Зверрез тшакьялiсь ур

Унаись ни усьлiс меным и лыддьöтны, и кывлыны отир басниись, бытьтö бы ур радейтö косьтыны тöв кежö аслыс тшак. И гижöны, и баитöны эта йылiсь тырмöмви, а кыдз сiя керö этö былись, висьтавны бытшöмжыка некин оз вермы. Косьтö — да. Эталö ме тожö верита. Неöтпырись ни векöс овтöн ас синöн адззылi, кыдз лэбтöмöсь куим-нёль метр сувдöн му бердсянь, öшалöны кöз уввез коласын тшаккез. Сiдзкö, не гижись, не висьтасись отир озö бöбöтчö — пу уввез коласын öшалан тшаккез — урлöн уджыс и эм. Но кыдз сiя нiйö лэбталö да öшлö? — вот кытöн вопросыс. Эд видзöтны кö кытшöмкö картинка вылiсь, дак художниккез рисуйтöны, кыдз сiя видзö öм одзас одзись лапкаэзнас сюрöм кыськö голи, то ли орех. Сiйö жö картинасö позьö пантавны и быльнöй оланiсь. Этасянь позьö думайтны, что и тшаксö сiя, пу вылас чывтöн, видзö тожö одзись лапкаэзнас. Но... Эстöн недыр и сорасьны. А сэтчö жö быдöс я сiя сёйö нiйö тшаккесö, кöдна быдмöны миян вöррезын? Или вежöртö ныын кытшöмкö толк да косьтö дзир медбытшöммесö? Тожö эд вот, думайтны пондыны дак, интереснöй вопрос.

Мöсгобыс, или кыдз сiйö шуöны эшö миян отир коласын — чочком гоб или чочком гриб — миян местаэзын тожö пантасьлö. Но быдмö сiя не быдлаын и быд вöрсис он пантав. Лажмытiнын да кыдз-пипуа вöр коласын мöсгоб лоны оз вермы. Абу сiя и пожумника кöс ягын. Петö — мöсгоб частожыксö позьö пантавны куш кöзъя везöлын да сэтчö жö эшö вылын да кöс местаэзын, кытöн пуэз увтын муыс вевттьöм не кузь нитшöн, а кöс да кыз лысöн, кöда местын нельки туруныс кодьöн оз петав. Сэтшöм местаö ме öтпыр гожумнас и иньдöтчи тшакла. Охота вöлi кöть öтпырись öктыны сiйö, мый лыддиссьö медбурöн.

Колана местаын ме кежи туй вылiсь и недыр мыйись сюри гырись да тшöк кöзъя везöлö. Кок увтын, пуэс коласын, öтiк важ лысся сэсся нем эз вöв: эз быдмы некытшöм турун. А кыза кисьтöм лыс увья муыс мыччассис небытöн, кыдз нитш.

Недыр мыйись пондiсö пантасьны öтiк бöрсянь мöдiк и колана тшаккез. Вöлiсö мöсгоббес и гырисьöсь, и поснитöсь, сiсьöсь и ёнöсь. Мукöдыс ны коласiсь сэтчöдз ни ештöмась сiсьмыны-лёпсьыны, что ас выланыс öддьöнсö нельки эз и вачкисьö. И сё жö öктынытö меным адззисис мый. А сiдз кыдз ме вöлi öтнам, то и тэрмасьнытö öддьöнсö эз ковсьы: одзсим тшаксö некин эз öкты. Ме жагвыв кежласи лапья кöззэз коласöт то öтöрö, то мöдöрö, бöрйи быдöнныс коласiсь поснитжык да ёнжык мöсгоббез, кöдна гленитчисö — тэчи дозам. А öктiсьтöнняс öтiклаын казялi, кыдз кинкö перкйышалöм гоб юрресö. Сантиметр кык ылына öтамöд дынсянь бель видзисö кык неыджыт гöпок. Медперво думайтсис лёль вылö. Эта тварьыс мукöд коста сiдз вель уна тшыкöтö кодя тшак. Но мöсгоб юр вылын пелялöм местаэс лёльыс гöгрöса да волькыта йирöм вылö некыдз эз вачкисьö. Сiдз позис керны дзир кытшöмкö чорыт, йыла да лэчыт торöн. Сэтчö жö, кöр ме босьтi киам сiдз пелялöм мöсгоб да пондi видзöтны матiсяньжык, казялi эшö и сiйö, что пелялöмыс вачкисис пинь туй вылö, а резец кодь йыла да лэчыт пиннес тöдчисö ордчöн кыка. Сэк ни вежöртi, что эта уджыс не лёльлöн, а кытшöмкö грызунлöн. А кытшöмлöн вот? Эд ыбас-вöрас нiя тыр: кöчыс и ёжыс, мушырыс и чужмöрыс. Вот и пондыв эстöн тöдны, кин ны коласiсь пиннезнас сiдз тшакыс бердö кутчисьлiсь, кöр аслат синöн эн адззыв.

