Зöртусьпу

Эстöн лыддьöтiсьыс бöра, натьтö, висьталас, что сэтшöм нима пуыс миян местаэзын оз быдмы да абу, а былись зöртусясö некысь и мöдiклаись он пантав. Миян местаэзын абу, да, не пуыс ачыс, не нимыс сэтшöмыс. А вот мöдiк местаэзiсь ме сiйö пантавлi ни. Сы йылiсь часöт и висьтася.

Веськöтчи ме сiя гожумöн Татарияын, неылын Казань дынсянь, «Крутушка» санаторийын. Вöлi эта арвыв кадö, августнас, кöд коста гортын, миян местаэзын, воö няп ^.

Санаторийыс сулалö вöр коласын. Петны шоччисьöм могись адззисьö кытчö. Выходнöй луннэзö, кöр абу некытшöм процедура, позьö вель дыр кежö мунны вöрö. И колö висьтавны, что ась эта и шöр полоса, вöррес сэтчин тожö тырмöны, кöть нiя и не миян кодьöсь ни и миянiссес вылö öддьöнсö оз вачкисьö. Миян вöррезся нiя югытжыкöсь да просжыкöсь. Ветлöтан мукöд коста сэтшöм вöрöт лунтыр сьöрна, тöдсасян виль местаэзкöт, адззывлытöм пуэзкöт, тöдтöм туруннэзкöт и некин тэныт оз мешайт, öтiк мортöс эта коста он пантав. А вот интереснöйсö да адззывлытöмсö, öтi-мöдiкö, пантавны эта коста позьö. Сiйö жö дубсö, шуам, кöда миян округын оз быдмы, нето басöк листа клёнсö. А пантасяс эшö кытшöмкö югытжык местаын, вöр коласас, быдса орешниковöй роща, кытöн лещина (фундукöн эшö сiйö шуöны) ореххес быдмöны. Но сэтчин вöррезын оз пантасьö миян лиственница, сыспу да кöз. Этасянь сэтчинiсь вöррес и лоöны югытжыкöсь.

Пыд вöр коласас, пуэс вуджöрын, часто позьö пантавны сэтшöм колана турун, кыдз купена лекарственнöй. Ыббез гöгöр кушиннэзын да подакокувтын арöдз цветитö лöзчача рöмöн цикорий. А ыббез дорын ачыс лöзчачаыс цветитö нач не голубöй, кыдз миян, а фиолетовöй рöмöн.

Сiйö жö пусö, кöда йылiсь пондöтчис басниыс, ме панталi не пыд вöрись, а позьö висьтавны, санаторий бердсис. Шочыника сулалан пожуммез коласын не öддьöн джуджыта, кыдз жельнöг, быдмис кытшöмкö кустарник. А сы вылын öшалiсö гöрд видзан ягöддэз. Ылiсянь видзöттöн, нiйö нем эз видз примитны няп туйö. Сы туйö ме нiйö медперво и примитi. А кöр сибöтчи зэв матö, сэтöн вöлись и казялi, и вежöртi, что менам бöбассьöм. Ась ылiсянь кустыс и вачкисис жельнöг куст вылö, былись сiя вöлöм сё жö не жельнöг. А мый? Висьтавны веськыта, сымдасö ме кытчöдз и ачым эг тöд. Некöр эта вотöдз пантавлыны сiйö меным эз усьлы, и эта увья сiя меным вöлi нач тöдтöм.

Вежöртана, что и ягöддэс, кöдна асланыс гöрд видзöмöн эшö ылiсянь усисö син вылö, да кöднö ме примитi медперво няп туйö, вöлi тожö не няп. Кыдз и ачыс кустыс, нiя тожö вöлiсö тöдтöмöсь, а сэтчö жö цвет эта или ягöд, вежöртнытö бытшöма эз и позь. Чожажык позяс висьтавны сiдз, что и цветыс, и ягöдыс вöлiсö öтлаын да öткоста. А сэтшöмсö природаас быд лун он пантав.

Ув бердсянь нюжалöм сьöд сунис кодь за бердын медперво öшалiс, кыдз воскись лякöм алöй рöма, яя, нёль лепестока цветок, кöда öддьöн вачкисис кык-куим сантиметр пасьта кресток вылö. Сьöд сунис кодь вöснитик заокыс этö цветсö ас вылас пысалöмöн, эшö кык-куим сантиметр кузьöн öшöтчис увлань, и вöлись эстöн, нач торйын цветокыс дынсянь, шогмис ягöдок. Настоящöй диво да и дöс сэтöн.

