Сьöдпель

Чулалiс кузь да сьöкыт август месяц. А öтлаын сыкöт — и быдсöн гожумся кад, кöр кöдзöм парресö пинявтöн, миянлö, дасöтiк-даскыкгодся зоночкаэзлö, лунiсь лун, шондi петан кадсянь и шондi пуксьытöдз, ковсис кыскавны коккез пиняэз сьöрын гöрöм му кузя.

Август бöрья лунас ми уджавнытö эгö ни петö. Эта местö павжун гöгöрöдз, тэчим аслыным волыса гырись котомкаэз, кöднаын быдыслöн школьнöй тетраддезся да учебниккезся вöлi пуктöм эшö быдса неделя кежö сёян: кынымкö чöвпан мымда пöжалöм нянь да джын ведра етш картошка. Этна сьöкыт котомкаэзöн, мийö öтлаын öтiкгодся нылочкаэзкöт вит-квать велöтчись чукöртчим павжун бöрсянь быдöнным öтлаö деревня сайö да сэтчинсянь вöлись и вöрзьöтчим дас километр ылына Чурак туйö.

Эстöн ни корсьö юöртны сы йылiсь, что миян коласiсь öтiк ёрт Гришка эшö тулыссяняс быдтiс понöс. Гожумбыт сьöрна учöтик сьöд пеля чочком кычан вöтлiсис миян сьöрö пиняланiнö и кепись ыждасис этöн каднас быдмис чуть я не быдса понöдз. Дак вот, кöр ми петiм туйö, миянкöт öтлаын кыдзкö казявтöг лöсьöтчöм и Сьöдпель. Но мийö мунiм гортiсь быдса неделя кежö и сымдасö, мед сiя вöтчис миян сьöрö, эз бы ков. Эд öткö, и верднытö сiйö сы дырнасö йöзас лоас немöн, а мöдкö, и овнытö сылö сэтчин некытöн. Но кыдз бы Гришка ёртным и бытшöм басниöн, и видöмöн, и нельки кинас лöгвевйöн вувьялöмöн, эз пондыв бергöтны Сьöдпельöс бöр гортö, этаись нем эз ни пет. Видöм да вувьялöм увья Сьöдпель, бöжсö жмитöмöн, недырик кежö бергöтчывлiс бöр. Но колiс только миянлö иньдöтчыны одзлань, кыдз сiя гусьöн-пöлöн вились пондывлiс оськавны быдöнным сьöрö. Керны эта бöрсянь кольччис нем, кыдз öвтыштны сы вылö киöн. Сiдз ми öтлаын Сьöдпелькöт Чурак туяс и иньдöтчим. Погоддяыс сулалiс мича, сiйöн и öтöрас вöлi шоныт. А быдсö миян коласiсь шонтiсö эшö и асланым сьöкыт котомкаэз, кöдна быд оськöв вылын дугдывтöг нырыштiсö увлань. Кытчöдз чулалiм деревня бердiсь ыббез да локтiм Сия ю бердöдз, быдыс миян коласiсь ештiс пымавны люзь. Ю бердас вöлi тöдчöмöн ыркытжык. Эстöн ми первуись шоччисьыштiм да пöттöдз юим. А мунны одзлань пыд вöр коласöт лоис казялöмöн кокнитжык, сiдз кыдз вöр коласiсь руыс вöлi сöстöмжык да ыркытжык, а сэтшöмнас лолассис кокнитжыка. Нюжöтчöмöсь нин кöласöн öтамöд сьöрын, ми вешталiм да вешталiм коккезнымöс одзлань. Эта коста то чулавлiс кöс песока яг да петавлiс важ сотчöм места, то лэдзчывлiм шор дорö да пондывлiм оськавны ыркыт да уль вöр коласöт.

Кытшöмкö кадö, вöрöттяс мунтöн ни, Сьöдпель ештöм миянöс одзавны. И ась сiя вöлi эшö том, но мыччалiс öнi асьсö настоящöй вöралiсь понöн ни. Сiйöн, что сылöн эз вöв миян моз некытшöм котомка, а оськалiс сiя не кык, а нёль кок вылын, Сьöдпель эз кыв некытшöм мыдз и некытшöм шоччисьöм эта коста сылö эз ков. Витикöн каттьыштöм бöжа сiя гажöн да кокнита котöртiс миян одзын, а öткоста ештiс кежавлыны туй вывсис, чуть я не быд мыр, кöчка, нето куст бердö, кывзiсис, нюкайтчис. Кынымиськö Сьöдпель вувтчывлiс и уррез вылö. Но вöравнытö ны сьöрын вöлi эшö одз. Сэтчö жö некинлöн миян коласiсь сьöрын и пишальыс эз вöв. А куш киöн да вöр коласын урсö сё ни он кут.

