Глава II

Пемдандорас Юлий Пестеров петiс станцияись. Локны сыкöт эта лунö городöдз некин эз лöсяв, кабинаас пукалiс öтнас. Не öддьöн эшö важ «Урал» дзуртышалiс рессораэз вылын, вель ылына резiс öтмöдöрö колесоэз увтiсь кизерик нять, дзик гортлань тэрмасись вöв, перыта тарöвтчис тöдса туй кузя.

Жагöна ветлöмсö Пестеров эз радейт, терпитны эз вермы, кöр сiйö кинкö одзавлiс туй вылын. Этасянь тырöн ли простöн, сiя вексö тэрмöтiс.

Вот и талун... Кытчöдз локтiс гортлань джын туйколас — дас кыным автомашина одзалiс. Но öтiклаын зонка сорасис: умöль места ордйикö матööв кежöтiс канава дорас. Кöс погоддяö повны эстöн нем. Но öнi сулалiс зэра ар, канава дорыс вöлi нильыг. Автомашиналiсь бöрсö перыта чапкис бокö, öтiк колесоыс нильдiс канаваöдз, пондiс буксуйтны.

Пестеров петiс, солдатскöй бушлат карманiсь кыскис нöитчöм папироса, öзтiс куритны, видзöтчис. Быдсöн одзыс да öтiк бöрись колесоыс сулалiсö чорыт туй вылын.

Зонка бертiс кабинаö, заводитiс мотор. Но мымда бы сiя эз мырсьы, кыдз эз пондыв, а петкöтны автомашинасö туй вылас сiдз и эз вермы. Канаваö лэдзчисьöм колесо швылькйис-бергалiс öтiк местаын, кисель кодь нильыг да кизерик нятьын, гарйисис сё пыдынжыка. Медбöрын Пестеров вежöртiс, что отсöттöг нем оз пет. Лöгувья сiя эшö öтпырись вежис скорость, зэркыта, мымда вын, татшкис-нырыштiс кокнас газ педаль вылö. Передача коробкаын мыйкö пельдiс, пондiс ёркöтны, вынöн зэгöтны автомашинасö. Сэк вöлись зонка чапкис газ, горöн маттясьтöн, öвтыштiс кинас, пондiс видзчисьны.

Öтöрас эта коста сё зэрис. Зэр воттес вöлiсö сэтшöм поснитöсь, что пемдандорас син одзын нельки эз и тыдалö. Кылiс дзир, кыдз нiя, жагвыв кышöтöмöн, вартiсö кабина вевтöс кузя. Одзись стекло вылын поснит зэр воттес жагвыв чукöртчисö гырисьжыккезö, öтмöдöрö чуклясьтöн, ыскöвтiсö увлань. Ны пыр Пестеров гажтöма видзöтiс туй вылö, думайтiс. А дума сылöн вöлi öтiк: кыдз янсöтчыны эта лихорадкакöт — сiдз сiя шуис ассис автомашинасö — да вермыны пуксьыны виль вылö.

Уджалiс Пестеров не умöль автомашина вылын. Капиталка бöрсянь сувтöтöм мотор кыскис бытшöма. Эз полöт и ходовöй часть. А ёнакодь зыртчöм резинасö позис и вежны. Но автомашина сылö эз гленитчы сiйöн, что маркаыс вöлi важ. Гырись виль ЗИЛлэзкöт да «Ураллэзкöт» сiйö ордчöн он сувтöт.

Кынымкö автомашина мунiсö сувтчывтöг. Но öтiк виль ЗИЛ, бокöттяс шупыта швыркнитöмöн, одзалiс, сувтiс. Кылiс кабина ыбöсоклöн негорöн оссьöм-пöднассьöм. Чожа мый Пестеров дынö сибöтчис ён вывтыра, дзик айпöв ош, Лёнька Ратегов.

Этö мортсö Пестеров казялiс важын ни, дзир тöдсасьнытö сыкöт матöжык талунöдз кадыс эз петав. А тöдсасьнытö колiс. Öткö, Ратегов вöлi аскоддьöм, повтöм да гордöй мывкыда, мöдкö, автоколоннаись главнöй механиккöт сiя олiс кыдз вонкöт. И öнi, кöр сiя сувтiс Пестеров дынын, мöдыс эталö нельки гажмыштiс.

Сибöтчикас ни Ратегов горöтчис:

— Здорово. Мый нö ортсö ветлан?

— Да вот... Эг казяв тэрмасьтöнняс.

— Тэрмасян сё?

— Да овлö сымда-мымдаыс. Ог радейт гаг моз кыскасьнытö.

— Ме, кывзы, и ачым сiдз жö. Терпитны ог вермы, кöр быдкодь мукöдзылыс одзö пырö.

