Семьялöн судьба

Ильино посад... Сулалö сiя керöслöн лунвывся скатын. Керöс увтас, тшöк да кудриа бадь кусттэз коласын, муись петö неыджыт сöстöм ключ, Гожумнас сылöн ваыс сэтшöм кöдзыт, что юикö пиннез поткöтö, а тöвнас, медгырись мороззэз коста, оз и кынмы.

Быд лунö, рытъяв кадö, тöлöн и гожумöн, шор ладорсянь посад пасьта паськалö горöна шовкöтöм. Этö нывкаэз нето инькаэз песлалöны да сöдзöтöны ключ ваын паськöм, вартлöны сiйö кыдзовöй чукыля нöшшезöн.

Гожумся кадö, мича рыттэзö, том пöлöс чукöртчö ключ весьтiсь пос вылö нето лог сайись паськыт, рöма цветтэзöн киськалöм видз вылö. И кöвьясьö сэк посад весьтiсь пемыт-лöз небоын гора сьыланкыв. Öтлаын сьылан горкöт асывся кадöдз дугдывтöг киссьö гармоннялöн сьöлöмгажöтана перебор.

Да мый баитны... Бытшöма овсис посадскöй отирлö колхоззэзö пырöм понсянь. Колхозниккез öтлаын гöрисö, кöдзисö, вундiсö да вартiсö.

Быдöс, мый аркмывлiс межатöм, паськыт ыббез вылын, мый öксьывлiс весöтöм гажа видззез вылын, мый йылiс пода картаэзын — вöлi асланыс, колхознöй.

Бур вöлi эстöн отирлö и сiйöн, что олiс Ильино посадын Митя Созонов. Лым кодь чочком юрсиа, кузькодь чужöма да лöз сина, неыджыт да топыт лысьöра и бытшöм мывкыда морт йылiсь славаыс паськалiс омöн район пасьта. Киэс Митялöн, кыдз баитöны отир коласын, вöлiсö золотöйöсь. Кутчисьлiс ли сiя керны додь нето телега, кöньöс нето пызан, сувтöтны öшын нето ыбöс косяккез, вартны ли виль керкуын кинлöкö гор — быдöс петiс сы киись. А сибöтчö кö вундан кад, Ильино посадö быд ладорсянь кыссис подвода бöрын подвода. Öксьывлiсö нiя Митя керку дынö, кöда сулалiс посад конецас, неылын колхознöй кузница дынсянь. Кузьлун, югдандорсянь пемдандорöдз, чулавлiс сылöн кузницаын: Митя пинялiс чарлаэз. «Счастливöй морт», — баитiсö сы йылiсь. И баитiсö не весь: Митя былись вöлi счастливöй. Эд мый бы эз шогмы сы киын, быдöс вöлi морт понда. А керны бурсö отир понда — оланын медыджыт счастье.

Эз öбижайтчы Митя и аслас олан вылö: удж эм — гажа, сьöлöм сьöртi; нянь, паськöм, ырöш, сёян — тырмö. Бур вöлi сылöн и семья: инь — Дуняша да кык зон. Ыджытжыкыс, Егорка, чожа лöсьöтчис ни мунны школаö. Да и мöдыс, кöть совсем учöт, а айыс кодь жö — немымда весь оз ов, сё мыйкö строитö.

Быдöс вöлi бур, только öтпыр Дуняша пондiс норасьны аслас здоровье вылö.

— Висьö, Митя, менам то эстi, кыдз эд писькöтö, — мороссö киэзнас кутöмöн баитлiс Дуняша.

— Терпитышт невна. Страда эд ныр одзын, уджыс горшви. Мый отирыс думайтасö, водан кö öнi больницаö? Нуöта арнас городöдз, враччез дынö, веськöтасö нiя, — рамыника баитлiс Митя иньыслö.

Но сы моз эз пет. Эта гожумö лэбтiсис лёк, виркисьтан война...

Митя лöсьöтчис туйö недыр. Сёр рытöн вайисö повестка, а ашынас одз асылöн вöлi тэчöма ни котома. «Берта ли?» — петiкас ни думайтыштiс аскежас Митя, зоннэс вылö видзöтöмöн, а горöн содтiс:

— Олö, быдмö, кывзö мамнытö. Од кö вунöтö менö, велöтöмöс менчим, петат морттэзö.

Окалiс Митя кыкнаннысö да пуксьöтiс пызан сайö. Сэсся ниртыштiс ыджыт кулакнас ассис синваэсö да колис гортсö. Дыр кежö я — некин эз вермы висьтавны: не нiя, кöдна мунiсö тшöтш сыкöт, не нiя, кöдна петiсö гортсиныс сёрöнжык, не нiя, кöдна горзытöн кольччисö деревняö.

