Глава XV

Рытъявылас, кöр тöдчöмöн нюжалiс пу-турунлöн вуджöр, а шондi югöррезлöн луншöрся калитöмыс ныжмис ни, öт киас куим литр тöрик тыра бидонöн, мöдас — сумкаын тшакöн, Таисья котöрöн чулалiс бöрья ыб, петiс деревня увтö. Мунны тырдозöн веськыта деревня кузя, отир син одзöт нывка эз ни понды, кежис деревня увтö, йöррес пöлöн кытшöвтöмöн сибöтчис асланыс карчйöр весьтö. Сэтöн, вевдöрись межа дорас, Таисья панталiс мамсö. Вартлытöмсянь ныж, сiмöм дорыша литовкаöн Дарья Семёновна ытшкис межаэз вылiсь турун.

Пымалöм да мыдз нывка вуджöтiс йöр омöн сумка да бидон, но пырны перво жö керкуас эз понды, сувтöтiс тыра доззэсö ытшкöм межа вылö, мынöтiс голя бердсис чышьян, сiйöн жö чышкыштiс чужöм пасьта визывтан ньылöмсö.

— Ытшкисян, мама?

— Кокала тай то, — нылыслань дзар кертöг шыасис Дарья Семёновна, кынымиськö дженытика, былись бытьтö кокыштiс, öвтыштiс майöггез бердöт кольччöм турун тылöппез кузя, и вöлись сэк, кöр ытшкыштöмöсь, нiя жагвыв водiсö кок увтас, öшöтiс литовкасö вевдöрись йöрпотш вылö, бергöтчис, иньдöтчис паныт.

— Немись нем сэрпöсь литовкаыс оз бось.

— Вартлыны колö, оз босьт дак.

— Колö, да кин öшö сiйö миянлö вартлас, ачым ог куж дак. — Матын Таисья дынын мамыс сувтiс, казялiс одзсис сумка да бидон.

— Кутшöм нö öшö битон сьöрат вайин, эн босьлы топ гортсянь да?

— Неби тай, хозяйственнöйö пыралi да.

— И сiйö эд, батя, гортiсь лавкаö оз вермö вайнытö. — Дарья Семёновна кутыштiс бидонсö вуг бердöт. — Да тыра тай нö, кылö? — лэбтыштiс вевт, дзар керыштiс пытшкас. — Мак-мак-мак, гöрд ягöд абу я сымда öктöмыт? Кысь нö тэ сэтшöм басöксö адззин? И гöрдöтны ни, видзöт жö, ештöм.

— Трасса дорсис тай, шондi морос вывсис. Некин абу инмылöм да.

— Чож инö. — Босьтны видзöтöм могись тыра бидонсö киас Дарья Семёновна эз ни понды, чапкис öмас кынымкö ягöдтусь, лэдзис вевтсö бöр аслас местаö, веськöтчис, нёджжöвтыштiс нылыс ладорö. — Да мый нö школаат висьталiсö? Мыйлö корлöмöсь?

Тöдiс эд Таисья, одзлань ни тöдiс, что эта йылiсь юасьтöг оз чулав. Сы йылiсь баитнытö нывка шуч туй лöсьöтчис. Но вот колана басниыс пондöтчис. И сы местö, мед повтöг да веськыта юöртны быдöс, кыдз эм, сiя паймыштiс, кыдз да кытшöм кыввезöн видзны мамыслö ответ, эз тöд. А быдöс сысянь, что полiс откажитöмись. Сiя жö полöмсянь мышкыртöм юра нывка вештыштiс кинас синнэс весьтö лэдзчисьыштöм юрсисö, усьöм кодь голосöн дыр мыйись юöртiс:

— Мыйлö разь?.. Велöтчыны тшöктöны мунны.

