын вöр весьтын да мичöтiс небыт-лöнь öмидз рöмöн му, турун, сю петассэз да вöр. То öтöрсянь, то мöдöрсянь ны вылö пидзыртчис-киссис вылын енöжын öшалан ыбшаррезлöн сьöлöм саймöтан питиртöм-сьылöм, а ытшкытöм межаэз пасьта цветитан турун коласын гажöн да быд голосöн дзуркöтчисö-орсiсö асланыс «скрипкаэз» вылын гырись и поснит кöбывкаэз.

Кыдз эта гажа да лöнь рытыс, сiдз и одзланьын сибöтчан ойыс вöлiсö нылöн асланыс. Тэрмасьны талун некытчö эз ни ковсьы. Но талун зонка унажыксö мыйсянькö оськалiс чöлöмöн. Кадiсь-кадö сiя дзарышалiс вывлань, кысянь киссис ыбшаррезлöн сöстöм дзульзьöм, кывзiсис кöбывкаэз дзуртышалöмö, нёджжасис öтмöдöрсянь шыннялан лöзчача да селько-белько цветтэз вылö, мышкыртчöмöн нетшкöвтлiс туй дорись кытшöмкö öткаса турун тылöп, пиннес коласын сiйö поснита тордöм-курччалöм бöрын сьöвзьывлiс бöр, чöлöмöн ас кежас мыйкö думайттöн гажтöма ловзисьлiс.

Кытшöмкö кадö зонкалöн чöлöм-гажтöмтчöмыс усис и нывкаыс син вылö.

— Мый талун тэкöт сэтшöмыс? Мый чöлан?

— Да нем. Сiдз тай. Мый йылiсь эшö кольччö баитнытö? Быдöс ни öнöдз баитöм да... — вились гажтöм ловзисьöм сорöн шыасис зонкаыс, недырик чöлыштöм бöрын содтiс: — Сьöлöм вылын кыдзкö гажтöмкодь, топ сiйö мыйкö полöтö.

— А тэныт абу шог? Некыт оз вись?

— Да оз. Кытiсь тэ босьтiн, мед сэтшöм годдэзö менам кыткö висис? Смех эд лоас, пондыны кö свадьба панытас шогавны. Курöггес эд серавны пондасö. Висьталасö эшö: гöтрасьнытö пö повзис. — Аслас жö кыввез вылын зонка горöн ваксьыштiс, а сэсся кыдзкö аслыс казявтöг вились ловзисис ыш.

— Огö ни, батi, талун сы ылына мунö да? — Аня сувтiс, юасян синнэзöн видзöтöв-керис зонкаыс вылö. Сергейлöн гажтöмыс öнöдз ештiс вуджны и сылö.

— Анечка! Мый тэкöт? Мыйлö, кöдö оз ков? Да сьöвзьы тэ ме гажтöмтчöм вылö. Не бертны жö эта увья миянлö бöр. Нач ни не уна муннытö кольччис да. Эта мекöт, натьтö, быдсöн сы увья, что гöтыртöм кадыскöт янсöтчыны охота абу.

— А былись эд, кывзы жö, — гажмыштiс нывка зонкаыс кыввезсянь. — Меным сiйö мыйкö тожö жаль. Сымда эд ме оланын тавося гожумö бурыс да гажаыс вöлi, что нельки оз и веритсьы. Быль и быль. Думайта вот, думайта мукöд коста ас кежам, и быдöс эта меным кыдз сказкаын мыччассьö. То ли быдöс вöлöмыс топ нач не мекöт вöлi, а кинкöткö мöдiккöт. Бытьтö ме сiйö книгаись лыддьöтi нето киноись адззылi. Сэтшöмыс жö мортыскöт дзир вöтын вермас лоны.

— Мыля жö вöтын, Анечка, кöр ачыт баитан, что быдöс эта быль. Мунам, — корис зонкаыс. Сiя нюжöтiс нывкалö ассис кисö. А кöр мöдыс кутчисис сы бердö, нiя жагвыв пондiсö оськавны одзлань.

— Кывзы жö, Серёженька, мый меным часöт юрам пырис. Не босьтны я миянлö заявленнёэсö бöр? Сэк эшö год сьöрна этадз олыштам, а? Ме бы дак видзчиси, или кыдз тэ баитан — терпитi эшö сымдасö, мед только быдöс важмоз миян кольччис. Эд сэтшöм кадсö век сьöрна сэсся некöр он ни бергöт.

Жагвыв ордчöн оськавтöн, нiя петiсö ю берег дорö, сибöтчисö медвылын да бытшöма ни öнöдз тöдса местаöдз.

Сэк кежö ылын вöр сайын пондiс саясьны шондi. А быдöс сiя, мый вöлi югдöтöм сы медбöрья да вель кузя нюжалöм югöррезöн: и ылiсь вöр да ю сайись вель пасьтöн паськалöм видз, и ачыс Кува юыс, кöда öтмöдöрö чуклясян нывка чикисьöн ылiсянь нюжöтчис поперег ны син одзын, и сiя вылын да крут, тшöтш ва бердöдз усян берегыс, кöда вывсянь увлань видзöттöн нельки пыкöтасис лов да тöдчöмöн бергöтчис юр, мыччассисö сiя кадö быдыс ас местас эшö гырисьжыккезöн да просжыккезöн — видзыс паськытжыкöн, юыс — пыдынжыкöн, берегыс — крутжыкöн, а быдöс весьтын ны весьтын кокнита öшалан енöжыс — вылынжыкöн. И кыным просжыкöн мыччассис гöгöр ой кежö лöньсьöм природа, сыным öддьöнжык вöлi охота паськöтöм киэзöн жмитны сiйö быдсöн öтвыв да öткоста ас бердö, то ли жмитчыны быдöс бердö ас вывтырöн.

Чöлöмöн зонка вель дыр нёджжасис ас гöгöр, кытчöдз судзöтiс син, эшö öтпырись да пыдына ловзисис. А быдöс местö сы паськöтöм киэз коласö, кöр сiя жмитiс нiйö бöр, сюрис дзир нывкаыс. Но сiдз кыдз зонка понда сiя вöлi тожö быдöс местö, сiдз жö быдöс местö и гажöтiс.

— Мый, полан, что öтлаасьöмыс бöрсянь и бурыс миян коласын сэсся нем оз ло? Гажсö да радейтöмсö тэнчит кинкö мырддяс? Оз эд. Быдöс эта сiдз жö, кыдз и öнi, кольччас миянкöт öтлаын. Öтiкись пола — эта вылö лоас етшажык кад. Но эта местö ми лоам öтлаын. И ась етшажык лоас сiя öнняыс, сы местö лоас мыйкö мöдiк, этася немöн не умöльжык, а мыйöнкö, батi, эшö и буржык. А босьтны бöр заявленнёсö öнi небасöк ни. Быдöс жö ашын кежö керöм-лöсьöтöм и гöссесö корим ни. Эд одз ли, сёрöн ли, а öтлаасьнытö сё ни ковсяс. Мыйлö сэк асьнымöс аслыным жö сорны? Пуксьы вот — пукыштам.

Зонка лэдзчисис турун вылö, мыччалiс кинас нывкаыслö ас бокас.

— А жаль сё жö, что этöн каднас ми тэкöт öтпырись эг ештö ю саяс вуджавны, — баитiс нывка зонкаыс бокö пуксьытöн. — Видзöт вот сэтчин видзыс мый пасьта. И быдкодь гажа местаэсö, натьтö, позис бы адззывны. И вöрыс сы сайын, натьтö, öддьöн гора-гажа. Вот бы сэтчин листыс поттöн гуляйтыштны, во-о-он, — нывка мыччалiс кинас медылiсь пу йыввез вылö, кöдна сайын шондiыс неважын сайöвтчис.

— Сы ылына нельки? Да сэтчин жö край света ни, баитöны, — шутитыштiс зонкаыс.

— Но и ась. Тэкöт ме и сэтчинöдз ог повзьы.

— Но мый жö... Спасибо, менам королева. Кöркö и сэтчинöдз сибалам. Ми жö тэкöт вöлись пондöтчам овнытö. Синнэзнымöс вöлись оланыс вылö осьтiм. И кернытö эшö этöн каднас нем эг ештö, и некытöн эшö эг вöлö да нем эг адззылö.

Эстöн зонка жмитыштiс нывкасö ас бердö. А кöр мöдыс нюжöтчис киэзнас сы голя бердöдз, кыкнанныс пöрöтчисö турун вылас, пондiсö окасьны.

— Уна дзир оз ков, Серёженька. А то бöра мекöт... но тöдан эд ачыт... — паныт зонкасö окавтöн корис Аня.

Зонка и былись вынсьöтчис видзсьыны. Но талун сыын саймис эшö öтiк, нач эшö тöдтöм да видзчисьтöм нывкаыс понда желаннё. Окасьтöнняс ни öтiк кинас (мöдыс сылöн вöлi нывкаыслö юрöдз местö) зонка пöрччалiс сы платье бердiсь вевдöрись киззесö, пырис мороссэз дынöдз.