Год бöртi посадын эз ни кольччы öтiк здоровöй мужик. Гажтöмтчис Ильино посад. Шоча пондiс кывны шор дорын нöшлöн горöна шовкöтöм. Эз чукöртчывлö нывкаэз пос вылын, эз петавлö басöк рöма видз вылö. Некинлö вöлi орсны гармонняöн. И лöньсисö гажа сьыланкыввез да горöна сералöм. Мырддис лёк войнаыс отирлiсь гажсö: гозъяэзлiсь любитчан ойесö, том пöлöслiсь гажа пантасьöммесö да пыма окасьöмсö, челядьлiсь заботатöм, пöта да шоныта быдмöмсö. Эшö год бöртi мича песня туйö частожык пондiс кывны иннезлöн герьясьöм.

Гажтöмтчис ключ дорын сьöлöмгажöтана местаыс. Одззамоз тулысся кадö ва вевдöрын асланыс листок шумитiсö бадь кусттэз, одззамоз сералöмöн цветитiсö видззез, горалiсö кайез. Но и пуэслöн шумитöмыс, и видззеслöн сералöмыс, и кайеслöн горалöмыс эз вермö гажöтны отирлiсь олансö. И усьлiс кö одзза оланыс тöдвылö, сьöлöм вылын вöлi только курыт да сьöкыт.

Сьöкыт олан пондöтчис и Дуняша понда. Колiс уджавны, вердны да пасьтöтны челядьсö, а здоровье эз лöсяв. Дуняша шогавлiс одззамоз. И кыным одзлань, шогöт сё частожык водтöтлiс постеляö. Этасянь етша öксьывлiсö трудоденнез. Кадiсь кадö нем вöлi сёйны.

И куимöт годыс Дуняшалö нем эз вай бурсö: эшö öддьöнжык пондiс шогавны. А больницаö эз мун и бригадирлiсь эз кывзы тшöктöмсö: сэтчин пö, фронт вылас, эшö умöльжык, да сё терпитöны; веськала пö, поди. Эшö тöв шöрнас петiсö быдöс гожумся запассэз. Виль год коста сёйсис медбöрья картошка. Тшыгсянь усис мöс, а поснит подасянь Дуняша орöтчис эшö одзжык. Хозяйствоись вöлi вежöм да вузалöм быдöс, мыйтöг кыдзкö позис кыссьыны. Но и эта эз вермы керны пöта олансö. Югдандорас Егорка тшыг кынöмöн мунö школаö. Вова лунтыр пукалö гор вылын, мамыс бердö жмитчöмöн. Сiя орöттöг, гöрдöтöм синнэсö тiликö, корö:

— Мам, ме бы сё-я-а!

Эта нора корöмсянь Дуняшалöн сьöлöмыс потны готов, но немöн чöлöтны тшыг зоночкасö. Дуняша крепитчö, медбы не горöтны зоночкаыс сьöрö. Эз лысьт сiя горзыны голоснас, медбы отирыс эз кылö, медбы зоныс синвасö эз адззыв сылiсь. Быд мортлöн эта кадö гореыс вöлi не етшажык.

Пондöтчис февраль. Бырсис и зöровöй пизьыс, кöдаись пипуовöй пильнöйчаг сорöн инька пöжавлiс шочыника кöвдöммез. Кытшöм нiя курытöсь вöлiсö да эшö дубöсь, но тожö сёйсисö. Сэсся пöжавны вöлi нем.

Куш пильнöйчагись оз позь. Мöдöтлiс мамыс Егоркаöс правленнёö пизёкла — нем эз вай, норовитны тшöктöмась невна.

Сьöкыта чулалiс Дуняшалöн тöвся ойлун. Юрö пырисö быдкодь гажтöм думаэз. Сьöлöмнас кылiс, что сибöтчö мыйкö сьöкыт да страшнöй, кöдö оз туй не ордйыны, не падмöтны. Этасянь сё частожык усьлiсö тöдвылас Митялöн медбöрья кыввес: «Кыскы, быд вынiсь кыскы челядьсö. Ны вылö быдöс надея, ныын миян быдöс олан». И кыскис Дуняша, кыскис, кыдз чайтчис, мымда вермис. Öтiк кусöкöн — чöскыт сiя вöлi нето курыт — эз ордйы челядьсö. А медбöрья кадö и ассис кусöксö удiс-вердiс нылö. Быдöс вын пуктiс челядьсö кыскöмö. Но локтiс кад, что нем лоис пуктыны. Мый эшö кольччис мамлöн ны понда, дак эта радейтöм. Но кытшöм бы ыджыт сiя эз вöв мам сьöлöмын — эта не нянь кусöк. Сiйö оз туй торйöтны да удны, медбы чöлöтны тшыг челядьсö.

