Глава XI

Асылыс сулалiс гудыра. Порсева весьтын торк кудель моз каттисисö то ли зэран кымöррез, то ли туман, кöдна вöтисö ас пытшкын быдöс ловья шыэсö: поннэзлiсь вувтöм, подалiсь баксöм, тракторрезлiсь гурöтöм да отирлiсь баитöм. А Светланалö мыччассис, бытьтö эта пожар коста пöимöн лэбтöм кукань карта, öтлаын сотчöм подаыскöт, öнöдз эшö кöвьясьö деревня весьтын, сiдз кыдз уль да сьöкыт руыс гöгöр вöлi тыртöм сiйöн жö палитчöм гöн да сотчöм яй дукöн, кöда дзик вöтлiсис нывка сьöрын. Мед не вынсьöтны ас пытшкын шог да недолыт, не кывны гырк мöдралан да öстöдз вайöтан дуксö, деревня сайöдззас, кукань карта местас чадитан головняэс дынö талун асывсянь зоотехник эз ни кежав. Сё эшö кольмöм юра да тогзян сьöлöма, сiя локтiс правленнёöдз — колiс видзчисьны районсянь начальстволiсь локтöм, — пырис аслас чулан кодь жырокö, пöрччалiс пальто бердiсь киззез, но чöвтчынытö эз ни понды, кыдз вöлi, пуксис пызан сайö. Оз позь висьтавны, что эстöн нывкалö кернытö вöлi нем. Сэтшöм кадыс сы уджын, кöр нем бердö кутчисьны, эз на петав. Но кутчисьны мыйкö бердö талун не вын, не охота эз вöлö. Чулалöм ойся картинаыс öнöдз эшö сулалiс син одзын, пöдтiс аслас дукöн да жарöн, не сайöвтчыны кöда увья, не вештыны кöдö тöдвылiсь эз позь.

Районнöй начальствоыс, следователь Порсев, а Светлана понда öнöдз эшö Костя-принц, да пожарнöй службаись лейтенант — отир басниын — пожарник, локтiсö асывсянь. Вежöртана, что нiя перво жö пырисö председатель дынö. А мыйкö дырна сэтчин пукалöм бöртi, быдöнныс öтлаын ни: нiя кыкöн, ачыс Яков Терентьевич, бригадир да фермаись заведующöй, иньдöтчисö пожар местö.

Зоотехник йылiсь, кöда районнöй начальстволiсь локтöмсö видзчисис, натьтö, медöддьöн, некин ны коласiсь эз и касьтыв, кыдз бытьтö сiя эта свет вылын эз и вöв. Ас жырокын пукавтöн, Светлана и локтöмнысö кылiс, и видзчисис — вот-вот корасö öтлаö. Но не корöм, не юасьöм могись некин сы жырокö сiдз и эз кежав. А кöр правленнёсис быдöнныс петiсö, мед мунны сытöг, нывка, асьсö бöбöтлöм могись, думайтiс: «Жалейтiсö, мед не дойдны этöн видзöтчöмнас».

Час кыным бöртi сiдз жö быдöнныс бертiсö бöр. Светлана видзчисис, что часöт оссяс ыбöс, порог дорас сувтас ачыс председатель, руч моз рамыника, — вежöртö жö ни эд, натьтö, öнöдз, кин увья пусис эта кашаыс, — висьталас: «Пырал, Светлана, баитны корöны. Ог и тöд, кыдз да мый висьтасьнытö пондан... Но да видзöт ачыт, öтлаын эд уджалiм». Но чулалiсö час бöрын час, а зоотехник жырокись ыбöсыс сiдз öтпырись и эз оссьыв.

Председатель дынын совещаннёыс кыссис час кыным сьöрна. А сэсся быдöнныс мунiсö павжнайтны. «Павжнайтöм» вылö кадыс чулалiс эшö унажык. Сiя лунö правленнёас некин эз ни мыччась. Рытъявыв, эшö удж вывсис мунöм вотöдз, зоотехник дынö жырокас, вöлиськö, дзар керыштiсö бухгалтерияись уджалiссез: экономист Вера да счетовод-кассир Раиса, кöда порог дорсяняс ни пондöтiс:

— Мый нö öтнат, кыдз чуд, пукалан? Эз разь рочалö сотчöм пермасö гылъялны?

Раиса кыввезсянь Светланалö перыта сувтiс син одзас, кыдз позис бы гывйыштны ведрапонiсь ваöн поспу вылö курöглiсь палькнитöм. И сысянь, что баитсяс сотчöм кукань картасö сiдз жö гывйыштöм йылiсь, дзик пасьтöм вылö йыа ваöн койыштöмсянь нывка зэгöтыштiс пальто увтын пельпоннэзнас, чутыртчис-жмитчис вывтырнас.

— Тэ мый сымдасö баитан?

— Сiйö жö, мый и отирыс. Пажынöдз тай предыс дынын баитчисö, кыдз сотчöм перманытлiсь, сотчöм куканнезнытлiсь следдэсö чышкыны. Стихийнöй бедствие пö лоöм да. Асьныс пö мыйсянькö сотчöмась.

— Тэ мый сымдасö баитан?

— Сiйö и баита, мый ас пеллезöн кылi.

— Забор вевдöрöттяс эд миянлö сы жырсянь быдöс кылö, — сэтчö жö шыасис öнi и Вера, кöда кольччис сулавны порог саяс, ванйöв осьтöм ыбöс коласын.

— Кылiн вот, меным он верит дак, — баитiс одзлань Раиса. — Вот и вердiс Таисьяыс тiянлö куканнесö. Гожымбыт сьöрна эд, гожымбыт сьöрна нылкаыс пермасиныт кодьöн эз и петал. Сiя и ытшкис, сiя и куртiс, и пастукалiс, и ношаэзнас нылö вылас кыскалiс. Привессэсö округас медыджыттэзö босьтiс. Эта мымда вын, эта мымда кад торкис. Етша öшö сiя, дак öшö и асьсö пожарыс вылын стрöйдiс. И вот... На тэныт!.. Стихийнöй бедствие пö и дöс сэтöн. Не прав, не виноват — некин оз ло. Некинлö и нем эта понда. Тэнчит кöть мыйкö юалiсö жö?

