Гöрд льöмпу

Первуись ми сыкöт пантасим Перемын Народовольческöй улица вылын. Усис сiя меным син вылам, сувтöтiс, дзик домалiс ас бердас, и, кытчöдз эг пöт сы вылö, нем вылö невачкисьланаыс вылö, видзöтöмсянь, оськöв ылына одзлань керны эг вермы.

Эстöн колö казьмöтны и сы йылiсь, что тöдсасьöмыс миян коласын шогмис март гöгöр, кöр кок увтын эшö вель джуджыта куйлiс лым, а пуэс вылын некытшöм лист эз вöв, нельки пугырыс оссьыны эз ешты. И, вежöртана, конешно жö, что сувтöтiс сiя менö не кытшöмкö сэтчин ажурнöй формаа листтэзöн, не тюльпан кодь гырись да öгралан бирöма цветтэзöн нето апельсин гырися воöм плоддэзöн — не. Сувтöтiс сiя менö нывкалöн кодь волькыт да басöк вывтырöн, мунны кöда бердöт ордчöн да не нёджжöвтыштны кöда вылö эта коста кöть öтiк синöн — просто грех.

Думайт вот ачыт, лыддьöтiсь. Оськалан тэ сiдз городскöй улица кузя важынсянь ни тэныт тöдса кыдззез, пипуэз да тополлез пöлöн. И вдруг нач видзчисьтöг пантасьö тэныт ны коласын му бердсянь метр кык-куим сувдöн волькытся-волькыт, кыдз стекло, веськытся-веськыт, кыдз масiсь, жечовöй печка труба кыза пу, кöдалöн качыс сэтшöм жö сина, дзик кыдзлöн, но не кыдзыслöн кодь жö бель чочком, а вишнёвöй-гöрд рöма, бытьтö нарошно то ли мичöтöм, то ли краситöм. Позьö-оз мунны сэтшöмыс бердöт сувтчывтöг да эшö сэк, кöр тэ сiйö эта вотöдз некöр да некысь эн на пантавлы? Оз эд? О-оз. То-то жö вот. Тшöтш эта мекöт и лоис, кöр усис син вылö сэтшöм адззывлытöм дивоыс.

Вель дыр ме сулалi вöрöтчытöг сы одзын, нёджжалi да думайтi, кытшöм эта сэтшöм диковиннöй — басöк пу. Но да тöдан разь перво жö сымдасö, кöр öтiк качся, не лист, не цвет, не ягöд — нем абу. Но öтпырись адззылöмсö ме сэсся эг ни вунöт. Кытшöмöн сiя меным пантасис, сэтшöмöн и кольччис тöдвылын пыр кежö. А дума эта коста ме ылöсын бергалiс дзир öтiк: «Вот бы и миян округö сэтшöм басöксö кыськö вайны да садитны».

Мöдöтпырись, сiя жö гожумö, ме панталi этö пусö гортын ни — лесотехникум территория вылiсь усисö син вылам кык пуок. Перемскöйысся нiя вöлiсö тöдчöмöн томжыкöсь да учöтжыкöсь, но качыс сьöртi нач нiя жö. И сiйöн, что öнi нiя вöлiсö листын, кöда öддьöн тшöка, ровнöй лёдзöн да симметричнöя, топ рисуйтöмöн, пукалiс-видзсис быд торья улок вылын, а эшö сiйöн, что этна басöк да том пуоккес вöлiсö гортын ни, округас — гленитчисö меным эшö одззася öддьöнжык.

Сэтöн жö усис тöдвылö и П. Н. Богданчик, кöда колис ас бöрсянь Кудымкарскöй лесотехникумын тöдчана след — ас киöн садитöм да быдтöм дендрарий. И эта пуыс, кöда йылiсь мунö часöт басниыс, первуись пыртöм да садитöм миян округын тожö Пётр Нестерович киэзöн.

Дак мый жö бы эта сэтшöмыс? Кытшöм виль быдмас?

