Глава V

Тэрмасьны одзлань лоис некытчö. Но вайтöм вердчан увья лэбтiсьöм лöг этасянь эз чулав. Сiя сё одззамоз пизьöтiс вир, öзйöтiс сьöлöм. Нем мöдiк этася нельки юрö эз пыр. Кукань карта ладорö бöр оськавтöн, Таисья думайтiс: «Кыдз, кытшöм совестьöн сiя эта бöрсянь спектакль вылас пукалö? Рад, натьтö, что турун тележкасö ас öшын увтас сувтöтiс да куканнесö ойбыт кежö вердчантöг колис. Тварь несчастнöй. Этö сiя нарошно керö. Сы увья, что заседаннё вылас горшнас эз вермы, эз кывзö сiйö да сы нёж эз пет. Мед только досадитны мыйöнкö. Но и ась бы меным ли, кинлö ли досадитiс, оз кö сiя вермы этатöг. А колхознöй подаыс вылын мыйлö издевайтчынытö? Мыйлö сiйö тшыгйöтнытö, кöр правленнёыслöн решеннёыс примитöм? Сiдз эд только нач ни вельмöм, нач ылöстöм морт вермас керны. Вот тэныт и коммунист. Но чö-öв, бригадир! Эн думайт, что эта тэныт сiдз чулалас. Что некытшöм управа оз адззись. Ашын жö правленнёö муна. Быдöс, предыслö висьтала».

Картаыс дынсянь нывка казялiс, что куканнес талун пöтöсь ни, чукöртчöмась пöдана завор бердö, видзчисьöны, кöр нiйö йöртасö. Конюховка ладорö öнi нывка и дзар эз кер, иньдöтчис пöдана завор дынö. А кöр кыскалiс майöггез коласiсь заворняэз, ачыс кежыштiс бокö, пондiс видзчисьны куканнезлiсь петöм, öткоста, кыдзкö казявтöг, нёджжöвтыштiс и конюховка ладорö. Сэк сылö син вылас и усис Порсев, кöда одззамоз öтнас пукалiс скамья вылын. Таисья понда эта вöлi сэтшöм видзчисьтöм, что нывка нельки эз и вежöрт, кыдз сiйö примитны. «Вот бöбöв», — дженытика думнитiс сiя ас кежас, а одзлань вынсьöтчис мыччавны, кыдз бытьтö öнöдз сiйö эз и казяв.

Галина баснилö, бытьтö шöрöт школасö Порсев кончитiс дзир Таисья увья, веритнытö быдсöн и эз позь, но и не веритны — сiдз жö.

Кыкьямысöт классö сiя годö Порсевасис кончитiсö сизим морт. Ны коласiсь нёльыс — кык нывка да кык зонка — сiя жö годö мунiсö велöтчыны одзлань, кинлö кытчö туй: зонкаэз — кытшöмкö заводскöй ПТУ-ö, нывкаэз — фабричнöйö, мед лоны швеяэзöн.

Галина лöсьöтчис поступитны медицинскöй училищеö, кöда вöлi матынжык горт дынсянь. И дзир видзчисьтöм несчастье, кöда вöтiс сiйö эта гожумö, планнэсö сылiсь дзугис. Эшö вступительнöй экзаменнэс вотöдз, гортын уджавтöн, нывка бытшкис коксö назём вилаöн и мунны экзаменнэс вылö эз вермы.

Порсев жö, кöда кончитiс кыкьямысöт классö куш тройкаэз вылö, одзланься велöтчöм йылiсь сэсся эз ни думайт. Кытшöмкö мöдiк туй зонкалöн вöлi тожö эшö бöрйытöм. Öтпыр сiя баитiс лоны электрикöн, мöдпыр — электровоз вылiсь машинистöн. То кöсйисис мунны пöрисьжык воныс дынö, мед сы сайсянь уджавны кинöнкö шахтаын — лоны горнякöн. А то эшö грöзитчис кончитны кытшöмкö СПТУ, мед петны сэтчинсянь тракторист-машинистöн да кольччыны пыр кежö горт колхозын. Но сiдз кыдз нем вылын зонка сувтчыны эз вермы, быдöс бытшöм намереннёэс сiдз басниöн и кольччисö.

Гожумбытнас Порсев шочыника уджавлiс колхозын, кöр кытчö мöдöтасö да мый тшöктасö, отсалiс öткаса мамыслö (айыс зонкалöн год кынымöн одзжык сотчис юöмсянь) керны мымдакö турун, а сёрöнжык, август вылас ни, иньдöтчис Березникиö, воныс дынö, но чожа бертiс бöр.

