Орöмыс оз йитсьы

Öтiк акта пьеса

ОРСÖНЫ:

ЛЕНА — фермаын уджалiсь;

СЕРЁЖА — сылöн зон, квать годся;

АНАСТАСИЯ ЯКОВЛЕВНА — Леналöн мам;

АЛЕКСЕЙ — Леналöн мужик;

ВАСИЛИЙ АНДРЕЕВИЧ ― сосед.

Действиеыс мунö деревняын, гожумся рытö, АНАСТАСИЯ ЯКОВЛЕВНА керкуын. Жырись веськытлань да одзись стенаэзын — куим öшын, шульгаланьсянь заборкаын кык ыбöс: узьлан жырö да комö. Обстановка коласiсь: комод, пызан, кынымкö стул, стенаэз бердын часыэз, зеркало. Осьта öшынöт öтöрсяняс кылö нывкаэзлöн нюжвыла да проникновеннöя сьылöм. ЛЕНА мышкырöн пукалö öшын одзын, горзö.

АНАСТАСИЯ ЯКОВЛЕВНА (мыччисьö комсянь, сувтö жыр шöрö, чöлöмöн видзöтöв-керö нылыс ладорö, дыр мыйись). Мый нö бöра талун сэтшöмыс лоис?

ЛЕНА (повзьöмувья дрöгнитö, дзар керыштö мамыс ладорö, пыдына ыш ловзисьöм бöртi пондö чышкыны синваэсö). Нем эз.

АНАСТАСИЯ ЯКОВЛЕВНА. Мыйсянь нö зэрмис, нем эз ло дак? (Оськöвтö матöжык нылыс дынö, пуксьö ордчöн).

ЛЕНА. Ме ачым ог тöд. То ли олансö ассим жаль лоис, то ли эшö мый. Места тай ог адззы. Сьöлöм öмöт готов петны.

АНАСТАСИЯ ЯКОВЛЕВНА. Олансö тэныт ассит не жалейтны, а лöсьöтны колö. Жалейтöмсяняс сiя не буржык, не гажажык оз ло.

ЛЕНА (мамыслань бергöтчыштöмöн). Кыдз нö ме сiйö лöсьöта-а-а? Кы-ы-ыдз?

АНАСТАСИЯ ЯКОВЛЕВНА (чорытакодь, лöгтöг). Мужиккöт, мужиккöт тэ годдэзын овны колö, вот кыдз.

ЛЕНА. Кысь нö ме сiйö, мужиксö, вая? Деньга вылö эд он неб...

АНАСТАСИЯ ЯКОВЛЕВНА (дыр мыйись чöлыштöм бöртi). Кывсьö тай, бытьтö бы Öльöшкаыт гортö бертöм.

ЛЕНА. Вайöтöм тай вöрисьыс, абу вермöм некытчö сэтчин юрсö пуктыны да.

АНАСТАСИЯ ЯКОВЛЕВНА. Пантасьлiт я мый я ни кöдкö коста?

ЛЕНА. Вовлiс талун фермаöдззас.

АНАСТАСИЯ ЯКОВЛЕВНА. Мый нö баитö, вовлiс да?

ЛЕНА. Бöра тай öтлаасьны корö. Кöсйисис рытнас вовлыны, гортас нуöтны.

АНАСТАСИЯ ЯКОВЛЕВНА. Вот и бур, кöсйисис дак...

ЛЕНА. Мый сэтöн бурыс?

АНАСТАСИЯ ЯКОВЛЕВНА. Мыля жö бöра мый? Öтлаасят бöр да и пондат овны. Не öтнат сё жö...

ЛЕНА. А тэ разь он тöд, кынымись ни ми сыкöт öтлаасьлiм да янсöтчылiм? Уна я этаись прокыс? Или сiдз, век сьöрна и пондам этöн оланнас отирсö смешитны?

АНАСТАСИЯ ЯКОВЛЕВНА. А кин тiянöс тшöктö янсöтчынытö? Öтлаасьö да и олö отир моз. Некинöс од пондö смешитны.

ЛЕНА. Олö, шуан, отир моз? Да кин нö сыкöт, сэтшöм некодя тварьыскöт отир моз олас?

АНАСТАСИЯ ЯКОВЛЕВНА. Мыйöн сiя тэныт сэтшöм некодя лоис?

ЛЕНА. Да быдöсöн.

АНАСТАСИЯ ЯКОВЛЕВНА. Сiдз, дак сэтшöмыс сайö и мунны эз ков. Мыйлö нö сэк юртö яташитiн? Али одзжык эн тöд, кытшöм сiя вöлi?