Таисья видзчисис, что мамыс часöт жö сувтас поперег, лэбтiсяс видчыны да кöритны дас год сьöрна велöтчöм вылö öштöм кадöн. Нывка мышкыртiс юрсö эшö лажмытжыка, вежöртiс — лэдзны сы дырна кежö гортiсь öтiк отсасисьöс öткаса да нездоровöй мамыслö ох, кытшöм некокнит. Но не видчöмöн, не кыдзкö мöднёж нуöтны одзлань пондöтöм баснисö, Дарья Семёновна эз тэрмась. Мыйкö вылö сiя вуджöтiс бöрлань киэсö, нылыс моз жö аслас кок увтö видзöттöн горбыльтчыштiс, думайтöв-керис ас кежас, гажтöма ловзисис, дзескыта горöтчис:

— Мун... мунан дак...

Некытшöм лöг, кöдö Таисья видзчисис, этна горöтчöм кыввезын кыдз бытьтö и эз кыв. Нывка гажмыштiс.

— Былись, мама? Лэдзан менö институтас? — эз вермы видзсьыны да юалiс Таисья, мед только веритны мамыс кыввезлö. Сiя готов вöлi уськöтчыны сы дынö, учöтик моз öшöтчыны голя бердас да кутчыны окавны. Но эшö эта вотöдз ассис юалöмсö ковсис жалейтны. Тöдöмöн бы, дак юавны сымдасö абу и колöм. Буржык вöлöм чöвны.

— Мый нö öшö тэныт кернытö, абу кö прокыт пермаас уджалны?

Вöлi бы эта былись сiдз, некытшöм обида, батi, эз бы кут. Сiйö позис бы бергöтны шуткаö, не примитны сэтшöм матö сьöлöм бердö. Не öддьöн гордöй морт, натьтö, сiдз бы и керис. Но этна кыввезсянь, дзик поткöтчан нöшöн вачкöмсянь, Таисья син одзын пемдiс. Минута кежö вовлöм гажись öнi и след некытшöм эз кольччы. Пондöтöм басни йылiсь, кöда кежö нывка сыбурна лöсьöтчис шуч туй, кöда вылö надейтчис, кыдз быльö пöртöм мечта вылö, öнi сiя думайтiс: «Абу, дак абу. Сэтшöмыс медöк и вöв».

Ассис уджсö, кернытö кöдö Таисья вöлись пондöтчис, медодзза лунсянь старайтчис керны сiдз, кыдз только кужис да вермис, не вын, не кад эта вылö эз жалейт и куканнесö тшыгйöн эз видз. Öнi, мамыс одзын дорйисьöм могись, эта йылiсь бы горöтчыны и колiс. Но горöтчы нывка сымдасö былись, одзлань ни тöдiс, мамыс паныт висьталас: «Бура-бытшöма уджалiссесö пермасис оз вашöтлö». Таисья шыасьтöг босьтiс кок увтсис бидон да сумка, сöдзöм синваэс пыр умöля адззытöн, иньдöтчис бороздаöт керку ладорö.

Сёрöнжык, вывсö вежöм бöрсянь, нывка кайöтлiс öшымöсiсь ва, чукöртiс сьöд паськöм — лöсьöтiс асыв кежö песласьны.

Ужин коста пызан саяс мама-ныла пукалiсö чöлöмöн, дзик быдöс йылiсь ны коласын вöлi важын ни баитöм и горöтчыны öтамöдлö вöлi нем. Не клубö, не мöдiклаö кытчö абутöм кодь настроеннёöн эз кыскы. Но и керкуас лолавнытö вöлi немöн. Таисья петiс карчйöрö, кытчöдз тыдалiс, пондiс весöтны капуста гряддэз. Эта удж сайын сiйö зоотехникыс и застанитiс.

— Тэ гортын ни? — сибöтчис зэв йöр бердöдз, нырыштчыштiс гырдззаэзын кусiньтöм киэзöн вевдöрись йöрпотш вылö да гажвевйöн горöтчис сiя. Но талун и зоотехниккöт пантасьöмыс нем бурсö эз кöсйы. Светланаыс шыасьöмсянь нывка дзик кынмис местаас, кыдз горöтчыны паныт кыв, эз тöд. «Быдöс талун öтiк юр вылö, да ась ни...» Жагвыв веськöтчис гряддэс коласын.

— Локтi тай неважын, — негорöн шыасис Таисья синнэсö лэбтывтöг. — Видзчисьыштö недырик, ме чожа... — зыртыштiс öтамöд бердö муöсь киэсö, котöрöн уськöтчис керкуö, чожа петiс бöр, сибöтчис зоотехник весьтöдз, нюжöтiс йöр омöн сылiсь письмо.

