Глава X

Асылыс панталiс гажтöма.

Погоддяыс сулалiс кымöра да ыркыт, кöр нельки öтöрöдз петны абу некытшöм охота, а керкуын пукавтöн пöрöтö он. Лöня, дзик гусясьöмöн, вылiсянь киссис бисер кодь поснит зэр, кöдасянь пемдытöдз ештöмöсь вазьны керку юррез, йöррез да му. Вöрöтчытöг, бытьтö сунасисö, сулалiсö сьöктамöм листа пуэз, нёкыртчис увлань вазьöм картовка кор. Кок увтын вились вöлi ва да нять. Но Таисьялiсь тöнсянь öзйöм лöгсö нельки тшыксьöм погоддя эз кусöт. А одзланься пессьöм йылiсь Петюль Васькалöн басниыс дзир содтiс вын да веритöм.

Кукань карта дынсянь ни, кöр подаыс вöлi лэдзалöм, кадсö öштытöг, нывка вились иньдöтчис правленнёö, председатель дынö.

Посöдз дынас сибöтчытöн, осьта öшынöт, Таисья кылiс бригадир да юралiсь коласын горöн баитöм. Но эта нывкаöс эз падмöт. «Бур, что кыкнанныс öтлаын. Меным сiйö и колö. Вöв бы эшö зоотехникыс ны коласын, дак эшö буржык».

Правленнё пытшкас Таисья медперво Светланаыс жырокö и кежалiс, но весь. Зоотехникыс гортын эз на вöв.

Председательыс кабинетö нывка оськöвтiс сэк, кöр бригадир, кыдз и пыр, тшыннялан папиросаöн тырппес коласын, ветлiс öтмöдöрö кабинет пасьта, öткоста горöн баитiс:

— ...вот и думайтö, Яков Терентьевич, кысь ме эта видзтöг сымда вердчансö кера?

— Ас дырнят эд, Прокопий, правленнёыс сы йылiсь баитiс.

Председатель, кöда эта вотöдз сулалiс пызан сайын, оськöвтiс заборка бердö, мынöтiс тув вылiсь да кышыштiс вылас кокнитик плащ, лöсьöтчис, тыдалö, кытчöкö мунны. Несьöкыт вöлi казявны и сiйö, что öтамöд коласын баитöм коста Таисьялöн пырöмыс кыкнанныс понда вöлi сэтшöм жö неколана, кыдз и видзчисьтöм.

Сы дженытика здоровайтчöм вылö некöдыс нельки эз и шыасьö.

Бригадир сувтiс, лöньсис, дзар керыштiс пырисьыс ладорö. «Тэнö дзир эстöн и эз тырмы», — бергöтчис председатель ладорö.

— Сiдз вот, Терентьич. Кера, кыдз баитi. Сёрöнжык асьныт жö спасибо висьталат, — ответсö видзчисьтöг петiс.

— Кер ас юр вылат, етша öшö грекыс дак, — не öддьöн горöн вöтчöтiс председатель бригадир сьöрö, тыдалö, охотатöг и сiйöн дышвевйöн оськöвтiс бöр аслас пызан сайö.

Кывзыны кö бытшöмжыка бригадир да председатель коласiсь баснисö, позис бы, натьтö, и вежöртны, мый йылiсь сiя вöлi. Но керны сымдасö Таисья эз казяв, да и думайтны эта вылын вöлi некöр. Председательыс пасьтасьöм коста ни нывка повзьыштiс сыись, что часöт мöдыс, кыдз лун кынымöн одзжык, петас правленнёсис, мунас да и дöс сэтöн. «Мый тэ сылiсь босьтан?»

Но талун юралiсь сiдз эз ни кер. Пышшалан синнэзöн Яков Терентьевич дженытика, дзик нильдiс, нёджжöвтыштiс нывкаыс ладорö.

— Баит, мый бöра тэнат сэтчин?

— Öтiк менам, Яков Терентьевич, басниыс — бöра вердчан йылiсь.

