Пöрись кань

I

Война коста годiсь годö эз тырмывлы отирлö сёян. Эта кузя миян деревняын не быд керкуын видзисö пон да кань. Эд и нiйö тожö ковсис мыйöнкö вердны.

Кынымкö год сьöрна эз вöв каньыс и миян. И колö висьтавны, что сытöг керкуас тожö эз вöв некытшöм олан. А быдöс сысянь, что каньыстöг нач осилейтiсö шыррез.

Лöньжык вöлi шыррезсянь гожумнас, шоныт кадö. Сэк нiя, тыдалö, петавлiсö керкусис карта вылö да карчйöрö, кошшисö аслыныс сёянсö турунiсь да вужжезiсь. Но кыдз только сибöтчывлiс тöв, шыррез быдса араваöн чукöртчывлiсö бöр керку пытшкö. А сiдз кыдз кутавнытö нiйö эстöн вöлi некинлö, нiя вельмывлiсö, кыдз баитсьö, кучикись петтöдз. Мукöд коста шыррез петавлiсö син одзö нельки лунся югыт коста. А сибöтчывлiс кö рыт да куслiс сартаса би, быд пельöсын нiя лэбтывлiсö сэтшöм кутерьма, что эта коста ланьтöм да шоччисьöм йылiсь и думайтны вöлi нем. Пискышавтöн, — натьтö, тышкасисö öтамöд коласын, — нiя котрасисö пызан да лабиччез кузя, жольöтiсö пань-бекöрöн залавка вылын да сы пытшкын, кышöтiсö порог дорись рос увтын, дугдывтöг мыйкö кручкисö-йирисö гор сайын. И мымда бы нiйö эта коста эн повзьöтлы да эн вашöтлы, кöр öшöпекöн, кöр гормöтчанöн нето бырöм öтöпкиöн, — нем эз отсав. Лöньсьывлiсö кынымкö минута кежö, а одзлань вились пондöтчывлiс быдöс сiя жö.

Лöньсьывлiсö шыррез дзир асывнас да и то не асьныс, а кöр мамö чеччывлiс ольпасись, кыскывлiс горись ухватöн биа шоммез да ны вылö ушкöмöн, öзтывлiс сартаса би. Сэк вöлись нiя уськöтчывлiсö залавка да ком джаджжез вывсянь гор сайö, а сэтчинсянь лэдзчывлiсö гор увтö да джоджулö.

Нерадсялöм сэтшöм олöмсянь, кытшöмкö кадö мамö вайöтiс керкуас кань.

Оланас чожажыксö овлö сiдз, что вайöтöны каньсö учöтсянь, висьтавны мöднёж — пиянöн. Сэтшöмыскöт медперво позьö орсны. Учöтик каньпиянлöн орсöмыс зэв ёна гажöтö поснит челядьöс. Сэтчö жö и велалö сiя учöтсянь аслас горт дынö бытшöмжыка и некытчö оз ни пышшы. Но мамö вайöтiс керкуас бабöлiсь пöрись кань, кöдö шуисö Муркаöн.

Вежöртана, что не орсны, не вöтлiсьны челядь сьöрын пöрись кань эз ни радейт. Но неделя бöртi позис ни адззыны, что пышшыны бöр Мурка тожö эз думайт, сiдз кыдз уджыс эстöн сылö вöлi тырмöмви.

Асыввезнас, кöр ме мунлi школаö, Мурка гажтöмтчытöг кольччывлiс öтнас гортö. А кöр ме уроккез бöрсянь бертлi бöр, сiя лöня пукавлiс то ли матын порог дынын, то ли пызан увтын.

Мукöд кань моз горöн Мурка миян некöр эз нявзы. Эз пелитчы и пидзöссэз вылö. Сёйнытö сiя корис мурзьöмöн да коккез бердö зыртчышалöмöн. Пöрись кань бытшöма кужис да вермис керны и ассис удж и нельки некытшöм выходнöйез этаын эз тöд. Вайöтöмыс бöрсянь кык-куим неделя сьöрна и öтiк лун сэтшöмыс эз петав, мед сiя эз кый да эз петкöт пызан увтö кöть öтiк шырöс.

Биа рытöн, тöвнас, кытчöдз лонтiсис джодж шöрын сулалан жечовöй печка, Мурка лöня пукалiс сы увтын да кадiсь кадö тюкышалiс нырнас джодж бердö — сунасис. Сэтчö жö шонытiнас кольччывлiс сiя и сёрöнжык кежö, кöр ми пöднавлiм печка труба, кусöтлiм би да водлiм узьны. Думайтсис, что пöрись каньлöн ойыс сiдз сэтöн и чулалас. Но не.

Кытшöмкö кадö, ойнас, залавка увтын нето сы пытшкын, кöдö мамö ой кежас нарошно кольлiс осьтöн, кывлiс перыта да дженыта гыж-важнитöм. Эта сьöртi сорасьтöг ни позис тöдны, что овсис олан эшö öтiк шырлöн. Сэтöн жö Мурка петкöтлiс кутöмсö джодж шöрöдз. И вöвлi кö мöдыс сэк кежö эшö ловья да вермис котрасьны, ны коласын пондöтчывлiс быльнöй «шырись-канись» орсöм. Мурка лэдзлiс шырсö джодж шöрö, ачыс вешшывлiс оськöв ылына бокö да вынсьöтчис мыччавны, кыдз бытьтö сiйö сэсся оз и адззы.

Вежöртана, что ловья шырлö, мед вермыны пышшыны бöр аслас смертнöй казнь увья, дзир эта и колiс. Недырик нюкайтчыштöм бöрсянь сiя медодз керлiс дженытика оськöв-мöдiк, а сэсся уськöтчывлiс местасис, мымда чож, ком ладорö. Но öтпырись чеччöвтöмöн Мурка сэтöн жö вöтлiс сiйö бöр вугыр кодь йыла гыжжезнас, бергöтлiс одзза местаö. Сiдз вöвлi и öтпыр, и мöдöтпыр, а сэсся эшö да эшö.

— Дугды жö, Мурка, игруйтнытö, — горöтчывлiс аслас ольпась вывсянь саймöм мамö.

— Мр-р, мр-р, — негорöн шыасьлiс паныт пöрись кань. Эта вылын быдöс вöлись и лöньсьывлiс.

Дышöтчытöг Мурка кыйсис и луннэзнас.

Луншöр гöгöр, кöр ме бертлi школаись, керкуас пыравтöн часто усьлiс казявны сiйö джодж шöрись сiдз жö кутöм шырöн. Но Мурка перыта дзимлявлiс ассис жертвасö кытшöмкö пельöсö. Сэсся ми пуксьывлiм павжнайтны öтiк пызан сайö. А павжнайтöм бöрсянь быдыс миян коласiсь вились кутчисьлiс аслас удж бердö.

Начальнöй школаын велöтчикö менам некöр эз бырсьывлы öтiк да сiя жö быдлунся сьöктасян удж. Быдöс этö сысянь, что сiя кадö ме эшö эг куж панны да кыйны ас кокö нинкöммез. А нiя, кыдз нарошно бырисö-орисö ме кокын лунiсь лун. Эта увья меным и ковсис керны быд лун öтiк да сiйö жö удж — сьöктасьны. Но эта жö уджыс Муркалö медöддьöн эз и гленитчы. Сьöктасян уджсö пöрись кань некыдз нельки терпитны эз вермы. И колiс дзир меным кутчисьны симöт гырдззим бердö, мед пондыны шöравны шуллез, кыдз сы кышöтöмсянь да пурт увтын симöтыс виксышалöмсянь пöрись кань, весьö пöртöм эта виксöмöн, пондывлiс чепсасьны керку пасьта то öтöрö, то мöдöрö, витöт пельöссö кошшытöн. Но сiдз кыдз миян керкуын пельöссэс вöлiсö дзир нёль, некытöн кöдна коласiсь симöтыс виксышалöмсянь Муркалö спасеннёыс эз вöв, медбöрын сылö эз кольччывлы нем, кыдз уськöтчыны кань öшынö да сайöвтчыны джоджулö. И кытчöдз ме кери симöт шуллез, а сэсся шваткöтi-вартлышалi сьöктаннас кабьялöм нинкöм кузя, син одзын Мурка эз и мыччась.

Сёрöнжык, сьöктасьöмыс бöрсянь, ме пуксьывлi пызан сайö, керны ассим уроккез. Симöтлöн виксышалöмыс да сьöктанöн шваткöтöмыс кывны дугдывлiс. Сэк вöлись, кутöм шырöн, Мурка петавлiс джоджувсис бöр. Сiдзкö и ме сьöктасьöм коста пöрись кань пукалiс джоджулас не весь. Сiя керис ассис колана удж.

