Глава VII

Öнöдз зоотехник вежöртiс ни, что мунны одззамоз важ да тöдса колеяöт, кöда некытчö одзлань оз нуöт, а годiсь год бергалö сё öтiк местаын — оз позь. Но сылö некöр эз думайтсьы, что сэтшöм сьöкыт лоас кежны веськытжык туй вылö.

Эшö июльнас, турунасян страда коста пондiс кывсьыны, что мускытöн куртöм-тэчöм бöрсянь уна турун зороддэс бригадаэзас тшыкöны, пöдöны да сiсьмöны, öткоста колхознöй видззесö колхозниккез ытшкöны аслыныс. Оз позь висьтавны, что эта йылiсь ачыс председатель нем эз кыв да эз тöд. Но паныт эталö сiя и чуньöн эз вöрзьöт. А зоотехникыс неöтпырись казьмöтöм бöрсянь видзöтнытö председатель сiйö жö асьсö и мöдöтiс.

Быдса неделя сьöрна Светлана кытшлалiс бригадаэзын видз бöрсянь видз (бур, что местаэс вöлiсö тöдсаöсь), дышöтчытöг сибöтчывлiс быд зород дынö, уна кöдна коласiсь былись вöлiсö пöдöмöсь ни, пешлiс да видзöтiс нiйö быд ладорсянь. Эз ордйы зоотехник и сiйö, мый желлялiс син быд оськöв вылын. Быд колхознöй межа дорын, быд видз пельöсын да подлосын, ордчöн колхознöй зороддэскöт сулалiсö кык-куим и асланыс колхозниккезлöн. Светлана сибöтчывлiс и ны дынö, соравны кöднö колхознöйескöт эз позь. Вежöртана, что колхознöйесся нiя вöлiсö тöдчöмöн учöтжыкöсь. Но не только. Сiя кадö, кöр колхознöй турун зороддэс сулалiсö видз нето шутём шöрын, унаын ны коласiсь туруныс вöлi пöдöм. Аслыныс колхозниккезлöн нiя частожыксö вöлiсö тэчöмöсь межаэз пöлöн, матынжык вöр бердын, мукöдыс нельки вöрколасас, но туруныс ныын вöлi кажöп кöс, и вачкис сэтшöмыс бердсянь не баг дукöн, кöда пöдтiс колхознöй турун зороддэс гöгöр, а сiйöн гожумся ма дукнас, кöдöн дзир и вермö патшкыны аскадö ытшкöм — куртöм да бытшöма тэчöм турун.

Кынымкö лун бöртi видзöтчöмыс бöрсянь быдöс вылö сувтöтöм акттэсö Светлана вайис да пуктiс председатель одзö.

— Видзöтö вот, мый бригадаэзас керсьö. Колö ашын жö заседаннё öктыны да падтыны бригадирресö сэтшöм уджсис.

Позис думайтны, бытьтö ачыс председатель некöр бригадаэзас эз вöвлы, и мый сэтчин керсьö, оз тöд.

— Видзöтам. — Акттэс вылö дзар кертöг дженытика шыасис юралiсь.

Ашынас, кöр зоотехник вились пырис председатель дынö, мед тöдны, кöр пондасö чукöртны правленнёсö заседаннё вылö, пызан вылас сылöн акттэс эз ни тыдалö, а сы юасьöм вылö мöдыс горöтчис:

— Некöр, Савельевна, сэтшöм дзескыт кадас заседаннёэс вылö отирсö дергайтны. Страда öнi. Уджалны колö.

— А кöр сэки?

— «Кöр, кöр», — нерыштiс председатель. — Кöр личытжык лоас, сэк и öктам, — кöть ачыс одзлань ни тöдiс, что гожумся страда коста личыт кадыс некöр оз овлы, и чукöртны правленнёсö эз думайт.