Роч кыв вылын сiя шусьö — черёмуха Маака. Ме жö комиöн шуи сiйö гöрд льöмпуöн. А мыля? Вылынжык эта йылiсь вöлi висьталöм ни. Сiйö дзир гöрд льöмыскöт, висьтавны мöднёж, Виргинскöй льöмпуыскöт соравны оз ков. Эд льöм да льöмпу — не öтiк. Öтiклаын ми шуам асьсö пусö, а мöдiклаын — сылiсь ягöдсö. Сэтчö жö гöрд льöмпулöн льöмыс, кыдз и миянiсьыслöн жö — сьöд да тöдчöмöн поснитжык. Гöрд льöмпулöн ягöддэс тожö сёянаöсь, дзир öм пытшк да кыв сотана кöраöсь, кыдз, шуам, öмидзлöн нето сэтöрлöн.

Гöрд льöмпулöн гортыс — Амур ю пöлöн бассейн, кытöн сiя пантасьлö вöррезын, кыдз и миян гортся льöмпу. А сiдз кыдз гöрд льöмпу оз пов мороззэзiсь да кыдз öддьöн басöк декоративнöй быдмас, бытшöма мунö миян поясiсь городскöй озелененнёын Челябинсксянь тшöтш Ленинградöдз.

Жаль вот только, что миян округись, кыдз и городсис, озелененнё коласiсь быдлаись этö басöк пусö он пантав. Но кыдз вылынжык вöлi висьталöм ни, округас сiя сё жö пыртöм.

И кин этö керис, сы йылiсь ме тожö юöртi. А мед паськöтны сiйö омöн округ пасьта, эта понда бöра жö колö сад радейтiсь морт-энтузиаст. Эд некытшöм колана да бытшöм удж ачыс оз керсьы. Сiйö колö керны мортлö.

БЕЛЬПУ

Мый эта сэтшöмыс? — юалас, натьтö, лыддöтiсь. Эта лох — миян ирга сувда жö, оттöмик да кузь листа кустарник, кöда семействоись лоö и облепиха. Но лохнас кустарниксö шуöны роч кыв вылын. А комиöн ме сiйö шуи бельпуöн. Мыля сiдз? Часöт улынжык висьтала.

Унажык пуэз вылын, кöдна эмöсь природаас да кöднö ми тöдам, гожумся листыс овлö зелёнöй рöма. Но шочыника ны коласын пантасьлöны и сера (руд) и, нельки, чочком листа пуэз. Пример туйö позьö вайöтны бадь-верба да гортся льöмпу. Ны листтэзлöн бан ладорыс зелёнöй, а мöдöрыс рудвевья. Видзöтан сiдз этна пуэз вылö лöнь погоддя коста — сулалöны зелёнöйöсь. Но вот уськöтчис вынажык тöвчик, мöдöртiс-павтыртiс нылiсь лист, пуэс пондöны мыччассьыны бель вачкöмöн, дзик тöвчикыс увья вежöны ассиныс рöм.

А то эм эшö природаас чочком тополь. Сiйö жö эшö шуöны и серебристöйöн. Этö сысянь, что пугырыс потiкö пулöн томыник листтэс вевттьöмöсь чочком гöнöн. Сёрöнжык, кöр нiя паськаласö, бан ладорсянь лоасö зелёнöй рöмаöсь и нельки свиттяланаöсь. А мöдöрсяняс нiя сэтшöм гöнаöсь и кольччасö, и этасянь одззамоз пондасö мыччассьыны чочкоммезöн. Сысянь и пуыслöн нимыс — чочком тополь. Первуись эта топольыс вöлi пыртöм миян округö эшö 1892 годö И. Я. Кривощёковöн и öнi пантасьлö городас уна пельöсын.

Чочком топольыс кодь жö и бельпу, сiдз кыдз сылöн оттöмик да кузь листтэс вевттьöмöсь мöдöр ладорсянь тожö чочком гöнöн, а бан ладорсянь эшö дзик резöмöсь поснит вотёка серебристöй рöма краскаöн. Сiйöн нiя и мыччассьöны быдкоста да быд ладорсянь серебристöйезöн или бель вачкöмöн. А этасянь и пуыслöн ним.

Цветитö бельпу июньнас вежкодь рöма да öддьöн дука цветтэзöн. Октябрь кежö сы вылын воöны негырись, кузьмöса, вевдöрсяняс небыт да тожö серебристöй рöма, а пытшкас ребристöй плоддэз-кöдзыссэз. Нiя несёянаöсь, но кöдзны кö муö, нельки стратифицируйттöг петалöны бытшöма.

Бельпулöн гортыс — Севернöй Америка. Но первуись ме сыкöт пантаси не сэтчин, кытöн некöр эг на вöв, а горт столицаын — Кудымкарын.

