Глава III

Картовыс Таисьялöн и тыртсис. Но сiя кадö карчйöрын уджыс вöлi эшö сымда, что лун куим сьöрна кöть эн и петав. Лук гряддэзся сiдз жö вöлiсö тырöмöсь быдкодь ёг турунöн свёкла да морковь. Колiс тыртышавны бытшöма ни кутчисьöм капуста, ытшкыны межаэз вылiсь турун, кöда ыджыт зэр коста мукöдлаöттяс вöлi нельки водöм. Но и куканнесö вердöм увья полöтан думаыс нывка юрись сэсся эз ни петав, гуддисьны эстöн эз сет.

Чожа карчйöрсис Таисья петiс бöр, бергалöв-керис мыйкö дырна посöдзын да керкуын, кошшис важ замоккез бердiсь ключчез, иньдöтчис фермаö.

Сьöрас вайöм ключчезöн нывка вель дыр гуддисис осьта замок бердын. Мый бы сэтчин эз вöв, а кольны чомсö осьтöн öнi сiя эз ни лысьт. А сэтöн, кыдз нарошно, нёль ключ коласiсь и öтiк эз лöсяв. «Мый жö керны? Эд не узьлыны жö меным чом ыбöс дорас».

Сёрöнжык, кöр быдöс надея игнавны замоксö вöлi öштöм ни, ключыс сё жö адззисис. А öшалöм сiя конюховкаын, стена бердö дорыштöм кöрттув вылын. И кöр нывка вайис да пыртiс сэтчин рос, сэк вöлись коланаыс и усис син вылö. Чом ыбöсыс вöлi игналöм. Этасянь Таисьялöн и сьöлöм вылас лоис кокнитжык.

Сэк кежö куканнес, пöтöсь ни, быдöнныс ештöмась вуджны шор мöдöрас и сэтчин, вылынжык местаын, водöмась шоччисьны. «Ась. Ме сэк тожö шоччисьышта». Таисья пуксис завор сайись одзза местаас. Тöдвылiсь эз петав школасянь босьтöм письмо. Сё эшö жалейтöмöн нывка думайтiс аслас неважынся мечта йылiсь. Сiя тöдiс, что вступительнöй экзаменнэс таво сiйö эз ни бы падмöтö, и кытшöм бы вöлi бур мунны велöтчыны одзлань эта жö годö. Этна думаэз сайын зоотехник сiйö и застанитiс.

Таисья, кöр казялiс сылiсь сибöтчöмсö, ас кежас думайтiс, что часöт мöдыс пондöтас баснисö виль подакокувт йылiсь. А зоотехник мыдз оськöввезöн сибöтчис зэв, здоровайтчис, юалiс:

— Кыдз нö талун чеччин? Эн сёрмы асывнас? «Норасис я мый я кинкö?» — дивуйтчыштiс ас кежас.

— Чеччи тай, гымалöмыс саймöтiс да. Не сiя бы, дак лунтыр узи.

— Адззылiн вот, кыдз сiя вильыс да коланаыс миян правленчикöт сетсьö? Пондан тöдны. — Зоотехник лэдзчисис ордчöн, резиновöй сапожкаэсö коксис кыскавтöн, одзлань баитiс: — Сöскöмö ни эд, сöскöмö, позьö шуны, öманыс сюйыштан, ньылав дзир тöд. Но да кытчö тэныт? Не — и дöс сэтöн. Кыдз пыксясö мыйкö бердö — тракторöн местасиныс он вöрзьöт, бытьтö тэ нiйö кытшöмкö преступленнё вылö ылсöтан. Тысяча мымда быдкодь причинаэсö адззасö, асьтö смех вылö лэбтасö, мед только нем не керны.

— А былись эд, Светлана Савельевна, — шыасис Таисья зоотехник сьöрö. — Ме вот мымда ни ас кежам думайта эта йылiсь, а вежöртны некыдз ог вермы. Мыйын сэтöн ладыс?