Арланяс, кöр Таисья да Галина баитчисö мунны школаö, öкмысöт классö, Порсев öтлаасис ны дынö.

Сэк кежö ны оланын сибöтчис сiя кад, кöр зонкаэс и нывкаэс пондöны ни нёджжасьны öтамöд вылö, янсöтöны быдöнныс коласiсь сiйö, кин öддьöнжык усьö син вылö. И думайтны кö эта сьöртi, то медодз Порсев син вылö колiс усьны сэк ни басöкжык чужöма да лöсьытжык вывтыра Галиналö. Сэтчö жö и мывкыддэзнаныс нiя вöлiсö матынжык öтамöд дынсянь. Сiдз сiя и лоис.

Кынымкö месяц сьöрна Порсев, кыдз быльнöй кавалер, лунiсь лун жöдзис Галина гöгöр. Зонка кольлалiс сiйö школаö, видзчисьлiс раздевалкаын, мед сы коста жö видзыштны сылiсь учебниккез, часто классын пуксьывлiс ордчöн парта сайö, мед, бытьтö казявтöг жмитчыштны нывкаыс бердö нето кутыштöмöн жмитыштны ас бердас, гижлiс сылö стиххез, ыставлiс уроккез коста запискаэз.

Но колö висьтавны и сiйö, что воöм кодь вывтыра да акань сина Галина усьлiс син вылö не только Порсевлö. Классас зонкаэс вöлiсö öтi-мöдiöн Порсевся интереснöйжыкöсь. И ась Галина Порсевлö нем поперег и эз висьтав, но мöдiк зонкаэзкöт аслас поведеннёöн мыччалiс, что сы гöгöр мöдыслöн бергалöмыс сылö нач нем туйö. А кöр нывка сетiс сылö öтпырись лыддьöтны аслас альбомись не сылiсь, а нач мöдiклiсь стиххез, Порсев вежöртiс, что видзчисьны сылö эта кукласянь (сiдз Галинаöс шувлiсö классiсь зонкаэз) нем. Зонка кежис, но эта вылын öнi эз ни сувт. Быдöс, мый керлiс сiя öння виöдз Галина понда, öнiсянь жагвыв вуджöтiс Таисья вылö. Позис нельки думайтны, что нывкаэс гöгöр бергавтöг овнытö сiя оз ни вермы. Сымда-мымдаыс, натьтö, эстöн и былись вöлi сiдз.

Стиххесö одззамоз Порсев и эз гиж. И запискаэсö уроккез коста, кыдз Галиналö, тожö эз ыстав. Нельки сибöтчывлiс Таисья дынö не быд перемена коста. Да и пуксьывнытö сыкöт ордчöн одзись парта саяс быдöнныс син одзын некöр эз лысьт, дзик полiс сотчöмись. Но син вывсис нывкасö некöр эз ни öштыв. И колiс кö кытчö кольлавны, отсавны мыйкö нуны нето вайны, мыйкö адззыны да лэбтыны, видзыштны да мыччыштны, кортöг, видзчисьтöг, сiя сэтöн и вöлi. Жаль — мöдыслöн сiя кадö зонкаэзкöт дружитöм йылiсь и дума эшö некытшöм эз вöв. Думайтiс кö Таисья мый йылiсь, дак дзир аслас велöтчан йылiсь. И быдöс, мый сы öддьöн вынсьöтчис Порсев керны нывкаыс понда, мöдыс сымдасö адззис да эз адззы. Этасянь ны вылö боксянь видзöтiкö и мыччассис сiдз, кыдз бытьтö Порсев отсасьö аслас томжык сойлö, кöдалö эта отсасьöм-дозирайтöмыс важын ни неколана: кöть эм, кöть абу.

Вöлi ны коласын дзир öтiк тор, кöда кузя Таисья некыдз эз вермы бергöтчыны Порсев дынiсь — öтласа велöтчöм. Зонкаыслö сiдз жö, кыдз и Галиналö — кыкнанныс öтмоз дышöтчисö уджавны уроккез сайын, — часто ковсис отсавны. А керны этö Таисья вермис. И корис кö мыйын Порсев сысянь отсöт, нывка некöр эз пыксьыв. И мунiс кö зонка велöтчаннас невна кокнитжыка дасöт классын да вермис кö сетны выпускнöй экзаменнэз — не етша Таисьяыс отсöт пыр.

