Сэтöрлöн кöр

Быдмö менам садын сортовöй сьöдсэтöр «Память Мичурина». Сортыс важ. Петкöтöм сiйö эшö ачыс садовод Иван Владимирович Мичурин. А сёрöнжык этö сортсö шуöм сы нимöн мöдiк садовод-селекционер И. А. Толмачёв.

Лыддиссьö сортыс десертнöйöн. Висьтавны мöднёж — бытшöм кöра ягöдаöн, кöдаын тырмöмви кыдз шöмыс, сiдз и чöскытыс, мыйсянь сiйö унажык позьö сёйны свежöйнас.

Сюрис эта сортыс ме садö питомникын уджалiсь тöдса отирсянь.

Öння кадö сiя жö питомникын эмöсь эта сортся вель уна и мöдiккез, кöдна коласiсь мукöдыс мыйöнкö, натьтö, нельки буржыкöсь. Но вежны сiйö мöдiк вылö охота менам абу. Вот и видза öтiксö аслам садын кыкдас год сьöрна ни. А мый увья? Часöт висьтала.

Воö сэтöрыс одз, мукöд сорттэзся тöдчöмöн одзжык. Кузя нюжалöм роззэз вылын воöм ягöдыс не чим сьöд рöма, кытшöмöн и колö бы лоны сьöдсэтöрыслö, а пемыт-коричневöй. Но колö висьтавны, что и этаын сылöн ассямаыс не быдöс. Быдöс коласiсь медтöдчанаыс сортыслöн сё жö корыс.

Воас сiдз гожумнас сэтöр. Сибöтчан сэк кустыс дынö да и нетшкöвтан бытьтö казявтöг кынымкö ягöдтусь. Сiдз жö казявтöг и öмат чапкан. А кöр нильыштан кыв увтат да кылан кыв йывнат, топ öмидзлiсь жö, кытшöмкö чирыштан-сотанкодь, небытик шöмсора, чöскыт кöр, эта бöрсянь, кыдз баитсьö отирыс басниын, кустыс бердiсь и плетьöн он вашöт. Сэтöн жö, дзик тшыгувья, пондö лэдзчыны дуль, охота лоö сёйыштны эшö да эшö. И сулалан сiдз кустыс дынын и минута, и куим, и, нельки, дас сьöрна, чапкалан öмат то кынымкö тусьöн, а то и кырымтырöн небыт да шоныт-коричневöй рöма ягöд, а пöтнытö сiдз и он вермы. Оз быр охота сёйны эшö да эшö. Но... меддонаыс ме понда нельки не ачыс ягöдлöн кöрыс, а медодз сыкöт, эта кöркöт, важын ни, эшö челядь кад коста тöдсасьöм, нач учöтик, абутöмкодь, позьö шуны, эпизод, история, картинка, кöда кыдз вöлi, сiдз и кольччис сэксянь ме тöдвылын век кежö. Сiйöн быдкоста, кöр воö садын сьöдсэтöр, а ме сибöтча, нетшкöвта кынымкö небытик тусь, чапка öмам, нильышта кыв увтын да кыла нылiсь кöр, сiя бергöтö менö недырик кежö важын ни чулалöм да унаöн вунöм тöдвылiсь аслам челядься кадö, ятнöя сувтöтö син одзö оланiсь öтiк лун.

Вöлi эта арвыв кадö. Колхознöй ыббез вылын пондöтчис нянь дзимлялан страда. Погоддяыс сулалiс мича да кöс. Эз ни пöдты аслас ма кöра дукöн видззез вылын цветитан турун. Öнöдз сiя вöлi ытшкöм, куртöм да зородалöм. А сука вöрзьöм отавасянь некытшöм цветитан дук эз лэбтiсь. Сэк кежö руас тöдчöмöн сорлассис ни воöм нянь дук, кöда пöт мортöс пöткöтiс эшö öддьöнжык, а тшыгыслiсь дзир вынсьöтiс сiйö жö тшыгсö. Эд вöлi войнася кад, кöр уджалiсь отир пöт кынöмсö кодьöн эз кывлы. Но вöлi эшö шоныт гожум и луншöрся кадö, шондiа да лöнь погоддя коста, сё эшö тыдавлiс йöррезлöн орсöм, а ыбын да вöрын тшыг мортыслö адззисис öктыны тшак-ягöд.

Кыдзкö сэтшöм кадö отсасьöм могись ме и нöбöтi вунданiнö мамöлö павжун. Вундiс сiя деревня сайись ыбын, кöдö шуисö Матiсьдзибöн. Вежöртана, что муннытö сэтчинöдз и эз вöв ылын. Колiс дзир петны деревня сайöдз да подакокувтсö сы сайись чулалöм бöрсянь вуджны оль. А сэсся муныштан эшö джын километр ылына шочыник кöзъя вöрöт йöр бердöдз, кöда сайын и пондöтчö колана ыб.

Петi ме туйö эшö павжун вотöдз, кöр шондiыс эшö эз на ешты бергöтчыны деревняыслö поперег. Сiйöн мамö дынö сёрмöмись эг пов. Эз полöт öддьöнсö и тöдса туй. Эта увья ме немымда эг и тэрмась.

Сьöрам ме кыски öтiк волыса сера дöраовöй сумка, кытчö вöлiсö тэчöмöсь луккез, нянь, кольть, баран сюровöй пыдöсалöм патракын сов да бутылка мымда йöв. Быдöс тэчöмыс вöлi не сэтшöм и уна. Но öтiк да векнит волыса сумкаыс зубытöдз нырыштiс пельпон вылö. Эта кузя мунтöнням ме сiйö и кери сувтчышалi, мед лöсьöтыштны пельпон вылiсь волыс нето кöть вештыштны сiйö кöдöрöкö зубытöдз нырыштöм местаись. Сэтчö жö эшö шорсö вуджтöн, шоччисьöм могись, ме вель дыр пукалi посок дорын, видзöтi, кыдз олöны посок увтас поснитик лягушкаэз. А овсис нылö, колö висьтавны, месся унаöн буржыка, сiдз кыдз кыскавнытö нылö ме моз нем эз ковсьы. Нiя дзир сымда и тöдiсö, что уялiсö, кöдöрö шедас, лажмытик да шоныт шор ваын нето чеччалiсö небытик тина коласас да куталiсö поснитик номмезöс — вердчисö. Сымда ны оланын и вöлi удж.