Сiдз месяц кыным сьöрна кыйсьöм бöртi миян керкуын эз кольччö не только шыррез, но нельки дукыс нылöн сэсся эз ло.

II

Каннес овлöны быдкодьöсь. Неöткоддезöн öтамöд коласын нiя вермасö лоны не только гöннаныс: öтiккез, шуам, рудöсь, мöдiккез — сьöдöсь, куимöттэз — сераöсь да сiдз одзлань. Неöткоддезöн нiя вермасö лоны и асланыс мывкыдöн да вежöрöн, нельки кытшöмкö аскодьöм привычкаэзöн. Öтiккез, овлö, радейтöны керны ассиныс удж — кыйсьыны, а мöдiккез шыррез бöбалöм вылö — и сэтшöмыс тожö овлö — кыдз баитсьö, и виш оз керö. Сэтшöммес сымда и тöдöны, что дрыкйöны-узьöны лун и ой, кöть нылö юрöдзаныс шырыс покастит. Эмöсь, кöдна лунiсь лун радейтöны вöравны: öтнаныс мунöны матiсьжык вöрö, караулитöны да куталöны сэтчинiсь нельки кайезöс. А эмöсь, кöдна хозяин-хозяйка сьöрын, кыдз пон жö, вöтлiсьöны. Эмöсь нельки сэтшöмöсь, кöдна колана кадö, кыдз пон жö, кутчöны дорйыны кинкö шогья ассиныс хозяинöс нето хозяйкаöс.

Бöрьяас лыддьöтiсьыс, натьтö, оз и верит, сiдз кыдз ас синöн сымдасö адззывтöг ме и ачым тожö бы эг верит. Но кыдз усис адззывны да вежöртны — тшöтш сэтшöмöн вöлöм миян и пöрись кань, Мурка. А пондi ме тöдны эта йылiсь то кытшöм история бöрсянь.

Вылынжык вöлi юöртöм ни, что велöтчи ме сiя годдэзö начальнöй школаын, мöдiк нето куимöт классын. Ветлöтны гортсянь школаöдз вöлi километр ылына, мöдiк деревняö. Миян керкуыс сулалiс матын деревня дорас. Сiйöн школасянь гортö берттöн кинкö менам ёрттэз коласiсь часто пыравлiс миянö шонтiсьны. Эта шонтiсьöм-шоччисьöм коста часто ми керлiм öтлаын и гортся удж: велöтiм уроккез, пилитiм да поткöтiм пес. А мукöд коста сэтöн жö, удж коласас, пондывлiм мыйиськö орсны да вель дыр кежö вунöтлiм джынысви орöттöм чурка нето решайттöм задача йылiсь.

Сiдз петiс и эта лунö.

Погоддяыс öтöрас сулалiс кöдзытся-кöдзыт. Подöн оськавтöн кок увтын, дзик горзiс, норöн дзуртiс-виксышалiс чорыт лым. Бимороз зубыта чеплялiс ныр да пеллез, вугмöтiс чуннез, жутöмöн лякасис вöснитик да некодя тöвся паськöм пыр пидзöссэз бердö, тувдöтiс быдсöн вывтыр.

Мийö, нылочкаэз да зоночкаэз — быдöнным öтлаын даскыным велöтчись — уроккез бöрсянь школасис петiм öтдруг. А мед не сiдз кынмыны, джын туй вылас ни челядь пондiсö орсны: вермасьны да тойласьны, кин кинöс вермас. Но ме кокын нинкöммес вöлiсö бырöмöсь, и бродитны сэтшöммезнас лым пытшкöт да сэтшöм кöдзыт погоддя коста охота, вежöртана, эз вöв. А вермасьтöнняныс ни орис Толиклöн запяток, и бырöм нямöт увья ёртöлöн пяткаыс лоис нач куш. Эта кузя ми сыкöт и колим орсiсь-бöбалiсь ёрттэзнымöс туй вылас, тэрмасьöмöн иньдöтчим горт деревня ладорö.

Ыб кузя оськавтöн некытшöм зника кöдзытыс эз сет. Сiя вашöтiс миянöс, мымда чож.

Деревня сайись воротаэз бердсянь миян керку весьтöдз туйколас ми котöртiм сувтчывтöг. А сэтöн Толик перыта бергöтчис ме ладорö.

— Пыралам тiянö шонтiсьнытö?

— Лок пыралам.

Сэтöн жö ми гира-гара кайим поспуэз кузя, осьтiм замокалöм ыбöс, пырим.

Мурка, кыдз и пыр, пукалiс эта коста пызан увтын — сунасис. Миян пырöм коста сiя дзир недырик кежö осьтыштлiс синнэсö, но сэтöн жö лöсьöтчыштiс бытшöмика одзись лапаэс вылын, мышкыртiс юрсö бöр.

Керкуыс миян кöть и лажмыт, но ыджытся-ыджыт, кыдз сарай, быдкоста вöвлi кöдзыт. Мед чожажык сетны шонтiсьны ёртöлö да вермыны шонавны аслым, ме тэрмасьöмöн осьтi труба, шульыштöм сартассэз сорöн сюйыштi печка горö би. А кытчöдз Толик чöвтчис-пöрччасис да пыркöтiс порог дорын орöм запятока нинкöмись лым, ме ештi пыравны джоджулö да петкöтi сэтчинiсь кынымкö ён картов. Эд öтiк кынмöмся ми сэтчö жö вöлiм эшö и тшыгöсь: колiс мыйöнкö павжнайтыштны.

Кöр печкаыс жаралiс да пондiс шонтны ныр, ми Толиккöт кöвдöмалiм вöснитика ён картов, тэчим кöвдöммесö кальыт плита вылö. Асьным пуксим öтмöдöрсянь матöжык печка бердö, шонтiсьтöнняным пондiм видзчисьны, кöр пöжассясö картовка кöвдöммез, мед нiйö позис сёйны.

Ми павжнайтiм. А Мурка, кöда адззис, мый ми керам да кылiс нырнас пöжалöм картовлiсь дук, одззамоз кольччис пызан увтын. Эта коста сiя неöтпырись ни ордчылiс одзись коккес вылын пызан тас вылас, но быдкоста сэтöн жö керлiс бöр. Сибöтчыны печка дынас йöз морт дырни пöрись кань эз лысьт.

Бöртiжык ме нуи Муркалö пызан увтас öтiк сайкöтöм картовка кöвдöм, кöдö сiя сэтöн жö нетэрмасьöмöн пондiс сёйны. Сiдз ми куимнанным и павжнайтiм. А пым картовка кöвдöммезсянь да жара лонтiсян печка дынын ештiм и шонавны.

Одзлань мийö ёртöкöт кутчисим сы нинкöм бöрись орöм запяток бердö. Мунны сытöг деревнялöн мöд конецöдз сэтшöм кöдзыт погоддя коста Толик эз лысьт. Лэчыта кеслöм пуртöн ми вундыштiм Толик нямöт бердiсь тор да кынымиськö кусiньтöмöн керим сыись виль запяток. А кöр натодиль лöсьöтöм пышнасян нинöн сiя вöлi пышналöм-вурöм нинкöм бердö и ёртö кöмасис бöр, сэтöн жö порогувтас ми пондiм сыкöт вермасьны.

Пышнасьöм коста Мурка одззамоз кольччис пукавны пызан увтын. Эта миян уджыс сылö, тыдалö, öддьöнсö эз мешайт. Но кыдз только ми кутчим вермасьны, пöрись кань сунавнытö дугдiс. Ас коласын миян ружтöм-пессььöмыс сылö, тыдалö, эз гленитчы. Пушитöм гöна Мурка жагвыв петiс пызан увтiсь, дзик повзьöмувья, горöн корöмöн, кынымиськö нявöстiс. Миянлö думайтсис, что сiя корсьö петны öтöрö. Ме дышöтчытöг осьтi ыбöс, кытсалi: «Кис-кис-кис, Мурка. Лок пет». Но пöрись кань, тыдалö, абу и думайтöм сибöтчыны ыбöс дынö. Небасöк голосöн одззамоз нявзытöн сiя жагвыв сайöвтчис комö. Сэтчинсянь ни одзлань кылiс öтпыр-мöдöтпыр вывлань кокнита чеччöвтöм. Мурка кайис залавка вылö, а сэтчинсянь горсайöт горвылöдз.

Öнi миянлö Толиккöт некин да нем эз ни мешайт. Ми сэтöн жö и вунöтчим пöрись кань йылiсь, пондiм вермасьны одзлань.