Мый эшö висьтассяс ны коласын сэтшöм аскоддьöм дружитöм йылiсь, дак этö сiйö, что зонка веритiс одзлань кежö. Сiя вежöртiс — век сьöрна Таисья сэтшöмöн оз ло: кöр-некöр вежсяс не только чужöмнас, но и отношеннёнас. Сибöтчас кад, кöр и сыын саймас зонкаэз дынö интерес. Эта надейтчöмыс и отсалiс Порсевлö видзчисьны. И эстöн сiя эз сорась. Но öткоста зонка эз тöд мöдiкö, сiйö, что бытшöма дружитöм-любитöм понда кык морт коласын öтамöд дынö саймöм интересыс етша. Этася колö, мед и олан дынö интерессэс вöлiсö тожö öткодьöсь.

Йöр бердас сулавтöн Таисья видзчисис, кöр куканнес вуджасö карта ладорö, пöдныштiс завор, иньдöтчис подаыс сьöрö. Сэк кежö Порсев, тыдалö, казялiс ни нывкалiсь небытшöм настроеннёсö, повзис сыись, что карта воротаэсö пöдналöм бöрсянь Таисья шыасьтöг вермас мунны гортö. Нывкалiсь шыасьöмсö видзчисьтöг сiя горöтчис:

— Мый, эн верит, что турун тележкаыс бригадир öшын увтын?

— Веритi ли эг, меным колiс ас синöн адззывны, — зонкаыс ладорö дзар кертöг шыасис Таисья воротаэс дынсянь.

— А ме думайтi — тэ сiйö вылат мöдан кыскыны.

— И кыски бы... Некинлiсь бы эг юась. Жаль — вынö оз судз, — шуткатöг панöвтiс нывка, каличалiс воротаэз, жагвыв иньдöтчис конюховка ладорö. — Тэ мый эстöн öнöдз пукалан?

— Он разь адззы — тэнö видзчися?

— Мый нö спектакль вылас эн мун? — Матiсяньжык Таисья казялiс зонкаыс кок увтiсь косялöмöн чапкöм билеттэз, паныт сувтiс.

— Интерес öшис. — Порсев веськöтчыштiс. — Эшö кытчöкö тэрмасян?

— Тэрмася, конешно. Меным эшö ытшкисьны колö. Зонка дивуйтчöмöн бергöтлöв-керис юрнас.

— Кывзы жö, Тайка.

— Баит, ме кывза. — Нывка вежсьыштiс кок вылiсь кок вылö.

— Не. Тэ верман он морт моз, кöть час сьöрна мекöт пукалыштны? — лöгвевйöн юалiс Порсев, öткоста мыччалiс скамья вылö.

— Но верма, Колька, верма. — Таисья оськöвтiс скамейка бердöдз, пуксис. — Только не час, а джын час мымда.

Нывкаыс шутитöм вылö одзлань Порсев эз ни шыась. Сiя бергöтчыштiс паныт, кадсö öштытöг пондöтiс:

— Висьтав, пожалуйста, неужто тэ эта фермася буржык местасö аслыт эн адззы? Мыйлö тэ этна дристöсь куканнез дынö юртö сюйыштiн? Эд öтпырись театрыс локтiс, и сэтöн ми тэкöт спектакль вылас мунны эг вермö.

— Но и мунiн бы, колö öддьöн дак. Ме тай тэнö эг видз.

— Ме бы мунi. Да не ме йылiсь басниыс, не ме йылi-ись.

— Но и ме йылiсь, Колька, тожö тырмас! — вежсьыштöм голосöн поперегалiс Таисья. — Мыдзи быдöннытсянь öтiксö кывзыны! — Недырик чöлыштöм бöртi: — Спектакль вылö öтпырись эг мун, дак этасянь мушарыс эз боквывтчы. Уджыс менам, видзöт тэ, сылö оз гленитчы. Но и ась. Оз и ков. Аслым бы дзир гленитчис. А тэныт, Колька, ме удж дынöдз кытшöм дело? Или тэ меным... — эстöн зонкаыс вылын сералöмöн ни, — ...фермаыс местö мыйкö буржыкö адззин?

Нывкалöн сералöмыс Порсевöс не эз дойд не эз падмöт. Нач мöднёж. Таисья кыввез бöрсянь зонка нельки гажмыштiс, кыдз бытьтö только этö баснисö и видзчисис.

— Эг эшö. Но ковсяс, дак верма и адззыны. Мунам öтлаын?

— Тэкöт? Кытчö жö бы, абу кö секрет? — А одзлань сералöмсö сайöвттöг ни: — Сё эшö Венераыс вылö лэбзьыны думайтан?

— Сералан, Тайка? А ме тэныт былись баита. — Ошшасьöмöнмоз, дзик мыйкö нач вöвлытöмö да видзчисьтöмö, кöда одзлань некинлö и юрö эз бы пыр, Порсев юöртiс: — Менö вонö ас дынас, Березникиö корö. — Зонкалö, тыдалö, думайтсис, что эта юöрыс нывкаöс колананёж и дивуйтас, и гажöтас. Мыйкö дырна сiя чöлыштiс:

— Но дак кыдз? Мунам? Мый нö эшö чöлан? Эстöн и Таисья думайтöв-керис, гажтöма ловзисис.