— А сыын и эм, что вильмоз, кыдз отирыс, миян юралiссезным уджавнытö оз кутчисьö. Мыйын эшö этася? — А недырик чöлыштöм бöртi одзлань öзйыштöмöн: — Тэ думайтан, нiя оз тöдö, кыдз талун мöдiк районнэзын, мöдiк хозяйствоэзын подасö видзöны? Эн думайт, Таисья, тöдöны. Öддьöн нельки бытшöма тöдöны. А оз кö кутчисьö асьныс, дак сiйöн дзир, что охота абу. Эд эта понда ковсяс не только думайтны, кысь, шуам, сiйö жö виль подакокувтсö адззыны, а мыйкö эшö и керны — кöть сiйö жö вердчансö ой кежас подаыслö ытшкыны да ваявны. А мыйлö? Кöр нылö сытöг буржык да кокнитжык. Кытчö, шуам, буржык да кокнитжык йöртны сы местö быдöс подасö öтiк пар йöрö. А эм или абу сэтчин сылö кытшöмкö вердчан, эта нiйö немымда оз гильöт. — Подöн ветлöтöмсянь мозолитöм коккесö жагвыв малавтöн, зоотехник недырик чöлыштiс, нёджжöвтыштiс Таисья ладорö. — Кылiн вот, кыдз подасö пар йöрас видзöм увья бригадирыс тэныт горöтчис: деддэзным дырни пö эшö сiдз вöвлi. Эта ны понда закон. И нач не сiйöн, что сiдз колхозыслö мыйöнкö буржык, а сiйöн дзир, что этадз нылö аслыныс кокнитжык. И сы понда, нiя готовöсь кучиксиныс петны. А кыдз буржык хозяйствоэзын талун подасö видзöны, эта йылiсь и кывзыны оз думайтö, сiдз кыдз эта понда колö уджавны. Вот нылöн и быдöс политика. Видззес пö, видзöт тэ, подакокувтыс вылö абу, турунсö куканнеслö ой кежас некытiсь ытшкыны. Кывзыны бригадирлiсь баснисö, дак кыдз бытьтö быдöс сiдз и эм. А что ачыс годiсь год кык мöс да кык öшка тöвйöтö, дак сэтöн мылякö оз баит, что нылö некысь ытшкынытö. Лысьтас разь казьмöтны, кöр колхознöй видззес вылiсь ытшкöм туруннас не колхознöй подасö, кыдз колiс бы, а медодз ассис вердö? И не бригадирыс öтнас сiйö керö. Талун быдöнныс сiдз керöны. Эта увья колхознöй подаыслö быд год вердчаныс и оз тырмы.

Быдöс, мый йылiсь баитiс зоотехник, — быдöс сiдз и вöлi. Уна öтi-мöдi эта коласiсь Таисья кывлiс да тöдiс и сы баснитöг. Сiйöн нывка дивуйтчис öддьöнжык не сы баснилö, а сылö, мыля сiя чöлiс эта йылiсь правленнёас, заседаннё коста. «Мыйын сэтöн ладыс?» Но кытчöдз аслас юасьöмöн нывка эз дзуг сылiсь баснисö, мöдыс, и, натьтö, казявтöг, мый думайтöны часöт сы басни йылiсь, тэрмасьöмöн, дзик полiс кытчöкö сёрмöмись, одзлань висьтасис:

— Адззылiн вот, кыдз бригадирыс тэ бердö кутчисис, кöр горöтчин, что подасö сэтшöм видзöм-вердöм понда талун миянöс судитны колö? Öддьöн эта истинаыс нылö эз гленитчы. Сэтчöдз эд, видзöт жö, дорйисьны пондiс, что и тэныт паныт судöн грöзитiс. А сы понда разь только, Таисья, талун миянöс судитны колö, что гожум шöрнас колхознöй подасö вердны ог кутчисьö, тшыгйöтам? А тавося куканнес понда?.. Эд мöссэс фермаас тöвбытнас сто шестьдесят пиялiсö. А видзöт вот, кыным кукань тулыснас, веж турун вылас лэдзим? Быдöнныс сэтöн, син одзат. — Кинас öвтыштöмöн зоотехник мыччалiс видз вылын вердсись (öнöдз нiя вöлiсö сувтöмöсь ни) куканнез ладорö, — и сэтöн эшö кыкдас мымда мöймусяöсь. Кытöн остальнöйыс, юалан?

— А былись эд, Светлана Савельевна... дивуйтчöмöн шыасис Таисья, — ...сымда кö, шуат, тöвбытнас мöссэс пиялiсö дак?