Вöлiм ми ёртöкöт не только öтiк годсяöсь, но нельки öтвынаöсь, сiдз кыдз некöдыс миян коласiсь öтамöдлö öддьöнсö эз сетчы. Öтамöд бердö киэзöн сир моз лякасьöмöн да коккезöн быд вынiсь тарашитчöмöн, ми вель дырöн педзим-бергалiм öтiк местаын. Эта коста быдыс миян коласiсь вынсьöтчис ас кежас кыдзкö то ли кышавны кокöн, то ли падтыны мöдсö, мед вермыны уськöтны да сэтчö жö эшö сюрöтны и увтö. И усьлiс этö миян коласiсь кыдз öтыслö, сiдз и мöдыслö. И обижайтчыны öтамöд вылö, кыдз часто овлö вермасьтöн челядь коста, миянлö вöлi нем понда.

Эта вермасьöмын ми торким ёртöкöт вель уна вын да кад. А кöр кутчисим медбöрьяись, Толик менö вермис. Сiя личкис менö лопаткаэзöн джодж бердö, а мынöтчыны сы увтiсь бöр вын менам эз ни судз, ковсис миритчыны. Вермöмыс кольччис сы сайын. Öнi ме вылын вевдöрсянь пукавтöн, ёртö пондiс менö гильöтны. Боккезöт гильöтöмсянь сералöмыс нач бырöтiс менчим вын да садь. Пессьыны одзлань лоис нач немöн. Гильöтöмсяняс ме дзир сымда и кери, что медбöрья вынторöн нюжласи-вакси. И сэк лоис сiя, мый некöдыс миян коласiсь эз видзчись. Горвыв ладорсянь ме син одзын тыдыштiс кинлöнкö перыта вуджöртчöм. Сы коста жö Толик, серавтöнняс, дзик заваритöм, мымда вын горöтiс:

— Уик-уик-уик, — да öткоста чеччöвтiс коккес вылö. Эта сыкöт лоöмыс вöлi сэтшöм видзчисьтöм, что медперво ме некыдз да нем эг и вежöрт. Но ёртöлöн изöвтöм-бергалöмыс да зубытсянь горöн ойкайтöмыс повзьöтiсö менö сы öддьöн, что ме эг и казяв кöдкоста да кыдз сувтi коккез вылö. Эстöн вöлись и лоис вежöртана быдöс лоöмыс: йöрнöс пыр бытшöма мöртчöтöм гыжжезöн Толик спина вылын, кыдз тигр, пукалiс Мурка.

Лоöмсö и ёртö öнöдз тожö вежöртiс ни и дзир мездiсьны каньыс гыжжез увья некыдз эз вермы. Повзьöмсянь ыждöм сина, сiя мый вермис, пиньласис öтмöдöрö вывтырнас, зэгöтiс пельпоннэзнас, горзöмöнсорöн корис:

— У-юй-юй, кытшöм зубыт! У-юй-юй, мездöт чожжык! Но сибöтчыны ас дынас Мурка нельки меным эз сет. Кöр ме, нюжöтöм киэзöн, оськöвтi ёртлань, мед мынöтны сы спина бердiсь каньсö, сэк вöлись сiя ачыс чеччöвтiс джоджö. Но пышшыны нето дзебсисьны кытчöкö эта бöрсянь Мурка эз думайт. Лöгувья сё эшö пушитöм бöжнас öтмöдöрö жагвыв öвтышалöмöн да бöрас дзар кертöг, пöрись кань нетэрмасьöмöн иньдöтчис пызан увтö.

Паймöмöсь да öшöмöсь эта видзчисьтöм лоöмсянь, чöлöмöн да полöмöнсорöн ми ёртöкöт нёджжасьöв-керим то öтамöд вылö, то пöрись кань ладорö.

— Вот эта кань дак ка-ань! А мый понда сiя ме вылö сiдз?.. Кыдз ылöса пон чепöссис.

— Сы понда, натьтö, что вермин менö да чеччынытö бöр эн сет, гильöтны пондiн. Думайтiс — джагöтны мöдан.

— Пондыв сэтшöм каньыс дырни... Сiя тэнö асьтö чожажык джагöтас. Вот тиграыт кытöн!

Вежöртана, что эта бöрсянь некытшöм вермасьöм йылiсь и дума ни лоны эз вермы. Толик тэрмасьöмöн пондiс пасьтасьны. Чожа мый ёртö мунiс гортас, а ме öтнам пукси уроккез сайö.

III

А эта вöлi гожумнас.

Рытъявыв кадö, мамöс удж вывсянь видзчисьтöн, ме пукалi öтöрись посöдзын, вевдöрись поспу вылын, старайтчöмöн серöтi аслым виль «вöв» — бадьовöй бедь.

Эта коста деревня сайись ыб кузя, öтiк кок вылас быд оськöв коста питкылясьтöн, деревня ладорас жагвыв сибöтчис хромöй кузнец — Питкыль Паш. Колхознöй кузницаыс, кыдз и начальнöй школаыс да правленнёыс, вöлiсö километр ылына миян Гришкина деревня дынсянь Новожилова деревняын. Сэтчинсянь лунтырся удж бöрсянь и питкыльтiс-бертiс гортö хромöй кузнец. А сыкöт ордчöн, кыдз быдлаö да пыр, люштыртiс-котöртiс сылöн чим сьöд пон Алля.

Сэтчин жö, воротаэз сайись ыб дорын вöлöм, тыдалö, сiя кадö и миян пöрись кань Мурка. Сэксянь, кöр керкусис шыррес вöлiсö быдöс куталöмöсь, сiя часто кыйсис и öтöрын. Тöвнас, пыдын лым коста, пöрись кань петавлiс сарайö да керкупöлскö, чассэзöн караулитчис турун-кöрым коласын. Гожумнас, кöр сывлiс öтöрись лым да пондывлiс «судзны кок», Мурка «вöралiс» не только карчйöр межаэз вылын, но петавлiс мукöд коста и колхознöй ыб дорöдз. Сiя жö вöлi и эта рытö.

Повзьöтöм поныс сибöтчöмöн, пöрись кань, вежöртана, иньдöтчис гортлань. Медперво ме казялi дзир сiйö, кыдз хозяиныс одзын воротаэсö вуджöм бöрсянь Алля турöпöн уськöтчис кинкö сьöрö. И дзир сёрöнжык вöлись усис казявны, что вöтчö сiя миян пöрись кань сьöрö.

Кин ны коласiсь котрасьö перытжыка, ме и öнi эшö бытшöма ог тöд. Но сэк, кöр пöрись кань ньöвьёсьöн лэбзис горт ладорö, мед не сюрны поныс пиннез коласö, а мöдыс быд вынiсь, кыдз пружина, нюжласис сы сьöрö, мед вöтны да кутны, меным мыччассис, что пышшыны поныс шогья каньыс оз ни вермы. Сэтчö жö öлöмыс местö Питкыль Паш воротаэс дынсянь нарошно ызйöтiс:

— Ату сiйö, Алля, ату, ус-с!

Но кыдз бы хромöй кузнец эз ошшась эта вотöдз аслас понöн, бытьтö бы сiя кöть кытшöм чож каньöс и вöтö, и кутö, и жегдыштö нем туйö, керны сымдасö миян Муркакöт эз ешты. Ась сiя и вöлi пöрись кань, но пышшавны поннэс шогья, тыдалö, эшö вермис.

Эз чулав, натьтö, и вит-квать секунда сьöрна кад, кыдз кань да пон вöлiсö миян керку весьтын ни. Не öтiк метр ылынасянь, нюжöтчöмöн, Мурка дзик лякасис, судзöтчис гыжжезнас керку угöв бердöдз вель вылына му бердсянь да сэтöн жö гыж-важ чылыштiс карта юр вылöдз. Аллялö, кöда тожö вöлi ордчыштiс каньыс сьöрö, нельки бöжыс эз дöнзьы.

Бедьнас вулйыштöмöн, понсö ме сэтöн жö вашöтi бöр. Мурка и ачыс адззылiс, кыдз Алля немтöг люштыртiс посöдз дынсис. Но лэдзчыны карта вылiсь пöрись кань эшö вель дыр эз лысьт. Сё эшö горбыльтчöм да поснита тогзян вывтыра, сувтöтöм гöна, сiя дивуйтчöмöн видзöтышалiс то поныс сьöрö, то ме ладорö, дзик юалiс: «Мый понда сiя ме сьöрö сiдз?.. Мый ме сылö умöльсö кери?» Но сiя кадö этна вопроссэз вылö и ме ответсö эг адззы. Меным сымда и кольччис, кыдз лöньсьöтны сiйö, сылiсь нимсö рамыника шувлöмöн: «Мурка, Мурочка миян, чож канёк».