Колö висьтавны эшö и сiйö, что эта ягöдокыс некытшöм мöдiк вылö, не öтнёж, не мöднёж, тожö эз вачкись. Пантавны сэтшöмсö некытшöм мöдiк пу нето кустарник вылiсь меным некöр эшö эз усьлы. Дзир анькытш тусь ыждышта, за бердсяняс сiя вöлi гöрд-виж рöма, яя да небыт. А увтсяняс, эта небытик яй коласiсь, кыдз синбугыль, быликтчöмöн видзöтчис сьöд ядрышко, кытöн шогмисö кöдзыссэз.

Ог тöд, бытшöма я кужи висьтавны лыддьöтiсьыслö тöдтöм куст вылiсь цвет-ягöд йылiсь. Но ас синöн öтпырись адззылöм бöрсянь сiя ме тöдвылiсь эз ни петав. Уна я эшö панталан кустарниккес коласiсь сэтшöмсö, кöда вылын öшалiсö бы öткоста да эшö öтiк и сiя жö заок вылын и цвет, и ягöд да сэтчö жö эшö и баситöмöсь куим неöткодь рöмö? «Пелькытш да и дöс сэтöн!» Некыдз мöднёж тэ сiйö он и шу. И уж сэтшöм сiйö бытшöм-басöка да аккуратнöя думайтöм-керöм природа-мамыс, что адззыны этася бытшöмжыкöн, басöкжыкöн да аккуратнöйжыкöн эз и позь.

Вежöртана, что цвет-ягöдыс меным öддьöн и öддьöн гленитчис. А вот ачыс кустарникыс — эз. Öткö, сiйöн, что сэк кежö сiя сулалiс листтöм ни, кыдз баитсьö, куш шаттез. А мöдкö, то ли кытшöмкö грибковöй шогöтсянь, то ли эшö мыйсянь, этна шаттес вöлiсö вевттьöмöсь кытшöмкö дойкаэзöн. Эта кыдзкö и эз сет сибöтчыны ны бердö киöн, татшкис бöр ас дынсис, полöтiс. Жаль öткоста вöлi и сiйö, что ме эг тöд, кыдз кустсö шуöны. Миян округын эта кустарникыс эз быдмы, а некытiсь мöдiклаись эта вотöдз ме сiйö тожö эг пантавлы. Мыйкö тöдсакодьыс кытöнкö ылöсын и кылыштiс, но эта, натьтö, вöлi чожажык кыськö дзир лыддьöтöм нето кылöм, а не адззылöм ас синöн. И мымда бы ме öнi эта дорын думанам эг мырсьы, уськöтны-вайöтны тöдвылö коланасö сiдз и эг вермы.

Кынымкö лун бöртi одз асывнас, кыдз и пыр, ме чеччи да петi физзарядка вылö. Мыйкö дырна чукляси-пиньласи упражненнёэз местö, а сэсся лэдзчиси котöрöн подöна туёк кузя.

Вит сувда лечебнöй корпусыс чожа мый кольччис бöрын да саясис пожума вöр коласас. Одзлань туёкыс петкöтiс менö öтмöдöрö чуклясян тракт вылö. Сы кузя ме и иньдöтчи котöрöн город ладорö.

Быд асыв сiдз котрасьöмсянь маршрутыс вöлi тöдса ни. Но талун ме нюжöтi сiйö эшö кузьжыка — котöртi ылöжык.

