Медбасöк клён

Челядь кадсянь олö ме тöдвылын и некöр оз вун сэтшöм лирическöй, сьöлöмöдз йиджан сьыланкыв «Рос на опушке, в роще клён». Кыввес Яков Шведовлöн.

Рос на опушке, в роще клён.

В берёзку был тот клён влюблён.

И лишь для клёна каждый год

Берёзка стройная растёт.

А вот кыдз гижис сiя жö клён йылiсь Михаил Матусовский:

Старый клён, старый клён, старый клён стучит в стекло,

Приглашая нас с тобою на прогулку.

Отчего, отчего, отчего мне так светло?

Оттого, что ты прошла по переулку.

И конечно жö, оз позь эстöн ордйыны сiйö есенинскöйсö, кöда, натьтö, тöдса быд том и пöрись лыддьöтiсьлö:

Клён ты мой опавший, клён заледенелый,

Что стоишь нагнувшись под метелью белой?

Или что увидел? Или что услышал?

Словно за деревню погулять ты вышел.

Пример туйö вайöтöм быд стихлöн, а эстöн четверостишиелöн, аслас автор, но быдыс ны коласiсь, сiдз ли этадз ли, гижö öтiк и сiя жö пу — клён йылiсь. Примеррес дзир куима. Но пондыны кö видзöтны паськытжыка роч литература, проза да поэзия, кыдз классическöй, сiдз и öннясö, клёныс йылiсь гижöмсö позяс пантавны не öтiк сотня мымда быдкодь жанра произведеннёэзын. Сэтöн жö колö висьтавны и сiйö, что клён йылiсь уна гижöм стиххез лоисö бöртiжык сьылiсь отир понда сьыланкыввезöн. Этö жö позьö висьтавны и пример туйö вывланьын вайöтöм стиххез йылiсь. Быдöнныс нiя гижöмöсь важын ни. А сёрöнжык быдыс вылö ны коласiсь композиторрез гижисö музыка. Сэксянь быд стихотвореннёыс и лоис отир коласын популярнöй сьыланкылöн. И ась Россия пасьта клёнлöн виддэс пантасьлöны уна да быдкодьöсь — нельки дасвит мымда — сорасьтöг позьö висьтавны, что пример туйö вылынжык вайöтöм сьыланкыввес посвятитöмöсь ны коласiсь дзир öтiклö, кöда лыддиссьö медбасöкöн да шусьö йыла листа клёнöн, кöдалöн эта йыла пельöса, ажурнöй листыс красуйтчö нельки канадскöй государственнöй флаг вылын.

Эстöн лыддьöтiсьыс одзын вермас сувтны сэтшöм вопрос, мыля ме клён йылiсь куимнан примерсö вайöтi не асланым коми-пермяцкöй, а роч поэзияись? Эта сысянь, что öннявиöдз миян неыджыт коми-пермяцкöй литератураын не стихотвореннё некытшöм, не рассказ эта клён йылiсь абу на гижöм, и сэтшöмсö он пантав. Не сiйöн, вежöртана, бытьтö миян гижиссезлö, поэттэзлö да прозаиккезлö эта басöк пуыс мыйöнкö оз гленитчы и этасянь некинлö ны коласiсь некöр да некысь нельки син вылö оз усь, а сiйöн дзир, что кöдзыт климат увья миян округись вöррезын ачыс клёныс, кыдз, шуам, бадь нето пипу, оз быдмы. Сiдзкö, петö, что миян гижиссез син вылö усьнытö лоö немлö.

Но сiя кадсянь, кыдз меным усис адззывны ас синöн да пондi тöдны этö басöк пусö, лоис öддьöн и öддьöн охота, мед сiя быдмис миян округын, кöть бы городскöй да сельскöй улицаэзiсь озелененнё коласын. Эта увья ме и пондi кошшыны быд ладорись округ сайись эта клёнлiсь кöдзыссэз.