Öтiк асылö, кöр эшö деревня узис, Дуняша öзтiс сартас да пондiс пыркöтны дозмуксö ^. Неыджыт симöтовöй чуманокись казялiс содз мымда чуж пизь. Кисьтiс чуж пизьсö сельничаö да сорлалiс сiйö ваöн. Петiсö куим кöвдöмок. Зоннэс, дульнысö горша ньылалöмöн, сулалiсö ни горби одзын, видзчисисö, кöр пöжасяс эта чöскыт няньыс. Эз ешты мамныс и сайкöтны нiйö — сiдз и ньылыштiсö öтiкöн пыммесö. Сэк Дуняша висьталiс:

— Мунö, дитяэз, Крутикö. Нöбöтат айнытлiсь медбöрья выввежöт. Вежат картошка вылö, — и сибöтчис зелёнöй сундук дынö да кыскис сыись дрöжитан киэзнас чим сьöд виль костюм. Егорка казялiс, кыдз мышкыртчис сы весьтын мамыс да кыдз пондiсö зэгавны сылöн кöс пельпоннэс. Синваэс, гырисьöсь да сьöкытöсь, усялiсö веськыта костюмыс вылö.

Югдандорас вöралан лямпаэз вылын зоночкаэз петiсö туйö. Мунны вöлi не матын — двадцать километр ылына. Туйыс шуч кыссис волокöт, только шочыника пантасьлiсö неыджыт кушиннэз — колхознöй вильсаэз. Кöр кольччис бöрö медбöрья колхознöй ыб, Егорка кыскис писис горби одзын пöжалöм кöвдöмоксö, торйöтiс сiйö шöри да сетiс джынсö воныслö...

Вöлöна туй лоис умöльжык, нежык юж, но челядь эз чинтö öднысö — кöдзытыс тэрмöтiс. То и шондi пондiс мыччасьны пуэс коласöт, но сiя немымда эз шонт и эз гажöт челядьсö.

— Киэзö кынмöны, — норасис Вова.

— А тэ ёнжыка вöрöтчы, — баитiс Егорка. — Сэк оз пондö кынмыны. Но мунны перытжыка Вова эз ни вермы. Сiя ёна ни мыдзис эта кузь да сьöкыт туйын, öдва вöрöтiс коккесö. Стрась охота вöлi сёйны. Не öтпырись ни усьлiсö тöдвылö чуж пизёвöй кöвдöмоккез. Эта коста Вовалöн нельки дульыс лэдзчис, а син одзас сiдз и сулалiсö унася-уна чöскыт кöвдöммез.

— Чожа ни, Егорка, Крутикыс?

— Чожа, чожа, вот чукыльсö только чулалам, — быдпырись öтмоз отвечайтiс Егорка воныслö. Но чукыль чулавлiс, а Крутик сё эз вöв. Сэк Вова лэдзчисьлiс лым вылö и баитiс горзöмöн:

— Ог сэсся мун. Ог вермы. Кынöм сималö.

— Шоччисьышт нö невна. Чожа локтам, — воныслiсь синваэсö чышкикö чöлöтiс Егорка.

И только пемытсорнас ни челядь сибöтчисö деревня дынö. Вова пезьдалiс, джöмдалiс, и Егорка кыскис сiйö кипöлöттяс.

Деревня дорас челядьöс панталiс лёк пон. Вувтöмыс вылö петiс чочком да няньзыр ота тоша старик. Сiя кытсалiс понсö, сибöтчис челядь дынö.

— Деда, сет мыйкö сёйны. Стрась эд кынöм сималö, — старик синнэзö веськыта видзöтöмöн корис Егорка.

— Кысь тiянöс быдöнсö вердан, — горöтчис паныт старик да пыдына ловзисьöмöн содтiс: — Эх, война, война! Мый тэ отирыскöт керан, кыдз тэ только, проклятöй, ны вылын он издевайтчы, — и кутiс Вовасö кипöлöттяс да иньдöтчис посöдз ладорö.

Керкуокыс вöлi неыджыт, важ да пемыт. Стена вылын, пызан весьтын öшалiс ночник. Сылöн гöрд биокыс умöлика югдöтiс енджаджын сулалан еннэз да учöтик, ёна ни тшыкöм зеркало. Сыкöт ордчöн крöмликайтiс важ, уна кадсянь сьöдöтöм ни часы.