Кытчöдз ме думайтi эта йылiсь, пиньтуя мöсгоббес ме гöгöр пантасисö эшö и мöдiк, и куимöт, а сэсся эшö да эшö. Пиньтуялöмöсь вöлiсö не медпöрись да медгырись тшаккес и не медтоммес да медпосниттэс, кöдна сэк кежö вöлись мыччисисö лыс колассис, а нiя жö ёнжыккес да шöрöт ыждаэс, кöднö öктi и ме аслам корзинаö. Колö висьтавны эшö и сiйö, что уджсö этö керис кинкö нач ме одзын да топ нарошно. Кыдз пиньтуй местаэс, сiдз и пелялöм тороккес, кöдна вöлiсö колялöмöсь сэтöн жö, мöсгоббес гöгöр, тыдалiсö нач öнняöсь. «Вот эд, мыся, дивоыс кытöн. Эта мымда тшак петалöм, а öктыны дзоньнас оз сетö. Сiдз и доз он ешты тыртны, кинкö быдöс одзсим тшаксö тшыкöтас». Небасöк сё жö дозас пиньтуясö тэчны, кöр позис бы эта местö нач дзоньсö, вöрöттöмсö öктыны.

Ештi ме дзир думайтны этö думасö, кыдз сэтöн жö мыччассис, что кöззэс коласöт одзам топ кинкö вуджöртчис. Веськöтчыштi, сувтi, сулала сiдз вöрöтчытöг, видзчися, мый одзлань лоас. А сэтöн вот сiя, урыс, кыдз тшынок, одзам, кöззэс сайын, петалöм мöсгоббес коласын öтмöдöрö чепсасьö. И сэтшöм эд сiя этö лöня да перыта керö, что сiйö и видзöт — син вывсит öштан. Чепöссяс сiдз öтiк мöсгоб дынö, «цоп» пиннезнас кутыштас, мöдiк дынö — «цоп». «Видзöт тэ, — думайта ме, — кыдз эд пожар вылö тэрмасьö. Эта сьöрö, кыдз баитсьö, и пара вöлöн он вöтчы». И бöрйисьö эшö мыйкö. Тшыкöтö-пиньтуялö тшаккесö, а босьтнытö быдсöн оз босьт. Эшö тшак да не тшак сылö. А мый вылö бы сiдз?

Но кытчöдз ме гусьöн, чöлöмöн да вöрöтчытöг сулавтöн дивуйтчи-нёджжаси сы удж сьöрын, öтiк мöсгоб урокыслö пиннес коласö сё жö шедiс. Эг ешты ме и синöн кваркыштны, кыдз сiя вöлi пу вылын ни. Сё жö ме бытшöма ештi казявны, что мöсгобсö сiя видзис пиннезнас. Сiдз урок чылыштiс кöзыс кузя куим-нёль метр сувдöн, эстöн вöлись сувтiс. Мыдзыштiс, тыдалö, сы сьöкыта ношасö вывлань лэбтыны.

