Глава V

Неделяöн одзжык, кор Светлана ветлöтiс видзöтчöм могись Демьяновскöй ытшкассэз пасьта, эта вöлi мöдiк бригада, Порсева да Демьянова коласiсь Öгань ыб вылын казялiс кöдзöм зöр-анькытш, гажмыштiс. «Вот тай кытöн вöлöм куканнеслö ой кежас вердчаныс».

Сiя жö лунö, кадсö öштытöг, нывка адззылiс и демьяновскöй бригадирöс, юалiс, кытчö сiя мöдö воштыны сымда зöр-анькытш. А бригадир, годдэза ни, кöсыник, но чож, кöть и мыкталiсь кодь басниа Иван Захарович, тыдалö, одзлань ни вежöртiс зоотехник юасьöмлiсь причинасö — не быдöнныслö жö лоны Порсеввез кодьöн — горöтчис:

— Верд, ыхкы да, куканнетлö. Он, дак сихос выхö дзимлялам.

Эта басни бöрсянь зöр-анькытшыс зоотехник юрись эз ни петав. Эта и вежöртана. Лобозниккöт да зутурункöт, кöднö ваялiсö куканнезлö ой кежас, сувтöтны ордчöн зöр-анькытшсö эз позь. Не öтiк лун сьöрна Светлана думайтiс, кытшöм туянажык кадö позис бы пондöтны эта йылiсь председателькöт басни.

Чожа мый, кыдз мыччассис зоотехниклö, и сiя тожö адззисис: кöр Таисьялöн петiсö бытшöмöсь суткися привессэз. И кыдз думайтсис зоотехниклö, не казявны сымдасö колхознöй юралiссез некыдз эз вермö. Ась этна привессэс вöлiсö эшö и не рекорднöйöсь. Ась нiйö и ачыс куканьвöдитiсь лыддис абутöммезöн. Одззаэс сьöртi, кöдна чулалöм год сьöрна триста граммся гырисьжыккезöн öтпырись эз петавлö — ны сьöртi Таисьялöн медодззаэс вöлiсö аскоддьöм рекордöн и некыдз мöднёж эта йылiсь зоотехник эз ни думайт.

Сiя лунö, öшлiсьöмыс бöрсянь, Светлана дзир недырик кежö пырыштлiс гортö, мед павжнайтны. А кöр локтiс правленнёö, вештiс бокö быдöс ассис удж, кутчисис «Молния» бердö.

Час бöртi и правленнёын, и клуб стена бердын, и гаражын медтыдалан местаэзын нiя öшалiсö ни. Быдыс вылын гöрдöн, гырися, мед тыдалiс ылiсянь, вöлi петкöтöм: «Июль месяцö том куканьвöдитiсь Таисья Кырасова босьтiс куканнез вердöмын шестьсот шестьдесят грамм мымда суткися привессэз! Поздравляйтам комсомолка Кырасоваöс медодзза успехöн!»

Вöвлiсö я эта вотöдз Порсевскöй колхозын сэтшöм привессэз да лэдзавлiсö я сэтшöм «гора» молнияэз — висьтавны сьöкыт. Но кыдз перво жö Светлана и думайтiс, эттшöм бур юöр казявтöмöн эз ло

Медперво сыкöт тöдсасисö бухгалтерияын уджалiссез: председательлöн годдэза ни да жöник сайö ветлытöм сой, шадраöсь чужöма Öльöн, экономист Вера да счетовод-кассир Раиса. Öтiк бöрсянь мöдiк, нiя петалiсö коридорöдз, лыддьöтiсö, а сэсся бухгалтериясянь эшö вель дыр кылiс эта йылiсь ас коласын горöн баитöм. Но эстöн Раиса, тыдалö, эз пöт. Кежалiс эшö и зоотехник дынöдз.

— Этö Таисьяыс, Савельевна, вермис сiдз куканнесö вердны? — кыдз бытьтö эз верит гижöмыслö, зоотехник вылö кваркышавтöг видзöттöн, юалiс кассир, ответсö видзчисьтöг, содтiс: — Öддьöн тай сiя, тыдалö, прока вöлöм. Пондöтчö вöлись уджалнытö да...

