Повессез гажа грива бур юöр

Гожум. Погоддяыс сулалö мича да кöс. Лунтыр, асывсянь и рытöдз, дугдывтöг сотö-палитö шондi. Павжун гöгöрас муыс калямö, кыдз баня гор из. Сы бердö оз позь павкöтчыны кöмтöм кокöн. Руыс тожö пым, кыдз баняын. Этасянь сьöкыт лолавны. Абу некытшöм тöлок. Ыб дорись кыдзовöй рас сулалö лöня, дзик сунасьö. Оз вöрзьöтчы öтiк листок.

Сёрдын, сiдз шусьö ыбыс, гöрöм му кузя жагвыв оськалöны кык вöв. Лунтырся жарсянь да уджсянь нiя мыдзöсь. Мунiканыс вöввез дыша гогинялöны юррезнаныс. Вöввес сьöрын кыссьöны пиняэз. Ны увтiсь, кыдз изыннэз увтiсь, кымöрöн кайö бус. Лöнь погоддя увья сiйö некöдöрö оз нöбöт. Этасянь бусыс öшалö ветлöм весьтас, топ асывся руд туман.

Ордчöн вöввескöт оськалöны пинялiссез. Этö томыник зоночкаэз — Толя да Витя. Нiя тожö мыдзöсь и сiйöн чöлöны. Дзир мукöд коста кöдакö ны коласiсь вувйыштас вöлыслö шатьöн нето ветлöм дорас дыша горöтчас:

— Бергöтчы чожжык!

Кöмкöтыс челядь кокын — нинкöммез, а выланыс öтiк дöраовöй йöрнöс-вешьян. Паськöмыс ны вылын руд, кыдз и муыс жö. Этö лунтыр сьöрна пуксьöм буссянь.

Но вот учöтжыкыс, кöда мунiс одзас, горöтчис:

— Толик, шоччöтыштам, батi, вöввесö? Тыр меным нинкöммезам муыс пырис.

— А менам горш косьмö. Шоччöтам.

Мыдзöм вöввезнысö зоночкаэз петкöтiсö межа бердöдз, лэдзисö. Асьныс пуксисö сэтöн жö межа дорас отöн паськалöм льöмпу куст увтö.

— Эх, ю дорö бы öнi! Быдса час бы васис эг петав, — горöтчис Витя. Зонка пöрччасис, пондiс пыркöтны нинкöммез пытшкись му.

— Купайтчыны тэныт эшö. Юны, шу, кöть бы пöттöдз, и сiя ни бур бы вöлi. Тэнат горшыт оз косьмы?

— Оз тай кытчöдз.

Васö эта гожумö адззыны вöлi сьöкыт. Жар погоддя увья поснит шоррес быдöс косьмисö. А татöн, кыдз нарошно, нельки некытшöм шорок эз вöвлы.

— Кöть бы кадыс перытжыка чулав. Недыр ни велöтчанöдз кольччис.

— Былись эд, кывзы жö, Толик. Чожа школаö.

— А мый, ашынсянь кö не петны ни, а? — горöтчис Толя. Видзчисьтöг зорамöм думасянь зонка нельки гажмыштiс. Но Витя паныт эз шыась.

— Мый нö шы он сет? — Толя сибöтчыштiс ёртыс пельпон бердöдз. Мöдыс эта коста думайтiс мыйкö ас кежас.

Зонка и рад бы вöлi шоччисьыштны кынымкö лунсö, но... Согласитчыны ёртыскöт сiя эз лысьт. «А мый эшö гортын висьталасö? Сетасö я ашынсянь шоччисьнытö ? »