— А гортын тэныт, Колька, не удж, не места оз адззисьö?

— А-а, — шыасис Порсев кинас öвтыштöм сорöн. — Кытшöм ни эстöн удж да места? Запутымас. Мый бурсö эта Порсеваын адззылан? Öтiк нять да вöр. И петны кодя мортлö моз некытчö.

— Вот кыдз. — Таисья гажтöма гогинялыштiс юрнас. — Интересно. Кытчöдз быдмим да велöтчим, быдöс вöлi бур. Некытшöм нять да вöр эз мешайт, некытшöм гажтöм эз кут. И петнытö адззисис кытчö. А кыдз кончитiм школасö, сэтöн вöлись и казялiм, что гортным миян не горт, а дзир запутым, кытöн кодяжык мортыслö не удж, не места оз ни адззисьö. Или ми асьным сэк не сэтшöм кодяöсь вöлiм да öнi вöлись сэтшöммезнас лоим?

— Мый тэ менам кыввез бердö кышасян? — Порсев перыта сувтiс коккес вылö, бергöтчис паныт. — Син одзат жö, син одзат! Или он адззы — быдöс талун том отирыс гортiсь мунö? Этö тэ öтнат сэтшöм ылöсаыс адззисьöмыт, что золотöй медальöн фермаö, куканнез дынö пырин. Сы увья, что мамыт шогалö. Воштiсьнытö этася некытчö. А не сiя бы, дак важын ни эта коста городын, институтын вöлiн, — пизис зонка дорйисьöм могись. — Висьтав, пожалуйста, мый эстöн сэтшöм бурыс да гажаыс, кöда бердö бы кутчисьны позис? Чожа колхозас öтiк пенсионеррез кольччасö, кöдна гроб дорöттяныс ветлöтöны да мунны некытчö оз чайтчö. А миянлö мый эстöн керны?

Мымда бы Таисья эз кывлы эта вотöдз отир басниись кытшöмкö бур да гажа местаэз йылiсь (адззывны нiйö ас синнас нывка эз на ешты), мымда бы эз лыддьöт ны йылiсь книгаэзын, сувтöтны ныкöт ордчöн ассис гортсö сы юрö и дума некöр эз пырав. Быдöс бур да гажа местаэзö нывка веритiс сiдз жö, кыдз и сыö, что местася, кытöн сiя чужис, местася, кöда сувтöтiс кок вылö, буржыкöн да гажажыкöн сы понда некытöн да нем оз вермы лоны.

Öтiкын Порсев эз сорась. Не мамыслöн бы шогалöм, ар кежас Таисья и былись бы вöлi институтын. Но шуны велöтчöмсö гортiсь пышшöмöн некыдз оз позь. Вöлi кö нывкалöн мечта сюрны институтö, дак нач не сы понда, мед кольны ассис горт, а сы понда дзир, мед институтсö кончитöм бöрын бертны бöр тöдiсьжык да прокажык мортöн. И эз кö öнöдз Порсев сымдасö вежöрт, дак буржык бы вöлi öвтыштны сы вылö киöн, бергöтчыны да мунны. Пукавны сыкöт эстöн весь споритöм могись не кад, не охота эз вöв. Сiйö видзчисис эшö унася-уна удж, а шондiыс ляпкисис ни ылiсь вöр бердö, сiйö и видзöт сайöвтчас. Но ас йывсис абутöмсö кылöм бöрсянь кутöм обидаыс муннытö эз сет, видзис. Таисья нёджжöвтыштiс зонкаыс вылö, кыдз сiя, ответсö видзчисьтöн, жöдзö öтмöдöрö сы одзын.

— А Березникиас? Сэтчин эм мый кернытö? öддьöн бур да гажа?

— Березникиас, шуан? — дивуйтчыштiс Порсев. — Да сiя жö тэныт не деревня кытшöмкö, а город. Вежöртан тэ, он сымдасö, город. А городыс, сiя, батя, город и эм. Деревняыскöт ордчöн сiйö некöр он сувтöт. Гöгöр асфальт. Некытчö и коктö он нятьöсьт. Ем ойнас уськöт, дак и сiйö адззан. И петнытö рытся кадö эм кытчö, — öдззис ошшасьны зонка. — Паркыс и стадионыс, дворецыс и кинотеатрыс — мый уж тэныт колö. Сэтчин и уджыс, не кыдз эстöн, кытшöм колö адззисяс. — Аслас радейтöм увья зонка, тыдалö, öнöдз эшö надейтчис, что нiя вермасö баитчыны ас коласын, кыдз сылö колö. Но Таисья думайтiс ылын не сы нёж.