Не сьöкытжыка, кыдз меным думайтсис, овсис и сьöд юрока пистöжоккезлö, кöднö ме панталi сёрöнжык кöзъя вöр коласiсь. Кык учöтик каёк, тыдалö, гозйöн сiйö и керисö, то лэбзьыштлiсö неылö öтамöд дынсянь, то чеччалiсö ув вывсянь ув вылö, невылына му бердсянь, чивзышалiсö негорöн ас коласын и сё кошшисисö да кошшисисö, мед адззыны мыйкö сёйны. Нельки кузь бöжа катшалö, кöда нем керöмсянь горöн китшсьытöн кольлалiс менö шор дорсянь завор бердöдз, овсис, тыдалö, месся буржыка. Некытшöм забота, натьтö, сы оланын этася эз и вöв, кыдз чепсасьны пу вывсянь пу вылö да керксьыны чульсис петтöдз, мымда горш.

Ме жö, кытчöдз кысси аслам сьöкыт ношаöн Матiсьдзиб завор бердöдз, ештi пымавны люзь. Эстöн эшö öтпырись ковсис шоччисьны. Сiйöн и мамö дынö локтi сёрöнöв, кöр мукöд вундiссес ештöмась вöлi павжнайтны ни да öнi шоччисисö куйлöмöн вундöм-домалöм кольтаэз вылын. И дзир öтнас мамö быдöнныс моз эз шоччись. Менö видзчисьтöн сiя сё эшö курышалiс ас одзас зеркало кодь югыт бока чарлаöн сю да няжйис-вундiс. Этасянь сылöн и медпаськыта пондöтöм адасыс ештöм кольны быдöннысö: мунöм медылö одзлань. А омöн адас пасьта лажмыта да волькыта тшöтшкöртöмкодь (кыдз только кужлiс менам мамö) вундöмпод коласын сяр видзöмöн куйлiсö бок выланыс, бытшöма да басöка домалöм кольтаэз.

Менчим локтöмöс мамö казялiс ылiсянь. Но нельки сэк сiя паныт эз чепöссьы. А кöр ме сибöтчи зэв матö да мынöтi пельпон вылiсь сумка волыс, дзик орсöм могись, кокнита да перыта сiя кöртыштiс тыртöм кольтасö сюсис жö керöм йыöн, сыö жö, кöрталöм кольтаас, и тожö кыдз орсöмöн, зангыштiс йыла нырнас пельпон вылiсь мынöтöм чарла, чышкыштiс йöрнöс сос бердас чужöм пасьта визывтан ньылöмсö, пуксис, судзöтчис öтiк кинас павжун сумка бердöдз, кыскыштiс сiйö матöжык асланяс.

— Мый нö сы дырна? Отирыслöн пажыныс эд продитiс ни.

— Сьöкыт, коли, сумкаыс...

— Но сёй, пуксьы да. А сэсся отсалан кольтаэсö грудитны. Ме сы коста кöть кольта-мöд вундышта.

Мамö бертыштiс ^виль рудзöговöй нянь шöрöм, öтлаöтiс сы дынö ас павжунiсь кольть, нюжöтiс меным. Ачыс сiя весöтiс да няньыс сорöн жö пондiс сёйны луккез.

Павжнайтöмыс бöрсянь шоччисьнытö кадыс эз петав. Мамö чеччис, вились кутчисис удж бердö. Медодз сiя мыччалiс меным, кöд весьтö адас шöрас чукöртны кольтаэз, а сэсся босьтiс киас чарла, тэрмасьöмöн вились мышкыртчис вундыны.

Сетöм удж бердö и ме кутчиси тожö гажöн. Идъя-зöрья сю кольтаэс эз вöлö сьöкытöсь. Кыскавны нiйö öтiк-кыкöн адас шöрöдз вын менам судзис ни. Но сэтöн жö ме и кылi, и казялi, кытшöм зубыта кырлалö да бытшкалö менчим кокгуммезöс чорыт вундöмпод. Эд ме вöлi кöмтöм. А дженытик вешьянкоккез увья менам нiя вöлiсö нач кушöсь. И кытчöдз ме чукöртi адас шöрö быдöс кольтаэз, менам кокгуммезö лоисö бытшкалöмöсь да кырлалöмöсь сыбурна, что нельки дзонь места некытöн эз кольччы. Быд сэтшöм бытшкöм нето кырöвтöм местаись чездiс вир. А этася эшö сiдз сотiс-палитiс, что терпитны этö зубытсö некытшöм вын эз судз. Медбöрья кольтаэсö ме чукöртi синваэз сорöн ни, а сэсся горзытöн пукси ны вылö.

— Мый лоис? — оськöвтiс матöжык мелань да юалiс мамö. А кöр казялiс вирöдз кырлалöм коккезöс, сылö, тыдалö, лоис недолыт. Но жалейтны эта увья сiя менö эз понды, лöгвевйöн сьöвзис аслыс кок увтас, сэтшöм жö лöгвевйöн одзлань горöтчис:

— Тьфу тэнö, некодя мортöс! И кольтаэсö грудитны ни прокыт тэнат оз тырмы. Кин только тэись, тэ кодьöмсис и петас.

Кин меись петас кöркö, дас нето кыкдас год бöртi, сiя кадö кватьгодсялö, меным эта йылiсь кыдзкö эшö эз и думайтсьы. А висьтавны веськытжыка — думайтнытö сымдасö ме эшö эг куж. Но этна кыввез бöрсянь, кöдна вöлiсö горöтчöмöсь кыдз ыджыт да бытшöма ни вежöртiсь мортлö, чездалöм вира коккезын зубытыс кыдз бытьтö лöньсьыштiс. Öнi менчим синнэзöс курöтiс мыйсянькö мöдiксянь, кöдалiсь причинасö ме бытшöмжыка и вежöртнытö эг вермы. Но горзынытö одзлань сэсся эг ни лысьт, жагвыв лöньси.

