Мöдiк картина

Правленнёын, асывнас, шондi петан кадö. СИЛАНТИЙ дед, бедь вывтi коксö вожмöвтöмöн, пукалö öшын одзын, куритö. Кыйтöм баличаа юрöн, бордпавкйöн пырö ДАРЬЯ СЕМЁНОВНА,

ДАРЬЯ СЕМЁНОВНА (жыр пасьта öтмöдöрö нёджжасьтöн). Учкисьыс менам татчö эз пырав?

СИЛАНТИЙ. Кытшöм эшö учкись? (Бергöтчö пырисьыс ладорö, жагвыв лэдзö коксö бедь вывсис.)

ДАРЬЯ СЕМЁНОВНА. Но нылö инö, Тайкаыс менам.

СИЛАНТИЙ. Сiдз бы перво жö и висьталiн. Мый бы сылö сэтшöм одз правленнёсис кошшыны? Некин эшö правленчиыс абуöсь да. Неважын тай, видзöта вöлi, öшын увтöттяс мунö.

ДАРЬЯ СЕМЁНОВНА. Неважын, шуан? А кöдöрö жö бы?

СИЛАНТИЙ. Да пермаланяс, некö. Ме чайтi, ас местат ни уджавнытö мöдöтiн.

ДАРЬЯ СЕМЁНОВНА. Мöдöтас сiйö кинкö кульыс, мыйнö оз да. (Ас кежас.) Вот öвсьытöм. Вот грекö пыртан шогöт. Эз эд то кывзы менчим кылöс. Мый нö ни эта сэтшöмыс лоö?(Вачкö киэзнас боккес кузя.) Ызйöтiс, натьтö, батя, сiйö кинкö, ызйöтiс. Сэсся нем. Некöр бы сiя ачыс сымдасö эз кер. Некöр бы сылö аслыс сымдаыс юрас эз пыр. Кин жö бы? Тöдны бы вот, кытшöм кульвугыр, кытшöм нелюбöй чужöм сымдасö керис. Ме бы сылiсь, ме бы... Синнэсö бы кыскалi! Юрсисö бы нетшки! Кин жö, кин?..(Казялö кинöскö öтöрись, уськöтчö öшын дынö.) Да вот жö кин, во-о-от. Этö сiя быдöс и соровтiс. Сэсся некинлö. Но часöт ме сылö мыччала!(Вешшыштö öшын дынiсь, видзчисьтöн пондö дзарышавны пыранiн ладорö. Правленнёас пырö зоотехник.)

СВЕТЛАНА САВЕЛЬЕВНА (порог дорсянь). Здоровöн чеччит.

СИЛАНТИЙ. Локтан здоровöн. (Тюкöтöв-керö бедьнас джодж кузя.)

СВЕТЛАНА САВЕЛЬЕВНА. А тэ мый, Дарья тётка, сэтшöм одз талун правленнёас локтiн?

ДАРЬЯ СЕМЁНОВНА. Кытшöм тэныт дело — одз не одз? Колiс и локтi. Тэ, бытьтö, нем он и тöд? Эшö юасян?

СВЕТЛАНА САВЕЛЬЕВНА (лэдзчыштö порог вылiсь, дивуйтчöмöн). А мый меным колö тöднытö? Чеччи вöлись да...

ДАРЬЯ СЕМЁНОВНА. Эн баит — нем он тöд. Сiдз, натьтö, ме тэныт и верита, мый нö ог да.

СВЕТЛАНА САВЕЛЬЕВНА. Вот эшö. (Жмитыштö пельпоннэзнас.) Да висьталöны тэныт — нем ог тöд. А мый сэтшöмыс лоис?

ДАРЬЯ СЕМЁНОВНА (нерöмöн). Мый лоис, мый лоис. Висьтав вот, ноко, мыйлö проклённöй пермааныт нывкасö бöбöтiн?

СВЕТЛАНА САВЕЛЬЕВНА (нюжвылика). Ах, вот мыйын делоыс. Тайкасö я мый я?(Сибöтчö пызан дынöдз, пуксьö.)

ДАРЬЯ СЕМЁНОВНА. Кинöс нö эшö? Не сизима менам чива-люваыс.

СВЕТЛАНА САВЕЛЬЕВНА. Некин сiйö, Дарья тётка, эз бöбöтлы, ачыс корсис.

ДАРЬЯ СЕМЁНОВНА. Эн баит — ачыс корсис. Некöр ме сымдаыслö ог верит. Тэнат, тэнат эта уджыс, сэсся некинлöн. Ачыс сiя сымдасö некöр бы эз ылöст кернытö.

СВЕТЛАНА САВЕЛЬЕВНА. Да дугды тэ, Дарья тётка, весь ме вылö грешитнытö. Висьталöны тэныт — ачыс корсис.