И былись. Чулалiс месяц сьöрна, быдсöн турунасян страда, а заседаннёыс сiдз и эз вöв чукöртöм. Вежöртана, что и бригадаэзын сiйöн каднас нем эз вежсьы. Колхознöй подалö вердчансö заптiсö одззамоз, дзир мыччалöм могись, бытьтö керöны — кытöн мускытнас, а кытöн и нач ульнас, мед вöлi только ытшкöм да зородалöм. Сы коста жö джын ытшкассэсö: векнитжык межаэсö да видз пельöссэсö одззамоз колисö ытшкытöг, мед сёрöнжык ытшкыны, косьтыны да зородавны аслыныс.

И вот... Сибöтчис кад, кöр бригадаэзлiсь керöм вердчансö зоотехниклö колiс примитны ас вылас. Кытшöм сыын ответственность, сэк кежö Светлана тöдiс бытшöма ни.

— Чукöртö комиссия. Öтнам не сымдасö таво ог кер.

— Кутшöм öшö комиссия? — поперегалiс председатель. Горöтчынытö сiя тöдiс мый. — Думайтан отирыслö этася и керны нем? Тэ жö специалист. Вежöртан, натьтö, мый позьö, мый оз подаыслö вердны.

— Вежöрта, конешно. Сiйöн ог и кутчись öтнам примитнытö.

Споритöмыс ны коласын кыссис дыр. Но не сiя лунö, не ашынас эта удж бердö зоотехник сiдз и эз кутчись, кöть одзлань ни тöдiс, что вердчаныс медодз колö сылö, кöр-некöр примитны сiйö сё ни ковсяс. Эд колхознöй подасö вердöм понда отвечайтiс медодз зоотехник. И ась подаыс вöлi эшö йöрттöм, туйтöм кад кежö запассö колiс керны öнiсянь. А примиттöм вердчансö ваявны эз позь.

Некинöс ревизионнöй комиссияись председатель сiдз и эз сет. Но неделя бöртi гижöм распоряженнёöн тшöктiс öтлаасьны зоотехник дынö Порсевскöй фермаись заведующöйöс.

Не öтiк лун сьöрна зоотехник, бригадир да фермаись заведующöй ветлöтiсö шöрöт бригадаись видззез пасьта, видзöтчисö. И эз кö позь осьтны силос гуэз да дзар керыштны кöть öтiк синöн, то турун зороддэс вöлiсö осьтаöсь, и видзöтнытö нiйö быд ладорсянь нем эз видз.

Оз позь висьтавны, что быдöс вердчаныс вöлi заптöм умöля. Унажык туруныс вöлi куртöм да тэчöм кöс погоддяö. И кöдöрсянь бы сэтшöм зородыс дынö эн сибöтчы, некытшöм баг да дук эз кыв. Сэтшöммес дынын и баитнытö унасö вöлi нем йылiсь. Öтлаын меряйтiсö да лыддисö, кöть бригадир ладорсянь петлiсö мылякö пыр унажык, а зоотехник ладорсянь етшажык. Но бытшöм турун зород дынын и баитнытö ас коласын лöсявлiс бытшöмжыка. Бöртiжык сувтчывлiсö кытшöмкö öтiк, кыкнанныс понда лöсялан вес вылын, быдыс гижлiс сiйö аслыс. И бур бы, мун сiдз ны коласын быдöс удж. Но пантасьлiсö турун зороддэз, кöднаын мускытöн куртöм-тэчöм да умöля пыклöм турун вöвлi пöдöм. И кытшöм местöт бы сэтшöм зород дынö эн сибöтчы, быд ладорсянь лэбтiсис да патшкис нырö тшын кодь баг, кöдасянь сэтöн жö быдöнныс пондывлiсö несйыны. А кытшöм этаись вердчан да кытчöдз сiя вайöтö колхознöй подасö, сэк Светлана тöдiс ни, и сэтшöм турунсö эз примит. Бригадирлö жö, мед вöлi тыртöм план, колiс, мед примитiсö. Лэбтiсьлiс спор. И сiя кадö, кöр зоотехник да фермаись заведующöй сулавлiсö кытöнкö öтiк местаын, ачыс бригадир котрасис пöдöм турун зород гöгöр, кыскышалiс то öтiклаись, то мöдiклаись, нежык тшыкöм турун, горöтлiс:

