Кватьöт картина

Фермаын. Арнас, кынтан кадö. Витöт картина бöрсянь чулалiс кынымкö месяц.

ДАРЬЯ СЕМЁНОВНА (простöй ведраэзöн мыччисьö кукань карта пытшкись, сувтöтö нiйö му вылас, пöрччалö юр бердiсь личамöм чышьян, дивуйтчöмöн, ас кежас). Эта нö мый? Эта мый сэтшöмыс? Чудо тай, чудо. Кыдз сiя вермöм öтiк гожумнас сiдз куканнесö вердны-быдтыны.

ТАИСЬЯ тыра ведраэзöн петö кормокухняись, иньдöтчö кукань карта ладорö. Халат карманiсь тыдалö конверт. Ас кежас нывка сьылö.

Горадзуль тэ менам, горадзуль,

Сьöлöмсянь тэнö сьылöтны рад.

Но мыля жö, дона горадзуль...

Сибöтчö мамыс весьтöдз

ДАРЬЯ СЕМЁНОВНА (жалейтöм могись, рама да нюжвылика). Ылöстöм горадзуль, арт-ладтöм горадзуль. Тэныт эшö сьывсьö?

ТАИСЬЯ (сувтчывтöг). А мый, мама, сэтшöмыс лоис?(Сайöвтчö воротаэз коласын.)

ДАРЬЯ СЕМЁНОВНА (сьöрсяняс). Тьфу! Ылöстöм ректан! Сiя эшö юасьö.(Нылыс сьöрö бергöтчöмöн, чышьянасьтöнняс.) Тэнат юрат мыйкö кöть эм жö, абу?

ТАИСЬЯ (простöй ведраэзнас мыччисьö воротаэз коласын, шутитöмöн). Но мыля жö, мама, абу?

ДАРЬЯ СЕМЁНОВНА. Да нем торыс, нем кляпыс, видзöта вот ме тэ вылö, дак абу. (Босьтö ассис ведраэз, ордчöн иньдöтчöны кормокухня ладорö.)

ТАИСЬЯ (шутка могись обидитчöмöн). Но жö тэ, мама, кытшöм. Абу, шуан, дак мыйлö нö эшö сэк юасян?

ДАРЬЯ СЕМЁНОВНА. Ой, Тайка, Тайка! Ой, грекö пыртан кага. Кин тэнö, сэтшöм ылöстöмсö, ме юр вылö сетöм? Ас йывсит кöть мыйкö думайтан жö, он? (Сибöтчöны кормокухняö пыранiн весьтöдз, сувтöны.)

ТАИСЬЯ (горöн ваксьытöн). А мый меным, мама, ас йывсим думайтнытö?

ДАРЬЯ СЕМЁНОВНА (нюжвылика). Кыдз жö мы-ы-ый, кыдз жö мы-ы-ый. Тэ эд гортö кодьöн он пыравлы: пемытöн мунан, пемытöн локтан. Лун-лун сё эд пермаын, сё куканнез дынын.

ТАИСЬЯ. А кытöн нö меным эшö лонытö? Эта жö удж. Ме эд кытчöдз öтнам, а нiя вон мымдаöсь. (Кинас öвтыштöмöн мыччалö кукань карта ладорö.) Нiйö жö тшыгйöн он видз, вердны-юктавны колö.

ДАРЬЯ СЕМЁНОВНА (одззамоз нюжвылöн). Мый ме тэныт и баита, мый и баита. Да кысь тэ öтнат сымда подасö вердан-юкталан? Думайтны эд колö. Ме вот öтпырись отсасьнытö вовлi, да и то садьö бырис.

ТАИСЬЯ. Да ме разь, мама, тэнö отсасьны кори?

ДАРЬЯ СЕМЁНОВНА. А мый нö эшö?

ТАИСЬЯ. А куканнесö видзöтны. (Шутитöмöн.) Ме чайтi, тэ менö ошкыны пондан, а тэ перво жö вот видчыны кутчисин.(Чöлыштöм бöрсянь.) Вöвлiсö, эзö тэнат кöркö сэтшöм куканнес?