ДАРЬЯ СЕМЁНОВНА (горöтöмöн). Баит тэ меным — ачыс корсис! Дöс и дöс этö тэ соровтiн, да лысьтан эшö эта бöрсянь ме син одзö мыччисьны! Да эта понда тэнчит юртö колö пиньöвтны! Чавкан синнэтö колö кыскавны! Кöрыша рожатö колö гыжьявны! Да ме вот тэныт!(Дзирбарасьöв-керö öтмöдöрö, оськöвтö Силантий дынö, кватитö сы киись бедь, пызаныс омöн судзöтчöмöн, öтпыр, мöдöтпыр вачкö бы зоотехниклö. Мöдыс медперво ештö вешшыштны бокö, бöртiжык уськöтчö пызан увтö.)

СИЛАНТИЙ (горöн). Ноко жö, Дарья! Виртöм! Бöбмин я мый я?(Чепöссьö бедьыс сьöрö.) Тэ мый этö правленнёас?.. Чöв жö! Дугды! Тэ тöдан, мый эта понда?..(Кутчисьö Дарья Семёновна бердö, пондö судзöтчыны аслас бедь дынöдз. Бöртiжык бедь конечыс сюрö сы киö, пондöны мырддясьны.) Лэдз, ноко, öнi жö! Вай татчö бедьсö!

СВЕТЛАНА САВЕЛЬЕВНА (пызан увтсяняс горзöмсорöн). Весь эд тэ ме вылö, Дарья тётка, ве-е-есь. Вот адззылан. Вай кöть вот талун жö Тайкаыслiсь юалам дак.

ДАРЬЯ СЕМЁНОВНА (Силантийкöт бедьнас мырддясьтöн). Шыась эшö менам сэтчин. Чавкан син тэ, дзöдзыв син тэ! Пет вот пызан увтсис, дак вöлись ме тэныт праздниксö мыччала.(Силантийлö.) Лэдз, ноко, Сила дядь, сетлы бедьсö ме киö. Ме сiйö часöт велöта, кыдз челядьсö пермаэзас ылöтлыны.

Оссьö ыбöс, пырö председатель.

ЯКОВ ТЕРЕНТЬЕВИЧ (дивуйтчöмöн). Эта эшö мый талун асывсянь правленнёас керсьö? Кытшöм эшö спектакль?

ДАРЬЯ СЕМЁНОВНА лэдзчисьö бедь бердiсь, дзугсьöм юрсиэсö лöсьöтышавтöн, чöлöмöн вешшö ыбöс ладорö.

СИЛАНТИЙ. Да вот... (Кинас, бедь сорнас, дзик татшкö, мыччалö Дарья Семёновна ладорö, пуксьö одзза местаö, кутö бедьсö пидзöссэз коласö, кыскö кисет, пондö каттьыны куритны.)

СВЕТЛАНА САВЕЛЬЕВНА (мыччö юрсö пызан увтсянь). Немись нем понда тай тышкасьны кутчисис. Невна эз и вий. Бур, что аскадö ештiт локнытö.

ЯКОВ ТЕРЕНТЬЕВИЧ. Вот кыдз. Мый жö бы тiян коласын сэтшöмыс эз тырмы?

СВЕТЛАНА САВЕЛЬЕВНА (пызан саяс пуксьытöн). Да нылыс увья быдöс. Тайкаыс сы местö уджавны корсис. А öнi мöдыс(Юрнас öвтыштöмöн мыччалö Дарья Семёновна ладорö.)... шуö, ме пö бытьтö сiйö сэтчин бöбöтлi.

ЯКОВ ТЕРЕНТЬЕВИЧ. Былись я мый я, Дарья Семёновна?

ДАРЬЯ СЕМЁНОВНА. А мый нö эшö? Мый ме сылö йöз я мый я, мед том киння томöн сирпöртъяс сюйыштны? Эшö и синнэсö кодьöн осьтны эз ешты да... Отирыслöн не öтiкöн горттэзаныс пукалöны да и то пермааныт оз мунö. А менам сiя керку тырьяс сымда и эм, кыдз öткаса турун тылöпок, да эшö и сiйö пермаö. Кокнит я меным этасянь?

СВЕТЛАНА САВЕЛЬЕВНА. Сiдз, батi, Дарья тётка. Но мыля тэ ме вылö весись думайтан? Некин сiйö фермаас эз бöбöт. Ачыс корсис, ачыс локтiс.

ДАРЬЯ СЕМЁНОВНА. Но и мый, кöть ачыс дак? Мый сiя эшö, сэтшöм томыс, ылöстас? Нач эшö челядёк да. Висьтала, отирыслöн сы годсяэс эшö аканнезöн орсöны.