Кöсыник, кыдз сартас, оттöмик чужöма инька чöвтiс Вова вылiсь зипунсö да пондiс юасьны, кысь нiя, кинлöн да кыдз татчö шедiсö. Челядьлö тшыгувья эз вöв охота баитны. Нiя, дульнысö горöн ньылалöмöн, кадiсь кадö видзöтыштлiсö жарöн лонтiсян печка ладорö, кöда вылын сотчöм да жугалöм дора чугунын пусис картошка...

Чулалiс кык лун, кыдз челядь мунiсö гортсиныс. Дуняша пондiс жалейтны, что эттшöм кöдзыт погоддяö иньдöтiс челядьсö кузь туйö. Эна луннэзö сiя куйлiс чеччывтöг, мукöдпыр и васö вöлi некинлö вайны, мед кöтöтны горшсö. Асъяпон пыравлiсö сы ордö соседкаэз гор лонтны, вайыштлiсö нето йöлок, нето картов. Инькалöн шогсянь да тöждiсьöмсянь и кынöмыс эз симав: разь невна пешлыштас йöлоксö, а мукöдсö коляс зоннэслö.

— Мунiн бы тэ больницаö, может, и веськöтiсö бы, — баитлiсö соседкаэс. Но Дуняша эз кывзы нiйö, аслас олан коста сiя больницаын эшö некöр эз куйлы и öнi сё надейтчис, что кыдзкö и гортын веськалас. И былись, куимöт лунас Дуняша чеччис. Талун эз кыв моросас зубытыс, вöлi долытжык. И только сьöлöмыс поиктiс-пессис, кыдз кайлöн. Сiя дыркодь пукалiс горвыв дорын, кыйис баличаэсö да вежис вывтсö. Решитiс ачыс лонтны горсö. Осьтiс трубасö да пондiс лэдзчыны улö. И ештiс только сувтны приступка вылö, кыдз пемдiс син одзас, пондiсö бергавны джоджыс и потолокыс...

Саймис сiя джоджын ни. Вöлi сэтшöм кöдзыт — пиннез эз локтö оча. Ёна доймисö юр, морос да шульга бок. Быд вынсö пуктöмöн сiя лэбтiсис ни пидзöсчаннес вылö, но шогсянь да зубытсянь вились бырис садьыс. Дуняша вежöртiс, что выныс оз ни судз сувтны коккез вылö. Шоччисьлöмöн, жагвыв сiя кыссис веськыта лабич дынö да пуксис пызан бердас. Эта коста жö кинкö не тэрмасьöмöн кайис посöдзö. Кылiс, кыдз небура дзуртышалiсö лымöн тырöм поспуэс. Вот и оссис керку ыбöс. Порог вылас сувтiс дасгодся нылочка. Дуняша лэбтiс сы вылö умöля ни адззан синнэсö, тöдiс локтiсьсö — почтальон. Усисö тöдвылас Митя, зоннэс, мыйсянькö зубыта, дзик емöн бытшкыштiс сьöлöмсö, но гажöнмоз юалiс:

— Письмо, дитя, вайин? Вай нö татчö чожжык, вай, — и нюжöтiс дрöжитан киэсö одзлань.

Нылочка шысеттöг сибöтчис пызан дынас, сюйыштiс Дуняша киö конверт ыжда гижöт, кöда кузя пельöссянь пельöсö нюжалöма гöрд визь. Дуняша босьтiс кöс чуннезнас гижöтсö, сувтöтiс синнэсö сы вылö — и вежöртiс быдöс, мый лоис Митякöт.

Дуняша эз и горöт — сы понда вын эз ни вöв — сьöкыта ыш ловзисис да сыркйöвтiс öтпыр, мыйсянь дрöгнитiс быдсöн сылöн кöс телоыс, и жагвыв пöрис пызан сайö, лабич вылö. Шульга киыс, кöдаын вöлi гижöтыс, ыскöвтiс пызан вывсис ляпкöса морос вылас да пыр кежö жмитчис сувтчöм сьöлöм бердас. Пемдöм синнэс куньсисö, куньсисö жагвыв, но топыта, медбы некöр сэсся не оссьыны.

