Сюра бабыв

Кыдзкö рытöн ми Вовакöт печатайтiм фотокарточкаэз. Объектив рамка увтын ме югдöтлi фотографическöй гижöт листтэз да сэтöн жö лэдзалi нiйö ордчöн сулалан ванночкаö. Одзланься уджсö керис Вова. Сiя видзчисис, кöр ны вылын мыччисяс кытшöмкö изображеннё, кадiсь кадö баитлiс:

— Вот этö ме. А эта миян керкуным. — А одзлань сэтöн жö: — Видзöт жö, пап, Шарикыс кытшöм бура петöм. Вот Шаричок — ылöса понок. Сiдз эд, пап? Ылöса эд сiя?

— Сымда-мымдасö кыдз, поди, абу, — шыаси ме аслам удж коста. А недыр мыйись Вова вились сибöтчыштiс кинас ме пельпон бердöдз.

— Пап, пап, видзöт жö татчö! Эта мый сэтшöмыс? Öтлаын Вовакöт ме дзар керыштi ванночкаö. Фотокарточкаыс и былись вöлi петöм интереснöй: медодз нельки невежöртана. Сы вылын тыдалiс негырись сина, пружинаöн каттьöм вöснитик хоботока да антенна кодь кузь уссэза кинлöнкö юрок. Ме жагвыв вежöртi, кин эта да горöтчи:

— Эта бабыв.

— Бабы-ы-ыв? — дивуйтчöмöн нюжöтiс Вова. — А мыля нö сылöн борддэс абуöсь, бабыв дак? А мыля сiя сюра? Овлöны разь, пап, сэтшöм бабыввес?

Вовалöн юасьöмыс и уськöтiс меным тöдвылам эта бабывкöт пантасьöм-тöдсасьöмсö.

Арся гажа лунö иньдöтчи ме сэк вöрö рябинала. Сьöрам босьтi фотоаппарат.

Сiя годö рябинаыс вöрас шогмис вель уна. Не дышöтчыны кö, дак сiйö позис ваявны нельки доддезöн. Уна ягöдсянь быд рябинпулöн увдöрись уввес вöлiсö нёкыртчöмöсь лажмыта-лажмыта, чуть я не му бердöдз. Этасянь и судзласьны öддьöнсö, нето кайны пуэз вылö, эз ковсьы. Ме сымда и кери, — кытшлалi ны гöгöр да вуджавлi öтiк пу дынсянь мöдiк дынöдз, кöдна лёдзöн-лёдзöн быдмисö туй пöлöн.

Ведра кык тöрик доз — рюкзак — тырис перыта, и эта бöрсянь ме иньдöтчи бöр гортö. Но кадыс вöлi эшö одз. Тэрмасьнытö öддьöн эз ковсьы. Сiйöн ме кадiсь кадö сувтчышалi туй вылас, видзöтчи. Син вылö усьлiс то гöрдöтöм листа, топ биöн öгралан паськöмö вочöтчöм ^нывка, пипу, то кольть сьöлöмöс рöма листа да чочком кока невеста-кыдз. А öтпырись одзсим казялi ме ыджыт да басöк бабывöс. Вывтыр бердсяняс сылöн борддэс вöлiсö пемыт-гöрд рöмаöсь, а доррезöттяс — вежöсь, топ и топ брыжиа деревенскöй запон. Не быд лун сэтшöмсö миян вöррезын панталан. Охота лоис сюрöтны сiйö объектив увтö да кольны плёнка вылö: кöр эшö эта бöрсянь усяс сыкöт мöдöтчид пантасьнытö?

Эта коста бабыв лöня пукалiс песока туй вылын, шондi югöррес увтын, тыдалö, шонтiсис. Öддьöн эд этна тваррес шондiсö да шонытсö радейтöны. Борддэс сылöн вöлiсö паськöтöмöсь и ылiсянь вачкисисö оссьöм цвет вылö. И вермыны кö бы сибöтчыны сы дынö матöжык, сiдз и тöд, фотопортрет петiс бы öддьöн басöк.

Оськöв бöрын оськöв пондi сибöтчыны. А бабыв дзик дразнитiс менö, пукалiс вöрöтчытöг.

Кынымкö оськöв ылынасянь ме босьтi ни сiйö объектив вылö. Но ылынöв. Эшö бы матöжык, эшö... эшö... Вот и уссэс ни нельки тыдалöны, но умöля. Жагвылика, мед нем эз казяв, вынсьöтча керны эшö öтiк дженытик-дженытик оськöв. Часöт позяс нырыштыштны кнопка вылö и... Эшö сы вотöдз бабыв одзалiс быркнитны борддэзнас, öшис объектив увтiсь.

Веськöтчи. Видзöта. А сiя öвтышалö брыжиа борддэзнас туй весьтас, чепсасьö-чуклясьö то öтöрö, то мöдöрö, то увлань, то вывлань. Вот öтпырись кежыштiс нельки туй мöдöрас. Ме повзикодь ни. Думайтсис, что ештас нач сайöвтчыны син одзись. Но сымдаыс бöра эз жö ло. Канава мöдöрсяняс ни сiя бергöтчис бöр, вились лэдзчисис да пуксис туй вылас. Жаль, тыдалö, вöлi янсöтчыны шоныт местаыскöт. А меным дзир этö и колiс.

Ме пондi гусясьны одзлань. Но, кыдз и одзжык, вились нем эз пет. А сэсся сiдз жö эшö да эшö. И сiдз мыдзтöдз.

А бабывлö кöть бы мый. Лэбалö неылын ме дынсянь и пышшынытö ылö оз пышшы, и матö сибöтчыны оз лэдз.

Медбöрын ме сувтi туй шöрас, пондi думайтны, мый керны одзлань. А сiя эта коста лэбалöв-керис ме гöгöр да и пуксис сёрöнжык... Кытчö бы тi думайтiт?.. Веськыта объектив вылас. Сулала ме местаам, дзик кынмöм, нельки ловзисьнытö ог лысьт. А бабыв пукалö объектив дорас да одзлань менö дразнитö: то жмитыштас борддэсö, то вились нiйö паськöтас, а öткоста вöрöтышалö антенна кодь уссэзнас — нюкайтчö. Матын, а он кут.

Не кулöм, не ловья, ме вель дыр думайтi, мый керны одзлань. Но нем коланаыс эта коста сiдз юрö и эз пыр. Кольччис öтiк — вöрзьöтчыны мунны одзлань. А сэтöн бабыв мышкыртчыштiс юрнас окуляр весьтас, мöдiс, тыдалö, видзöтыштны сы пыр, мый сэтчин сэтшöмыс, камера пытшкас. Нем буржык вылö ме öнi эг ни надейтчы. Сiйöн и керны кольччис нем, кыдз нырыштыштны эта коста кнопка вылö.

Объективас бабывлöн сюрöма дзир чужöмыс. Не вывтырыс, не борддэс эз тыдалö. Этасянь сылiсь уссэсö Вова и примитiс сюррез местö.