— А сэтшöм уж, нем баитны.

— Дак уна эд öддьöн сэк сiя деньгасö шедтас. Быдса тысеча, натьтö.

— Ась кöть куимö. Шедтöмсö абу жаль.

— Да абу. Сiдз тай горöтчи, уна, мыся, öддьöн да.

Степан Васильевичлöн, кыдз и Светланалöн жö, лякавтöм паза, штукатуриттöм стенаа да белиттöм потолока кабинетыс вöлi коридорлöн сай конецын. Мунтöн я, локтöн я, партийнöй секретарь пыр ветлiс коридорöттяс зоотехник жырок весьтöт. Но чулалöм год сьöрна и öтпыр эшö эз вöв, мед сiя, нарошно ли, сорасьöмöн ли, осьтiс сы жырö ыбöс, пырис, да то ли мыйкö юалiс, то ли висьталiс. А эстöн — на тэныт. Лыддьöтiс тыдалö, Таисья йылiсь гижöмсö, жагвыв осьтiс ыбöс, нёджжöвтыштiс порог сайсянь, пырис.

Светлана öнöдз эшö пукалiс «Молния» листоккез сайын, гижис, мед ыстыны нiйö мöдiк бригадаэзö да фермаэзö.

— Пуксьö, Степан Васильевич, — рочалiс зоотехник здоровайтчöмныс бöрсянь, мыччалiс пызан мöдöрись кык умöлик стул вылö.

— Да мый, поди... — шыасис партийнöй секретарь, видзöтöв-керис гижöм листоккез вылö. — Эз эд, тыдалö, Таисьяыс бöбöт. Кутчисьны мöдö уджалнытö, — öвтыштiс тшöканас «Молния» листок вылö.

— Мыля тi, шуат, мöдö, Степан Васильевич? Сiя эд важын ни кутчисис. Этö ми тiянкöт сы моз ог вермö да ог кутчисьö.

— Ми-ту да, — шыасис думайттöнняс партийнöй секретарь, ловзисис, а одзлань, кватитчöмöн ни: — А мый? Сё разь öшö мыйкö оз тырмы? Ваялöны ни öнi турунсö да...

— Ваялöны кытчöдз. Да кытшöм сiя турун. Басни эд öтiк. Куш лобозник да осока, уна я сiйöн куканнесö вердан?

— Сiдз, натьтö. А кысь буржыксö ваян, кор видззез ытшкöмöсь?

Эстöн зоотехник вöлись и казьмöтiс мöдiк бригадаись адззылöм зöр-анькытш йылiсь, кöда сылöн петавтöг видзсис тöдвылын.

Оз позь висьтавны, мый горöтчис бы эта вылö партийнöй секретарь, не вöвны кöбы эта кадö сы син одзын Таисья удж йылiсь «Молниялö?» Чожажык сэк нельки эта пантасьöмыс эз бы вöв. Öнi жö откажитнытö, тыдалö, вöлi недолыт.

— Да. Кöдзöм миян сэтчин зöр-анькытшыс...

— Но и кыдз жö бы сэк, Степан Васильевич? Оз туй сiйö куканнеслö ой кежас ытшкыны? — Зоотехник лэдзис ручкасö, каттьыштöмöн жмитыштiс морос бердас киэсö, пондiс видзчисьны. Партийнöй секретарь и öнi эшö эз тэрмась. Мыйкö дырна сiя думайтöв-керис ас кежас.

— Мыля, поди... Баитны колö предыскöт...

«Аха. Сiдзкö, позьö», — ятнöйжыка ни думайтiс зоотехник.

— А бур бы öддьöн... Эшö бы, видзöтан кö, привессэс содiсö.

— Баитны колö, — эшö öтпыр шыасис Степан Васильевич.