Костикакуланын — сiдз вöлi примитöм шуны туй гöгöрись паськыт, но тырöм видз — Сьöдпель инмис кöч след вылö, пондiс кöчавны. Öнi сылöн шочыника да нюжвылöн каньгöм-вувтöмыс кывлiс то кысянькö боксянь, то бöрсянь.

Эта коста ми сибöтчим Чураковскöй тракт бердöдз, но петнытö сы вылö эшö эг ештö. Эстöн ми быдöнным чукöртчим öтлаö, сувтiм кытшöмкö визира весьтö, пондiм кывзiсьны. Понлöн вувтышалöмыс öнi кылiс одзсяняным ни, тракт ладорсянь.

— Кутас или оз? — юалiс кинкö миян коласiсь.

— Кляпсö сiя кутас, кычаныс. Нач эшö том да. Вашöтлас мымда, — шыасис эта вылö понлöн хозяиныс. А эта коста вöр коласiсь визира вылын, кöда весьтын ми сулалiм, öтпыр-мöдöтпыр мелькнитiс миян ладорö кытшöмкö руд пятно. Некин миян коласiсь и синöн бытшöмжыка кваркыштны эз ешты, кыдз эта тöвчикöн лэбзян руд пятноыс вынöн люкасис Гришка лядьвей бердö, люкасьöмсяняс метр ылына таралiс бöр, но сэтöн жö чеччöвтiс лапаэз вылö, перыта уськöтчис одзлань. Син одзын кынымиськö мелькнитöм бöртi эта руд пятноыс öшис бöр сiдз жö, кыдз и мыччисис. Но нiя, кöдна адззылiсö руд пятнолiсь перыта мелькайтöмсö, сё жö ештiсö вежöртны, что эта вöлi кöч. И вöлись öнi, кöр ми казялiм, кыдз миян ёртным зыртышалö кинас люкыштöм местасö, эта вылö ми, сы вылын сералöм могись, горöн да гажöн пондöтiм:

— Видзöтö жö, челяда. Люкыштiс эд Гришкасö кöчыс, кыдз пороз.

— Вот этö да! Невна тай кок йывсис эз пöрöт. Эз жö эд, поди, коктö чег, — баитiм-ваксим ми горöн.

— Эз, но зубыткодь кылö, — шыасис ёртным.

— Бур, кöть эз вöв сюра, а то бы кишкаэтö лэдзис, — лöдсалiс вились кинкö миян коласiсь, и ми, быдöнным öтдруг, ваксим эшö одззася горöн. А кинкö нывкаэз коласiсь, кöдна сулалiсö бокынмоз миян дынсянь, полöтöмöн сэтчö жö горöтчис:

— А мый тi, зонкаэз, сералат? Думайтат, бур одзын сiя люкасис?

— А былись эд, кывзö жö.

Паймыштöмöсь сэтшöм баснисянь, ми ваксьынытö дугдiм, недырик кежö быдöнным лöньсьыштiм. А эта коста сiя жö визира вылын кöч следыс кузя мыччисис Сьöдпель, кöчыс моз жö, тöвчикöн сибöтчис миян дынöдз.

— Сьöдпель! Сьöдпель! Ту! На! — ылöстöг да ладтöг öдззим ми горöтлыны сылö. А Сьöдпель сувтчыштiс, кытшöлöн котöртiс öтпырись миян гöгöр да öтпырись норöн тявкнитöм бöрсянь, что ылöтлiсö весь кöч след вылiсь, вились уськöтчис сы сьöрö. Минута бöртi сылöн шочыника каньгöмыс пондiс кывны ылын ни миян дынсянь кытöнкö вöр коласас.

Эстöн ми вöлись быдöнным и вежöртiм, кытшöм причина увья кöчыс люкасис Гришка лядьвей бердö. Не бур олансянь сыкöт сымдаыс шогмис. Эта вылын серавтöн ми и петiм тракт дорö.