Мамö жö, кöда коссö веськöтлытöг вешшышалiс эта коста öтмöдöрö адас пасьта да сё няжйис-вундiс, удж коласас неöтпырись ни дзарышалiс дженытика ме ладорö. И быд сэтшöм дзарнитöмсянь, кыдз йыа васянь, ме вывтыр пасьта паськавлiс чутралан дрöж. Öнöдз ме тöдi ни, что уджавтöн сiя оз вермы терпитны ас гöгöр нiйö, кин, кыдз и ме, весь пукалö сы син одзын да нем оз кер. Но мый колiс керны эта коста меным, сымдасö сiя эз на висьтав, а ачым ме этö тожö эг тöд. Кытшöмкö вежöрттöм обидасянь ме чöлöмöн кольччи пукавны кольта вылын, курччалi ассим тырппезöс да жагвыв малалi кырлалöм коккезöс.

— Мун кöть сэтöрысла оляс лэдзчыл. Öтаваыс, батi, оз жö сiдз бытшкал.

Ме кывзi чöлöмöн. А мамö одзлань эшö висьталiс:

— Пыр завор бердсяняс öсек пöлöнняс оль ладорас. Синнэт эмöсь, дак сэтчин ачыт казялан. Сьöд только сэтöрыс воöм. Дозас он öкты, дак, батi, кöть адтö ассит тыртан. Нем тэныт сэтöн, адас шöрас, гыр моз весь пукалнытö.

Ме вежöртi, что этася буржыксö мамöсянь видзчисьны нем. Тöдi эд, — быд лунся сьöкыт уджсянь да тшыг олансянь сiя аслыс ачыс нерад. И бурыс эстöн ме понда вöлi кöть сiя ни, что мамö лэдзис менö ас дынсис. А пырны öсек пöлöн ольö, ась и öтнаслö, полöм менам эз пет. Шондiыс павжун бöрсяняс öшалiс эшö вель вылына, и гöгöр вöлi югыт. А не кöин, не ош матын деревня гöгöрас гожумся кадö эз олö. Полöтiс кö менö мый эта коста, дак бöра сiя жö бытшкасян вундöмподыс, кöда пыр оськавтöн колiс кыдзкö петны мамö адасiсь межа дорöдз. Но мед не лöгöтны сiйö одзлань, кольта вылас нем кертöг пукалöмöн, ме шыасьтöг сувтi дойман коккез вылö, чöлöмöн жö оськöвтi öтпыр-мöдöтпыр межа ладорö.

— Да дозсö разь сьöрат он и босьт? — сы коста жö кылi бöрсяням мамöлiсь шыасьöм. Не бергöтчыны, не шыасьны паныт ме эг ешты.

— Одзат, борозда дорас простöй туисыс сулалö. Дышвевйöн да охотатöг ме нёджжöвтi ас гöгöр. Туисыс усис син вылö кынымкö оськöв ылына. Сибöтчи, мышкыртчи, лэбтi. Сiйöн ни öвтышалöмöн иньдöтчи бороздаöттяс межа ладорö. Мед не бытшкавны да не кырлавны коккезöс вились, оськалi жагвыв, кок увтö видзöтöмöн. А кöр сибöтчи межа дорöдз, сэтöн вöлись и мынi.

Важынкодь ни ытшкöм межа пасьта вились лэбтiсьöм öтаваыс вöлi небыт. Коккезöс бытшкалöмись эстöн ме эг ни пов. Простöй туисыс тожö эз вöв сьöкыт. Одззамоз сiйöн öвтышалöмöн, ме перыта сибöтчи завор бердöдз, но вуджны йöр мöдöрас эг ни понды, а перво жö кежи сы пöлöн оль ладорö.

Медодзза жö лажмытик ула да пемыт лыса кöззэз коласын, кöдна быдмисö шочыника видзыс пöлöн, вились усис пантасьны сьöд юра пистöжоккезкöт, кöдна одззамоз быркайтiсö-чеччалiсö пу уввес коласын да кошшисö аслыныс пöтöс. Но öнi ме кери сiйö жö, и ны буржык олан йылiсь думаыс ме юрö эз ни пырав.

Ыб ладорсяняс öсек пöлöнняс некытшöм туй эз вöв. Сы бердöт быдмис дзир морт сувда лабазтурун, кöда весьтын дугдывтöг дзингисö-лэбалiсö зiэз да малянкаэз. Вöр коласас эз руав некытшöм тöлок. Сiйöн эстöн руыс вöлi тыртöм сё эшö цветитан турун, пöжсьöм лист да лыс дукöн. А быдöс коласö сорлассис да пöдтiс мукöдсö шоналöм сэтöрпулöн нельки курытвевья да сьöкыта нырыштан дук. Асьныс сэтöр кусттэс пантасисö сэтöн жö, нач неылын завор бердсянь. Но матiсь кусттэс вылiсь сэк кежö ягöдыс вöлi öктöм ни. Неунаöн сiйö позис казявны дзир кынымкö куст вылiсь. Ме и эталö вöлi рад. И ась öктöмыс коласiсь öмам эшö и öтiк тусь эз сибав, туис вевт вылас кынымкö кырым мымда вöлi готтьыштöм ни.

Кыным одзлань, сыным ягöдыс сэтöр кусттэс вылын пантасьлiс сё унажык да гырисьжык. А öтiклаын, бокынмоз öсек бердсяняс, лапья кöззэз коласын син вылö усис месся кынымиськö вылынжык гöрдсэтöр куст. Шуч тыдалан да биа шомöн öгралан, — не весь сiйö миянын шондiсэтöрнас и шуöны, — ягöдыс сы вылын öшалiс сымда, мымда ме ас оланын эшö öтпырись эг адззывлы. Эта менö сэтчöдз гажöтiс, что мыйкö дырна кежö ме нач вунöтi сьöдсэтöр йылiсь, пондi öктыны гöрдсö. И ась ме эта коста и эг вöв öддьöн тшыг, ягöдыс сiдз и корсис öмö. Но сёйны перво жö сэтшöм басöксö, кöда биа доннэзöн моз öшалiс-öгралiс син одзын, шондi югöррес увтын, вöлi кыдзкö жаль да нельки недолыт, кöть öктiсьтöнням и сöдзис öмам да вотялiс морос вылö дуль.

