Монгольскöй гöсь

Мушар вылiсь природаын дуббес пантасьлöны быдкодьöсь. Только «Декоративнöй дендрология» учебникись, кöда сетö рекомендацияэз, кытöн да кытшöм виддэз ны коласiсь буржык садитны озелененнё понда, ме нiйö лыдди даснёльö. Эм этна коласын и бадь кодь листа дуб, и гöрд дуб, эм дуб черешчатöй, и эм нюрвыв дуб. А сэсся эшö дуб чочком, дуб скальнöй, дуб пробковöй да мöдiккез. Вежöртана, что быдыслöн ны коласiсь аскодь узöра лист, öтiк мöдiкся басöкжык. И сьöкыт нельки висьтавны, кöда ны коласiсь медбасöк. Листыс сьöртi меным медöддьöн гленитчöны гöрд дуб да каштан листа дуб. Öтыслöн ны коласiсь сiя кыдз йыла листа клёнлöн жö, дзир кузьмöса. Мöдыслöн тожö кузьмöса да, топ кыдз доль пилитчан пилалöн, гырись пиня дора. Жаль только, что некöдыс ны коласiсь миян вöрын оз быдмö. Кыкнанныс нiя шонытжык местаись. Оз быдмы миянын и черешчатöй дуб, кöда пантасьлö омöн Россиялöн шöрöт полосаын да кöда быдöс дуббез коласiсь медбытшöма вермö терпитны миянлiсь кöдзыт тöв. И садитны кö сiйö миян местаö морт киöн, овны-быдмыны тожö вермас. Но эстöн ме мöда висьтавны эшö öтiк дуб йылiсь, кöда йылiсь лыддьöтiсьыс тожö эшö нем оз тöд.

Сэксянь, кöр ме служитi флотын, ылын тихоокеанскöй берег дорын, кадыс чулалiс уна ни, куимдас годся унажык. Но öнöдз эшö ме син одзын сулалöны нiя природнöй парккес, кöдна эмöсь Владивосток город гöгöр мукöд сопкаэз пасьта. Вежöртана, что миян вöррез вылö нiя немöн оз вачкисьö.

Шочыника быдман пуэзсянь нiя югытöсь, сöстöмöсь да шучтыдаланаöсь быд ладорсянь, кöдöрсянь бы ны вылö эн видзöт. Быдса километр ылына и, нельки, ылынжык ны пыр быдöс тыдалö, кыдз ки долонь вылын. А эта югытсянь, сöстöмсянь да проссянь нiя эшö и öддьöн гажаöсь. А быдöс эта сысянь, что этна природнöй парккес аркмöтöмöсь куш монгольскöй дубись.

Пуыс эта быдмö не перыта и не джуджыта, кыкдас метрся вылынжыка оз лэбтiсь. Сiйöн не сирпукöт, не кыдзкöт нето тополькöт, кöдна вермасö нюжавны куимдас-нёльдас метр сувдаöн, монгольскöй дубсö ордчöн он сувтöт. Садитöм кö сiя прос местаö, сылöн уввес не сiдз кыссьöны вывлань, кыдз паськалöны зэв паськыта öтмöдöрö да аркмöтöны аскодьöм шатёр. Этасянь сiя вачкисьö чожажыксö пöрись рябина нето пöрись жö льöмпу вылö.

Миянлiсь кöдзыт климатическöй условиеэсö монгольскöй дуб вермö терпитны черешчатöй дубся не умöльжыка. Сэтчö жö и быдмö сiя быдкодь почва вылын, кöть и радейтö унажыксö изъя местаэз да кытöн унажык известь. А сiйöн, что быдмö монгольскöй дуб не öддьöн джуджыта да оз полöт аслас пöрöмöн непогода коста, неумöль садитны сiйö и городскöй озелененнёö.

Чуть я не кыкдас год сьöрна ме видзи тöдвылын этö дубсö. И дзир сизимдасöт годдэз конецö, кöр уджалi природа дозоритан окружнöй обществоын, миянлö усис босьтны город Благовещенсксянь кык посылка мымда эта дублiсь кöдзыс. Нiя жö годдэзö кöдзöм жёлуддезiсь петалiсö томыник петассэз. Вöлiсö нiя не öтiк сотня мымда.

Обществоись удж вылiсь мунöм увья садитнытö питомниксис меным аслым нiйö эз ни усь. Этасянь кытчö да кин нiйö садитiс, бытшöма кытчöдз и ог тöд. Но 1989 годся гожумö пантасьны мукöдыскöт ны коласiсь сё жö усис. Куим-нёль монгольскöй дуб казялi ме окружнöй санитарно-эпидемиологическöй станциялöн территория вылiсь. Дубоккес ловьяöсь и садитöмöсь бытшöма, вель ылö öтамöд дынсянь, сiдз кыдз дзескыт местасö нiя оз радейтö.

Öння кадöдз том пуоккез быдмöмась метр сувдöн ни. Но вöлi бы öддьöн бур, сетiсö кö бы нылö быдмыны да овны не öтiк сотня год мымда, кыдз культурнöй да ловья природнöй памятниккезлö. Эд сёрöнжык дубоккес пондасö цветитны, аркмöтны да воöтныассиныс кöдзыс. А этна кöдзыссэзсянь сiя вермас паськавны жагвыв и омöн округ пасьта. Монгольскöй гöсь — миян округын! Кытшöм бы вöлi бур.