ЯКОВ ТЕРЕНТЬЕВИЧ (жагвыв иньдöтчö аслас пызан сайö, пуксьö). Гордитчыны, гордитчыны, Дарья Семёновна, колö сэтшöм нывнас, что эз повзьы мукöд моз да ачыс тэ местö фермаас уджавнытö кутчисис.

ДАРЬЯ СЕМЁНОВНА. Гордитчыны, шуат? Мыйöн жö бы? Не сiйöн я тшöктат гордитчыны, что эта перманскöй уджыс сылö бокöн петас, том киння томöн калекаö пöртас?

СВЕТЛАНА САВЕЛЬЕВНА. Да но бöра, Дарья тётка, и калекаö ни пöртас.

ДАРЬЯ СЕМЁНОВНА. А мый-ту оз? Ог разь ме тöд тiянлiсь перманскöй условиянытö? Быдсöн ассим векöс да здоровьёöс сэтчин пуктi — тöда. Эд мый бердö бы эн кутчись — сё кипонiсь, сё быдвынiсь. Оз и оз. Оз понды сiя пермааныт уджавны, вот адззылат.

ЯКОВ ТЕРЕНТЬЕВИЧ. Мыля жö бöра оз?

ДАРЬЯ СЕМЁНОВНА. Висьтала — челядёк эшö: и мывкыдыс челядёклöн, и етшыс оз тырмы. Пессьöв-керас неделя сьöрна да и пышшас бöр.

ЯКОВ ТЕРЕНТЬЕВИЧ. Таисьяыс? Ог думайт. Оз сiя вачкись сэтшöмыс вылö.

СВЕТЛАНА САВЕЛЬЕВНА. Сiя жö комсомолка.

ДАРЬЯ СЕМЁНОВНА. Но и мый, консомолка дак?

ЯКОВ ТЕРЕНТЬЕВИЧ. А сiя и эм, Дарья Семёновна, что локтiс кö ачыс фермаас, дак бöр сё ни оз мун. Совестьыс оз тырмы сымдасö кернытö.

ДАРЬЯ СЕМЁНОВНА. Совесть вылö, сiдзкö, надейтчат?

ЯКОВ ТЕРЕНТЬЕВИЧ. А то кыдз жö?

ДАРЬЯ СЕМЁНОВНА. Сiдзкö, прокыс вöв кöть эн, совестьыс бы дзир эз сет уджсö чапкыны? Сiйö вот ме и видзöта, коммуниссэзныт тiян сiдз жö колкозсö лэбтöны. Öтiк комунис эд рядовöйнас оз уджав, сё ни кытшöмкö начальникöн ветлöтö. Мукöдыслöн удж вылас прокыс и воть мымда абу, но совестьыс оз тырмы откажитчынытö. Сiдз, мыр моз местасö и занимайтö.

ЯКОВ ТЕРЕНТЬЕВИЧ (ыш ловзисьöмöн). Сiдз, батi, кытчöдз.

СВЕТЛАНА САВЕЛЬЕВНА. Этö тэ кин йылiсь сiдз, Дарья тётка? Ме йылiсь кö, то ме кыдз-некыдз специалист, дипломöн локтi. Кинö велöтчи — сыöн и уджала. А мöдiккез дынöдз меным дело абу.

ДАРЬЯ СЕМЁНОВНА. А сiдз уж, тыдалö, и эм. Не сiдз бы, дак и пермаас порядоккес не нiя бы вöлiсö.

СВЕТЛАНА САВЕЛЬЕВНА. Мый тэ менчим ферманскöй порядоккезнас синнэзöс бытшкан? Куимöдз год вöлись уджала да... Революция я мый я сiйöн каднас тшöктан керны:

ДАРЬЯ СЕМЁНОВНА (оськöвтö матöжык пызан дынö, зоотехникыс ладорö кинас зэркыта öвтыштöмöн). И кер! Сы вылö тэнö государствоыс и велöтiс. Сы понда эстöн и пукалан, стулсö правленнёас нырыштан. Ылöса-прока бы вöлiн спесалис, дак куим годнас куим революсiя ни бы колiс керны.

СИЛАНТИЙ (юрнас öтмöдöрö öвтышавтöн, ас кежас). Öт жö тэ, кыдз эд зiэз нiя öтамöд бердö лякасьöны. Революция нылö пондöм ковсьыны.

ЯКОВ ТЕРЕНТЬЕВИЧ (горöн). Дугдö жö правленнёас споритнытö. Тырмас тiянлö горшшезнытö летны.

СВЕТЛАНА САВЕЛЬЕВНА (Дарья Семёновналö). Важын ни тай вöлi мöда. Колö тэныт öддьöн, дак сувт ме местö да и кер.

