Михаил павлович лихачёв

Михаил Павлович Лихачёв чужис ноябрь 4 лунö 1901 годö Белоевскöй (öнi Кудымкарскöй) районiсь Ёгва посадын крестьянскöй семьяын.

Ёгвинскöй двухкласснöй училище кончитöм бöрын сiя велöтчис перво Кудымкарскöй высшöй начальнöй училищеын, а сыбöрсянь Юсьвинскöй учительскöй семинарияын, кöдö кончитiс 1919 годö.

Сiя жö годö сентябрь медодзза лунсянь Михаил Павлович пондiс велöтны Поносовскöй начальнöй школаын. Эстöн сiя уджалiс öтiк год, а мöд год кежас Михаил Павловичöс вуджöтiсö гортас, Ёгвинскöй начальнöй школаö, кытöн велöтiс только кынымкö месяц, а сэсся сiйö босьтiсö Краснöй Армияö.

Армиясянь Михаил Павлович бертiс 1921 годö арнас да вились пондiс велöтны Ёгвинскöй школаын. Эстöн уджавтöн сiя нуöтiс ыджыт общественнöй удж: отсалiс организуйтны ликпункттэз, кытöн ачыс жö велöтiс отирöс грамотаö.

1924 годö Михаил Павловичöс иньдiсö уджавны заведующöйöн Шипицынскöй начальнöй школаö, а 1925 годся март месяцö вуджöтiсö Кудымкарö народнöй образованнё отделö.

1926–1930 годдэзö Михаил Павлович уджалiс окружнöй газета «Гöрись» редакцияын. Этасянь сiя часто ветлiс командировкаэзö округ пасьта, öктiс деревняэзын сказкаэз, песняэз, пословицаэз да поговоркаэз, мед лöсьöтны сёрöнжык коми-пермяцкöй фольклор сьöртi сборник.

1930 годö арнас М. П. Лихачёв сетiс вступительнöй экзаменнэз да пондiс велöтчыны Московскöй редакционно-издательскöй институтын. Öткоста велöтчöмкöт сiя уджалiс СССР-ись народдэзлöн центральнöй издательствоын коми секцияын.

1933 годö январьнас Коми-Пермяцкöй окрисполком босьтiс М. П. Лихачёвöс уджавны окрисполкомись научнöй бюроö, кытöн сiя уджалö коми-пермяцкöй кыв исследуйтöм вылын, эта жö кадö велöтö коми литература сьöртi Кудымкарскöй педучилищеын.

1934 годö М. П. Лихачёвöс бöрйöны делегатöн писателлезлöн I Всесоюзнöй съезд вылö. Эта съезд вылын Москваын Михаил Павлович пантасьлiс А. М. Горькийкöт, кöда козьналiс сылö аслас автографöн библиотечка. М. П. Лихачёвöс примитiсö членöн СССР-ись писателлезлöн Союзö.

Михаил Павловичлöн литературнöй творчество пондöтчис 1923 годсянь. Öтiкöн первöйез коласiсь сiя пондöтчис гижны роднöй коми кыв вылын художественнöй произведеннёэз. Медодз да унажык Михаил Павлович гижис стихотвореннёэз да рассказзэз поснит челядь понда.

Сiя кадö школаэзын эшö эз вöлö учебниккез коми-пермяцкöй кыв вылын, и Михаил Павлович Лихачёв кутчис керны челядь понда букварь «Одзлань», кöда петiс 1925 годö. А сы коста жö гижöм стихотвореннёэзiсь да рассказзэзiсь сёрöнжык, 1929–1934 годдэзö петiсö челядь понда сэтшöм торья книгаэз, кыдз: «Пионер», «Учöтик ударниккез», «Челядьлö» да «Челядь садын».

1925–1930 годдэзö миян округын вöлiсö эшö уна неграмотнöй отир, кöдна нач эз кужö гижны да лыддьöтны. Нiйö велöтöм понда тожö колiс керны учебниккез роднöй кыв вылын. И Михаил Павлович кутчисьö эта удж бердö. Сiя гижö ны понда букварь «Удж бердö».

Уна вын М. П. Лихачёв пуктiс национальнöй письменность зорöтöмö. 1925 годöдз неграмотнöй гырись отирöс да челядьöс велöтöм понда учебниккес вöлiсö сувтöтöмöсь кудымкарско-иньвенскöй (В-овöй) диалект вылын. 1925 годö организуйтчис Коми-Пермяцкöй национальнöй округ, кöдаö пырисö кык диалекта коми йöз. Ны öтлаасьöм бöртi öтласа коми кылö вöлi пыртöм косинско-камскöй диалектiсь буква «Л». Эта увья ковсис сувтöтны виль азбука да виль учебниккез. «Л» сора виль алфавитсö гижис М. П. Лихачёв, и 1928 годö эта виль алфавитыс петiс торья книжкаöн Москваын. Эта жö кадö гижись уджалiс гырись йöз понда виль букварь вылын, кöда шусис «Виль оланлань» да вöлi лэдзöм 1929 годö. 1931 годö петiс виль букварь и челядь понда. Шусис сiя «Мича асыв», а лöсьöтiс букварьсö М. П. Лихачёв öтлаын С. Ф. Зубовкöт. Сiдз жö вöлiсö гижöмöсь сылöн и мöдiк учебниккез.