— На вот! На! Видзöтö синоккезнаныт! Мыйöн сiя не турун, кöр турун дукöн патшкö! — нюкайтлiс ачыс, вайöтлiс ныр одзö мöддэслö. Но часто эта коста вöвлi сiдз, что бытшöм туруныс местö бригадирлö шедлiс пöдöм да багсьöм, кöдö нюкайтöмсянь, кыдз бытшöм самосад-табаксянь чегöтiс ныр. Сэтöн жö, аслас басни коста, бригадир öдззывлiс несйыны омöн видз пасьта.

— Во-во-во, а-ахпчи-и! Ви-ви-ви ахпчи-и! Мы-мы-мы ахпчи-и!

Бригадир вылö видзöттöн, не зоотехник, не фермаись заведующöй видзсьыны эз вермö. Светлана жмитлiс киэсö кынöм бердö, а Иван Фролович ассис сельнича кодь кынöмсö кышавлiс кытшöмкö ёнжык пыкöт бердö, кыкнанныс öтдруг, куснясисö-ваксисö. Бöртiжык, сöдзöм синваэсö чышкытöн, зоотехник баитлiс:

— Но и тырмас тiянлö, Прокопий Егорович, абуыс дорын несйынытö.

Но нельки этадз «апчихайттöн» бригадир споритiс одзлань.

Куимöт членыслö, лыддьыны кö нiйö быдöннысö комиссия местö, колiс бы лоны сiйöн истинанас, кöда эз адззисьлы бригадир да зоотехник коласын. Лоны жö сiйöн Иван Фролович, кыдз этö вежöртiс нельки ачыс, сiя некыдз эз вермы. Сувтны паныт бригадирлö, кыдз мужик мортлö да ёртлö, сiя эз лысьт решительнöя нельки сэк, кöр бытшöма адззис да вежöртiс, что мöдыс тыдалöмöн кыскö асланяс, öмавны быд коста нывка-зоотехникöс, кöда мукöдлаас вынсьöтчис кöстыны тожö ас дор да кöда юралöм увтын Иван Фролович уджалiс фермаас, сылöн тожö петiс полöм. Поговоркаыс, «мед и кöиннэс вöлiсö пöтöсь, и баляэс дзоньöсь», эстöн некыдз эз лöсяв, сiдз кыдз ачыс фермаись заведующöй кольччис эта коста кык би коласын. Сiйöн кык лун сьöрна сiя и вöтлiсис ны сьöрын, кыдз вуджöр, и мый керсис ны коласын, кылiс да эз кыв, чöлiс. «Ась. Асьныс тöдöны. Кыдз баитчасö, сiдз и бур». Куимöт лунас асывсянь колiс вуджны мöдiк бригадаö. И эстöн Иван Фролович ылсöтчис кутöм шог вылö, не мöдiк, не куимöт бригадаö сэсся сiдз и эз мун.

Сувтöтны сы увья пондöтöм удж да вились пондыны споритны председателькöт охота эз ни вöв. «Ась, — думайтiс зоотехник, — примита öтнам, но примита дзир сiйö, кöда мыйöнкö вачкисьö вердчан вылö. Пöдöм-багсьöмсö ась кöть асьныс сёйöны».

Неделя сьöрна вöлi кытшöвтöм быд видз. Эта коста эз петав öтiк сэтшöм лун, мед эз ковсьы споритны кытшöмкö бригадиркöт, сiдз кыдз пöдöм турун зороддэс пантасьлiсö тожö быд лун да быд бригадаын, а бригадиррес, Прокопий Егорович моз жö, несйывтöдз ошкисö бригадалiсь смех вылö керöм удж, кöдö нылö колiс мыччавны бур местö.

