Менам ыбшар

Позьö я лыддьыны гожумöн деревняын олiсь мортлö сiйö гожумсö, кöд коста тэ нельки öтпырись он кыв ыбшарлiсь сьылöм-горалöм — кöр шоналöм да тулысся веж петассэзöн вевттисьöм ыб весьтын, одз асывсянь лунтыр сьöрна сёр рытöдз, дзик сылöм шондi воттезöн вылiсянь киссьö-виялö сэтшöм чиння-гора, сöстöм да сьöлöм саймöтан: тир-рли-рли-рли, вир-рли-рли-рли, си-ля-ля-ля, ви-лял-ля-ля, тюр-р-р, тюр-р-р, тюр-р-р? Думайта, что сэтшöм сьыланкывсö кывтöг лыддьыны гожумсö гожум местö оз позь. Меным, чужöм-быдмöмлö пыд вöр коласiсь деревняын, ыбшарлöн сьылöмыс тöдса бытшöма. Сы дынö ме велалi учöтсянь, и сытöг чулöтöм гожумыс ме понда тай эз и вöв.

Бöртiжык оланас петiс сiдз, что овнытö усис городын. Но ыбшаркöт ме нельки öнöдз эг янсöтчы, öнöдз олам ордчöн. А быдöс сысянь, что городас ме ола не унасувда благоустроеннöй коробкаын, кöда вачкисьö чожажыксö зверинец вылö, кысянь не ловья мусö, не ыркыта кышöтан пу листсö, не оссьöм цветсö он ни казяв; кытчö-кöдöрö бы эн оськöвт — сё öтiк изовöй стена. Ме ола аслам неыджыт усадьбаын, аслам керкуокын и бöра жö не город шöрас, кытöн зын-бусöн сорлассьöм руыс пöдö автомашинаэз дзингöмсянь. Менам керкуыс сулалö тшöтш город дорас, а сы бердсянь и тшöтш вöр бердöдз эшö нач неважын куйлiс гöрöм да кöдзöм ыб.

Öнöдз эшö тöдвылын сiя медодзза тулысыс, кöр сетöм участок вылö ме пондöтчи ваявны быдкодь колана материал, мед строитны керку. Эта вöлi мартнас, кöр сулалiс мича да шоныт погоддя, сылiс лым, визывтiсö шоррез.

Апрель вылас, öтвыв ме участоккöт, сылöм лым увтiсь пондiс кушамны гöрöм ыб. А чожа мый лымыс, бель видзан кöччезöн, кольччис куйлыны дзир лажмыт местаэзын, кырассэз да канаваэз пöлöн. Кушамöм жö му бердiсь да шондiа погоддяö син одзын вериктöмöн вывлань лэбтiсис кокнит да чуть тöдчана пар. Муыс пондiс шуравны гöран-кöдзан кад кежö.

А кытшöмкö лунö, асывсянь, кöр ме киам черöн воли вайöм вöр бердiсь кач, кысянькö нач неылiсянь ыб ладорсянь ме пельшы бердöдз сибалiс: тюр-рли-рли-рли, вир-рли-рли-рли, тюр-ля-си-ля, ви-ля и сiдз одзлань. Вежöртана, что сьылöмыс кылiс ыбшарлöн. Сылiсь сöстöм сьыланкывсö тöдiсь морт некытшöм мöдiккöт некöр оз сорав. И сё жö эта менö дивуйтiс. И эз кö меным медперво сыö веритсьы, дак дзир сы увья, что эта вöлi зэв город бердас, кöдöрсянь и быдкодь бус-газсö петкöтiс тырмöмви, и быдкодь тракторрезсянь да автомашинаэзсянь шумыс сибалiс тожö бытшöма. Но кöр ме бергöтчи да пондi нёджжасьны горалöмыс ладорö, недыр мыйись и былись казялi вывланьын перыта шевкйисян борда каёкöс. Сэк кежö сiя эшö невылына öшалiс му бердсяняс и тыдалiс бытшöма. Руд каёк перыта-перыта шевкйышалiс паськöтöм борддэзнас, а öткоста, сiдз жö дугдывтöг, киськалiс-вотьöтiс му весьтас ассис сэтшöм сöстöм да гора сьыланкыв.

Чулалiсö минута бöрын минута. Эта коста ыбшар лэбтiсис сё вылöжык да вылöжык. А öтлаын этакöт и сьылöмыс сылöн лоис топ сё сöстöмжык, сё вынажык да горажык. И кыным вылöжык лэбтiсис енöжас сера каёк, сыным паськытжыка паськалiс гöрöм ыб пасьта сылöн сьылöм.