— Кывзы жö, Колька. Гортыт, шуан, тэныт запутым кодь, нять да гажтöм. Петны кодя мортлö некытчö. А не эта разь запутымыс тэнö кок вылат сувтöтiс? Не сiя разь шöрöт образованнёсö сетiс? А мыйöн тэ эта понда сылö вештiсин? Мый сэтшöмсö керин, мед нятьыс етшажык вöлi да петны лоис кытчö? Батi, канава öтiкö гарйин? Тротуар вöвдiн?

— Кинкö разь Порсевас тротуарресö вöвдiс ни? Мымда ола, дак сэтшöмсö кытчöдз и вöтöн эг адззыв.

— А мыля тэ, Колька, кинкö вылö надейтчан? Мыля медодз ачыт он кутчись? — сё öддьöнжык жаралöмöн баитiс Таисья. — Вунöтiн ни разь, кытшöм подвиггез йылiсь эшö неважын мечтайтiм? А öнi, кöр колана кадыс сибöтчис, деревенскöй нятьсис да ферманскöй уджсис повзим. Гажа да шоныт местаэз кошшыны пондiм. Сiдз я мый я?

Порсев вежöртiс, что не согласитчыны кö Таисьякöт мыйынкö кöть öтпырись да панласьны одзлань, этадз нывкасö он лöньсьöт и ас ладорö он бергöт. Сувтчывтöг скамейкаыс одзöт öтмöдöрö ветлытöн, сiя паныт горöтчис:

— Сiдз, Тайка, сiдз. Только вежöрт, пожалуйста, что не ме öтнам сэтшöмыс. Талун быдöнныс сiдз керöны. Вежöртан? Быдöнныс!

Быдöнныс йылiсь зонкалiсь кыввесö, кöдна вылö сiя вынсьöтчис нырыштны медöддьöн, Таисья кыдз бытьтö эз и казяв.

— А сэтчин, Березникиас, кытöн, баитан, сэтшöм бур да гажа, тэ кöть öтiк кöрттув дорин? Öтiк кирпич пуктiн? Öтiк пу садитiн?

— Эг эд, Тайка. Эг ешты сымдасö, — нарошно ни, кыдз эм, веськыта горöтчис Порсев, но мед вермыны сайöвтны Таисья шогья ассис недолытсö, горöн пондiс ваксьыны. — Этö сэтчин и метöг керöмöсь. — Зонка видзчисис, что Таисья вот-вот серöмтчас сы сьöрö жö, и, öтлаын серавтöн, нiя миритчасö. Но и сэтöн эшö Порсев моз эз шогмы. Лöдсалöм могись, нывка шуис:

— Не тэ юрöн, шу, не тэ киэзöн, и уж, натьтö, не тэ понда. А тöдан жö кöть, он, кыдз тэ коддес йылiсь отирас баитöны?

— Кыдз жö бы интересно? Висьтав, пожалуйста, понда тöдны, — сё одззамоз вынсьöтчис шутитны Порсев. Сiя зэв матö сувтчис Таисья одзö, пондiс видзчисьны. Но видзчисис зонка нач не сiйö, мый корис висьтавны. Шыннялöмöн нывкаыс вылö видзöттöн сылö öнöдз эшö думайтсис, что часöт и мöдыс тожö шынньöвтас паныт, öвтыштас кинас быдöс вылö да сы вылын и лöньсяс. Таисья тожö видзöтiс Порсев вылö и былись нельки шынньöвтiс, только не сiйöн шынньöвнас, кöдö видзчисис сысянь зонкаыс.

— А сiдз вот — ась пö и дворникöн, а только городын. Кывлiн тэ кöркö сэтшöмсö, эн? Эта тэ йылiсь и эм. А унаöн я вылынжык куканьвöдитiсьысся? Думайтышт-ко вот, Колька, ачыт.

Одззася риз видзöмыс Порсев чужöм вылын кусiс. Шыасьны паныт öнi зонка эз ни тэрмась. Сiя лэдзис увлань синнэсö, тырпсö жагвыв курччавтöн пондiс думайтны. Таисьяöс жö быдöс висьталöмыс, тыдалö, и öнi эшö эз лöньсьöт. Нывка жалейтöмöн гогинялыштiс юрнас: «Порсев тэ, Порсев»,

— Тэ кöть тöдан жö, кыным орден комсомольскöй билет вылат новйöтан?