Сэтшöмыс челядькöт вöвлi быд год. Арсяняс, кöр пондöтчывлiс велöтчан кад, нiя радöн ветлывлiсö школаö. Но велöтчан годыс кузь. Тöвбытнас челядь ёна мыдзлiсö и медбöрын учебниккес вылö видзöтлiсö кыдз ош вылö. Охота вöлi кöть недырик кежö мезмыны уроккез бердiсь. И кöр чулавлiс велöтчан кад, быдöнныс лякасьлiсö удж бердö. Но и колхозас гожумся кадö уджавнытö тожö абу кокнит. Асывнас чеччöтöны шондiтöг, медчöскыт он коста: колö мунны вöввезла. А сэсся, кыдз доддясян — лунтыр колö ветлöтны пиня сьöрын, гöрöм му кузя. Кöть жар, кöть кöдзыт погоддя коста вожжиэсö кисит он ни лэдз. А луншöр гöгöр петö сымда лöдз, что вöввес асьныс аслыныс нерадöсь. Нiя пессьöны, пышшöтчöны, сiйö и видзöт — доймасö, а то эшö и асьнысö пинялiссесö ештасö дойдны. Челядь эшö абу ыджытöсь, ылöстöмöсь. Вежöртана, что гожумбытнас быд лунся сэтшöм уджын нiя мыдзöны. Вились охота лоö пуксьыны парта сайö, чöлöмöн кывзыны велöтiсьлiсь висьтасьöм, решайтны примеррез да задачаэз, кошшыны карта вылiсь государствоэз да нылiсь столицаэз.

Вот и öнi. Усис Толялö тöдвылас велöтчан йылiсь дума, зонка часöт жö готов вöлi пуксьыны парта сайö.

Мöйму вöлись чулалiс война. Колхоз эшö эз на ешты сувтны бытшöма коккез вылö. Эз тырмы отирлö нянь. Мужиккез война вывсянь бертiсö етша. Эта увья нылö, кöдналö вöлись колiс бы котрасьны ю дорö чериавны да ветлöтны вöрö тшак-ягöдла, öтмоз пöрисьжыккезкöт ковсис лунiсь-лун уджавны ыббез вылын. Челядь отсалiсö колхозлö, а öткоста шедтiсö и аслыныс нянь кусöк. Быд уджалöм лун понда сiя жö рытö колхозсянь сетавлiсö двести грамм мымда пизь.

Школасö касьтылöм коста зоночкаэз недырик кежö вунöтiсö асланыс удж йылiсь. Сiя кадö льöмпу куст сайсянь, кöда увтын нiя часöт пукалiсö, видзчисьтöг мыччисис бригадир.

— Но мый, шоччисят?

— Шоччисям тай. Некытчö тэрмасьнытö, — шыасис паныт Толя, содтiс: — Петам талун татiсь. Подлосыс дзир невночка кольччис.

— Адзза, что петат. Вот и бур. — Бригадир кыскис чышьянок, пондiс чышкыны чужöм вывсис ньылöмсö. — Петö да шоччисьыштö талун, а ашын Гажа Гриваö.

— Тью-у-у! — шутньöвтiс Толя. — А ми ашынсянь думайтiм... — Эстöн Толя джöмдiс баснинас, видзöтыштiс ёртыслань.

— Мый тi ашынсянь думайтiт?

— Дак эд чожа школаö, Опонь дядь. Шоччисьыштны бы невночка сы одзын колiс.

— Мыдзит? Вежöрта, челядь, вежöрта. Но и тi менö тожö вежöртö. Отсалö эшö невнасö. Зöр вот вундыны ковсяс пондöтчыны, а миян ытшкисян страдаыс öнöдз петкöттöм. Отирыс, асьныт тöдат, оз тырмы. Думайтö вот, кинöс ме тiян местö Гажа Гриваас мöдöта? Не босьтны жö эд эта увья отирсö ытшкисян-куртансис. Адззат, погоддяыс кытшöм сулалö. А сёрмыштан кö невна сэтшöм кадö — тöвбыт кежö вердчантöг кольччан. Отсыштö эшö кыдзкö лунсö-мöдiксö. А петат Гажа Гриваись, сэсся шабаш. Сэсся тiянöс — некытчö.