Даскыным минута сьöрна, кöр ме чатырöн вывлань видзöтнытö мыдзи ни, ыбшар лэбтiсис сы вылына, что пöртчис чуть тыдалан точкаö. А медбöрын и эта сьöд видзан точкаыс öшис мыдзöм синбур весьтiсь, дзик незьдiс енöжлöн дортöм-помтöм пыдынiнас. И дзир дугдывтöг да быднёжа питиртöмыс, ордчöн кöдакöт эз позь сувтöтны нельки медмастеровöй скрипкалiсь горалöм, öнöдз эшö эз лöньсьы ме пельшы весьтын. Сiя одззамоз, дзик пожнассис, киссис да киссис му вылас. Но вот кысянькö нетыдалан вылынiнсяняс ни, нетыдалан жö ыбшар шутньöвтiс горöн да нюжвылöн, сэсся эшö öтпыр, лöньжыка эшö, а эта вылын быдöс лöньсис. Эта сьöртöт и позис вежöртны, что сiя судзöтiс ассис колана потолок, а öнi мыдзöм, но гордöй аслас басöка сьылöмсянь, изöн моз лэдзчисьö бöр му вылö. Но кöд местö пуксис бытшöма сьылiсь сера-гора кай, сымдасö ме эг казяв. Этасянь сэк меным и пондiс думайтсьыны, что сiя кежис ме участок дынiсь кытчöкö мöдiк местаö и матö ме дынö сэсся некöр оз ни сибав. А недыр мыйись ыбшарлöн сьылöмыс кылiс вились. И мый вöлi эстöн меддивуйтанаыс, дак этö сiя, что кылiс сьылöмыс бöра жö важ местасянь, нач ордчöн менам участок дынсянь. И кылiс сiдз сьылöмыс лунтыр сьöрна.

Эз лöньсьы ыбшар и ашынас, кöть ме этаись мымдакö сё эшö полi.

Одз асывнас, кöр ме вöлись локтi уджавны аслам участок вылö, сэк кежö гора кай öшалiс ни енöжас ордчöн гöрöм ыб весьтын да пöдтiс аслас питиртöмöн сы весьтiсь ыркыт эшö да сöстöм русö.

Эз чапкы ассис бöрйöм местасö да эз мун мöдiклаö ыбшар и сёрöнжык. Не первöй год ни олiс сiя, тыдалö, матын город бердас и кольнытö сiйö öтпырись бöрйöмсö, натьтö, вöлi жаль. Сьылiс ыбшар, кöр ме садитчи: лунiсь лун, быдса неделя сьöрна бергöтi кöртзырöн вильса му, лэбтi гряддэз да медодзза жö годö сюйи лук, чеснöг, картов да капуста. Сьылiс и сэк, кöр пондöтчи садитны сад: гарйи гуэз да лёдззезöн садитi сьöд, гöрд да чочком сэтöрлiсь кусттэз, öмидз да крыжовник. Сьылiс сера-гора кай и сэк, кöр сибалiс кад тыртны петалöм картов, а сы коста жö, удж коласас гарйи керку увтö котлован да пондöтчи кисьтны фундамент.

Öткодь шоныт да мича погоддяыс гожумбыт сьöрна оз овлы. Вöвлi, что мукöд кадö сiя тшыксьывлiс, то ли кымöртчывлiс кынымкö лун кежö, то ли лэбтiсьлiс кöдзыт да вына ойтöв. Но ыбшарлiсь сьылöмсö нельки эта падмöтны эз вермы. Сiя быд асыв лэбтiсьлiс пыдöстöм енöжö, дугдывтöг дзурликтöмöн киськалiс сэтчинсянь аслас поз гöгöрöт му.

Лöньсьывлiс сера кай дзир ыджыт зэр коста, кöр нельки сысся унаöн гырисьжык катша-рака эз лэбалö. Сэк ыбшар, натьтö, тожö пукалiс кытшöмкö му комок нето кöчка бердö сайöвтчöмöн, полöмöн видзчисис ассис кад. И вöвлi, кöр и зэрыс эшö быдсöн чулавнытö эз ештыв. Кытшöмкö бöрлань кольччыштöм кымöрок бердсянь перыт воттез сё эшö вартiсö ульсалöм му кузя. Но сьылiсь ыбшар видзчисьны зэрыслiсь досповна дугдöмсö, тыдалö, эз ни вермы. Паськöтöм борддэзöн сiя чепöссьывлiс аслас местаись, калькавлiс му бердiсь да сувтчышалöмöн вывлань лэбтiсьтöн, вились кутчывлiс кöдзны-койны ассис сöстöм питиртöм. Сiдз аслам удж да ыбшарлöн гажöтан сьыланкыв коласын и чулалiс менам участок вылын гожум. Сибöтчис август — арвыв кад.