Эта дженытик басни коста Пестеров казялiс ни, что Ратегов юыштöм. Сiя жö одзлань юалiс:

— Эм, абу мыйкö куритнытö? Бырсисö менам туй вылас, — хлопкис-вачкис киэзнас простöй карманнэз кузя.

Пестеров перыта пыралiс бушлат карманö. Öзтiсö куритны.

— Но дак мый сулалан? Видзчисян, кöр пемдас?

— Коробкаыс, кылö, разьсис.

— Тю-у-у, — Ратегов гогинялыштiс юрнас. — Но, а тросыс кöть сьöрат эм, абу?

— Да эм кытöнкö умöлик.

Вына ЗИЛ нем туйö кыскис Пестеровлiсь канаваö сибдöм автомашинасö, иньдöтчис гортлань. Буксир вылын мунтöн видзны газ да вежлавны скоросттез эз ковсьы. Пестеров сымда и керис — бергöтышалiс öтмöдöрö руль да, ковсис кöр, нырыштышалiс тормознöй педаль вылö. «А бур сё жö виль машинаыс вылын уджавнытö: и шедтiсян буржыка, и боксянь унажык кыпалö».

Городас пыртöн, медодзза жö магазин дынын сувтiсö. Пестеров котрасис магазинöдз. Вайöтöмыс понда ковсис вештiсьны. Да и тöдсасьöмныс увья юыштнытö талун нем эз видз.

Гаражас ни сiя пырис да пуксис Ратегов кабинаö. Кык здоровöй зонкалö бутылкаыс эз и сидзав, но кыввезнысö пöрччалiс.

— Но дак кыдз?.. Дыр эшö думайтан эта телега вылын пилитны? Тöв эд сибалö, нерадсялан кöдзытiнас, — пондöтiс Ратегов.

Пестеров гогинялыштiс юрнас, паныт горöтчис:

— Тöда, Лёнька, что нерадсяла, да кысь буржыксö босьтан?

— Мыля кысь? Он разь тöд, что вильöсь локтöны?

— Тöда и сiйö. Но кин меным öнiсянь вильсö сетас? Ме жö вöлись месяц татöн уджала.

— Но и мый сыись, что месяц?

— А сiя и эм, что виллес вылö отирыс и метöг тырмö. Вон мымда гаражас пöрисьжык шофёррес.

— А мый тэ ны вылö видзöтан? Кинлö колö — ась видзчисьöны. Нiя, батi, век сьöрна пондасö видзчисьны, дак и тэ тожö?

— Но эд нысся одзжык меным виль машинасö сё ни оз сетö.

— Да но тэныт небаснисö баитнытö. Сетасö, колö дзир кужны корны. Вежöртан? — Ратегов дзарнитiс Пестеров вылö.

— Кыдз? — öзйыштöм синнэзöн Пестеров лякасис Ратегов бердö, кыдз велöтöм пон видзöтö аслас хозяин вылö да видзчисьö, мый тшöктасö керны чöскыт тор понда. Пестеров и былись вöлi готов кöть мый вылö, мед тöдны, кыдз позяс сюрны виль автомашина вылö. Сiя видзчисис кывны Ратеговсянь мыйкö сэтшöмö, мыйöдз ас ылöсöн и век он лок. А мöдыс горöтчис:

— Да сувтöт механикыслö литра вина и дöс сэтöн.

Пестеров мыйкö дырна думайтiс Ратеговыс кыввез вылын, öвтыштiс öтмöдöрö юрнас: «Нем оз пет».

Лукавöй биок югйöвтыштiс Ратегов синнэзын. Сiя вынöн тапкис-лэдзис ош лапа кодь кисö Пестеров пидзöс вылö.

— Споритам?

— Споритам!

— Ящик вылö?

— Шутитан эд, Лёнька?

— Сiдзкö, он верит? Мунам часöт жö. Тэ эшö менö он тöд. А вот кöр пыркнитан кармансит ящикыс вылö, сэк вöлись вежöртан.

Басниыс коласын öтдруг петiсö кабинаись, иньдöтчисö проходнöй ладорö. Диспетчерскöй дынын ёрттэз сувтiсö.

— Но, Юлька, сiдз и тöд — ящик вина талун тэнат горзö.

— Батi, тэнат да?

— Но этö ми часöт видзöтам. Мун пыр проходнöяс, видзчисьышт. Ме часöт Борисыс дынö кежала, — оськöв кыным бöртi Ратегов öшис арся пемытас, и дзир оськöввес — кирзовöй сапоггезöн нятьöт горöн шлёпкöтöмыс — мыйкö дырна эшö сибалiсö Пестеров пеллезöдз.