Годiсь годö лэбис М. П. Лихачёвлöн творческöй активность, а öтлаын зорамис и художественнöй мастерство. 1930 годö сылöн петiс стиххезöн сборник «Медодзза петассэз», главнöй темаэс кöдаын: морт, сылöн удж да виль оланлань кыссьöм. Аслас стиххезын поэт сьылöтö сiйö олансö, кöда локтiс вöра Коми крайö Октябрьскöй революция бöрсянь, корö коми йöзсö янсöтчыны важ да сьöкыт оланкöт, чожажык строитны вильö, мунны одзлань. Ыджыт восторгöн поэт примитö виль оланлiсь вöвлытöм приметаэз да явленнёэз, öтiк бердöт ны коласiсь оз мун чöлöмöн да равнодушнöя. Этö позьö казявны не только стиххез содержаннёись, а нельки сэтшöм ны названнёэзiсь, кыдз: «Дасöт Октябрь», «Деревня саймис», «Осьтö ясли», «Быдмам и ёнмам», «Виль би», «Тракторнöй зык», «Öшын кöрттуйлань» да сiдз одзлань.

1928 годсянь округын пондiсö организуйтчыны медодзза колхоззэз. Этö виль событиесö М. П. Лихачёв аслас творчествоын тожö эз ордйы. Медодз эта темаын сiя выступайтö не кыдз поэт, а кыдз прозаик, гижö неыджыт повесть «Виль туйöт» ^. Эта повестьын автор мыччалö беднота да середняккез коласiсь передовöй отирöс, кöдна вынсьöтчöны петны оланас виль туй вылö, организуйтöны колхоз. Ордчöн ныкöт мыччалöмöсь и кулаккез, кöдна öтувтчöны паныт коллективсалö, быд вынiсь мешайтöны бедноталö керны ассиныс удж да кокньöтны öтласа вынöн ассиныс олан. Повесть «Виль туйöт» петавлiс торья книжкаöн 1929 годö.

1930 годдэзö округын пондöтчис сплошнöй коллективизация. Быдкодь причинаэз увья, кыдз и быдсöн Союз пасьта, сiя мунiс сьöкыта. Деревняын лэбтiсис вына классовöй пессьöм. М. П. Лихачёв эз сулав бокын этна гырись историческöй событиеэз дынсянь. Колхознöй строй победа йылiсь да виль олан строитiссез йылiсь сiя гижис уна стиххез, кыдз: «Коллектив», «Кöдзан кад», «Ыджыт удж», «Ытшкисян кад», «Гуна вылын» да мöдiккез, кöднаын мыдзтöг сьылöтö виль олан, öтласа вынöн кокньöтöм удж, радуйтчö эталö öтлаын колхозниккезкöт.

Мунö кокнита удж,

Ог казялö.

Шондi кисьтö югöр

Да сералö.

Мыля лэбимö сiдз,

Бура олам? —

юалö поэт коллективнöй удж йылiсь висьтасьöм бöрсянь, и сэтöн жö ачыс сетö ответ аслас юалöм вылö:

Мийö виль коллектив

Ёна дорам.

Эстöн вайöтöм дзир öтiк пример. Но виль оланöн, öтлаасьöмсянь кокнямöм уджöн восторгайтчöмыс кылö авторлöн не только быд стихотвореннёын. Эта восторгöн, эта сьöлöм пизьöтан гажöн гöрдззöм да тыртöм быд поэтическöй строка.

Эй-эх, кытшöм тшöк

Тыра шепа сюыс!

Сувтi бы, везöвтi мех

Да сьылöтi муöс... —

баитö поэт аслас стихотвореннёын «Межатöм ыб дорын». Сiя жö кадö М. П. Лихачёв уджалö и проза вылын, гижö сэтшöм рассказзэз, кыдз «Кресттöм» да «Икота», кöднаын бöра жö мыччалö, кыдз колхознöй стройлöн враггез быднёж вынсьöтчöны падмöтны колхоззэзлiсь сувтöм да ёнмöм, кыдз нiя эта понда используйтöны нельки деревенскöй икотницаöс.

Этна жö годдэзö Михаил Павлович гижис том йöз, комсомолеццез йылiсь поэма «Козинтöг», кöда медодз вöлi печатайтöм Сыктывкарын «Ордым» журнал страницаэз вылын, а сыбöрын петiс торья книжкаöн. Сэк ни гижисьлöн кынымкö произведеннё вöлiсö вуджöтöмöсь роч кыв вылö да печатайтöмöсь уральскöй альманахын.

Михаил Павлович не только гижис ачыс, но уна уджалiс и переводдэз вылын. Сiдз сыöн вöлiсö вуджöтöмöсь роч вылiсь ас кыв вылö уна стихотвореннёэз А. С. Пушкинлöн, роман «Мать» М. Горькийлöн да мöдiккез.