— Эзö кытчöдз.

— Юаласö разь миян кодьыслiсь?.. — но одзлань кватитчöмöн да ассис баснисö поперегалöмöн: — Тожö, батi, ныкöт öтвыл да? Батi, одзлань предыскöт баитчит? Не сiдз, дак эд семьдесят тысечсö кинлöкö вештыны колсяс. Шутка разь? Не юрöн, не кокöн сэтöн он тырмöтчы.

— Тэ мый сымдасö баитан? — только и вермис горöтчыны ыждöм сина Светлана. Öшöмкодь Раисаыс видзчисьтöм баснисянь, мöдiк кыввесö сiя эз ни адззы. А мöдыс, öзтöм аслас басниöн, сылiсь панласьöмсö эз кывзы. Сiя дзик сьöвзис, зэркыта öвтыштiс зоотехник вылö:

— Быдöнныт тi эстöн öткодьöсь! — швыркнитiс-бергöтчис осьта ыбöс ладорö, оськöвтiс, порог сайсяняс эшö содтiс: — Москваö б... эта йылiсь колö гижны.

Öткодьöн колхознöй начальствокöт, кытшöмöн лыддис сiйö Раиса, зоотехник нельки аслас думаэзöн некöр эз вöв. Сiйöн аслас кыввезöн счетовод ыджыт осадоксö сы сьöлöмын эз коль. Нывкаэс мунöм бöрсянь эта йылiсь Светлана эз ни думайт. Раиса басниись сы юрын сибдiс нач мöдiк — былись я кукань карталiсь сотчöмсö примитöны стихийнöй бедствие местö? Этöн думанас бöртiжык нывка и иньдöтчис гортö.

Öтöрас пемдiс. А руас, кыдз мыччассис Светланалö, сё эшö кылiс палитчöм гöнлöн да сотчöм яйлöн öстöдз вайöтан дук.

Правленнё поспуэз кузя лэдзчытöн зоотехник кылiс öткаса тракторлiсь горалöм. Думайтны кö сы сьöртi, что колхозас быдкодь тракторыс, гусеничнöйыс и колёснöйыс, вöлiсö кыкдас гöгöр да керисö тöв и гожум быдкодь удж, дивуйтанаыс эстöн нем эз вöв. Нылiсь тöдса гурöтöмсö позис кывны кöть кытшöм кадö. Год сьöрна ны гурöтöм дынö зоотехник велалiс сыбурна, что вежöртiс этö, кыдз вöралiсь вежöртö ас понлiсь вувтöм, — тöдiс двигательыс гурöтöм сьöртi, колёснöй эта или гусеничнöй, тырöн сiя мунö кытчöкö или простöн. И чожажык сiя жö, что тракторлöн горалöмыс колхознöйес вылö, не гусеничнöй, не колёснöй вылö эз вачкись, и тшöктiс зоотехникöс сувтчыштны да кывзiсьны буржыка. Тракторыс кылiс не асланыс, не колхознöй. Öддьöн ни горöн да отчётливöя сетiс сiя двигательсянь выхлопнöй говк, а содтыны кö сэтчö жö, что керис этö лöга да быд вынiсь, кыдз тулысöн лэдзöм пороз люкалö лым увтiсь мыччисьöм медодзза шондi морос — эта сьöртi позис вежöртны, что эта не кытшöм мöдiк, кыдз леспромхозовскöй бульдозер, то ли кыскö мыйкö вывтi сьöкытö, то ли гарйö му. А содтыны кö сэтчö жö, что сылöн вынöн да лёка эрзöмыс сибалiс кукань карта ладорсянь, то несьöкыт вежöртны, кытшöм полöтöмöн сiя сидзис зоотехник сьöлöмöдз.

Думайттöг, мый сiя керö, Светлана иньдöтчис сотчöм кукань карта ладорö. Нывка нельки эз казяв, кыт да мый дырна сiя оськалiс. А кöр петiс деревня сайöдз да сибöтчис сiя местаö, кытöн тöн эта коста сулалiс ась и важ да умöлик карта, олiсö гожумбыт сьöрна сэтшöм бытшöма вердöм колхознöй куканнез, эстöн зоотехник казялiс сэтшöмö, кöдасянь, кыдз баитсьö, юрси кышöпöн сувтö.

Кыдз нывка и думайтiс, тракторыс былись вöлi не асланыс. Леспромхозовскöй бульдозер, кöда, тыдалö, локтöм эшö павжун гöгöр, öнöдз ештöм ни гарйыны вöвлöм кукань карта весьтöт метр кык сувда траншея, а öнi тойлалiс сэтчö быдöс сiйö, мый кольччис пожар бöрсянь.

Чöвтiсö я Светланаöс бимороз коста, сюйыштiсö я ловйöн би пытшкö, вежöртнытö сымдасö эз позь. Буржык лоас висьтавны, что вöлi эстöн и öтыс, и мöдыс: медперво чöвтicö, а сёрöнжык и биас сюйыштiсö. Витш кыскöм кынöмöн, ва выв шать моз зэгалан вывтырöн да ру вылö ва пытшкись кыскöм бöрсянь чери моз осьта öмöн, зоотехник, тувдöм местаас, мыйкö дырна видзöтiс сы вылö, мый керсис син одзын. Видзöтiс бы эшö, но кытшöмкö кадö нывка кылiс, что муыс сы кок увтын пондö пöлiнясьны, дзик мöдö пышшыны. И мед только не усьны кытöн сулалiс, вермыны кыдзкö видзсьыны коккез вылын, кыкнан кинас юр бердас кутчисьöмöн, бергöтчис, ватнöйсялöм коккесö дзик вата кузя жö жагвыв вештавтöн, иньдöтчис бöр.