* * *

Öтöрын тешитчис пурга: тыртiс туйесö, гусялiс шондi мичсö, повзьöтлiс уннялöмнас отирöс. А Егорка воныскöт эзö повзьö: только югдiс, и нiя лэдзчисисö бöр туйö. Чöвтöтовöй ^сера дöраись вурöм сумкаын кышöтiсö кынымкö сухарь. Оча крепитöм лямпаэз вылын куйлiс ведра-мöд картошка. Сiйö кыскис Егорка. Вова, кадiсь кадö чужöмсö чышкöмöн, вöтчис воныс сьöрö. Тöлыс падмöтiс лолалöм, пöдтiс, сюйис öмö, нырö, зипун ворот сайö поснитик лым, слепитiс синнэз. Вова, кöть и вöлi пöт, но джын туйын нач сувтiс.

— Егорка-а, ог вермы сэсся муннытö, — чуть да и бöра норасис сiя и пуксьывлiс небыт лымö. Егорка кыдз вермис бурöтлiс сiйö, дырöн шоччöтлiс и сэсся казьмöтлiс мамыс йылiсь, кöда нiйö ой и лун видзчисьö. Вовалöн чулавлiс мыдзыс, и челядь бöра мунiсö одзлань.

Рытнас, кöр кольччис совсем невна гортöдз, Вова тушмыль водiс туй вылö, кунис синнэсö. Егорка пондылiс вердны вонсö сухаррезöн — сiя откажитчис. Кöсйис адззыны сахар сы понда, кöр локтасö гортаныс — шы эз сет. Егорка пыр кежö мöдiс сетны воныслö айыслiсь складенёк — шы абу.

Омöн ны гöгöр сулалiс тшöк вöр. Кöдöрö бы эн видзöт, чöлöмöн сулалiсö пуэз, гырисьöсь да гажтöмöсь. Пемытiнас нiя кыдз бытьтö жмитчисö öтамöдныс бердö, гöгöртiсö челядьсö быд ладорсянь, эз мöдö лэдзны нiйö ас колассиныс. Полöм кутiс Егоркаöс. Страшно вöлi сьöд-пемыт да неласковöй вöрсянь, а эшö страшножык — вонокыс понда. Тöдвылö усис айыс. Вöлi бы сiя гортын, дак и мамыс бы эз понды шогавны и нiя бы Вовакöт этадз эз маитчö. Вон кыдз айныс нiйö радейтiс! Быдпырись айыс вердлiс конфеткаэзöн, пряниккезöн. Да и мамыс вон кытшöм чöскыт чуж пизёвöй кöвдöммесö пöжавлiс. Етша только. Дасö бы нето двадцатьö! А öнi ачыс, натьтö, тшыг и кöдзытын. Сэк эд öтiк крöшка öмас эз босьт. Егорка гусьöникöн корис:

— Вова! Мунам, Вовка, кылан? Видзöт, ой ни эд. Ме тэнö кыска.

Вовка паныт эз шыась. А Егоркалö охота вöлi кывны паныт сылiсь шыасьöмсö, медбы вашöтны этöн ассис полöмсö. Егорка вунöтiс ни мыдзöмсö. Сiя горзöмсорöн пуксьöтiс картошка мешöк вылас вонсö и пондiс кыскыны. Сiя тэрмасис гортлань и гусьöника горзiс. Сы чужöм кузя котöртiсö нятьöсь ньылöм воттез да синваэз. Эз тöд Егорка, мымда эшö кольччис мунны и чайтчас ли кыссьыны талун гортöдз. Но öтiкö тöдiс: колö мунны, тэрмасьны, быд вынiсь тэрмасьны одзлань. И Егорка мунiс. Усявлiс, чеччывлiс и бöра мунiс, кыскис бöрсяняс лямпаовöй дадёксö, кытöн вöлi картошка да Вова.

Мый этö? Егоркалö кажитчис, что кытöнкö кылiс морт голос. Сiя недыр кежö чöлiс, кывзiсис. Но гöгöр одззамоз вöлi пемыт да лöнь. Этасянь лоис эшö страшножык, и Егорка вились пондiс горзыны. Но кытöнкö пуэз коласын, нач ни ордчöн вились кылiс инькалöн голос. Егорка бергöтчис эта голос вылö и кыдз кынмöм сувтiс местаас: сы одзын сулалiс Катя тётка, неылын сы дынсянь, пемытiнас, тыдалiс турун додь.

Колiс только видзöтыштны лямпаэз вылö, медбы быдöс вежöртны Катя тёткалö.

— Мый, совсем я мый я?.. — горöтчис Катерина. Ачыс босьтiс Вовасö дадёксис да лэбтiс турун додь вылас. — И тэ кай.

Воваöс водтöтiсö додь шöрас да öтмöдöрсянь каттисö турунöн. Егорка водiс бокас, ордчöн пуктiс картошкасö. А лямпаэсö Катерина сюйыштiс кытчöкö додь радз коласö.