— Эта мый? — дивуйтчыштiс Светлана.

— Письмоныт тiян. Ме сiйö бöр вайи, эг вермы сетнытö да.

— Мыля, Таисья? Эз я мый я вöв гортын Аркадий Николаевичыс?

— Да не, Светлана Савельевна. Вöлi сiя павжун бöрсяняс, но... кыдз сэтöн висьтавнытö... Ме сiйö лыддьöтi, кыдз асьныт тшöктiт, и... вежöртi, что эта норасьöмыс öнi нем оз ни сет. Тi жö сэтчин быдöс дзир ме йылiсь гижöмöсь.

— Кин йылiсь нö эшö колiс?

— А кулöм куканнес йылiсь, вердчантöм нуждаыс йылiсь, строиттöм картаыс йылiсь. Быдöс йылiсь, мый меным асьныт висьтасит. А сы йылiсь эд эстöн нем и нем абу висьталöм.

— Таисья! Да вежöртан, — эг ешты ме öтiк ойнас сымдасö. Эг ешты и эг лысьт. Мыйлö ме тэныт и горöтчи, мед ассянят, мый колö, содтiн. Не весь жö ме тэныт быдöс йылiсь юöртi, не весь надейтчи.

— Сiдз, батi. Да мыйлö меным öнi сiйö, кöр предыс фермасис откажитiс да уджавнытö сэсся ог думайт? Школасяняс менö велöтчыны тшöктöны мунны. — Нывка эшö осьтлiс öмсö, мед зоотехник одзын дорйисьöм могись юöртны быдöс йылiсь, мый сiя лöсьöтчö керны одзлань. Но сы удж да фермасис вашöтöм йылiсь мамыслöн неважся горöтчöм кыввес, кöдна эта вотöдз и садясьны эшö бытшöма эз сетö, сорисö-панiсö сы юрын быдöс одззася думаэсö да öштiсö сiйö ладсис.

Светлана жö öнi вöлись вежöртiс, что уджалiсьыс, кöда вылö сiя надейтчис, кыдз некин вылö, надейтчис нельки öддьöнжык, ежели вермис надейтчыны ас вылас, сiя уджалiсьыс эз ло. Зоотехник тöдiс, что примитöм решеннё бöрсянь (а одзланься велöтчöм йылiсь юöрыс сы вылö и вачкисис) бергöтны Таисьяöс бöр некытшöм вын оз ни судз. Весь аслас кыввезöн нывка эз чапкась, и öтiкö висьталöм бöрсянь видзчисьны мöдiкö сысянь эз позь. «Но мый жö сэк?.. Сiдз, дак сiдз». Этö позис бы, натьтö, и горöтчыны, но зоотехник дзир думайтiс. Чöлöмыс öтамöд коласын кыссис дыр. Горöтчыны некöдыслö кыдз бытьтö нем эз адззись. Бöртiжык Светлана, шыасьтöг жö, жагвыв вöлi оськöвтiс ни, мед мунны. Но думаыс, что быдöс бертö бöр важ местö, кыдз вöвлi год, и дас, и кыкдас сьöрна, кöдасянь кыркöтiс вывтыр пасьта кучик, сiя думаыс оськöвтнытö одзлань эз сет, видзис.

— Кывзы жö, Таисья. Тэ ачыт кöть вежöртан, мый керин?

— Но эд, висьталi жö ме тiянлö, Светлана Савельевна, что быдöс сэтчин гижöм дзир ме йылiсь, а уджавнытö фермаас... — и вились пондöтöм баснисö висьтавны быдсöн нывка эз вермы, джöмдiс, лöньсис. Сы коста жö сылö тöдвылас усис эшö и сiя, мый сувтöтiс сэтчин, райком порог одзас, но мый öнöдз зоотехникыслö эз вöв висьталöм. А шогмис то кыдз. Павжун бöрсянь, кöр лыддьöтöм письмонас Таисья пукалiс райкомö пыранiн дынын, сы дынö сибöтчис сiя коричневöй платьеа секретарь-машинисткаыс, кöдакöт нывка баитiс асывнас.