Сысся, мый дзир часöт зоотехник адззылiс, син одзын нем эз вöв. Нем сiя эз кыв и нем эз тöд. Сэтшöмöн Светлана и бертiс гортö.

Миськавтöм сапоггесö нывка кыскалiс эшö порог сайын, а керкуас гышкöптiс-чöвтiс вывсис пальто, уськöтчис кровать вылö.

Мый керсис сы гöгöр — быдöс вöлi вежöртана. Невежöртанаöн кольччис öтiк: мый керны сылö. Нельки не сiдз. Мый колiс керны аслыс Светланалö, этö сiя тожö тöдiс. А вот кыдз сiйö вермыны кернытö — этö нывка бытшöма эз тöд. «Вöвны бы эта коста ордчöн Таисьяыслö, только бы öтнаслö сылö, и меным бы этася некин и некин эз ков. Кыкöн сыкöт, ордчöн сыкöт повнытö вöлi бы нач немись».

Ольпасяс куйлытöн Светлана кылiс, кыдз бертiс удж вывсянь айыс, кöда неважынсянь вились уджалiс колхознöй кузницаын. Кыдз сiя чöвтчис-пöрччасис, миссис да мыйкö дырна не öддьöн горöн баитiсö öтi-мöдi йылiсь мамыскöт, а сэсся пондiсö лöсьöтчыны ужнайтны. Сiя жö талун эз кыв некытшöм кынöм сималöм. Нельки баитны мыйкö йылiсь охота эз вöв. Нывка вöрöтчытöг кольччис куйлыны, думайтiс.

Кытшöмкö кадö вöрзьöтчисö занавескаэз, пыранiн весьтас сувтчыштiс мамыс, негорöн куршыктöмöн сетiс тöдны ас йывсис.

— Чеччы жö, дитя, ужнайтны колö, и айыт бы мыйкö баитö.

Ужнайтöмыс бöрсянь кольччöм рытся кад чулалiс Липоввез семьяын лоöмыс йылiсь басниын.

— Мый талун тэнат сэтчин керсьö? — юалiс перво жö нылыслiсь Савелий Григорьевич, кöр вешшис пызан сайсис да öзтiс куритны. — Кругом отирыс болк баитöны, бытьтö бы ачыс картаыс сотчöм.

А кöр Светлана юöртiс быдöс йылiсь, мый керис правленнёас лунтыр сьöрна, мый сiя кылiс да адззылiс ас синнас, Савелий Григорьевич ассяняс эшö содтiс:

— Сайöлтчыны, натьтö, мöдöны öтветыс улъя. Кыдз бы öшö тэнö ас коласаныс эз каттьö. Каттисян сэтшöммескöт öтчид, дак сiдз и тöд, отирыс син одзö он ни эта бöрсянь мыччись, и кодя кылсö нысянь он кыл. Судитасö, мыйись мый, дак буржык вештыны. Кылiн тэ менö?

— Кылi, ая.

Айыс басни бöрсянь Светлана невночка кыдз бытьтö лöньсьыштiс, кöть кутöм лöгыс правленчи вылö эз на чулав. Эта увья асывнас нывка нельки правленнёас эз кежав, перво жö иньдöтчис фермаö, кöть и одзлань ни тöдiс, что кернытö сiдз эз бы ков.

Гаражыс вöлi сыланьын жö, и туй вылас зоотехник öтлаасис Петюль Васькакöт да Порсев Андрейкöт, кöдна тожö тэрмасисö удж вылö.

Петюль Васькаöс панталöмыс уськöтiс зоотехниклö тöдвылас Таисьяöс да сiйö, что деревнясис петтöн нач вунöтчис кежавны Поликарп дядь дынö, мед тöдны, бертiс-эз сiя районiсь. Здоровайтчöмыс бöрсянь нывка перво жö юалiс:

— Од тöдö, зонкаэз, бертiс эз я районсяняс тракторыс?

— Тöн рытъявыв эшö гортын вöлi.

— Эз висьтась Поликарп дядьыс, кыдз ветлöмöсь?

— Да кыдз?.. Нуöтöмöсь, висьтасьö. Нем умöльжыкыс туй вылас абу ни лоöм. Кольöмöсь Таисьясö больницаас, — юöртiс Петюль Васька, мый тöдiс, а одзлань досаднöя, и юрнас, и кинас öткоста зэркнитöмöн: — Вот жö тэ, халера, кытöн!.. Невночка эд, невночка, Савельевна, — чунь йывсö мыччалöмöн, — ...чуть, чуть да эг ешты. Ачым эд, видзöт жö, дзоньöн петi, а сылiсь коксö...

— Сiдз, Вася, да. Эн ешты невночкасö. И сё жö тэ молодец! Думайт вот ачыт, кин бы сэтöн унажыксö ештiс? Некин ни эд эз надейтчы, что Таисьяыс ловйöн кольччас, кöр картаыс вылас лэдзчисьны пондiс. Тэ жö сiйö смертьсис кыскин. Некыдз мöднёж эстöн он и висьтав. Эта понда тэ одзын сiя век сьöрна оланнас одзöсын лоас. Спасибо тэныт, Васенька, öддьöн ыджыт спасибо!

— Да но, одзöсын... Кытшöм сэтöн?.. — шыасис зонка зоотехниклiсь баснисö панöвтöм могись, öвтыш керис кинас.

— Былись ме тэныт висьтала. А что коксö чегöтiс, дак том эшö, жагöник, батi, веськалас.

— Сiйö-ту веськöтасö, басни абу, — сэтчö жö шыасис и Андрей. — А былись разь, Савельевна, картаыс ачыс öзйöм? Гаражас баитöны, бытьтö бы пö ачыс мыйсянькö.