ДАРЬЯ СЕМЁНОВНА (одззакодь небыт голосöн, рамыника). Ой-ой-ой дитя, да ой-ой-ой. Кысь сiйö-ö-ö, эзö-ö-ö. Век сьöрна пермааныс уджалi, а некöр и некöр менам сэтшöммес эз вöвлö. Да и кысь нылö ме дырни вöлi сэтшöммезнас лонытö? Ме эд некöр и нем эг лысьт ны понда правленнёыслiсь корнытö. Эг и ылöст сымдасö. Кытöн тшöктiсö — сэтöн и видзи, мый вайисö — сiйöн и вердi. А тэ то, видзöт, эн понды ме моз уджавнытö. Мырсин, мырсин да медодзза жö годас и виль подакокувтсö, и вердчансö вермин корнытö.(Чöлыштöм коста мама-ныла рамыника видзöтöв-керöны öтамöд вылö.) Ог и тöд, кин сьöрья тэ менам сэтшöмыс шогмöмыт.

ТАИСЬЯ (радувья простöй кинас сывьялö мамсö голяöттяс, жмитчыштö вывтырнас сы бердö, шутитöмöн). Ме, мама, кадыс сьöрья.(Одзлань серьёзнöя ни.) Вежöртан тэ, он, кытшöм öнi кадыс? Оланыс сэтшöм, что сы понда колö пессьыны быд оськöв вылын.

ДАРЬЯ СЕМЁНОВНА. Поть бы тэнö, пессисьöс. (Дзик учöтик кагаöс малыштö нывсö юрöттяс.) Орöтан вот тэ асьтö этöн уджнас, орöтан. Ме эд тэ понда пола. Эд лоас кö мыйись-мый тэкöт умöльыс, дак кинлö тэ сэсся сэтшöмыс пондан ковны? И корин бы эд то кинöскö аслыт отсасись местö. Сё бы, видзöтан кö, кокнитжык вöлi. Тырмас ни тэныт öтнасытлö мырсьынытö.

ТАИСЬЯ. Эз ни, мама, уна кольччы. Куканнесö ми чожа пондам öшлыны. А сы бöрсянь мукöдсö яйö сетам.

ДАРЬЯ СЕМЁНОВНА. Но ачыт тöдан. (Чöлыштöм бöрсянь.) А куканнет, дитя, Кристос ныкöт, öддьöн басöкöсь. Гленитчисö меным. Топ и топ тай не тавосяöсь, топ и топ не колкознöйöсь. Нем висьтавны, вермöмыт вердны-быдтыны.

Мыччисьö ГАЛИНА. Юрсö увлань мышкыртöмöн, не öддьöн перыта сибöтчö ны дынö.

ГАЛИНА. Здоровöн олат!

ТАИСЬЯ (гажöн, дивуйтчöмöн). Галка, тэ?!(Лэдзö кисис ведраэсö, уськöтчö паныт.) Здорово! (Сывьялö подругасö кыкнан кинас, кругпöв бергöтчöны öтлаын.)

ГАЛИНА. Тэ татöн жö, Дарья тётка.

ДАРЬЯ СЕМЁНОВНА. Локтi тай то.

ГАЛИНА. Отсавны, натьтö?

ДАРЬЯ СЕМЁНОВНА. Кытшöм ни, нылö, меись отсасись. Простöн ни ветлöтнытö ог вермы да. Гоз кыным тай то картовкасö петкöтi, дак невна и садь эз быр.

ТАИСЬЯ (Галиналö). А тэ кысянь? Кытчöдз?

ГАЛИНА. Гортсянь ме тэ дынöдз.

ТАИСЬЯ. Он разь талун уджав? Выходнöй, натьтö?

ГАЛИНА. А-а. (Öвтыштö кинас.) Вакрамешö нылiсь уджнысö. Ме баитны тэ дынö локтi.

ДАРЬЯ СЕМЁНОВНА. Но баитö инö, инмит öтлаö дак. А меным мунны жö колö. Эд и гортын тожö удж. (Кисис простöй ведраэсö сувтöтö кормокухня порог вылö.)

ТАИСЬЯ. Мама, тэ мунан ни? (Оськöвтö мамыс сьöрö, оськöв кыным ылына кольлавтöнняс.) Но мун, шоччись. Дöс ме тэнö талун уджнас мыдзöтi. Спасибо, что вовлiн отсасьнытö.(Малыштö мамсö пельпон кузя, бергöтчö, бертö бöр Галина дынö, сувтö паныт.) Вай жö кöть ме тэ вылö видзöтышта. Важынкодь ни эд эг адззыв.(Видзöтöв-керöны öтамöд вылö. Чöлыштöм бöрсянь.) А вежсьыштöмыт эд тэ, Галка, мыйöнкö этöн каднас. Быль и быль.