— Кутшöм öшö вердчан йылiсь? — дзескöтчöмöн шыасис председатель, кыдз бытьтö ны коласын эта басниыс некöр эшö эз вöв баитöм нето баитöм вöлi сэтшöм важын ни, что öнöдз нем эз видз и вунöтны. — Ас дырнят жö решеннёсö примитiм...

— Тöда, Яков Терентьевич. Да кытшöм сыись прок? Сiя жö не вердчан, куканнеслö одзаныс он чапкы. А кöть и мыччалан, дак лыддьöтöмсяняс нiя пöтöсь оз лоö, — баитiс Таисья. — Тi жö тöдат, ытшкыны да ваявны турунсö бригадирыс эз кöсйись. Но дак вот... Кыдз перво жö баитiс, сiдз и керö. Неделя сьöрна ни эд заседаннёыс бöрсянь чулалiс, а куканнеслö турунсö эшö и öтпырись эз вайлö.

Нывкаыс басни сьöртi председатель, тыдалö, вежöртiс ни, что киöн öвтыштöмöн эстöн он бергöтчы.

— Тöда, Таисья, — шыасис сiя ыш ловзисьöмöн, жагвыв лэдзчисис бöр аслас местаö. — Тöда. А мый керны? — Кыдз этö мый, Яков Терентьевич? — дивуйтчыштiс Таисья. — Мыля тi этö менчим юалат? Тшöктыны колö бригадирсö, мед ваялiс.

— Тшöкта вот. Быд лун тшöкта. Часöт тэ одзын сы йылiсь жö баитiм. Но оз ваял, дак мый ме сыкöт кера?

— Нем ог вежöрт, — одззамоз дивуйтчыштiс Таисья, жмитыштiс пельпоннэзнас. — Тi жö председатель, Яков Терентьевич. Кыдз этö оз?

— А сiя бригадир, — сорис юралiсь Таисьялiсь баснисö. — И бригадасö ассис миянся буржыка тöдö. Быд лун вот эстöн тэ моз жö норасьö, что и отирыс сылöн оз тырмö, и вердчансö колана мымда керны оз вермы, ытшкынытö некысь. Неуна миян кодя видззес, и эстöн сiйö тожö колö вежöртны.

Быдöс этö председатель висьталiс сiдз, что не тöдны кö Таисьялö, мый ны бригадаын тырмö, а мый оз, баснисö позис бы примитны быль туйö. И кольччис бы сэк öтiк — ыш ловзисьны гажтöма, лöньсьыны, öшöтны юр да сiдз, нем сорöн, и петны бöр. Сы вылö, натьтö, председатель и надейтчис, кöр сувтiс веськыта бригадир дор. Лыддис, что эта вылын ны коласын басниыс баитсис, вились сувтiс.

Тшöктiс я председатель ваявны бригадирöс куканнезлö турун да кытшöм бытшöма — Таисья вежöртiс ни.

— Сiдзкö, тiян тшöктöмсянь, Яков Терентьевич, сiдз бригадирыс куканнеслö турунсö и ваялö? Петö, что тi асьныт сiдз тшöктiт?

— Сымдасö ме тэныт, Таисья, эг баит. Висьтала вот, быд лун, мыся, норасьö — ытшкынытö нем да некысь.

— Сiйöн ас öшын увтас быдса тележкаэзöн ытшкöмсö и пöрлалö?

— Да не бригадирыс жö, тракторист сiйö пöрöтiс.

— Но эд не бригадирыс тшöктöмтöг? Ачыс трактористыс сымдасö некöр оз кер. И ме сымдаыслö тожö некöр ог верит.

— Ог ме тöд бытшöмика, мый нiя сэтчин ас коласаныс...