ЛЕНА. Кысь нö меным вöлi одзлань тöдны, кытшöм мужикöн сiя лоас? Думайтi, вежсяс, лöсямас, кöр öтлаасям, дугдас юны. Вот и мунi. А сiя не только лöсямны да вежöртсьыны, эшö одззася бöбöвжык сы местö лоис.

АНАСТАСИЯ ЯКОВЛЕВНА. Кытшöм бы эз вöв — сiя тэнат мужик. И кагаыт сысянь быдмö.

ЛЕНА. Но и мый? Быдмö тай.

АНАСТАСИЯ ЯКОВЛЕВНА. А тэ разь сы йылiсь нем он и думайт, что сiя тэнат айтöг талун? Эд сiя ылöстö ни, и сылö ай колö. Он разь адззы, кыдз медбöрья кадö соседыс бердö лякасьны пондiс?

ЛЕНА. Но и ась лякасьö. Мый сэтöн умöльыс? (Чöлыштöм бöртi). Вöв сiя Серёжкаыслö айöн, дак и ме бы сы, бердö тожö лякаси.

АНАСТАСИЯ ЯКОВЛЕВНА (нылыс вылö кинас зэркыта öвтыштöмöн). Мун жö, стыдтöм, эн ылавлы баснисит! Думайтан жö, он, мый баитан? Сiя тэсся чуть я не кыкись пöрисьжык да. Ловья мужикыт вывтi лысьтан сымдасö баитнытö.

ЛЕНА. Но и ась пöрисьжык, зато морт — не туник, не винагаг кытшöмкö. Сэтшöмыскöт и пантасьнытö гажа, и баитнытö кокнит да бур.

АНАСТАСИЯ ЯКОВЛЕВНА. Дугды жö — кöдö оз ков. Нач тай öшин баснисит. Кытшöм бы сiя сэтчин эз вöв, йöз кагаыслö айнас сё ни оз ло.

ЛЕНА. Мыйöн тöдан? Батi, эшö буржыкöн лоас. Сiя öнi ни Серёжкаыслö роднöй ай местö.

АНАСТАСИЯ ЯКОВЛЕВНА. Дугды, висьталiсö тэныт, ладтöм баснисö баитны. Эн пырт менö грекас пöрисьувья! Эн позорит асьтö отирыс син одзын! Кинкöт пиянтö нажывитiн, сыкöт и ов. (Чöлыштöм бöртi.) Мый тэ талун сылö висьталiн пермаас, шуан, вовлiс да?

ЛЕНА. Мый ме сылö висьтала? Споритöв-керим ас коласын да сiйöн-сорöн и янсöтчим.

АНАСТАСИЯ ЯКОВЛЕВНА (сьöвзьö.) Тьпу тэнö, артладтöмöс.

ЛЕНА. А мый меным сыкöт окасьны я мый я?

АНАСТАСИЯ ЯКОВЛЕВНА. Не сiйö тэныт шуöны, мед.

ЛЕНА. А мый нö эшö?

АНАСТАСИЯ ЯКОВЛЕВНА. Вылына тэ, Ленка, асьтö лэбтан, кыдз ме видзöта дак. (Осудитöмöн öвтышалö öтмöдöрö юрнас.) Ой, вылына-а-а. Зон эд, висьтала, тэнат сыкöт, зо-о-он.

ЛЕНА. Да буржык бы уж мöдiккöт кинкöт, ежели сэтшöмыскöт. Да мый эд керан, эз кö колана кадö некин сысся буржыкыс пантась. А сэтшöмыс меным сэсся вöв кöть эн — дарöм оз ков.

АНАСТАСИЯ ЯКОВЛЕВНА (вились сьöвзьö.) Тьпу тэнö, стыдтöмöс, арттöм баснинат. Ме тэныт зоныт йылiсь — айтöг, мыся, быдмö, а тэ... (Öвтыштö кинас нылыс вылö.)

ЛЕНА. Кывзы жö, мама. Тэ мый меным джöмыт и паныт сё öтiксö тотян? Сiя дзир и басни — зоныт да зоныт.

АНАСТАСИЯ ЯКОВЛЕВНА. А кин йылiсь нö эшö тэныт тотьнытö, кöр кагаыс айтöг быдмö? Кин йылiсь этася думайтнытö?