«Кыдз висьтавны мамныс йылiсь?» — думайтiс сiя аскежас, кадiсь кадö вожжинас вöвсö сырйикö. Додь вöлi лажмыт, и вöв рыпкис перыта. А кöр сибöтчисö посад дынö, Катерина шуис:

— Кöдзыт, натьтö, тiян гортаныт, узьö миянын.

— А мыля, тётка, кöдзыт?

— Мамныт гортын абу. Нуöтiсö сiйö больницаö. Умöль сiя öддьöн, оз ни, натьтö, лэбтiсь.

Не виль юöрöн вöлi Егорка понда мамыслöн шогалöмыс. Сiйöн Катерина кыввез бöрсянь сiя пыдына ыш ловзисис:

— Веськöтасö, может, кыдзкö больницаас. А сэтчö и тятюö локтас... Гортö локтöм бöрын Катерина медперво пыртiс керкуö Вовасö да картошка, сэсся пöрöтiс турун додьсö ворота одзас. Зоныс, двенадцатьгодся Ваня, нуöтiс вöвсö конюшняö, а Катерина кутчис Вова бердö: юкталiс чайöн, пым йöлöн, сетыштiс матор. Вова тупыльтчис западня вылö и сразу ланьтiс — нырыштiс мыдзыс да кынмöмыс. Катерина шебралiс сiйö пасьöн, юр увтас сюйыштiс гуня и лöсьöтiс сёйны.

Ужнайтiсö куимöн. Но Ваня эз понды сёйны сола тшаксö да картошкасö, няньтöг юис алюминиевöй кружкаись йöв да петiс пызан сайись. Егорка тожö вöрзьöтчис сы сьöрö, да Катерина кутiс зоночкасö киöттяс, бöр пуксьöтiс аслас местаö.

— Сёй, Егорка, сёй. Эн видзöт тэ сы вылö, ась чегласьö. А тiянöс некинлö öнi верднытö — мамныт абу.

Катериналöн кыввес уськöтiсö Егоркалö тöдвылас мамсö, кöдö, натьтö, тшыгйöн и нуöтiсö больницаас. Самöм йöрнöс соснас Егорка чышкис сöдзöм синваэсö. Сёйны сэсся эз тöр. Горшас тасасьöм нянь кусöксö сiя кылöтiс синва кодь лöз квасöн да тожö чеччис пызан сайись и Ваня сьöрö шымыртiс-кайис гор вылö. Ачыс Катерина водiс пöлать дорö. Но талун сiйö эз узьöт. Быдкодь думаэз пырисö юрö. Тöдвылö усисö нывка кадся гажа годдэз.

Кык морт киын вöлi Катериналöн счастьеыс. Созонов Митя да Васька Степан быдмисö öтдруг да öтлаын. Не öтпырись нiя вовлiсö оча морос Катерина понда. Кыкнанныс öтмоз ёна любитiсö гажа да бытшöм, сьылiсь-йöктiсь Катеринаöс. Но вöлiсö том отир не öткодь характераöсь. Степаныс Катерина моз жö любитiс гажöтчыны том кадö, сьылiс бура, йöктiс и ачыс орсiс неумöля гармонняöн. Томмез коласын öтiк гулянка эз чулав сытöг. Гармоннянас и сайöвтiс, натьтö, Степаныс Митясö Катерина син одзын.

Чулалiс год свадьба бöрсянь. Катериналöн шогмис зон. Учöтик Ванятка да гортiсь удж домалiсö сылiсь бöжсö керку бердö. Степанлö жö гортын эз пукассьы. Сiя одззамоз аслас гармонняöн бергалiс да гажöтчис том отир коласын. Эта кадö, арся рытö, и усис Катериналö пантасьны Митякöт, кöда сё эшö ветлöтiс гöтыртöг. Сё, тыдалö, эз чулав öбидаыс сы сьöлöмын аслас любитöм понда.

— Но мый, ичмонь, гажöна овсьö гармонняыткöт? — Митялöн кыввес, кыдз лёк пурт мöртчисö Катерина сьöлöмö. Но ответсö видзны вöлi немöн, и öбижайтчыны сы вылö эз туй. Эна зубыт кыввезсянь только мыйкö бытшкис моросас да лоис жар. — Чöв, Катерина, оланыс эшö кузь, — кытшöмкö гажасора голосöн содтiс Митя да кежис туй мöдöрас.