Гажмыштöм эта баснисянь, Светлана вились кутчисис удж бердö. Нывка одзлань ни веритiс, что сэтшöм привессэз кузя и председатель оз ни откажит. Сiдзкö, и кадсö öштыны вöлi нем, колiс баитны, öнi сiя тэрмасис кончитны бöрья листок. Пызан весьтас мышкырöн пукавтöн, зоотехник нельки эз и казяв, кöд коста вились оссис сы жырись ыбöс. Порог дорас сувтчыштiс ачыс председатель.

— Оз я тiян «Молнияныт» пöрьясь? Эдö я сорасьö лыддьынытö да оз я кол мöдпöл куканнезнытö öшлыны?

Зоотехник кылiс, кыдз неважынся гажыс öшö бöр. «Öшлö, мунö, асьныт, одö кö веритö», — корсис öзйыштöм чужöма нывка кыв вывсянь.

— Оз эд, Яков Терентьевич. Неöтпыр лыдди и öшлi бытшöма. А мый? Оз гленитчы мыйöнкö куканьвöдитiсьыслöн уджыс?

— Вöлi бы мыйлö. А этатшöм уджыссянь... — öвтыштiс тшöканас «Молния» листоккез ладорö, — ...öтiк вред.

Споритны председателькöт зоотехник и öнi эшö эз понды, сералöм могись нарошно дивуйтчöмöн одзлань юалiс:

— Да но бöра, Яков Терентьевич. Тi мый, былись я мый я этö баитат? Кыдз нö ме öнöдз некинсянь сымдасö эг кывлы?

Зоотехниклiсь сералöмсö председатель дзик эз и казяв.

— Эн лок сiя куканнес дынö (этö Таисья йылiсь), дак унаöн бы буржык вöлi. Эд эта бöрсянь сiя, сiдз и тöд, етшажык привессэз вылö оз ни согласитчы. И бур бы, вöл сiя öтнас сэтшöмыс. А то эд öнi сiйö и видзöт — мöдiккез сы сьöрö сiйö жö керны пондасö.

— Мый тi сэтiсь сэтшöм умöльсö адззит? Эта жö öддьöн бур, пондасö кö мöдiккез Таисьяыс сьöрö вöтчыны.

— А бурыс сэтöн мый, ме тiянлiсь юала? Тi жö, Савельевна, специалист, вежöртат, натьтö, что привессэс да йöлыс немтöг оз оллö. Сы понда эд вердчан, вердчан колö. А кысь ми эта мымда подаыслö сiйö пондам вайны? Ми жö сыкöт öтнасыскöт нерадöсь.

— Ах, вот мый тiянöс полöтö. Колана мымда вердчансö сетны од вермö. Ковсяс, дак эта йылiсь öтлаын правленнёыскöт пондам думайтны. А мый баитат нерадсялöмыс йылiсь, дак этö тi весь. Нерадсялiс кö кин вердчаныс увья, дак медодз ачыс куканьвöдитiсьыс, Таисьяыс. Но нерадсялiт кö тi, дак не вердчансö сетöм-вайöмсянь, а чожажык эта увья нильдалöм-панласьöмсянь. Некыдз мöднёж эта йылiсь он ни висьтав. Подакокувтыс вылö да вердчансö ваялöм вылö решеннёсö правленнё примитiс. Но тi, Яков Терентьевич, кыдз председатель, öтлаын бригадирыскöт, не виль подакокувт вылас, кыдз колö, пастучитны, не карта пытшкас вердны гожумбытнас бытшöмик сiдз и эд сетлö. Не эта увья я, мед только не сетны колананёж вердны подасö, тi и вердчансö тележкаэзнас деревня шöрас пöрлавлiт, и куканьвöдитiсьсö фермасис вашöтлiт, и, нельки бöрья подакокувтсö, сетöмсö ни, бöр ытшкит? — Баитiкас зоотехник вежöртiс, что эта бöрсянь куканнеслö зöр-анькытш йылiсь думайтны нем. Но чöвны председательыс сэтшöм басни бöрсянь, кöр сiя баитiс Таисья удж йылiсь, кыдз неколана йылiсь, зоотехниклöн вын эз судз. Нач мöднёж, обидитöм да лöгöтöм сы басниöн, бöртiжык нывка эшö горöтчис: — Кывзыны кö тiянöс, дак некытшöм пода колхозыслö и видзны оз ков.