М. П. Лихачёв уна ассис стиххез да рассказзэз лэдзлiс торья книжкаэзöн. Быдöс вывланьын висьталöммесся позяс вайöтны пример туйö и сэтшöммезö, кыдз: «Межатöм ыб дорын», «Быдмам и ёнмам», «Кывбур чукöр» да мöдiккез. Окружнöй музей лыддьöм сьöртi, талун кежö сылöн öксьöны куимдасся унажык торйын лэдзöм сборник. Но медыджыт сылöн книга, медтöдчана творческöй успех да быдса явленнё коми-пермяцкöй национальнöй литератураын — роман «Менам зон». Этö книгасö М. П. Лихачёв пондöтiс гижны 1933 годö и уджалiс сы вылын куим год сьöрна. Эта медыджыт произведеннёын гижись пыдына да паськыта мыччалiс, кыдз овсис коми-пермяцкöй деревняись отирлö Октябрьскöй революция вотöдз, кыдз деревенскöй богаттё, Яран Гавриллэз да Чебрень Егоррез, эксплуатируйтiсö беднöй отирöс, пукалiсö ны сиви вылын. Аслас романын гижись эз ордйы и самодержавнöй властьлiсь представителлезöс — земскöй начальникöс, урядникöс, старшинаöс — кöдна быдсöн вöлiсö деревенскöй богаттё дор, отсалiсö нылö обижайтны беднöй йöзöс.

Öддьöн радейтöмöн автор мыччалö ассис главнöй геройсö, Мирошöс. Романсö лыддьöтiкö позьö адззыны, кытшöм сьöкыт, кытшöм курыт вöлi олан эта «айтöм», вежöра зонкалöн челядь кадö, кытшöм обидаэз да лишеннёэз пыр ковсис сылö мунны кок вылас сувттöн, мед лоны сёрöнжык повтöмöн да пондыны пессьыны Советскöй власть понда гражданскöй война коста. Сiдз жö бытшöма мыччалöмöсь романын и мöдiк образзэз.

Дженытика висьтассяс и произведеннёыс кыв йылiсь, кытшöмöн сiя гижöм. Стиххез, рассказзэз, поэма да повесть вылын уджалöм бöрсянь автор бытшöма ни ештiс «сувтны коккез вылö», лоис профессиональнöй мастерöн. Воöм вöлi сыын колана гражданскöй позиция, тырмöмви — ответственность творческöй удж одзын да коми йöзлiсь кывсö бытшöма тöдöм.

Вот кыдз пондöтчö романiсь дасöтiкöт глава: «Нятя ар... Сера, бусöсь öнöн моз вевттьöмась кымöррез небосö. Часто пожналö-зэрö, гиззьö, ёркöтчö зэрыс ойтöв сорöн öшынö, кышöтö-маласьö керку стенаэз бердö, посöдз понö, нюдз шаттезöн вачкисьö керку юррез бердö... Патькö-визывтö вотьваыс керку юррез вылiсь, кизертö зэрыс туйез вылiсь нятьсö, зiльк видзö гöппезын гудыра ваыс...» Лыддьöт сэтшöмсö мича майскöй лунö и нельки рамыника маласян тöлок да пöжалан шондi югöррез пыр позьö и кывны и адззыны, кыдз «пожналö» да «гиззьö», «кышöтö» да «ёркöтö», «патькö-визывтö», «кизертö» да «зiльк видзö». Но эта описаннёыс не öтiк. Сэтшöмсö позьö пантавны романлöн чуть я не быд страница вылын, мыйсянь произведеннёыс и талунöдз дона да интереснöй быд коми лыддьöтiсь понда.

Кыдз быд способнöй профессиональнöй гижись, овтöнняс да уджавтöнняс М. П. Лихачёв бытшöма нёджжасис коми йöз олан сьöрын, чукöртiс материал одзланься произведеннёэз понда. Но пыртны оланö ассис планнэз сiя сiдз и эз ешты. Сталинскöй репрессиялöн период эз ордйы и сiйö. 1937 годö М. П. Лихачёв, кыдз и уна тысяча сы кодь жö способнöй да колана отир омöн Союз пасьта, вöлi арестуйтöм.

Не öддьöн надёжнöй сведеннёэз сьöртi примитöм лыддьыны, что М. П. Лихачёв кулiс 1945 годö. Сылöн богатöй литературнöй наследие öнöдз эшö абу чукöртöм. Но пондам надейтчыны, что 2001 год кежö, кöр миян национальнöй письменностьлöн да литературалöн основоположниклö пондас тырны 100 год, эта уджыс унажыксö лоас керöм, и миян лыддьöтiсь вермас тöдсасьны пыдынжыка М. П. Лихачёвлöн классическöй творческöй наследиекöт.

Öнi жö М. П. Лихачёвлöн творчество да сы значеннё йылiсь позьö лыддьöтны филологическöй наукаэзлöн кандидат В. В. Пахоруковалiсь роч кыв вылын книгаись «Пути и проблемы развития коми-пермяцкой прозы».

Биографическöй очерк основаö пуктöм одззася изданнёись (Лихачёв М. П. Бöрйöм произведеннёэз, Кудымкар, 1959) составитель Н. В. Поповлöн материал.