— Этö ме иньытсянь сэтшöмсö тöн рытнас кылi, Раисаыссянь. А сэсся эшö некин нем эз висьтав.

— Да, да, — сэтчö жö тэрмасис Петюль Васька. — Вермис-эз, интересно, сiя ачыс öзйыны? Оз эд мыйкö веритсьы.

Зоотехник öшискодь. Не специалист эта делоын, сы йылiсь басниын Светланалö недыр вöлi и сорасьны, кöть ачыс сiя кылöм басниэзö тожö эз верит. Но вопросыс вöлi сувтöтöм öддьöн веськыта, и кежласьны эта увья некöдöрö эз позь.

— Сiдз, батi, вермис, но только не причинатöг. А причинаыс ас кежас оз овлы. Ог ме сэтiсь сэтшöмсö адззы.

— Во-во-во, правельнö! Ме тожö сiдз думайта, — сы дор жö тэрмасьöмöн сувтiс Петюль Васька.

«Эта жö смех, — лöгöн думайтiс зоотехник зонкаэскöт янсöтчöм бöрсянь. — Кыдз этö сiдз? Быдöнныс и быдöс йылiсь тöдöны, а ме ачым нем йылiсь и нем ог тöд?»

Заведующöйыс фермаас эз на вöв, а высьтiсиссез кончитiсö асывся удж. Öтiк бöрсянь мöдiк инькаэз бертiсö тыра ведраэзöн, кинкö дженытик «здоровоöн», а кинкö чöлöмöн, дзик зоотехниксö казявтöг, сайöвтчисö заборка сайö. Не горöн баитöм, не шутитöм ас коласын нылöн тожö эз кыв. А прос ведраэзöн жольöтöм да шушкöтчöм казьмöтiсö сiя жö шог обстановка йылiсь.

Но вот Поликарп дядьлöн иньыс, Анфисаыс, быдöннысся одзжык мыччисис заборка сайсянь, оськöвтiс пызан вылын осьтöм журнал дынö, но сiдз кыдз ручкаыс эта коста вöлi зоотехник киын, корны сiйö эз ни понды, дзик некинлö, кöдзыта юöртiс:

— Нёльдас менам асъяпонсяыс. — Бöр заборка саяс сiя сэсся эз ни берт, кежыштiс бокö, пондiс видзчисьны, кöр зоотехник, сылiсь моз жö, гижас журналас мöдiккезлiсь высьтöм йöв. А кöр быдöнныс, öтiк бöрсянь мöдiк, чукöртчисö матöжык пызан гöгöр. Анфиса пондöтiс:

— Эта нö мый сэтшöмыс миян пермаас керсьö? Не öтiк лун сьöрна ни бара силоссö оз ваялö. Арсянь пöдöм турун вылын да кын кöрым вылын мöссэсö видзам, и некинлö эта дынöдз некытшöм дело абу. Начальствоыслö, тiянлö, кöть баит, кöть эн. Да вöлi бы кинлö баитнытö. А то эд суткиэзöн эсчö запермöйыс оз мыччась.

— Сьмек эд эта, инькаэз, сьмек эд! Куим литраöн луннас чилькöтам, да и сiйö, абутöм кодь йöлнысö, одделеннёаныс нöбöтнытö оз вермö. Тöння клягаэзныс öнöдз, видзöтöти, тырöн сулалöны. Сiдз бöра сэтöн и шöммöтасö.

— А кытчöдз запарникнысö лöсьöтасö, дак сы дорын и тöлыс продитас, — лэбтiсисö Анфиса сьöрö мöдiк высьтiссез.

— Этадз юралöмсянь öтiк перма колкозас оз кольччы, сiдз и тöдö, — баитiс одзлань Анфиса. — Дöс поданыс кулöмöн оль дорас кыскассяс да пöимöн кымöрас лэбтiсяс. Мый тi лешшöйсö, начальство, лунтыр-лунтыр асланыт правленнёын, асланыт порсьпозын пукалат-тойсясят, кор эстöн некутшöм порядок абу? Не совесть тiян, не управа тiян вылö некутшöм тай оз и адззись! Етша öшö — гожумбытся удж нывкаыслiсь пöимö пöртiт, дак öшö и асьсö, том киння томöн, калечитiт! Куимöдз гöд ни эд, куимöдз гöд ни, кыдз кукань картасö строитны пондöтчисö и öнöдз бытьтö кончитны эз вермö? Эта улъя сэтшöм несчассёыс и вöтiс. Эта улъя сто головсö лолйöн и жаритiт. Да, поди, öшö нылкаэсö сы понда винитны пондат? Ась только кылсяс мыйись мый! Ась только пешлiсят!.. — Анфиса оськöвтiс зэв пызан бердöдз, öдззис зукйыны кулакнас аслас басни увтö пызанпöв кузя, — ...сэк вöлись ми тiянлö страсьсö мыччалам! Быдöннысö б... табунöс правленчисö судитны колö! Не пызан сайын, нылö, порсь табуныслö, кöртöвöй решётка сайын местаыс! — лöгöн горöтлiс Анфиса отделеннё пасьта.

Зоотехник вежöртiс, что басниыс пондöтчис не шутка могись. Жаль, кывзыны сiйö, кинлö öддьöнжыксö колiс бы, эз вермö, да и сылö аслыс быдсöн эз сетö. Басниыс коста саймис пызан вылын телефон. А кöр Светлана шыасис лэбтöм трубкаö, провод мöдöрсяняс председательлöн голосыс недобрöя юалiс:

— Тэ мый талун фермаас керан?

— Фермаас менам тожö удж. Кытöн мый эшö этася?..

— Видзöт тэ öшö, кутшöм уджалiсь адззисьöм. Правленнёын талун асъяпонсяняс колiс лоны.