Зоотехниклöн веськыт басниыс председательсö тожö сидзöтiс. Ассис думаэсö сiя эз сайöвт, кыдз эм — веськыта горöтчис:

— Праельнö! Ме понда колхознöй подаыс, кыдз шогöт, кыдз горшö пурт, — кöть вöл, кöть эн. Сымда и тöдан — ёркöтан, тöл и гожым вердчансö торкан, кыдз прорваö сюян, а толкыс сё сымда. Тырмас и сiйö, кöдö отирыс асьныс видзöны.

— Колхозниккес видзöны, дак ас понда. А мыйöн нö сэк колхозыс пондас овны, не видзны кö сылö колхознöй подасö?

— Олö тай.

— Олö, шуат? — Зоотехник сувтöтiс председатель вылö дивуйтчöмсянь ыждöм синнэсö. — Да миян жö джын отирыс ни колхозсис мунiс. Фермаэзас талун сувтöтны некинöс. Ытшкисьнытö бригадасис сизим мортöн петöны. Годiсь год колхознöй подаыс тшыгсяняс кулö. Вит километра туй колас трасса дорöдззас вочны ог вермö. Деревняэс вылö видзöтöмсянь сьöлöм гудыртчö. Правленнёас, кыдз чуланын чуддэз пукалам, кодяжык стулыс увтын абу. Год сьöрна йöлыс увтö флягаэсö босьтны ог вермö. Колхознöй кассаас некöр нятьöсь копейка абу. А государстволiсь одзöсалöмыс сизим миллион мымда. Не этö я тi, олöмнас и лыддят? Сiдз разь талун отирыс олöны? А миян олöмсянь эд синнэз ни осьтны оз позь. Отирыс одзö мыччисьны полöм петö. Стыдсяняс чужöм вылö кöть симöт кышав. Эта разь олöм? Позьö я сэтшöмсö олöмнас лыддьыны?

Зоотехниклö вöлi öддьöн охота, мед колхоз понда сьöлöмшогыс, кöдöн нывка олiс лунiсь лун, кöть öтпыр колананёж йиджис председатель ылöсöдз. Но нывка кылiс, что висьтавны быдöс йылiсь сiдз и эз вермы. Горöтчыны веськытжыка зоотехник öнöдз эшö эз лысьт, а мукöдлаас и колана кыввес эз адззисьö. Председательлö жö эта басниыс, вачкисис, былись нем туйö. Тырппес вылын риз-видзан шынньöлöн сiя видзöтöв-керис аслас специалист вылö, бöртiжык сы вылö жö, кыдз абутöм тор вылö, öвтыштiс кинас. «А-а, кывзыны эшö тэнö», — сiйöн сорöн сайöвтчис бöр.

«Вот тiянлö и баит», — нывка гажтöма ловзисис, уськöтiс öлöдзас киэсö, вель дыр кежö кольччис пукавны, чöлöмöн да вöрöтчытöг, думайтiс.

Примитны председательлiсь баснисö шутка местö эз позь. Сэтшöм торрезнас оз шутитö. Примитны сiйö быль местö аслас ылöсöн зоотехник тожö эз вермы. Горöтчы сiдз колхознöй подасö вöдитöм йылiсь кинкö рядовöй, не öддьöн грамотнöй колхозниккез коласiсь, вежöртны этö кыдзкö эшö бы позис. Но мед сiдз баитiс общественнöй хозяйство йылiсь ачыс юралiсь?.. «Не-е». Светлана öвтыш-керис юрнас. «А мыйсянь? Мыйсянь ми сэтчöдз локтiм, что нельки мед святöйыс вылö, асланым удж вылö, кöда керö миянöс мортöн, пондiм видзöтны, кыдз неколана да абутöм тор вылö, нельки сэк, кöр и адззам, и тöдам, и вежöртам, что асланым уджöн ассиным нянь кусöксö ог шедтö??? Мый миянöс керис сэтшöмнас? Не нiя я государствоыс карманiсь быд годся одзöссэс, дармовöй зарплатаыс, кöда понда, шедтытöмыс понда, месяцись месяцö ведомостяс гижсям? Нiя и только нiя! Эд эн сет государствоыс годiсь год этнö одзöссэсö, думайтны асланым удж йылiсь да керны сiйö отир моз, ми бы важын ни велалiм.