— Кватьдас куим юр, Таисья! Вежöртан тэ сымдасö, он? Кватьдас куим юр! Думайтны эд только!.. — аслас дивуйтчöмсянь зоотехник хлоп вачкис киэзнас боккес кузя, — ...ферма увтас упадьнас катша-ракаыс кокалiсö да деревенскöй поннэс вильöтiсö! А эта понда разь миянöс судитнытö оз ков? Эд ло сымдаыс ме увья, öтнам увья, дак эта понда киöн и кокöн эн бы тырмöтчы. Уж сiдз и тöд — дас год кежö бы решётка сайö йöртiсö. А эстöн некинлö и нем. Некин тай шы оз сет. Кыдз бытьтö сiдз и колö.

— Былись я мый я, Светлана Савельевна? — эз вермы видзсьыны Таисья, ыждöм синнэзöн да кваркышавтöг сы вылö видзöттöн. — А мыля? Некин, батi, эта йылiсь нем оз и тöд да?

— Да но тэныт, «некин оз тöд». Быд месяц правленнёыслö фермаэссянь отчёттэсö сетöны. И правленнёыс районас сiдз жö. Быдöнныс тöдöны, да только некин шы оз сет. А сiйöн дзир, что винитны кинöскö öтiкöс эта понда оз позь. Быдсöн правленнёсö колö. Да сiйöн эшö, что подаыс не асланыс кинлöнкö, а колхознöй. А мыйлö колхознöйыс понда?

— Ужас! Эта жö ужас! — öнi и Таисья öдззис хлопöтны киэзнас боккес кузя.

— Сiя жö и эм — ужас. А мыйсянь быдöс? — И аслас жö юалöм вылö зоотехник юöртiс: — Не бур олансянь, натьтö. Бура, бытшöма подасö видзöм-вердöмсянь сэтшöмыс оз овлы. Примитi ме мöйму öтнам, комиссиятöг, сiдз правленнёсянь тшöктiсö, бригадиррезсянь фермаэзлö вердчан. А сiя нылöн джыныс сiсь вöлöм. Ас синнам адззи сымдасö да горöтчынытö нем эг лысьт. Мый ме томувья... Первöй год жö... Пондöтчи вöлись уджавнытö да... Горöтчылi жö кынымиськö, кöр пöдöм турунаöсь зороддэс пантасьлiсö, что сэтшöмсö, мыся, примитнытö эз бы ков, оз сёй подаыс. А эта вылö бригадиррес, кыдз ас коласын баитчöмöн, быдöнныс öтмоз: «Мыйöн нö, он примит дак, эта ыжда аравасö тöвйöтны мöдан? Не сытöг. Пöдыштöм сымда-мымдаыс. Но да мый этаись повнытö? Колкознöйыслö ладно. Вердсяс коласас. Тöлыс кузь — быдöс дзимлялас». Пыри ме акттэсö гижтöдз председатель дынö, висьтала, то кыдз, то кыдз, мыся, Яков Терентьевич, уна туруныс пöдöм да сiсь, мый сыкöт кернытö? А сiя меным бригадиррес моз жö: «Примитны колö, кытшöм эм. Кысь тöв шöрнас буржыксö ваян?» Вот и примитi ас юр вылö. Декабнас ни, кöр эшö пийöтчан кадыс эз сибав, менам мöссэс чöвтчыны пондiсö. Етша кытшöм лун сытöг чулавлiс, мед кытшöмкö группаись кöть öтiк эз костiась. И сiдз кыкдас сизим мымда. Вот вöлись кытöн бы ме гырдззаэзöс курччалi. Но, кыдз баитсьö, матын — да он судзöт. А уж горзынытö эта увья усис пöттöдз, — ыш ловзисис зоотехник, гогинялöв-керис юрнас. Эта бедаыс чулавны эз ешты, вöтiс мöдiк. Куканнес, кöдна ловйöн шогмисö, тожö кувны пондiсö.

— Шогöт ли мый ли кытшöмкö?..