— Мыйлö тэ нiйö? — жагвыв кинас панласьöмöн шыасис нывкаыс. — Недолыт жö, кывзы. Терпитышт ни öтiк лунсö. Ашын вöлись. Адззылас эшö кинкö дак.

Недырик кежö лöньсьыштöм коста зонка видзöтöв-керис нывкаыс синнэзö сэтшöм коран-кеймисян синнэзöн, что панласьöмсис мöдыс жагвыв вештiс киэсö бöр. Зонка керис ассис. Дзескыт паськöм увтiсь сiя кыскис вывлань нывкалiсь бель чочком, кыдз парнöй йöв да капуста кöчан кодь зумыт мороссö, кöда шöрын гöрдъягöд тусь кодь юрок гöгöр вöлi непаськыт шоколад рöма кытш, жмитчис сы бердö, шонытыс бердö и чужöмнас, и тырппезнас, пондiс окавны быд ладорсянь. Сэсся сiдз жö керис и мöдыскöт. А кытшöмкö виль вöвлытöм эшö эта вотöдз недолытсянь, стыдсянь да полöмсянь эта коста нывка дзир сымда и керис — вынсьöтчис сайöвтчыны кинкö шогья киэзнас, кöть некин матын ны гöгöр эз кыв, и казявны сiйö осьта да вывлань кыскалöм мороссэзöн вöлi некинлö.

Пöттöдз окалöм бöрсянь мыйкö дырна зонка эшö видзöтöв-керис ны вылö, а сёрöнжык ачыс жö отсалiс сайöвтны бöр, гырдзза вылас нывкаыс весьтö нырыштсьöмöн, гажтöмтчöм синнэзöн, орöттöг пондiс видзöтны сы вылö.

— Мый сiдз видзöтан?

— Мед тэнö, талуннясö, пыр кежö тöдвылын кольны.

— Полан — ашын кежö ме ог ни сэтшöмöн ло?

— А сiдз, натьтö, и эм. Ашынсянь ми тэкöт кыкнанным не сэтшöмöсь ни лоам. Вот адззылан, дудiок менам.

— Умöльжыкöсь я мый я мыйöнкö?

— Да не, ме думайта. Мыйöнкö, натьтö, эшö буржыкöсь.

— Сiдз, дак сэк и повны немись. Мунам жагвыв гортö. Уна ни, натьтö, кадыс. А то дöс менö эстöн номмес курччалiсö.

Кыкнанныс лöсьöтчисö чеччыны. Но эшö эта вотöдз нiя эшö öтпырись да вель дыр кежö öтлаасьлiсö öтамöд бердö тырппезнаныс, дзик медбöрьяись век кежö янсöтчöм одзын. А сэсся кыкнанныс жö öткоста, чожа да кокнита сувтiсö коккез вылö, недырик пыркöтчöм бöрсянь не тэрмасьöмöн иньдöтчисö горт ладорö.

XXV

Кытшöвтны одззамоз ыббес кузя öнi нiя эзö ни пондö. Бертны бöр ю пöлöнняс мыччассис матынжык.

Керöс бокöт быдмöм том вöр коласöт лэдзчисö ю бердöдз, петiсö бытшöма тöдчан туёк вылö.

Недыр мыйись бöрлань кольччисö ловпу вöрöн да бадь-тальникöн тырöм оль да ытшкöм видз. Туёкыс петкöтiс городскöй пруд дорö, кöда весьтын, шочыник вöрöн тырöм вылына усян берег сайын пондöтчисö ни городскöй постройкаэз.

Берег дорас, неыджыт мысочок одзын, туйсö поперегалiс неыджыт жö ключ-шор, кöда бердöт оськöв кыным пасьтöн кок увтын вöлi нять. Эстöн зонка босьтiс нывкасö киэс вылö, вуджöтiс шор мöдöрас, а сэсся бöр эз ни лэдз, сiдз аслас ловья ношаöн иньдöтчис вывлань.

— Верман, думайтан, керöс паныт киэт вылын кайöтны?

— Да ме тэнö, колö дак, не только эта керöсок вылöдз, тшöтш городöдз киэз вылын кайöта.

— Былись, Серёженька?

— А вот адззылан, он верит дак, — кагаöс моз нывкасö морос одзас видзöмöн, не öддьöн перыта зонка пондiс оськавны вывлань.

Мед не мыччассьыны сэтшöм сьöкытöн зонкаыс киэз вылын, Аня кыкнан кинас кутчисис-öшöтчис сы голя бердö, кыдз кага жö учöтик, пуктыштiс юрсö сы пельпон вылö. Сiдз нiя и локтiсö керöсок йылöдз. Шочыника быдман пуэз коласöт öтмöдöрö недырик чуклясьöм бöрсянь зонка кок увтiсь туй пондiс лэдзчисьны бöр увлань. Сэтчин, ю берег дорас, сулалiс лодочнöй станция, кöдаын öнöдз некин, натьтö, эз ни вöв. Но неылын сы дынсянь, ю берег дорас жö, тшöтш туй весьтас, нiя казялiсö керöм биок, кöда гöгöр рытся пемытыс пыр тыдалiсö куим-нёль морт.

— Лэдз, Серёженька, казяласö эшö.

— Но и ась. Мый тэныт челядьыс. Черикыйиссез, натьтö, черива пуöны, — зонка повтöг иньдöтчис одзлань.

Дас кыным оськöв ылынасянь ни, кöр зонка мöдöтпырись дзар керыштiс би гöгöр пукалiссес ладорö, вежöртiс — чукöртчöмась эстöн ой кежас нач не черикыйись челядь. Би дынас пукалiс горпöдан пасьта чужöма, кызвевья, лэдзöм тоша детина. Бокöнмоз сы дынсянь перыта бергöтлiс öтмöдöрö малик шырöм тошнас кымöстöм да гусьлöн кодь кузь голяа, тыдалö, нач неважын лэдзöм лагернöй решётка сайсянь, чулим. Эшö кыка, кöдна коласiсь öтыс тыдалiс мышнас, вöлiсö пельпоннэз бердöдз сынавтöм плетеннезöн лэдзöм юрсиаöсь, кöдна ва-банясö, натьтö, год сьöрна ни эз адззылö. Ны кок увтын би гöгöрас сэк кежö валяйтчисö ни кынымкö простайтöм бутылка. Асьныс нiя кöдна сё эшö мыйкö ватшкисö-сёйисö, кöдна куритiсö.

Берег пöлöн нылань сибöтчись Сергейöс да Аняöс би гöгöрын пукалiсь компанияыс казялiс, тыдалö, важын ни. Этö позис вежöртны ны гора басни сьöртi. Но вот горпöдан чужöмыс мыйкö горöтчис и сэтöн жö нёльнанныс горöн гöрдлыштiсö, кыдз вöввез.

— Бергöтчам бöр, — негорöн шушкыштiс нывка ёртыслö, сы коста жö нильдыштiс зонкаыс киэз вылiсь, сувтiс.

— Сёр ни öнi бöрлань. Мунам бокöт. — Нывкасö киöттяс видзтöн зонка оськöвтiс одзлань.

Крута лэдзчисьöм берег бердсянь тшöтш ва бердöдззас местаыс вöлi вель паськыт, ордйыны би гöгöрын пукалiссесö адззисис кыт. Но кöр зонка нывкакöт, ордчöн оськавтöн, пондiсö сибöтчыны би весьтöдз, сiя жö горпöдан чужöмаыс горöтчис:

— О-го! Вот эта идиллия! — А одзлань веськыта зонкаыслö: — Эй, тэ, углан! Öддьöнöв я мый я тютятö зыртiн, киэт вылын вайöтан?

— И-хи-хи-хи-хи! — виксыштiс эта вылö кымöстöм, шырöм юра чулимыс. Сы сьöрö и мöддэс керисö сiйö жö.

— Пöднав öтöпкитö! Инь сiя менам, — шыасис зонкаыс.

— Кинлö сiя этö горöтчис? Сувтöтö, ноко, велöтны колö, кыдз пöрисьжык отирыскöт баитны.

— Чöв тэ, Серёженька. Эн кутчись паныт. Ась нiя кöть мый... — повзьöмувьяс горöтыштöм сорöн шушкыштiс нывкаыс, кыкнан кинас кутчисис зонкаыс бердö. — Мунам чожжык эстiсь.

Но сэк кежö куимыс чеччöвтiсö ни коккез вылö, кыдз уснитöм поннэз, быд ладорсянь кытшöвтöмöн поперегалiсö нылiсь туй. Оськöв кыным ылына би дынас кольччис сулавны дзир ачыс горпöдан чужöмаыс.

— Вердтöмöсь я мый я, поннэз моз отирыс вылö чепсасят? — юалiс нывкаыс.

— Тупкась, кытчöдз тэкöт оз баитö, — шыасис öтiк сынасьтöмыс.

— Сет жö куритнытö, — одзлань ни обезьяналöн кодь киэсö нюжöтöмöн корис зонкалiсь кымöстöмыс, ас киöн пондылiс ни вöлi пырны сы карманö.

— Ог ме курит.

— Сэк, батi, этö одзöсöн сетлан? Туяна эшö, тыдалö, ась и вöдитöмовöй, — кылiс зонка боксяняс, вежöртiс: басниыс нывкаыс йылiсь.