Дыр эшö Катерина одзын пемытiнас югьялiс Митялöн цигаркаыс. Посöдз ыбöс одзын сулавтöн ни сiя эшö öтпыр дзар керис сы сьöрö. А биокыс нарочно, кыдз ловья, то саясьлiс, то вились мыччисьлiс. Сiя кыдз бытьтö мыччалiс инькаытлö туй, корис сьöрас.

Сьöкыта чулалiс эта бöрсянь ой, но ордчöн вöлi мужик, кöдö сiя бöрйис сьöлöм сьöртi, и мöдiк йылiсь öнi сёр ни вöлi думайтны.

Вылын мыгöра, бытшöм да здоровöй Степанöс босьтiсö войналöн медодзза луннэзö. Кык письмо локтiсö туй вывсянь — куимöтыс вöлi не ассяняс ни.

Сьöкыт вöлi эта кадыс. Эз позь тöдны, кинöс мый видзчисьö одзлань. Сiдз чулалiсö год бöрын год. И вот... Катерина лэбтыштiс подушка бердiсь юрсö. Пемытiнас нем эз тыдав, и только куим лолалан шы кылiсö горвыв дорын да западня вылын.

Гор ештöтан кадö челядь чеччисö. Катерина пöдналiс труба да вайис сёйны.

— Ме, тётка, гортö муна, — эшö миссьытöг горöтчис Егорка да пондiс пасьтавны ассис зипунсö.

— Кольччö кытчöдз миянын. Ме Вовасö часöт пым йöлöн юктала, — ласкова баитiс Катерина, Егоркалiсь юрсö малалiкö.

— Дак колö эд школаö мунны, а менам книгаэзö абу, — норасис Егорка. — Кыным ни лун эг ветлы, кольчча эд.

— Перво пуксьö да сёйö. Мыйöн школаас мунан? Видзöт, нинкöммет напроч разьсьöмöсь.

Чöвтчытöг, шапкасö киас видзöмöн, Егорка сулалiс порог дорын да видзöтiс бырöм нинкöммес вылö. Катерина бöра сибöтчис сы дынö, жагвыв чöвтiс зипунсö да пуксьöтiс зоночкасö пызан сайö.

— Сёйö, похлёбкасö талун лукöн пуи, — ачыс пондiс кыскавны ведратöрик чугунiсь кöтöтöм нин витиккез.

Дыр думайтiс Катерина, кыдз бы повзьöттöг висьтавны мамыс йылiсь, но некыдз эз вермы. Кынымись ни сiя осьтлiс эта понда öмсö, а кыв вылiсь петiс мöдiк басни.

— Но, олö, дитяэз, кыйö нинкöммезнытö, — горöтчис Катерина, удж вылö мунiкö. — Ваняыс тэнö велöтас, Егорка, он кö куж кыйнытö.

Не сэтшöм ни учöт да ылöстöм вöлi Егорка, мед не вежöртны морт кывсö. Дитянас шувлiс сiйö только мамныс. Эта кылыс öнi повзьöтыштiс сiйö. Этасянь Егоркалö эз пукассьы. Ештiс только мунны Катерина, и сiя вились пондiс пасьтасьны.

— Кытчö тэ? — юалiс Ваня.

— Гортö колö ветлыны, — шуис Егорка.

— Ме тожö тэкöт муна, — пасьтасис Ваня и тшöтш петiс керкуись.

Посöдз дын эз вöв некытшöм след. Ыбöс бердын öшалiс важ замокыс, только ключ вöлi пуктöма виль местаö. Керкуыс кажитчис пемытжыкöн да гажтöмжыкöн, ветлiс пуста дука кöдзыт ру. Пытшкас быдöс вöлi не одззамоз. Енджаджын мылякö кольччöма öтiк ен. Сiя виноватöя видзöтiс челядь вылö пемыт пельöссяняс. Быдöс дозмукыс вöлi миськалöм да тэчöм öтлаö, кыдз бытьтö некöр и некинлö сэсся оз понды ковны. Синнэз вылö усис пöлать, кöдаын дорсяняс эз тырмö кынымкö пöв. «Кытчö жö нiя лоисö?» — пöлатьыс вылö видзöтiкö аскежас думайтiс Егорка.

— Ныись, натьтö, гроб керисö, — видзчисьтöг горöтчис Ваня.

— Мы-ый? Кытшöм гроб?

Только öнi Ваня казялiс, что горöтчис неколанаö. Сiя виноватöя вирснитыштiс нырнас и пондiс лöсьöтчыны бöр мунны.

— Мый тэ чöлан? Кытшöм гроб керисö? — пизис Егорка.