Медыджыт шумыс лэбтiсис сёрöнжык, правленнёас ни. Бригадиррез, кöр казялiсö, что тшыкöм турунсö зоотехник акттэзас оз сюрöт, сыкöт спориттöн, кутчисö сувтöтны виль акттэз. Эта увья быд бригада сьöртi нiя шогмисö кыкпöвсаöсь: зоотехниклöн аслас, бригадиррезлöн — тожö. Сёрöнжык ныын ковсис гижсьыны кык ладорсянь, кыдз вердчансö сетiсьлö, сiдз и сiйö примитiсьлö. И вежöртана, что этаись нем эз пет. Бригадиррез эз гижсьö зоотехник акттэзын, зоотехник откажитчис гижсьыны ны акттэзö.

Куимнан бригадир нырыштiсö Светлана вылö сiйöн, что кытшöм бы годö да кытшöм вердчан нiя эз заптывлö, сымдаыс, мед зоотехник эз примит, эшö некöр эз вöвлы. Висьтавны кö веськыта, дак быд годö сiдз и вöвлi. Вöвлi, видчисö, споритiсö öтамöд коласын, но быд берся бöртi пыр вовлiс сэтчöдз, что бригадиррес вермывлiсö. Зоотехниклö, мед вöлi мыйöн тöвйöтны подасö, нем эз кольччыв, кыдз примитны сiйö, мый вöвлi заптöм. Вежöртана жö, что тшыкöтöм турун местö сентябрь вылас некытшöм бригадир нем буржыксö керны оз вермы, сiдз кыдз не ытшкас, не колана погоддя сiя кадö эз ни вöвлы, страдаыс чулавлiс.

— Эта жö смех! Некор тай сэтшöмыс эз вöллы!

— Кутшöмö керлiм, сэтшöмöн и тöлйöтлiсö поданысö! — горöтлiсö öтамöд бöрсянь бригадиррез, но некин ны коласiсь эз казьмöт сы йылiсь, кытчöдз вайöтлiс сэтшöм вердчаннас подасö вердöмыс. Позис думайтны, что эта йылiсь некин да нем эз и тöд.

— Некöр эз вöвлы и сiя, мед сэтшöм вердчансяняс колхознöй подаыс эз кув, — баитiс паныт зоотехник. Но сылöн кыввес некинлö колананёж эз мöртчö, и эта вылын споритöмыс эз кус.

Сёр рытöн, öтöр ладорсянь гижсьöмöн, акттэсö пыртiсö председатель дынö. Но ачыс юралiсьыс правленнёас эз лöсяв, бригадиррез сы вылын и рознитчисö. Несьöкыт вежöртны, что эта вылын нылöн удж вöлi кресталöм. Зоотехниклöн жö пессьöмыс и сы бöрсянь эшö эз чулав.

Ойбыт сьöрна Светлана думайтiс, мый керны, но не öддьöн решительнöй мывкыда, сiя некытшöм решеннё сiдз и эз адззы.

Сiйöн жö думанас локтiс нывка ашынас и правленнёö. Не юрö, не киэзö удж некытшöм эз пыр. Зоотехник вежöртiс, что ас местын, кыдз специалист сiя прав, некытшöм вина ас саяс эз кыв. Но сы коста жö тöдiс — председатель сы дор некöр оз сувт. Одзланься споррез увья Светлана не öтпыр ни öвтыштлiс думанас быдöс вылö кинас. «Ась, кыдз эм. Плетьнас обухсö он лöсйы». Но этна думаэз дырни тöдвылас быд коста усьлiс чулалöм тöв, кöдасянь вывтыр кöдзавтöдз кутлiс полöм. Одззася думаэсö нывка тэрмасис вашöтны бöр, вежöртiс, что öвтыштны быдöс вылö киöн öнi сiя оз ни вермы: ылöснас кылiс — сэтшöм правоыс сылöн, кыдз специалистлöн, и мортлöн абу. А эм кö мый, дак öтiк долг — пессьыны истина понда.