— Да не. Некытшöм шогöт эз вöв. Пийöтчан отделеннёыс фермаас öнöдз абу. Кукань картаыс учöтиккес понда строиттöм. Шогмöмныс бöрсянь ми нiйö, беднöйезöс, сэтшöминö янсöтам, кытöн тöлыс лун и ой быд ладорсянь вижгö-нöбöтö. Вот нiя миян сэтöн и кынмалöны, вот и кулöны. Кукань картасö куимöдз год ни строитöны, сё эшö некытшöм конец оз тыдав. И озö кö кончитö таво гожумнас, дак и одзлань нем оз вежсьы, тöвнас бöра сiя жö и лоас.

Эта вылын зоотехник недырик кежö лöньсис, нюжöтчис аслас сапожкаэз бердöдз, бергöтiс нiйö шондiлань мöдöр боккезнас.

— Сэтшöм вот, Таисья, талун миян олан. И тэнат эта... — юрнас öвтыштöмöн Светлана мыччалiс кукань карта ладорö, — ...тожö ни важся-важ, отирыс шуанöн, öтiк честнöй кыв вылын видзсьö. Пöльтыштас вынажык тöв, сiдз и тöд, бок вылас водтöтас. А мый керны? — Зоотехник гажтöма ловзисис. — Талун сiя ни бур, что куканнеслiсь подакокувтсö вежисö.

— А мыля тi, Светлана Савельевна, быдöс этö меным висьталат? — юалiс Таисья недырик чöлыштöм бöртi. — Мыля не правленнёыслö. Заседаннёыс коста эд колiс эта йылiсь баитнытö.

— Мыля, шуан?.. — Зоотехник лэбтiс му вывсис ытшкытöм турун тылöп, пиннес коласын засö жагвыв курччавтöн мыйкö дырна думайтöв-керис ас кежас. — Сiйöн, что мыдзи ни ме эта йылiсь предыслö да правленчиыслö баитнытö. Сэтчö жö, мымда бы эг баит, некин менчим басниöс оз кывзы, и прокыс этаись сё сымда.

— Мыля жö бöра?..

— Часöт быдöс висьтала, — зоотехник павкöтчыштiс кинас Таисья кисой бердöдз, бытшöмжыка лöсьöтчыштiс местаас. — Вежöртан, Таисья, меным эшö тöн, кöр тэ пондöтiн правленнёас баснисö нетуяна подакокувт йылiсь, медперво некыдз эз веритсьы, что сiя мыйкö вермас вежны. Пöдтасö, думайтсис, кыдз менö жö, горшшезнаныс, сымда и лоас. И дзир сёрöнжык, кöр не нiя тэнö, а тэ аслат кыввезöн, дзик дорин, жмитiн быдöннысö, кыдз баитсьö, стена бердö, что паныт нылö и горöтчынытö лоис нем, сэк вöлись и вежöртi, кытшöм повтöмöн, веськытöн да лэчыт кылаöн колö лоны, мед вермыны вермасьны аслат убежденнёэз понда. И не только вермасьны, но и вермыны. Вежöртнытö, Таисья, ме сiйö и вежöртi, да вот беда — аслам менам сiдз оз пет. Сiйöн и баснисö менчим, кыдз да мый йылiсь бы эг баит, миян правленчиыс оз кывзö. Оз сiя менам мöртчы ны ылöсö сiдз, кыдз тэнат. И эшö, Таисья... Этö ме тöн тожö казялi. Лöгöтö кö, шуам, тэнö, öзтö кö öддьöнжык быд паныта кыв, то менö сэтшöмыс дзир сорö да ладсис öштö. И дзуг сiдз öтпырись басни коста, йитны сiйö бöр ме ог ни вермы. Веритан-он? Öша. Нем ог вермы сэсся висьтавны.

Аскöттяс Таисьякöт сэтшöмыс эз вöвлы. Былись, кыдз и горöтчис часöт зоотехник, аслас убежденнёэз понда споритöм коста быд паныта горöтчöм кыв сетлiс нывкалö унажык вын. Но вежöртiс Таисья и сiйö, что лоны öткодьöн быд мортыс оз вермы. Сiдзкö, и не веритны зоотехниклö некыдз эз позь. Мед не сорны сылiсь одзланься баснисö, паныт сы юалöм вылö нывка öнi эз ни шыась, дзир гогиньтыштiс юрнас. А мöдыс эта коста одзлань эшö юöртiс:

— Висьтавны кö веськыта, дак ме тöн тэнат баснилö сэтчöдз завидуйтi, что веритан-он, нельки синваэз петiсö. Вот бы, мыся, меным сэтшöмнас лоны да вермыны сiдз миян правленчикöт воюйтны. Но мый эд керан, абу кö меным сымдасö еныс сетöм, — гажтöма шутитöмöн горöтчис зоотехник. — Абутöмсö он одзöст. А тэ, Таисья, молодец! Спасибо, что йысö вöрзьöтiн. — Светлана кутчисьыштiс нывкаыс пельпон бердö, не сiдз жмитыштiс ас бердас, кыдз ачыс жмитчыштiс сы бердö. — Спасибо, Таисья! Эта бöрсянь и ме, батi, чорытжык мывкыдаöн лоа. Вот бы тэныт, кывзы, ме местын уджавнытö, дак öддьöн бы, натьтö, этасянь уна прокыс вöлi. А мыля ме быдöс йылiсь тэныт висьтаси, дак öнöдз, натьтö, и ачыт ни вежöртiн. Колiс жö эд кинкöткö кöть öтпырись сьöлöмшогсö янсöтны, мед тэнö не только кывзiсö, но и вежöртiсö. Ачыт тöдан, что сэтшöмсö быд мортыслö тожö он висьтав, — кончитiс зоотехник ассис баснисö.

— Да-а, — öнöдз эшö дивуйтчöмöн шыасис Таисья, öвтыш-керис öтмöдöрö юрнас, гажтöма ловзисис. — Этатшöм порядоккес дырни колхозсö, батя, чожа он сувтöт. — Ась, — öвтыштiс кинас зоотехник. — Тырмас талун эта йылiсь. Век сьöрна сiдз сё ни оз ло. Кöр-некöр сё буржыклань вежсяс. Кыдз талун куканнет? — Сюйис кокас тöвзьöтöм ни öнöдз сапожкаэсö. Кыкнанныс öтдруг сувтiсö.

— Син одзаныт вот. Сёйöны тай. — Таисья öвтыштiс кинас видз ладорö. — Пышшавны эстöн некытчö. Вöтлiсьны да панласьны оз ков. Кыдз йöртi асывсяняс, дак öнöдз юррезнысö эшö эз и лэбтылö.

— Ась сёйöны. Эстöн не пар йöр — вердчан тырмас. А пизьсö да совсö, забыль, вайисö?

— Асывсянь эшö. Только кыдз ме нiйö верднытö, Светлана Савельевна, понда? Куканнесö ме шуа.

— Мыля кыдз?

— Дак нем жö ог тöд. Баитi вот тöн правленнёас, что килограммовöй привессэз колöны. А талун кыдз пондi думайтны ас кежам, мый эта сэтшöмыс, дак сэтöн вöлись и повзи. Весь ме, натьтö, быдöс этö ас юр вылö. Эд öтiк пастучитöмнас сэтшöм привессэзöдз нiйö сё ни он верд. А кыдз да мый эшö этася пондыны керны, немись нем ог тöд. И нем, натьтö, менам оз и пет этаись.

— Таисья? Да тэ мый? — дивуйтчöмöн горöтчис зоотехник. — Мый жö тэ кöдö оз ков баитан? Тэнат, да эшö бы эз пет? Кинлöн нö сэк петас? Öгань бабыслöн я мый я? — А одзлань убедитöм могись: — Чапкы тэ быдöс этö юрсит. Эн пов, не полiсь родiсь топ кыдз да. Вöлi бы охота да вердчан — быдöс петас.

— Ог тö-öд. Некытшöм жö опыт эшö абу.

— Лоас, абу дак, эн тöжды эта понда. Опытыс оланкöт локтö. Кывзы вот, мый ме тэныт висьтала. Мукöд яслиэс жугалöмöсь, дак этö ме талун жö айöлö висьтала. Ештас — лöсьöтас. Сiя тöдö — кыдз да мый. А тэ быд яслиö совсö пыртлы да тэч. Велаласö куканнес сiйö нювны, буржыка сёйны-юны пондасö. А пондасö кö ваявны ой кежö турун, тэ сiйö яслиэзас пизьнас сорлав и ась сёйöны. Луннас пондан пастучитны, а ойнас вайöм турунöн вердны. Адззылан, мый лоас. Месяц бöртi куканнетö он и тöд.