Эта сэтöр куст дорын ме и вöти кынымиськö тыртöм туис вевт, мыйсянь литр куим тöрик туисокö джынысви лоис тыртöм. Сэк вöлись радувья да кыдзкö казявтöг ме и чапки öмам öгралан дон кодь кынымкö ягöд тусь. И колiс дзир öтпырись керны сымдасö, кыдз ме сэтöн жö и вунöтчи аслам доз йылiсь. Орöтчыны ягöд бердiсь, кöдö эшö неважын сёйнытö вöлi жаль да недолыт, öнi ме эг ни вермы: некытшöм вын эта вылö эз судз. То кынымкö тусьöн, а то и кырым тырöн ме сiйö и кери, вайöтлi тырппез дорöдз да пöрлалi öмам. Сотан кодь чöскыт шöмсянь чикралыштлi синнэзнам, а öткоста мыдзтöг да дугдывтöг сiйö и кери, вöрöтышалi аннэзöн: кажйи-сöски да ньылалi. И кыным унажык ме сiйö сёйи, сыным унажык шедiс öд.

Ордчöн сулалан да джынысви эшö прос туисокö усис меным тöдвылам вöлись сэк, кöр сэтöр кустыс вылын нем эз ни кольччы. Сэк кежö, пиннезö йöрмöмсянь, менам нельки аннэз вöрны дугдiсö. Но ме тöдi, что эта сiдз недырик кежö и чожа мый чулалас. Сiйöн пиннезлöн йöрмöмыс öддьöнсö менö эз полöт. Гажвевйöн ме эшö видзöтöв-кери куш ни öнi да этасянь нельки веськамыштöм ён сэтöр куст вылö, кöда сэтшöм бытшöма, кыдз бурся-бур гöсьöс, потшшуйтiс менö аслас ягöдöн, сыбöрсянь вöлись лэбтi кок увтсим туисок, иньдöтчи одзлань.

Муннытö ковсис неылö. Кынымкö оськöв ылына эта сэтöр куст дынсянь, матын öсек бердас пантасис эшö сьöдсэтöр куст, кöда вылын воöм ягöдыс öшалiс, кыдз нять, öнöдз вöлi тожö эшö öктытöм.

«Некин эшö, тыдалö, абу инмылöм», — думайтi ме гажувья ас кежам, видзöтчöв-кери гöгöр, сувтöтi кок увтам туисок, пондi öктiсьны одзлань.

Жагвыв сибöтчис рыт. Шондiыс, кöда эшö неважын öшалiс вöр весьтын, öнi лэдзчисьыштiс увлань да пондiс тыдавны дзир пуэс коласöт. И ась эз на ешты лöньсьыны кайезлöн сьылöм-горалöм, ракаэзлöн карзöм да катшаэзлöн китшсьöм, вöр коласас лоис пемытжык да ыркытжык. Дзир сэтöрпулöн вына да сьöкыта нырыштан дук, кöда эстöн эз бырав нельки ойся кадö, сё одззамоз патшкис нырö.

Ыб ладорсянь, кöда дынöдз этасянь вöлi нач неылын, пондiс кылышавны вундiссезлöн ас коласын горöтлöм-баитöм. Эта сьöртi позис вежöртны, что нiя недырик кежö чапкисö ассиныс вундан удж, пондiсö суслонитчыны. Сэк эд дзир нылö и позис сёрнитны буржыка öтамöд коласын. Адас дорас дугдывтöг мышкырасьтöн унасö он баит.

Сьöдсэтöр куст гöгöр бергавтöн ме эшö тыртi да лэдзи öтiк вевтöс. А эта вылын, тыдалö, мыдзыштi. Öктыны ягöдсö дозам охота öшис. А висьтавны веськытжыка, вились лоис сiя жö, мый вöлi неважын шондiсэтöр куст дынын. Кытшöмкö кадö, казявтöг, ме вились чапки öмам кынымкö ягöд тусь, нильыштi нiйö кыв увтам. Сэк и сотыштiс менчим кыв йылöс сэтшöм небыт-шöма, а öткоста и чöскыт кöр, кытшöмö эта вотöдз пешлывлыны да кывлыны эшö некöр эз усьлы. Вежöртана, что эстöн ме вились вунöтчи аслам доз йылiсь, вились пондi сёйны. Перво жö вежöртi эшö и сiйö, что кыдз бы меным эз гленитчы неважын сёйöм шондiсэтöр, кöдö ме сёйи пиннез йöрмытöдз, сьöдыс сы сьöртöт вöлöм унаись небытжык, чöскытжык да кöражык.

Сэк жö, сэтöр куст гöгöрас бергавтöн, меным син вылам неöтпырись ни усьлiс зiэзлöн бергалöм. Нач видзчисьтöг нiя мыччисьлiсö кыськö сэк, кöр ме лэдзлi кисим ягöддэзiсь простайтöм ув и нёкыртöмыс бöрсянь сiя кокнита да зэркыта веськамлiс бöр, сувтлiс аслас местаö. Но кытчöдз зiэс менö эз вöрöтö, то и нем полöтанасö ас гöгöрись ме эг кыв да эг казяв. А кытшöмкö кадö, кöр ме нёкыртi асланям куст шöрись медгырись да медбасöк ягöда медыджыт ув, куст весьтас зiэс лэбтiсисö кыськö не кык-куим ни, кыдз одзжык, а быдса табун. Сэтöн жö öтiк сотiс-шваткис меным синкымам, мöдiк — юрбöрам.

Мед вежöртны лыддьöтiсьлö, кытшöм зубыта чушкалö зi, этö зубытсö кöть öтпырись колö пешлыны да терпитны аслыт. Позьö вежöртны этö и сы сьöртi, висьтавны кö, что кыкись шваткöм-чушкöм бöрсянь тыра дозö йылiсь ме вунöтi ни. Висьтала не сравненнё местö, кöр баитсьö «дзик чушкалöм», а чушкалöм былись, туйсö кошшытöг ме вöлi чепöсси местасим веськыта сэтöр куст вылöт, мед пышшыны. Но да кытчö сэтöн. Кок увтын вöлi кöчковника да вöтян оль. Медодзза жö оськöв коста сэтöр куст коласас тальччынытö инмис кöчкаэз коласö, небыт местаö. Этасянь ме öтiк кокнам вöйи вонясянöдз, мöднас сибдi сэтöр куст коласö и, вежöртана, ачым сэтöн жö бааси сэтöр куст весьтас. Сэк вöлись ме гöгöр зiэс лэбтiсисö быдса кымöрöн. А ны лöга дзингöм-бизгöмсянь и кывны гöгöр сэсся нем эз позь. Но зубытыс вöлi сё жö не ны дзингöм-бизгöмсянь, а ны чушкалöмсянь. Думайтсис, что сiдз ловья вывтi и кулясö. И кулисö. И пышналiсö. Да сэтшöм бытшöма, что эстöн сымдасö висьтавнытö оз и позь.

