Повтöм дзöдзыв

Шоччиси ме сiя годö санаторийын, неылын Казань дынсянь. И колö висьтавны, что меным, ойвывланись мортлö, сэтчинiсь местаэс ёна гленитчисö. Медöддьöн гленитчисö вöррез, кöдна дзоньöсь сулалiсö санаторий гöгöр быд ладорсянь. Висьтассяс и сiйö, что шöрöт полосаись вöррес унаöн оз вачкисьö миян вöррез вылö. Пемыт лыса кöз нето ньыв сэтчин оз пантась. Ны местö ордчöн чочком кока кыдззезкöт да силькöтан листа пипуэзкöт, быдмöны ён дуб, нинпу, орешник-лещина (фундук) да басöк листа клён. Этасянь и асьныс вöррес тöдчöмöн югытжыкöсь да гажажыкöсь, ежели миян местаэзын.

Шоччисьтöн ме вель уна кад чулöтi этна вöррезын. Мукöд коста дырöн сулавлi нето пукавлi адззывлытöм эта вотöдз пуэз увтын, кывзi ны листлiсь тöв вылын гажöна кышöтöм, думайтi, кыдз бы нiйö вермыны вуджöтны миян местаэзö.

Пантасьлi ме эта коста и этна вöррезын быдкодь олiссезкöт, ручкöт, шуам, ёжкöт, вöрмöскöт да уррезкöт. Первуись адззылi ваын олiсь крысаэзöс и нельки ужöс, кöда йылiсь рассказыс одзланьын. Но мый быдöс коласiсь меддыр кежö кольччис тöдвылын, дак этö дзöдзывкöт пантасьöм.

Неылын санаторий дынсянь эм природалöн öтiк достопримечательность — голубöй ты. Нач неыджыт, куйлö сiя веськытланьсянь Казанка ю пöлöн. Тысö юыс бердсянь янсöтö сизим-кыкьямыс оськöв пасьта берег. Ваыс тыас пыдöссяняс унася-уна ключчезiсь и видзсьö вит-квать метр сувдöн вылынжыка, ежели ордчöн визывтан ю. Но меддивуйтанаыс эстöн сiя, что ваыс тыас сэтшöм жö голубöй рöма, кытшöмöн овлö мича погоддя коста асывся кымöр.

Эта вотöдз ме ты дорас вöвлi ни. Но сiя лунö ми вились иньтöдчим сэтчин öтiк ёрткöт, кöда локтiс шоччисьнытö месся бöртiжык и нiя местаэзын эшö эз вöв.

Пондöтчис сентябрь. И вöрас öнi, кыдз некöр, вöлi югыт, ыркыт да прос. Эта коста руас оз ни кыв быдкодь цветитан турунлöн пöдтанакодь дук. Сiя сöстöм да кöс, кöдöн и лолассьö кокнита.

Туйыс миян кыссис то вöрöт, гырись пожуммез, пипуэз, нинпуэз да дуббез коласöт, то петавлiс кадiсь кадö недырик кежö неыджыт кушиннэз вылö.

Ме, кыдз туйсö тöдiсьжык морт, мунi одзсяняс да дугдывтöг öвтышалi одзам бедьöн, мед орлавны туй весьтын öшалан чераньвеззэз, кöдна быд оськöв вылын лякасисö то чужöм, то паськöм бердö. Менам ёртö, ме годдэзся жö инженер-строитель Юрий Александрович, кынымкö оськöв ылына оськалiс бöрсяням.

Öтiк неыджыт кушин вылын, кöр ми ёртöкöт оськалiм ордчöн, меным юöртiс:

— Видзöт жö — дзöдзылыс.

Ме сувтi, дзар керыштi кок увтам. Но казявны дзöдзывсö перво жö эг вермы.

— Кытöн?

— Да вот жö, туй вылас. — Юрий Александрович мышкыртчытöг мыччалiс меным кинас веж песока туёк вылö.

Дзöдзыввесö эта вотöдз ме пантавлi уна ни. Но усьлiсö нiя син вылö частожыксö пышшиканыс. Эд дзöдзыв, мымда ме тöда или тöдi эта вотöдз, пресмыкающöй тварь öддьöн полiсь. И казялас кö сiя матын ас дынсянь кинöскö ловьяöс, сэк жö тэрмасьö пышшыны да сайöвтчыны син одзись. Сiйö жö ме видзчиси и öнi. Но мымда бы ме эг вынсьöтчы казявны, мед кинкö тэрмасис пышшыны миян одзись, казявны сымдасö сiдз и эг вермы. Некин ловьяыс син вылö эз усь.