— Мый нö видзчисян, он пыр? Локтiс ни эд Аркадий Николаевичыс. Чожа сылöн заседаннё пондöтчас. Бöра эд некöр лоас.

Таисья сувтiс, оськöвтiс инькаыс сьöрö. Но эстöн тöдвылас усис гортiсь партийнöй секретарькöт неважынся пантасьлöм, кöр сылö, кыдз корисьлö, ковсис висьтасьны аслас мог йылiсь решётка кодь стын пыр, а некытшöм отсöт эта норасьöм бöрсянь и воть мымда эз ло. Сэкся жö состояннёыс, кытшöмöн Таисья немтöг мунiс бöр стын дынсянь, öнi кутiс сiйö виль вынöн, дзик кынтiс местаас. Нывка сьöвзис, бергöтчис, сюйыштiс бöр аслас сумкаö зоотехниклiсь письмо, сiйöн сорöн иньдöтчис гортö.

Öнi эта йылiсь позис бы и висьтавны. Но Таисья полiс сыись, что зоотехник эталö оз верит. А кöть бы и веритiс, дак этасянь нем оз ни вежсьы.

— Ась, шуам, и сiдз, — пондöтiс одзлань зоотехник Таисьялiсь кончиттöм баснисö. — Ась тэ он понды сэсся фермаас уджавны. Но эд эта бöрсянь сiйö он пöднав. Он ло эстöн тэ, а подаыс, куканнес кольччасö. Сiдзкö, тэ местö ковсяс кинöскö мöдiкöс сувтöтны. Дак неужто тэ этна куканнез йылiсь, эта морт йылiсь, кöда тэ местö локтас, эн думайт, кöр сюйыштiн письмосö бöр аслат сумкаö?

«А былись эд, былись. Кыдз жö сiдз? Эта мымда ны увья песси да», — дзик саймис да паймыштiс эта вежöртöмсянь Таисья.

— Эд гижи кö ме эта йылiсь райкомас... — баитiс одзлань зоотехник, — ...дак не только тэнö öтнастö да тэнчит уджтö, но и примитöм решеннёсö, и куканнесö...

— Вежöртi, Светлана Савельевна, быдöс вежöртi, — падмöтiс Таисья зоотехниклiсь баснисö, кыкнан кинас кутчисис юр бердас. — Мыля нö ме эта йылiсь эг думайт? Мыля эг вежöрт? Мыля?..

Аслас кыввезын зоотехник эз сорась, вежöртiс, что Таисья ылöсöдз нiя йиджисö. Эта сiйö невночка ловзьöтiс. Мыйкö дырна чöлыштöм бöртi, мед петкöтны Таисьяöс недолыт состояннёись, юалiс:

— Мамыт, забыль, эз на ошшась, кыдз талун ме бердö правленнёас тышкасьнытö кутчисьлiс?

— Тi мый сымдасö, Светлана Савельевна, баитат? — Таисья лэдзис киэсö, дивуйтчöмсяняс ыждöм синнэзöн видзöтöв-керис зоотехник вылö. — Мамö? Тiян бердö? Сiя мый, йöймис я мый я?

А кöр зоотехник юöртiс, кыдз да мыйсянь быдöс пондöтчис, Таисья гажтöма гогинялыштiс юрнас, сэтшöм жö гажтöма висьталiс:

— Буржыксö сысянь и видзчисьны нем. Öнöдз ме сiйö вежöртi ни. Сiя миян правленчикöт öткодь.

Эта вылын куканьвöдитiсь да зоотехник коласын басниыс жагвыв лöсямис. И мед сорасьтöг тöдны, мый думайтö Таисья одзлань кежö, обидатöг ни Светлана эшö öтпыр юалiс:

— Но дак висьтав, Таисья, бытшöмжыка, мунан-он одзлань велöтчынытö? Баитан, что школасяняс велöтчыны тшöктöны, а кыдз да мый ачыт думайтан, баснисит сiдз бытшöмика и эг вежöрт.

Морос тырйöн да гажтöма Таисья ловзисис ыш, мышкыртöм юрöн мыйкö дырна думайтiкас чöлiс.