Сёрöнжык, кöр ме вились кутчиси аслам удж бердö, пöрись кань карта юр вывсис сё жö лэдзчис. Повнытö сылö эстöн öнi вöлi некинiсь ни, сiйöн пырны керкуöдз Мурка эз тэрмась. Неважынся повзьöмувья сё эшö пушитöм бöжа, сiя мыйкö дырна нюкайтчыштiс вылiсянь, а сэсся дышöтчытöг лэдзчис поспуэз кузя му вылöдз. Эстöн Мурка сибöтчис керку угöв бердöдз, кöда бердöдз неважын сибöтчылiс сы сьöрö пон, пондiс нюкайтчыны. Сiдз нюкайтчытöн, пöрись кань мунiс-локтiс öтмöдöрö и керку весьтöт, тшöтш сiя местаöт, кыт вöтчис неважын сы сьöрö пон.

Ме казялi ни, что Мурка нюкайтö понлiсь следдэсö. Но мый вылö сiя этö керö, сiдз сэк и эг вежöрт.

Вежöртана эта лоис дзир сёрöнжык, джын год бöртi.

IV

Сiя годдэзö миян деревняын магазиныс эз на вöв. Сiйöн куритiсь отир табаксö куритлiсö ас садитöмö. А эз кö тырмывлы сiя асланыс, кошшисисö мöдiккез ордöт.

Кынымкö год сьöрна асланым карчйöрö табаксö и ми тожö садитлiм. Етша я кин куритiсь мужиккез коласiсь корас то чер ороп садитöм, то гез кыйöм понда. Эта жö табакöн часто усьлiс меным вештiсьны и нинкöммесö панöм понда. А сэтöн Питкыль Паш кеслiс миянлö поперечка пила. И сiдз кыдз бырсьöм табак увья куритнытö эта кадö вöлöм сылöн нач нем, гортас кеслöм пиласö сiя вайис бöр ачыс, мед сэтöн жö и корны керöм удж понда мед.

Сартаса би коста ни, рытнас, ме кылi, кыдз Питкыль Паш дзурликасис-кайис миян поспуэз кузя, сувтöтiс пытшкись посöдз пельöсö кеслöм пила. А сэсся оссис керку ыбöс. И кöр сiя öтiк дженытик коксö вуджöтiс порог омöн керку пытшкас, осьта ыбöс коласöт öтлаын кöдзыт руыскöт, ассис хозяинсö одзалöмöн, пелитчис-пырис и сылöн пон Алля да сэтöн жö уськöтчис шульга лабич увтö. Мурка, кöда эта коста, кыдз и пыр, пукалiс пызан увтын, спина вылас сувтöтöм гöнöн ни, уськöтчис комö, а сэтчинсянь сайöвтчис горвылö.

Поныс весьтö жö, шульга лабич вылас, пуксис сёрöнжык и Питкыль Паш, юöртiс вайöм пила йылiсь да сэтöн жö корис куритны. Мамö вайис да кисьтiс сылö сальзьöм кисетас содз мымда масьтöм табак. А кöр Питкыль Паш каттис сыись додь ож кыза чигарка, öзтiс да кынымиськö ньылыштiс крепыт табак тшынсö, бурмыштöм сьöлöмöн ни пондiс ошшасьны, кытшöм бытшöма кеслiс миянлiсь пила.

Эта басни коласын сылöн поныс жагвыв петiс лабич увтiсь, гусясьöмöн пондiс кыссьыны ком ладорö. Вöлi сiя, тыдалö, тшыг, а комсяняс, натьтö, кылiс кытшöмкö помой дук.

Басни коласын мамöлöн öтпырись шытьнитöмыс эз ни отсав. Алля дзир мыччалiс, бытьтö мöдö бергöтчыны бöр, но былись эз ни бергöтчы. Öтмöдöрö чуклясьöмöн сiя иньдöтчис одзлань да, дзик казявтöм, сайöвтчис дöраовöй занавеска сайö. Эстöн сылö и усис вештiсьны... И не только сэкся асныритöм понда, но и одззаыс понда тожö.

Кыдз калитчöм кöрт бердö ваöн койыштöм, кылiс каньлöн лöгвевья фырснитöм, и Алля сы коста жö дзик заваритöм, горöн кивöстöмöн, тарöвтчис комсис занавеска увтöт бöр да уськöтчис хозяиныс дынö, лабич увтас. Но сайöвтчыны пöрись кань шогья öнi эстöн эз ни позь. Пушитöм-пашмöтöм гöна, мегырöнмоз кöстöм вывтыра, биöнмоз вирдалан сина, Мурка сьöрсяняс жö чепöссис лабич увтö да сэтöн вöлись и кутчис пышнавны кортöм гöсьсö шыла кодь йыла пиннезнас, сыналiс понлiсь ныр гöгöрсö вугыр кодь лэчыт гыжжезнас. И сiя кадö, кöр лабич увтас Аллялö колананёж да кодьöн и бергöтчынытö эз позь, Мурка чушкалiс-сыналiс сiйö, кыдз сылö колiс. И эрзiс-дорйисис кö пон медперво, то бöртiжык сiя пондiс дзир визжитны, дзик былись джагöтiсö ни.

— Мурка, дугды жö! Мурка, брысь! — горöн горöтлiс мамö да горöн жö зукöтiс коккезнас джодж бердö. Но хозяйкалiсь горöтлöмсö да зукöтöмсö пöрись кань бытьтö эз и кыв. Мыччассис нач мöднёж — эта öлöтöмсянь сылö шедö дзир унажык öд.

Чулалiс сiйöн, что медбöрын Алля, горöн визжиттöн, уськöтчис ыбöсö. А Мурка кольлалiс сiйö порог дорöдз да вöлись сайöвтчис комö.

Понсö керкусис репöтöм бöрсянь чожа мый и сылöн хозяиныс чеччис аслас местаись да иньдöтчис жагвыв петанiн ладорö. Порог дынсяняс ни сiя жалейтöмöн горöтчис:

— Тшыкöтiс, тыдалö, сотана каньныт менчим понсö, стрöйдiс.

Томувья ме эг лысьт горöтчыны пöрисьжык мортлö сiйö, мый бергалiс эта коста кыв вылын: мыйлö ускайтан йöз каннес вылö. Эта местаö мамö, невна мöднёжжык ме думася, паныт Питкыль Пашыслö висьталiс:

— А мый сiя тэнат, кыдз йöвдоз, вексö сьöрат вöтлiсьö да эшö йöз керкуöдз пырö?

Эз радейтлы мамö видзны керкуын понсö. Эта увья нельки ассиным порог дорöдз эз лэдзлы.

Горöтчыны эта вылö Питкыль Пашлö вöлi нем. Сiдз, чöлöмöн, сiя и сайöвтчис ыбöс саяс.

Эта бöрсянь хромöй кузнец ассис кань куталiсь понсö сьöрас эз ни новйöт. Кузницаö я асывнас, гортö я бöр рытнас öнi сiя дзурликасис-ветлiс öтнас, ускайтны йöз каннез вылö вöлi некинöс. А недыр мыйись кывсис, что слепöйсялöм Аллясö Питкыль Паш джагöтöм да кульöм понкеписсез вылö.

V

А сiя тулысö миян Муркалöн шогмисö пияннэз.

Нёльыс коласiсь мамö колис öтiкö, сэтшöм жö сьöла гöнаö, кытшöм вöлi и ачыс пöрись кань.

Садитчан кад вотöдз каньпиян быдмис вель ыджыта ни. Сiя вермис кайны мамыс сьöрö горвылöдз да лэдзчыны сэтчинiсь бöр, дышöтчытöг ветлiс джоджулö. Вöлi каньпиян не только чож да кокнит кокйыла, но эшö и гажа мывкыда. Быдса чассэзöн, мыдзтöг, сiя вермис орсны сюрöм кыськö лапаэс коласö рудзöговöй шепöн, нинкöм бердiсь öшалан воньöн нето пöкрöм бердiсь сыррезöн. Сiя жö ур моз ветлiс öшалан занавеска кузя, чывлiс стена пöлöн потолок увтын лöсьöтöм сёр вылöдз, кöда вылын öшавлiс быдкодь паськöм. Висьтавны öтiк кылöн — каньпиян вöлi керкуас аскодьöм гаж туйö, видзöтны кöда сьöрын эз кут некытшöм мыдз, позис пöттöдз серавны сы орсöм вылын.

Радейтiм каньпиянсö ми, радейтiс сiйö и мамыс. Етша, что Мурка сiйö, ыджытöс ни, сё эшö нимöтiс. Аслас латка дынö, кытчö мамö кисьтлiс нылö лун кежö йöв, пöрись кань медодз лэдзлiс ассис пиянсö. И кытчöдз каньпиян пöттöдз эз сёй, мöдыс латкаыс бердöдз нельки матö эз сибöтчыв: бокын пукавтöн видзчисис. Этася пöрись кань быд лун вайöтлiс аслас пиянлö шырöс нето кайöс. А сэсся быдса чассэзöн вермис пукавны кытöнкö бокынмоз да видзöтны, кыдз мöдыс орсö.