Бригадирыс басни коста зоночкаэз эз шыасьö, кывзiсö. Да и кывзiсö я только? Ась нiя и томöсь, ась не гырись отир, но нiя вежöртiсö. Вежöртiсö челядь, что корö кö Опонь дядь, сiдзкö, не весь. Сiдзкö, дзескыт сылö нытöг бергöтчынытö. Сiдзкö, колö отсавны. Сэтчö жö бригадир ассяняс кыв сетiс, что Гажа Грива бöрсянь нiйö — некытчö. А веритны Опонь дядьлö позьö. Челядь тöдiсö: кыдз сiя висьталiс — сiдз и лоас.

Бригадирыс басни бöрсянь Толя гажмыштiс.

— Ура-а-а! Вот этö да! — гажöн ыкöстiс сiя, сувтiс коккес вылö. Витя одззамоз кольччис пукавны межа дорас, чöлiс. Пукавтöнняс сiя нырыштчис мороснас пидзöссэс вылö, киас сюрöм шатёкон пондiс перкйышавны кок увтсис шеллясьöмöдз косьмöм му.

Колхозын Витя отсасис вöлись куимöдз гожум. Вовлыны эта коста Гажа Гриваын зоночкалö кытчöдз эз усьлы. Пинявнытö сэтчин быд год иньдывлiсö пöрисьжык да садяжык челядьöс. Киннэз каясö таво — сiя кытчöдз эз на тöд. Юавны жö эта йылiсь бригадирыслiсь вöлi мыйкö недолыт.

Мый эз лысьт Витя, керис Толя. Сiя дзар керыштiс лöньсьöм ёртыс вылö, юалiс:

— Опонь дядь, а киннэз эшö Гажа Гриваас каясö?

— А ог на тöд. Висьтав вот, кинöс бы эшö тэкöт позис мöдöтны. Морт куимыс, натьтö, сё ни ковсясö.

Öнi вöлись Витя дзик саймис. Зонка чапкис кисис шатёк, тожö сувтiс.

— Ме öтпырись сэтчин эг на вöв да... ог тöд, мöдöтасö, озö.

— А каян? — юалiс бригадир.

— Мыля ог? Кая.

— Но вот и бур. А куимöтсö кинöскö сё ни адззам. Сэк пиняэзнытö талун гортö ваят. Да няридз ашын кежö лöсьöтö. — Бригадир босьтiс сажень, иньдöтчис поперег ветлöмыс кузя.

Бригадир басни бöрсянь челядь вежсисö син одзын. Нiя пондiсö тэрмöтышавны вöввезнысö. Асьныс эта коста сё видзöтышалiсö рытлань бергöтчöм шондi ладорö. Позис думайтны, что зоночкаэз полiсö кытчöкö сёрмöмись. Тэрмасиканыс Толя вунöтiс нельки аслас горш косьман йылiсь.

ТУЙЫН

Вöввезнысö асывнас челядь вайöтiсö одз. А кöр Толялöн Рыжкоыс вöлi доддялöм, зоночкаэз пондiсö тэчсьыны туйö. Няридз вылö нiя пуктiсö куим пиня да сымда жö улыккез. Эта коста ны дынö сибöтчис куимöт ёртныс — Миша. Локтiкас зонка сё эшö тiлис синнэсö.

— Тi кытчö, зонкаэз, лöсьöтчат?

— Гажа Гриваö. А мый?

— Да нем. Ме эд тожö тiянкöт.

— А мый нö сы дырна узян? Мунны ни эд пондам.

— Дак ме не виноват. Мамö коли дыр абу саймöтöм. Но ме чожа. Айö только вöвсö вайöтас — и быдöс.

— Кыдз быдöс? Кык ой кежö эд каям. Да и кöдзыс эшö колö кайöтны. Етшаöв пö сэтчин.

— Да ме тöда, тöда. Дак эд кольö менö, Толик, но?

— Но вöрöтчы сэк чожжык.

Миша и былись пондiс тэрмасьны. Сьöкыт кокйылöн сiя котöрöн уськöтчис бöр гортас.

Сёяннас ассис мешöксö да Витялiсь пестерсö Толя тожö пуктiс няридз вылö, домалiс öтлаын пиняэзкöт да улыккезкöт.