Матö трубкаас горöтлöмсянь председательлiсь баснисö кывзiс не только зоотехник. Светлана вöлi осьтiс ни öмсö, мед висьтавны, что одзза лунас лунтыр правленнёсис эз петав. Но вир пизьöтан лöгсянь Анфиса и эстöн эшö чöвнытö эз вермы, одзалöмöн горöтчис:

— Жеребеччöйö бы тэныт горшат! Дзут синлö! Вражиналö! — но сэтöн жö, тыдалö, вежöртiс, что провод мöдöрас сылöн горöтчöмыс сё ни оз кыв, досадасянь ружтыштöмöн, зэркыта öвтыштiс кинас, бергöтчис, шупыта оськöвтiс ыбöсö. Сы сьöрö жö сьöрсьöн-бöрсьöн вöрзьöтчисö и мöдiк высьтiсиссез. Эта коста провод мöдöрсяняс эшö кылiс:

— Тэ бытьтö он тöд, что талун эстöн следствие мунö? Али заваритiт меным кашасö, сотiт куканнезнас картасö, да одö лысьтö правленнёас мыччисьны? Милиционерöн вайöтны колö?

Зоотехниклöн горшас мыйкö сибдiс. И мымда бы нывка эз вынсьöтчы висьтавны паныт эта бöрсянь, сiдз нем и эз вермы. Видзчисьны сылiсь баснисö председатель сэсся тожö эз понды, пуктiс трубкасö бöр.

Баитiсö я мыйкö эшö петтöдззаныс высьтiсиссез, сымдасö Светлана эз ни кыв. Мыйкö дырна сiя пукалiс, дзик кольмöтöм. А кöр вежöртiс асьсö, сы гöгöр некин эз ни вöв. Дзир заборка сайсянь кылiс простöй дозмукöн миськасян тазын жольöтöм, да ны бердын жö бонлöн негорöн кышöтöм — миськасис дежурнöй высьтiсись.

Зоотехник эшö пондылiс уськöтны тöдвылас, мый вöлi кертöм, да мый думайтiс керны эта вотöдз, но высьтiсиссес видчöм да председательыс горöтлöм, а веськытжыка висьтассяс — сотчöм пода карта понда сiйö винитöм кузя, вунöтöмыс тöдвылö сiдз и эз берт. Сiйöн сорöн Светлана иньдöтчис фермасис бöр.

Не вын, не охота тэрмасьны эз вöлö. Нельки чочком светыс син одзын эз тыдав. Эз кывзiсьö коккез, кöдна умöля кылiсö увтсиныс му. Нывка öдва вешталiс коккез. Кытшöмкö вежöрттöм жарсянь сотчис быдсöн вывтыр, дзик удерлунся пожар коста. Но быдöс неважынся кылöмыс, кöда öтiк тшакыльöн усис сылö öтнаслö юр вылас, пемдöтiс да пöдтiс ылöс, кытшöмкö кадсянь пондiс янсавны торрез вылö. Светлана вежöртiс, что кыдз высьтiсиссезлöн видчöм, сiдз и председательлöн винитöм, вöлiсö иньдöтöмöсь веськыта сы вылö, но öткоста казялiс, что эта видчöмыс да винитöмыс öтамöд коласын, кыдз колiс бы, оз йитсьö, а сувтöны öтамöдлö паныт. Эта невночка лöньсьöтiс.

Поликарп дядь öшын увтын зоотехник кылiс Галиналiсь керкусянь öшын пыр горöтлöм, сувтiс. А мöдыс пасьтöг, юр вылас везтыштöм чышьянокöн, чепöссис сы сьöрö, матö сибöтчытöн, синваэз сорöн юöртiс:

— Миянöс эд, Светлана Савельевна, Таисьяыскöт фермаыс понда винитöны. Бытьтö бы туруныссянь картаыс öзйöм. Мый нö öнi лоас?

— Кытшöм турунсянь?

— Кöдö сiя лунö сараяс кайöтлiм.

Зоотехник тöдiс, что сараяс подалö вердчансö видзны оз туй. Ыш ловзисьöм сорöн, гажтöма сiя гогинялыштiс юрнас. «Этö дзир эз тырмы».

— А вермис разь сiя öтiк рытнас сэтчöдз шонавнытö?

— Кысь нö ме тöда? — горöтыштiс Галина. — Этö нiя сэтчин сiдз баитöны, — öвтыштiс кинас правленнё ладорö. — Судитасö эд öнi миянöс?

— Ог тöд. Менö вöлись корисö юасьнытö, и висьтавны öнiсянь ме тэныт нем ог вермы. Кежав миянö рытъявылас.

— Но, — дженытика шыасис Галина, оськöвтiс бöр посöдз ладорö.

Куканьвöдитiсьыскöт дженытик басниись зоотехник эшö öтпыр вежöртiс, что следствиеыс пондöтчö нач не сы ладорö, кöдöрö колiс бы. Не полöтны сэтшöмыс эз вермы. Но гажöтiс кö эта коста мый, дак Галиналöн сылö норасьöмыс. Локтiс кö нывкаыс сы дынö этöн баснинас, то колö думайтны: отсöт ли, совет ли кытшöмöкö сё ни видзчисис. Матын правленнё дынын паныт зоотехниклö шедiс колхознöй электрик, учöтик вывтыра, дерева кока Порсев Öльöксан. Мымда нывка тöдiс этö вексö бриттöм-мисьтöм чужöма, летсьöм-вотсьöм паськöма мортсö, садь юрöс эшö некöр эз пантавлы. Сiя и талун асывсянь, кöр, натьтö, корлiсö сэтчин жö, допрос вылас, вöлi кодыш. И кöр сiя сибöтчис матöжык зоотехник дынö да тöдiс сiйö, горöн маттясьöм сорöн горöтчис:

— Этö тiян понда... — одзлань Öльöк нимкодялiс сэтшöма, кытшöмöн Светлана не только лоны былись, нельки думайтны ас йывсис эз вермы, — ...понда менö миличаэс кыскалöны. Сотiт... — одзлань бöра сэтшöм нимкоддезöн, — ...табун пермасö, дак öнi öльöтрик виноват! Ы-ы-ы, ме бы тiянöс п... табунöс, п... п... табунöс, тютя табунöс! — Пиннезнас гирчигалöмöн Öльöк нёджжасьöв-керис ас гöгöр, мый бы коланаыс вермис шедны киö. Но Светлана, кöда паныт и джын кылöн эз шыась, эта коста вöлi ылын ни, сибöтчис правленнё дынö.