Усьтöнням ни ме кылi, кыдз дöраовöй дженытик йöрнöс увтiсь кушöтчöм кынöмам сотiсö-бытшкисисö вит-квать ем. Кынымкö секунда сьöрна, кöдкоста ме ештi сувтны бöр коккез вылö да уськöтчи пышшыны, вывтыр пасьта сэк кежö и простöй места эз ни кольччы. Öтзубыта кынöмöкöт зiэс шваткöтiсö-чушкалiсö юрöс да голяöс, чужöмöс да киэзöс.

Медперво нельки эз позь вежöртны, кöд местö унажык, а кöд местö етшажык сидзис зубытыс. Быдсöн вывтыр пасьта куш местаэсö сотiс топ биöн.

Горöтлi я ме эта коста да горöн я, сымдасö нельки ог и тöд: повзьöмувья тöдвылын оз видзсьы. Нем ог чайтчы висьтавны и сы йылiсь, кыт да кыдз, жагöн или перыта, пышши ме бöр эта местаись. Но кöр ме вöлиськö мезми вöр колассис да, мымда чож, уськöтчи öсек пöлöн межа вылöттяс завор ладорö, эстöн мамö пантасис ни. Сiя, тыдалö, уськöтчис паныт ме чирзöм-горзöм вылö, кöда йылiсь ме, зубытыс да повзьöмыс увья, немись-нем эг тöд.

— Мый лоис, горштö летан? — горöн да лöгвевйöн юалiс менчим повзьöмкодь чужöма мамö.

— Зi... зi... зiэ-эс ко-коли-и чу-чу-чушкалiсö-ö-ö, — мыкталöмöн шыаси ме паныт да эстöн ачым вöлись казялi, что горза. Терпитны горзытöг сымда зубытсö вын менам некыдз эз судз.

— Сiдз тэныт и колö. Та-кöс-кöй. Мöдöтпырись вöрöтны он понды.

— Э-эг ме нiйö вö-вö-вöрö-ö-öт, колö кö тэ-тэныт тö-тö-тöд-ны да-а-ак, — шыаси ме одзлань мамöлö, а сэсся вдруг кытшöмкö эшö вежöрттöм, но öддьöн зубыт обидасянь пондi горзыны эшö одззася горöнжыка.

Ме вылö видзöттöн мамö мыйкö дырна чöлыштiс, а одзлань одззамоз лöгöн висьталiс:

— Но и дугды буалнытö. Чушкалiсö и чушкалiсö. Он жö, батi, сысянь кул. — А одзлань, кватитчöмöн, юалiс: — А кытöн нö туисыт? Колин я мый я кытчöкö?

Эстöн вöлись ме и казялi, что öктöм ягöднас тыра дозö сьöрам и былись абу. А кöр уськöтi тöдвылö, кыдз ме пышши зiэс увья, ачым жö вежöртi, что петкöтны сiйö эта кадö сьöрам ме некыдз эг вермы, кыдз эз бы вермы и некин мöдiк, кöда сюрис бы ме местö.

— Кольччис сiя... Эг вермы ме... — Чушкалöмсянь пыкöса чужöмöн да пиньöвтчöм тшöкаöн öтпырись öвтыштöмöн ме мыччалi оль ладорö.

— Дак петкöт мун, кытчö колин.

Сiя зубытыс, кöда увья ме вунöтi тыра доз йылiсь да коли сiйö зiпоз дынас, чулавнытö öнöдз эшö эз ешты. Сiйöн мамö кыввезсянь менö перыта чапкис жарö. Сы коста жö мыйсянькö видзчисьтöг пондiс бергöтчыны юр. Öсек пöлöн тыдалан ыбыс вдруг пондiс боквывтчыны ме вылö, дзик ловья. А мый вöлi одзлань эшö этася, сымдасö ог ни тöд.

Зiэс чушкалöмсянь ме сё жö эг кув. Лун кыным бöртi чушкалöм местаэс ямисö. Жарыс жагвыв пуксис. Зубытыс чулалiс. Öнöдз быдöсiсь этаись, натьтö, и след некытшöм эз кольччы. А вот сэкся сэтöр кöрсö сэсся эг ни вунöтлы. Сiя и öнöдз эшö менам тöдвылын.

ÖМИДЗ

Ветлi ме кыдзкö гожумнас вöрö тшакла. Öктi тöв кежö маринуйтöм понда поснитик уртшак, кöда вöлись ештöм мыччисьны нитш колассис, абу эшö и паськалöм и этасянь дзир чуньпон гырися, кыдз дзуль.

Ветлöтны-кошшисьнытö, мед тыртны сы гырисянас доз — ведратöрик корзина — ковсис дыр да паськыта. Сiйöн и вöрсис петнытö лöсялiс не одзза местаöт, кыт пыри, а мöдiк туй кузя: деревняэз сайöт да ыббез коласöт, кöдна пасьта сэк кежö окласис ни морт сувда да тыра шепа сю — рудзöг. Сы коласын, матi межа бердсяняс, шочыника пантасьлiсö лöзчачаэз, кöднатöг оз овлы некытшöм рудзöг. Ны весьтын жö, этна лöзчачаа да ва моз окласян рудзöг ыббез весьтын, öшалiс енöжас да риз видзис, шыннялiс рамыник чужöмбана шондi. А окласян ыб да риз видзан шондi коласын, сiя жö голубöй рöма енöжын, öшалiсö эшö унася-уна ыбшаррез, кöдналiсь дзурликтöм-питиритöмсö ме кывза вот кыдз джын век сьöрна ни, а пöтны этöн кывзöмнас сiдз и ог вермы.