ЛЕНА. А ме йылiсь?.. Ме йылiсь тэ мыйкö думайтан жö — он? Ме эд кытчöдз тожö ловья морт. И меным аслым тожö охота морт оланöн овны. Или тэ этö нем туйö он и пукты?

АНАСТАСИЯ ЯКОВЛЕВНА. А ме разь тэныт часöт не сы йылiсь баита. Кин тэныт оз сет морт оланнас овнытö. Ме тэнö ог видз, эг домав. Висьтала тай вот — öтлаась мужикыткöт да и ов. И зоночкаыс аймам коласын лоас.

ЛЕНА. И рад бы, да сайкалiс менам сы дынö сьöлöмö. Одзлань ни тöда, что одззася буржык оланыс миян коласын сё ни оз ло. А одззакодьсö меным, батя, сэсся оз ков.

АНАСТАСИЯ ЯКОВЛЕВНА. Но сэк ме ог тöд, кыдз эшö тэныт... мый эшö... (Грöзитчöмöн.) Видзöт сэк... кыдз тöдан... (Бергöтчö мöдöрö.)

Лена ыш ловзисьö, мышкыртöм юрöн пондö бöрйыны чуннес коласын чышьян бердiсь сыррез. Кылö автомашиналöн öшын увтö сибöтчöм.

ЛЕНА (перыта дзар керыштö öшынö, бергöтчö бöр, негорöн да повзьöмöн). Но вот и касьтывлiм ас юр вылö.

АНАСТАСИЯ ЯКОВЛЕВНА. Мый, бытьтö, сiя ни локтiс? (Сувтö.)

ЛЕНА. Сiя тай, тыдалö. (Сувтö мамыс сьöрö). Кытчö жö бы менам сы син шогья?.. (Думайттöнняс пондö нёджжасьны öтмöдöрö.)

АНАСТАСИЯ ЯКОВЛЕВНА. Дугды жö-ö, дугды-ы! Эн ни пет кучиксит! Пукав, пуксьы да! Оз сiя тэнö ловья вывтi сёй! Да баит, менам, бытшöмика. Абу ни челядёккез — отирсö смешитны. Чапкы юрсит челядь мывкыдтö. Пиянныт йылiсь думайтны колö. (Сайöвтчö комö.)

Лена видзöтыштö зеркалоö, öшöмкодь выраженнёа синнэзöн жагвыв пуксьö бöр, öтöрсянь кылöны сибöтчан оськöввез, ёркöтчöм, оссьö ыбöс.

АЛЕКСЕЙ (ыбöс колассяняс). Позьö-оз?

Лена аслыс казявтöг сувтö, бергöтчö пырисьыслань мышкас.

АНАСТАСИЯ ЯКОВЛЕВНА (мыччисьö комись ыбöс коласын, негорöн). Да позьö, позьö. Мыля жö бöра оз?

АЛЕКСЕЙ (вуджö порог омöн, сувтчыштö). Здоровöн олан, Анастасия Яковлевна.

АНАСТАСИЯ ЯКОВЛЕВНА. Локтан здоровöн. Пуксьы, шоччись.

АЛЕКСЕЙ. Спасибо. Эг öддьöн мыдз. Ме баитны локтi. (Сибöтчö, пуксьö стул вылö, чöлыштöм бöртi.) Кытöн нö Серёжкаыс?

АНАСТАСИЯ ЯКОВЛЕВНА. Баитö, баитны локтiн дак. А зонныт öтöрас, натьтö, кытöнкö челядьыскöт котрасьö. Кытöн сылö этася лонытö? Ас кок вылас ни öнi да. (Сайöвтчö бöр, чожа мый, киас кружкаöн, петö комись, сибöтчö зятьыс одзö.) Ю жö. Горшыт эд, натьтö, косьмö.

АЛЕКСЕЙ (босьтö, юö, бергöтö кружкасö бöр). Спасибо.

АНАСТАСИЯ ЯКОВЛЕВНА. На здоровью. (Босьтö кружкасö, нылыслö.) Мый нö öшö бöра мышнат сулалан? Баитö, пуксьы да.

ЛЕНА (бöрас дзар кертöг). Баитат тай. Мый нö эшö этася колö?

АНАСТАСИЯ ЯКОВЛЕВНА. А кытчö уж тэкöт. (Недовольнöя öвтыштö нылыслань кинас, сайöвтчö комö.)

СЕРЁЖА (горöтлöмыс кылö öтöрсянь, осьта öшын весьтын). Мама! Мама! Кин миянö машинанас локтiс?!

