Кык кока, а оз оськав

Луныс вöлi мича, а челядьлö только сiя и колö. Öддьöн ни нiя радейтöны гожумся шоныт погоддясö.

Коля петiс керкуись да пуксис поспуэз вылö, шондi югöррес увтö. А Славик бытьтö только и видзчисьöм ёртыслiсь петöмсö. Сiя сувтöтiс посöдз дынас ассис «лисапетсö», шуис:

— Здравствуй, Коля.

— А, Славик! Здравствуй!

Этö Коля велöтiс ассис томжык ёртсö здоровайтчыны асылöн пантасикö. Коля таво кончитiс ни первöй класс, а öнi шоччисьö — каникуллэз.

Славик годöн томжык ёртысся, но таво тожö лöсьöтчö парта сайö. Кыдз лöсьöтчö? О, Славик кокнита ни вермö лыддьыны стоöдз, тöдö быдöс азбука, лыддьöтö букварь и нельки кужö гижны кынымкö буква. Вот сiдз. И велалiс этö быдöс аслас ёртсянь, Колясянь.

Славик пуксис ордчöн ёртыскöт да малалыштiс кинас ассис чочком дженытик юрсисö.

— Вот эд талун кытшöм шоныт, ага эд, Коля?

Коля эта коста видзöтiс посöдз дынын чеччалiсь воробей вылö и ас кежас мыйкö думайтiс.

— Шоныт то шоныт, а вот тöд-ко тэ загадка, кöдö ме тэныт висьтала.

— И тöда, висьтав, — шыасис паныт Славик. Сiя думайтiс, что загадкаыс букварись, а букварьсис сiя быдöс ни нiйö тöдö.— Тöдан, шуан? Сэк кывзы. Кин кык кока, а некöр оз оськав?

Только öнi Славик казялiс, что букваряс эта загадкаыс абу.

— Кык кока, а оз оськав... — горöтчис ас кежас зоночка да юалiс: — А мый нö сэк сiя керö, оз кö оськав? Сулалö, да?

— Ловья сiя, сiдзкö, и оз сулав, ветлöтö, но не оськалöмöн, не морт моз. Вот и думайт — кин.

Коля пондiс видзчисьны, мый висьталас ёртыс. Зоночка чöлiс. А воробей эта коста пискышалiс: жив-жив, жив-жив — и öктiс шыдöс туссез, кöднö кольöмась типпез.

Славик гöгöр нёджжасис. Неöтпыр ни сы син вылö усьлiс руд гöна каёкыс, а тöдны ёртыслiсь загадкасö некыдз эз вермы.

— Но мый? — юалiс Коля.

— Ог тöд, — гажтöма шыасис Славик.

— Орсам сэк шашкаэзöн.

— Ог на, думайтны колö да вöлись.

— А сё ни эд он тöд.

Эна кыввезсянь Славикöс нельки öбида кутiс, но мый керны, оз кö пыр юрö коланаыс?

— Сэк висьтав ачыт, — корис Славик.

— Видзöт, — Коля чуньнас мыччалiс воробей вылö.

— Мый, сiя думайтан?

— А тэ видзöт.

Зоночкаэз кыкнанныс пондiсö следитны руд каёк сьöрын. И былись, мымда бы сiя эз вешшыв местаись местаö, öтiк оськöв эз кер, а сё чеччалiс.

— Вот эта зага-а-адка, — нюжöтыштiс Славик да гыжьялыштiс кинас чочком юроксö.

Уджыс веськöтö

Кöркö миян деревняын челядь садыс эз вöвлы. Быдöс поснит челядьыс учöтсянь олiсö гортын, дед-баб нето пöрисьжык сой-вон ордын.

Но менам учöтсянь не дед, не баб, не пöрисьжык сой-вон эз вöлö. Олi ме гортын öтнам. Мунас, вöвлi, мамö уджавны, а менö лунтыр кежö замок увтö игналас. Вот и пукав öтнат — джендöт кадсö. А эд гажтöм учöтöн öтiкöн керкуас пукавнытö. Ой, кытшöм гажтöм. Эд гортын пукавтöн и орснытö некинкöт. Да и чачаэс сэк менам вöлiсö етша: чайник вевт, гöгрöса галя да öтiк каб. А орснытö нiйöн öтiкöн некытшöм интерес эз вöвлы. Сiйöн унажык кадсö ме чулöтлi öшын одзын, асывсянь видзчиси мамöлiсь гортö локтöм и часто горзi. Чожа этасянь пондывлiс висьны юр. Сэк ме водлi узьны. А кöр саймывлi, вились кутчисьла важыс бердö. Сiдз и чулалiсö луннэз.