Этна думаэз коста оссис ыбöс. Öтiк кокнас председатель сувтчыштiс порог вылö, здоровайтчытöг горöтчис:

— Пырал, ноко.

Юралiсьыс мыччисьöмсянь ни Светлана паймыштiс, гажтöма ловзисис. «А-а, мый лоас, сiя и ло», — öвтыштiс кинас, петiс пызан сайись.

Кабинетас зоотехник пуксис мыччалöм стул вылö, а председатель чапкис сы одзö бригадиррезлiсь акттэз.

— Кутшöм öшö спектак? Мыля акттэзас абу гижсьöмöсь?

Колiс бы висьтавны, что эз кö кин гижсьы акттэс вылö, дак медодз асьныс бригадиррез. Не нiя эд примитiсö зоотехникыссянь вердчансö, а зоотехникыс нысянь. Сiдзкö, и акттэсö сувтöтны колö сылö, а не бригадиррезлö. Сувтöтны жö торьяэсö нылöн некытшöм право эз вöв. Но эта йылiсь председатель и сытöг тöдiс бытшöма, и баитны сы йылiсь Светлана эз понды. Сiя одзлань ни вежöртiс, что этöн унасö он судзöт. Да и медколанаыс öнi вöлi нач не сыын, кин ладорсянь нiя сувтöтöмöсь, а сыын, мымда ныын истина.

— Сiйöн, что сiсь вердчаныс меным фермаас оз ков. Ме примита сiйö, мый позяс вердны. Вот. — Эстöн зоотехник пуктiс председатель пызан вылö ассис. Но ны дынö Яков Терентьевичлöн некытшöм интерес эз вöв. Дзар кертöг сiя вештiс нiйö бöр.

— Мыйöн нö сэк подасö тöлйöтны мöдан?

— А мыля тi сiйö менчим юалат, «мыйöн подасö тöвйöтны мöда?» Мыля не ассиныт медперво? Или думайтат, что сiя менам аслам? Öтнамлöн? Сiя жö колхознöй. И сiйö тöвйöтöм понда тiянсянь сымда жö...

— Менчим сiйö тiянтöг юаласö! — орöтiс председатель. — Тэ меным висьтал, мыйöн тöлйöтны мöдан? Кыдз специалис?

Горöтлöмöдззас кытчöдз и эз на лок. Но думайтны кö сы сьöртi, кыдз вöлiсö горöтчöмöсь медбöрья кыввес, сы дынöдз уна эз ни кольччы. То ли сысянь, то ли сiя несправедливостьсянь, кöда шучкöп кылiс председательыс басниын, зоотехниклöн неважынся полöмыс чулалiс.

— Но мый жö?.. Висьтала, колö дак. Сiйöн Яков Терентьевич, кöдö тi меным месяцöн одзжык сувтöтöм акттэс вылö кöсйит. Эдö на вунöтö, мый йылiсь мунö басниыс?

— Дак тэ мый этö нарошно керан?

Нем нарошно Светлана эз кер. Сiя керис сiйö, мый и колiс керны сылö, кыдз специалистлö, кöр сылö аслас должность да обязанность сьöртi вöлi сетöм право примитны подалö вердчан. И ло сы местын зоотехникнас кинкö мöдiк, эта мöдiклö ковсис бы керны сiдз жö. Этö Светлана вежöртiс. Сiдз бы, натьтö, и колiс горöтчыны, кöть эта йылiсь председатель и висьтавтöг тöдiс бытшöма. А горöтчис кö сiя зоотехниклö нарошно керöм йылiсь, дак дзир сы понда, мед аскадö ештыны вуджöтны ас йывсис баснисö мöдiк вылö. Эстöн самöй сiя случайыс, кöр баитсьö — пöрöтны винасö шог юр вылiсь здоровöй вылö. Этö Светлана тожö вежöртiс, сiйöн сiдз паныт и висьталiс:

— А тi асьныт, Яков Терентьевич?.. Тi разь не нарошно сiдз керит, что сувтöтöм акттэсö видзöтны правленнёсö сэк эд чукöртö? Не нарошно разь керит, кöр ревизионнöй комиссиясö вердчансö примитны эд лэдзö? Мый вылö надейтчит? Не сы вылö я, что öтнас зоотехникыс, мöймуся моз жö, бригадиррескöт нем оз кер. Кытшöм вердчан нiя тшöктасö, сэтшöмö сiя и примитас? А уж мыйись мый тöвнас подаыскöт лоас, дак бригадирреслiсь сы понда он юав, отвечайтнытö эта понда öтiк зоотехниклö ковсяс. Не сiдз, батi, шуат?

Сы сьöртi, кыдз председатель ловзисис ыш да пышшöтiс бокö синнэсö, позис казявны, — зоотехник инмис колана местаö. Но мед не мыччавны ассис недолытсö, вежсьыштöм голосöн юралiсь шыасис:

— Да мый понда öшö тэ отвечайтiн? Тэнö мый, судитiсö мыйкö понда? Или зарплатасит колисö? Эзö эд? Эзö, конешно. А что выговор öтiкö сетлi, дак сы улъя öддьöнсö, натьтö, эн умöльтчы. Сiя не чад, синнэз оз чадит, и не поньöт — сьылiлён оз нырышт. Ме аслам векын годдэсö сымда эг на ол, мымда выговорресö кыскалi. Но кыдз адззан, син одзат вот, не эг умöльтчы, не эг пöрисьмы. Нельки гöг öтпырись эз письтыл и грыжа некöдöрö эз петал, öнöдз лолъя ветлöта. Истиннöй спасибо сылö, кин этö наказаннёсö думайтöм. Ме бы сылö памятник султöтi.

Председатель видзчисис, что эта шутка вылö зоотехник вот-вот шынньöвтас, а сы бöрсянь, видзöтан кö, и баитчынытö быдöс йылiсь сыкöт кокнитжык лоас. «Эд вежöртö жö, натьтö, сiя, что оланас быднёж овлö. И мыйлö сэтöн колö сувтны öтамöдлö паныт, кöр баитчынытö отир моз и сытöг позьö». Но зоотехниклiсь паныта шынньöвтöмсö видзчисьны председатель сiдз и эз вермы.

— Эзö, да. Не эз судитö, не эз штрафуйтö. Сiйöн дзир, что некытшöм вина мöссэс чöвтчöмын да куканнес кулöмын менам эз вöв. А мый висьтассяс выговоррес йылiсь, кöдна тiян нёж «не оз чадитö, не оз нырыштö», — кыскавны нiйö, шедтытöммесö, ме тожö ог понды.

— Но этö тэ весь, Савельевна, сiдз баитан. Оз оллы сiдз, мед эта ыжда пода коласiсь сымда-мымдаыс эз кул. И нем, ме думайта, эта понда горзынытö. Гижсьы вот акттэзас, кöднö бригадиррес султöтiсö, да и уджал одзлань, кыдз уджалiн.

— Ась тiян нёж и сiдз, мед «сымда-мымдаыс эз кув». Но ме специалист. И тöда кö одзлань, мыйсянь сiя кулö, этакöт сэсся некöр ог миритчы. Тырмас ме совесть вылö чулалöм годсö. Не сы понда меным зарплатасö вештöны. — Он кö тэ, Савельевна, морт кылсö вежöрт, дак и тэнчит акттэтö утверждайтны ме тожö ог понды.

— Дак тi жö сы увья и тшöктат менö гижсьыны бригадиррес акттэзö, мед менчим не утвердитны. Кытшöм эшö сэтöн вежöртöм колö? Сэк ковсяс виль комиссия öктыны да мöдпöв вердчансö примитны.

— Тiянлö мый, этася и керны нем?