Дак вот. Кывзi ме сiдз гажа голоса ыбшаррезлiсь горöн питиртöм-сьылöм, видзöтышалi то рам югöра шондi, то жагвыв окласян-шушкöтчан рудзöг да сы коласын вежöра невеста моз лöня шыннялан лöзчачаэз вылö, горша лолалi мыдзувья ма кöр вылын сулöтöм сöстöм да чöскыт руöн да вешталi жагвыв коккезöс тыра доз увтын горт ладорö.

Оз позь висьтавны, мый дырна бы ме сiдз мунi. Но öтiклаын, неылын кытшöмкö деревня сайын, кырас пöлöн межа дорын син вылö усисö кынымкö ыджыт öмидз куст. Видзöтчöм могись ме кежи аслам туёк вылiсь, сибöтчи матöжык этна кусттэз дынö.

Воöм ягöдыс унасö и эз адззись. Литр мымда, натьтö, öктынытö эз и позь, сiдз кыдз ме вотöдз этчö кинкö, тыдалö, сибавлöм ни.

Öмидз кусттэз гöгöр ытшкытöм туруныс (межаыс куйлiс кытчöдз ытшкытöм) вöлi тальöм. И гажöтiс кö менö эстöн мый, дак дзир сiя дзор ягöдыс, кöда öшалiс кусттэс вылын и кöда, пондыны кö бы сiйö öктыны öнi жö, джын ведраетш, натьтö, öксис бы. Эта увья сэтöн жö и зорамис менам дума, вовлыны татчö эшö öтпырись öмидзавны. Эд думайтны кö отирыс басни сьöртi, дак чöскытжык да кöражык öмидзся и лоны нем оз вермы. Сэтчö жö öмидзыс не туримоль нето пуягöд, кöдналö вонытö кадыс колö уна. Шоныт да мича погоддя коста быгыльтчöм öмидз вермас воны — небзьыны да гöрдöтны — нельки кынымкö лунöн.

Кынымкö лун бöртi ме и лöсьöтчи öмидзавны. Одзся-одз асывнас, кöр городас эшö не шы, не тöв эз вöв, а енöжлöн асыв ладорыс и рöмсявны эз на ешты, ме босьтi сьöрам джын ведратöрик доз, кокнита пасьтасьöмöн петi туйö.

Муннытö колiс вель ылö, вит-квать километр ылына, Сiйöн ме и тэрмасикодь. И босьтны сьöрö ном-геб шогья мазь, то ли кöть чышьян, вунöтчи. Усис эта меным тöдвылам туй вылас ни, ылынöв город дынсянь. Бертны эта кузя бöр городö охота, вежöртана, эз ни вöв. «Ась, — думайтсис оськавтöнням, — шондiыс петтöдз кыдзкö терпита. А петас шондiыс, дак сэсся нiя ыб вылас курччасьнытö дугдасö ни». Сэтчö жö вöлi сьöрам и куритан. А табак тшынсис ном-гебыс сымда-мымдасö тожö полö, öддьöнсö оз сибöтчы.

Мый баитсяс туй йылiсь, дак кыссис сiя не вöрöт, а ыббез кузя, кытöн дугдывтöг руалö тöв. А тöв вылас ном-гебыс öддьöнсö тожö оз видзсьы.

Ыббес вылöт, чорзьöм туйыс кузя, ковсис оськавны быдса час сьöрна. Оз позь висьтавны, что этöн каднас ме ештi мыдзны. А вот пымавнытö даки пымалi. Этасянь увдöрись паськöмö вамис люзь, дзескöтöмöн пондiс лякасьны вывтыр бердö. Сы бердсянь жö паськалiс и шоныт пар. Некытшöм тöлок, кöда вылö ме надейтчи эшö гортсянь, ыббес весьтын талун эз руав. Вöрöтчытöг öшалан руыс вöлi кытшöмкö уль да сьöкыт, кöда лолавтöнняс бытьтö пöдтiс. Сэтшöмыс овлö дзир погоддяыс тшыксьöм одзын, кöть енöжыс сэк кежö эшö и эз вöв кымöра.

Тöлiсьыс асыв кежас вылын эз ни тыдав, ештiс, натьтö, пуксьыны. Но омöн енöж пасьта анькытш моз койыштöм звездаэс куснытö эшö эзö на ештö, дзуз видзисö, видзöтчисö быд ладорсянь. То ли ойся ыркытсяняс, то ли перыта оськалöмыссянь ном-гебыс ме гöгöр эта кадö öддьöнсö эшö эз бергав.

Деревнясö, кöда сайын вöлi колана местаыс, да кытчö ме сыöддьöн тэрмаси, ордйи сы ылына, что ме локтöм вылö сэтчинсянь нельки öтiк пон эз тявкнит. А меным дзир этö и колiс — ог радейт поннэслiсь вувтöмсö. Боксянь видзöттöн, натьтö, нем эз видз думайтны, что муна сiдз кытчöкö гусясьöм могись.

Сюэз да межа вывсис ытшкытöм турун коласöт оськавтöн, öнi ме вевдöрсяняс ни сэтчöдз вадiси, что быдöс паськöмöс вывтсим кöть сэтöн жö чöвт да пидзрав. Но гажöтiс сiя, что кынымкö чулалöм лун коста ягöдавнытö öмидз кусттэс дынö кыдзкö эшö некин абу сибавлöм.

Кыдз перво жö и казялi — öктынытö вöлi мый. Сiйöн пидзрасьны да косьтiсьны ме эг ни понды, а лэдзи кисим му вылö доз да перво жö кутчиси öктiсьны.

Ась сэк кежö шондiыс кытчöдз и эз на пет, сё эшö гожумся ойыс эз вöв пемыт. Сэтчö жö югдынытö, эшö шондiыс вотöдз, пондöтчис ни и öктiсьнытö нем эз видз, тыдалiс.

А эта коста ордчöн, кырас пыдöсас, топ ловья, жагвыв пессис-вöрöтчис аслас непаськыт, но вель кузя нюжалöм тушаöн рудвевья да сьöкыт туман. Сiя топ мöдiс бергöтчыны кыминь нето гатш, но кернытö сымдасö прокыс, тыдалö, эз тырмы. Эта увья сiя дзир жагвыв то лэбталiс вывлань, то лэдзавлiс бöр ассис нагöлеч пасьтöм кикоксö да юр-кынöмсö. Эта вöрöтчöм сьöртi одзлань ни позис вежöртны, что вынсьöтчö кö сiя öнiсянь сiдз, сёрöнжык сё ни лэбтiсяс. Но öктiсьны меным туманыс кытчöдз тожö эз мешайт.