Мед меным вöлi не сэтшöм гажтöм, öтпырись мамö вайöтiс гортö каньпиян. Вöлi сiя чочком, сьöд сийöса да сера бöжа. Öтiк синыс да öтiк пельыс каньпияныслöн тожö вöлiсö сьöдöсь. Шуи ме сiйö Муркаöн.

Каньпияныс медперво вöлi учöт да ме кодь жö горзiсь. Сiя тожö гажтöмтчис мамыстöг.

Чулалiс кынымкö неделя. Мурка быдмыштiс. Öнi сiя отсöттöг кайис ни лабичö, пызан да залавка вылö, а ковсяс, дак и гор вылöдз. Велалiс Мурка и орсны. Сiя дзебсисьлiс ме шогья то ли пызан увтö, то ли ва кöньöс сайö. А кöр ме адззывлi сiйö, Мурка чеччöвтлiс меным юр вылам да бöра тэрмасис кытчöкö дзебсисьны. Дзебсисьлi кö ме, сiя менö тожö кошшис. А кöр адззывлiс, водлiс бокам, пондывлiс мурзьыны. Сы рамыника сьылöмсянь ме и ланьтлi.

Öтпырись ме дзебсиси пöлатьö, кытчö каньпияныс кайнытö эз вермы. Гöбечсяняс ни сiя кынымиськö нявöстiс. Но ме паныт эг шыась, видзчиси, мый лоас одзлань. Мурка водiс гор вылö, мурзьыштiс öтнас недырик да сы сорöн онмöссис. Чожа и ме тожö ланьтi.

Сайми кытшöмкö тарласьöм шысянь. Медперво дзар керыштi горвыв ладорö. Но каньпияныс сэтчин эз ни вöв. Муркасö ме казялi джоджись. Сiя öтнас тарлалiс джоджöт неыджыт лукок. То öт лапанас, то мöднас Мурка вашöтлiс лукоксö керку пасьта, сэтöн жö уськöтчывлiс, мед сiйö кутны, лапаэзнас чапкывлiс вывлань, усьлiс, öтлаын тарласис.

Ме вель дыр видзöтi сы орсöм сьöрын, а медбöрын лöсьöтчи нельки повзьöтны сiйö. Гусьöн, мед каньпияныс эз казяв, ме лэдзчи гöбечö. Эстöн мешöкын куйлiс лук. Сiя кадö, кöр каньпияныс быглясис аслас лукокöн, ме вылiсянь лэдзи эшö мöдiк лукок. Повзьöм увьяс Мурка сiдз чеччöвтiс — чуть только пöлатьыс бердö юрнас эз люкась. А сэсся сiя кöстiс спинасö, сувтöтiс гöнсö да бокöн-бокöн пондiс повзьöтчись лукыс дынö сибöтчыны — сiйö и видзöт, уськöтчас сы вылö да кыдз шырöс джагöтас.

Но кернытö сымдасö Мурка эз ешты. Кöр сiя лöсьöтчис уськöтчыны повзьöтчись лукыс вылö, ме вылiсянь лэдзи джоджас эшö öтiк лук, Öнi каньпиян чеччöвтiс эшö одззася вылынжыка да уськöтчис пызан увтö. Куимöт лукыс вашöтiс сiйö и пызан увтсис. Каньпиян уськöтчис комö, но и сэтчин вöлi сiя жö. И кытчö бы öнi сiя эз воштiсь, кытчö эз сайöвтчы, бöрсяняс сы вылö усялiсö луккез. Ме нiйö чапкалi не öтiкöн ни, кыдз медперво, а мымда шедас. А каньпиян дугдывтöг котрасис джодж пасьта. Сiя то вöтлiсис тарласян луккес сьöрын, то пышшалiс ны шогья. Ме жö, мымда верми, вакси сы вылын да сё чапкалi джоджас мешöксис луксö.

Сэсся Мурка сё жö казялiс, кытчö сайöвтчыны. Кöр ме содзтыр луксö чапки джодж шöрас, каньпиян перыта уськöтчис западня дынö да пырис аслас öшынокöт джоджулö.