Кöр правленнёас некин эз ни вöв, гажтöм да мыдз Светлана чеччис пызан сайись, сьöкыт ноша моз нырыштан настроеннёöн иньдöтчис гортö. Зöр-анькытш йылiсь колана басниыс, кöда кежö нывка лöсьöтчис, сiя лунö кольччис баиттöг. Но сiя кадö, ась осока да лобозник, бригадирыс эшö ваялiс. Öнi жö Прокопий Егорович откажитчис и этаись. Видзчисьны сысянь одзлань кольччис нем, а видзны вердтöг куканнесö оз позь. Охота или не, керись моз бöра ковсис мунны председатель дынö.

Вежöрт колхознöй юралiсь колхозлiсь интерессэсö öтмоз зоотехниккöт, видзöтан кö, и баснинас сы дынö локны полöм эз бы пет. Таисья удж да колхознöй подасö видзöм-вердöм йылiсь сылöн неважынся, шуам сiдз — сьöлöмсянь признаннё бöрсянь, öшис не только мыйкö буржык вылö надейтчöм, öшис нельки охота пондöтны эта йылiсь баснисö. Но эта вöлi зоотехниклöн удж да долг. Сэтчö жö и зöр-анькытшсö эта вотöдз куканьвöдитiсьыслö сiя кöсйис ни, и кежны председателькöт басниись öнi эз позь. Сiйö колiс керны да керны сiдз, мед не повны эта бöрсянь куканьвöдитiськöт пантасьöмись. Эта думаöн сiя асылö Светлана гортiсь и петiс.

Правленнёас вöлiсö ни. Председатель кабинетын, юралiсь киння пукалiсö и гаражись механик, и фермаись заведующöй, и бригадир.

Светлана пырис сэтчö жö öтлаö, негорöн здоровайтчöм бöрсянь пуксис неылын ыбöс дынсянь.

— ...дак эд чассес, чассес абу, вочнытö немöн, — баитiс одзлань механик, зоотехникыс пырöм коста недырик кежö дзугöм баснисö.

— Егор Васильевич! — сорис председатель баитiсьсö. — Тöлнас вöлi наряд — нуöтны комбайннэсö сельхозтехникаö. Сэк тэ баитiн — туйыс абу, вочам гортын. Öнi, кöр локтiс кад кайны ыб вылö, комбайннэс тэнат вочтöмöсь сулалöны, а ачыт баитан — чассес абу.

Эта вылö механик чöлöмöн дзир жмитыштiс пельпоннэзнас.

— Кык неделя срок, Егор Васильевич, мед комбайннэс вöлiсö вочöмöсь. Бöртiжык ме öшö ачым тiян дынö кежала.

Механик, учöтик вывтыра да дженытик кикока, топ гном, мужичок, кöдалöн нельки челядьыс вöлiсö ас кодяс жö поснитöсь, веськöтчыштiс коккес вылö, иньдöтчис ыбöсö, а бригадирсянь сы сьöрö шутитöмöн эшö кылiс:

— Сiдз вот, Егорок. Он воч комбайнсö, сетасö тэныт киат кык чарла, пондан вундыны. Удж как раз тэ сьöртi, мышкырасьны оз кол.

— Тэ мый, Прокопий Егорович, пиннетö герйöтлан?

— Не горзыны жö меным комбайннэзныт понда.