Керкуын овтöн Мурка ассис пиянсö и оськöв ылына сьöрсис эз кольлы. Вöвлi, что бöбалöм могись каньпиян пышшывлiс недырик кежö мамыс дынiсь да кытчöкö дзебсисьлiс. И сэк пöрись кань, негорöн нявзытöн, пондывлiс кошшыны пиянсö ачыс.

Лунöн ли ойöн узьлiсö нiя тожö пыр öтлаын. А буржык лоас висьтавны, что узьлiс мамыс лапаэз коласын дзир каньпиян. Ачыс Мурка, сiйö онмöтöм могись, негорöн мурзис-сьылiс. А кöр пияныс онмöссьывлiс пыд онöн, пöрись кань сы весьтын дзир сунасис. И колiс дзир кывны эта коста кöдöрсянькö да кытшöмкö сятнитöм, дзуркнитöм нето кышнитöм, кыдз сiя сэтöн жö осьтлiс синнэсö, видзöтчис.

Эта каньпиян кузя и шогмис öтпыр эшö öтiк история, кöдаын Мурка мыччалiс асьсö кыдз настоящöй кань, сiдз и кага мамöн. Кадыс сэксянь чулалiс вель уна ни, но быдöс лоöмыс и öнöдз эшö сулалö ме син одзын, дзик эта вöлi тöн.

Мича, шоныт да кöс ни тулысся погоддяö ми лöсьöтчим садитчыны. Асывсянь, кытчöдз эз лок гöрись, ме, назём вилаэзöн киын, коялi карчйöрын петкöтöм ни сы вотöдз назём. Мамö, керкуас асывся ештöтчöм бöрын, пондiс петкöтлыны межа дорö кöдзысовöй картов.

Кытшöмкö кадö удж коласас ме пыралi керкуö юны. Эта коста и казялi, что пöрись каньыс гортын абу. Каньпиян öтнас тарлалiс порог дорын уськöтöм картов — орсiс. Бöр петтöн ме кутi да петкöтi сiйö сьöрам тöвзьöтöм могись карчйöрö: ась, мыся, сöстöм ру вылас орсыштас да чочком свет вылас видзöтыштас.

Карчйöрас ме нуöтi да пуксьöтi каньпиянсö ылiсьжык межа сайись йöр вылö да сэтчö и коли. Ачым вились кутчиси одзланься удж бердö.

Чожа мый локтiс гöрись. А бöрсяняс сiйö кольлалiсö сылöн жö кык вöралiсь пон.

Карчйöрас вöвсö пыртöм могись ковсис осьтны карта воротаэз. А öтлаын вöлыскöт, асланыс хозяин сьöрö, пырисö и поннэз. Сэтöн ни ны дынö жö öтлаасис и миян томыник эшö кычан, Лыско, кöдö Мурка и матö порог дорöдз эз лэдзлы.

Гöрись öзтiс куритны, сувтöтiс межа дорсянь плуг, борозда весьтöт öтiк кытшöн осьтiс гöгöр, пондiм садитчыны.

Эта коста куим öтлаö чукöртчöм пон орсiсö сэтöн жö, öтамöд коласын: то пышшалiсö-вöтлiсисö öтамöд сьöрын, то быглясисö-вермасисö шоналöм ни да кöс му вылын.

Каньпиян йылiсь, кöдö ме неважын петкöтi керкуись да пуксьöтi йöр вылö, сэк кежö удж коласас кыдзкö вунöтчи ни. Но сы йылiсь абу вунöтчöм мамыс. Кытшöмкö кадö сiя не только казялöм керкуись öшöм пиянсö, а и адззöм сiйö йöр вывсис, лэдзöм му вылöдз да, бороздаас сайöвтöмöн, пондöм нуöтны бöр гортö. И лэдзчыны кö бы нылö сiдз борозда пыдöсöттяс карта бердöдз, поннэс, öтамöд коласын туплясьтöн-орстöн, нiйö, натьтö, эз бы и казялö. Но аслас пиян понда полöмшогья Мурка, тыдалö, думайтöм нач мöднёж. Нуöтны ассис пиянсö матi орсiсь поннэз дынöт сiя эз лысьт. Эта увья и шогмис сiя, мый некин эз видзчись.

Кыдз только пöрись кань сибöтчис пиянкöт поннэз весьтöдз, сiя сэтöн жö колис ассис пиянсö бороздаö öтнассö, а ачыс уськöтчис поннэз вылö.

Кык-куимись нюжöтчöмöн чеччöвтöм бöрсянь пиньöн и гыжöн Мурка, дзик зi, лякасис пöрисьжык песик ныр бердö. Видзчисьтöм уськöтчöмсянь, а эшö öддьöнжык сэтшöм жö видзчисьтöм зубытсянь, Шарик унньöвтöмöн ордчис-чепöссис бöрись коккес вылö. Но и эстöн Мурка, кыдз тигр, нюжöтчöмöн уськöтчис пон вылö и не аслас вынöн да тушаöн, а вайöтöм зубытнас пöрöтiс сiйö кок йывсис.

Эта коста томжыккес — миян Лыско да Шариклöн ёрт Тарзан, тыдалö, вежöртiсö ни, мыйын делоыс, мымда чож уськöтчисö пышшыны, кöдöрö шедас. И сiя кадö, кöр Лыско инмис осьта воротаэз ладорö, Тарзан чепöссис аслас хозяин дынö, кöдöрын вöлi и каньпиян. И кöр пурöм-чушкалöм Шарик зубытсяняс горöн каньзытöн, öдззöтчис карчйöрись осьта воротаэз ладорö, пöрись кань чепöссис Тарзан вылö.

И кыдз бы кузь кока да неуклюжöйкодь кычан эз пондыв сайласьны хозяиныс коккез гöгöр, матын каньпиян дынын, кöда норöн нявзытöн пукалiс метр кык пасьта гöрöм сайись бороздаын, нем эз ни отсав. Эз отсав и садитчись инькаэзлöн горöтлöм-чирзöм да гöрисьлöн горöн маттясьöм. И сiя кадö, кöр Тарзан, нырсö сайöвтöмöн да горöн каньзытöн-визжиттöн, бергалiс хозяиныс коккез гöгöр, пöрись кань сылö и ловзисьны эз сет, сё кулис-сыналiс гыжжезнас сылiсь чук гöгöрсö.

— Джагöтас понсö!

— Косялас! Мездö! — горöтлiсö öтмöдöрсянь инькаэз, но сибöтчыны матö ны дынö эта коста некин эз лысьт.

Бöртiжык Тарзан нельки изöвтны-бергавны дорйисьöм могись дугдiс. Сiя сюйыштiс нырсö хозяиныс сапога коккез коласö да мымда горш уннялiс. А гöрись öдззис öвтны ас гöгöр плетьöн. И кöр сiя öтпырись сибалiс Мурка спина кузя, сэк вöлись пöрись кань чеччöвтiс бокö, сэтöн жö вуджис гöрöм сайись бороздаö, аслас пиян дынö. Повнытö одзлань кежö вöлi некинiсь ни, и öнi нiя сiя жö бороздаöт иньдöтчисö сьöрсьöн-бöрсьöн керку ладорö.

Сэтшöм вот вöлi миян пöрись кань Мурка.

УРКАНЬ

Санаторийлöн дас сувда главнöй корпуслö паныт, öтмöдöрсянь пыранiн дынас, вöлiсö лöсьöтöмöсь кык ыджыт фонтан. Ны гöгöр бетонируйтöм чашаэзын быдкоста сулалiс метр сувдöн ва, кöдаын кынымкö неыджыт косякöн уялiсö истöг гырися аргышшез.

Сэтöн жö, öтлаын этна аргышшезкöт, олiсö и кытшöмкö гырисьжык чериэз, но лун сьöрна отирыс син одзö нiя öддьöнсö эз мыччасьö: унажык кад вöрöтчытöг сулалiсö ва пытшкöт нюжлалöм водопроводнöй трубаэз увтын.

Этна фонтаннэз увтö рыт и асыв вовлiсö вердсьыны ты вылын олiсь уткаэз. Кöр дас етш, а кöр и унажык нiя шумöн лэдзчисьлiсö отир син одзын ваö. А вердчисö уткаэз сiйöн, мый чапкисö нылö корпусын шоччисись отир быд этаж вывсянь.