Недыр мыйись, аслас Дюттян вылын, мыччисис и Миша. Вöлыскöт ордчöн оськалiс Мишалöн мамыс. Горбыльтчöмöн сiя кыскис спина саяс кык ведра тöрик пестер. Эта коста шондiыс бергöтчис деревняыслö доль. Сiдзкö, кадыс вöлi кыкьямыс час гöгöр ни. Колiс петны туйö.

— Но, мунö жагвыв, — горöтчис бригадир, кöр зоночкаэз пуксисö асланыс вöввез вылö. — Тэ, Толя, садяжык да и туйсö бытшöма тöдан. Синйы ёрттэт сьöрын. Да жагöн, видзöтö, поссэс вылын. Весись вöввезнытö эд тэрмöтö да эд кольö öтамöднытö.

— Но, — дженытика шыасис Толя паныт бригадирыслö. Зоночка ныкнитiс ассис Рыжкосö. Сы сьöрö вöрзьöтчис Витя. Миша эта коста сулалiс мамыскöт да сё эшö кывзiс сылiсь велöтöмсö.

— Да эдö жö бöра сэтчин косясьö! Эд песö миянлiсь Мишасö! — горöтчис челядьлö бöрсяняныс Мишалöн мамыс.

— Да огö, огö! — ылiсянькодь ни шыасис паныт Толя, а öткоста ас кежас думайтiс: «Тшыг кинкö тiян вöзабыдтöмись ».

Матын деревня саяс челядьлö тöдса быд пу да куст. Вильыс эстöн син вылö нем эз усь. Сiйöн зонкаэз мунiсö чöлöмöн. А Миша кыдз кольччис перво жö бöрлань, сiдз öнöдз ёрттэсö и эз вöтлы. Вöлыс сы увтын, гнедöй гöна, ён да öддьöн жаг кöбыла, эз и думайт тэрмасьны одзись вöввес сьöрö. Сiя нюжвылика вешталiс коккесö, сунасис. Топ сэтшöм жö пукалiс сы вылын и ямщик. Пестер увтас Миша, топ мыр, полiс вöрзьöтчыны местасис. Ылiсянь видзöтiкö позис думайтны, что и сiя суналö вöлыс моз жö.

Дыр мыйись матiсь ыббез кольччисö бöрлань. Одзлань туйыс пондiс кыссьыны вöр коласöт. Ыркытiнас кысянькö койыштiс ном. Быдса кымöрöн нiя пондiсö лякасьны чужöм да киэз бердö. Вöввес пондiсö пессьыны. Ковсис дорйисьны, öвтчыны чегöм улоккезöн. Эстöн вöлись Миша бытьтö саймис.

— То-о-оли-ик! Ви-и-итя-а! Видзчисьö менö-ö-ö!

— Видзчисьны ковсяс. Кытчö сыкöт воштiсян, — горöтчис Толя, тпрукнитiс ассис вöвсö.

— Кывзы жö, Толик, а мыйсянь сiя сэтшöм кыз? Синнэс, видзöт жö, топ шеллез кольччöмöсь, а ачыс и вöрöтчыны кодьöн оз вермы.

— Дышсяняс, мыйсянь разь эшö. Адззан, кытшöм сiя нылöн вöзабыдтöм. Вöвсö сылö асывнас кошшö да вайöтö айыс, павжунсö тэчö да нöбöтö сьöрас мамыс.

— Былись эд.

— А мый нö ме тэныт висьтала? Тэнö сiдз видзны да еркöтны-вердны, дак и тэ сэтшöм жö каб лоан.

Паныт Витя эз шыась. Зоночка дзир гажтöма ловзисис ыш да дзар керыштiс бöрланяс.

Эта коста пуэс колассянь мыччисис Дюттянлöн суналан синнэза кокан кодь сьöкыт юрыс. Сэсся, öтiк бöрсянь мöдiк, петiсö тоиннэз вылö вачкисян коккес. Недыр мыйись Миша сибöтчис ёрттэс дынöдз, сувтiс.

— Тэрмöта, тэрмöта, а сiя и синöн оз кваркышт, — пондiс сiя норасьны вöлыс вылö.

— Мыйöн жö тэ сiйö и тэрмöтан, кöр тэнат и шатьыс киат абу?

