Кыдзтшак (битшак)

Чага-тшак йылiсь эстöн вывланьын вöлi казьмöтöм ни, сiдз кыдз и сiя быдöнныс кодь жö тшак. Сiйö позьö пантавны чуть я не быд пу бердiсь. Быдмö чага-тшак кöзовöй да ньыловöй мыррез бердын, быдмö и пипу бердын. Сiйö жö, кöть и шочыника, позьö пантавны и бадь, и ловпу бердiсь. Но сiдз кыдз чага-тшак частожыксö пантасьö кыдз бердын, сiя кыдзтшак йылiсь басниыс одзлань и пондас мунны рассказас.

Кыдз бердын быдман чага-тшаксö, кыдз, шуам, гоб нето рыжыккез отирыс и оз сёйö. Но коланаыс сылöн нач мöдiкын. Кыдз гижсьö официальнöй медицинскöй литератураын, кыдзовöй чага-тшак вылын лöсьöтöм чай или настой падмöтö раковöй пыкöслiсь одзлань быдмöм. Вежöртана, что öтiк этöн ни свойствонас чага-тшак морт оланын лоö öддьöн дона да колана. Но чага-тшаклiсь колöмсö ме тöда этася эшö мöдiкö. Сы отсöтöн позьö кокнита шедтыны би, висьтавны мöднёж — биасьны.

Миян кадся оланын, кöр быдлаын эм электричество, эмöсь истöггез да вузассьöны быдкодь зажигалкаэз, биасян нуждаыс некытшöм и абу. Но шедiт, шуам, тi вель дыр кежö вöрö, кытöн ковсяс чулöтны не öтiк ой, а истöггез сьöраныт эз лöсялö. Сы дырна биасьтöг вöрас вермас лоны и кöдзыт, и гажтöм. Вежöртана, что бисö позяс шедтыны первобытнöй отир моз, пондыны кö зыртны öтамöд бердö кык пу. Но эта вылö ковсяс торкны вель уна кад. А зэра да уль погоддя коста и кöс пуэсö адззыны лоас сьöкыт. Адззисяс кö матын кок увтын кытшöмкö чуньпон кодь галька, а сьöрын лöсялас неыджыт кöрттор, шуам, сiя жö перочиннöй пурток, öтамöд бердö кужöмöн вартлышавтöн неыджыт бичирсö позяс шедтыны и ны коласiсь. Но эд сiя шедö-чеччöвтö дзир мгновеннё кежö да сэтöн жö кусö бöр. Сiдзкö, не сартасöн, не симöтöн, не нельки нитшöн эта учöтик бичирок бердö он сидзöтчы. Нем бердö ны коласiсь сэтшöм учöтыс оз кутчись. Этатшöм би шедтöмын вермас отсавны дзир öтiк тор — нарошно лöсьöтöм эта понда чага-тшак.

Вывланьын вöлi висьталöм ни, что талуння миян оланын абу сэтшöм нужда, мед немöн вöлi биасьны. А вот нёльдасöт годдэзся война коста сэтшöм нужда вöлi. Сiя и öнöдз эшö ме тöдвылын да ме син одзын.

Годнас öтпыр-кыкись да невночкаöн сеталöм истöггес быд лунся обиходын некыдз эз тырмывлö. Эз тырмывлö нельки сэк, кöр öтiк истöгсö янсöтлiсö доль кык тор вылö. Часто вовлiс сэтчöдз, что биасьнытö асывнас керкуас вöвлi нач немöн, мед лонтны гор. Сэк лонтiсьöмыс бöрсянь пондывлiсö чышкыны да пöднавны сэтшöм кыз öгырöн, мед сы пытшкын биыс эз кус, вермис видзсьыны быдса сутки сьöрна.

Но и эта удайтчывлiс не быд лун. Часто вöвлi сiдз, что горын чукöртöм öгырын сутки сьöрна, мöдiк асылöдз, шоммез бердын биыс эз видзсьы, куслiс. Биасьны асывнас да лонтны гор кольччывлiс нач немсянь. Сэк ковсис ушкыны кынмöм öшын стекло, видзöтчыны сы пыр соседдэз ладорö, кин ны коласiсь шедтас одзлань би да лонтас гор, мед кöть кытшöм кöдзыт нето турöпа погоддя коста петавны ны ордö одзöсасьны.

Эшö этася гажтöм вöвлi истöгтöм оланыс куритiсь мужиккез понда, кöр эз адззись мыйöн öзтыны самосадiсь каттьöм цигарка. И эта шогья ковсьывлiс петавлыны биа сосед ордö нето овны куриттöг да ньылавны дуль. Вот сэк вот и мездiс куритiсь мужиккесö битöм нуждасис миян первобытнöй предоккезлöн огниво да чага-тшак.