— Да. Не öтнасытлö жö тэныт сэтшöмсö вöдитны. Миянлö эд не пыр кежö. Ой кежас тырмас — и бур, — реш керис öмсö, серöмтчис кымöстöм чулимыс зонкаыс одзын жöдзтöн.

— Сетат-одö муннытö? — юалiс зонкаыс.

— Эн тэрмась. Ештан. Муннытö тэныт неылöдз кольччис. Баитчам да вöлись, — висьталiс паныт сiя жö кымöстöм чулимыс. Сы коста жö öтiк кузь юрсиаыс не öддьöн сöстöма миссьöм кинас сибöтчис нывкаыс морос бердöдз.

— Охо! Зумыткодь... — ештiс шыасьны сiя, но сы коста жö наотмаш öдззöтöм нывкаыс кисянь кутыштiс кералöм тырппесö, и сэк жö кыкнан миссьытöмыс öтдруг уськöтчисö нывкаыс вылö, мед нетшкöвтны сiйö зонкаыс кисой бердiсь. «Куимöн кöть бы...» — думнитiс зонкаыс. Но видзчисьны одзлань вöлi сёр ни. Коккес коласö кымöстöмыслö чужйöмöн зонка сiйö пöрöтiс. Ештiс чепöссьыны мöддэс вылö, мед мездыны нывкасö. Но эстöн нiя сiйö и асьныс лэдзисö, кыкнанныс чепöссисö зонкаыслö паныт.

— Пышшы, Аня! Котöрт городас!

— Некытчö ме öтнам ог мун! Виясö тэнö öтнатö... — шыасис нывкаыс зонкаыс тшöктöм вылö. Сылö, тыдалö, думайтсис, что лоны кö эстöн öтлаын, дак зонкаыслö сiя мыйöнкö отсалас. Нывка и былись вöлi чепöссис сэтчö жö, быдöнныс коласö, мед кутчисьны кöдакö шыртöм юрсиа бердö. Но öнi быдöнныс дынö жö оськöвтiс горпöдан чужöмаыс. Казявтöг сiя кутiс нывкасö бöрсяняс кисойнас горш весьтöт, ас пельпон вылö бöрлань чатыртöм юрöн калькöтiс сылiсь коккесö му бердсис, джагöтöмöн кыскис быдöнныс дынiсь бокö.

— Лок, эн мешайт зонкаэслö уджавнытö, — горöтчис сiя нывкаыслö, а шырсьытöммеслö горöнжык содтiс: — Мый тi сыкöт сы дырна...

И кыдз бы öнi нывка эз лет-вот асьсö, мед мездiсьны горпöдан чужöма киэз коласiсь, этаись сылöн нем эз пет. Прос кытчöдз киэзнас сiя кынымиськö пондылiс судзöтчыны бöрлань, сы тош да юрсиэз бердöдз. Но мöдыс сыöддьöн нырыштiс сылiсь горшсö, что ловзисьнытö эта бöрсянь лоис нач немöн. Нывка пондiс джагавны. Нем эз пет и горöтлöмись, кöдö сiя мырсис керны. Эта местö дзир киргис.

Öтнаслöн зонкаыслöн кыкыс вылö вын тожö эз судз. Чужйöмöн я, татшкöмöн я, кöр сiя и мездiсьлiс недырик кежö öтыс увья, сы коста жö сы вылö уськöтчывлiс мöдыс.

Öтпырись, кöр зонка чужйöмöн пöрöтiс öтсö кок йывсис, а мышланьсянь кутчисьöм мöдсö чапкис вывсис ас омöн, сылö позис бы чепöссьыны бокö да пондывны пышшыны. Кадыс эта понда вöлi. Но вермис я сiя кольны ны киö нывкасö? Анясö мездöм могись сылань медодз зонка и чепöссис, но падмöтöм кинкö кокöн, сэтöн жö вöлi уськöтöм бöр. Эстöн вöлись кыкнан шырсьытöмыс öтдруг сы вылö и уськöтчисö, öдззисö чужйыны-тальны, кыдз шедас. Но и сэк эшö зонкалöн адззисис вын сувтны коккез вылö, пондывны мездiсьны.

Сiя кадö сувтiс коккес вылö и кымöстöм чулимыс, кöда зонкаыс чужйöм бöрсянь öнöдз веклясис му вылас. Сибöтчыны эта бöрсянь матö зонкаыс дынö куш киöн сiя, тыдалö, эз ни лысьт. Сы киын öнi ойся пемытiнас, сё эшö шайялан би югöр увтын, кöдзыта югйöвтiс пурт. И кыдз бы нывка эз пессьы горпöдан чужöмыс киэз коласын, кыдз эз вынсьöтчы чирнитны-горöтны зонкасö дорйöм могись, немись-нем быдöсiсь этаись эз пет. Кыкнан киыс сэк кежö сылöн вöлiсö пиньöвтöмöсь бöрлань, а горшыс нырыштöм сё одззамоз. Но кытчöдз эз быр досповна садь да адззисö повзьöмсяняс мöслöн кодь шардöм синнэс, мымда позис адззыны горзöмсяняс шорöнмоз визывтан синваэз пыр, сiя видзöтiс, мый керисö зонкаыскöт сы син одзын.

Öтпыр-мöдöтпыр пуртнас затшкöм бöрсянь сiя эшö чепöссис ны киэз коласiсь, но сэтöн жö чапкисьыштiс гатш, а сэсся сырлёль мунöм вывтырöн да кикокöн пондiс лэдзчисьны му вылас. А эта коста кымöстöмыс кöр кынöмас, кöр моросас, бытшкалiс зонкалö эшö да эшö. Зонка эшö видзсис пидзöссэс вылын, кöр сiя жö кымöстöм чулимыс медбöрьяись татшкис сылö пидзöснас вирöдз ни жугдöм-вартöм тшöкаö. Горöтöмыс местö негорöн киргытöн зонка жагвыв пöрис гатш, петöм лола ни, жагвыв пондiс веськöтчыны берег дорись песок вылын.

Вöлись öнi, кöр зонкаыс эз ни вöв ловья и отсавны Анялö мездiсьны мортвийиссес шогья лоис нач некинлö, нывка вежöртiс, кыдз сiя сорасис сэк, кöр мездöтöм недырик кежö зонкаыс отсöтöн эз кывзы сылiсь тшöктöмсö да эз уськöтчы перво жö пышшыны. Эд шогмы сэк сiдз — и зонкасö вийны-вартлыны кольччис бы нем понда. А öнi?.. Öнi Аня вöлi бы рад сылö, керисö кö бы и сыкöт сiйö жö. Нем мöдiк этася сылö эз ков. Сiя тöдiс — одз ли сёрöн нiя сыкöт сiйö керасö. Но эта вотöдз нiя нёльнанныс пöттöдз пондасö изгаляйтчыны сы вылын. Ойыс вöлись пондöтчис и этö нiя ештасö.

Эта вотöдз сымдасö Анякöт пондылiсö керны не öтпырись ни. И сiйö стыд-позорсö, кöдö усис терпитны паныт мырсьöм-пессьöм коста, сiя тöдiс бытшöма. Но сэк эта вöвлi öтiк морткöт, кöдö мымдакö эшö позис примитны морт туйö. Öнi жö сылö ковсяс не пессьыны ни одззамоз, а нагöлеч чöвтöмлö видзöмöн куйлыны нёль зверь увтын да ны син одзын, кöдна дзир часöт и дзир эта понда вийтöдз, лов петтöдз вартлiсö да бытшкалiсö сылiсь меддона зонкаöс, меддона мортöс. И етша висьтавны, что эта думасянь нывка повзис. Эта думасянь повзьöмувья сiя пымалiс люзь, дзик кöтöтiсö, а öткоста, аслыс казявтöг, нельки вадiсис. И ась мездiсьны да мезмыны некытшöм надейтчöм одзлань эз ни вöв, миритчыны сыкöт, мый позис лыддьыны лоöмöн ни, нывка нельки сэк эшö эз мöд. Ась и надейтчытöг, нырыштöм горша да пиньöвтöм киэза, простöй коккесö сiя калькöтiс недырик кежö му бердсис, каттьыштiс нiйö горпöдан чужöмлö кок бердас да, мымда вын, дырснитiс сылö бöрнас. Усьтöнняс ни нывка кылiс, кыдз мынiсö сылöн киэс, а личамöм жö ки увтiсь сiя ештiс мездöтны и тувдöм ни голяа юрсö, чепöссис коккес вылö.

— Он эд мун. Некытчö, — горöтчис горпöдан чужöмыс, жагвыв пондiс лэбтiсьны коккес вылö. Сiя кадö куимыс пляж да город ладорö поперегалiсö сылö туйсö. Но этö нывка тöдiс да видзчисис одзлань ни. Сiя уськöтчис бöр, вöр ладорö. Эта вöлi видзчисьтöм быдöнныс понда. Недырик кежö нылöн öшыштöм коста нывка ештiс чепöссьыны вит-квать оськöв ылына.