ГАЛИНА. Мыйöн жö бы?

ТАИСЬЯ. Да кыдз тэныт висьтавны. Чужöм вылат топ умöльтчыштöмыт, а вывтырнат... Вывтырнат дзик ёнмыштöмыт и... лоöмыт этасянь эшö одззася лöсьытжык.

Видзöт и мороссэт дзескамны пондöмась. (Шутка могись жагвыв сибöтчыштö киэзнас Галина мороссэз бердö.)

ГАЛИНА. Мун жö, Тайка. Казялас эшö кин дак... (Оськöв ылына вешшыштö Таисья бердiсь, казялö сы карманiсь тыдалан конверт.) Кинсянь жö письмосö сьöрат новйöтан?

ТАИСЬЯ. Этö я мый я? (Вачкыштö кинас карман кузя, шутитöмöн.) Жöниксянь, кинсянь разь эшö. Порсевыс тай гижöм да заказнöйöн ыстöм.

ГАЛИНА. Былись я мый я?

ТАИСЬЯ. Да не, Галка. Шутка могись ме тэныт сымдасö горöтчи. Институтсянь сiя меным локтiс. Татчö тай вайисö. Программаэз ыстöмась.

ГАЛИНА. Одзлань сё жö кутчин велöтчыны?

ТАИСЬЯ. Кутчи тай, кытчöдз велöтчиссьö. Мый весись кадсö ештыны. Верми бы, дак сё бы одзлань кокнитжык вöлi. А мый?

ГАЛИНА. Да нем. Сiдз тай юалi.

ТАИСЬЯ. Баит, Галка, баитны, шуан, локтiн дак. Висьтась, кыдз ни овсьö.

ГАЛИНА (увлань синнэсö лэдзыштöмöн, ас вылас лöгöн). А мый сэтöн, Тайка, баитнытö? Баитсис менам. Бöбöв жö ме, бöбöв. Но мыля, мыля ме тэнö перво жö эг кывзы, да эг лок тэкöт öтлаын фермаас уджавнытö?(Чöлыштöм бöрсянь, ас йывсис жö.) Кытчö тэныт — шöрöт образованнёнас. Нятьсис повзи, шонытик места да сöстöм удж колiс адззыны. Вот и адззи ас юр вылам. Öнi эта увья кöть кытчö воштiсь. Кöть петляö пыр, дак и сiя ни оз отсав.(Горöн сьöвзьö.) Тьфу! Эта жö смех! Эд кык кö юр, дак öтiкыс и усь!

ТАИСЬЯ (дивуйтчöмöн). А мый тэкöт сэтшöмыс лоис? Мыйкö уджнас оз лöсяв? Видчит, батi, кинкöткö?

ГАЛИНА. Уджнас кö бы дзир...

ТАИСЬЯ. А мый эшö этася?

ГАЛИНА (бергöтчö мöдöрö, негорöн, но одззамоз ас вылас лöгöн). Тыра ме, Тайка, вот мый. Вот кытчöдз бöбöвсö шонытик местаыс да кокнитик уджыс вайöтiсö.

ТАИСЬЯ (оськöв ылына вешшыштö бокö, чöлöмöн да дивуйтчöмöн видзöтöв-керö Галина вылö улiсянь вылöдз, паймыштöмöн). Галка?! Да тэ мый? Мый тэ сымдасö баитан? Былись я мый я?

ГАЛИНА (сöдзöм синваэсö чышкышавтöн). А вот кöть мый öнi. Кöть талун жö джагöтчы.

ТАИСЬЯ. Да чöв тэ. Дугды. Мыйлö, кöдö оз ков, баитан. Öтлаасят, батi.

ГАЛИНА (öвтышалö öтмöдöрö юрнас). Оз и думайт керны сымдасö. Нельки баснисö эта йылiсь оз кывзы.

ТАИСЬЯ. А кыдз нö сэк? Мый?

ГАЛИНА. А вот кöть мый.

ТАИСЬЯ. Но бöбöв жö тэ, Галка, и эм. Колiс разь асьтö сэтчöдз лэдзны?

ГАЛИНА. Да чöв тэ, эн сэтшöм горöн баит. Кылас эшö кинкö. Висьтав вот, мый одзлань пондыны кернытö? Кытчö öнi меным воштiсьнытö?

