Сiдзкö, ловья

Вöрписö сэкся лэдзöм бöрсянь годдэс чулалiсö тожö уна ни. Неöтпырись этöн каднас сiя и тöдвылö усьлiс. Сё думайтсис, адззис я, панталiс я сэк сiя ассис мамсö, кöда след кузя сiдз пöльтiс-котöртiс миян дынiсь. Эз я сiйö жегдышт кытöнкö öтнассö кöин нето ош? Эд сэтшöм учöтиксö вермис джагöтны нельки руч. А жаль сё жö кыдзкö, мед сiя том киння томöн торксис. Но вот...

Кыдзкö гожумнас жö, лесниклiсь юасьöмöн, кералi ме Дзульган туй вылiсь кынымкö потш. Колiс керны лиснич да öшлыны виль кайпоззэз. Керавнытö потшшесö кералi, а нöбöтны вылам гортöдз ог чайтчы. Потшшес ульöсь, сьöкытöсь.

Белоевскöй тракт дорöдз, кытöн сiя дзульгановскöй туйыскöт поперегасьö, вылам ме нiйö сё жö петкöтi. А сэтöн пантасис тöдса экскаваторщик, кинлöкö мыррез шедтавны мунö.

— Видзчись, — шуö меным. — Бöр локтöн отсала. «Ась, — думайтi ас кежам, — ... видзчися инö. Вылын перытжыка сё ни он кер. Быдса лун сы дорын чулалас». Пукси ме потшшезнам эта туйвежын аэропорт ладорсянь, пукала. Вель дыр сiдз видзчисьны ковсис, кытчöдз экскаваторщикыс бöр эз берт. Нем керöмсянь не öтiк сигарета ни куритi да сё видзöтышалi туй ладорö, кöда кузя орöттöг одз да бöр быдкодь машинаыс гугйис-мунiс.

Но вот кытшöмкö кадö туйыс мыйкö дырна кежö просмыштiс. И ась некытшöм пода сэк кежö ме гöгöр эз вöв, веськытланьсянь, туй мöдöрас, син одзын топ кинкö вуджöртчис. Одзлань ме сылань и нёджжöвтi да сэтöн жö, кыдзкö аслым казявтöг ни, сувтi коккез вылö. А эта кадö город ладорсянь туй бердас кольччыштöм неыджыт вöрокись мыччисис мампöв вöрмöс. Туй бердсянь паськыта весöтöм местаöт сiя пондiс сибöтчыны канава бердö. Оськалiс вöрмöс не жагвыв и не перыта, кыдз и вермис бы оськавны ас кежас, кöр некин сы сьöрö эз вöтчы, и не пышшыны, не сайласьны некин шогья эз ковсьы. Кин лякасис сы бердö эта мича шоныт гожумся лунö, дак этö вирьюись лöдззез, кöдна кымöрöн изöвтiсö-бергалiсö быд ловья гöгöр да сотiсö-курччалiсö, кыт шедас. Ны увья мездiсьöм могись мунтöнняс вöрмöс кадiсь кадö öвтышалiс юрнас.

Туй бердiсь канаваыс эта местöт вöлi гарйöм пыдына да паськыта. Эта увья сэтöн и пукалiс гожумбыт сьöрна нять ва. А вапукöтас быдмисö стрелолист, аир да осока. Но вöтянакодь нять местаыс вöрмöсöс, мыччассис, немымда эз полöт. Эстi сiя нельки поперегавны эз понды, а топ нарошно, пидзöсви да кокнита нятьöттяс бродиттöн, иньдöтчис канаваыслö доль. Эта коста вöрмöс кынымиськö мышкыртыштлiс увлань юрсö. И нельки ылiсянь позис казявны, кыдз вöрöтышалiс аннэзнас. Несьöкыт вöлi вежöртны, что сiя вердсис стрелолист турунöн. Эта йылiсь ме öнi тöдi ни.

Ме, кыдз кынмöм ас местын, öнöдз сулалi чöлöмöн да вöрöтчытöг. Ог вермы висьтавны, адззис я менö вöрмöс. Меным жö эта кадö вöлi охота дзир сiйö, мед сiя кыдз позьö дыржык вердсис эта канаваын да позис, вот сiдз вот, видзöтны сэтшöм матiсянь сы вылö. Но öштыны эстöн уна кад вöрмöс эз понды. Вот сiя, эшö öтпырись мышкыртчылöм бöрсянь аннэзнас одззамоз вöрöттöн, зэркыта пыркнитiс комолöй юрнас. Сы коста жö ме дынöдз кылiс, кыдз «шлюп-шляп, шлюп-шляп» вачкыштiсö юр бердас паськыт да гöгрöсавевья пеллес. Кокнита оськöвтöмöн мампöв кайыштiс туй ладорись канава дорö да сувтчывтöг, кытчöдз эз тыдав некöдöрсянь автомашинаэзлöн сибöтчöм, оськöвтiс асфальт вылö. Эстöн, кыдз меным мыччассис, оськöввес сылöн вöлiсö невночка перытжыкöсь. Вит-квать оськöв сьöрна вöрмöс поперегалiс асфальт, öдззöтчытöг да öтпырись некузя чеччöвтöмöн вуджис туй мöдöрись сэтшöм жö паськыта гарйöм канава, а даскыным оськöв бöртi сайöвтчис канава саяс тшöка лэбтiсьöм том пипу вöр коласö.

Ме одззамоз сё эшö видзöтi сiя местаö, кытöн дзир часöт сайöвтчис ме син одзись мампöв вöрмöс. Но вöлi лöнь и некин да некытöн сэсся эз тыдав. Сэк кежö некытшöм автомашина некöдöрсянь эшö эз мыччись, и ме котöрöн уськöтчи сiя местаö, кыт нач неважын вöрмöс поперегалiс асфальтöн вевттьöм туй.

Кыдз вöлi висьталöм ни, туй мöдöрас сiя вуджис тэрмасьтöг. Но кöр ме аслам четверттезöн меряйтi сылiсь оськöв, кузянас сiя петiс метрся унаöн кузьжык. Асфальт вылын кольöм следыс вöлi тожö четверться не дженытжык. А öтмöдöрö ылына паськалöм гыжжес, кыдз подковвез, быдса сантиметр сувдöн мöртчöмöсь асфальтас.

Эстöн меным вились и усис тöдвылам уна годöн одзжык лэдзöм вöрпи, а одзлань думайтсис: «Эз торксьы, сiдзкö. Öнöдз эшö ловья».