— Кутö! Мунас! — лöгвевйöн, а öткоста и повзьыштöм-сорöн сувтiс да горöтчис горпöдан чужöмыс. Полöмыс эта вöлi вежöртана — нач неважынся жертва нач видзчисьтöг да быдöнныс син одзын лöсьöтчис пöртчыны ловья свидетельö. А эта ны понда вöлi не сiя ни удовольствиеыс, кöда одзын нiя сэтшöм блаженствоöн зыртышалiсö миссьытöм киэзнысö.

XXVI

Вöтчисö куимöн. Горпöдан чужöмыс оськалiс бöрсяняныс дзир видзöтöм могись: не сы тушаöн вöлi котöртны сэтшöм том нывка сьöрö.

Аня бöрас и дзар эз кер. Не сiя вöлi кад, мед дзарышасьны. Ас сьöрас вöтчöмсö нывка кылiс ны кок шы сьöртi. «Кыдзкö бы не падмыны... Не кышасьны бы... не усьны... Кöть бы керöсокыс вылöдз...» А ачыс эта коста вöлi сэтчин ни. Одзын, керöсок мöдöрас, сiйö видзчисис ключ-шор, кöда сайсянь эшö нач неважын, кыдз кагаöс, зонкаыс босьтiс сiйö киэс вылö, вуджöтiс нять, кайöтiс керöс панытас да сiдз жö кöсйисис нöбöтны тшöтш городöдз. Öнi этö нятинсö колiс вуджны бöр да öтнаслö ни. Но полöтiс Аняöс нач не бöр да öткаса вуджöм. «Кыдзкö бы нять мöдöрöдззас... Только бы не вöйны кокöн... Только бы не сибдыны», — думайтiс сiя одзлань ни, синваэсö чышкытöг да орöтчöмöн одзлань котöртiкö.

Эта вöлi не орсöм, не шутка могись зонкаэз одзын ассис чожсö мыччалöм. Позорнöй смерть одзын нывкалö кыдзкö нач видзчисьтöг да надейтчытöг ни, петiс, инмис, лöсялiс, мыччисис (шуö, кыдз лöсялö öддьöнжыка) öтпырись ловзисьöм кузьышта кад, кöд коста колiс ылöстны, кужны да чайтчыны керны сiдз, мед кольччыны ловйöн, ловйöн не ас пондаись ни, не сiдз ас пондаись, кыдз век кежö мырддьöм любимöй морт понда, кöда пуктiс сы кузя, сы честь да достоинство кузя ассис олан, ловтöг, вöрöтчытöг, шойöн кольччис куйлыны öтнас берег дорас, кöдö бöр öнi некыдз, некöр да некин оз ни ловзьöт, но кöда том олан понда колö вештiсьны. И öнi, кöр нач видзчисьтöг, да нач надейтчытöг Аня мынiс вирьюись зверрез киэзiсь, сiя, конешно жö, вежöртiс, что мый бы сэтчин эз вöв, но сюрны мöдöтпырись эна зверрез коласö некыдз оз позь. Мöдöтпырись сюрöм бöрсянь сэтшöм колана кадыс, кыдз часöт, сэсся оз ни петав. И позис кö эшö кыдзкö нильдыны ны увья, дак дзир öнi, эна минутаэзö да секундаэзö — сэсся некöр. И позис не горöтлöмöн да паныт пессьöмöн, а дзир коккезiсь чожöн «шакаллэс» увья пышшöмöн. Сiйöн Аня и пуктiс öнi ны увья пышшöмö быдöс ассис вын да чож.

Кыдз нывка усьтöг-вöйтöг, дзик борддэз вылын вуджис ключ-шор мöдöрас, эта йылiсь нельки тöдвылын нем эз кольччы. Сiя кылiс, сiя тöдiс, что сы сьöрö вöтчöны, тöдiс, что пуктасö этаö быдöс ассиныс вын, чож да кужöм, мед вöтöмöн я, панöвтöмöн я, кытшöвтöмöн я вермыны кутны сiйö бöр. Этасянь нывка öнi вынсьöтчис вежöртны дзир öтiкö — вöтöны или озö, кöть кок шыэзныс сьöртi, кöдна кылiсö бöрсяняс, сибöтчыны матöжык эз вермö.

Недыр мыйись одзланьын мыччисис туйвеж, кöдö нывка синйис да видзчисис одзлань ни. Öтöрлань туйыс кольччис кыссьыны пруд берег пöлöн, кöда кузя неважын, кыкöн зонкаыскöт, нiя бертiсö Кува ю берег дорись. Мöд туйвежыс кежис веськытлань да перво жö чепöссис вывлань, керöс паныт, öнöдз сiя нывкалö тожö вöлi тöдса ни. Шочыник пожум да кöз вöр коласöт джын километр ылына вывлань кыссьöм бöрсянь туйыс петкöтiс кытшöмкö городскöй улица вылö. Веськытланьсянь вылынжык куйлiс ключ-шорöн орöтöм да вöрöн жö тырöм пыдын кырас. Одзалöмöн поперегавны нывкалiсь туй вöтчиссеслö вöлi некыт. «Эстi колö ештыны», — думнитiс Аня, сувтчытöг кежис туйвеж кузя вывлань. Эшö пуэс коласö сайöвтчытöдз нывка öтпырись да дженытика нёджжöвтыштiс бöрас.

Кымöстöм чулимыс пуртнас вöлi медматын. Сiя и горöтiс нывкалö бöрсяняс:

— Он эд мун, сука!

Кык шырсьытöм дикобраз, мымда прок, тэрмасисö сы бöрсянь. И дзир горпöдан чужöмыс эта коста син вылö некысь эз усь. Ештiс Аня казявны и сiйö, что ны дынöдз одззася туйколасыс öнöдз ештöм нюжавны кыкдас оськöв ылына гöгöр. И ась эта öддьöнсö и эз на лöньсьöт, котöртны одзлань керöс паныт вын-чожсö нывкалö содтыштiс. «Кок етш бы мед дзир эг ор... Мед только не усьны... Кöть бы медодзза керкуэс весьтöдз... Мед, мыйись-мый, дак кöть отирыс кылiсö», — кеймис-думайтiс Аня, керöс паныт быд вынiсь да быд жиласö нюжлавтöн.

Вот и медкрут местаыс кольччис бöрлань. Öтмöдöрсянь сулалан вöрыс пондiс шочамны. Кытшöмкö кадö пуэс коласöт тыдыштiсö заборрез, а заборрес вевдöрöт — керку юррез. Эшö дас оськöв, эшö вит, эшö, эшö...

Улица вылöт ни, медодзза керкуэс весьтöт котöрттöн, сы оськöввез вылö öтмöдöрсянь горöн да лöга вувтчисö поннэз. Но нылöн цеппезöн жольöтöмыс нывкаöс эз повзьöт, а дзир гажöтiс. Ачыс сiя, нырыштöм-дойдöмсянь да мыдзöмсянь сибдöмкодь голосöн, мымда вын, горöтiс:

— Оти-и-ир! Дорйö-ö-ö! Вийöны-ы-ы! Лэбтiсьöм шум вылö кынымкö керкуын недыр мыйись öзйисö биэз. Но видзчисьны, кöр оссяс кöдакö керкуись ыбöс, нывка эз понды. Одззамоз горöтлытöн да сувтчывтöг сiя котöртiс одзлань.

Мöдöтпырись Аня нёджжöвтыштiс бöрланяс сэк, кöр петiс городскöй автобуснöй маршрут вылö. Эта коста бöрсяняс сы сьöрö вöтчиссес эз ни тыдалö. Горöтлöмöн лэбтöм шум, öзйöм биэз да поннэзлöн лёка вувтöм мымдакö отсалiсö: кöть недырик кежö янсöтiсö нiйö нывка сьöрись. Но эстöн нiя вермисö кытшöвтны сiйö мöдöрсянь. Сэтчö жö некин отир коласiсь эта сёр кадö матын сы гöгöр эз тыдав. Эз вöв некöдöрсянь и городскöй маршрутнöй автобус. Веськыт да паськыт ойся улицаыс, мый ылына судзöтiс син, вöлi прос да лöнь. И сы вылын чунь öтнас нывкаыс, кыдз ки долонь вылын, бытшöма тыдалiс быд ладорсянь. И ло сыкöт мыйись-мый эстöн, колана отсöтсö и öнi эшö видзчисьны вöлi некинсянь. Этасянь сылöн одззася полöмыс эз чулав.

Дзир öтпырись ловзисьöм кежö сувтчыштöм коста Аня думайтiс, мый пондыны керны, кöдöрö уськöтчыны одзлань. Медколанаыс, конешно жö, — кыдз позьö перытжыка сюрны милицияö. Но этасянь сэтчинöдз вöлi километрся уна, кöдö котöртöм коста сiйö вермасö панöвтны быд пельöс сайсянь. Ылöстiс, что кытчöдз сiя öтнас да дорйытöм, нiя пуктасö быдöс вын, мед сiйö, не кыдз ассиныс жертваöс ни, а кыдз ловья свидетельöс, дзимлявны асланыс туй вылiсь. Анялö усис тöдвылас матiсьжык продуктовöй магазин дынiсь таксофон, кысянь позис звонитны. И кытчöдз некин да некöдöрсянь сы сьöрö эз мыччись, котöрöн нывка сылань и уськöтчис.