Природа дозоритан обществоын уджавтöн, гожуммезнас ме кадiсь кадö петавлi уджалан кабинетiсь, мед ветлöтыштны видзöтчöм могись то городскöй паркын да скверрезын, то отир карчйöррез да палисадниккез пöлöн, оз я эта коста усь мыйкö син вылö адззывлытöм да тöдтöм. Вöвлi, что и усьлiс, вот кöть бы сiя жö бельпуыс.

Сибöтчи ме кыдзкö сiдз Хорошев нима улицаöт даскыкьямысöт керку весьтöдз. Видзöта палисадникас — таволга кусттэз быдмöны. Ны колассянь, забор вевдöрöттяс лажмыта нёкыртчöм тротуар весьтöдз американскöй (ясенелистнöй) клён. Керку пельöс сайын веськыта öшынас видзöтö сирень. Этна миян важся тöдсаэз ни. А вот палисадник пельöсас быдман рябинник рябинолистнöйкöт пантасьнытö эстöн усис первуись. Сы вотöдз этö метр сувда кустарниксö, кöда миян вöррезын ачыс оз быдмы, ме эшö эг адззывлы, кöть литературасис сы йылiсь и кывлi ни.

Медöддьöн дивуйтанаыс усис син вылö медбöрын. Ылынжык улица бердсянь, клён да сирень сайын, ме казялi метр куим сувда серебристöй листа кустарник. Диво да и дöс сэтöн. Медодз меным нельки думайтсис, что эта шогалiсь бадь. Но бытшöмжыка видзöтчöм бöртi сё жö вежöртi, что бадьыс вылö сiя унасö оз вачкись. Сэтшöм серебристöй листа бадьсö эта вотöдз ме тожö некöр эг адззывлы.

Кинлöн эта пуыс? Кытiсь?

Топ-топ пöдналöм калиткаыс вöлi игана пытшксяняс, что и трек некöдöрö эз кер. Ёркöтчöмыс вылö паныт тожö некин эз шыась. Сiдз вöвлi и мöдöтпыр, и куимöтпыр вовлöм коста. А кыдзкö сiдз жö пöдана калитка сайсянь ме ёркöтчöм вылö юалiсö: «Кин сэтчин?» Ковсис висьтавны не только — кин ме сэтшöмыс, но и кысянь, мыйлö да кынымöтпырись ни татчö локтi.

Калиткасö осьтiс öтка хозяйка, роч, сэк эшö шöрöт годдэзся и, кыдз лоис вежöртана тöдсасьöмыс бöрсянь, Сальникова Руфина Фёдоровна — садик-яслиын воспитательöн век сьöрна уджалiсь морт.

Вежöртана, конешно, что сiя и карчйöрсö да садсö ассис меным мыччалiс, а öткоста юöртiс и сiйö, кысь сылöн лоисö вöвлытöмöсь миян местаын сэтшöм интереснöй да виль кустарниккез, кöдна кынымöтпыр ни вайöтiсö менö сы ордö. Важын, кöр вöлi строитöм керку, сы гöгöр озеленитöм понда Руфина Фёдоровналö сойыс ыстас Свердловскöй областись саженеццезöн посылка. Быдöнныс коласын вöлöмась и бельпу (лох) да рябинник рябинолистнöй. Сiдз этна кустарниккес первуись вöлiсö пыртöмöсь миян округö. И пантасьлö кö öння кадö шочыника рябинникыс и мöдiк местаэзын город пасьта, то бельпусö некытiсь да некинлiсь нельки омöн округ пасьта сэсся он пантав. Сiя дзир öтiк — дзир Руфина Фёдоровна садын. Но кутчисьны кö, дак и öтiк эта кустсянь сiйö позьö паськöтны жагвыв омöн округ пасьта.

Кыдз вылынжык вöлi висьталöм ни, бельпусö кокнит быдтыны сы кöдзыссэзiсь. Сэтчö жö, садитöм кö мам кустыс бытшöм местаö, аслас вужжезсянь сiя быд год сетö летöрöс, кöдö позьö гарйыны да садитны торья кусттэзöн виль местаö. Аслас вöвлытöм, дивуйтанаöдз басöк серебристöй рöма листтэз шогья, сiя сулалö сымдасö, мед лоны миян округын виль декоративнöй кустарникöн.