— Думайтан, меным öтнасöлö быдöс понда горзыны да выговорресö кыскалны? Горзан и тэ, немöн лоас сюэсö дзимлялны дак. Выговорыс йылiсь казьмöтöм бöрсянь Светланалö тöдвылас вöлись усис, что лун кынымöн одзжык председательöс да партийнöй секретарьöс корлiсö районö. Турунасян страдаыс чулалiс, а джын вердчаныс колхозыслöн вöлi эшö кертöм. Сiдзкö, колiс думайтны, что юралiсьыс районсяняс бертiс не простöн

— Ог и думайт, — панласис сы коста бригадир.

— Мыля тэнат силос траншеяэс пöдналтöмöсь сулалöны? Öнiсянь сiсьтам-нильзьöтам, а тöлнас фермаас вердчантöг пондасö овны.

— Öтiк траншея пöдналтöм сулалö, тыртнытö немöн вöлi.

— Но эд сэтчин, Прокопий Егорович, сто тонн силос. Сiя тэнат месяц осьтöн олö. Думайт вот, мый сыкöт зэррес ултын керсьö.

— Тыртам талун-ашын, вермам дак.

«Сiдз вот тi годiсь годö фермаэслö вердчансö и керат, да мед эта бöрсянь эшö подаыс эз кув», — думайтiс зоотехник. А кöр бригадир сувтiс да оськöвтiс петанiн ладорö, Светлана горöтчис:

— Эдö на мунö, Прокопий Егорович. Часöт эшö куканнеслö вердчан йылiсь öтлаын баитны колö.

— Кутшöм öшö вердчан йылiсь?

— Кöдö ой кежас од ваялö.

— Эта йылiсь ми тiянкöт тöн бытшöма баитiм. Ме тiянлö коми кылöн висьталi — нем менам сэсся рукйöсь поданытлö ытшкыны, — лöгвевйöн шыасис бригадир, сувтчывтöг оськöвтiс порог сайö.

— Вот тэ сыкöт и баит. Мый сэк одзлань кернытö?

— Мыйöн ме тöда? — Председатель паськöтыштiс киэсö. — Кылiн эд, мый бригадирыс висьталiс — нем сэсся ытшкынытö.

— Кылi, конешно, и не первуись. Этö сiя и мöйму гожумбыт баитiс.

— А кытчö сылö воштiсьнытö, кöр силос траншеяэс öнöдз тырттöмöсь сулалöны, джын вердчансö вöлись керис? Эстöн ме думайта, бригадирсö тожö колö вежöртны.

— Да-а, — сэтчö жö нюжвылöн шыасис и фермаись заведующöй.

Эта вылын зоотехник баснисис öшискодь. Сiя и тöдiс, мый горöтчыны одзлань, но öткоста тöдiс и сiйö, что сылiсь висьталöмсö колананёж председательыс сё ни оз вежöрт.

— Ме сэсся ог тöд, мый эшö этна куканнезкöт... — пондöтiс одзлань председатель. — Кузь гожумбыт ны йылiсь и басни. Лунiсь лун сiйö эстöн и кылан — куканнез да вердчан. Позьö думайтны, что этася тiянлö, Савельевна, и баитны нем йылiсь.

Зоотехник вежöртiс — вились пондöтчö спор, кöдаын некин некинöс оз вермы, быдыс кольччас ас дор, а дело керöм оз ло. Оланас часто сiдз и керсьö. Абу кö кинлö охота керны ассис удж, колана баснисö сiя вуджöтö неколана спорö, кöд коста кинöскö позьö лэбтыны смех вылö, мыйынкö винитны, мыйöнкö повзьöтны, обидитны, оскорбитны и сiйöн сорöн кежны бокö лэбтöм вопрос дынiсь. Эта вылö жö вачкисисö öнi и председательлöн бöрья кыввес — «баитны нем йылiсь». А мый кольччис керны зоотехниклö? Бергöтчыны да петны бöр сiя эз вермы. Не сы понда локтiс, кöть и кылiс ни — мый понда локтiс, надейтчыны сы вылö тожö оз позь. Чöвны? Чöлöмсянь прокыс тожö неуна.