Лöзöттöдззас, кöр öмидзыс пондö мыччассьыны сьöлаягöдрöмаöн, а кустсö казявтöг сидзöтöмсянь пондö вотявны чуннез пыр увлань, кыдз ва, этна чулалöм луннэзöн сiя эшö и абу ештöм. Эз вöв ягöдыс и öддьöн гырисьöн, кытшöмöн вермас лоны бытшöма дозирайтöм коста садовöй öмидз. Но шуны сiйö поснитöн тожö бы вöлi грех. Öмидз кыдз öмидз, кытшöм сiя и вермас шогмыны ыб дорись бытшöм муа межа вылын. Быд ладорсянь сiя вöлi не только гöрд, но и небыт. И кöть кок увтö ваыс моз и эз на вотяв, быд тусёкыс заокыс бердiсь калькалiс кокнита.

Öктiсьнытö ме вöлись пондöтчи. Эшö и ведёрка пыдöсö бытшöма эз саясь. Но коддзöтанакодь чöскыт дуксö кылöмсянь сöдзис ни öмын дуль. А кöр эшö сувтöтi син одзö, мымда да кытшöм кöраö пуа ме сыись, öктöмсис ни, гортын вареннё, сöдзöм дульö этасянь öтпыр-мöдöтпыр вотьыштiс ни морос вылам.

Эстöн жö, öмидз куст коласас небурика вöрöтчытöн, ме вöлись и казялi, что ме гöгöр перыта пондiсö чукöртчыны номмез. Кыным одзлань, — нiя вöлiсö сё унажык да унажык. Быдыс ны коласiсь ас голосöн, нiя дзингисö дугдывтöг улын и вылын. Но номмесö, нельки лöзъюгытiнас позис не только кывны, но и казявны. Сiйöн, пуксьылiсö кö нiя кытчöкö син одзö, нiйö позис и вийны, и вашöтны.

Но öткоста номмес дзингöмкöт да курччасьöмкöт ме пондi кывны эшö и öтi-мöдiлаöт петшöралöм, кöда бöрсянь эта местаыс пондывлiс сотны-лудны сэтшöм вынöн, что терпитны, мед не гыжйыштны сэтшöм местасö, некытшöм вын эз судз. И петшöралöмыс эта, кыдз ме и казялi, и вежöртi, вöлi не сiя петшöрсянь, кöда быдмис морт сувдöн öмидз куст коласын, кöдö ме адззи синнам да кöда увья, кыдз верми, берегитчи. Петшöралöмыс эта вöлi геббезлöн. Этна пытш гырися да борда, а сiдзкö и лэбалiсь тваррезлöн оз кыв лэбавтöнняс некытшöм дзингöм. Сы увья да поснитыс увья нылiсь и сибöтчöм-пуксьöмсö казявны сьöкыт. И ась эта тварьыс и учöт, сэтшöм учöт, что эд нельки видзöтнытö нем вылö, но курччасьö сiя сэтшöм зубыта, кыдз не вöв, не пон, не медстрашнöй зверь оз курччась. Висьтавны веськытжыка, дак не сэтшöм зубыт сы курччöвтöмсянь, кыдз эта коста жö курччöвтöминас лэдзöм ядсянь. Эта ядсянь и пондö лудны курччöвтöм местаыс, терпитны кöдö оз судз некытшöм вын. Эта жö ядсянь сiя местаыс пондö эшö и пыктыны.

Дак вот. Киэзöс, чужöмöс, моросöс да голяöс петшöралöмыс этна поснитик да борда тваррез курччалöмсянь и кылiс. А пуксисö нiя ме вылö кывтöг да казявтöг. И мымда бы ме эг курит сьöрсьöн-бöрсьöн сьöрö босьтöм сигаретаэз, кыдз эг пöляв ас гöгöр курытся-курыт табак тшын, отсöтыс этасянь вöлi етша. Кытшöмкö кадö кöдöрсянькö нiя сё ни лякасисö-пуксисö ва паськöм вылö, а дыр мыйись котрасьöм бöртi инмывлiсö сайöвттöм местаö да сотiсö-заваритiсö то öтiклаöт, то мöдiклаöт.

Öтiк кепка, кöдö ме эта коста пуктылi юр вылам быднёж ни, кыдз только шедiс, этна тваррез увья тожö некыдз эз сайöвт. Неöтпырись ни усьлiсö тöдвылам и мазь да чышьян, кöднö ме вунöтi перво жö босьтны сьöрам. Но кынымись бы ме нiйö думанам эг касьтыв, этасянь некытшöм отсöт тожö эз вöв. Котöртны часöт ныла бöр гортöдз эз ни позь. Адззöм ягöдсö öктытöг эта увья он коль.

Мый вылö ме надейтчи перво жö, дак этö шондi вылö. Эд вермис кö эшö кин мездыны менö этна вирьюись зверрез шогья, дак дзир сiя аслас пым югöррезöн, кöдна не номлö, не геблö öддьöнсö оз гленитчö. Сiйöн час кыным сьöрна öктiсьöм коста, кöр литр кык мымда ягöдыс дозам вöлi öктöм ни, ме сё эшö видзчиси шондiлiсь мыччисьöм. Чулалöм кад сьöртi öнöдз сылö колiс бы петны ни. Но сiя, кыдз нарошно, сё эшö эз тыдав.

Эз кыв мылякö деревня ладорсянь и поннэзлöн вувтöм да подалöн баксöм. Эз руав некöдöрсянь некытшöм тöлок. Вöрöтчытöг, дзик кынмöмöсь, сулалiсö межа вылын ытшкытöм турун да ыб вылын сю. Но мый вöлi меддивуйтанаыс эшö этася, дак этö сiя, что кадыс сьöртi луныс кыдз бытьтö бы и пондöтчис ни, а ыб весьтын эз кыв ыбшаррезлöн питиртöм-сьылöм. Гöгöр сулалiс лöнь, сэтшöм полöтана лöнь, что öтiк номмез дугдывтöг бизгöмся быдöс гöгöр мыччассис ловтöмöн.