ТАИСЬЯ (ас кежас думайтыштöм бöрсянь). Но эд не петляö жö эта увья пырны. Лок ме дынö фермаас уджавнытö.

ГАЛИНА. Примитасö, думайтан?

ТАИСЬЯ. Локтан, дак мыля озö? Ме ачым верма зоотехникыскöт баитны. Сьöкыт жö меным öтнамлö сымда куканнескöт. Вот и пондам öтлаын уджавны. А одзлань, батi, и тэныт кыдзкö лöсямас.

ГАЛИНА (чöлыштöм бöртi). Спасибо, Тайка. Сэк ме талун жö ачым правленнёас пырала.

Пондö кывны матын шутнялöм. Когтиэзöн пельпоннэз вылын мыччисьö ПОРСЕВ.

ПОРСЕВ (сибöтчытöнняс, ылiсянькодь). Мый жö бы этна, кык тото, оча ныр сувтöмась да тоткöны?

ГАЛИНА (перыта нёджжöвтö Порсев ладорö, негорöн Таисьялö). Но ме сэк, Тайка, муна ни. Тэ видзöт эта йылiсь некинлö.(Грöзитыштö чуньнас.)

ТАИСЬЯ. Да мый жö тэ, Галка, кöдö оз ков...

ПОРСЕВ (Галиналö). Тэ он я мун ни? Мый нö сэтшöм чожа?

ГАЛИНА (Порсев вылö дзар кертöг). Некöр менам.(Саясьö.)

ПОРСЕВ (сибöтчö Таисья дынöдз, Галина ладорö юрнас легнитöмöн). Мый нö вовлiс?

ТАИСЬЯ. Тэ тай мыйкö вылö локтiн жö.

ПОРСЕВ. Ме-ту? Ме тэкöт адззисьлöм могись. Эгö на эд талун адззисьлö. Гажтöмтчи тэтöг, вот и локтi. (Сьылö.)

Сьöлöм потö, сьöлöм потö,

Ачым ог тöд, мый понда.

Порсеваас нывка олö,

Ой, навернö, сы понда.

ТАИСЬЯ. Мунi Колька, эн бызды, кöдö оз ков. (Оськöвтö кормокухняö пыранiн ладорö.)

ПОРСЕВ. Тайка! Но кытчö тэ? (Перыта шупкö кок увтас пельпоннэс вылiсь когтиэсö, панöвтöм могись сувтö ыбöс одзас, кутö киöттяс.) Сулалышт жö невночкасö. Ме эшö сибöтчыны эг ешты, а тэ бöра пышшан ни. Позьö разь сiдз кернытö? Кывзы жö, мый ме тэныт часöт висьтала.

ТАИСЬЯ (перыта мынöтö кисö). Мый эшö?

ПОРСЕВ. Ветлам талун рытнас киноö?

ТАИСЬЯ. Сымда тэнат тöдвылат и эм, кино да спектакль. А ме нельки вунöтi ни, кöр медбöрьяись киноас вöвлi.

ПОРСЕВ. Вот и ветлам кöть öтпырись.

ТАИСЬЯ. И рад бы, да некöр меным. Ог ешты. Кин нö ме местö куканнесö вердны-юктавны пондас. Öтнам жö ме уджала. Ог эд орöтчы.

ПОРСЕВ. Кывзы жö, Тайка. Тэнат сьöлöмыт кöть эм жö, абу?

ТАИСЬЯ (пельпоннэзнас жмитыштöмöн). А кыдз тэ думайтан?

ПОРСЕВ. Да тэнат жö из сы местын. Вежöртан, он, из! Пу! Галя!

ТАИСЬЯ. Сiдз, дак и юасьны нем.

ПОРСЕВ. Да чöв тэ — юасьны нем. Ме жö надейтчи тэ вылö. Тэ увья и уджавнытö гортö кольччи, мед öтлаын тэкöт лоны. А тэ? Эх! (Зэркыта öвтыштö кинас.)

ТАИСЬЯ. А ме бытьтö некыдз сымдасö ог вежöрт. Сiдз эд?