— Эд ыксö, пожалуйста. Ме висьталi — одö кö веритö менам акттэзлö, ковсяс виль комиссия öктыны. Сытöг ме вердчансö ог примит.

Зоотехниклöн бöрья кыввес вöлiсö висьталöмöсь сiдз, что надейтчыны мыйкö вылö председательлö эз позь. Эта бöрсянь Светланалö буржык бы вöлi петны. Но мунны юралiсь дынiсь сiя эз тэрмась. Кыкнанныс лöньсисö. Быдыс ны коласiсь думайтiс ас кежас. Председатель — сы йылiсь, мый бы эшö позис керны асныра зоотехниккöт, мед вермыны тшöктыны примитны вердчан. Зоотехник жö — кыдз пондöтны председателькöт одзланься баснисö кукань карта кончитöм йылiсь, кытöн гожумбыт сьöрна некин и чуньöн эз павкöт. И ась талуння басни коста надейтчыны бурыс вылö и эз туй, чöвны одзлань, кöр сибöтчö ар, и подасö вот-вот ковсяс йöртны, Светлана эз вермы.

Сiя кадö, кöр председатель, сё эшö сяткöтiс чуннезнас пызанпöв кузя, зоотехник, кыдз бытьтö эта вотöдз ны коласын нем эз вöв, юалiс:

— Кöр кукань картаыс бердö кутчисят? Чожа тöвны пондас, а уджыс сэтчин, не тпру, не но, некöдöрö оз мун.

— Оз и оз. Некор, сiдзкö. Локтас кад — кутчисям.

— Эта не ответ. Меным колö тöдны, кöрсянь сэтчин куканнесö позяс йöртны, кöть ачым ни адзза, что лымыс усьтöдз этаись нем оз пет.

— Адззан, дак и юасьны нем.

— Кытöн сэк думайтат подасö тöвйöтны?

— Сэтчин жö, кытöн и мöйму тöлйисö.

Гожумся страдаыс чулалiс. Быд бригадаись кык-куим мортöн уджавны ферма вылас адззыны позис. А месяц сьöрна эта бригадаыс ештiс бы не только вевттьыны, но и яслиэсö бы керис и джоджжесö вöвдiс. Этö зоотехник вежöртiс, эз вежöрт мöдiкö, что кукань картасö кончитöмись председательлöн откажитöмыс не мый мöдiк, кыдз аскоддьöм вештiсьöм: и сы понда, что зоотехник эз сет вашöтны Таисьяöс куканнез дынiсь, и сы понда, что бригадиррезлiсь сiсь вердчансö эз примит.

— Неужто, Яков Терентьевич, эта тiянöс немымда оз полöт? Не курöгпоз йылiсь эд мунö басниыс.

— Кутшöм öшö полöм? Не первöй гöд сэтчин подасö тöлйöтам.

— Сiя и эм — не первöй. Сэтчин жö талун не только взвоз вылас кайны, пытшкас пырнытö полöм петö. Быдöс жö столббес сiсьмöмöсь, сiйö и видзöт, кытшöмкö непогодаöн боквывтас. Думайтны кö сэтчин тöвйöтны, дак öнiсянь жö колö кутчисьны вочны. А подасö йöртöм кежö колö ойся сторожöс сувтöтны.

— Кыкö оз кол? — сералöмöн горöтчис паныт председатель. — Пороззэсö я мый я пийöтны мöдат, али куканьвöдитiссесö асьнысö — Ойся сторожсö султöтны тшöктат?

Этна кыввез вылö Светлана нельки ответсö эз адззы.

— И кутшöм öшö сiйö вочöм? Триццеть лет ни, кыдз ме тöда, вöлкартаыс сулалö и öшö триста сулалны пондас.

«Но мый жö?.. Сiдз дак, сiдз». Баитны эта бöрсянь кольччис нем йылiсь. Зоотехник босьтiс председательыс пызан вылiсь ассис акттэсö бöр, сiйöн сорöн петiс.