Баитны председателькöт, позис кö сiйö эта бöрсянь сiдз шуны, Таисья одзлань эз ни вермы. Сылö вились охота лоис öвтыштны быдöс вылö, бергöтчыны да мунны бöр. Да и ачыс председатель, кöда ештiс ни петны пызан сайись, сiйö дзир и видзчисис. Но керны сiдз Таисьялö, вöлi бы öвтыштны киöн аслас удж вылö. А öвтыштны аслас удж вылö, кöда бердö сiя кутчисис, нывка некыдз эз вермы, сiдз кыдз кытшöм бы сьöкыт да нетуяна сiя эз вöв, эта сылöн удж, кöдö некыдз мöднёж нельки шунытö оз позь, и кöда дзир öтнас вермö да керö мортсö мортöн. И бергöтчыны кö сы дынiсь öтпырись, öтпырись öвтыштны сы вылö киöн, эта бöрсянь и ачыс уджыс тэ дынiсь тожö бергöтчас. Сэтчö жö бергöтчыны бöр джын туй вывсянь — Таисья мывкыдын чертаыс эз вöв. Сiдзкö, кольччис öтiк — мунны одзлань. И сiя кадö, кöр председатель видзчисис, что нывкаыс вот-вот уськöтчас ыбöсö, мöдыс видзчисьтöг оськöвтiс пызан дынöдз, повтöг пыкöталiс председательсö биöн öгралан синнэзöн:

— Мый вылö тi, Яков Терентьевич, решеннёсö примитiт?

— Хмы, — шыасис председатель, оськöв ылына керыштiс бöр. — Кыдз этö мый вылö? Мыля тэ, Таисья, сiдз вопроссö султöтан? Эд сетiсö жö тэныт подакокултсö. — Вились лэдзчисис пызан сайö, пöрöтчыштiс стул спинка бердö. — Кылзы жö, мый ме тэныт висьтала. Вермин бы тэ этöн баснинас кöркö мöдöтпырись пыралны.

— Кыдз мöдöтпырись?

— Да сiдз жö, кыдз и талун. Лун куим бöртi, шуам, или сёрöнжык.

Таисья сымдасö эз вермы. Висьтав нывкалö — пыравны час нето джын бöртi, этö сiя вежöртiс бы. Но лун куим бöртi нето эшö сёрöнжык — не. «Неужто председательыс оз вежöрт, что уджавнытö одзлань сiдз оз позь? Мыйлö колö кольны решиттöм вопроссö ашын нето мöдiк лун кежö, кöр позьö этö керны талун? Эшö разь етша, кöр примитöм решеннёыс бöрсянь быдса неделя ни чулалiс?» Таисья кылiс, кыдз сьöлöмыс вынсялöмсянь перытжыка чепöссис вывтыр пасьта вир, вынöнжык öдззис вартны кöсичаэз кузя. Видзсьöмöн эшö, кытчöдз нывка вермис керны сiйö аскöттяс, сiя öвтыш керис öтмöдöрö юрнас.

— Некöр меным правленнёас быд лун туйсö тальны. Не кортöн ветлöтiсь. Не ас понда кора. Не ассим — колхознöйö подасö верда.

— Но кык-куим лунсö кöть верман видзчисьнытö? Корис кö председатель видзчисьны, колö думайтны, что эта вылö сылöн вöлiсö кытшöмкö аслас причинаэз. Но вот беда, неделя сьöрна бöбöтлöмсянь одзлань председательыслö Таисья эз ни верит. Эз вермы. Эз верит сылö, что согласитчыны кö видзчисьны эшö кынымкö лун, этна бöрсянь мыйкö вежсяс буржыклань, «Кытшöм эшö вермас лоны видзчисьöм, кöр решеннёыс примитöм и колö дзир керны?» Нывка одззамоз öвтыш керис юрнас.

— Кылзы жö, Таисья. Менчим эд не öтiк ферма понда юалöны. И нытöг уджыс горшви. Страда жö öнi. Кыдз тэ этö он вежöрт?