И кöр ме первуись öктiсьтöнням вöлиськö, веськöтi кос, лэбтыштi юрöс да видзöтчöв-кери ас гöгöр, сэк вöлись и казялi, что кырас пыдöсас неважын вöрöтчись туманыс öнöдз ештöм лэбтiсьны вöрысся вылынжыка ни да везтöм-вöтьöм ас пытшкас быдöс сiйö, мый сытöг позис казявны ас гöгöр ылiсь и матiсь. А вöлi сiя сук, кыдз парнöй йöв и öшалiс енöжсянь тшöтш му бердöдз. Эта увья öнi эз тыдав не только неылiсь деревняыс нето кырас сайись матiсьжык вöрыс, эз тыдав нельки ачыс кырас пыдöсыс.

Эстöн ме вежöртi, что сэтшöм погоддяö шондiыслiсь петöмсö видзчисьны нем. Настроеннё дзугсьыштiс. Но ягöдыс öктынытö кытчöдз вöлi, и мунны гортö простöн ме и öнi эшö эг тэрмась. Ме кольччи öктiсьны одзлань. А мый висьтассис ном-геб йылiсь — нiя менö сёйисö. И сысянь, кытшöм повтöма да нахальнöя нiя лякасисö не только киэз, морос да голя бердö, а пырисö веськыта и нырö, и öмö, и синö, и пельö, колö думайтны, что нiя менö и воть мымда эз жалейтö. Нельки нач мöднёж, ештiсö кö бы, то ли вермисö, нiя, тыдалö, готовöсь вöлiсö менö джагöтны, джагöтны сэтöн жö, межа дорись öмидз кусттэс коласын, лунся югыт коста. Эта увья ме медперво не сымда öктiси, мымда воюйтi этна вирьюись тваррезкöт. Но кöр атшавтöдз мыдзи эта воюйтöм-пессьöмсянь да сэтчö жö эшö вежöртi, что шондiыслiсь петöмсö видзчисьны нем, а дозö сё эшö тырттöм, сэк ме öвтыштi быдöс вылö кинам. Ась, мыся, сёйöны. Час кынымнас джагöтны да вильöтны коскаэзöдз сё ни оз ештö. А пондыны кö ныкöт тышкасьны-пессьыны одзлань, дак сы дорын и луныс чулалас, нельки дозöс бытшöмжыка тыртны ог ешты. Одзлань сiдз и вöлi. Ме тэрмаси-öктiси, а нiя менö вильöтiсö. Нiя менö пышналiсö, кыдз только вермисö, а ме тэрмаси-öктiси.

Но вот куимнан кустыс вылiсь (а межа дорас нiя дзир куим и вöлiсö) ягöдыс öктiссис. Сэк кежö менам и дозö тожö тырис. Вежöртана, что гагьясьны дырсö öмидз кусттэс гöгöр эта бöрсянь ме эг ни понды. Эшö öтпырись öзтi куритны, босьтi киам тыра доз да сiя жö туй кузя, кыт и локтi деревнясö ордйöмöн, иньдöтчи бöр гортö.

Колö висьтавны сэтöн жö, что кымöра погоддя увья öктiсьтöнняс вывсим люзь ва паськöмыс косьмынытö сiдз и эз ешты. Этасянь ме кынми гöжтöдз. А бöр петтöнняс одззамоз жö вились вадiси. Эта увья и чуннез кодьöнсö эз ни куснясьö, и коккез вöлiсö тувдöмöсь, нельки бытшöма эз и кывзiсьö.

И мед кöть невночка вермыны шонавны да не сетчыны ни сэсся, кыдз öктiсьтöнняс, виликтыны вирьюись ном-геблö, гортö локтöн ме тэрмаси эшö öддьöнжык, нежели асывнас, вöрас мунтöн. Жагвыв шоналiсö кикок, шоналi и ачым.

Гортö бертi мыдз да тшыг, но бертi сё жö не простöн. Ме локтiк кежö гортын некин эз лöсяв и этадз, натьтö, вöлi буржык.

Веранда пытшкын ни ме сувтöтi кисим скамья вылö тырöн вайöм доз, сэтöн жö кыскалi коксим резиновöй сапоггез да жагвыв кули-чöвтi вывсим люзь ва паськöм, кöдö и öнi эшö нем эз видз пидзравны.

Вöрсис берттöн, эшö туй вылас, ме кылi ни, что чужöм гöгöрлö топ мыйкö дзескöтö. Сiйöн öнi сибöтчи миссян доз дынö, мед мынöтны матег сорнас сы вылiсь нять-ньылöмсö. А кöр, кыдзкö казявтöг, дзар керыштi ас вылам паныт öшалан зеркалоö, повзьöмувья чуть и весьö эг пöр, пондi петитчыны бöр-бöр-бöр. А быдöс сысянь, что ме немöн ас вылам эг вачкись и ачым ачымöс зеркалосис эг тöд.

Пыкöса пеля, шваввез кодь öшалан синкыма, кöдна сайсянь öнi синнэзö кодьöн эз и тыдалö, öдöм тырппезсянь пиньöвтчöм öма, швавйöсь юра, чужöмбана да тшöкаа, ме былись вачкиси не ас вылам, а чожажык öбушитöм чурка вылö, кöда вылö видзöтöмсянь кыртiс спина бердiсь кучик, а юрси сувтiс кышöпöн. Веськытжыка висьтассяс сiдз, что сэтшöмыскöт, кытшöмöн ме вöлi талуння öмидзалöм бöрсянь, пантасьлынытö ас оланын кытчöдз эз на усьлы. Вот кыдз нiя менö, вирьюись геббес велöтiсö. Аскиння повзьöм-шардöм кузя неылын вöлi и синваэз дорöдз. И былись бы, натьтö, нытöг эз чулав, не уськöтны кö бы эта коста тöдвылö тыра доз, кöда сулалiс веранда пытшкись скамья вылын. А сы бердсянь öнi омöн веранда пасьта паськалiс сэтшöм тöдса, чöскыт да коддзöттöдз вына дук, кытшöм вермас лоны дзир вöрись öктöм öмидзсянь.

Вот эта бöрсянь вöлись и думайтö, чöскыт я ягöд, öмидз.