— Квать тай топ, — думайттöг ни, кöдöрö бергöтчас одзланься басниыс, шыасис паныт Порсев.

— А мый этна квать орден сайын?... Думайтан, батi, что билетсö баситöм могись нiя сэтчин рисуйтöмöсь? Или комсомолыслö нiйö козин местö козьналiсö? Кыдз бы не сiдз. Этна наградаэс, колö кö тэныт тöдны — гражданскöй и Отечественнöй войнаэз, Днепрогэс и Магнитка, Турксиб и БАМ, лэбтöм вильса, Комсомольск и Березникиыс, кытчö лöсьöтчан, тожö. И эн думайт, пожалуйста, что этна дзир басöк да гора кыввез. Квать орденыс комсомолыс знамя вылын да этна гора кыввес — öтiк и сiя жö. Öтамöдтöг нiя не вöвны, не овны эз бы вермö. А ны сайын?... Ны сайын эд, Колька, бимороз и пöжалан жар! Ны сайын калитчöм песока пустыняэз да пыдöстöм нюррез, дортöм вöррез да гранитнöй керöссэз. Ны сайын тшыгыс, пасьтöм-кöмтöмыс, шогöттэс, а быдöскöт öткоста, лунöн ли, ойöн ли, неделяэзöн узьтöг, сёйтöг, шоччисьтöг, быд вынiсь, быдсöн мылаöн, быдсöн кужöмöн керöм удж. И сiя кöбы дзир! А то эд эшö ас удж, ас горт, ас олан да свобода понда смертькöт пессьöм. Эд сы понда, мед керны буржыкöн олан, мед век сьöрна вöлiсö отир тöдвылын да басниын сэтшöм гора кыввез, кыдз Днепрогэс, Магнитка, Комсомольск, — сы понда миян кодь том отирыс, быдын кöдна коласiсь биöнмоз öгралiс олансö радейтан сьöлöм, тысячаэзöн сiсьмисö ссылкаэзын, кайисö эшафот вылö, ловйöн пырисö фашистскöй танккез увтö, ловья мороссэзöн пöдналiсö пулемёттэз, миллионнэзöн усисö шойöн омöн Европа пасьта. Быдöс йылiсь, мый вöлi керöм том отирöн эта олан понда, талун нельки висьтавнытö оз позь. А тэ, Колька, быдтöм-велöтöм, вердöм-пасьтöтöм горт му вылын, комсомольскöй жö билетöн карманын, талуння виöдз эшö и оча чунь эн вачкы, а баитан, что овны да уджавны гортын колана условиеэз абу.

— Да эта и тэ баснитöг вежöртана. Мый сэтöн суськынытö?

— Сiдз, Колька, сiдз, ог спорит. Кыдз только сiйö вежöртны.

— Да кöть кыдз. Кöть кöдöрсянь кут, сё ни öтмоз вежöртсяс. Абутöмсö немыс местö он пукты.

— Тэ нёж сiдз. Тэ коддес понда условиеэс — кокнит олан да бытшöма лöсьöтöм места. Ме жö думайта, что медодз — эта мортлöн удж, сiдз кыдз сытöг асьныс колана условиеэс не чужны, не усьны кысянькö кымöрсянь оз вермö. Сiдзкö, быд мортлö колана условиеэсö колö керны аслыс. Сэк дзир сiя и вермас шусьыны мортöн. Сiя жö, кöда нiйö некытöн оз кер, а кошшö кинкö киöн керöмö, — сэтшöмыс абу ни морт.

— Кин нö сэк сiя тэ нёж, абу кö морт?

— Паразит сiя, вот кин! — он кö тэ öнöдз сымдасö вежöрт. Думайт вот ачыт, вöлiсö бы миян талун нiя жö Комсомольскыс, Березникиыс да Магниткаыс, вöвны кöбы быдöс том отирыслö тэ кодьöн?

— Ог тöд. Сэки, батi, вöвлiсö сэтшöммес, кöдна йылiсь тэ баитан. Но ме тэныт, Тайка, эшö öтпырись висьтала, что талун том отирыс быдöс сiдз керö. Быдöнныс буржык местаэз кошшöны. Дак быдöнныс я мый я сэк паразиттэз, кыдз тэ шуан?