ПОРСЕВ. А мый эшö не сiдз я мый я? Сiдз сiя и эм. Тэ жö меным паныт и кодя кывсö некöр он горöтчы. Гожумбытнас öтпырись и киноас мекöт эн ветлы, öтiк рыт ордчöн эн чулöт. Ме тэлань быдсöн сьöлöмöн, а тэ?.. Тэныт жö эта кöть эм, кöть абу.

ТАИСЬЯ(рамыника). Коля тэ, Коля.(Судзöтчö киэзнас сы воротник бердöдз.) Тэ думайтан, меным абу гажтöм? Менам сьöлöм оз вись? Меным абу охота любитнытö? Меным паныта радейтöмыс оз ков? Колö эд. Батi, эшö тэсся öддьöнжык колö...(Уськöтчö посöдзись столб бердö, сывьялö сiйö кыкнан кинас жмитчыштö сы бердö, дзик ловья бердö.)

ПОРСЕВ (перыта уськöтчö сы дынö). Тайка! Горадзуль менам! Сьöлöмгаж! Тöдi эд, тöдi. Пыр веритi. Но мыля?.. Мыля тэ öнöдз чöлан? Мыля тэ меным одзжык эн казьмöт?(Мынöтö столб бердiсь Таисьялiсь киэсö, сывьялö асьсö, пондыла бы окавны.)

ТАИСЬЯ (пыкöтасьö киэзнас Порсев морос бердö, öвтыштö öтмöдöрö юрнас). Лэдз, Коля. Оз ков.(Мынöтчö сы киэз коласiсь, вешшыштö неылö бокö.)

ПОРСЕВ (öшöмöн моз нюжöтыштö сылань киэсö). Тайка! Сьöлöмгаж менам! Мый тэкöт сэтшöмыс? Ме жö... ме любита тэнö, Тая. Тэ кылан?

ТАИСЬЯ. Сiдз, батi, Коля, любитан, только не сiйöн любитöмнас.

ПОРСЕВ (öшöмöн моз). Не сiйöн, шуан? Кыдз не сiйöн? Мыля? Ме жö быдсöн сьöлöмнам, быдсöн ылöснам. Кыдз эшö этася?

ТАИСЬЯ (юрнас öтмöдöрö öвтышалöмöн). Не, Коля. Кылö менам сьöлöмö, не сiйöн.

ПОРСЕВ (обидитчöмöн). Мый, думайтан кинöскö месся буржыкöс пантавны? Кинкö öддьöнжык радейтны пондас?

ТАИСЬЯ. Ог тöд. Талун деревня вылас некин ме сьöртi зонкаэс абу. Но не сы йылiсь часöт басниыс Вежöртан, Коля, не сы йылiсь.

ПОРСЕВ. А мый йылiсь сэк?

ТАИСЬЯ. Сы йылiсь, что тэ любитан менö дзир ас пондасит, кыдз колана торöс.

ПОРСЕВ (дивуйтчöмöн). А кин понда эшö колö?

ТАИСЬЯ. Сы понда, кинöс любитан. Ме понда, сiдзкö. Ме эд тэныт не гленитчан чача, кöдö орсöм могись позьö вöдитны киын. Ме, Коля, ловья морт. И менам, ас киння, эмöсь эшö кытшöмкö интерессэз, удж, мечта. И меным колö, мед любитiн тэ не дзир менö ачымöс, кыдз колана торöс, а öтлаын мекöт быдöс сiйö, мыйöн ме ола. Мед менö, аслам уджöн да мечтаэзöн, кылiн сьöлöмнат, вежöртiн ылöснат сiдз жö, кыдз кылан да вежöртан асьтö. Сэтшöм любитöм видзчиси, сэтшöм вылö надейтчи. И ло сiя миян коласын былись сэтшöмöн, нем вылö бы эг видзöт, нем бы менö эз сувтöт. Сэтшöм любитöм понда ме бы биас и ваас пыри, но...

ПОРСЕВ. Мый но?

ТАИСЬЯ. Адзза и вежöрта — сэтшöм любитöмсö тэсянь видзчисьны оз позь. Абу сiя миян коласын сэтшöмыс. Эз вöв и лоны оз вермы. Он вермы тэ, Коля, сiдз любитнытö.

ПОРСЕВ (перыта). Бöбöтчан! Бöбöтчан, Тайка, что оз вермы. Весь тэ сымдасö баитан. Мымда ме тэныт гожумбытнас ферманскöй куканнетö пастучитны отсалi, мед дзир тэкöт ордчöн лоны. Не тэ понда разь?