Тракт кузя джын километр бöртi миянöс видзчисис эшö öтiк шоччисян места. Эта вöлi Кыдз ю, кöда поперегалiс миянлiсь туй. Пос саяс шульгалань кежис Шаламова деревняö туй. Веськытланьын, ю берег дорас, вöлi лöсьöтöм шоччисян места — джеккез вылын скамья. Эстöн ми мынöтiм «чашкалöм» пельпоннэз бердiсь сьöкыт котомкаэзлiсь волыссэз, мед юны да шоччисьыштны.

Кöр ми, зонкаэз, быдöнным сулалiм берег увтын да сьöрсьöн-бöрсьöн мышкырасим колода вывсянь ва бердö юны, вывланьын сулалiсь нывкаэз горöн чирзöмöн юöртiсö:

— Зонкаэз! Видзöтö! Кöчыс! Кöчыс!

Кöр ми уськöтчим вывлань, сэк кежö сiя ештiс ни чеччöвтны пос вылöдз. Нюжалöм чуть я не метр кузьöн, вылына да кузя, метр кык-куим кузьöн чеччöвттöнняс, сiя дзир кык-куимись жö и гырскыштiс горöн бöрись коккезiсь гыжжезнас поспуэз кузя. А кöр сiя мынiс пос вывсис, кежис Шаламовскöй туйвежö, кынымиськö эшö мелькнитiс миян син одзын дженытик да «нильыг» бöжа чочкомжык бöрнас — сымда ми сiйö и адззылiм — саясис вöр коласас.

Сы коста жö пос вылас мыччисис и Сьöдпель. Кыдз и кöчыс, миян чирзöм-горöтлöм вылö сiя и пельöн эз вöрзьöт. Тöдчöмöн мыдзыштöм ни эта вотöдз, осьта öмöн да кузя нюжöтöм кыла, сiя, кöчыс моз жö кынымиськö гырскыштiс гыжжезнас пос кузя, сорасьтöг уськöтчис следыс кузя одзлань.

Лöньсьыштöмöсь быдöс лоöмыс бöрсянь, ми чукöртчыштiм быдöнным öтлаö, пондiм висьтасьны öтамöдлö быдыс аслас впечатленнё йылiсь: кин нывкаэс чирзöм бöрын кöд коста да мый весьтiсь казялiс пос вывсис кöчсö, кыдз да кытшöм сiя сылö мыччассис, мый думайтсис да мый вöлi охота эта кадö керны. Вежöртана, что ми быдöнным жалейтiм дзир öтiкö, что некинлöн миян коласiсь эз вöв сьöрын пишаль, кöдöн бы кöчыслö позис лыйны. Эд не мый мöдiк, а дзир эта понда поныс миян вылö сiйö кыкись и петкöтлiс. А сiдз кыдз пишальтöгьяс керны кöчыскöт нем оз позь, бöртiжык кинкö миян коласiсь жö горöтчис:

— Висьталö спасибо поныслö, что кöть ловья кöчсö быдöннымлö мыччалiс да и люкасьöмсö сылiсь пондiм тöдны. А тэ, Гришка, эшö эн мöд лэдзны Сьöдпельсö сьöраным мунны. Норовитö вот недырик, дак сiя эшö и куимöтчид миян дынö шардöм синасö петкöтас.

Но сiя кадö Сьöдпельлöн каньгöм-кöчалöмыс кылiс вель ылын одзланьын ни. Сэтчö жö пукавны дыржык Кыдз ю дорас миянлö эз позь. Сэк кежö шондiыс лэдзчисис матö вöр весьтöдз ни, а миянлö Чуракöдззас локтöдз кольччис вермыны куим кузься-кузь да паныт сулалан керöс. Сiйöн ю дорас кöчкöт мöдöтпырись пантасьöмсö видзчисьнытö ми эгö ни енöвтчö, кышалiм бöр пельпоннэз сайö ассиным волыса котомкаэз, кöдна мыдзыштöм коста быдыслö мыччасисö из сьöкытаэзöн, жагвыв иньдöтчим одзлань.

Кытшöмкö кадö Сьöдпельлöн каньгöм-вувтöмыс кывны дугдiс. И недырик кежö ми сы йылiсь нельки вунöтчим. Но Чурак керöс увтас сiя миянöс жагвыв вились вöтiс, пöт да гажа. А сё эшö вирöсь чук да сэтшöм жö лапаэз сьöртi позис вежöртны, что кöчыс вöлi кынöмас ни. Сiдзкö и кöчалiс не весь.