— Умöля! Умöля тiянлiсь юалöны! Юалiсö бы буржыка, некöр бы этадз эд керö! Некöр бы примитöм решеннёыс бöрсянь эд бöбöтлö да куканнесö эд тшыгйöтö! И юалöны сэтчин тiянлiсь мыйкö понда или озö, меным сэтчöдз некытшöм дело абу, — баитiс Таисья. — Примитiт решеннёсö, дак колö керны! Нем сэтöн мöдiк уджыс вылö ылсöтчыны да ашыннэсö кöсйыны! Ме тiянлö не кöртовöй — суткиэзöн фермасис не петавны, лунiсь лун ытшкыны да ношаэсö кыскавны. Тырмас! Вежöртi ни öнöдз — кытчöдз горш выланыт он сувт, тiянсянь видзчисьны нем! Тi только кыввезнаныт и кужат кернытö!

— Видзöт тэ, кутшöм öшö адззисьöм. И дело сылö абу, мый председательыс баитö, — не одззася коран голосöн горöтчис юралiсь. — Не унаöл я велалöмыт баитнытö? Пондöтчан вöлись уджалнытö да... Мамыт век сьöрна фермасис эз петал, но тэ моз правленнёас ыждалнытö некор эз ветлöт. И тэ кодь басниэсö некор эз баит.

Председательыс казьмöтöмсянь Таисья син одзын вились сувтiс мамыс, кытшöмöн сiйö усис пантавны Сенинскöй больницаас. Нывка кылiс, кыдз мыйкö пондiс кильöтны горшсö, чеплявны нырсö да курöтны синнэсö. И эз кö сiя чöв юралiсь одзын одзжык, дак öнi кöть и колiс бы — эз вермы.

— Ах, вот кыдз? Сiдзкö правленнёас эз ветлöт? Ме кодь басниэсö эз баит? Этасянь сiя тiянлö и бур вöлi, что некинсянь да нем эз кор? Некин вылö эз норась, некинкöт эз тышкась. А уна я сы чöлöмсянь прокыс? Не сiйöн я годiсь год пар йöррезас куканнесö и видзит? Не сiйöн я куим год сьöрна яяс сеттöдз быдтiт? — Басниыс коласын Таисья кылöтiс дуль сорнас горшас сибдöм комоксö, одзлань эшö öддьöнжык öзйöмöн баитiс: — Да! Век сьöрна мамö фермасис эз петав. А тöдат жö кöть, одö, кыдз сылö эта чöлöмыс дöнзис? Быдсöн эд здоровьесö сэтчин пуктiс. А тi, председатель, кöть öтпырись юалiт, кокнита-не сылö уджассьö? Мыйынкö отсалiт?

Баиттöнняс Таисья эз и казяв, кыдз сы синнэзiсь брызнитiсö синваэз, эз кыв, кыдз рожабаннэсö сотöмöн да öтамöдсö одзалöмöн нiя визывтiсö увлань, усялiсö, кöр морос вылас, кöр джоджöдз. Мамыс йылiсь горöтчöм кыввес нывкаöс обидитiсö сы öддьöн, что сувтчыны аслас басниöн, лöньсьыны, чöвны, кытчöдз эз вöв висьталöм быдöс сьöлöмас чукöртчöм курыт-зубытыс, сiя эз ни вермы.

— Месяц сьöрна ни эд китöм и коктöм мамö больницаас куйлö. Вот эд кытчöдз сiйö аслас чöлöмыс вайöтiс. А тi, председатель, эта коста кöть öтпырись юалiт, кыдз да мый сыкöт? Мый ни сэтчин керö? Батi, звонитiт? Или больницаас кежалiт? Некöр эшö эд и думайтö! Нельки эд и вöтасьö! Да тi жö эшö сы уджöн менчим синöс бытшкат! Думайтат, натьтö, сiдз гожумбыт и понда быд ойö ачым ытшкыны да ношаэсö дюттьöтны? Не донаöв я этадз вердöмыс сувтас?