— Часöт локтам. Видзчись. Некöдöрö эн мун. Верман сайöвтчыны магазин ограда пытшкас. Сэтчин эм туалет, быдса штабель мымда важ пес да сымда жö простöй ящиккез, — юöртiс отделеннёсянь дежурнöй, кöр кывзiс нывкалiсь орласян баснисö да пуктiс трубкасö бöр. Бöр жö кусiс нывка ылöсын и сiя гаж, позис кö сiдз шуны сылiсь сiя кадся ловзисьыштöмсö, кöда саймыштлiс сыын мортлiсь шыасьöмсö трубкасис кылöм коста.

Мед не лэбтыны казявтöг неколана шум, пырны пöдана магазин оградаö воротаэз увтöт нето ны вевдöрöт, Аня, вежöртана, эз ни лысьт и эз пондыв. Нельки таксофон трубкасö одзза местаас нывка бöр эз ни öшöт, поснита тогзян киэзнас жмитыштiс сiйö тшöка увтсянь морос бердас да сiдз и кольччис сулавны видзчисьтöн.

Неважын чулалöм кошмар бöрсянь Анялö öнöдз эшö эз веритсьы, что сiя не сэтчин ни, пруд берег дорас, этна вемтöм да код шакаллэз коласын. Нылiсь сы сьöрö мыччисьöмсö позис видзчисьны быд минута, нельки быд секунда коста. Сiйöн кикоклiсь, сьöлöмлiсь да и быдсöн вывтырлiсь поснита тогзьöмсö лöньсьöтöм шогья магазин стена бердö мышкас зэв-зэв жмитчöмöн, нывка, кыдз кытшö шедöм кöч, быд вынiсь кывзiсис полöтан ойся лöняс — оз я кыв кинлöнкö да кöдöрсянькö гусясьöмöн я, тэрмасьöмöн я сылань сибöтчöм. Öнöдз эшö дугдывтöг визывтан синваэз пыр сiя орöттöг дзиргис-видзöтiс ас гöгöр — оз я кинкö мыччись сы сьöрö ылiсь я, матiсь я пельöс сайсянь, мед аскадö казялöм бöрсянь, сэтöн жö ештыны нетшкöвтчыны местаись да кöдöрöкö пондывны пышшыны одзлань.

Аслас видзчисьöмын нывка и былись эз сорась. Кытшöм бы эз вöв охота, мед сы корöм вылö милицияыс локнытö одзалiс, сы нёж сё жö эз пет. Недыр мыйись сы след кузя улица шöрас, кытчö Аня сувтчылiс неважын öтпырись ловзисьöм могись, жагвыв да вуджöр моз лöня, öнi мыччисис кымöстöм чулимыс. Малик шырöм юраöс да гусьлöн кодь кузь голяаöс рышкытик ойся пемыт коста некинкöт мöдiккöт соравны эз позь. Сiя сувтiс туй шöрас, сотня кыным оськöв ылына магазин дынсянь, тыдалö, сiдз жö пондiс кывзiсьны да видзöтчыны ас гöгöр.

Недыр мыйись эта бöрсянь мыччисисö и кык дикобраз. Но петiсö нiя не кымöстöмыс сьöрö, а нач мöдöрсянь. А кöр, тыдалö, казялiсö öтамöднысö, лöня да тэрмасьтöг, иньдöтчисö паныт. Вежöртiсö, тыдалö, что мунны этöн абутöмкодь чулалöм кадöн нывка ылö эз ешты и сылö колö лоны кытöнкö эстöн. Ны коласö нывка и былись позьö шуны сюрис кытшö. И кыным матöжык нiя сибöтчисö öтмöдöрсянь магазин весьтö, сыным эта кытшыс нывка гöгöр жмитчис, учöтсялiс сё öддьöнжык да öддьöнжык. И кытчö-кöдöрö пондыны воштiсьны ны шогья öнi, Аня эз тöд. Магазин стена бердö лякасьöмöнмоз, сiя кольччис сулавны ас местас дзир сiйöн, что казявнытö сiйö эта вотöдз нiя эзö на ештö. Но колiс сылö кöть öтпырись вöрзьöтчыны ас местын, кыдз сэтöн жö бы и усис быдöнныс син вылö. «Неужто сiдз и оз ештö?.. Эд кöсйисисö жö часöт локны... Неужто эстöн... ны коласiсь пышшöм бöрсянь ни?..» Не кулöм, не ловья, дзик кынмöм ас местаын, эстöн нывка вадiсис мöдöтпырись. Но кыдз бы эз сот неважын пымалöмсянь öнöдз эшö косьмытöм люзь ва лядьвейесö ны кузя увлань визывтан ва, сымдасö сiя не эз кыв, не эз казяв.

Эта коста кысянькö улiсянь негорöн пондiс сибавны кытшöмкö машинаэзлöн гугйöтлöм-горалöм. Чожа мый фараэзлöн би югйöвтiс улица пöлöн садитöм пу йыввез кузя, лэдзчисис увлань, веськöтчис да водiс туй шöрас. Кык дикобраз, сюрöмöсь этна би увтö, дзик вотьыштiсö, кежисö туй бокас да сэтöн жö саясисö син одзись.

Кöр Аня казялiс одзись машина вылiсь лöзвевйöн мигайтан биок да мöдiс чепöссьыны сылö паныт, сэк вöлись и кылiс, и вежöртiс, что повзьöмсянь да мыдзöмсянь жутöмкодь коккес озö ни кывзiсьö. Öнi нiя нельки видзнытö сiйö эзö ни вермö, и öтпырись вöрзьöтчöм бöрсянь нывка жагвыв пондiс лэдзчисьны магазин стена пöлöн му вылас.

XXVII

Зонкасö дзебöм бöрсянь не только овны, а и оланыс вылö видзöтны некытшöм охота эз ни вöв. Но сы понда жö, эта олан понда, сiя рытö сэтшöм сьöкыта пессьöм бöрсянь, сюйыштны петляö юр вын тожö эз адззись.

Месяц кыным сьöрна Аня чулöтiс кыдз чад-кольмöтын: не шондiлiсь öгралöмсö, не лунся югытсö эз адззыв. Нывка ветлöтiс, кыдз вуджöр, позис кö шуны ветлöтöмöн гортсянь удж вылö да удж вывсянь гортö, общежитиеöдз вуджавлöм. Том да гöтыртöм отир олан вылö нывка öнi и дзар эз ни кер. Кино, театр да телевизор и син одзö оз ков. Некытшöм зонкаэз йылiсь да ныкöт тöдсасьöм йылiсь думаэз сы юрö тожö эз пырö. Öткоста тöдiс да вежöртiс — нывка юрöн общежитиеас век сьöрна он ов. Сэтчö жö кывзыны зонкасö вийöм бöрсянь ас йывсис отирсянь быдкодь баснисö да кöритöмсö, кöр паныт эталö и кыв горöтчыны он вермы, тожö эз вöв кокнит. Быдöс эта увья общежитиесис колiс бы мунны. Но кытчö муннытö?... Вежöртана, что нывка думайтiс торья квартира йылiсь, адззыны-босьтны кöдö городас вöлi некысь. Горисполкомын, кытöн Аня сулалiс очередяс медодзза годсянь, эта сылöн очередьыс сё эшö кольччис тысяча саяс, и надейтчыны сэтчинiсь квартира вылö матiсьжык год кыным сьöрна эз позь. Эта местö, правда, оссис мöдiк туй — сувтны очередьö кооперативнöй вылö. Одзжык эта йылiсь кыдзкö эз думайтсьы, а öнi нывкалö этася и воштiсьнытö лоис некытчö.

Жаль вöлi, да и полöм петiс вештiсьны сэтшöм квартира понда козин местö сюрöм деньгаöн, кöдö Аня ас киэзöн да ас уджöн эз шедты. Но мöдiк, туянажык петанiн сэсся эз адззись. Лöньсьöтiс мымдакö сiя, что эта йылiсь некин, нельки ачыс козьналiсьыс öннявиöдз эз тöд. И не юöртны кö аслыс нывкалö, дак и одзлань кежö тöдны оз понды.

Ась кыдзкö и полöм сорöн, эз веритсьы, что вештöм деньга понда и былись вермас лоны городын аслат торья да сэтчö жö эшö и благоустроеннöй квартира, очередяс Аня сувтiс. А кык год бöртi, кöр нывкалö тырис кыкдас кыкьямыс да эта увья нельки общежитиеас овны одзлань эз ни позь, сiя вермис петны аслас торья квартираö.

Вежöртана, что медодзза кадö эталö нывка вöлi радся-рад, кыдз бытьтö этася оланас сэсся нем эз и ков — тöд уджав да ов. Но и эта гажыс, нельки ас благоустроеннöй квартираын, тырмис нач недырик кежö. Год бöртi ни öткаса олöмсянь кутiс сэтшöм гажтöм, что ас стенаэз коласын кöть кöинöн унняв. И уннявлiс, только не сэтшöм горöн, мед стена сайись соседдэз эз кылö.