ЛЕНА (мышкыртчыштö осьта öшын весьтö). Пыр лок керкуас — адззылан.

Посöдзын кылöны негора да перыт оськöввез. Керкуас перыта пырö СЕРЁЖА, но казялö стул вылiсь папсö, тöдö сiйö, сылань полöмöн видзöттöн да ылына орддьытöн, жагвыв сибöтчö мамыс дынö.

ЛЕНА (пуксьö, малыштö зонсö юрöттяс). Но тöдiн, кин локтiс? Серёжа чöлöмöн мышкыртö юрсö, жмитчö мамыс бердö.

АНАСТАСИЯ ЯКОВЛЕВНА (мыччисьö комсянь, сувтö ыбöс коласас, внучекыслö). Эта эд тэнат папыт и эм. Вунöтiн я мый я? Мун, здоровайтчы. Сет папытлö китö. АЛЕКСЕЙ (чöлыштöм бöртi). Былись разь менö вунöтiн? Мый нö он здоровайтчы? Лок ме дынö. Ме эд тэла машинанас локтi. Мунан мекöт кабинаас?

Серёжа чöлöмöн лэдзö юрсö эшö лажмытжыка.

ЛЕНА. Но мун, папыт корö дак. Мыйись нö повзин? Батi, кöть öтiк кампетöн гöститöтас. (Пондылö бы татшкыны зонсö ас бердсис.)

Серёжа тарашитчö коккезнас, кыкнан кинас кутчисьö мамыс бердö, негорöн пондö горзыны. Сы коста жö Алексей лапкöтыштö киэзнас аслас карманнэз кузя, но дзик öнi вöлись казялö, что некытшöм гöстинеч сьöрас абу, паськöтыштö киэсö да лэбтыштö пельпоннэсö.

ЛЕНА. Но чöв, эн горзы. (Малыштö зонсö юрöттяс, рамыника.) Мунан папыт дынö овнытö? Видзöт, сiя мымда тэныт курорт вывсяняс гöстинеччесö вайöм — оз и тöд, кытшöм карманiсь мый кыскыны.

АЛЕКСЕЙ. Но ладно тэныт пиннетö герйöтлыны! Вунöтчи ме талун эта йылiсь. И дума мыйкö юрын эз вöв.

ЛЕНА (мужикыслiсь баснисö кывзытöг). Адззан вот, кыдз тэ сiйö учöтсянь радейтiн, что сiя тэись, кыдз биись полö. Роднöй айыс дынö нельки сибöтчыны оз лысьт.

АЛЕКСЕЙ. Да но бöра и оз ни лысьт. Не оз лысьт, а вунöтiс менö этöн каднас... кытчöдз гортын эг вöв.

ЛЕНА. Баит — вунöтас. Висьтав уж веськыта — кидтiн кодя мывкыднат ас дынсит.

АЛЕКСЕЙ (горöн ни). Ась тэ нёж, ась! Кидтi и кидтi! Мый сы вылö видзöтнытö? Мый кляпсö сiя эшö ылöстö? Велалас, колö дак. Лöсьöтчы часöт жö да мунны колö. Видзчисьö сэтчин машинаыс. Недыр кежö меным сiйö сетiсö.

ЛЕНА (дивуйтчöмöн.) Мунны, шуан? Кытчö жö бы?

АЛЕКСЕЙ. Гортö! Кытчö эшö этася?

ЛЕНА (шутитöмöн). Гöститны я мый я?

АЛЕКСЕЙ (местасис чеччытöн, горöн). Тэ мый меным сэтöн комедиясö орсан? Мый кöдö оз ков, юасян? Кытшöм эшö гöститны? Овны ме тэнö нуöта!

СЕРЁЖА (полöмöн, синваэз сорöн). Мама-а!

ЛЕНА (зоныслö). Чöв, эн горзы, эн пов. (Жмитö морос бердас, мужикыслö.) Ах, во-о-от кы-ыдз! Овны, шуан? А дыр кежö я?

АЛЕКСЕЙ. Да пыр кежö. Мый тэ, кöдö оз ков юасян?

ЛЕНА. А тöдан жö — он, кынымöтпырись ни тэ менö пыр кежö овнытö нуöтан?

АЛЕКСЕЙ (чöлöмöн пуксьö бöр, кыскö папиросаэз, пондö öзтыны куритны). Но... мöдöт... не... куимöтпырись.

ЛЕНА. А ноко думайтышт буржыка. Не нёльöтпырись я?