— Да, Колька, кошшöны. Талун мода — овны готовöй вылын. И сэтшöммесö некыдз мöднёж, кыдз паразиттэзöн, шуны оз позь. И ась талун сэтшöммес и унажык, но только не быдöнныс. Эталö ме некöр ог верит. И эн думайт, пожалуйста, что этна унажыкыс, этна паразиттэс, кöдна старайтчöны овны готовöй вылын, олансö му вылас керöны да видзöны. Озö. Нiя дзир оланыс бердын видзсьöны. Нылöн олöмныс быдсöн сы вылö и мунö, мед готовöй олансяняс ас понда унажык босьтны. А керöны да видзöны олансö нiя неунаыс, кöдна сылö уджнас быдсöн асьнысö сетöны. Но кыдз ме вежöртi ни, тэ, Колька, ылы-ы-ы-ын не ны коласiсь. Но и мун, кытчö тэныт колö! Мун и ов, кытöн тэ понда быдöс керöм-лöсьöтöм! Тöд только, что кытöн бы тэ эн вöв, некытöн и некытшöм прок некинлö тэсянь оз ло... И мыйлö только тiян кодьыс комсомольскöй билеттэсö кыскалö? — Таисья гажтöма ыш ловзисис, лöньсис.

Порсев жö, кöда öшöтöм юрöн кольччис сулавны Таисья одзын, недолытсянь шыасьны паныт эз тэрмась. И вöлись сэк, кöр нывка сувтiс да оськöвтiс стена бердын öшалан литовка ладорö, зонка чепöссис сы сьöрö, кутыштiс киöттяс.

— Тайка! Но мыйлö тэ сiдз? Мыйлö, кöдö оз ков? Ме жö не дворникöн, кыдз тэ шуан... Ме вонöкöт öтлаын, шахтаын... проходчикöн понда уджавны, вот адззылан. И тэныт... Тэ жö тöдан... гленитчан меным... Тэ понда жö буржыксö мöдi... — Басниыс коласын зонка сывьялiс нывкасö, пондылiс жмитны ас бердас.

Овлö, кöр зонка сибöтчöм коста нывка пондö мездiсьны сы кутöмись да тэрмасьö вешшыны ылöжык, нето öзйö сiя жö желаннёöн да сибöтчö паныт. Порсевлöн сибöтчöмыс Таисьяöс некыдз эз вöрзьöт. Вежöртана, что и зонкаыслö паныт локтöм йылiсь думайтны вöлi нем. Но и мездiсьны да пышшыны сы увья нывка тожö эз пондыв. Сiя дзир каттьыштöмöн тэчис морос одзас киэсö, öтпырись юрнас öвтыштöмöн вештiс синнэс весьтö лэдзчисьыштöм юрсисö да нёджжöвтiс паныт:

— Тöда, Колька. Не первуись баитан. Только весь. Оз ков.

Не нывкаыс кыввезсянь, а чожажык сысянь ассяняс, кытшöм кöдзытöн, «öзтытöмöн» кольччис сiя сывьялöмыс бöрсянь, зонкалöн киэс жагвыв и былись калькалiсö Таисья кос бердiсь.

— Мый тэкöт сэтшöмыс? Быдöнныс жö öнi дружитöны.

Эта басниыс Таисьялö тожö вöлi тöдса ни. Нiйö жö кыввесö сiя кылiс неважын и Галина подругаыссянь.

— Ась, кинлö колö дак, абу жаль. Дружитны быднёж позьö.

— А ме любита тэнö. Вежöртан-он?

— Не одзöв я, Колька, любитöмыс йылiсь баитан? Кад я эшö талун миянлö сы йылiсь думайтнытö? — юалiс Таисья, ответсö видзчисьтöг одзлань содтiс: — Кывза вот ме тэнчит баснитö, а аслам серöм петö. Сысянь, натьтö, что ас пытшкын нем сэтшöмсö ог кыв. Эз на лок, сiдзкö, ме понда сiя кадыс, эз саймöт öнöдз сiйö чувствосö, кöдö любитöмнас шуöны. А, батi, тэнат любитöмыт меным нем туйö. Некыдз сiя менö оз вöрзьöт. Вермас я сэк лоны сы йылiсь басниыс? Менö жö öтiк эта думасянь стыд кутö.

— Да ладно тэныт, Тайка, — падмöтiс Порсев. — Миян годсяэс гöтрасьöны да жöниккез сайö петöны. А сылö, видзöт тэ, кадыс абу локтöм. Думайтышт жö юрокнат, мый баитан. Дассизим ни эз я тыр.

— Но и ась. Дассизимыс — не сизимдас. А мый эшö миян этася сэк кежö эм, мед мунöм-гöтрасьöмыс йылiсь думайтны?

— Тэныт мый, эшö высшöй образованнё колö? — серöмтчис Порсев.

— А кинлö сiя талун оз ков? Ме думайта, дак быдöнныслö том отирыслö. Да сiя кöбы дзир. А то эд... — Таисья зэркыта öвтыштiс кинас, оськöв ылына вешшыштiс зонкаыс бердiсь. — Эта йылiсь и баитны охота абу.