Оз кужö бöбöтчыны челядь. Ны характерын абу эта неколана чертаыс. Этасянь, часто думайттöг, нiя висьталöны öтамöдныслö сiйö, мый кылöны да адззöны и мый йылiсь мукöд коста буржык бы вöлi чöвны. «Эн лёб челядьыслö мамныс йылiсь. Висьтав — больницаын пö», — усисö Ванялö тöдвылас мамыслöн кыввес. «А-а, сёровно бы висьталiсö», — думайтыштiс аскежас Ваня. — Удерлун мамтö дзебисö, — кыдз лыйис, горöтчис сiя. — Только мамö эз тшöкты тэныт висьтавны.

Повзьöмувья Егорка нем эз письты висьтавны, и öмыс эз оссьы, только ыждiсö синнэс да тырисö сöстöм, пым синваэзöн. Керкуыс, кытöн сiя шогмис да чулöтiс дас год ас оланiсь, сразу лоис гажтöм-гажтöм. Егорка öктiс пызан сайись ассис учебниккез, и челядь петiсö...

— А кытöн, Егорка, мамö? — медодз юалiс Вова, кöр Егорка локтiс сы дынö.

— Сiя больницаын куйлö и оз вермы чеччыны, — мöдiс бöбöтны Егорка, но эна кыввезсянь Егоркалö мылякö лоис öддьöн зубыт, и сiя жмитiс бердас вонсö да кутчис сыркьявны... Пöттöдз горзöмсянь челядь онмöссисö и саймисö вöлись павжун кадö, кöр Ваня лöсьöтчис ни мунны школаö.

Катериналö колiс только вуджны порог, медбы тöдны быдöс йылiсь. Егорка, пыктöм да гöрдöтöм синнэза, пукалiс öшын одзын. Ваня виноватöя видзöтыштiс мамыс вылö да эшö öддьöнжык мышкыртчис нинкöм весьтö, горöнжык öдззис шваткöтны сьöктанöн...

Не öтiк неделя думайтiс Катерина сы йылiсь, кыдз юöртны быдöс Митялö, кöда неделя бöртi Дуняша кулöмсянь гижис гортас письмо. А кöр письмоыс вöлi гижöм да мöдöтöм, эз ло спокой ответсö видзчисьöмсянь. Тöдiс Катерина, что нем эз кер Митялö умöльсö этöн поступокнас — не кувны жö эд челядьлö мамныстöг — но мыйсянькö полöм петiс. Сiдз видзчисьöмын чулалiс месяц. Сибöтчис тулыс. Вылына ни бергалiс юр вевдöрын шондi, кисьтiс му вылö шоныт да гаж. Кузьжыкöсь да гажажыкöсь лоисö луннэз. Пуксис, лöзöтiс лым. Шоныт тöввез кулисö вöр вылiсь чочком шебрассö. Сибöтчис кад, кöда кужö да вермö вöрзьöтны морт сьöлöмын медвöснит струнаэсö. И кöть годдэзын ни вöлi Катерина, а письмосö видзчисьöмыс да тулыслöн сибöтчöмыс и сылiсь вöрзьöтiсö сьöлöмсö.

Рыттэзнас, кöр челядь водлiсö ни узьны, Катерина дырöн эшö пукавлiс öшын дорын. Сiя лыддьöтiс письмоэз. Эта кадö Катерина томмывлiс: чужöмыс рöмсявлiс, биöн сотчисö тöв вылын потласьöм тырппес, синнэс югьялiсö шоныта-шоныта. Керку бердö негора стукöтчöмсянь Катерина дрöгнитлiс, лöньсьывлiс нето уськöтчывлiс ыбöс дынö, мед пантавны сiйö, кинöс видзчисис.

Öтiк лунö, кöр челядь локтiсö школаись, Катерина вöлi гортын ни. Сiя пасьталöм виль сарафан, кöмалöм сапоггез, юр вылас гöрд потшшалок. Сэтшöмнас Егорка сiйö эшö некöр эз адззывлы. Катерина только и видзчисис челядьыслiсь локтöмсö. Сiя пасьталiс дубитöм пась, юр вылас пуктiс гырись сера ыджыт шаль, шуис:

— Но, дитяэз, кольччö гортö, а ме муна айнытö вайöтны. — И тэрмасьöмöн окалiс куимнаннысö да петiс керкуись. А паныт сылö шыннялiс мича шондi, шыннялiс сiдз ласкова, кыдз эз на шыннявлы не öтiк год ни.

И челядь понда эта луныс вöлiмедгажа быдöс тулысся луннэз коласiсь: сiя вайöтiс челядьлö айнысö, а сыын — гаж да шоныт.