АЛЕКСЕЙ (нервнöя шупкö кисис сотöм истöг, лöгöн). Ась и нёльöтпырись! Мый сэтöн сэтшöмыс? Мукöдыс эшö не сымдаись янсöтчывлöны да öтлаасьлöны...

ЛЕНА (тожö вежсьыштöм голосöн ни). Но и ась! Ась, кинлö сiдз гленитчö! А ме сэтшöм олансö тэкöт пöттöдз олi! Пöттöдз тэсянь ноппесö кыскалi! Пöттöдз курыт-зубытсö терпитi! Пöттöдз синваэсö кисьтi! И меным сэтшöм оланыс сэсся дарöм оз ков. Мыдзи ме тэкöт олансяняс! Тырмас!

АЛЕКСЕЙ (рамжыка ни.) Да не, Ленка. Оз ло сэсся сэтшöмыс.

ЛЕНА. Сiдз, натьтö, ме тэныт и верита, мый нö бы ог да.

АЛЕКСЕЙ. Висьталöны жö тэныт — оз ло. Честнöй кыв сета, вот адззылан.

ЛЕНА. Донтöм тэнат кылыт, кыдз и совестьыт жö. Да и недыр кежö, кытчöдз стопка горшат оз сюр. Ме тэнö важы-ы-ын ни тöда.

АЛЕКСЕЙ. Да ог понды ме сэсся юны, ог. И öмö некöр ог босьт. Весь я мый я сы дырнасö веськöтчи?

ЛЕНА. Эн кошшы бöбöввесö. Этö тэ сылö висьтав, кин тэнö оз тöд. Сизим год сьöрна ни сiдз баитан, а баснисит прокыс сё сымда. И ме сэсся тэныт öтiк кывлö ог верит. (Мыйкö дырна кежö лöньсьöны.)

СЕРЁЖА (гусьöнмоз.) Мама, а дядя Васяыс тэнö чилькöтчыны корис.

ЛЕНА. Ой, Сергунька. (Кватитчöмöн дзар керыштö часыэз вылö.) Былись тай кадыс уна ни. Мый нö тэ меным перво жö эн висьтав? Нач и нач ме сы йылiсь талун вунöтчи. (Перыта сувтö, лэбтыштö пельпоннэс вылiсь юр вылас чышьян, иньдöтчö ыбöсö.)

СЕРЁЖА. Мама, эн коль! Ме тожö тэкöт муна! (Уськöтчö мамыс сьöрö.)

АЛЕКСЕЙ (чепöссьö коккес вылö). Кытшöм эшö сэтöн дядя Вася?!

АНАСТАСИЯ ЯКОВЛЕВНА (мыччисьö комись ыбöс коласын). Да сусед сiя миян, сусед. Тöдан эд, натьтö, Василей Öндреевичсö, кöда бухгалтернас правленнёас уджалö? Сылöн иньыс вексö шогалiсь вöвлi, некинöс нельки эз и вайлы. Öтiк пиян эз вöв. А неважын и ачыс кулiс. Эттшöм то бытшöм морт ачыс, Василей Öндреевичыс. И винасö сiя оз ю, и табаксö оз курит, и кöзяйсвосö кужö-вермö видзнытö, а вот на тэныт, сэтшöм несчассё юр вылас — чунь öтнас керкуас кольччис.

АЛЕКСЕЙ. Ах, вот мый. (Бертö бöр, вились öзтö куритны, мыйкö дырна думайтöв-керö ас кежас.) Дак эд том эшö сiя. Мöдöтпырись гöтрасьны вермас.

АНАСТАСИЯ ЯКОВЛЕВНА. Да абу, сiдз-ту, пöрись, нёльдас саяс кытöнкö, и бытшöм öддьöн, висьтала, оз ю не оз курит да... А дзир öтнас вот кольччис. Сiйöн Ленаыс, рыт-асывнас мöссö высьтыны и ветлывлö.

АЛЕКСЕЙ. А нiя сыкöт не öнджа сэтчин?.. Но кыдз сэтöн?.. Не кукры-мукры ас коласаныс?

АНАСТАСИЯ ЯКОВЛЕВНА. Да мыля жö бöра?.. Нем тай кытчöдз сэтшöмсö эг казявлы. Сiя эд унаöн пöрисьжык Ленаысся да...