Öтiклаын туй бокас, тшöтш канава бердын, меным усис син вылö пемыт-зелёнöй листа кытшöмкö тöдтöм да том кусток. Вöрас сы коддес тыр, пантасьлöны быд оськöв вылын. Эта увья ылiсянь нем дивуйтанасö ме сыись эг адззы. Но ордчöн сы бердöт котöрттöн син вылö усис том улоккес вылын унася-уна, гырись да бурöй рöма гаг — тля. Сэтчö жö и видзсисö-пукалiсö нiя улоккес бердын не кыдз шедiс, а быдыс öтылына öтамöд дынсянь. Эта вöлi интересно ни и менö сувтöтiс. А кöр ме оськöвтi кустыс бердöдз зэв, мышкыртчи сы весьтö лажмытжыка, сэк вöлись и вежöртi, что сы вылын вовсе и не тля. Этна сылöн зöртуссез. Да, да. Эттшöмыс йылiсь ме кыськö сы вотöдз лыддьöтлi ни. Ны увья роч кыв вылын и кустарникыс сiдз шусьö. Кыдз жö сiйö-ö... Бородавочнöй? Нет, не бородавочнöй, а борода... бородав... да, да, бородавчатöй, бересклет бородавчатöй, — вöлиськö локтiс меным тöдвылам. Дак вот сiя кытшöм и вöлöм.

Мыйкö дырна ме эшö бергалöв-кери эта кусток гöгöр, бытшöма видзöтi, кытшöмöсь сылöн листтэз да кыдз нiя уввес бердын пукалöны. Бöртiжык сэтiсь жö чегöтi неыджыт улок да сiйöн сорöн ни иньдöтчи бöр.

Вежöртана, что санаторияс ме перво жö сибöтчи пожуммес коласiсь адззылöм кусттэз дынö и сэтöн жö вежöртi, что эстöн цвет-ягöдыс вöлi нач сiя жö. Зöртуссес, кöдна кыдз дойкаэз нето тля-гаггез вöлiсö лякöтöмöсь кыкнан кустлöн улоккез бердын и сорасьнытö öнi эз ни сетö. Сэтöн жö меным лоис охота, мед эта кустарникыс, кöдакöт усис пантасьны да тöдсасьны, быдмис и миян округын. А кыдз этö керны? Позис дзир öктыны сылiсь кöдзыс, вайны да кöдзны гортын. Но сэк кежö нiя эшö эзö вöлö воöмöсь. Сэк кежö менам и веськöтчан кадыс кытчöдз эз чулав, мымдакö позис и видзчисьыштны. Но эта йылiсь ме сэсся эг ни вунöтлы, видзи этö думасö лунiсь лун, висьтавны кö сэтчö жö, что санаторияс веськöтчытöн кöдзыссэсö ме öктi и мöдiк быдмассэзлiсь. Сы коста жö вöлiсö öктöмöсь да ыстöмöсь эшö одзлань кык посылкаöн быдса пуд мымда черешчатöй дублöн жёлуддез.

Мунан лун паныттэзö бересклетлiсь кöдзыссэсö кырым етш ме и былись öктi. Унажыкыс матын эз адззись. Да и нiя неунаыс, кöдна вöлiсö öктöмöсь, вонытö сэк кежö, тыдалö, эз ештö. Некытöн нiйö вöлi и косьтыны. Погоддяыс унажыксö сулалiс зэра да уль.

Сiя жö арö, гортын ни, ме нiйö кöдзи тöвся стратификация увтö. Öддьöн надейтчи, что чожа менам садын, а сёрöнжык и мöдiккезлöн городас, лоас эшö öтiк виль да интереснöя цветитан кустарник.

Чулалiс тöв. Сибöтчис тулыс, а сэсся и гожум. Сiдз жö арсянь садитöм дуб кöдзыссэзiсь петалiсö ме питомникын не öтiк сотня мымда том дубоккез. А вот бересклетыс сiдз и эз петав. Колö думайтны, что öктiк кежас сылöн кöдзыссэс воны досповна эз ештö.

Эта бöрсянь чулалiс дас годся унажык ни, а ме öнöдз эшö ог вермы вунöтчыны эта басöк да интереснöй цвет-ягöда кустарник йылiсь. И аслам садын сiйö меным öнöдз оз тырмы. Эз петав сэсся сэтшöм лöсялан кад, мед öктыны сылiсь кöдзыссэсö мöдöтпырись. Эта увья вот и висьтася лыддьöтiсьыслö. Кресь кинкö ны коласiсь öзъяс эта жö охотаöн — тырсьöтны округись садово-парковöй быдмассэсö, кутчас кöркö да и пыртас сiйö миян округö. А нимсö ме эта кустарниклö сетi не ачым, а дзир роч кывсис вуджöтi — зöртусьпу. Гленитчас, мыся, батi... кыдз и ачыс пелькытш кодь цвет-ягöда кустарникыс.