Лечебнöй корпуссэз гöгöр, а вöлiсö нiя быдöсыс вит-квать мымда, — быд ладорсянь садитöм бытшöм парк: быдмисö гырись да басöк пуэз. Ордчöн пожумкöт, сыспукöт да нинпукöт позис пантавны серебристöй тополь, дуб, клён, ясень, туя, каштан да мöдiккез. А эта паркись пуэз вылын олiсö унася-уна уррез. Не öтiк год сьöрна ни отирыс коласын овтöн нiя сэтчöдз ештöмась велавны морт дынö, что вачкисисö öддьöнжыксö гортся пода вылö. Уррез немымда эз полö ны дынö матö сибöтчöмись. Тшыгувья нiя часто асьныс вовлiсö морт дынö, а нюжöтöм сёянла вуджавлiсö пу вывсянь ки вылöдз. Быдöнныс коласын, эстöн жö санаторияс, столовöйö пыранiн лиснич увтын, олiс аслас семьяöн и кот. Юрсянь и бöж йылöдз сiя вöлi чим сьöд и дзир горш увтас, кыдз знаменитöй театральнöй артист, новйис бель видзан галстук-бабочка. Котихаыс сылöн вöлi сьöд-чочком сера, рам да дыш, кытшöмöсь нiя и овлöны готовöй сёян вылын. Вöлiсö нылöн и челядь: висьтавны мöднёж — пияннэз, кöдна, гыриськодьöсь ни да синмаöсь, лун-лун визлалiсö-котрасисö öтамöд коласын сэтöн жö лиснич увтас.

Быдöс эта ловья тварьыс сэтчöдз ни вöлi велöтöм-тшыкöтöм шоччисись отирöн, что шедтiсьны-овны ачыс ас кежас эз ни чайтчы, мортыс вердöмöн дзир и олiс. Босьтны, шуам, кöть сiйö жö котихасö. Думайтны кö сы еркöтöм-вердöм туша сьöртi, кöда мукöд понся вöлi кык-куимись ыджытжык да сьöкытжык да сы свиттялан гöн сьöртi, дак сорасьтöг позис вежöртны, что аслас векын ловья шырлiсь сiя и дуксö эз кывлы. Аслас арава кузя мампöв кань гортсис (лыддьöт — пос увтсис) кодьöн эз и петавлы. Сiя сымда и тöдiс — нимöтчис. А быдöс этася кольччöм кадсö торкис сы вылö, что нежитчис-быглясис шондi вылын да кыт шедiс нюлiс-чередитiс ассис и сытöг ни сöстöм свиттялан вывтырсö. И дзир сэк, кöр пондывлiс симавны кынöмыс да охота вöлi мыйкö сёйны, котиха сибöтчывлiс матöжык лиснич бердас, кöда кузя рыт-асыв да луннас ветлiсö столовöйö отир. Эстöн сiя пуксьывлiс зэв матö кок увтö, чатыртлiс вывлань юрсö, негорöн да дженытика шыасьлiс: «Мау». И кинкö шоччисиссез коласiсь сэтöн жö пуктывлiс сылö одзас то котлетка, то колбаска тор, то курöг кок.

Эта жö вöлi и аскöттяс котыскöт, кöда вердсис сiя жö «котёлiсь», кысь и котихаыс. Но мукöд коста кот, сэтöн жö пос увтас ордчöн котихаыскöт нюжласьтöн-быглясьтöн, тыдалö, мыдзлiс аслас «öвадсянь», кöда турунъюрöн ветлiс сы гöгöр, а то и сы кузя. Сэтчö жö висьтассяс, что нёльыс коласiсь кыкыс, кöть нiя и вöлiсö öтiк позувтiсь, вöлiсö не сьöдöсь ни, кыдз бы колiс лоны, нето кöть бы сераöсь, а рыжöй гöнаöсь и роднöй папаша-кот вылö матын эз вачкисьö.

Ассис чива-улясö бöбалöмсис öлöтöм могись куйлытöнняс кот кынымиськö горöн шмоткывлiс-вачкывлiс бöжнас му кузя. Но эта колананёж эз ни отсав. Мукöд коста каньпияннэз орстöнняныс чепöссьывлiсö вывлань лиснич кузя, а сэтчинсянь мынöм бöрсянь кöдакö ны коласiсь, — мыйыс оз овлы учöт коста, — усьлiс веськыта папаша-кот юр вылö, а неладно лоöмсö казялöм бöрсянь сэтöн жö дзебсисьлiс кытшöмкö щельö. Лöгувья папаша-кот перыта сувтлiс коккес вылö да вель дыр кежö петавлiс гортiсь. Вежöртiс, тыдалö, что эстöн сылö шоччисьны котлö моз аслас öвадыс сё ни оз сет. Сэк, натьтö, дзир сылö и усьлiс тöдвылас аслас важся-важ, кыдз и оланыс жö, профессия — кыйсьыны, мый векись векö керлiс сылöн кань род.

Медодз папаша-кот иньдöтчывлiс фонтан увтö да кутчисьлiс чериавны. И ась сылöн прокыс эта черикыйöмын и эз вöв уна, кадсö, кöдö сiя торкис эта забава вылö, одзöсавны эз ков. Мый уж мый, а сiя сылöн тырмис.

Сибöтчас, видзöтан кö, сiдз фонтан увтö, видзöтчас, орсö оз чериыс. А кöр казялас кытiсь аргыш косяк, бöрьяс коланажык места, кыт шоччисись отирыс етшажык ветлö, пуксяс зэв-зэв ва бердас, мöртас сыö синнэсö, дзиргö-видзöтö öтiклаö и кваркыш оз кер — видзчисьö. Син сылöн лэчыт, адззö бытшöма. Видзöтö кот, кыдз сы одзын аргыш косякыс орсö-вердчö да ылынöв кытчöдз, лапаöн он судзöт. И ась эта коста вотялö дуль ловья чери увья, керны нем, колö видзчисьны колана кад, кöр визыв аргыш косяк сибöтчас матöжык. Сiдз чулалö и минута, и дас, а то и джын час. Но вот кытшöмкö кадö аргыш косяк сибöтчö зэв матö. Котлöн вугыр-гыжжес сэк кежö лöсьöтöмöсь ни. Вирдыштöм перыта сiя чольснитö лапасö ваö. Но да кышасяс я истöг ыждышта аргыш, кöдалö и гыж коласöт нильдыны нем оз видз? Пыркнитас кот кынымиськö вадöм лапасö, голясö вывлань нюжöтöмöн видзöтöв-керас, кöдöрö чапкисис аргыш косяк, вежас местасö матöжык, пуксяс, пондö видзчисьны одзлань. Час нето джын бöртi и эстöн лоö сiя жö. А сэсся сiдз эшö да эшö. Сэк кинкö шоччисиссез коласiсь, кöда матын пукавтöн нёджжасьö сы удж сьöрын, горöтчас:

— Мый, бöра некин эз шед?

— Ня-ат, — дзар керыштас баитiсьыс вылö да шыасяс нора голосöн кот. А кинкö мöдiк одзза басниыс дынö сылö жö содтас:

— Мунiн бы, лучше, котихаыт дынö, дак буржык вöлi. Сiя сэтчин, лапушкаыт тэнат, готовöй котлетаэз да колбаса тыткö, а тэнö чериавны тшöктö. Он бöра и казяв, эстöн пукавтöн, кöдкоста сы дынö, лиснич увтас, гöрд кобоныс кежалас.

Но котыт — не морт. И мый баитöны сылö отир аслас котиха да сы кокнит поведеннё йылiсь, сiя дзир кывзö, а вежöртны оз чайтчы. Сiйöн баитiсьыс вылö паныт видзöттöн, кот дзир куньышалö синнэзнас. А кöр басниыс лöньсьö, сiя вились лöсьöтчö одзза местаас. Эта коста вылiсянь пондö кывны борддэзлöн тöдса кышöтöм. Кот перыта лэбтыштö юрсö, öзйыштöм синнэзöн видзöтö, кыдз сэтчö жö ваас, кык-куим метр ылына сы дынсянь, лэдзчисьöны уткаэз. Кот сэтöн жö вунöтö истöг гырися аргышшез йылiсь. Öнi сылöн дуль пондö вотявны зелёнöй голяа тшöг селезень понда, кöда нач неылын сы дынсянь куталö да горша ньылалö вылiсянь чапкалöм нянь. Но сiя ваын. А вадiсьны сы увья котлöн некытшöм охота абу. Сiйöн сiя и караулитчö берегсянь да видзчисьö, кöр мöдыс, кöть недырик кежö, петыштас кытöнкö берег дорас, мед кутны сiйö öтпырись чеччöвтöм коста. Но мымда бы кот эз кытшлав фонтан гöгöр селезень сьöрын, сибöтчыны сы дынö колана ылына сiдз и эз вермы. Эд уткаыс тожö адззö и мый мöдö керны кот — вежöртö.