— Некысь некинöс ог адззы.

Сэк Юрий Александрович мышкыртчис туёк весьтас. Увланьö нюжöтöм чуньöн сiя мыччалiс меным нач эшö учöтик, вöснитик, кузь бöжа да руд спинкаа дзöдзывпиян вылö.

— Дак мый сiя кулöм я мый я?

— Да не, ловья.

«Мыля нö сэк оз пышшы? — думайтi ме ас кежам, дивуйтчöмöн жмитыштi пельпоннэзнам. — Интересно». И мед сё жö не повзьöтны неыджыт тварьсö, кытшöлöнмоз да жагвыв сибöтчи матöжык.

Дзöдзывпияныс и былись вöлi ловья. Öнi ме казялi ни, кыдз кадiсь кадö сылöн мыйсянькö зэгалыштлiс бöжыс, а синнэс — кык неыджыт да сьöд тусёк — орöттöг видзöтiсö ёртö чунь вылö.

Ме сё эшö видзчиси, что дзöдзывпияныс, абу кö сiя некыт стрöйдöм, вот-вот чепöссяс кöдакö бокö туй вывсис да перыта уськöтчас пышшыны. И не вöтны кö да не падмöтны сiйö эта пышшöмись, чожа мый саясяс син одзись турун коласас. Но керны сымдасö сiя, тыдалö, абу и думайтöм. Нельки нач мöднёж.

Кöр Юрий Александрович сибöтчис сылань чуньнас эшö матöжык, дзöдзывпиян лöсьöтчис дорйисьны. Бöрлань петитчыштöмöн сiя перыта лэбтiсис нёльнан лапка вылас, а сэсся паськöтыштöм öмöн чеччöвтiс да кутчисис ёртö чунь бердö.

Вежöртана, что кыкнанным понда эта вöлi нач видзчисьтöм. Повзьыштöмувья ме нельки керсьыштi бöр. А Юрий Александрович перыта пыркнитiс кинас.

Чунь бердiсь мынöм дзöдзывпиян усис бöр туёк вылас, но нельки эта бöрсянь пышшыны эз думайт. А ёртö сэтöн жö видзöтöв-керис öтмöдöрсянь ассис чуньсö. Пиньтöм дзöдзывпиян курччöвтöмсянь не след, не зубыт некытшöм лоны и эз вермы и повнытö эстöн немись.

И сэк Юрий Александрович пондiс сибöтчыны кинас дзöдзывпиян дынö мöдöтпырись. А мöдыс, кöр казялiс этö сибöтчöмсö, сэтшöм жö полöтан позаын — осьтыштöм öмöн да лапкаэс вылын му бердсис лэбтiсьöмöн, кольччис аслас местаын, веж песока туй вылас, вились лöсьöтчис дорйисьны.

Ёна дивуйтiс миянöс дзöдзывпиянлöн поведеннёыс. Мый уж мый, но сымдасö, мед сэтшöм учöтик, абутöмкодь, позьö шуны, тварь уськöтчис паныт морт вылö, эта вотöдз ме не только эг адззывлы, но и кывлыны эта йылiсь эз усьлы. И медперво адззылöмыслö нельки эз и веритсьы. Сiйöн охота вöлi тöдны, мый сiя пондас керны одзлань.

Öнi повтöмжыка ни Юрий Александрович вились сибöтчис кинас дзöдзывпиян ладорö. И вились, кыдз и одзжык, шогмис сiя жö. Дзöдзывпиян чепöссис паныт да курччöвтiс пиньтöм öмнас ёртöлiсь чуньсö.

Сэтшöм ли сылöн вöлi мывкыд или эз вöв охота кольны шондi югöррезöн шонтöм песока местасö — висьтавны сьöкыт.

Вежöртана вöлi дзир öтiк, что мортыс сибöтчöмись эта учöтик тварь немымда эз пов. Сiя эз и думайт пышшыны, а чепсасис мортыс вылö нельки паныт.

Вашöтны дзöдзывпиянöс аслас местаись одзлань ми эг ни пондö, кытшöвтiм бокöттяс да сiдз сэтчö и колим. Ась шонтiсьö шондi югöррес увтын, гленитчö кö сылö öддьöн эта дак, абу жаль.