— Висьтав, висьтав, пондöтчин дак. Мый эшö этася оз тырмы?

— Колька тэ, Колька. Думайтыштiн бы ачыт кöть öтпырись, — а чöлыштöм бöртi: — Мый, шуан, эшö этася? Да ми жö тэкöт öнöдз, рыт и асыв, йöз нянь дорö пызан саяс пуксям, колö кö тэныт тöдны дак. Öнöдз выланым и коканым маммезнымлiсь босьтöмсö новьям. Вот эд менö мыйсянь стыдыс кутö, пондыны кö öнiсянь любитöмыс йылiсь думайтны. Или тэ этö тожö нем туйö он пукты? Бöра висьталан — öнi быдöнныс сiдз керöны?

— А мый, шуан, не сiдз я мый я? — повтöг горöтчис зонка. Сiя тöдiс, что оланас частожыксö сiдз и овлö, надейтчис, что висьтавны паныт эта вылö нывкаыслö лоас нем.

— Но и ась. Ась керöны, кин сiдз вермö дак. А ме — ог. Вежöртан, Колька? Ог вермы. Совесть менам оз тырмы любитöмыс йылiсь думайтны, кöр тöда, что ме вылын нельки эта несчастнöй платьеыс йöз киэзöн шедтöм, а аслам шедтöмыс эшö и воть мымда абу.

Паныт Таисья кыввезлö позис висьтавны, что и эстöн нем умöльыс абу. Что нiя эшö томöсь и пондасö кö уджавны, то и выланыс, и коканыс, мый колö, быдöс шедтасö. Но этна вöлiсö бы дзир кыввез, а не ачыс шедтöмыс, кöднаö Таисья сё ни бы эз верит, öнöдз зонка тöдiс ни сылiсь мывкыдсö. Но мый эта коста полöтiс Порсевöс медöддьöн, дак сiя, что Таисья сiдз жö вермис кутчисьны и сы паськöм бердö, юавны, кин киöн сiя шедтöм, сiдз кыдз сы вылын, кыдз и нывка вылын, нем аслас шедтöмыс эз вöв. Зонка перыта кизьыштiс пиджак полаэсö, дзик эта вермис сiйö мыйсянькö сайöвтны, и öнi ачыс ни вешшыштiс оськöв кыным ылына Таисья дынсянь. Но кутчисьны Порсевыс паськöм бердö Таисья эз ни пондыв, а одзлань эшö юöртiс:

— И эта, Колька, эшö не быдöс. Тэ вот любитöм йылiсь баитан, а некыдз öнöдз он вежöрт, что интерессэзным миян оланас ылын не öткодьöсь. Тэ разь он адззы сымдасö, что ми сынам не öтiк ладорö? Тэныт гленитчö ва ньылат, кыдз кокнитжык, тэ шуанöн, кыдз быдöнныс керöны. А меным сэтшöмыс, кöть эм, кöть абу, дарöм оз ков. Вот эта бöрсянь и думайт, позьö-оз миянлö любитöмыс йылiсь баитны.

— Кывзы жö, Тайка. — Порсев вились оськöвтiс матöжык, пуктыштiс кисö сы пельпон вылö, — ме жö думайтi, кыдз буржык. Тэ понда. Вежöртан? Тэ понда. А тэ, видзöт, кöдöрö бергöтiн, «интерессэзным не öткодьöсь» да «сынам не öтiк ладорö».

— Тырмас, Колька! Дугды бöбöтчынытö! Бытьтö тэ ме понда кыдз буржык думайтiн. — Таисья мынöтчис зонкаыс ки увтiсь. — Сiдз, натьтö, ме абутöмас и верита.

— Да кытшöм нö сэтöн бöбöтчöм? Кысь тэ сiйö босьтiн?

— А сыись, что керан быдöс ас нёжат, кыдз тэныт колö да гленитчö, а баитан — ме понда. Этö тэ дзир ас понда керан, а не ме понда. Вежöртiн?

— Да нем ме тэ басниись эг вежöрт, «ас понда» да «ме понда», — керыштiс Порсев.

— Эн кошшы, Колька, бöбöввесö. А былись кö тэ сымдасö он вежöрт, дак сэсся и баитны нем. Мый сэтöн весись кадсö торкны. Тэнат, ме видзöта дак, уджыт керсьöм. А меным эшö джын ойöдз ытшкынытö да пыртлынытö тырмас. — Таисья мынöтiс конюховка стена бердiсь литовка. Порсевлiсь одзланься баснисö кывзытöг иньдöтчис завор сайö.