Огниво — эта кöстöм подкова вылö мыйöнкö невна вачкисян кöрт, кöдалöн кыкнан конецыс каттьыштöмöсь кольцоэзöн. Ёнжыка видзöм могись ныö позьö сюйыштны кык чунь. Сы дынö колö эшö галька, кöда бердö огнивонас боксяньмоз чиркнитöм-вачкöмсянь позис бы шедтыны бичир. Но кыдз вывланьын вöлi висьталöм ни, этö шедтöм бичирсö мыйкö бердö ковсис кутчöтны. Этöн медбур мыйкöнас и лоис чага-тшак, сiдз кыдз огниво да галька сорöн шедтöм учöтик бичирок быдöс коласiсь медбура кутчисьö чага-тшак бердö. Но эта понда сiйö медперво колананёж колö лöсьöтны.

Ме ог тöд и ог висьтав, кытшöм ылöса-мывкыда мортлö пырис юрас шедтыны чага-тшак сорöн би. Думайтсьö, что эта адззöмыс ылын не миян луннэзся. Этасянь вермас лоны, что этö мортсö и ачыс историяыс оз тöд. А вот кыдз лöсьöтны колананёж этö чага-тшак, мед сы бердö сэтшöм кокнита кутчисис бичир, сымдасö усьлiс адззывлыны ас синöн и кöть небурика тöда.

Арнас ни, быдöс гожумся дзимлясян уджсö ештöтöм бöртi, деревенскöй стариккез, кöдна видзисö пишаллез, кытшöмкö провиант да чайтчисö эшö ветлöтны вöрö, кутчисьлiсö вöравны. Нiя жö, тырöн ли простöн гортö берттöн, ваявлiсö сьöраныс и чага-тшаккез. Колана мымда этадз ваялöм тшаксö заваритлiсö нето пувлiсö, а сэсся сiя жö ваын кöтöтлiсö эшö быдса неделя сьöрна, мед сiя сiсьмис. Эта бöрсянь вöлись этö небзьöм-сiсьмöм чага-тшаксö пондывлiсö косьтыны öддя горын. Косьтiсö не öтiк лун сьöрна сэтчöдз, что сы пытшкын и öтiк ватор эз кольччыв. Сэк вöлись этнö сухари кодь чорыт чага-тшаккесö жугдывлiсö черöн нето нöшöн и вевдöрись кöс корка увтiсь шедтывлiсö бурöй рöма, вата кодь кокнит да небыт вемсö, кöда чуннез коласын кокнита янсалiс торрез вылö. Эта вöлi тшöтш сiя, мый колiс огнивоöн биасьöм коста и шусис чагаöн.

Эта чагалiсь истöг юр ыжда пельыштöм торок öнi колiс пуктыны да жмитны öтiк киын кытшöмкö галька бердö, а мöд киöн кутчисьны огниво бердö да чиркнитны-вачкыны галька пöлöн. И шедас кö этадз чиркнитöм-вачкöмсянь бичир да инмас кö сiя эта учöтик чагаторок бердö, сiдз и тöд — би лоас шедтöм. Чага бердын югйöвтас неыджыт биок. Сы бердiсь жö чепöссяс кайны вывлань вуруновöй шöрт кызышта лöз тшынок. Но кöс чагаыс сотчö перыта. Öнi колö ештыны öзтыны сысянь самосадiсь каттьöм цигарка нето учöтик сартас. А öзйöм цигаркасянь нето сартассянь и печка горсö жарöтны абу ни сьöкыт.

Вот мый увья деревняын нiя битöм годдэзö быд куритiсь мужиккöт и вöвлi сiдз, что табак кисется, кöдаын вöвлi гырися масьтöм самосад да цигаркаэз вылö каттьöм гижöт, сы карманын, кыдз колхознöй кладовщиклöн ключчез, пыр гольöтiсö эшö огниво да галькаэз, а кытöнкö кисет коласын жö торйын вöвлi каттьыштöм небытик да кокнит чага. Быдöс этатöг сьöрын и биыс эз вöв. А куритiсь мортлö овны битöг некыдз оз позь, сэтшöмыс — не олан. Абу некытшöм охота думайтны сы йылiсь, что талуння биа оланыс кытшöмкö тöдтöм причина увья вежсяс сы öддьöн, что эшö öтпырись сы ылына жö шупкас-вештас бöрлань эта первобытнöй би шедтöмöдз. Но асланым предоккезлiсь историческöй опытсö миянлö колö тöдны. Вдруг эшö кöркö да кинлöкö пригодитчас. Вот мый увья ме и висьтаси эта учöтик рассказын кыдзовöй чага-тшак йылiсь, а асьсö сiйö шуи битшакöн.