Ме тожö пукси шоччисьыштны и казялi, что каньпияныскöт орсiкö джын мешöк мымда лукыс вöлi лэдзöм джоджö. Мöдi ни лэдзчыны улö, мед öктыны бöр шупкалöм луксö, но эта коста пытшкись посöдзас кылiсö мамöлöн оськöввез. Сэк ме перыта кайи пöлатьö, каттиси дöраовöй öн коласö, лöньси, бытьтö узя. Но мамö, тыдалö, казялiс менчим бöбöтчöмöс. Сiя кульыштiс ме вылiсь шебрас да юалiс:

— Тэ мыйлö мешöксис луксö джоджас лэдзöмат? Ме бытьтö саймöм бöрсянь тiльыштi синнэзöс, паныт горöтчи:

— Нем кернытö вöлi да...

— Чöв вот, мыччала ме тэныт «нем кернытö вöлi». Сэксянь мамö и дугдiс иган саяс менö видзны.

Ашынас жö, кöр сiя лöсьöтчис мунны уджавны, порог дорсяняс ни меным горöтчис:

— Но, ов гортын да эн дышöтчы. Талун ачыт ни джоджсö чышкы. Мед ёг тор эз кольччы. Вежöртiн?

— Но. Вежöртi.

— И пессö керкуас тожö пыртлы. Кылiн?

— Кылi.

— Да öтöрись посöдзсис лымсö чышкы жö.

— Чышка, мам, чышка, — кöсъялi ме, перыта катти да домалi кок бердам нинкöмись вонь.

Мамö мунiс. А меным нельки эз и веритсьы, что посöдз ыбöсыс талун абу ни игана и ковсяс кö — позяс петны öтöрöдз. Сiйöн эшö öтiк кöмтöм кокöн ме уськöтчи мамö сьöрсянь ыбöсö. Пытшкись посöдзас кокчуннез вылын перыта судзöтчи вылына дорöм ыбöс вуг бердö, перыта жö кыскыштi сiйö асланям. Кылiс негорöн дзуркнитöм — ыбöсыс и былись оссис. Меным сэтöн жö усис тöдвылам одзза лунö каньпияныскöт луккезнас орсöмыс. Ас кежам ме думайтi: «Вот кера часöт жö быдöс гортся уджсö, а сэсся? Сэсся лунтыр позяс орсны».

Керкуас ме босьтi киам кöтöтöм рос, пондöтчи чышкисьны. Чышки джоджсö öтпырись, чышки мöдöтпырись, а дзар керыштi бöрам — ёггес эшö кольччöмась. Вот и ковсис куимöтпырись джоджсö чышкыны. А сэтöн эшö каньпияныс мешайтö, оз сет меным бура уджсö кернытö: то сiя казявтöг росыс вылö чеччöвтас, уськöтас сiйö кисим да öдззас сыкöт джодж шöрас туплясьны, то кутчисяс коккез бердö и кутчас курччасьны да гыжьясьны. Кытчöдз ме куим-нёлись чышки джоджсö, сэтöн и павжун вöтiс. А керöм уджсянь ме тöдчöмöн ештi мыдзны ни. Но орсöм йылiсь дума юрись эз на пет.

Павжун бöрсянь ме кутчиси пыртлыны керкуö пес. Дасiсь ковсис кытшöвтны омöн керку гöгöр, карта ворота бердöдз. Этасянь ме люзь пымалi.

Пемдандорас ни менам удж керсис. Порог дорын ме бытшöма пыркöтi коккез бердiсь лым, шоччисьöм могись чöвтчытöг да пöрччасьтöг недырик кежö пукси западня вылö.

Мурка петiс пызан увтiсь, сибöтчис ме дынö, пондiс нювны киэзöс, а öткоста рамыника мурзьыны да нявзыны. Этö сiя сiдз корис менö орсны.

Колiс бы чеччыны. Эд гортся уджыс быдсöн вöлi керöм, и öнi пöттöдз позис орсны. Но мыйкö невежöртана видзис менö и нельки вöрзьöтчыны эз сет.

Керкуас вöлi лöнь. Сэтшöм жö лöня вотялiс пессэз бердiсь джоджö сылöм лымись ва. А гор бердсянь тöдчöмöн паськалiс шоныт ру, кöдö позис кывны нельки пеллезöн и кöдасянь öнi вöлi долыт быдсöн вывтырлö.

Ме сайми сёр рытöн, кöр öтöрас вöлi пемыт ни. Мамö бергалiс жарöн лонтiсян печка гöгöр, лöсьöтiс мыйкö сёйны. Сiя казялiс менчим осьта синнэзöс, юалiс:

— Но, бöра талун öтнат гажтöмтчин?

— Э-эг. Эг и казяв, кöр луныс чулалiс да.

— Адззылiн вот, кыдз сiя, уджыс, бöбсö веськöтö?