— Нем вылö меным шатьсö. Менам и темлякыс поводдэс бердын кузь, да только вот швычкынытö сылö мешöкыс увья некыдз оз туй.

— Но эн ни сэсся кольччы.

Челядь вöрзисö одзлань.

Медодзза оль весьтöт поссö вуджисö бура. Пос мöдöрас ни пондöтчис кондовöй кöзъя вöр. Пуэс, гырисьöсь да волькытöсь, кыдз пöляннэз, жагвыв окласисö öтамöд коласын. Кысянькö вылiсянь дугдывтöг кылiс: ш-ш-ш-ш. А увдöрас вöлi ыркыт да лöнь. Руыс эстöн уль. Му бердсянь лэбтiсьö сiсь да баг дук. Но сiя сэтöн жö сорлассьö чöд дуккöт. А ягöдыс вöрас, топ кисьтöм, лöз видзö кыкнан туй бокöттяс.

— Видзöт жö, Толик, чöдыс мымда.

— Адзза эд.

— А мый жö бы дöс кö, мымда эм вöрас, сiйö öктыны? Уна бы эд, натьтö, чукöртчис. Сiдз эд?

— Сiдз-ту сiдз, да кин сiйö сымдасö öктас. Тар-сьöлаыс кöть кокалас, дак сiя ни бур.

— Вот бы отирыслö доброыс кытöн вöлi, а? Толя осьтыштiс ни вöлi öмсö, мед горöтчыны мыйкö паныт, но эз ешты. Эта коста сылiсь няридзсö кинкö вынöн топ кыскыштiс бöрлань. Рыжко сувтiс.

— Вот тэныт и ягöд. Кышасис эд, кылö, кытчöкö няридзыс, — горöтчис Толя. Зонка гуж-важ лэдзчис вöв вылiсь, мышкыртчис, дзар керыштiс увтас. Няридз юр одзын сулалiс печка труба кыза ён кыдзовöй мыр.

— А тi мый сувтiт? Мунö жагвыв. Ме эд вöта. Мырсö вот дзир ковсяс керавны. Пиняэзнас тыра няридзсö киэз вылын сё ни он лэбты. — Толя мынöтiс няридз кок бердiсь чер, водсöн пырис няридз увтас, пондiс керасьны.

Миша чöлöмöн и былись вöрзьöтчис местасис, петiс одзлань.

— Тэ кытчö? Сулав! — горöтчис Витя.

— А мый?

— Нем. Ачыт невна кольччан бöрлань, дак мымда вын горштö летан, мед тэнö видзчисисö.

Шыасьтöг Миша сувтöтiс вöвсö бöр. Сiя кадö Толя сё эшö ружтышалiс няридз увтын да негорöн тюкöтiс чернас мыр бердö.

— Отсавны, батi, тэныт, Толик? — юалiс ёртыслiсь Витя.

— Да не. Оз ков, ме ачым верма.

Недырик шоччисьöм бöртi Толя вились кутчисис удж бердö. Но вот сiя петiс няридз увтiсь, сувтiс.

Черсö зонка сöтiс бöр важ местаас, вöвсö ныкнитiс. Кылiс негорöн кажнитöм. Няридз чеччöвтыштiс вывлань. Негорöн жолькнитiсö пиняэз бердын кöртовöй барашоккез. Мырыс кольччис бöрлань.

— Сымда и эм, — гажвевйöн горöтчис Толя, пуксис вöв вылö.

— Кыдз тэ, Толик, ылöстöмыт черсö сьöрат босьтны? Адззан, ковсис ни эд. А эз кö бы вöв, мый бы öнi эстöн пондiн керны? — баитiс Витя.

— Вöрын чертöг — кыдз киэзтöг, — ыджыт морт моз шыасис Толя ёртыс басни вылö, сэтöн жö суськисьтöг содтiс: — А ме эд эг мöд босьтны.

— Босьтöмыт жö тай.