Быдöс чулалö сiйöн, что пöттöдз сёйöм бöрсянь уткаэз лэбтiсьöны борд вылö. А кот, дульсö ньылавтöн да чатыртчöмöн, кольлалö нiйö синнэзнас. Но бертны гортö, лиснич увтö, кытöн сылö аслас чадоэзсянь абу некытшöм олан, кот нельки эта бöрсянь оз тэрмась. Медколана вöралöмыс сылöн эшö одзын. Кольччис эшö пондывны кутны урöс, кöдкоста не вадiсьны, не косьтiсьны оз ковсьы. Öнi сiя иньдöтчö паркö да пуксьö лапья пожум бердiсь скамья увтö, кытöн шоччисьтöн пукалöны кынымкö морт.

Скамья увтас не сэтшöм жар, кыдз фонтан гöгöр тэчöм асфальт вылын. Шондi югöррес этчö оз сидзö, кöс и ыркыт. Сэтчö жö и гöгöр кытчöдз лöнь, тэрмасьны некытчö. Позьö и шоччисьыштны. Кот бытшöмжыка лöсьöтчö аслас местаын, лöньсьö. Чожа мый сiя кылö, что пондö петны он. Синнэс сылöн жагвыв куньсьöны, и кот пондö сунасьны. Но нельки медчöскыт он коста сiя кылö бытшöма.

Кытшöмкö кадö кысянькö вылiсянь, тшöтш скамья весьтас, кылö тöдса «цок-цок». Узьтöнняс кот дзир этö горалöмсö и видзчисис. Сэк жö палялö сылöн он. Сiя перыта осьтыштö синнэсö, дзар керыштö вывлань. А сэтчин, пожум ув вылас, увлань видзöтчöмöн, пукалö боёк гöрд урок, видзчисьö, кöсъясö я сылö мыйкö сёйны.

— А, этö тэ, Рыжик? Но лок матöжык.

Скамья вывсис сувтö шоччисись морт, пондö кошшисьны аслас карманнэзын. Недыр мыйись сiя кыскö сэтчинiсь кык неыджыт орешина, нюжöтö нiйö осьта ки долонь вылас вывлань. Рыжик эталö радся-рад. Перыта сувтчышалöмöн, сiя лэдзчисьö сё улöжык да улöжык. Недырик кежö урок эшö сувтчыштас бöрья ув йылас. «Цок-цок» — быдöс я бур? Но полöтанаыс да бöбöтчанаыс кыдз бытьтö нем оз тыдав. Рыжик перыта мынöтчö лапаэзнас пожум ув бердiсь, и... вот сiя морт пельпон вылын ни.

Кокнитика нёкыртчыштöм пожум ув сэтшöм жö кокнитика веськалыштö-лэбтiсьыштö бöр. А Рыжик сэтöн жö вуджö мортыс ки долонь вылö, сэтöн жö кутчисьö сёйны. Пиннес коласын сiя нем туйö поткöтö орехлiсь кыш, лэдзö сiйö му вылö. А сы пытшкись кыскöм чуньпон ыждышта вемсö, одзись лапаэзнас зэв-зэв ныр одзас видзöмöн, перыта пондö пелявны поснит торрез вылö да горöн кручкыны-сёйны.

Скамья увтын ляпкисьöмöн да вöрöтчытöг куйлiсь кот öнi кваркышавтöг видзöтö зэгалан бöжок вылö. Но тöдны ас йывсис сiя кытчöдз немöн эз сет. И ась сылöн эта коста сöдзö ни öмас дуль, ась орсöны — то мыччисьлöны, то сайöвтчöны бöр — сы лапаэзын гыжжез, колана кадыс кытчöдз эз сибав и колö кужны да вермыны видзчисьны.

Но вот гöрд уроклöн павжнайтöмыс чулалiс, öтiк орехыс сёйöм. Сёйны мöдсö сiя эз ни понды, колис мöдöтпырись кежö. Öнi сiйö кольччис дзир кытчöкö дзебны. Орехнас пиннес коласын, Рыжик перыта чувизнитö-чеччöвтö му вылöдз, гарйыштö öтiклаын лапаэзнас гöпок, но тыртнытö ассис павжунсö оз ни ешты. Эта коста бöрсяняс и уськöтчö сы вылö кот. Но этö вöралiсьсö гöрд урок тöдö важынсянь ни: тöдö, что сысянь бурсö видзчисьны нем. Сылö колö не уроклiсь кольччöм павжунсö, а сiйö асьсö. И сiйöн, мый бы Рыжик эз кер му вылын, чочком галстук-бабочкаа ой кодь сьöд котсö тöдвылiсь сiя некöр эз лэдзлы и аслас быликтчöмкодь сьöд синнэзöн видзöтiс быд ладорö. И ась гöрд урок эз казяв сылiсь скамья увтсянь караулитчöм, чепöссьöм коста сылiсь перыта вуджöртчöмсö сiя казялiс ни. Сiйöн котлöн паськöтöм гыжжес сибалiсö сы бöж йыв бердö руас ни. И кöр кот сибалiс нiйöн простöй му бердас, сэк кежö урок лякасис ни аслас лапаэзöн пожум дын бердö, метр сувдöн му бердсянь. Эта вылын сылöн и одззася паймыштöмыс чулалiс ни. Но лöньсьыны кот и öнi эшö эз думайт. Мöдöтпырись чеччöвтöм коста сiя вöтiс пожум дын бердын сiйö местасö, кöд весьтын секунда джынöн одзжык видзсис урок. Сэк кежö сiя ештiс ни лэбтiсьны лажмытжык ув весьтöдз, дзик дразнитöм могись шыасис: «цок-цок». Кот вуджöртчыштiс и — сiя ув вылöдз. Но эта коста гöрд урок вöлi вылынжык ни. Кот сы сьöрö, а Рыжик — эшö вылöжык. Сiдз, сувтчытöг, нiя и кайöны пожум вылö. А кытшöмкö местын Рыжик уськöтчö бокö пу гöгöр. Кот, вежöртана, тожö оз кольччы. Син одзын вирдышавтöн, нiя пондöны керны кытш бöрын кытш.

Етша панталан сэтшöмсö, мед сiдз кужöмöн да сэтшöм перыта вермис вöтлiсьны пу вылöт ур сьöрын кань. Ас синöн адззывтöг эталö веритны вöлi бы сьöкыт. Но эстöн тöдчис бытшöма, что уджсö этö кот керö не первуись ни и этöн каднас ештöм велавны. Но кытшöм бы кужöмöн да перыта сiя эз котрась, вöтны да кутны перыт да ылöса гöрд уроксö сё жö эз чайтчы.

Öнöдз кот, тыдалö, и ачыс вежöртiс ни, что эз кö сюр сы лапаэзö визыв да кокнит зверёк му вылас, то эстöн, пу вылас, сiйö и вöтöн он кут. Но саймöм инстинкт — кутны — лöньсьыны да сувтчыны ас кадö öнi сылö эз ни сет.

Ылöстiс сымдасö и гöрд урок, что му вылын вöралiсьлö кутны сiйö му вылас кокнитжык и эм, ежели пу вылас, кытöн Рыжик вöлi ас гортын. И мунны, орöтчыны котыс вöтлiсьöм шогья, кайны пожум йылöдз нето вуджны мöдiк пу вылö, сiйö нем эз видз. Эта увья сiя öддьöнсö и эз тэрмась, а пышшалiс öтiклаын бергалöмöн, дзик нарошно дразнитiс. Вот эта нарошно дразнитöмыс котлö медöддьöн и эз гленитчы. Эта увья сiя и эз вермы сувтчыны колана кадö, вöтчис гöрд урок сьöрö сё одзлань и одзлань.

Но вот Рыжик кежыштiс ылöжык пу бердiсь. Сы сьöрö жö, вежöртана, уськöтчис и кот, сiйö и видзчись — вöтас да курмыштас гыжжезнас. Вот медбöрья чеччöвтöм. И... кöр мыччассис ни, что гöрд урок вот-вот лоас котыс лапаэзын, вöснитик уввез кузя сiя кокнита вирдыштiс вывлань. А кот лапаэз увтын сы коста жö чегö вöснитик улок. Бергöтчыны, нето керны бöр — сёр ни. Сымдасö кот оз ешты. Мынöм аслас местаись эта ув сорöн, сiя гира-гара пондö лэдзчисьны увлань. Вот ув, мöдiк, куимöт. Но быдöнныс нiя эстöн сэтшöм вöснитöсь да кокнита куснясянаöсь, что ны бердö кутчисьöм-падмöтчöмись öнi нем оз ни пет. Öтлаын чегöм увкöт, кыт онняюрöн, кыт кыдз, сiя усьö увлань.