Тöвся кузь рыттэзö, кöр нывка кусöтлiс би нето телевизор да водлiс öтнас аслас кöдзыт ольпасьö, оныс местö юрас пондывлiсö пырны быдкодь гажтöмтан да полöтан думаэз. Кадыс видзтöг визывтiс одзлань. И ась сэк кежö нывка эшö и эз вöв сэтшöм пöрись — вуджис куим дасöт вылас — кольччыны сiдз öтнаслö одзлань кежö охота эз вöв. Вот сэк оныс местö сiя и вадлiс ойбыт сьöрна ассис подушкасö курыт да сола синваэзöн.

Рытöн-асылöн, кöр Аня ветлiс удж вылö да бöр, сiя часто видзöтлiс гусьöн томыник кагамаммез вылö, кöдна кöр дадёкын, а кöр и сiдз, кипöлöт, кыскалiсö-новйöтiсö ассиныс зырымöсь ныра чадоэзнысö яслиö да садикö. Нывка сэтчöдз завидуйтiс сэтшöммеслö, что эта увья нельки ас йывсис вунöтлiс. Но мед лоны сэтшöм жö кагамамöн сылö, нимöтны ас моросöн ассит жö чужтöм пиян, вежлавны да пеславны сы увтiсь лякöсьтöм рузуммез, кöмöтны да пасьтöтны, новйöтны ясли-садö, сувтöтны отир моз кок вылö, мед лоис кинкöт горöтчыны гажтöм кадö кыв да кöть думаын надейтчыны кинкö вылö одзлань кежö, этö пиянсö медперво колiс кинкöткö пондöтны ас пытшкын, новйöтны да вайны. Эд кыдз баитсьö отир басниын, пыртны сiйö тöлöн тэ пытшкö оз вермы. Эта понда кöть недырик кежö, но сё ни колiс паныта морт. Но кин?...

Не сытöг, вежöртана. Ась не томыник да гöтыртöм зонкаэз, кыдз одзжык, а тöдса гöтыра мужик отирыс Аня вылö и öнöдз видзöтлiсö. Сэтшöммес лунiсь-лун вöзйисисö кöть недырик кежö нывкаыс ольпасьö да неыджыт мед понда, а то и сытöг, кöсйисö сылö коланасö. Эта понда колiс дзир сылöн аслас согласитчöм. Но сiдз кыдз некин бердö ны коласiсь сылöн сьöлöмыс эз куйлы, то и согласитчыны некинкöт сiя эз вермы.

Сергей бöрсянь, кöда аслас нравственнöй принциппез увья свадьба вотöдз нывкасö жалейтöмсянь тырсьöтнытö сiйö эз ешты, матiсьжыкнас Аня дынö кольччис дзир Павел. Ась сiя и вöлi гöтыра, ась олiс аслас семьяöн да челядьöн, ась вöлi не городас, а деревняын, сы вылö надейтчöм коста быдöс этö Аня лыддис нельки буржыкöн. Ны сэкся дружитöм бöрсянь кадыс öнöдз чулалiс уна ни. И отирыс, кöдна кöркö адззисö да тöдiсö эта йылiсь, этöн чулалöм каднас вунöтiсö ни. Сiдзкö, некинлö сымдаыс и юрö оз пыр, и некытшöм басни, видзöтан кö, эта йылiсь оз ло. Тырсялас, и тырсялас. Ваяс, и ваяс, кöть некöр да некинкöт отир син одзын эз кыскась.

Не öтiк лун нето неделя сьöрна воис Аня юрын эта думаыс. Не öддьöн вöлi кокнит бертны бöр сэтшöм вöвлытöм могöн сы дынö, кöдакöт паныт сiя кöркö сы дырна пессис-мырсис Лолог ю дорас дзир сы понда, мед эта эз шогмы ны коласын, а сэсся эшö и пышшис сы дынiсь, и, кыдз мыччассис сэк, век кежö. Но, кыдз баитсьö отирыс басниын: эн гудырт йöз шорсö — юнытö аслыт ковсяс. Оланыс корис. Оланыс тшöктiс. А сы корöм-тшöктöм увья ловья вывтi некытчö он воштiсь.

XXVIII

Лунся югытöн ни, одз да бöр сьöрсьöн-бöрсьöн визлалан гырись и поснит автомашинаэз коласын, бензовоз пырис городö. Синюшка весьтын (сiдз шусис лöзöн краситöм кöркöся магазин увья сы весьтiсь туйвеж да автобуссэзлöн сувтчанiн) Павел кежöтыштiс машинасö туй бокас, сувтчис.

— Кытöн пондан чеччыны?

— А тэ кöдöрö этасянь мунан?

— Веськыта нефтебазаö.

Этасянь Анялö мунны подöн эз ни вöв ылын. Но талун, кыдз некöр эшö эта вотöдз, колiс, мед Павел вайöтiс сiйö тшöтш öшын увтöдз.

— Кежалан жö, батi, миян керку дынöдз. Абу ни эстöн ылын да. Кыдз ме сы сьöкыта сумкасö ки вылын понда кыскыны?

Зонка негорöн куршыктiс, вöрзьöтчис одзлань. Эта нывкасö дзик ловзьöтыштiс. Первуись эта туй коста сiя нёджжöвтыштiс сы ладорö сiя шынньöла синнэзöн, кöдöн видзöтлiс пыр сы вылö кöркö, этадз жö ордчöн сы кабинаын пукавтöн. Нывка кылiс, кыдз кытшöмкö лöнь шоныт долыта-долыта жмитыштiс-шонтыштiс сылiсь сьöлöмсö, а öткоста быдсöн мороссö да вывтырсö. Гажöтiс сiя, что быдöс кöсйисис петны колананёж, кыдз и вöлi думайтöм одзлань.

— Висьтав, кöдöрö кежнытö.

— Да вот этасянь шульгаланяс и кеж, — гажвевйöн шыасис Аня. Сэсся сiя мыччалiс веськытлань, недыр мыйись эшö сылань жö, а сэсся вились шульгалань. А сэтöн Павел чöвны одзлань, тыдалö, эз ни вермы.

— Кытшöм жö тiян вемтöм архитектор сiдз городсö строитö? Одзжык вöлi город, кыдз город, ась и пуовöй. Öтiк улица кузя позис öтöрсянь и мöдöрöдз шуч мунны. А öнi сэтчöдз, видзöт жö, покаститöмась, что кежан кö кöр этадз мыйкö вылö город шöрас, дак петны бöр он ни адззы кыт. Сымда дзир и эм омöн город пасьта — быд улица вылын чукыль да тупик. Извилинаэс архитекторныт юрын етшажык, мымда городас быдкодь чукыльыс да тупикыс.

— Сiдз, батi, да мый нö ме сэтöн кера? — обидитчытöг, кыдзкö нельки гажвевйöн шыасис паныт нывкаыс. — Ме не архитектор, ачым ог строит.

Ас коласын этадз баиттöн ковсис кежласьны öтмöдöрö эшö размöд. Сэк вöлись öтiк вит сувда олан керку дынын Аня тшöктiс сувтчыны.

— Кежöт эталань туй вывсис, — нывка мыччалiс керку пельöс саяс. — Сэтöн некинлö оз мешайт.

— Мый вылö эшö?

— Дак он разь и пырав видзöтнытö, кыдз ме ола? Вештiсьны жö эд, натьтö, кыдзкö вайöтöмыс понда колö.

— Нем меным оз ков. Кöркö мöдöтпырись, лöсялас дак, видзöта. А öнi меным тэрмасьны колö.

— Видзöт тэ, эшö кытшöм. Тэрмасьö сiя. Бытьтö оз ешты рытöдззас бöр гортö локнытö. Мый, и сумкасö меным пыртны он отсав?

Павел пыркнитiс юрнас, ловзисис ыш. «Лякасяс жö эд то, кыдз сир». Нето-нето кежöтiс машинасö туй вывсис, сувтöтiс керку пельöс сайö, петiс, негорöн пöдныштiс бöрсяняс кабина ыбöсок, босьтiс нывка киись не öддьöн сьöкыт сумкасö, не тэрмасьöмöн иньдöтчис сы сьöрö.

Мед вермыны дзугны ас коласiсь чöлöм да мездiсьны эта чöлöм увья зорамöм недолытсянь, куимöт лестничнöй площадка вылöдз простöн да кокнита одзас оськавтöн, Аня бöрланяс горöтчис:

— Адззан вот, мый вылына сiйö колö кыскыны? Сумкасö, ме шуа.

— Зато городын, не деревняын.

— И этöн эшö тэ менö бытшкан?

— Да ог. Горöтчи, кыдз эм.

— Ась уж. Сiдз, дак сiдз. Мый эшö сэтöн висьталан.

Нёльöт площадка вылын Аня сувтiс, кежыштiс ас квартираö пыранiн бердö, кыскис пальто карманiсь ключ, сюйыштiс сiйö замок скважинаö, бергöтiс. Кокнитика татшкыштöм бöрын ыбöсыс оссис.

Эстöн ни Павел мöдiс сетны сумкасö хозяйкаыс киö, мед аслыс бергöтчыны да петны бöр. Но сумкасö примиттöг Аня кутiс сiйö кипöлöт, пыртiс порог омöн пытшкас, пöдныштiс бöрсяняс ыбöс, эстöн вöлись босьтiс сы киись сумкасö, öшöтiс тув вылö сы юр вылiсь юасьтöг кульыштöм шапка, ас киэзöн жö сы пась бердiсь киззесö пöрччавтöн недырик кежö жмитчыштiс чужöмнас сы морос бердö.