— Дак айö тшöктiс. Тöдан сiя миян кытшöм, о-о! Сiя оз радейт öтiксö куимись висьтавны. А он кö кывзы — эн обижайтчы. Кыдз мурзьыштас да дзар керыштас, этасянь ни спина пасьта кучик кöдзалö.

— А сiя тiянöс оз пес?

— О-оз. Сизимöн жö мийö. Быдöннымöс кö вартлыны, дак сылö и уджавнытö некöр лоас, — шутитöмöн висьталiс Толя. — Чорыт сiя мывкыднас, лёк. Этасянь быдöннымлöн учöтсянь сiдз велассьöм, что поперег сы кыввезлö некин оз кер.

Баитiканыс челядь чулалiсö уль вöр, петiсö непаськыт шутём вылö. Шутёмыс, топ йывдöм клин, вель ылö кыссис вöр коласöт. Шöрöттяс сiя вöлi эшö югыт. А вöр бердсяняс подлоссэс пондöмась ни тырны томыник пожум да кöз вöрöн. Шутём вылöттяс не öтiк местаöт öнöдз эшö тöдчисö кынымкö борозда. Ны сьöртöт позис тöдны, что одзжык этö неыджыт му торсö тожö гöрлöмась да кöдзлöмась. И дзир война увья, кöда мырддис колхозыслiсь уна вын, муыс вöлi чапкöм.

— Эта мый, Гажа Гриваыс ни? — юалiс Витя.

— Не. Сiя эшö одзаным.

— А эта кытшöм ыб?

— А кин сiйö... — сымда и ештiс горöтчыны паныт Толя. Эта коста кысянькö шульга ладорсянь, нач Рыжкоыс ныр увтö тшакыльöн тарöвтчис учöтик кöчпиян. Ыджыт я сiя зверь, но видзчисьтöм пантасьöмсянь вöлыс повзис. Сiя горöн корснитiс нырнас да öткоста чепöссис бокö. Толя, кöда пукалiс Рыжко вылын тожö бокöн, эз и казяв, кöд коста берездасис бöрлань, а усьтöнняс ёна люкалiс кымöснас няридз кок. Витялöн том Чалкоыс повзис Толяыс усьöмсянь ни да чепöссис мöдöрö. Повзис и Витя. Зоночка топ лякасис вöлыс бердö коккезнас, гырдззаэзнас нырыштчис сю мешöк вылö, мымда вын, зэлöтiс поводдэсö, öткоста тпрукайтiс вöвсö. Мишалöн Дюттян тожö осьтiс синнэсö. Но нем полöтанасö ас гöгöрись сiя, тыдалö, эз казяв и нельки пельöн эз вöрзьöт. А кöр быдöс жагвыв лöньсис, кöчпиянлöн и дукыс матын эз ни вöв. Челядь дзар керыштiсö öтамöд вылö. Эстöн вöлись Витя и казялiс ёртыс кымöс вылiсь ыджыт лöз швав. Зонкаэз пондiсö горöн ваксьыны. А кöр сералöмныс невна лöньсис, Витя одзлань юалiс:

— Толик, öнi тöдан, кыдз эта ыбыс шусьö?

— Кыдз?

— Сюраыбöн, вот кыдз.

— Мыля?

— А видзöт жö швавыс кымöс вылат кытшöм кайис.

Толя пешлыштiс кинас кымöссö, грöзитчöмöн горöтчис:

— Но чöв, пиньöла син. Локтас тöлыс, дак ме тэныт вештiся.

Кытчöдз челядь сёрнитiсö да сералiсö ас коласын, казявтöг сибöтчисö крут кырас дорö. Рыжко, кöда öнi вились мунiс одзас, сувтчис поспуэз бердö, дзар керыштiс бöрлань.

— Но вот и локтiм,

— Эта мый, Гажа Гриваыс ни?

— А мый тi думайтат? Сiя, конешно.