— Нач ме ладсис öши, ог и тöд, мый пондыны одзлань керны. Школасяняс велöтчыны тшöктöны. Ачым сiйö жö думайта — колö. И не мамö бы, дак нем вылö бы эг видзöт, талун жö бы мунi, но...

— Сiя мый, оз лэдз?

— Кыдз сэтöн висьтавны... Лэдзö, но сiдз, что сэтшöм лэдзöм бöрсянь муннытö некытшöм охота абу. Сэтшöм лэдзöмыс вöв кöть эн: мун пö, абу кö пö прокыт фермаас уджавны.

— Этö сiя тэ йылiсь сiдз? — дивуйтчыштiс зоотехник. — Сiйöн, натьтö, мед только не лэдзны. Но вöв бы менам тэ кодьöсь быдöнныс фермаэзас уджалiссес, дак некытшöм тоска-печаль бы эг тöд. Эстöн ме тэныт, Таисья, и советуйтны нем ог лысьт. Висьтала только, что мунан кö тэ бöр куканнес дынiсь, дак и меным некытшöм надея одзлань оз кольччы. Не буржык подакокувтсö, не ой кежас турунсö, немись нем сэсся куканнес оз адззылö.

— Мыля жö бöра, эм ни öнi подакокувтыс да?

— А тэ тöдан жö, он, мый талун сэтчин керсьö? Ме тэныт эшö сы йылiсь эг на висьтась. Ветлам, видзöтам, он дышöтчы дак?..

Думайтiкö «Колö я эшö сымдасö?» Таисья жагвыв вуджис йöр омöн, жагвыв ордчöн оськавтöн иньдöтчисö деревня сайö. Басниыс коласын нывкаэз сибöтчисö подакокувт бердöдз. Эстöн зоотехник тшöканас качыкнитöмöн мыччалiс йöр мöдöрас.

— Видзöт вот бригадирыс удж вылö, мый сылö талун юрас пырис.

Таисья чöлöмöн видзöтöв-керис литовкаэзöн ытшкöм подакокувт вылö, гажтöма гогинялыштiс юрнас:

— Дак неужто сылö нельки эта бöрсянь некытшöм управа оз адззись?

— А кытшöм управа, Таисья, кöр нiя предыскöт öтвыв керöны? — Дзир эд эта увья ни, Таисья, эта увья ме надейтчи тэ вылö, кыдз ен вылö, что пыртан райкомас письмосö. А öнi мый? Эд кытчöдз сiя мунас почтанас — мунас кö эшö, да кытчöдз локтасö сэтчинсянь отсöтнас, дак сэк кежö подакокувтсиным и след некытшöм оз кольччы. Эд кутчис кö бригадирыс кышсис петны, да эз кö сiйö аскадö некин падмöт, дак эн надейтчы, что эта вылын сувтас. Думайт вот ачыт, мый ми эстöн сыкöт керам? Отирлö наряд сетам, а тышкасьны ныкöт быдöнныскöт он понды. Ытшкöмыс бöрсянь öтаваыс и лэбтiсяс. Но эд не öтiк лунöн. Вот и ковсяс вились тшыг куканнезнымöс пичиктöм пар йöрас новйöтны.

Таисья паныт эз шыась. Сiя вежöртiс — кыдз зоотехникыс баитö, сiдз быдöс и эм. Но мед не вайöтны эта неколанаöдз, колiс не баитны — баитöмнас эстöн он отсав, а мыйкö керны.

— Ме тэныт, Таисья, некöр ог висьтав, что велöтчынытö оз ков. Но колян кö тэ сэтшöм бытшöма пондöтöм удж, проститан я, верман я кöркö аслыт сымдасö проститны?

Ас кежас Таисья öнi думайтiс сiйö жö, но ответыс эта вопрос вылö кытчöдз эз вöв. Сiйöн зоотехниклöн юасьöмыс сы ылöсöдз кыдзкö эз сибав. Но эта местö нывка тöдiс, кылiс ылöснас и сьöлöмнас, что подакокувт ытшкöмсö некинлö: не бригадирлö, не аслас председательлö — проститны сiя оз вермы.