Чöвтчыны аслас жырö зоотехник эз и кежав, кыдз вöлi вевдöрись паськöмнас — оськöвтiс председатель кабинетö. Кинкöт усяс пантасьны, нывка тöдiс одзлань ни, но сiя полöмись, кöда вöвлi пыр одзжык, талун мылякö и след некытшöм эз тöдчы.

Председатель кабинетiсь Светлана некинöс эз казяв. Мужиккезлöн ас коласын горöн баитöм-сералöм кылiс партийнöй секретарь жырсянь.

Осьтöм ыбöс коласöт нырö вачкис то ли таг, то ли вина, а, батi, öтлаын быдöскöт сорлассьöм табак тшын. Сы коласын, партийнöй секретарь пызан сайын — ачыс секретарьыс эстöн эз вöв — öнi пукалiс Костя-принц, Светланалöн челядь кадсянь и талуннявиöдз сьöлöмгаж и сьöлöмшог, сiя жö и районнöй прокуратураись следователь. Сылö паныт, пызан мöдöрас, пöрöтчыштöмöн — некыдз мöднёж сэтшöм тушаыслö эз и позь, — нырыштiс стулсö фермаись заведующöй. Ачыс Яков Терентьевич чадитiс öшын подушка вылын.

Зоотехник мöдiс ни пöдныштны ыбöссö бöр, но заведующöйсö казялöмыс уськöтiс тöдвылас фермаись тöнсянь эшö нöбöттöм йöв. Охотатöг нывка оськöвтiс порогсö.

— А, этö тi, — гажвевйöн панталiс Порсев-следователь, нильыштiс тыра пепельницаö биа сигарета, кынымиськö öвтыш керис пызан весьтын кинас кымöрöн кöвьясян табак тшын.

Сылö паныт шыасьöм местö зоотехник горöтчис:

— Иван Фролович, мыля тiян фермасис тöння йöлыс нöбöттöм? Мыля öнöдз флягаэзын сулалö?

— Кыдз нöбöттöм?

— Ме сiйö тiянлiсь юала.

— Но кыдз мыля? Эг ештö, нöбöттöм дак. Кыдз öшö этася?

— Кыдз эд ештö, кöр сiя тiян удж? Вунöтiт, батi, мый понда тiянлö зарплатасö вештöны?

— Тi меным сiйö од вештö! Зарплатасö. Правленнё вештö! — поперегалiс заведующöй, дзик петшöралöм увтсяняс, тэрмасьöмöн пондiс чеччыны. — Начальство тожö меным. Мый абутöмыс понда зарплатанас син бытшкöны? Унажык бы вöлi дак... — оськöвтiс порог ладорö. — Видзöтам вот, мый тэ сотöм куканнет понда висьталан.

— А тiянлiсь разь сiйö эз и юалö? Сiйöн, натьтö, что гожумбыт сьöрна кукань карта дынас öтпырись и нырнытö эд мыччалö? Не тi разь фермаас заведующöйыс?

— Дугдö, кöдö оз кол! — вевттис горшнас председатель. — Не сы вылö, Савельевна, тэнö татчö корисö! — нильыштiс кисис сигаретасö öшын подушка бердö, иньдöтчис заведующöй сьöрö. Нiя кольччисö öтнаныс.

— Мый тэ, тi сiдз перво жö Иван дядьыс вылö? Öтлаын уджалат да... — пондöтiс следователь, кöр пöднассис председатель сьöрын ыбöс. — Ме, конешно, вежöрта — беда колхозлöн шогмис öддьöн ыджыт, но... — паськöтыштöм киэзöн, — ...кыдз баитсьö, нем он кер. Пуксьö вот. Баитыштны колсяс, — мыччалiс просмöм стул вылö. — Жаль, конешно. Эг думайт, что этадз пантасьны усяс, но кыдз баитсьö, нем он кер. Олан — эм олан. А оланас мыйыс оз оллы.

Кытчöкö ылö öшын пыр видзöттöн, Светлана кывзiс, кöть следовательлöн басниыс не ылöсöдз, не сьöлöмöдз эз йидж. Мый вöлi охота дак — бергöтчыны да петны бöр. И мед видзны асьсö эта неколана оськöлiсь, нывка оськöвтiс мыччалöм стул бердöдз. Мышкыртчытöнняс кылiс, кытшöм пöдтан дукöн вайöтö пызан сайсянь, вештiс стулсö ылöжык стена бердö, бокöнмоз пуксис.

— Сё я мый я сэтшöм полiсь?

— Пöдан эстöн.

— Да, куритiм öтлаын пукалтöн. Но дак мый жö, Светлана... Савельевна. Висьтась, кыдз да мый эстöн шогмис. Мыйсянь, думайтан? — А эстöн и думайтны нем. И сытöг быдöс вежöртана. Куимöдз год ни вильсö строитам, и сё некыдз ог вермö. Эта йылiсь ме мыдзи ни предыслö да правленнёыслö баитнытö, а прокыс сё сымда. А кончит сiйö таво ар кежас, виль кукань картасö ме шуа, да вуджöт сэтчö куканнесö, дак эта мымдаыс миян некöр бы эз и шогмы.

— Думайтан, нарошно сы улъя и öзйис, что вильсö кончитны эд ештö?