АЛЕКСЕЙ (Анастасия Яковлевналiсь одзланься баснисö кывзытöг ни). Дак вот мыйын делоыс. Вот мый увья сiя аслас мужик вылö дзар оз и кер. Вот мый увья мекöт бöр и оз мун! Öткаса соседыслiсь, сiдзкö, мöссö высьтö? А öткоста и асьсö тожö!.. Но часöт ме нылö мыччала! (Шупкö кок увтас биа папиросасö, лöга нильыштö сiйö джодж бердö, вились чепöссьö кок йылö.)

АНАСТАСИЯ ЯКОВЛЕВНА. Да чöв жö, Öльöксей. Мыйлö весись грексö лэбтан, нем он тöд да? Локтас часöт Ленаыс, сыкöт и баит.

АЛЕКСЕЙ (одз да бöр пондö ветлыны жыр пасьта, ас кежас дивуйтчöмöн). Вот этö да! Некöр бы эг и думайт. Ловья мужикыс вывтi?.. Вот уж тютя, дак тютя жö и эм!..

ЛЕНА (осьта ыбöс колассянь, пыртöнняс). Этö тэ кин йылiсь сiдз? Ме йылiсь? Кинкöт, кысь тэ менö тютянас кутiн? Ловья мужикыс вывтi, шуан? А тэ ме вывтi, разь не ловья вывтi медодзза годсянь неделяэзöн гортö эн вовлы? А тöдан жö кöть, он, кытшöм тэись мужикыс? Кытшöм гаж тэ кодьыссянь? Кытшöм кокньöт?! Тэ менö кöть öтпырись бердат жмитiн? Öтпырись окалiн? Кодя тор кытшöмкö козьыалiн?

АЛЕКСЕЙ (дивуйтчöмöн). Видзöт тэ, мый эшö сылö пондöм ковсьыны. А этö тэ эн адззыв? (Иньыс дынö паныт сибöтчытöн, вайöтö сылö ныр увтас жмитöм кулаксö.)

ЛЕНА. Сiйö дзир ме тэсянь и адззывлi. Сiйö и тöда. Сы вылö только тэнат прокыт и эм.

АЛЕКСЕЙ. Кытöн Серёжкаыс?

ЛЕНА. Кытöн бы эз вöв. Тэныт сы дынöдз некытшöм дело абу.

АЛЕКСЕЙ. Кыдз этö некытшöм дело абу? Мый ме сылöн не ай ли мый? Лöсьöтчы часöт да мунны колö. Нем эстöн весись кадсö сёйны.

ЛЕНА. Ог и думайт. Мыйöн локтiн, сiйöн и мунан.

АЛЕКСЕЙ. Ме тэныт часöт мыччала «сiйöн мунан!» (Жмитöм кулаккезöн уськöтчö иньыс вылö.)

АНАСТАСИЯ ЯКОВЛЕВНА (киас ухватон мыччисьö комсянь). Дугдö грешитнытö! Баитö отир моз. А то ме часöт кыкнаннытö öбрала.

Алексей лöньсьö, жагвыв бертö бöр аслас местаö, пуксьö. Лена, чöлöмöн, лэдзчисьö осьта öшын весьтö.

СЕРЁЖА (öтöрсяняс.) Мама! Мама! А ми дядя Васяыскöт видз вылöдз ветлiм! Видзöт, мымда цветтэсö тэныт вайим!

ЛЕНА (öшынöттяс, паныт зоныслö). Спасибо, Сергунька! А мый нö керкуас он пыр?

СЕРЁЖА. Ме коли пола.

ЛЕНА. А дядя Васяыс кытöн?

СЕРЁЖА. Да вот жö сiя ордчöн сулалö.

ЛЕНА. Но часöт ме сэк ачым петала. (Сувтö, иньдöтчö ыбöслань.)

АЛЕКСЕЙ. Ме вот тэныт, тютя, часöт петала! (Иньсö одзалöмöн уськöтчö ыбöс дынö, игналö сiйö крючок вылö). Он тэ менам талун эстiсь ловйöн пет. (Кыскö пурт, оськöв, мöдiкö керö иньыс ладорö.)

АНАСТАСИЯ ЯКОВЛЕВНА (повзьöмувьяс уськöтö кисис укват, кутчисьö юр бердас). Ой, отир! Вияс!

ЛЕНА (шардöм синнэзöн уськöтчö öшын ладорö, корöмöн). Василий Андреевич, кут киэт вылö! Бытшкалас!

ВАСИЛИЙ АНДРЕЕВИЧ (öтöрсяняс.) Чеччöвт öшынас!

Лена сы коста жö уськöтчö осьта öшынö.

Занавес