— Спасибо, Павлик, вайöтöмыс понда. Пыр, пуксьы. Часöт ме ачым тожö чöвтча. Эн пов, он кынмы. Керкуас менам абу кöдзыт.

Квартираас и былись вöлi шоныт. Керны кольччис нем, кыдз öшöтны тув вылö вылiсь чöвтöм пась, оськöвтны порог омöн шöрöт ыжда жырö да пондыны тöдсасьны. А первуись локтöм коста тöдсасьнытö и былись адззисис мыйöн.

Шоныт, вежкодь-зелёнöй рöма паласöн везтöм джодж шöрын, сырья дора бордовöй скатерть увтын сулалiс пызан да сы гöгöрын жö вит-квать стул. Пельöсiсь лажмытик тумбочка вылын, везтöм сэтшöм жö сырья дора вевтöсöн, сулалiс неыджыт телевизор, а сыкöт паныта стена бердын — небытик диван да эшö кынымкö стул. Вежöртана, что быдöс эта вöлi небöм эшö нач неважын и не бусöсьмыны, не нятьöсьмыны, не быгавны некыт эшö абу ештöм, и, конешно жö, мыччассис вежалунсяöн. Но мый медöддьöн быдöнныс коласiсь усис син вылö, дак этö Анялöн сервант, кöда сулалiс шульгаланись стена бердын. Ась сы пытшкын дона посудаыс и эз вöв уна: öтiк хрустальнöй ваза да öтiк фарфоровöй чайнöй набор. Но сайись зеркальнöй стенкаыс, а öддьöнжыксö сервантлöн пемытöдз моритöм-краситöм да бытшöма полируйтöм пу кузя бронзовöй отделкаыс öтнас ни югдöтiс да гажöтiс учöтик квартирасö тырмöмви.

Кытчöдз Павел, неылын пыранiн дынсянь сулавтöн тэрмасьтöг нёджжасис жыр пасьта, сiйöн каднас узьлан жырын Аня ештiс чöвтны вывсис туйвывся паськöм да пасьтасьны мöдпöв. Бöр сiя мыччисис сэтчинсянь шоныт рöма цвета гортся халатын, недырик кежö, бытьтö мыччасьöм могись, сувтчыштiс сы одзö, дзик томувья, вежсьыштöм сы синнэз увтын, гажвевйöн юалiс:

— Мыйöн нö ме тэнö, гöсь, потшшуйтны понда? — öткоста мышкыртчис, осьтiс увдöрöт сервант, кыскис сэтчинiсь рöма цвета, кыдз и вылас халатыс жö, клеёнка, паськöтiс, павдöтiс сiйö пызан вылас, велалöмкодь ни хозяйка киэзöн волькöтыштiс чукыр местаэсö.

— Спасибо. Кытшöм ме тэнат гöсь? Не гöститны локтi да... Некытшöм потшшуйтöм меным оз ков.

— Да но. Эн жö небаснисö баит. Оз эд сiдз лöсяв, первуись пырин да. Пукышт недырик, пуксьы диван вылас да. Ме чожа мыйкö лöсьöтышта.

— Ме эд висьталi, что нем меным оз ков. Неважын сёйи да...

— Но жö тэ, батя, Павлик, кытшöм. Неужто и дас минута сьöрна пукыштны он вермы. И баитны эшö нем йылiсь эг ештö да.

— Баитiн бы, вöлi мый баитнытö дак. Эта кузя туйколас коста быдöс йылiсь баитнытö позис.

— Пондылi тай öтпырись да сiдз öмалiн, что эта бöрсянь эг ни лысьты одзлань нем горöтчынытö. — А недырик чöлыштöм бöртi одзлань эшö: — Тэ жö ме ладорö öтпырись и дзар эн кер.

— Вот эшö кыдз? — Дивуйтчöмöн горöтчис Павел. — Интересно. Колiс разь сымдасö? — Павел дзар керыштiс бöрланяс, сылань жö оськöвтiс, жагвыв лэдзчисис диван пельöсас.

— Думайтан, эз я мый я? — нарошно повтöма горöтчис Аня, веськыта зонкаыс вылö видзöттöн, но чепöссьöм вирсянь сэтöн жö пондiс рöмсявны чужöм вылас, сiйö сайöвтöм могись оськöвтiс порог омöн да кежис кухняö.

Кольччыны эстöн гöститöм могись некытшöм охота Павеллöн и эз вöв. Сiя вöлi удж вылын и колiс мунны одзлань. Но и петны керкусис öтнаслö, юасьтöг-висьтасьтöг, кöр корöны пукыштны баитöм могись, вöлi тожö небасöк. Öтнас Павел чеччис диван вылiсь, оськöвтiс матöжык зеркальнöй сервант бердöдз (гортас сылöн сэтшöмыс эз на вöв), пондiс нёджжавны да пешлышавны сiйö быд ладорсянь,

Недыр мыйись Аня мыччисис кухнясянь бöр, пондiс ваявны пызан вылö: кольттезöн жаритöм колбаса, сола тшак, весöтöм селёдка «иваси», мамыслiсь сьöрас вайöм пирöггез да пöжöм яй. А кöр кыскис да сувтöтiс пызан вылас стопкаэз да бутылка коньяк, горöтчис:

— Пуксьы, Павлик, пызан саяс да осьт бутылкасö.

— Тэ мый, бытьтö юны мöдан?

— Мöда.

— Велалiн ни разь?

— Велалi я эг я, талун тэкöт юа, кöть коддзытöдз. Паныт сулавтöн Павел чöлöмöн да дивуйтчöмöн видзöтöв-керис Аня вылö. А мöдыс, недолытсянь рöмсялöм чужöмсö сайöвттöг ни, паныт горöтчис:

— Мый тэ ме вылö сiдз видзöтан? Он верит, да? А ме тэныт, Павлик, былись баита. Вот адззылан. Осьт, пуксьы да, бутылкасö.

Павел пыркнитiс öтмöдöрö юрнас.

— Ог, Аня. Не осьтны, не юны ме ог понды. Ась, кинлö колö, сiя и осьтö, а меным оз.

— Меным колö, Павлик. Но ме осьтнытö ачым ог куж да ог вермы. Не женскöй жö эта уджыс — бутылкаэсö осьтавны.

— Сiдз, батi. Но ме öтiкö, Аня, ог вежöрт, мыйлö тэ быдöс этö керан?

— Да уж, натьтö. Сiдз бытьтö тэ и он вежöрт. Висьтав эшö, что он тöд, мый öткаса инькаыслö мужикыссянь колö.

— А тэ разь öнöдз быдöс ни вунöтiн? Не сы увья я кöркö ме дынiсь пышшин?

Пызан саяс Павел сiдз и эз пуксьы. Вились жаралöм басни коласын, кыдзкö аслыс казявтöг сiя оськöвтiс диван бердöдз, лэдзчисис одзза местаас.

— Пышши, Павлик, да. Но не сы увья, мый увья тэ думайтан. Ме пышши деревняыс увья, кöр вежöртi, что уджавнытö, кыдз меным колiс, сэтчин оз сетö. И сы понда, батi, сэтшöм донöн öнöдз ас оланöн и вештiся. Эн думайт, пожалуйста, что ме тэнö эг радейт. Радейтi, кыдз и тэ жö, и тэ сiйö тöдан. Тöда, что öтiкся тэсся сiя кадö некин менам эз вöв. — Басниыс коласын, оськöв бöрын оськöв, Аня тожö сибöтчис матöжык зонкаыс дынö, диван бердас, лэдзчисьыштiс ордчöн диван дорыш вылас. — И эг кö ме сэк тэныт сетчы — тьфу, мый баита, — сэтчин, Лолог дорас, дак нач не сiйöн, что тэнö эг радейт да тэнатöн лоны охота эз вöв, а сiйöн дзир, что деревняас век кежö кольччыны эг мöд. Аслам радейтöм увья сэк веритi да надейтчи, что и тэ ме сьöрö локтан. Ме жö тэнö, гöтыраöс ни, эшö нёль год сьöрна дугдывтöг видзчиси. Сё думайтсис — янсöтчатö сыкöт бöр. Но сораси. Кöр кывсис, что тэнат шогмöм мöдiк зон ни, сэк вöлись вежöртi — видзчися весь, надейтчыны одзлань лоис нем вылö.

Нывкалiсь баснисö Павел одзлань немöн эз ни сор. Кывзытöнняс сiя кыскис морос карманiсь сигарета, öзтiс куритны, чöлöмöн пондiс видзöтны, кыдз öзтöм сигаретаыс син одзын пöртчö рышкыт, кокнит да руд рöма пöимö, а вуруновöй шöртöнмоз вывлань нюжалан сэтшöм жö руд тшынок следтöг незьдö-паськалö руас. Вöлись сэк, кöр кытшöмкö кадö нывка лöньсис баснинас, мöдiк вылö сiйö вуджöтöм могись, Павел юалiс:

— Öддьöн я мый я бытшöма татöн шедтiсян? Или гортсянь отсалiсö кооперативнöй квартираыс понда вештыны?