Председательлö Таисьялöн басниыс эз гленитчы сiдз жö, кыдз эз гленитчö Таисьялö сы мам йылiсь юралiсьлöн горöтчöм кыввес. Куим год сьöрна колхознас юравтöн кывлыны сэтшöмсö ас йывсис нельки пöрисьжык отирсянь сылö кытчöдз эз усьлы. И висьтав Таисья аслас басниын кöть невночка мыйкö бöбöтчöмöн, кöть невночка мыйкö вöвлытöмö, сымдасö Яков Терентьевич некöр бы эз терпит. Думайттöг, бытшöма я керö, сiя важын ни мыччалiс бы би кодь лёк да зi кодь чушкасись нывкалö петанiн ладорö. И дзир сiя öтiкыс, что быдöс сы басниын вöлi быль, паныт кöдалö горöтчынытö вöлi нем, видзис юралiсьöс эта оськöлiсь. Но Таисьялiсь баснисö кывзытöн председатель вежöртiс и мöдiкö. «Кольны кö этö зiсö куканнес дынын уджавны одзлань, мымдакö сiя и уджалас, но кодя ойлунсö сы кузя эстöн он ни адззыв».

Мед пондывны эшö öтпырись лöньсьöтны синваэзöдз локтöм нывкаöс, лöгсö мыччавтöг, председатель одзлань горöтчис:

— Кылзы жö, Таисья. Кин тэнö тшöктö ойезнас ытшкисьны? Кин тшöктö ношаэзнас кыскалны?

Председатель видзчисис, что этна кыввез бöрсянь горзынытö мöдыс дугдас, чышкыштас рожабаннэс вылiсь визывтан синваэсö, шынньöвтас «Кужö жö эд, натьтö, нылка морт шыннялнытö?», да сы вылын споритöмыс и чулалас. Юралiсьлö колiс, мед эта и былись шогмис сiдз. Но мöдыс кыдз бытьтö абу и думайтöм вежöртны сылiсь баснисö. — Тi медперво, кыдз председатель! Кин эшö этася? Одö кö вермö бригадирыскöт решеннёсö тыртны. Или нарошно сералат ме вылын? Вунöтiт, кытшöмöсь обязательствоэсö босьтi? Надейтчат öтiк подакокувт вылын килограммовöй привессэсö босьтны? Ме жö не валеганитны тiян моз, а уджавны фермаас локтi.

— Но и тырмас! — орöтiс председатель нывкалiсь баснисö. А сэсся лöньжык голосöн ни: — Ме думайтi, мамыт сайсянь тэись былись бытшöм подавöдитiсь петас да, тыдалö, сораси. Эз вöл миян фермаас бытшöм куканьвöдитiсьыс, дак тэись буржыкыс сё ни оз ло. — Мед сетны вежöртны висьталöмсö буржыка, асьсö дорйöм могись председатель содтiс: — Сiйö дзир и эз тырмы, мед тэ сэтчин асныритiн, керин, мый колö и оз, да эта бöрсянь эшö мöдiккезöс винитiн. Сэтшöм уджалiссес меным оз колö. Он чайтчы кодя морт моз уджалнытö, дак верман мунны. Ме тэнö сэсся ог видз. А мунан, дак спасибо висьтала, öтiк мортыс куканнес дынö гожум кежас сё ни адззисяс.

Кытшöмкö не öддьöн гордöй мывкыда морт, натьтö, бы сiдз и керис — висьталiс бы спасибо, öвтыштiс киöн, бергöтчис да петiс,

Председательлöн кыввес Таисьяöс дзик чарöтiсö. Нельки кок увтсис джоджсö нывка кывны дугдiс. Этна кыввезсянь, дзик зубыта вачкöмсянь, сьöктамис да дикмис юр. Кымöра погоддясянь и сытöг ни не öддьöн югыт луныс пемдiс сы син одзын эшö öддьöнжык. Председатель мыйкö сё эшö баитiс. Но сылöн басниыс не пельшыöдз, не ылöсöдз эз ни сибав. Таисья адззис дзир, кыдз вöрисö сылöн тырппес, но нем эта басниись эз кыв да эз вежöрт. Мымда чулалiс этадз кад, нывка эз тöд. Эз ылöст и сiйö, мый колiс керны одзлань.

Отсалiс ачыс жö председатель. Кытшöмкö кадö сiя лöньсис, вились сувтiс аслас пызан сайись, сибöтчис зэв матö Таисья дынöдз, мыччалiс сылö кинас петанiн ладорö.