ТАИСЬЯ. Не, Коля, не ме понда. Ас пондасит, вот кин понда. Мед не меным тэкöт, а тэныт мекöт ордчöн лоны.

ПОРСЕВ. Да не öтiк я, что меным тэкöт, что тэныт мекöт?

ТАИСЬЯ. А вот и не, не öтiк.

ПОРСЕВ (пельпоннэзнас жмитыштöмöн). Нем ме мыйкö тэ басниись ог вежöрт.

ТАИСЬЯ. Вот сiя и умöль, что он вежöрт. Эта увья ме вылö и обижайтчан, баитан, что киноас тэкöт öтпырись эг вöв и рытсö ордчöн эг чулöт.

ПОРСЕВ. А мый эшö не сiдз я мый я? Сiдз эд и эм.

ТАИСЬЯ. Сiдз, Коля, сiдз. Ме ог и шу, что не. А не син одзат разь менам уджыс? Тэ разь он адззы сымдасö, что ме фермасис кодьöн ог и петав? Öтпырись кöть думайтiн сы йылiсь, ешта, ог ме тэкöт киноас муннытö? (Чöлыштöм бöрсянь.) Эн эд, эн и ылöст сымдасö кернытö. А быдöс сысянь, что тэ дзир ас йывсит думайтан, аслат гаж йылiсь. Мед кинкö кузя дзир тэныт öтнасытлö вöлi бур да гажа. Мöдiкыс йылiсь эта коста тэнат некытшöм дума абу. Вот тэнат кытшöм любитöмыт. А сэтшöмыс, колö кö тэныт тöдны, дак ме понда кöть вöв, кöть эн — дарöм оз ков. Сiя менö не оз шонт, не оз гажöт.

ПОРСЕВ. Кывзы жö, Тайка. Быдöс эд эта фермаыс увья. А ме разь сэтöн виноватыс, ачыт кö тэ юртö сюйыштiн?

ТАИСЬЯ. Мый увья бы эз вöв, сё öтiк. И мыйкö увья мöдiк увья миян коласын басниыс эта жö лоас.

ПОРСЕВ. Неужто тэ эта ферма бердö век кежö вурсин-лякасин?

ТАИСЬЯ. Кин сiйö тöдö, сiдз, батi. Мыйкö бердын мортыслö видзсьынытö сё ни колö. Сытöг оланыс, он и казяв, кыдз чагöс нöбöтас и некытшöм след оз коль. (Чöлыштöм бöрсянь.) И мый тэ менчим синöс быд коста ферманас бытшкан? Ферма увья да ферма увья. Аслат удж йылiсь бы невночка думайтыштiн, дак буржык вöлi: мый тэ гожумбытнас керин.

ПОРСЕВ. А мый меным сы йылiсь думайтнытö? Оз тай герьяв и сьöрын оз вöтлiсь.

ТАИСЬЯ. Адззан вот, кыдз ми тэкöт мортыслiсь олöмсö вежöртамö. Ме готов орöтчыны аслам удж вылын, мед только ештыны керны сiйö буржыка да унажык, а тэ понда аслат уджыт кöть эм, кöть абу. Не сiйöн я и кукань карта пытшксис сiсьмöм проводкасö гожумбытнас вежнытö эн вермы? Куим лампочка ферма гöгöрись столббес вылö öшöтны колiс, и эта вылö тэнат прокыт эз тырмы. А баитан эшö кытшöмкö любитöм йылiсь.

ПОРСЕВ. Тожö меным прока адззисьöм. Сiйöн эшö ме одзын пондан ошшасьны. (Таисья вылö кинас öвтыштöмöн.) Шöммы тэ йöвдоз моз век сьöрна эта ферманскöй нять пытшкын. А меным эстöн сэсся кернытö нем. Тырмас абутöмыс увья весись кадсö сёйны.(Бергöтчö, мунö сьывтöн.)

Лымыс сылiс, лымыс сылiс,

Кольччисö туёккез.

Порсеваас нывкаэс,

Ох, дьöгöдь туисоккез.

ТАИСЬЯ (бöрсяняс). Да мун тэ, мун! Сё ни аслат мунöмöн некинöс он повзьöт. Гожумбыт ни мунан Порсевасис, да сё öтiк местын.(Босьтö порог вылiсь простöй ведраэз, сайöвтчö кормокухняö.)

Занавес