— Не öтыс, и не мöдыс. Аслам шедтöмыс меным дзир ас вылам и тырмö. А гортiсь ме и нятьöсь копейка мымда некöр эг кор.

— Кытшöм нö кляп вылö быдöс этö босьтiн-строитiн?

— Думайтан, батi, ас доброöн городас овтöн вузаси? Ме кодь öткаыс йылiсь быдöс эд позьö думайтны.

— Думайтi или эг, сымдасö ме тэныт эг висьтав.

— Спасибо кöть эта понда. А квартираыс, Павлик, да и пытшкись обстановкаыс, быдсöн тэ кöркöся козин вылö небöм-строитöм. Ассим шедтöмсö ме эшö и копейка мымда сэтчö эг видз.

— Сералан я мый я? Кытшöм эшö козин вылö?. — Пидзöс вылас осьтыштöм истöг коробок пытшкö зонка пыркнитiс сигарета бердiсь пöим, дивуйтчöмöн да, натьтö, первуись сэтшöм веськыта нёджжöвтыштiс нывкаыс ладорö.

— Эн думайт, Павлик, пожалуйста, что ме тэнö пöрьяла. Былись ме тэныт этö висьтала. Вунöтiн ни разь, кытшöм козин тэ меным бöрьяись восьмöй март кежас козьнавлiн?

— Но.

— Дак вот. Сэк меным ны вылö машина легковöй инмылiс да тысячася унажык вылö эшö быд берсяыс. Сiдзкö, и квартираыс эта менам не сымда менам, мымда тэнат. — Эстöн Аня мыйкö дырна кежö лöньсис, пондiс видзчисьны, мый лоас одзлань. Сылö думайтсис, что сэтшöм видзчисьтöм юöр бöрсянь зонкаыс кыдзкö вежсяс: то ли гажмыштас сы понда, то ли пондас дивуйтчыны. Но не öтыс, не мöдыс этна коласiсь эз лоö. Юöрыс Павелöс нельки немымда эз дивуйт. Позис думайтны, бытьтö басниыс мунiс рублёвöй брошка йылiсь.

— Счастливöй, сiдзкö, вöлöмыт, — горöтчис зонка дыр мыйись, недырик чöлыштöм бöртi одзлань юалiс: — А мый нö айка саяс сы дырна он мун? Некин разь этатшöм квартираас оз адззись? Или сё эшö ас киння буржыкö кошшан? Он пов, что этадз öтнат пöрисьмыны ештан?

— Весь тэ, Павлик, менчим синлö сiйöн бытшкан, бытьтö ме ас киння буржыкö кошша. Меным я сы йылiсь, кытшöм эм, судитнытö? Эта йылiсь некöр и дума эз вöв. А вот тэсся умöльжыксö и одзжык эз ков, и öнi сiдз жö. Сiйöн, батi, нывка юрöн и пöрисьма, öнöдз нельки некинкöт нем эз вöв.

— Мый, сё бытьтö вöрöттöм я мый я?

— Мун, эн серав. — Аня öвтыш-керис кинас зонкаыс ладорö.

— Дак тэ кöть вай кинöскö öтiкöс, он адззы кин сайö муннытö дак. Абу разь и гажтöм эстöн öтнасытлö? Или быдтiсьнытö охота абу? Асьтö эд тожö кинкö быдтiс.

— Рад бы, батi. Да кинкöт ме сiйö, кöть и öтiксö дак, вая. Кин увтö шедас, эд сё ни он вод. А тöвнас сiйö, баитöны, тожö оз пырт.

— Не кин увтö шедас... Ас кодьöмöс, коланаöс адззы. — А одзлань, унажыксö шутка могись ни: — Бутылка сувтöтан, дак öтiк ойыс кежö кинкö сё ни согласитчас.

— Оз бы тай мыйкö, вот и бутылкаыс ни сувтöтöм да...

— А но, — вежöртiс да кватитчис Павел. — Ме-ту сэтöн причём?

— А притом, Павлик, что некинöс мöдiксö меным тэсся оз ков... оз, нельки эта недырик кежö. А тэкöт... кöть талун жö... Или сё эшö меным он верит? — Басниыс коласын Аня зэвжык вешшыштiс зонкаыс бердö, одззася гусьöнжыка одзлань баитiс: — Думайтан, батi, заразнöй кытшöмкö? Абу эд, эн пов. Менам былись öннявиöдз некинкöт нем эз вöв. Öнöдз сэтшöм, кытшöм сэк, но тöдан эд ачыт, вöлi. А немтöгья заразаыс оз кутчись.

Зонка кывзiс. Ас кежас мыйкö гажтöма думайттöн сiя нильыштiс кисис сотчöм сигаретасö сiя жö коробок пытшкö, видзчисьтöг пыкнитöм-öзйöм истöггезсянь перыта чапкис коробоксö палас-ковёр вылö да сы вылö жö тальччис кокнас.

— Полан, батi, что кыдз и сэк, мырсьыны-панласьны понда? — юалiс одзлань Аня, кöр зонкаыс лöньсьыштiс, ачыс жö одзлань висьталiс: — Ог сэсся, вот адззылан. Стыд кöть мый, а гортын эд. И мый меным öнi тэ одзын стыдитчынытö, кöр тэ сэк ни быдöс, кытшöм эм, адззылiн.

Но аслас баснисянь Аняöс стыдыс сё жö кутiс. Сы увья сайöвтчöм могись нывка вешшыштiс зонкаыс бердö эшö зэвжык, нюжöтчис киэнас сы морос бердöдз, сэтчö жö сайöвтiс чужöмсö.

— Но мый тэ чöлан? Ме эд тэнö ог тшöкты янсöтчыны. Вежöрта жö, натьтö, сымдасö, что гортын тэнат семья да челядь. Но и меным тэсянь тожö кинöскö колö. Только тэсянь, Павлик, и сэсся некинсянь. Тырсявны бы... Висьтала жö вот, что тэнат эта квартираыс, и мед сэтöн тэсянь жö кинкö и вöлi.

Аслас басниöн, думаэзöн, аслас надейтчöмöн да зонкаыс бердö кыссьöмöн асьсö жö Аня медперво и öзтiс. И сiя кадö, кöр мöдыс пукалiс чöлöмöн да вöрöтчытöг, дзик кынмöм, нывка, быдсöн шоналöм ни сэк кежö вывтырнас, жмитчис сы бердö сё зэвжык да зэвжык. Вот и киэс сылöн, кыдз кöркö жö, зонкаыслö паныт локтöн, каттисисö сы голя бердö, а ачыс, сотчытöдз косьмöм тырппесö жагвыв вöрöттöн, баня жар кодь кальыт ловшыöн, зонкаыс голя бердын, баитiс:

— Некин жö эта йылiсь тöдны оз понды...

— Не сыын, Аня, делоыс, пондас я кинкö тöдны.

— А мыйын эшö?

— Вежсям недырик кежö местаэзнас. Сувтöт асьтö ме местö да думайт: кольччис-эз бы мыйкö тэ сьöлöмын сiя морт дынö, кöда тэныт сэтчö сьöлалiс? Вермин я бы тэ сибöтны сiйö мöдöтпырись ас бердат, то ли ачыт сибöтчыны сы бердö?

Аня жагвыв дзимлялiс киэсö Павел голя бердiсь, вешшыштöмöн пуксис, мышкыртiс увлань юрсö, лэдзис синнэсö.

— Эн простит, сiдзкö, сэксясö?

— Рад бы, кыдз баитсьö, да... — одзлань чöлöмöн паськöтыштiс öтмöдöрö киэсö. — Тэ жö сэкся мунöмöн ме сьöлöмын быдöс шом-пöимö пöртiн, а шом-пöимсис мöдöтпырись радейтöмыс оз зорамлы. Да и айтöм челядьсö ассим, кытчöдз ловья, меным оз ков. Тэныт, батi, колö, а меным оз. Сьöлöмшог эта неколана, кыдз сылö, сiдз и меным. — Павел дзар керыштiс аслас часыэз вылö. — Извинит, пожалуйста, меным колö мунны. — Сiя сувтiс, вуруновöй носки поддэс вылын кок шытöг оськöвтiс порог сайö, пондiс кöмасьны-пасьтасьны петанiн дынас.

«Горöтчас эшö мыйкö или оз?» — думайтiс эта коста Аня ас кежас, диван вылас одззамоз чöлöмöн да вöрöтчытöг пукавтöн.

Шыасьöмыс местö кылiс, кыдз ружтыштöмöн пöднассис ыбöс, топ лыйис, шовкнитiс-игнассис английскöй замок. Оськöввес лöньсисö.

Кытшöмкö кадö öтöрсяняс ни кылiс, кыдз заводитчис мотор, а чожа мый лöньсис бöр и сылöн уджалан шумыс.

Öнi вöлись Аня лэбтыштiс вывлань синнэсö, вель дыр да гажтöма видзöтiс осьтытöм вина бутылка вылö, а кöр синваэзöн тырöм синнэс адззынытö дугдiсö, нiйö чышкытöг, уськöтчис аслас кöдзыт да гажтöм ольпась вылö.