Му бердö сибавтöдз кот сё жö ештö бергöтчыны колананёж, мед не зiтшкисьны сивилён вылас. Усьö сiя небытик коккес вылö, а сьöрсяняс сiйö öнi вöлись вöтöны кынымкö чегöм ув. Но куттöм урыс, тыдалö, сё эшö тöдвылын. Юрсö чатыртöмöн да бöжнас öтмöдöрö öвтышалöмöн, кот мыйкö дырна эшö нёджжасьö вывлань. А сэтчинсянь, увлань онняюртчöмöн, паныт сы вылö видзöтö быликтчöмкодь сьöд сина учöтик урок, дзик сералöмöн юалö: «цок-цок» — мый пö, кутiн, вöтлiсин-вöтлiсин да?

Кот паныт оз шыась. Недолытсянь синнэсö куньышалöмöн сiя лэдзö нiйö увлань, нетэрмасьöмöн сибöтчö бöр скамья дынöдз, нюжöтчö-водö сы увтö, пондö нювсьыны.

Чулалас мымдакö кад, и гöрд уроклöн бöра пондас симавны кынöм. Эта увья сiя вились лэдзчас му вылö, мед адззыны пышшытöнняс öштöм орех. А караулитiсь котлö дзир эта и колö. Скамья увтас гусьöн куйлытöн сiя бöрьяс коланажык кад да вились уськöтчас урок сьöрö. Но гöрд уроклöн лэчыт син, кокнит вывтыр да öддьöн чожöсь коккез. Сiя вились нильдас кот гыжжез увтiсь да бöбöтлас сiйö ас сьöрö, пу вылö. А мöдыт, кутöм лöгувья, пондас вöтлiсьны сы сьöрын, кыдз эта вöлi и удерлун, и тöн, и талун, кытчöдз вились оз мын да оз пичкись улöдз. Сiдз ныкöт вöвлi унаись ни, а батi, эшö унажыкись лоас одзлань. Сэтшöм уж ны коласын олан: öтыслö — пышшавны, мöдыслö — кутавны.

МЫЛА

Неважын мыччисьöм шондiлöн югöррез сидзны быд пельöсö эз на ештö. Тшöка сулалан пуэз коласын вöлi сё эшö пемыткодь да ыркыт. А межа дорись кöззэзлöн вуджöр нюжалiс непаськыт видз мöдöрöдз. Но сибöтчис асыв, кöда саймöтiс вöрын борда олiссесö, и, кыным одзлань, нылöн быднёжа питиртöм-горалöмыс лоис сё вынажык да горажык.

Кыз лысвасянь пидзöсöдз люзь ва паськöма ме петi видз шöрöдз, сибöтчи да сувтi тöдса пожум дынö. Сэтчö жö кысянькö вöр колассяняс шытöг сибöтчис менам пон, неыджыт, сьöд, чочком галстука, öддьöн кокнит кокйыла да визыв Травка. Сiя, кыдз и ме, тожö вöлi люзь ва.

Ме мынöтi спина сайись павжунöн пестер, öшöтi сiйö пожум ув вылö. Туисöн юансö сувтöтi сэтчö жö, пожум увтас. Эта сьöртi Травка вежöртiс, что одзлань муннытö оз ков. Öнi позьö шоччисьыштны. Сiя водiс сэтчö жö, пожум увтас, пуктiс ассис чуксö одзлань нюжöтöм лапаэс вылö. Но быдса кымöрöн гöгралiсь номмес шоччисьнытö сылö бытшöма эз сетö. Травка сiйö и керис, зыртышалiс лапаэзнас нырсö, нiйöн жö негорöн вартлышалiс му бердас да öмсö осьтыштлöмöн, кадiсь кадö кальскöтiс пиннезнас. Номмес курччалöмись жö ме кышыштi юр вылам чочком чышьян, литовкаöн киам, кежыштi межа бердöдз, пондöтi медодзза прокос. Шондiыс лэбтiсьтöдз туруныс вöлi ва да небыт, ытшкиссис кокнита. Турун вылын чукöртчöм лысваыс, быд ытшкыштöм бöрсянь, биöнмоз öгралан бисерöн киссис му вылö.

Уджавтöнняс ме эг и казяв, кöдкоста Травка ештöм чеччыны аслас местаись. Чожа мый сылöн вувтöмыс кылiс видз увтас, шочыник да пöрись вöр коласын. Но вувтiс пон не лöга, а кыдзкö нюжвылика да визжитöмöнмоз. Сiдз сiя вувтö неыджыт зверь вылö, кöда кытöнкö и матын, но не пиньöн, не лапаöн, некыдз он судзöт. И былись... Чулалiс час, мöдiк, а поныс сiдз и эз дугды вувтнытö. Быдсöн этö кадсö сiя, кылö, бергалiс öтiк да сiя жö местаын. Ылiсянь кывзытöн позис думайтны, что Травка то ли гарйисьö, то ли котрасьö непаськыт кытшöн, но не вöтны кинöскö, не судзöтны, некыдз оз вермы.

Ме неöтпырись ни пондывлi кытсавны сiйö дынам. Эта коста Травка недырик кежö лöньсьывлiс, но ме дынö сiдз и эз лок. А кöр лöньсьывлi ме, сiя кутчывлiс каньгыны-вувтны да визжитны эшö одззася горöнжыка.

А кыдзкö шоччисьтöн ме иньдöтчи видз увтас. Охота сё жö лоис тöдны, кин сэтчин сэтшöмыс.

Травка, кöр кылiс менчим сибöтчöмöс, гажöн никсытöн, чепöссис паныт. Эстöн ни ме казялi, что сы чукись, кыдз емöн бытшкалöмсянь, уналаöт чездöм вир. Уджыс вöлi керöм тожö уна ни. Сiя местаын, кытöн сы дырна ни вувтiс да бергалiс пон, джодж пасьтöн туруныс вöлi нильöм.

Ме одзын Травка сибöтчис ыджыт да важ мыр дынö, сувтчис. Но мымда бы ме эг нёджжась, казявны медперво некинöс эг вермы. И дзир сёрöнжык, кöр, вöлi лöсьöтча ни бергöтчыны да мунны бöр, меным син вылам усис ёж. Каттьыштчöм, дзик шар, сiя вöрöтчытöг куйлiс мыр вужжез коласын. Колiс меным сибöтчыны матöжык, кыдз ёж тшакыльтчис эшö ёнжыка. А кöр ме сибöтыштi сiйö куш кинам, сэтöн жö чунь йыввезöс топ сотыштiс.

— Адззан вот, кытшöм сiя лёк. Оз позь сы бердö куш киöн сибöтчынытö. Мунам, — горöтчи ме поныслö. Но Травкалö, тыдалö, жаль вöлi кольны адззöм торсö. Мунны ме сьöрö пон эз и думайт. Никсышалöмöн да вувтышалöмöн сiя вились сибöтчыштiс ёж дынö. А одзлань мый? Немöн эд сы бердö он кутчись. И сё жö поныс кольччис.

Ме ытшкиси одзлань. А Травка сiйö и керис, никсiс да вувтiс. Керны мыйкö этася унажык ёжкöт сiя эз вермы.

Павжун коста пон сы дырна кежö дзир и вовлiс ме дынö, мед сёйыштны шöрöм нянь. А сэсся вились иньдöтчис видз увтас.

Думайтсис, что эта коста ёжыс ештiс пышшыны: мунны гортас нето дзебсисьны аслас нораö. Эд этöн каднас сiя ештiс тшыгмыны. Да и пияноккес, натьтö, гортын тожö видзчисисö. Но ылынöв, тыдалö, вöлöм ёжлöн гортыс, и керны сымдасö сiя то ли эз лысьт, то ли эз ешты. Этöн каднас сiя нельки ассис местасö мыр вужжес коласiсь абу чапкöм. Вежöртiс, сiдзкö, кöть и учöтик да, что не петны кö сылö аслас мыр вужжез коласiсь, эстiсь сiйö некыдз да немöн поныс оз кыскы. Дорйис аслас йыла ёма пасёк, дорйисö и вужжес — не бöрсянь, не боксянь некыдз он кутчись.

Чожа мый видз увтсяняс вились пондiс кывны Травкалöн вувтöм. Этö быдöс, мый сiя вермис керны.

Рытъявылас ме эшö öтпырись кежалi видз увтас. Ёжыс ловья, сё сiдз жö куйлiс одзза местаас. Позис нельки думайтны, что некин да некытöн сiйö оз видзчись и некытчö сiя оз и тэрмась. Вот уж, мыся, мыла дак мыла. А сыын сылöн и спасеннёыс.