Сэк кежö ыбшарлöн аслас сьылöм коласын лоисö петкöтöмöсь да быдтöмöсь-вердöмöсь мöдiк позувт ни пияннэз. Эстöн корсьö юöртны эшö то мый йылiсь. Кыдз гижö аслас книгаын «Певчие птицы» кайесö бытшöма тöдiсь морт, свердловскöй гижись Николай Григорьевич Никонов — сьылö дзир айпöв ыбшар. Мампöв кайыс сымдасö кернытö оз прокмы, да и сьывнытö сылö некöр. Эта коста сiя пукалö аслас позын, кольттез вылын да пöжö пияннэз. Дак вот, август кежас менам ыбшарлöн пияннэс вöлiсö петкöтöмöсь мöдiк позувт ни. А сёрöнжык, эшö арся зэра да кöдзыт погоддя сибöтчöм вотöдз, ыбшаррез öтлаын асланыс пияннэзкöт лэбзисö тöвйыны шоныт местаэзö.

Гажтöм зэра ар да кузь кöдзыт тöв коста меным часто усьлiс тöдвылам гора кайлöн гажöна сьылöм-питиртöм. Сыкöт янсöтчöм бöрсянь вöвлi кыдзкö гажтöм. «Локтас я эшö аслас бöрйöм местаö мöдiк гожум кежö?» — часто думайтлi ме сэтшöм кадö. Вöлi öддьöн охота, мед ыбшарыс локтiс.

Тулысыс сибöтчöм коста ме вились кутчиси аслам строитчан удж бердö: колiс тшупны да лэбтыны одзлань керку стенаэз. Сэксянь жö пондi видзчисьны и ыбшарлiсь гортö бертöм. Удж коласын, лунiсь лун, ме видзöтышалi аслам участоккöт ордчöн куйлан ыб вылö, кöда вылiсь жагвыв сылiс да мунiс лым, кывзiсьлi — оз я сибав сы ладорсянь пельшы бердöдз ыбшарлöн сэтшöм тöдса шыасьöм.

Колö висьтавны, что аслам надейтчöмын эг сорась. Кытшöмкö лунö апрельнас, кöр ордчöн куйлан ыб вылiсь мунiс лым, а мича да шоныт погоддяыс вежсис кöдзыт да кымöра вылö, ойтöлöн ме пельшы бердöдз вайöтiс ыбшарлiсь питиртöм. А кöр ме радувья видзöтöв-кери шыасьöмыс ладорö, сiя вель вылына öшалiс ыб весьтас да, кыдз и одзза годö жö, гажöн питиртiс-сьылiс. И вились аслам удж да ыбшарыс сьылöм коласын пондiсö чулавны лун бöрын лун.

Сiя гожумö ме лэбтi быдсöн ассим керку. А ар кежас, кöр гозья ыбшар асланыс кык позувтся пияннэзöн иньдöтчисö тöвйыны шоныт местаэзö, ме тожö шонтi ассим строитöм пельöс да пыри сэтчö тöв кежас овны.

Эта бöрсянь чулалiс дас год. Сiйöн каднас менам участокын аслам керку гöгöр тöдчöмöн ни ештiс лэбтiсьны-быдмыны медодзза годдэзсянь садитöм сад. Уна пуэз да кусттэз пондiсö ни цветитны, и быд ар кежö сетöны быдкодь чöскыт ягöд.

Тöдчöмöн вежсис öтi-мöдi и ме керку гöгöр. Ме участок бердсянь öтмöдöрö ыб ладорас лоисö сувтöтöмöсь эшö не öтiк керкуок. Эта увья и ыбыс ме участок бердсянь вешшис вель ылö вöр ладорö. Но гора сьыланкыла менам ёрт — ыбшар нельки сэк ассис олан-сьылан местасö эз коль. Сiя вежис, дзир вуджöтiс ылöжык ыб шöрас ассис позсö. И быд тулыс, кыдз только шонтас да кушамас лым увтiсь гöрöм ыб, бертö сэтчö гожумбыт кежö.

Вот и таво, апрель шöрас, кöр ме гижа этö рассказсö, шоныт погоддя бöрсянь (а этадз овлö быд тулысö) мыйкö дырна кежö ыркöтiс бöр. Öтöрыс кымöра. Лэчыт ойтöв шутнялö проводдэз коласын, гардö да новйöтö öтмöдöрö сад пасьта мöймуся, дзимлявтöм эшö öнöдз лист. Вежöртана, что этатшöм погоддя коста и öтöрас мыччисьны некытшöм охота абу. А ыбшарлö кöть бы мый, öшалö ыб весьтас перыта шевкйышалан борддэс вылын да пожналö-кисьтö ассис сöстöм, гора да сьöлöм саймöтан сьыланкыв. Дак, натьтö, рад аслас оланлö, что эз торксьы кузься-кузь туйколасын, вермис бертны гортö, кытöн позяс поздiсьны, пöжны да быдтыны аскодьöм жö сьылiсь пияннэзöс, ассис потомство. А эталö и ме тожö öддьöн рад, сiдз кыдз ыбшарыс сьыланкывтöг ме понда гожумыс абу ни гожум.