Эта коста оськöв кыным ылына ме оськöвтi матöжык, мед бытшöмжыка адззывны, кыдз да мый урок пондас керны одзлань. Пиннес коласö кутöм мöсгоб сайсянь, кöда вöлi тупöсь пасьтышта, сылöн тыдалiсö дзир дробина гырисьышта сьöд синнэс. Эстöн вöлись и сiя менö тожö казялiс и, паймыштöм эта видзчисьтöм пантасьöмсянь, дзик гусясьтöн кутöм гусясись, дивуйтчöмöн да недырик видзöтыштiс ме вылö, бытьтö юалiс: а тэ пö эшö кысь сэтчö локтiн? Кин тэнö ме вöрö да ме тшаккез дорö корис? Но кыссис эта дивуйтчана тöдсасьöмыс нач дженыта. Кынымкö секунда бöртi ни урок чывкнитiс-бергöтчис мелань мышкнас, мöсгобнас пиннес коласын, чувизнитiс-вуджис мöдiк, а сэсся куимöт ув вылö, сайöвтчис ме син шогья пу саяс. «Но ачыт тöдан. Дзебсисин и дзебсись, сё ни ме тэнчит уджтö адззылi», — думайтi ме ас кежам да мöдi ни вöлi оськöвтны одзлань аслам туй кузя. Эта коста син вылам усис эшö öтiк тор. Матöжык мелань кöз ув вылын сэк кежö öшалiс ни öтiк, неважын лэбтöм мöсгоб. «Одзасян, сiдзкö? Но одзась, одзась. Öкта вот часöт быдöс мöсгоббетö, дак сэк вöлись пондан герьявны», — грöзитыштi ме думанам боёк тшакьялiсьлö.

Медодз ме сибöтчи пиньтуялöм мöсгоббез дынö. Босьтi ны коласiсь кынымöкö киам, пондi видзöтны. Тшаккес вöлiсö ёнöсь. И дзир сы сьöртi, кытшöм бытшöма нiя видзсисö коккезнаныс му бердас, меным быдöс лоис вежöртана. Эд мед нетшкöвтны мöсгобсö аслас вуж бердiсь, эта вылö колiс унакодь вын нельки мортлö. И мед янсöтны сiйö кокнитжыка вужыс бердiсь, медодз колö пиньлалыштны тшаксö öтмöдöрö. Эта бöрсянь сiя пыр шедö кокнитжыка. Но керны сымдасö тшакьялiсь урок, вежöртана, эз вермы. Пиньлалыштны öтмöдöрö мöсгобсö кок вылас сылöн ылöсыс эз тырмы, а шедтыны сiйö сiдз, вужыс бердiсь янсöттöг — выныс эз судз. А поснит да лэчыт пиннезöн вевдöрсянь кутыштöмсянь мöсгобыс, вежöртана, шедны вужжес вылiсь эз вермы, пиннезöн кутыштöмыс орис, торьясис. Вот урок и пелялiс нiйö сiдз öтiк бöрсянь мöдiкö, кытчöдз эз сюр ны коласын кöть öтiк сэтшöм, кöда кокнитжыка бы шедiс вужжес бердiсь. И сюрлiс кö быдöн коласiсь кöть öтiк сэтшöмыс, кöда кокнита янсалiс вуж бердiсь, эта вöлi уроклöн счастье.

Пантасьöмным кежö менам корзинаö пондiс тырны ни. Эта увья сiя кöз увтiсь, кытöн тшакьялiс урок, быдöс мöсгоббесö ме öктыны эг и понды. Кык-куимö ме дзир вöрöтыштi асланыс местаын, мед нiйö кокнитжык вöлi босьтны, да сiдз и коли.

Ог тöд, вежöртiс эз тшакьялiсь урок менчим отсöтсö. Видзчисьны, кöр сiя вились лэдзчас кöз вылiсь тшакьявны, ме эг ни понды, иньдöтчи аслам туй кузя гортлань. Эз усьлы вöвны сiя местаын и мöдöтпырись. Но сэксянь ме пондi тöдны медколанасö — кыдз тшакьялö ур.