— Эг и казялö, кыдз туйыс чулалiс. Но ылынкодь жö. — Витя да Миша бергöтлiсö öтмöдöрö юррезнысö, нёджжасисö. Син вылö зонкаэзлö медодз усис кырас, кöда вöлi адззывлытöм крут да джуджыт, öддьöнжыксö кырас мöдöрыс. Тасянь видзöтiкö думайтсис нельки, что не подöн не вöлöн сылань веськыта он и кай. Сы йылiсь жö тöдмöтiс и непаськыт туёк. Мед петны вевдöрöдззас, сiя кыссис не веськыта кырас паныт, а нюжалiс скатыс кузя бокöмоз.

Мый эшö этася усис син вылö интереснöйыс, дак этö вöр, кöда кырас пöлöн мыччассис куим-нёльпöвса. Шор весьтас, кöда горöн ургис-котöртiс кырас пыдöсöттяс, вель тшöка быдмис бадь-тальник. Сэтöн жö, но бадьысся тöдчöмöн вылынжыка лэбтiсис пемытвевья льöмпу вöр. Вылынжык ны бердсянь и тшöтш кырас дорöдз öдззöтчöм пöрисьвевья ни, ота да йыла листа нинпу вöр, кöдö матi деревня гöгöр некысь пантавлыны челядьлö эз усьлы, öдззöтчöмась нинпуэс вывлань, но кайны кырас вевдöрöдззас сiдз и абу вермöмась. Тшöтш кырас дорас нiйö панöвтöмась лым кодь чочком вывтыра гырись садовöй кыдззез. Шочыника кольöмöсь ыб дорöттяс, нiя и былись вачкисисö гажа да басöк сад вылö.

Туруныс эстöн, кыдз эшö одзжык висьтасис Толя, и былись вöлi вöввеслö кынöм увтöдз.

Быдöс, мый усис син вылö, — дзонь, вöрзьöттöм. Эз тыдалö матын кульöм кача да кöс нинпуэз, эз позь казявны öтiк лиалöм кыдз, эз бытшкö син льöмпуэзлöн чашкöтлöм уввез. И эз кö бы усь пос сайын син вылö тöлöн пöрöтöм öтiк кыдз, позис бы думайтны, бытьтö быдöс эта быдмöм да зорамöм öтiк мича асылö. Матын морт оланiн дынын сэтшöмöн неловья природаыс пантасьлö етша. Сэтшöмöн сiя вермас лоны дзир сэк, кöр отирлö дона сылöн оланыс, кыдз историялöн памятник. Тшыкöтны, вийны сэтшöмсö ылöса мортлöн ки оз лэбтiсь.

Мый эшö усис челядь син вылö, дак этö баня гор ыжда лым кодь чочком галя. Сiя куйлiс кырас покатас, неыджыт мысочок вылын. Зэв сы бердöт и кыссис вывлань туй. А сы гöгöр сулалан нинпуэс кышöтiсö галя весьтын лажмыта öшалан уввезнаныс.

— Видзöт жö, Толик, а мыля нö татöн лымыс öнöдз абу сылöм? — юалiс Витя.

— Кытöн?

— А то тай, нинпуэс коласын тыдалö, — висьталiс зоночка да мыччалiс сылань кинас.

— Сiя не лым, а галя.

— Мы-ы-ый? Галя, шуан? Сы ыждаыс?

— А мый тэ думайтан?

— Дак эта сiя и эм, Лаврей галяыс?

— Но.

— Вот сiя кытшöм! Чочком. А ме öнöдз думайтi, что сiя сьöд нето руд и не сы ыжда. Кывзы жö, Толик, а мыля сiйö сiдз шуöны?

— Ог ме тöд бытшöмика. Кытшöмкö пö морт я мый я кöркö сэтöн кувлöм.

Мортыс кулöм йылiсь юöрыс недырик кежö зоночкаэсö повзьöтыштiс. Но эта поломыс чулалiс перыта. Недыр мыйись Витя дивуйтчöмöн одзлань горöтчис:

— А не весь жö, тыдалö, этö ыбсö Гажа Гриванас шуöмась.

— Мый, гленитчö? — юалiс Толя да сэтöн жö одзлань содтiс: — Чöв вот, тэ быдсöн сыкöт тöдсась, да сэк вöлись баит. А öнi, челядь, колö вуджны мöдöрас, кадыс чулалö.