Сизимдасöт годдэзö, кöр ме уджалi природа дозоритан окружнöй обществоын, эта клёнлiсь кырым мымда кöдзыссэсö ыстiсö меным öтiк Уржумскöй школаись юнаттэз. Вежöртана, что эталö ме вöлi радся-рад. Но эшö öддьöнжык рад вöлi сылö, что кöдзыссэс локтiсö не ылiсь местаись, а ордчöн миян округкöт соседньöй Кировскöй областись, кытöн климатическöй условиеэс миянкöт чуть я не öткодьöсь. А этасянь эз пет некытшöм полöм сы понда, что локтöм кöдзыссэзiсь клён петассэс пондасö кынмыны. Умöльыс вöлi сiя, что петiк кежас кöдзыссэс вöлöмась, тыдалö, мускытöлöсь и бандероль пытшкас, туй костас ни, нiя ештöмась тшыктöдз багсьыны. Чапкыны ме этнö кöдзыссэсö сё жö эг понды, а бытшöма бöрйöм бöрсянь буржыккесö сiя жö арö кöдзи ас керку öшын увтö.

Чулалiс тöв. А кöр шонтiс погоддя да сылiс лым этна кöдзöм кöдзыссэзiсь петiсö нёль петас.

Год кыным бöртi этна петассэс пöрисö басöк саженеццезö, кöднö позис ни садитны кытшöмкö бöрйöм местаö.

Öтiк клёнсö, кыдз и маньчжурскöй орехсö жö, корис садитны ас öшын увтас Валентина Михайловна Ермакова, кöда олö Филичын, Маяковскöй нима улица вылын. Куим кольччöм петассэсö ме вуджöтi аслам виль участок вылö, но аслым садитi дзир кыкö, а öтiксö сетi Пирогова нима улица вылiсь соседлö, Виктор Яковлевич Климовлö.

Сэк кежö менам строиттöм эшö керку гöгöр и участокыс тожö вöлi лöсьöттöм. Сiйöн год бöртi ни кыкнан клён петасыс сюрисö бульдозер пурт увтö и ловзьыны-сувтны бöр эта бöрсянь сэсся эз ни вермö. Сiдз нёльсис ловйöн кольччисö кык клён петас, кöдна вöлiсö йöз ордын. Этна кык пуокыс олiсö-быдмисö цветиттöдз, пондiсö ни сетны ассяняныс кöдзыссэз. Но 1991 годö, кыдз юöртiс Валентина Михайловна, маньчжурскöй орехыс дзескöтчöм увья клёнсö ковсьöм керавны. Жаль, конечно, но кыдз баитсьö — кералöмсö вуж вылас бöр он ни сувтöт. Сiдз нёль клён петасiсь дасвит год бöртi ловйöн кольччис дзир öтiк. Талун кежö не только город, а и быдсöн округ пасьта дзир öтiк, уникальнöй, позьö шуны, экземпляр, кöда вылö öнi быдöс надея, и кöдö колö бы берегитны синöс моз жö. Но ог пондö думайтны, что эта медбöрья кольччöм клёнкöт тожö вермас шогмыны мыйкö умöль, кöть быдöсiсь этаись сiя немöн абу сайöвтöм: вермасö и керавны и машинаöн тальны. Но клёныслö колö овны, сiдз кыдз сiя быд год цветитö, а цветитöм бöрсянь зорамöм кöдзыссэс ештöны воны нельки миян сьöкыт климатическöй условиеэзын, и муö сюрöм бöрсянь ныись петалöны виль петассэз.

Лыддьöтiсьыс, натьтö, вежöртас, кытшöм забедно вöлi меным сысянь, мыля ас киöн быдтöм клён петассэзiсь нельки öтiк пуок эз кольччы ас садын. Но керны вöлi нем, кыдз кутчисьны быдтыны нiйö вились. Бур, что сэк кежö ловйöн кольччöм öтiк клёныс цветитiс ачыс ни да быд годö сетiс воöм кöдзыссэз. Кошшыны да корны нiйö кыськö округ сайись оз ковсьы. Быд арö, кöр кöдзыссэс воисö пуыс вылын, öктынытö нiйö позис ордчöн.