— Нарошносö ме эг висьтав. Вуджöт, мыся, сэтiсь аскадö подасö — сымдаыс некöр бы эз вöт, кöть бы и öзйис дак. А что öзйис, дак эталö и дивуйтчыны нем, кöть ми чожажык пöрöм сысянь видзчисим. Сэтчин бöрья кадö и пырнытö ни петiс полöм, сiйö и видзöт — боквывтчас. И проводкаыс, кöда вылö нюжöтöмыс бöрсянь некин öтчид и дзар эз кер, сэтшöм жö рызi-бызi öшалiс.

— Сысянь тэ думайтан?

— А мыйсянь эшö, öзйис кö зэра погоддяö, ульга коста. Замыканнё, натьтö, кытöнкö проводдэс коласын вöлi. Мый эшö этася?

— Мхмы. А вот ме думайта, не проводкасянь сё жö. Заключеннё миян не сэтшöм. Думайта — мöдiксянь мыйсянькö. Сiя жö вердчансянь, шуам, кöдö сараяс видзит.

— Некытшöм вердчан ми сараяс эг видзö.

— Мыля нö, Светлана Савельевна, эд видзö, кöр видзит. Тэ учти, что эта вотöдз ме öтi-мöдiлiсь юаси ни. И вот сiя жö куканьвöдитiсьныт тiян, Галинаыс, висьталiс веськыта, что öтлаын Таисьяыскöт сiя лунö сараяс турунсö кайöтлöмöсь. Нылкаыт эз суськы, висьталiс, кыдз эм, а тi меным баитат — некытшöм вердчан сараяс эд видзö. Эта мый? Или тэ, тi сы йылiсь нем од тöдö, или менö пöрьялат?

— Дак мый сэки?.. Петö — куканьвöдитiссес виноватöсь? — Светлана первуись дзар керыштiс аслас принц ладорö, казялiс тöння юöм бöрсянь öнöдз эшö пыкöса синнэсö. А мöдыс паныт эталö жмитыштiс пельпоннэзнас, паськöтыштiс пызан весьтас киэсö. «Петö сiдз».

— Жаль, конешно, нылочкаэтö, но... мый ме сэтöн верма?..

— Да, кайöтлöмöсь сiя лунö турунсö. Этö ме тожö тöда. Но неужто тi думайтат, что сiя öтiк рытöн сiдз вермис шонавны? Вермас-оз лоны сэтшöмыс, мед ношаöн пыртлöм да рышкытика тэчöм кöс турун öтiк рыт сьöрна вермис шонавны öзйытöдз? Сымдаыс жö некинлö и юрö оз пыр. Кин этаö веритас? Эд кывсьы кинлö отир коласiсь сымдаыс, дак серавны пондасö. А тi асьныт этаö веритат?

Порсев-следователь паныт эз шыась. Сiя думайтiс.

— И мыля сэк картаыс не сарайсяняс, не туруныс ладорсянь, а проводкаыс бердсянь öзйис?

— А кысь тэ, тi сымдасö тöдат?

— Ас синнам адззылi да мыля нö ог тöд. Эд кöр ми уськöтчим лэбтiсьöм шумыс вылö, дак туруныс весьтöт сарайыс вöлi эшö дзонь, а медöддьöн сотчис сiя угöлыс, кöда бердö проводдэс столб вывсяняс локтiсö. Сысянь и биыс карта пасьта паськалiс.

— Этадз ми öтiк мненнёöдз ог локтö.

— Кытшöм сэтшöм мненнёöдз? Тiянлö разь не истина колö?

— Сiдз, батi, истина. Но öткодь мненнётöг сiя лоны оз вермы.

— Интересно. Мыля бы и оз? Истинаыс разь кытшöмкö мненнё сайын?

Порсев-следователь гыжйöвтыштiс юрбöрсö.

— Кыдз сэтöн висьталны?.. Вообщем, ме эстöн видзöтчи, юаси и вывод менам сэтшöм — нарошно öзтöм эстöн абу. Турунсянь ли, проводкасянь ли, но картаыс öзйис ачыс. Висьталöны веськыта — стихийнöй бедствие. Часто миян районас сэтшöммес пантасьлöны, да и округ, и область пасьта, кылсьö, сiя жö. Дак вот, кыдз баитсьö миян кыл вылын «Состава преступления уголовного характера следствием не обнаружено». Петö, что и уголовнöй дело лоны эстöн оз вермы. Некин сэтöн не виноват. Сэтчö жö и картаыс вöлi важся-важ. Этö ме и ачым тöда, эшö учöтсянь. Но мый керны материальнöй ущербыскöт, кöда шогмис куканнес сотчöмсянь? Сiя жö семьдесят тысяч саяс. Колхозыслö сiя, понятно, и нем туйö. А тiянлö кö сiйö быдöннытлö кышаласö?.. Култöдз эд вештiсьнытö тырмас, сiдз и тöд. Жаль меным. Охота абу сiдз отирсö дойдны колхознöй подаыс понда. Ас отир жö быдöнныт. Колö я судöдззас вайöтны? — Эта вылын Порсев-следователь лöньсис, пондiс видзчисьны. Светлана гажтöма ловзисис, мышкыртiс увлань юрсö. Неадззан синнэс сьöртi позис вежöртны — думайтö.