ДАРЬЯ СЕМЁНОВНА. Спасибо. Менам керсьöм ни. Ов ме годдэзöдз, видзöтам, кытшöм сэк тэись керисьыс петас. (Бергöтчö, иньдöтчö петанiнлань.)

Эта коста пырöны ПОРСЕВ да ГАЛИНА.

ГАЛИНА. Привет!

ЯКОВ ТЕРЕНТЬЕВИЧ. Здорово, здорово, том отир. Пуксьö, баитö.

ГАЛИНА. Спасибо, ми недырик кежö. (Дарья Семёновналö.) Кытöн нö, Дарья тётка, Тайкаыс? Некин тай, ми часöт кежалiм да, гортаныт абу.

ДАРЬЯ СЕМЁНОВНА. Кыскöм тай кульыс пермааныс.

ГАЛИНА (дивуйтчöмöн). Мый, мунiс сё жö? Вот бöбöв. Но мый сiя сэтчинiсь бурсö адззис?

ЯКОВ ТЕРЕНТЬЕВИЧ. Таисья — нывка-молодец. (Томмеслö.) Адззат вот, кытшöм пример сiя тiянлö мыччалö?(Пауза бöрсянь Галиналö.) Но, а тэ мый думайтан? Он лöсьöтчы сы сьöрö?

ГАЛИНА. Эз на пур бöб поныс да... Важын ни тай вöлi мöда нятьнытö панявны.

ЯКОВ ТЕРЕНТЬЕВИЧ. Кытöн нö мый сэк думайтан керны?

ГАЛИНА. Мый меным думайтнытö? Ась вöв думайтö. Сылöн юрыс ыджыт. (Сибöтчö, пуксьö прос пызан сайö, видзöтöв-керö öтмöдöрсянь, дзик меряйтыштö ас бердас, лöсьöтчыштö бытшöмжыка местаас.) Адззат вот меным этатшöм пызан сайын местасö, дак понда уджавны. А фермааныт менö нятьöсь гезöн он кыскы.

ПОРСЕВ чöлöмöн пуксьö прос стул вылö, неылын пыранiн дынсянь.

ДАРЬЯ СЕМЁНОВНА. Перманытся том отирыслö бытьтö и места ни сэсся оз адззись.

ЯКОВ ТЕРЕНТЬЕВИЧ. Да не сiйö, Дарья Семёновна, шуöны, что места оз адззись. Но эд и фермаас уджавнытö тожö кинлöкö колö.

ДАРЬЯ СЕМЁНОВНА. Вот сiя и эм, что кинлöкö. А мыля бы не аслат ныввезлö? Мыля нiйö гортö эн коль да пермаас эн сувтöт? Кыкнаннысö эд, видзöт жö, дипломöдз велöтiн да кытчöкö сэтчин жö, городас, и жöниккез сайö сетiн.

ЯКОВ ТЕРЕНТЬЕВИЧ. Да но тэныт, Дарья Семёновна, челядь баснисö баитны — жöниккез сайö сетi. Юасясö разь öнняся том отирыс, кин сайö мунны да кин вылын гöтрасьны? Некин сайö ме нiйö эг сет, асьныс мунiсö.

ГАЛИНА. И зонныт часöт институтын велöтчö.

ПОРСЕВ. Да эшö колхознöй стипендия вылын.

СИЛАНТИЙ (öтмöдöрö юрнас öвтышалöмöн). А йöртiсö эд, тыдалö, талун предсö угöлас.

ДАРЬЯ СЕМЁНОВНА. Адззан вот, Яков Терентьевич, мый петö? Куимöс ни эд, куимöс колкознöй няньыс вылын кок йыланыс сувтöтiн, а колкозас ны коласiсь кытчöдз и öтiк оз уджав. Адззöмась миян кодь бöбöввесö да ны кузя и мунат.

ЯКОВ ТЕРЕНТЬЕВИЧ. Зоныс йылiсь талун эшö одз баитнытö. Велöтчö вöлись сiя. А кончитас — некытчö оз воштiсь. Бертас гортö и пондас уджавны. ( Галиналö.) А он бы тэ фермаас уджав, дак лок диспетчерöн гаражö. Местаыс эм, примитам.

ДАРЬЯ СЕМЁНОВНА (ас кежас, жалейтöмöн моз). Адззан вот... И сылö то шонытик местаыс адззисис. Миянiсьыслö дзи-и-ир, миянiсьыслö проклённöй перманысся нем буржыкыс эз дöнзьы.

ПОРСЕВ. Да чöв тэ, Дарья тётка. Эн тöжды öддьöнсö Тайкаыс понда. Оз сiя фермааныс дырсö уджав. (Председательыслö.) Вот кута кöркö рытнас, кежöта гортö инь вылö, сымда тi сiйö и адззылат.

Занавес