Этö уджсö ме лöсьöтчи керны не öтiк год сьöрна да сё кыдзкö эз лöсяв колана кад. И дзир чулалöм годся тулысö, натьтö, июнь вылас ни, кöр быдöс пуэс пондiсö пасьтасьны асланыс том листö, ме адззи удж коласын кад, мед кежавны соседдэз клён дынö: охота вöлi адззывны сы увтiсь кöть кынымкö арсянь усьöм кöдзысок. А кöр сибöтчи зэв том эшö, а этасянь и поснит листа пу дынö да жагвыв пондi нёджжасьны сы гöгöр, сэтöн вöлись и вежöртi, что кöдзыссэсö кошшыны оз и ков. Ны местын меным син вылам усис нельки нысся унажык — клён петассэзiсь неыджыт питомник. Одзза годдэзö шогмöм да киссьöм кöдзыссэз мöйму тулыснас, тыдалö, потöмась и гожумбытнас ештöмась вужьявны да сетны петассэз. Сiйöн öнi, то öтöрын, то мöдöрын, син вылö усисö вит-квать сантиметр сувдышта да кык учöтик листока виль пуоккез.

Вежöртана, что сэтшöм видзчисьтöм пантасьöмлö ме вöлi радся-рад. Бöрйи ме этна петассэз коласiсь вит ёнжык петас, гарйи нiйö вужоккезныс сорöн да и вайи гортö. Нёль петас бытшöма садитi садö, грядка вылö, а öтiклö адззисис местаыс улица ладорсянь аллеяын, ордчöн ыджыткодь ни кыдзкöт. Виль местаын быд петас кутчисис бытшöма.

Этö рассказсö ме гижа год бöртi, тулысöн жö, кöр шонтiс, сылiс тöвся лым да пондiс оссьыны пугыр. И колö висьтавны, что годöн одзжык садитöм клён петассэс тöвйисö бытшöма, быдöнныс кольччисö дзоньöсь да ловьяöсь, и эта кадö ны вылын тожö потiсö пугыррез, кöднаись мыччисисö поснитöсь эшö, но öддьöн и басöк ажурнöй листоккез.

Клёныс, кыдз и льöмпу нето кыдз, томувья быдмö тожö перыта. Öтiк гожум сьöрна сiя вермас лэбтiсьны быдса метр сувдöн. Этасянь меным и думайтсьö, что чулаласö вит-квать год и этна клён петассэс, садитöмöсь колана местаö, пöрасö гырись да басöк пуэзö, пондасö цветитны да сетны виль кöдзыс. Думайтсьö сiдзжö, что и ме, сэтшöмыс, кöдалö кöркö вöлi öддьöн охота, мед эта басöк пуыс быдмис миян округын, тожö не öтнам. Адззисясö и ме бöрсянь сэтшöм отирыс, кöдналö тожö лоас охота тырсьöтны округись садово-парковöй быдмассэз. Ны понда, сэтшöммес понда öддьöнжыксö и гижöм эта рассказыс, мед тöдiсö, кöр да кыдз вöлi пыртöм первуись миян округö йыла листа клён да кытшöм местаын городас сiя быдмö.

Öддьöн охота веритны и сылö, кöр локтас кад и эта басöк пуыс пондас быдмыны быдсöн округ пасьта. И нiя виль поэттэс да прозаиккес, кöдна локтасö миян коми-пермяцкöй литератураö миян бöрсянь, ештасö гижны эта клён йылiсь быд жанрын.

1992 г., тулыс.

ВИШНЯ

А былись эд. Кыдз ме баита, сiдз и эм. Яблоккесö и грушаэсö, сливаэсö и виноградсö, арбуззэсö и дыняэсö, нельки апельсиннэсö нето мандариннэсö öння кадö позьö небны магазинiсь. А вот вишнясö?.. Сiйö магазинсис он неб. Ассим векöс овтöн адззывлыны эшö эз усьлы, мед вишнясö, кыдз мöдiк свежöй фрукттэз, вузалiсö кытшöмкö магазинын. А öткоста... Öткоста колö висьтавны, что быдöннысö вывланьын висьталöм фрукттэсö вишняыскöт и ордчöн сувтöтны оз позь. Эд мыйсö дзир этна ягöддэзiсь оз позь керны. Пуны кö, шуам, вишнёвöй вареннё, сiя шогмас медбытшöм. Керны компот, и сiя лоас сэтшöм жö. И öтласа косьтöм фрукттэз коласын вишнялöн аслас места.

И керны кö этна ягöддэзiсь ликёр, наливка нето настойка, ордчöн ныкöт и сувтöтнытö лоас нем...