— Кытчö нö воштiсьны, огö кö вермö колананёж подасö вердны? Тонна турун огö кö вермö ой кежö вайны. Мыйлö нö сэк вöлi правленнёыслö сэтшöм решеннёсö примитны?

— Бöра тi эта решеннё бердö...

— А мый бердö эшö этася? Эд кер тi перво жö сiдз, кыдз сэтчин гижöм, дак эта йылiсь и басни бы некытшöм эз вöв. Эта жö смех, Яков Терентьевич, смех, что ми ассиным решеннё тыртны ог вермö! Думайтö пожалуйста, киннэз ми сэтшöммес эта бöрсянь? Кытшöм юралiссэз? Кин миянлö веритас? Кыдз отирыс видзöтас?

Басниыс коста кыдзкö нач видзчисьтöг, пырис партийнöй секретарь, чöлöмöн пуксис неылö юралiсьыс пызан дынсянь. Ачыс Яков Терентьевич нетэрмасьöмöн öзтiс куритны.

— Кутшöм нö сэтöн смех, кöр ытшкынытö нем?

— Тырмас тiянлö, Яков Терентьевич, — «ытшкынытö нем». Мыдзи ме, öтiксö тiянсянь кывзыны. Неохота вердны подасö, дак сiдз веськыта и висьталö, — горöтчис зоотехник, но сэтöн жö, кватитчöмöн: — Ой, да мый этö ме висьталöмсö ни тiянлiсь мöдпöв юала. Тi жö меным неважын öддьöн бытшöма висьталiт, что тiян понда эта колхознöй подаыс «кöть вöв, кöть эн». Сэк висьталö, пожалуйста, мый эстöн специалистыслö кольччö керны? Подасö тшыгйöтöм понда меным тiян зарплатаныт оз ков. Сувтöм лöнь коласын сигаретасö куритöм бöрсянь, пышшалан синнэсö вывлань лэбтывтöг Яков Терентьевич, вöлиськö, юалiс:

— Но ладно. Кысь, мый тэ адззан куканнетлö ытшкыны?

— Мöдiк бригадаын кыкдас гектар мымда зöр-анькытш ытшкытöм.

— Кылан-он, Степан Васильевич... — агрономыслань бергöтчöмöн пондöтiс председатель, — ...мый öшö гожым шöрнас куканнеслö пондöм колсьыны? — а одзлань, ответсö видзчисьтöг: — Но не-е, Савельевна, этö тэ ве-есь, зöр-анькытшыс йылiсь. Сы ултö миян ферма дынас нёль траншея простöсь сулалöны. Или тэ подасö тöлйöтны таво он думайт?

Председательлiсь баснисö зоотехник öнi кылiс да эз кыв. Öнi сылö медöддьöн колiс тöдны мый висьталас партийнöй секретарь. Светлана видзчисис. А Степан Васильевич думайтöв-керис мыйкö дырна, вачкисис, сё эшö эз тöд, кöдöрö да мый горöтчыны.

— Траншеяэс — да, сулалöны. Но ме думайта, зöр-анькытшыс и куканнеслö лоас. Небытшöм, Яков Терентьевич, примитöм решеннёыс бöрсянь гожумбыт сы йылiсь баитны да нем не керны.

— Дак мый сэк?..

— Ытшкыны колö, мый эшö этася. Ытшкыны. Ась вердöны. Эта йылiсь миян зоотехникыскöт басниыс вöлi ни.

— Но мый жö сэк?.. — председатель паськöтыштiс киэсö.

Светлана кывзiс, и аслас пеллезлö эз верит. И не висьтавны — счастьесянь, а мыйсянькö сэтшöм вылö вачкисянасянь сiя кылiс, кыдз пондiс сотны синнэсö да кильöтны нырсö. И мед только не мыччавны этö быдöнныс син одзын, сiя перыта уськöтчис ыбöсö.

Аслас жырокын ни зоотехниклö тöдвылас вöлись усис, что кукань карта йылiсь басниыс кольччис баиттöм. Но бертны бöр председательыс кабинетö вын сiя лунö нывкалöн эз ни судз.