«Петас мыйкö или оз?». Пестеров и одзжык ни тöдлiс, что сiйö, мый шедтiссьö уна кадöн да бытшöм уджöн, мукöд коста нем оз видз небны деньга нето вина бутылка вылö. И ась сiя ачыс кернытö сымдасö кытчöдз и эз лысьт, адззисис ёрт, кöда отсалас. «Не сэтшöм уж Ратеговыс ылöстöм, мед нем пондаись споритны ящик вина вылö. Тöдö, натьтö, мый бердö кутчисьö. А вдруг машинаэсла талун ыстiсö ни, а ми сёрмим? Этöн думанас Пестеров оськöвтiс проходнöй будка ладорö, кошшис кималаснас ыбöс вуг, мышкыртчöмöн оськöвтiс порог сайö.

Сторож Петрован сулалiс пидзöссэс вылын осьта камин ыбöс одзын, жарöтчис. Пырисьыс вылö дзар кертöг, сiя кынымиськö ушкыштiс öзтöм сартассэз вылö. А кöр биыс ыждiс да кутiс нювны пессö, сэк вöлись Петрован жагвыв сувтiс.

— Уджассис бöра, шуан? — сторож кыскис кармансис ас кодьöм жö сальзьöм кисет, пондiс каттьыны куритны.

— Уджассис, Петрован дядь, — шыасис паныт Пестеров.

— Буксир вылын тай, видзöта вöлi да, гаражас пыртiсö.

— Сi-iдз. Разьсис бöра менам лихорадкаыс. Киссис.

— А вильсö кытчöдз он думайтлы вайöтнытö?

— Кысь сiйö, Петрован дядь, вильсö босьтан?

— Вежöртана кысь. Заводiсь, натьтö, кытöн керöны. Ме сiйöн горöтчи... Кывсьö, бытьтö виль автомашинаэзла лöсьöтчöны мунны, да и тэ, мыся, батi, ныкöт жö öтлаын.

— А эн кыв, кöр мунасö?

— Вот уж сымдасö, зонö, ог куж висьтавнытö. Кин баитö — ашын, а кин — бытьтö пö талун ни. Кежав, он дышöтчы дак, дзизпетчерыс дынö. Сiя уж тэныт, кыдз эм, висьталас.

Пестеров нильыштiс кок увтас биа папироса, петiс.

Диспетчерскöяс Михаил Потапович Пермяков, не öддьöн басниа, но лэчыт кыла, годдэза ни морт, Пестеровыс юасьöм вылö горöтчис:

— Ашын мунасö, Пестеров. А тэныт мый? Или эн на ешты локны уджавнытö да тожö виль автомашина йылiсь думайтан?

— Михаил Потапыч, да тi мый сымдасö баитат? Мыля жö бöра и локны эг ешты, месяц ни автоколоннаас уджала да?

— Стыдитчин бы, уджалiсь морт. Виль автомашинаэс вылö пуксьытöдз важжес вылын отирыс дас годöн мырсьöны.

«Кин сiя эстöн сэтшöмыс — велöтны менö кутiс?» — Горöн жö паныт диспетчерыслö Пестеров висьталiс:

— Ачым тöда, мый кернытö.

— Ог и шу, что он тöд. Керан я дзир сымдасö, мый тöдан? Öтiк öштöм гайка увья лунтырöн гаражас павьялан. Тожö меным керись адззисьöм.

Пестеров вежöртiс, мый йылiсь казьмöтiс диспетчер, паныт кывнас джöмдiс. Öтпырись сыкöт и былись вöлi сэтшöмыс.

Неделя кыкöн одзжык Пестеровлöн чегис рессора. Гаражас зонка бертiс костi, но сiя жö лунö рессорасö дорöтны эз вермы. Вöлi сiя лöсьöтöм вöлись ашынас, павжун кежö. Но сэктöдз Пестеров ештiс юыштны и сiя лунö рейсас эз ни петав. Горöтчыны паныт диспетчерыс кыввез вылö öнi вöлi нем. Пестеров öвтыштiс кинас, дзугсьöмкодь настроеннёöн, видчытöн петiс бöр.

— Тожö меным начальство адззисьöм. Пукав бы тöд, шедöм шонытiнас дак. А не вот. Кытчö колö и оз пон юрсö сюйö.

— Кинкöт тэ сiдз? — кылiс Ратеговлöн шыасьöм.

— Да-а, диспетчерыскöт часöт баитiм. Юалi тай, кöр виль автомашинаэсла ыстыны пондасö.

— Тьфу тэнö! Адззöмыт тожö кинкöт баитны. Пестеров сибöтчис Ратегов дынö да мöдiс ни юавны:

«А кыдз тэнат сэтчин?» Но аскадö казялiс, что мöдыс не öтнас: ордчöн Ратеговкöт сулалiс автоколоннаись механик, Борис Васильевич.

— Дак кöдöрö иньдöтчам? — юалiс Ратегов и этöн юалöмнас ни сетiс вежöртны, что керöм быдöс сiдз, кыдз колö.

— Эх, Лёнька! Да вöлi бы мый понда! А муннытö адззисяс кытчö. Од дышöтчö — кежалам миянöдз. Неылын эстöн.