— А, натьтö уж, — шынньöвсö сайöвтöмöн шыасис Таисья.

— Не «натьтö уж», а быль ме тэныт висьтала. Не сыись тэ, Таисья, полан, мыйись колö бы.

— А мыйись эшö?

— Сыись, что бригадирыс миянлö турунсö ой кежас ваявны оз понды.

— Кыдз оз? Решеннё жö примитöм.

— Сiдз-ту сiдз, примитöм. Да только бригадирыс понда сiя не закон. Адззылiн жö, заседаннё вывсис пышшис. Этö ме одзза год сьöртi тöда. Мöйму эта вылö предыс распоряженнёсö тожö сетлiс. Дак гожумбыт сьöрна ме сы сьöрын вöтлiси, гожумбыт, кыдз енлö, кейми. А сiя кыдз эз понды ваявны, сiдз гожумбыт и эз.

— А мый нö сэк ми пондам керны?

— Колö бы кыдзкö медодзза луннэзсянь вермыны тшöктыны. А оз кö сiдз шогмы, дак бöртiжык сылö юр вылас кöть майöг лöсав, оз мöртчы. И неумöль бы эшö подакокувтсö шöри торйöтны. Но этö уджсö правленнётöг тожö он кер. Бригадирыслö наряд колö сетны. А сытöг сiя миянкöт и баитны оз понды.

— А янсöтнытö, Светлана Савельевна, мый вылö?

— Мед сiя миян культурнöй пастбищеöн лоис, а не просто подакокувтöн. Видзан, шуам, тэ куканнесö неделя кык сьöрна öтöрас, турунсö сэтiсь травитан, а мöдöрыс эта коста шоччисьö, виль турун сэтчин быдмö. Вуджöтан куканнесö сэтчö, а эстöн сiя жö лоас, виль турун пондас кайны.

— Бур бы, натьтö, сiдз-ту...

Басниыс коласын нывкаэз сибöтчисö завор бердöдз, сувтчисö.

Спектакль вылас, Таисья, забыль, мунан жö, он?

— Кытшöм эшö спектакль вылö? — дивуйтчыштiс куканьвöдитiсь.

— Да тэ мый? Öнöдз разь нем он тöд? Миян жö талун окружнöй театр клубаным спектакль мыччалö. Локтöмась ни артисттэс. Трасса вывсяняс машинаэзнысö леспромхозовскöй тракторöн кыскалöмöсь.

— Былись? Вот миян колхоз йылiсь бы и мыччав, — шыасис Таисья. А ме öнöдз нем ог тöд. Ог ветлывлы клуб ладорас да.

— Вежöрта, Таисья, — некöр кытчöдз. Но öтпырисьсö колö жö видзöтны. Сымда эд нiя миянö год пытшкас и сибавлöны. Бур эшö, что талун кежö кыдзкö локтiсö. Ашын, дак и меным бы не видзöтны вöлi.

— А мый сэтшöмыс?

— Ашын асывсянь ми мöс фермасö гожумся лагерьö вуджöтны пондам. Меным сэтчин ковсяс лоны. А мый дырна, эшö и ачым ог тöд. Ассис думаэсö думайттöн зоотехниклiсь баснисö Таисья кывзiс умöля. А кöр мöдыс лöньсис, сэк вöлись куканьвöдитiсь горöтчис:

— Кытчö нö ме куканнесö коля, мунны кö спектакль вылас?

— Дак тэ сы вотöдз нiйö и йöрт. Ась сёйöны. Сы бöрсянь кежалан. Не ыбись жö вайöтны. Ачыт тай баитан, что пышшынытö нылö эстiсь некытчö.

— Сiдз-ту сiдз. Дак менам эд эшö этася... — Таисья öвтыштiс юрнас куканнес ладорö, — ...и гортын удж да пода.

— Сё мамыт больницасис эз лок?

— Эз кытчöдз.

— Сэк Öгань бабсö кор, ась мöстö высьтас. Этадз, натьтö, и былись позис. Но ветлыны сэтшöм часто Öгань баб ордö öтiк и сiя жö могöн да сэтчö жö эшö спектакль увья Таисьялö вöлi недолыт. Сiйöн янсöтчиканыс ни сiя паныт шыасис:

— Видзöтам сэтчин.