Мöссэзлöн чöвтчöм и куканнезлöн кулöм, подакокувт понда пессьöм и кукань карта увья видчöм-споритöм вöлiсö не только тöдвылын. Быдöс эта, кöда эз сет колананёж уджавны, сорис да пöдтiс удж, сьöкыт шогöн öнöдз куйлiс сы сьöлöм вылын. И сiя кадö, кöр зоотехник эз тöд, кытчö воштiсьны эта шог увья, сылö вöзйисö кышавны ас юр да совесть вылö сэтшöмö, кöда бöрсянь, согласитчыны кö эстöн, кодяжык отирыскöт он ни пантась. «Тожö, батi, ныкöт öтласöн да?» — усис тöдвылö Раисалöн, дзик сьöвзьöм, лöга чапкöм кыввес, а сэтöн жö айыслöн: «Кыдз бы öшö тэнö öтлаö эз каттьö». Эз вун кытчöдз тöдвылiсь и Анфисалöн отделеннёын пызанпöв кузя кулаккезöн зукöтöм да грöзитöм. Эз тöд Светлана, кыдз бы сы местын керис часöт Таисья. Но öтiкö, медколанасö, что некöр бы эз согласитчы следовательыс заключеннёкöт да сы басникöт — тöдiс. «Жаль, что не кокйылас».

— Ме вежöртi тiянлiсь истинасö, — веськöтчытöн горöтчис зоотехник.

— Вот и бур, — гажвевйöн шыасис следователь. А Светлана öнi вöлись бергöтчис паныт и, натьтö, первуись сэтшöм повтöма сувтöтiс синнэсö аслас принц вылö.

— Пожарлiсь причинасö тi тöдат öддьöн бытшöма, а турунсянь öзйöм вылö липовöй заключеннёсö керит дзир Порсев роднытö сайöвтöм могись: мед председательлiсь безответственностьсö да халатностьсö, кöдна увья дзир и сотчис картаыс, пöрöтны невиннöй куканьвöдитiссез вылö. Сiдз эд, Константин Прокопьевич? Сiдз! Но эстöн тi сорасит. Сэк бергöтiт быдсöн стихийнöй бедствие вылö, кöд коста, тiян нёж, некин абу виноват. Но локтас кö делоыс судöдз, вештiсьнытö сотчöм подаыс понда ковсяс быдöнныслö. Петö, что невиннöй отирыс виновнöйеслiсь винасö пондасö вештыны? Сiдз ме тiянöс вежöртi, ёрт следователь?

— Да не, Светлана Савельевна. Невночка не сiдз. Сымдасö ме тiянлö эг баит. Ме висьталi — судöдззас позяс и не вайöтны.

— А кыдз нö сэк семьдесят тысячаыскöт, кöдна сэтшöм сирньылöмöн миянлö сетсисо. Кысь сiйö колхозыслö босьтны?

— Но этö тi уж асьныт эстöн... кыдз тöдат...

— Вот кыдз? Петö сiдз, что заключеннёсö тi сетат, кытшöм тiянлö колö, а кин да кыдз сы увья вештiсьны пондас, делоыс не тiян ни? Не, Костя, Константин Прокопьевич, ёрт следователь, или кыдз эшö сэтчин тiянöс. Ме думайтi, Порсев родсис, Порсевскöй увтырсис, эта порсьпозiсь кöть öтiк Порсев туяна мортöн петас. Учöтсянь и талуння виöдз надейтчи. Но талун вежöртi, что сораси. Не истинаыслö, ёрт следователь, служитан, кöда понда тэнö государствоыс няньнас вердö. А сэтшöм следователлес миянлö талун оз колö.

— Вот кыдз? — шутка могись шыасис Порсев.

— Да. Сiдз. Отир син одзын картаыс сотчис и эталiсь причинасö ми эстöн тiян кодь следователлесся буржыка тöдам.

— И мый жö бы тi эта отиркöт мöдат керны, кöр менам районнöй начальствосянь установка эм, мед уголовнöй делосö председательыс вылö не осьтны?

— А окружнöйыссянь тэнат сэтшöм установкаыс эм-абу? — смех вылö лэбтöмöн юалiс зоотехник. — Висьталан, батi, эшö, что тэнат и Москвасянь сэтшöм установка эм?

— Колас, дак и округсянь лоас. И нем тэ аслат отиркöт он кер.

— Но этö ми эшö видзöтам, — грöзитöмöн панöвтiс зоотехник следовательлiсь баснисö, сы коста жö оськöвтiс ыбöсö, кöть и былись эшö эз на тöд бытшöма, мый колiс да позис одзлань керны.

Öтöрись посöдзас Светлана недырик кежö сувтчыштiс. Сэк сылö син вылас и усис тополь ув бердын öшалан отвал. Нывка лэдзчис, оськöв бöрын оськöв сибöтчис сы весьтöдз, видзöтчис, казялiс да лэбтiс кок увтсис гусеничнöй штырь, вынöн сибöтiс отвал бердö.

Вачкöмсяняс пель чанöтан говк перыта чепöссис вывлань, пондiс паськавны деревня пасьта. Эз ешты сiя кусны, кыдз сэтöн жö сiйö вöтiс мöдiк, куимöт, а сэсся эшö да эшö.

Лэбтiсьöм шум вылö правленнёсис чепöссис председатель.

— Йöймин я мый я?! Тэ мый этö керан? — горöтiс сiя эшö поспуэс кузя лэдзчытöн, уськöтчис зоотехник дынö.

— Эн сибöтчы! — зоотехник лöга грöзитiс председательлö вылына лэбтöм штырьöн, öдззис вартны эшö одззася вынöнжык.

Оськöв кыным ылына зоотехник дынсянь сулавтöн председатель жöдзöв-керис öтiк местын, сьöвзис, бергöтчис, оськöвтiс вöлi правленнё ладорö, но сэтöн жö бергöтчис бöр, иньдöтчис гортас. И кыным одзлань вартiс зоотехник отвал кузя, сыным председательлöн оськöввес лоисö сё перытжыкöсь да перытжыкöсь, а ачыс сiя сё чинiс да чинiс син одзын, лоис сё учöтжык да учöтжык. Отвал горалöмöн саймöтöм отир, öтiк бöрсянь мöдiк, пондiсö мыччисьны керкуэзiсь. Но сiдз кыдз не тшын, не би некытöн деревня весьтын эз тыдав, быдöнныс пондiсö тэрмасьны правленнё ладорö. Пожарыс талун öзйис сэтöн.